1. Библий пахампарӕдти фӕрци нӕ бон ци ӕй базонун?

ТАГЪД рӕстӕги Йегови адӕнмӕ ци ’нгъӕлмӕ кӕсуй, е нин ӕнӕзонгӕ нӕй. Библий пахампарӕдти фӕрци нӕ бон ӕй базонун, федӕни цӕхуӕн ӕхсидзгӕ хабӕрттӕ цӕудзӕй ӕма махмӕ куд хаудзӕнцӕ, уой. Зӕгъӕн, еу пахампаради финст ӕй, зӕнхӕбӕл тӕккӕ хъаурӕгиндӕр паддзахӕдтӕ куд архайдзӕнцӕ, е. Етӕ ӕнцӕ, кӕрӕдзей нихмӕ ка цӕунцӕ, еци паддзӕхтӕ – цӕгаттаг ӕма хонсайраг паддзӕхтӕ, ӕма сӕбӕл дзурд цӕуй Данели 11 сӕри. Еци пахампарадӕн ӕ фулдӕр хай исӕнхӕст ӕй. Уомӕ гӕсгӕ нӕ бон ӕй федарӕй ӕууӕндун, ка ма си байзадӕй, е дӕр ке исӕнхӕст уодзӕй.

2. Райдайӕни 3:15 ӕма Раргомади 11:7 ӕма 12:17 куд финст ӕй, уомӕ гӕсгӕ Данели пахампарадӕ ӕртасгӕй нӕ зӕрдӕбӕл ци гъӕуама дарӕн?

² Цӕмӕй Данели 11 сӕри финст пахампарадӕ балӕдӕрӕн, уой туххӕй гъӕуама нӕ гъудий дарӕн еу гъуддаг: еци пахампарадӕ амонуй, Хуцауи адӕнӕй беретӕ кӕми цардӕнцӕ кенӕ карз ӕфхуӕрд кӕми ӕййафтонцӕ, ӕрмӕстдӕр еци бӕстити хецауӕдтӕмӕ. Зӕнхӕбӕл цӕйбӕрцӕ адӕн цӕруй, уони хӕццӕ рабаргӕй Хуцауи лӕггадгӕнгутӕ берӕ нӕ ’нцӕ. Мадта уӕд еци хецауӕдтӕ Хуцауи адӕни сӕ разӕй цӕмӕн искӕнунцӕ? Уомӕн ӕма Сайтанӕн ӕма аци дуйнейӕн сӕ нисан ӕй, Йеговӕ ӕма Йесойӕн ка лӕггадӕ кӕнуй, уони фесафун. (Бакӕсӕ Райдайӕн 3:15 ӕма Раргомадӕ 11:7; 12:17.) Данел ци пахампарадӕ ниффинста, е гъӕуама Библий иннӕ пахампарӕдти хӕццӕ дӕр федауа. Мадта цӕмӕй Данели пахампарадӕ раст балӕдӕрӕн, уой туххӕй ӕй гъӕуама иннӕ пахампарӕдти хӕццӕ дӕр рабарӕн.

3. Аци, удта иннӕ статьяй ци базондзиан?

 ³ Мадта еци гъуддаг нӕ зӕрдӕбӕл даргӕй ӕркӕсӕн Данели 11:25–39 финст дзурдтӕмӕ. Мах базондзиан, 1870-аг анзӕй 1991-аг анзмӕ цӕгаттаг паддзах ӕма хонсайраг паддзах катӕ адтӕнцӕ, удта аци пахампарадӕ ӕндӕрхузи лӕдӕрун цӕмӕн райдӕдтан. Иннӕ статьяй ба ӕркӕсдзиан Данели 11:40–12:1 финст пахампарадӕмӕ ӕма базондзиан, 1991-аг анзӕй Армагеддони уӕнгӕ цӕхуӕн хабӕрттӕ гъӕуама цӕуа, уой. Аци дууӕ статьяй ӕртасгӕй ӕркӕсӕ схемӕмӕ «Кӕрӕдзей хӕццӕ ка тох кӕнуй, еци паддзӕхтӕ кӕрони рӕстӕг». Фал бал фиццаг ӕркӕсӕн, аци пахампаради ци дууӕ паддзахей кой цӕуй, уони куд ес базонӕн, уомӕ.

4. Цӕгаттаг ӕма хонсайраг паддзӕхти базонунмӕ нин цӕхуӕн ӕртӕ гъуддаги банхус кӕндзӕнцӕ?

⁴ Райдайӕни «цӕгаттаг паддзах» ӕма «хонсайраг паддзах» адтӕнцӕ, Израилӕй цӕгатӕрдӕмӕ ӕма хонсарӕрдӕмӕ ци паддзахӕдтӕ адтӕй, етӕ. Цӕмӕн ес уотӕ зӕгъӕн? Дӕ гъос ӕрдарай, изӕд Данелӕн ци загъта, уомӕ: «Ӕз ӕрцудтӕн, цӕмӕй дин раргом кӕнон, дӕ адӕнбӕл фӕстаг бӕнтти ци ’рцӕудзӕй, уой» (Дан. 10:14). Нӕ эри 33-аг анзи Фӕндзайӕймаг бони уӕнгӕ Хуцауи адӕн адтӕнцӕ Израили адӕн. Фал еци бонӕй фӕстӕмӕ ба Йеговӕ бӕлвурдӕй ӕвдиста, ӕ адӕнбӕл Йесо Киристей еузӕрдон ахуркӕнуйнӕгти ке нимайуй. Мадта Данели 11-аг сӕри финст пахампарадӕн ӕ фулдӕр хай Израили адӕнмӕ нӕ амонуй, фал Киристей фӕдбӕлдзӕугутӕмӕ (Гъуд. 2:1–4; Ром. 9:6–8; Гал. 6:15, 16). Уомӕй уӕлдай ма цӕгаттаг паддзах ӕма хонсайраг паддзах аллихузи рӕстӕгути амудтонцӕ аллихузи хецӕуттӕмӕ ӕма хецауӕдтӕмӕ. Фал еугурӕйдӕр цӕмӕйдӕр ӕмхузӕн ӕнцӕ. Фиццаг: етӕ адтӕнцӕ, Хуцауи адӕнӕй беретӕ кӕми цардӕнцӕ кенӕ карз ӕфхуӕрд кӕми ӕййафтонцӕ, еци бӕстити паддзӕхтӕ. Дуккаг: Хуцауи адӕнӕн куд адтӕнцӕ, уомӕй ӕвдистонцӕ, ӕцӕг Хуцау Йеговӕй се ’сӕфт ке уинунцӕ. Ӕма ӕртиккаг: еци дууӕ паддзахи кӕрӕдзей хӕццӕ тох кодтонцӕ, бартӕ ке къохти уодзӕнцӕ, уобӕл.

5. Нӕ эри 2-аг ӕносӕй 19-аг ӕноси кӕронмӕ цӕгаттаг паддзах кенӕ хонсайраг паддзах еске ӕнгъизтӕй исхонун? Ба ’й лӕдӕрун кӕнӕ.

⁵ Нӕ эри 2-аг ӕноси киристон ӕмбурди фулдӕр кӕнун райдӕдтонцӕ, мӕнгӕ дини ахурӕдтӕ ка парахат кодта ӕма Хуцауи Дзурди рӕстдзийнадӕ ка римахста, уӕхӕн мӕнгӕ киристӕнттӕ. Уомӕ гӕсгӕ 2-аг ӕносӕй 1870-аг анзмӕ Хуцауӕн зӕнхӕбӕл организаци н’ адтӕй. Мӕнгӕ киристӕнттӕ хӕмпӕлгӕрдӕги хузӕн исберӕ ’нцӕ (Матф. 13:36–43). Уой зонун ӕхсидзгӕ цӕмӕн ӕй? Уомӕн ӕма е уобӕл дзорӕг ӕй, ӕма, Библий цӕгаттаг ӕма хонсайраг паддзӕхти туххӕй ци финст ес, е, 2-аг ӕносӕй 1870-аг анзмӕ ци паддзӕхтӕ кенӕ хецауӕдтӕ адтӕй, уонӕмӕ нӕ хауй. Еци хецауӕдтӕн сӕ бон н’ адтӕй Хуцауи адӕни нихмӕ рацӕун, уомӕн ӕма еци рӕстӕги, Хуцауӕн еуӕмӕйагӕй ка лӕггадӕ кодта, уӕхӕн адӕн н’ адтӕй *. Фал 1870-аг анзи фӕсте ба цӕгаттаг паддзах ӕма хонсайраг паддзах гъӕуама нӕуӕгӕй фӕззиндтайуонцӕ. Кӕцӕй ӕй зонӕн?

6. Хуцауи адӕн ка адтӕнцӕ, е нӕуӕгӕй бӕрӕг кӕнун кӕд райдӕдта? Ба ’й лӕдӕрун кӕнӕ.

 ⁶ 1870-аг анзӕй Хуцауи адӕн бӕрӕг кӕнун райдӕдтонцӕ, куд организаци, уотӕ. Еци анз ӕнсувӕр Чарлз Тейз Рассел ӕма е ’мбӕлттӕ Библи ӕртасун райдӕдтонцӕ. Етӕ адтӕнцӕ, Библий ке туххӕй финст ӕй, еци «федеуӕг», ӕма цалинмӕ Хуцауи Паддзахадӕ нӕма ӕрфедар ӕй, уӕдмӕ гъӕуама «над ракӕдзос кодтайуонцӕ» (Мал. 3:1). Хуцауи адӕн ка адтӕнцӕ, е бабӕй нӕуӕгӕй бӕрӕг кӕнун райдӕдта! Цума уӕди рӕстӕги адтӕй, Хуцауи адӕни ка ӕфхуардта, уӕхӕн паддзӕхтӕ? Гъӕйдӕ ӕркӕсӕн.

7. 1917-аг анзи уӕнгӕ хонсайраг паддзах ка адтӕй?

⁷ 1870-аг анзи Великобритани иссӕй зӕнхӕбӕл тӕккӕ хъаурӕгиндӕр паддзахадӕ, удта уомӕй тухгиндӕр ӕфсад некӕмӕ адтӕй. Данели пахампаради еци паддзахадӕмӕ амудта, ӕртӕ сикъайебӕл ка фӕууӕлахез ӕй, еци «минкъий сикъа». Кӕбӕл фӕууӕлахез ӕй, еци сикъатӕ ба амудтонцӕ Франци, Испани ӕма Нидерландтӕмӕ (Дан. 7:7, 8). 1917-аг анзи уӕнгӕ хонсайраг паддзах Великобритани адтӕй. Еци рӕстӕгмӕ Америки Еугонд Штаттӕ иссӕнцӕ зӕнхӕбӕл тӕккӕ гъӕздугдӕр бӕстӕ ӕма Великобританий хӕццӕ еумӕ архайун райдӕдтонцӕ.

8. Фӕстаг бӕнтти рӕстӕг хонсайраг паддзах ка иссӕй?

⁸ Фиццаг дуйнеуон тугъди рӕстӕг Великобритани ӕма Еугонд Штаттӕ еумӕ тухтонцӕ ӕма уотемӕй иссӕнцӕ зӕнхӕбӕл тӕккӕ тухгиндӕр паддзахадӕ – Англо-Америкаг дуйнеуон паддзахадӕ. Данел куд дзурдта, уотӕ еци паддзахадӕ «хъӕбӕр устур ӕма хъаурӕгин ӕфсад» ӕрӕмбурд кодта (Дан. 11:25). Гъе уӕдӕй ардӕмӕ хонсайраг  паддзах ӕй Англо-Америкаг паддзахадӕ ӕма фӕстаг бӕнтти кӕронмӕ дӕр е уодзӕй *. Фал цума цӕгаттаг паддзах ба ка адтӕй?

9. Цӕгаттаг паддзах нӕуӕгӕй кӕд фӕззиндтӕй ӕма Данели 11:25 финст дзурдтӕ куд исӕнхӕст ӕнцӕ?

⁹ Цӕгаттаг паддзах нӕуӕгӕй фӕззиндтӕй 1871-аг анзи, Расселл ӕма е ’мбӕлттӕ Библи ӕртасунмӕ къуар ку искодтонцӕ, уомӕй еу анз фӕстӕдӕр. Еци анз Отто фон Бисмарк цалдӕр бӕсти байеу кодта, ӕма уотемӕй фӕззиндтӕй Германий паддзахадӕ. Ӕ фиццаг паддзах иссӕй прусийаг паддзах Вильгельм Фиццаг ӕма Бисмарки исӕвардта хецауади сӕргълӕууӕгӕй *. Фӕстӕдӕр Германи ӕ дӕлбарӕ бакодта Африки бӕститӕй еуӕй-еуети, удта Сабур океани ци территоритӕ адтӕй, уонӕй дӕр кӕцидӕрти, ӕма архайдта, цӕмӕй Великобританийӕй тухгиндӕр иссайдӕ. (Бакӕсӕ Данели 11:25.) Германий паддзахадӕмӕ фӕззиндтӕй устур ӕфсад. Ӕ денгизон флотӕй устурдӕр флот ба адтӕй ӕрмӕстдӕр Великобританийӕн. Гъема Фиццаг дуйнеуон тугъди рӕстӕг, тохунмӕ имӕ ци фӕрӕзтӕ адтӕй, уони е знӕгтӕбӕл бавзурста.

10. Данели 11:25б, 26а финст дзурдтӕ куд исӕнхӕст ӕнцӕ?

¹⁰ Данели пахампаради ма финст ӕй, Германий паддзахадӕ ӕма е ’фсӕдтӕ ци бауодзӕнцӕ, е дӕр. Цӕгаттаг паддзахадӕ, дан, «федар фӕллӕуун нӕ бафӕраздзӕй». Цума цӕмӕн? Данел финста: «Уомӕн ӕма ин етӕ ӕ нихмӕ фудвӕндтӕ кӕндзӕнцӕ. Ӕма ин ӕ хуӕздӕр хуӕруйнӕгтӕй ка хуӕруй, етӕ ’й бабун кӕндзӕнцӕ» (Данел 11:25б, 26а). Данели рӕстӕги «паддзахи хуӕруйнӕгтӕй» хуардтонцӕ, паддзахи лӕггадгӕнгутӕй устур бунӕттӕ ка ахӕста, етӕ (Дан. 1:5). Мадта уӕд аци пахампарадӕ кӕмӕ амонуй? Германий паддзахади устур бунӕттӕ ка ахӕста, уонӕмӕ, уой хӕццӕ ба ма паддзах ӕ зӕрдӕ кӕбӕл дардта, еци генералтӕмӕ ӕма ӕфсӕддон хецӕуттӕмӕ. Ете уотӕ бакодтонцӕ, цӕмӕй паддзахи хецаудзийнадӕн кӕрон ӕрцудайдӕ ӕма ӕ бунат ӕндӕр хецау ниййахӕстайдӕ *. Данели пахампаради ма финст ӕй, цӕгаттаг паддзахи ӕма хонсайраг паддзахи астӕу ци тугъд цудӕй, е цӕбӕл рахецӕн ӕй, е дӕр. Цӕгаттаг паддзахи туххӕй си финст ӕй: «Е ’фсад ба ин дон фӕлласдзӕй, ӕма беретӕ фӕммард уодзӕнцӕ» (Дан. 11:26б). Ӕма ӕцӕгӕйдӕр Фиццаг дуйнеуон тугъди Германий ӕфсад бабун ӕй, раст ӕй цума дон фӕлласта, уотӕ. Еци тугъди цӕйбӕрцӕ адӕн фӕммардӕй, уойбӕрцӕ, уой размӕ еунӕг тугъди дӕр некӕд фӕммардӕй.

11. Цӕгаттаг паддзах ӕма хонсайраг паддзах куд архайдтонцӕ?

¹¹ Данели 11:27, 28 финст ӕй, Фиццаг дуйнеуон тугъди размӕ ци хабӕрттӕ ӕрцудӕй, уой туххӕй: цӕгаттаг паддзах ӕма хонсайраг паддзах еу «фингӕбӕл бадгӕй мӕнгӕттӕ дзордзӕнцӕ», удта цӕгаттаг паддзах «устур фӕллӕнттӕ» ӕрӕмбурд кӕндзӕй. Аци дзурдтӕ дӕр бабӕй исӕнхӕст ӕнцӕ. Германи ӕма Великобритани кӕрӕдземӕн загътонцӕ, сабур цард кӕнун сӕ ке фӕндуй, фал 1914-аг анзи тугъд ку райдӕдта, уӕд рабӕрӕг ӕй, мӕнгӕттӕ ке дзурдтонцӕ. Уомӕй уӕлдай ма 1914-аг анзмӕ Германи иссӕй хъӕбӕр гъӕздуг бӕстӕ. Уомӕй  гъӕздугдӕр адтӕнцӕ ӕрмӕстдӕр Америки Еугонд Штаттӕ. Уой фӕсте исӕнхӕст ӕй Данели 11:29 стих ӕма 30 стихи фиццаг хай: Германи истухта хонсайраг паддзахи хӕццӕ, фал ӕ нифс басастӕй, уомӕн ӕма ибӕл хонсайраг паддзах фӕууӕлахез ӕй.

12. Цӕгаттаг паддзах ӕма хонсайраг паддзах фиццаг дуйнеуон тугъди рӕстӕг куд архайдтонцӕ?

¹² 1914-аг анзӕй фӕстӕмӕ еци дууӕ паддзахи кӕрӕдзей нихмӕ дӕр ӕма Хуцауи адӕни нихмӕ дӕр карзӕй-карздӕр цудӕнцӕ. Зӕгъӕн, Фиццаг дуйнеуон тугъди рӕстӕг, Хуцауи лӕггадгӕнгутӕй ӕ къохмӕ тохӕндзаума ка нӕ иста, уони Германий хецауадӕ дӕр ӕфхуардта ӕма Великобританий хецауадӕ дӕр. Еугонд Штатти хецауадӕ ба ахӕстдони бакодта, игъосун кӕнуни гъуддагӕн разамунд ка лӕвардта, еци ӕнсувӕрти. Ӕма уомӕй исӕнхӕст ӕй, Раргомади 11:7–10 финст ка ӕй, еци пахампарадӕ.

13. 1933-аг анзи фӕсте ӕма Дуккаг дуйнеуон тугъди рӕстӕг цӕгаттаг паддзах куд архайдта?

¹³ Удта 1933-аг анзи фӕсте, уӕлдайдӕр ба Дуккаг дуйнеуон тугъди рӕстӕг цӕгаттаг паддзах Хуцауи адӕни хъӕбӕр ӕфхуардта. Бартӕ нацистити къохти ку бафтудӕнцӕ, уӕд Гитлер ӕма, ӕ фарс ка адтӕй, етӕ Хуцауи адӕни гъуддаг нихгӕдтонцӕ. Цӕгаттаг паддзах Йегови лӕггадгӕнгутӕй 1 500 адӕймагей бӕрцӕ рамардта. Мингӕйттӕ ба си ӕрвист ӕрцудӕнцӕ концлагертӕмӕ. Данели пахампарадӕ бабӕй уомӕй дӕр исӕнхӕст ӕй. Цӕгаттаг паддзах игъосун кӕнуни гъуддаг нихгӕдта, ӕма уотемӕй «ковӕндонӕ ницъцъумур кодта» ӕма, «алли бон дӕр ке... [хастонцӕ], еци кувуйнагӕн кӕрон» искодта (Дан. 11:30б, 31а). Гитлер ма ӕртхъерӕн кодта, Германий Хуцауи адӕнӕй еу дӕр ке нӕбал ниууадздзӕй.

14. Дуккаг дуйнеуон тугъди фӕсте цӕгаттаг паддзах ка иссӕй? Ба ’й лӕдӕрун кӕнӕ.

¹⁴ Дуккаг дуйнеуон тугъд ку фӕцӕй, уӕд Германий дӕлбарӕ ка адтӕй, еци устур зӕнхитӕ иссӕнцӕ Советон Цӕдеси дӕлбарӕ. Нацистон Германий хузӕн Советон Цӕдес ӕма ӕ фарс ка адтӕй, еци бӕститӕ дӕр карзӕй ӕфхуардтонцӕ, паддзахӕй уӕлдӕр Хуцауи ка ӕвардта, уони. Уотемӕй еци бӕститӕ иссӕнцӕ цӕгаттаг паддзах.

15. Дуккаг дуйнеуон тугъд ку фӕцӕй, уӕд цӕгаттаг паддзах цитӕ кодта?

¹⁵ Дуккаг дуйнеуон тугъди фӕсте берӕ нӕ рацудӕй, уотемӕй нӕуӕг цӕгаттаг паддзах,– Советон Цӕдес ӕма ӕ фарс ка адтӕй, етӕ,– Хуцауи адӕни нихмӕ цӕун райдӕдтонцӕ. Раргомади 12:15–17 ци «цӕугӕдони» туххӕй финст ес, е амонуй, Хуцауи адӕн ӕфхуӕрд ке ӕййафтонцӕ, уомӕ. Цӕгаттаг паддзах игъосун кӕнуни гъуддаг нихгӕдта, ӕма Йегови адӕнӕй мингӕйтти Сибирмӕ рарвиста. Мадта кӕдӕй фӕстаг бӕнттӕ райдӕдтонцӕ, уӕдӕй нурмӕ цӕгаттаг паддзах Хуцауи адӕни ӕфхуӕруй, фал ин сӕ бауорамун ба некӕд бантӕстӕй *.

16. Данели 11:37–39 финст пахампарадӕ Советон Цӕдесбӕл куд исӕнхӕст ӕй?

¹⁶ Бакӕсӕ Данели 11:37–39. Аци пахампаради финст ӕй, цӕгаттаг паддзах «ӕ фидтӕлти Хуцауи [ке] нецӕмӕ дардзӕй». Цума аци дзурдтӕ куд исӕнхӕст ӕнцӕ? Советон Цӕдеси фӕндадтӕй ӕгас динтӕ дӕр фесафун, ӕма архайгӕ дӕр уотӕ кодта, цӕмӕй адӕни цӕсти динтӕн кадӕ мабал адтайдӕ. Зӕгъӕн, 1918-аг анзи Советон хецауадӕ унаффӕ рахаста, цӕмӕй скъолати сувӕллӕнтти  ахур кодтайуонцӕ, Хуцау ке нӕййес, уобӕл. «Федар мӕсгути хуцауи» ба цӕгаттаг паддзах куд кадгин кодта? Советон Цӕдес дуйне ’хца харз кодта, цӕмӕй е ’фсад фӕуустурдӕр кодтайдӕ ӕма хъӕбӕр берӕ ядерон тохӕндзаума искодтайдӕ. Цӕгаттаг паддзах дӕр ӕма хонсайраг паддзах дӕр уойбӕрцӕ тохӕндзаума ӕрӕмбурд кодтонцӕ, ӕма син миллиардгай адӕни фесафуни фагӕ дӕр ӕй!

17. «Бӕстӕ ка исафуй, еци илгъагдзийнадӕ» ци ӕй?

¹⁷ Кӕд цӕгаттаг паддзах ӕма хонсайраг паддзах кӕрӕдземӕ знаги цӕстӕй кастӕнцӕ, уӕддӕр еу гъуддаги еумӕ архайдтонцӕ – етӕ исӕвардтонцӕ, «бӕстӕ ка исафуй, еци илгъагдзийнадӕ» (Дан. 11:31). Е адтӕй Еугонд Нацити Организаци.

18. Еугонд Нацити Организаци «илгъагдзийнадӕ» цӕмӕн хуннуй?

¹⁸ Еугонд Нацити Организаци «илгъагдзийнадӕ» хуннуй, уомӕн ӕма зӕрдӕ ӕвӕруй, ӕгас зӕнхӕбӕл дӕр сабур цард ке искӕндзӕй. Еци гъуддаг ба ӕрмӕстдӕр Хуцауи Паддзахадӕ искӕндзӕй. Пахампаради ма финст ӕй, илгъагдзийнадӕ «бӕстӕ... исафуй», зӕгъгӕ. Е ба амонуй, Еугонд Нацити Организаци ӕгас мӕнгӕ динтӕ дӕр ке фесафдзӕй, уомӕ. (Кӕсӕ схемӕ «Кӕрӕдзей хӕццӕ ка тох кӕнуй, еци паддзӕхтӕ кӕрони рӕстӕг».)

19, 20. а) Ци хабӕрттӕмӕ ӕркастан, уони зонун цӕмӕн гъӕуй? б) Иннӕ статьяй цӕхуӕн фарстабӕл базондзиан дзуапп?

¹⁹ Аци хабӕрттӕ нӕ зонун цӕмӕн гъӕуй? Уомӕн ӕма уонӕй бӕрӕг ӕй, Данели пахампарадӕ цӕгаттаг ӕма хонсайраг паддзахи туххӕй 1970-аг анзӕй 1991-аг анзмӕ ке ӕнхӕст кодта. Уомӕ гӕсгӕ нӕ бон ӕй федарӕй ӕууӕндун, аци пахампарадӕн ӕ иннӕ хай дӕр ке исӕнхӕст уодзӕй.

²⁰ 1991-аг анзи Советон Цӕдес фехалдӕй. Мадта уӕд абони цӕгаттаг паддзах ка ӕй? Уой ба базондзиан иннӕ статьяй.