1. Йесо уӕларвон хӕзнати туххӕй ци загъта?

ТӔККӔ хъазардӕр хӕзнатӕ цӕстӕй фӕууинӕн нӕййес. Йесо ӕ зундгонд радзубандий уӕларвон хӕзнати кой кодта. Ӕма еци хӕзнатӕ зӕнхон хӕзнати хӕццӕ рабарӕн дӕр нӕййес. Йесо загъта: «Дӕ хӕзна кӕми уа, уоми уодзӕй дӕ зӕрдӕ дӕр» (Матф. 6:19–21). Естӕмӕн хъӕбӕр ку фӕййаргъ кӕнӕн, уӕд нӕ нӕ зӕрдӕ уомӕ фӕрразӕнгард кӕнуй, цӕмӕй е нӕ къохи бафтуйа. «Уӕларвон хӕзнатӕ» ку ӕмбурд кӕнӕн, уӕд нин Хуцауи рази уодзӕй хуарз ном. Йесо балӕдӕрун кодта, уӕхӕн хӕзнатӕн нӕдӕр фесафӕн, нӕдӕр радавӕн ке ес.

2. а) 2 Коринфӕгтӕмӕ 4:17, 18 нӕ Павел цӕмӕ разӕнгард кӕнуй? б) Аци статьяй дзурд цӕбӕл цӕудзӕй?

² Апостол Павел разӕнгард кодта, цӕмӕй кӕсӕн, «цӕстӕй ци нӕ уинӕн, уомӕ». (Бакӕсӕ 2 Коринфӕгтӕмӕ 4:17, 18.) Цӕстӕй ци нӕ уинӕн, уонӕмӕ хаунцӕ, нӕуӕг дуйней ци арфӕдзийнӕдтӕй исхайгин уодзиан, етӕ дӕр. Аци статьяй дзурд цӕудзӕй, абони дӕр хайгин кӕмӕй ан, цуппар уӕхӕн хӕзнай туххӕй. Еци хӕзнатӕ ӕнцӕ: Хуцауи хӕццӕ нин ци лимӕндзийнадӕ ес, е, нӕ бон Хуцаумӕ ковун ке ӕй, е, сугъдӕг хъаури ӕнхус, удта нин нӕ лӕггади Йеговӕ, Киристе ӕма изӕдтӕ ке ӕнхус кӕнунцӕ, е. Уомӕй уӕлдай ма ӕркӕсдзиан, еци хӕзнатӕн ке аргъ кӕнӕн, уой нӕ бон ӕвдесун куд ӕй, уомӕ.

3. Цӕстӕй фӕууинӕн ке нӕййес, еци хӕзнатӕй тӕккӕ хъазардӕр кӕци ӕй ӕма си цӕй фӕрци исхайгин ан?

³ Цӕстӕй ке нӕ уинӕн, еци хӕзнатӕй тӕккӕ хъазардӕр ӕй, Йегови хӕццӕ нин ци лимӕндзийнадӕ ес, е (Пс. 25:14). Цума уомӕн куд ес гӕнӕн, цӕмӕй тӕрегъӕдгун адӕймаг  сугъдӕг Хуцауӕн е ’мбал уа? Йесо Киристей нивонди фӕрци. Библий финст ӕй: «Е дуйней тӕрегъӕдтӕ фӕххӕсдзӕй» (Иоан. 1:29). Киристе ӕ цард нивонди ку нӕма равардта, уӕд дӕр ӕй Йеговӕ зудта, ӕ Фурт мӕлӕти уӕнгӕ дӕр еузӕрдонӕй ке байзайдзӕй ӕма ӕ бон адӕни фӕййервӕзун кӕнун ке исуодзӕй. Уомӕ гӕсгӕ ӕ бон адтӕй, Киристей мӕлӕти размӕ ка цардӕй, еци адӕнӕй дӕр кедӕрти е ’мбӕлттӕбӕл нимайун (Ром. 3:25).

4. Киристей размӕ ка цардӕй, еци адӕнӕй Хуцауи ӕмбӕлттӕ ка иссӕй?

⁴ Киристей размӕ ка цардӕй, еци адӕнӕй Хуцауи ӕмбал ка иссӕй, уонӕй сӕ еу адтӕй Авраам. Авраам дессаги ӕууӕндундзийнади хецау адтӕй. Ӕ мӕлӕтӕй 1 000 анземӕй фулдӕр ку рацудӕй, уӕд дӕр ӕй Йеговӕ нӕ иронх кодта ӕма ’й худта е «’мбал» (Ис. 41:8). Мадта мӕлӕтӕн дӕр ӕ бон нӕй Йегови е ’мбӕлттӕй рахецӕн кӕнун. Авраам дӕр си иронх нӕй (Лук. 20:37, 38). Иов дӕр Йегови ӕмбал адтӕй. Еухатт уӕлӕрвти изӕдтӕ ку ӕрӕмбурд ӕнцӕ, уӕд Йеговӕ Иови туххӕй загъта, е, дан, ӕй «ӕнӕфау ӕма рӕстзӕрдӕ адӕймаг, тӕрсуй Хуцауӕй ӕма ӕхе лӕгъуздзийнадӕй хезуй» (Иов 1:6–8). Данели туххӕй ба Йеговӕ ци гъуди кодта? Данел ин 80 анзей бӕрцӕ еузӕрдонӕй фӕллӕггадӕ кодта, мӕнгӕ хуцӕуттӕн кӕми кувтонцӕ, уӕхӕн бӕсти. Каргун Данелӕн изӕдтӕ ӕртӕ хатти загътонцӕ, «Хуцауӕн хъӕбӕр хъазар дӕ», зӕгъгӕ (Дан. 9:23; 10:11, 19). Мах ӕй зонӕн, Йеговӕ хъӕбӕр ке ӕнгъӕлмӕ кӕсуй, ӕ хъазар ӕмбӕлтти кӕд райгас кӕндзӕй, еци бонмӕ (Иов 14:15).

5. Цӕмӕй адӕймаг Йегови ӕмбал исуа, уой туххӕй ӕй ци кӕнун гъӕуй?

⁵ Абони ба ӕнӕнхӕст адӕнӕй Йегови ӕмбӕлттӕ ка иссӕй, етӕ цӕйбӕрцӕ ’нцӕ? Ӕнцӕ цалдӕр милиуани. Уотӕ зӕгъун нӕ бон ӕй, уомӕн ӕма ӕгас зӕнхӕбӕл дӕр берӕ нӕлгоймӕгтӕ, силгоймӕгтӕ ӕма сувӕллӕнттӕ архайунцӕ, цӕмӕй сӕ цардӕй Хуцауи зӕрдӕ рохс кӕнонцӕ. «Рӕстзӕрдӕ ка ӕй», етӕ Йегови ӕмбӕлттӕ ’нцӕ (Ӕмб. 3:32). Уомӕн гӕнӕн ес, Киристей нивондбӕл ке ӕууӕндунцӕ, уой фӕрци. Еци нивонди фӕрци ма адӕнӕн сӕ бон ӕй сӕхе Хуцауӕн иснивонд кӕнун ӕма донаргъуд райсун. Адӕймаг еци ӕхсидзгӕ къахдзӕф ку искӕнуй, уӕд, Дун-дуйней тӕккӕ устурдӕр кадӕ кӕмӕн ес, уомӕн ӕ хӕстӕг ӕмбӕлттӕмӕ ӕрбайеу уй!

6. Нӕ бон куд ӕй бавдесун, Хуцауи хӕццӕ нин ци лимӕндзийнадӕ ес, уомӕн аргъ ке кӕнӕн?

⁶ Нӕ бон куд ӕй бавдесун, Хуцауи хӕццӕ нин ци лимӕндзийнадӕ ес, уомӕн аргъ ке кӕнӕн? Авраам ӕма Иов Хуцауӕн сӕдӕ анземӕй фулдӕр еузӕрдонӕй фӕллӕггадӕ кодтонцӕ. Ӕма ин мах дӕр гъӕуама гъе уотӕ еузӕрдонӕй лӕггадӕ кӕнӕн, аци дуйне цӕйбӕрцӕфӕнди ма рахӕсса, уӕддӕр. Данелӕн Хуцауи хӕццӕ ци лимӕндзийнадӕ адтӕй, е ин ӕ цардӕй дӕр хъазардӕр адтӕй (Дан. 6:7, 10, 16, 22). Йегови ӕнхуси фӕрци цийфӕнди фӕлварӕнти дӕр бафӕраздзиан ӕма нин ӕ хӕццӕ ци лимӕндзийнадӕ ес, уой некӕд фесафдзиан (Фил. 4:13).

7. а) Ӕмбесӕндти 15:8 куд финст ӕй, уомӕ гӕсгӕ нин Йеговӕ нӕ кувдтитӕмӕ цӕхуӕн цӕстӕй кӕсуй? б) Йеговӕ нин нӕ кувдтитӕбӕл дзуапп куд раттуй?

⁷ Цӕстӕй фӕууинӕн ке нӕййес, еци хӕзнатӕй ма еу ӕй, нӕ бон Хуцаумӕ ковун ке ӕй, е. Хуарз ӕмбӕлттӕ фӕууарзунцӕ кӕрӕдземӕн сӕ хабӕрттӕ ракӕнун ӕма сӕ зӕрди ци ес, уой радзорун. Йегови хӕццӕ дӕр нӕ бон ӕй дзорун Библий фӕрци. Ӕ Дзурди нин раргом кодта, ӕ гъудитӕ ӕма, ӕ зӕрди ци ес, уой. Мах ба ӕ хӕццӕ фӕдздзорӕн, ковгӕ имӕ ку фӕккӕнӕн, уӕд. Нӕ бон ин ӕй нӕ зӕрди арф сагъӕстӕ дзорун, сауӕнгӕ ма иннетӕн ке нӕ радзурдтайанӕ, уой дӕр. Йеговӕн ӕхцӕуӕн фӕууй нӕ кувдтитӕмӕ  игъосун. (Бакӕсӕ Ӕмбесӕндтӕ 15:8.) Йеговӕ не ’Мбал ӕй ӕма нӕ берӕ уарзуй, удта нин нӕ кувдтитӕмӕ айдагъ игъосгӕ нӕ фӕккӕнуй, фал нин сӕбӕл дзуапп дӕр раттуй. Еуӕй-еухатт нин дзуапп еци фӕдӕй раттуй. Иннӕ хӕттити ба нӕ фулдӕр рӕстӕг фӕгъгъӕуй ӕнгъӕлмӕ кӕсун. Фал ӕй фӕззонӕн, дзуапп нин ке ратдзӕй, ӕ афонӕ ку уа, уӕд, удта хуӕздӕр куд ӕй, уотӕ. Хатгай ба нин, мах ци дзуапмӕ ӕнгъӕлмӕ кастан, уӕхӕн дзуапп нӕ раттуй. Зӕгъӕн, цӕхуӕндӕр фӕлварӕнӕн кӕрон искӕнуни бӕсти нин, гӕнӕн ес, ӕма зунд, удта хъауритӕ ратта, цӕмӕй бафӕразӕн (1 Кор. 10:13).

8. Нӕ бон Хуцаумӕ ковун ке ӕй, еци кадӕн аргъ ке кӕнӕн, уой нӕ бон куд ӕй бавдесун?

⁸ Нӕ бон ковун ке ӕй, е ӕй хъазар лӕвар. Ӕма еци лӕварӕн ке аргъ кӕнӕн, е цӕмӕй бӕрӕг уодзӕй? Зӕгъӕн, Библи нӕ разӕнгард кӕнуй, цӕмӕй имӕ «алкӕддӕр» ковӕн (1 Фес. 5:17). Йеговӕ нӕ тухӕй нӕ ковун кӕнуй. Е нин нӕ сӕребарӕдзийнадӕн аргъ кӕнуй ӕма нӕ разӕнгард кӕнуй, цӕмӕй имӕ алкӕддӕр ковӕн (Ром. 12:12). Ӕма имӕ алли бон дӕр, бони дӕргъи ба цалдӕр хатти дӕр ку ковӕн, уӕд ӕй ӕвдесдзиан, еци кадӕн аргъ ке кӕнӕн. Уомӕй уӕлдай ма Йеговӕн арфӕ ӕма кадӕ кӕнун дӕр гъӕуама ма иронх кӕнӕн (Пс. 145:2, 3).

9. Еу ӕнсувӕр ци гъуди кӕнуй, ӕ бон Хуцаумӕ ковун ке ӕй, уой туххӕй? Ду ба ци гъуди кӕнис?

⁹ Йеговӕн куд фулдӕр рӕстӕг лӕггадӕ кӕнӕн, ӕма нин нӕ кувдтитӕбӕл дзуапп куд дӕттуй, уой куд арӕхдӕр уинӕн, уотӕ си никки хъӕбӕрдӕр боз фӕууӕн, нӕ бон имӕ ковун ке ӕй, уой туххӕй. Крис ӕнхӕстрӕстӕг лӕггадӕ кӕнуй 47 анзей дӕргъи, ӕма зӕгъуй: «Мӕ зӕрдӕмӕ хъӕбӕр цӕуй сӕумӕцъӕхӕй, ӕртӕх ма хори тунтӕмӕ ку ферттевуй, уӕд раистун ӕма еци сабури Йеговӕмӕ раковун. Ӕз ин райарфӕ кӕнун е ’гас лӕвӕртти туххӕй, удта имӕ мӕ бон ковун ке ӕй, уой туххӕй дӕр. Изӕрӕй дӕр имӕ раковун ӕма мӕ зӕрдӕ фарнӕй байдзаг уй, ӕма уотемӕй хуссунмӕ бацӕун».

10. Хуцауи сугъдӕг хъаурӕ хӕзнабӕл цӕмӕн гъӕуама нимайӕн?

¹⁰ Хуцауи сугъдӕг хъаурӕ дӕр ӕй, цӕстӕй фӕууинӕн ке нӕййес, уӕхӕн хӕзна. Йесо  дӕр нӕ разӕнгард кодта, цӕмӕй Хуцауӕй сугъдӕг хъаурӕ корӕн (Лук. 11:9, 13). Йеговӕ нин ӕ сугъдӕг хъаури фӕрци, сауӕнгӕ «адӕймагмӕ ка нӕййес, уӕхӕн хъаурӕ» дӕр раттуй (2 Кор. 4:7; Гъуд. 1:8). Хуцау нин ӕ сугъдӕг хъаурӕй ку ӕнхус кӕна, уӕд цийфӕнди фӕлварӕнти дӕр бафӕраздзиан.

11. Сугъдӕг хъаурӕ нин куд ӕнхус кӕнуй?

¹¹ Сугъдӕг хъаури фӕрци нӕ бон ӕй, Хуцауи гъуддаги нин ци ихӕстӕ ес, уони ӕнхӕст кӕнун. Удта Йегови бон ӕй ӕ сугъдӕг хъаури фӕрци уотӕ бакӕнун, цӕмӕй ӕной дӕр хуарз кӕмӕ арӕхстан, еци гъуддӕгтӕмӕ никки хуӕздӕр исарӕхсӕн. Мадта нин нӕ лӕггади цидӕр хуарз ку фентӕсуй, уӕд ӕй фӕллӕдӕрӕн, е Хуцауи сугъдӕг хъаури фӕрци ке ӕй ӕма нӕхемӕ нӕ ниууӕн.

12. Псаломи 139:23, 24 куд финст ӕй, уомӕ гӕсгӕ нӕ бон цӕй туххӕй ӕй ковун?

¹² Хуцауи сугъдӕг хъаурӕн ке аргъ кӕнӕн, уой нӕ бон куд ӕй бавдесун? Зӕгъӕн, нӕ бон ӕй Йеговӕмӕ ковун, цӕмӕй нин ӕ сугъдӕг хъаури фӕрци банхус кӕна, ци лӕгъуз гъудитӕ ӕма фӕндтӕ нӕмӕ ес, уони исбӕрӕг кӕнун. (Бакӕсӕ Псалом 139:23, 24.) Ӕма кӕд ести рӕдуд зундбӕл хуӕст ан, уӕд нин ӕй ӕ сугъдӕг хъаури фӕрци фӕууинун кӕндзӕй. Ӕма уӕд гъӕуама Йеговӕмӕ ковӕн, цӕмӕй нин ӕ сугъдӕг хъаури фӕрци нӕ лӕгъуз сагъӕсти ӕма фӕндти хӕццӕ тох кӕнунмӕ ӕнхус кӕна. Уотемӕй бавдесдзиан, Йегови сугъдӕг хъаурӕй ке туххӕй фенӕхай уодзиан, уӕхӕн гъуддӕгтӕй нӕ нӕхе еуварс дарун ке фӕндуй (Еф. 4:30).

13. Нӕ бон ци ӕй кӕнун, цӕмӕй сугъдӕг хъаурӕн никки фулдӕр аргъ кӕнӕн?

¹³ Нӕ рӕстӕги сугъдӕг хъаури фӕрци цӕйбӕрцӕ цидӕртӕ бантӕстӕй, уобӕл ку сагъӕс кӕнӕн, уӕд ин никки фулдӕр аргъ кӕндзиан. Уӕлӕрвтӕмӕ иссӕуни размӕ Йесо ӕ ахуркӕнуйнӕгтӕн загъта: «Хуцауи сугъдӕг хъаурӕ [уӕбӕл] ку ’рцӕуа, уӕд исхайгин уодзиайтӕ хъаурӕй, ӕма мин уодзиайтӕ ӕвдесӕнтӕ» (Гъуд. 1:8). Еци дзурдтӕ куд ӕнхӕст кӕнунцӕ, уой нӕхе цӕститӕй уинӕн. Хуцауи сугъдӕг хъаури фӕрци Йегови лӕггадгӕнгутӕ ӕгас зӕнхӕбӕл дӕр иссӕнцӕ аст милиуан ӕма ӕрдӕгӕй фулдӕр. Уомӕй уӕлдай ма ӕгас зӕнхӕбӕл дӕр нӕ хуӕртӕ ӕма ӕнсувӕрти астӕу ес фарнӕ ӕма еудзийнадӕ.  Хуцауи сугъдӕг хъаурӕ нин ӕнхус кӕнуй нӕ уодигъӕди рӕсугъд менеугутӕ ирӕзун кӕнун. Зӕгъӕн, уарзондзийнадӕ, цийнӕ, фарнӕ, фӕразондзийнадӕ, хӕларзӕрдӕдзийнадӕ, хуарздзийнадӕ, ӕууӕндундзийнадӕ, фӕлмӕн уодигъӕдӕ ӕма хебӕлхуӕцундзийнадӕ. Аци менеугутӕ еугурӕйдӕр ӕнцӕ, Хуцауи сугъдӕг хъаурӕ ке дӕттуй, еци «рӕзӕ» (Гал. 5:22, 23). Мадта сугъдӕг хъаурӕ ӕцӕгӕйдӕр дессаги лӕвар ӕй.

14. Нӕ лӕггади нин ка фенхус кӕнуй?

¹⁴ Ес ма нин еу ӕнӕуингӕ хӕзна дӕр: нӕ бон ӕй Йегови ӕма ӕ организаций уӕларвон хаййи хӕццӕ ӕмгуст кӕнун (2 Кор. 6:1). Сӕ хӕццӕ ӕмгуст кӕнӕн ахуркӕнуйнӕгтӕ цӕттӕ кӕнуни гъуддаги ку фӕййархайӕн, уӕд. Павел ӕхецӕй, удта иннӕ игъосунгӕнгутӕй дӕр загъта: «Мах ан Хуцауи ӕмкосгутӕ» (1 Кор. 3:9). Еци гъуддӕгти ку фӕййархайӕн, уӕд Йесой хӕццӕ дӕр ӕмгуст фӕккӕнӕн. Йесо ӕ фӕдбӕлдзӕугутӕн «ӕгас адӕнихӕттитӕй дӕр» ахуркӕнуйнӕгтӕ цӕттӕ кӕнун ку бафӕдзахста, уӕд ма син загъта: «Ӕз... уодзӕн уӕ хӕццӕ» (Матф. 28:19, 20). Изӕдти туххӕй ба ци ес зӕгъӕн? «Ӕносон хуарз хабар... зӕнхӕбӕл цӕргутӕн» ку фегъосун кӕнӕн, уӕд нин етӕ ба разамунд фӕддӕттунцӕ, ӕма е дӕр ӕй Хуцауи лӕвар (Рарг. 14:6).

15. Игъосун кӕнуни гъуддаги Йеговӕ куд архайуй, уомӕн цӕветтон ӕрхӕссӕ.

¹⁵ Уӕхӕн ӕнхуси фӕрци нин ци ӕнтӕсуй? Хуцауи Паддзахади туххӕй ку фегъосун кӕнӕн, уӕд еуей-еу нӕмгутӕ ниххаунцӕ хуарз зӕрдити, исирӕзунцӕ ӕма тиллӕг раттунцӕ (Матф. 13:18, 23). Ка сӕ исирӕзун кӕнуй? Йесо загъта, еунӕг адӕймаг дӕр ӕ фӕдбӕлдзӕуӕг ке не ’суодзӕй, «Фидӕ ’й ку не ’рбакӕна, уӕд» (Иоан. 6:44). Уотӕ ке ӕй, е Библий еу хабарӕй хуарз зиннуй. Еухатт Павел горӕт Филиппти рази хуарз хабар игъосун кодта силгоймӕгтӕн. Лидийӕ дӕр уони астӕу адтӕй, ӕма Библий еци силгоймаги туххӕй финст ӕй: «Йеговӕ [ин] ӕ зӕрдӕ райгон кодта ӕма, Павел ци дзурдта, уой ӕ зӕрдӕмӕ арф райста» (Гъуд. 16:13–15). Йеговӕ Лидий куд ӕрбакодта, уотӕ ма милиуангай адӕни дӕр ӕрбакодта.

16. Нӕ лӕггади нин ци ӕнтӕсуй, уой туххӕй боз кӕмӕй гъӕуама уӕн?

¹⁶ Нӕ лӕггади нин ци ӕнтӕсуй, уой туххӕй боз кӕмӕй гъӕуама уӕн? Аци фарстабӕл Павел дзуапп равардта коринфӕгтӕмӕ ке ниффинста, еци финстӕги: «Ӕз сагътон, Аполлос дон кодта, фал ӕй ирӕзун ба кодта Хуцау. Мадта, садзгӕ ка кӕнуй, е дӕр неци ӕй ӕма, дон ка кӕнуй, е дӕр – кадӕ ӕмбӕлуй Хуцауӕн, ка ӕй ирӕзун кӕнуй, уомӕн» (1 Кор. 3:6, 7). Ӕма мах дӕр гъӕуама алкӕддӕр Йеговӕй боз уӕн, нӕ лӕггади нин ци ’нтӕсуй, уой туххӕй.

17. Йегови, Йесой ӕма изӕдти хӕццӕ ӕмгуст кӕнун нӕ бон ке ӕй, уомӕн ке аргъ кӕнӕн, уой нӕ бон куд ӕй бавдесун?

¹⁷ Йегови, Йесой ӕма изӕдти хӕццӕ ӕмгуст кӕнун нӕ бон ке ӕй, уомӕн ке аргъ кӕнӕн, уой нӕ бон куд ӕй бавдесун? Нӕ бон ӕй хуарз хабар зингзӕрдӕй игъосун кӕнун, зӕгъӕн, хӕдзарӕй-хӕдзарӕмӕ, удта берӕ адӕн кӕми фӕууй, уӕхӕн бунӕтти дӕр (Гъуд. 20:20). Беретӕн ба еске хӕццӕ радзорун хуарз фӕууайуй, сӕхе хабӕртти ку фӕуунцӕ ӕма син фадуат ку фӕззиннуй, уӕд. Фиццаг бал адӕймагӕн салам раттунцӕ, уой фӕсте ба естӕмӕйти дзубанди райдайунцӕ. Дзубанди син ку рауайуй, уӕд ин Паддзахади туххӕй дӕр радзорунцӕ.

18, 19. а) Рӕстдзийнади муггӕгтӕбӕл дон куд фӕккӕнӕн? б) Йеговӕ Рапалаланийӕн куд банхус кодта?

¹⁸ «Хуцауи ӕмкосгутӕ» ке ан, уомӕ гӕсгӕ рӕстдзийнади нӕмгутӕ айдагъ итаугӕ  нӕ кӕнӕн, фал ма сӕбӕл дон дӕр кӕнӕн. Адӕймаги фулдӕр базонун ку фӕффӕндуй, уӕд имӕ гъӕуама нӕуӕгӕй ӕрбацӕуӕн кенӕ имӕ нӕ бӕсти ӕндӕр еске рарветӕн. Нӕ нисан ӕй, еци адӕймаги хӕццӕ Библий ахур райдайун. Ӕма нин е ку бантӕсуй, уӕд нӕ зӕрдӕ цийнӕй байдзаг уй, уӕлдайдӕр ба ин Йеговӕ ӕ зундахаст ӕма ӕ уодигъӕдӕ ӕййевунмӕ куд ӕнхус кӕнуй, уой ку фӕууинӕн, уӕд.

¹⁹ Ӕнсувӕр Рапалалани цӕруй Хонсар-Африкаг Республики. Е раздӕр адтӕй, хуастӕ ка фӕккӕнуй, уӕхӕн дӕсни. Библи ахур кӕнун ку райдӕдта, уӕд ӕ зӕрдӕмӕ хъӕбӕр цудӕй, ци базонидӕ, е. Фал си мӕрдти хӕццӕ дзоруни туххӕй ци финст ес, уобӕл ба нӕ арази кодта (Дук. з. 18:10–12). Фал сабургай Йегови фӕрци ӕ гъуди раййивта ӕма, ци куст кодта, уой ниууагъта, кӕд уомӕй цардӕй, уӕддӕр. Рапалаланибӕл нур цӕуй 60 анзи ӕма зӕгъуй: «Йегови Ӕвдесӕнтӕй хъӕбӕр боз дӕн, уомӕн ӕма мин берӕ гъуддӕгти банхус кодтонцӕ, зӕгъӕн, куст иссерунмӕ. Фал тӕккӕ хъӕбӕрдӕр ба боз дӕн Йеговӕй, уомӕн ӕма мин мӕ цард раййевунмӕ банхус кодта. Ӕз донаргъуд райстон ӕма исдӕн Йегови Ӕвдесӕн ӕма ин цийнӕгӕнгӕй лӕггадӕ кӕнун».

20. Аци статья дӕ цӕмӕ разӕнгард кӕнуй?

²⁰ Мах радзурдтан, цӕстӕй фӕууинӕн ке нӕййес, цуппар уӕхӕн хӕзнайебӕл. Тӕккӕ устурдӕр си ӕй, Йеговӕ не ’мбал ке ӕй, е. Уӕхӕн кади аккаг нӕ ке искодта, уой фӕрци хайгин ан иннӕ хӕзнатӕй дӕр: нӕ бон ӕй Йеговӕмӕ ковун, ӕ сугъдӕг хъаурӕй нин ӕнхус кӕнуй, удта нин Йеговӕ, Йесо ӕма изӕдтӕ нӕ лӕггади ӕнхус кӕнунцӕ. Гъӕйдӕ мадта еци хӕзнатӕн никки устурдӕр аргъ кӕнӕн ӕма Йеговӕй алкӕддӕр боз уӕн, уӕхӕн дессаги Ӕмбал нин ке ӕй, уой туххӕй.