1. Йесо ӕ ахуркӕнуйнӕгтӕн ци ниффӕдзахста? (Кӕсӕ хузӕмӕ ӕндаг цъарӕбӕл.)

Ӕ МӔЛӔТИ размӕ, еци ’хсӕвӕ Йесо ӕ ахуркӕнуйнӕгтӕн ниффӕдзахста: «Ӕз уӕ куд бауарзтон, сумах дӕр уотӕ уарзетӕ уӕ кӕрӕдзей». Удта ма ӕ дзурдтӕбӕл бафтудта: «Мӕ ахуркӕнуйнӕгтӕ ке айтӕ, уой еугур адӕн дӕр базондзӕнцӕ, уӕ кӕрӕдзей ку уарзайтӕ, уӕд» (Иоан. 13:34, 35).

2. Кӕрӕдзей цӕмӕн гъӕуама уарзӕн?

² Киристе куд загъта, уомӕ гӕсгӕ ин ӕ ахуркӕнуйнӕгти алке бон дӕр уодзӕй базонун, уой хузӕн уарзондзийнадӕ сӕмӕ ку уа, уӕд. Уотӕ адтӕй фиццаг ӕноси дӕр ӕма уотӕ ӕй абони дӕр. Мадта гъӕуама кӕрӕдзей ӕгас зӕрдӕй уарзӕн, е ӕнцон ку нӕ уа, уӕддӕр.

3. Аци статьяй ци базондзиан?

³ Ӕнӕнхӕст ке ан, уомӕ гӕсгӕ нин кӕрӕдзей ӕгас зӕрдӕй уарзун ӕнцон нӕ фӕууй. Фал уотемӕй дӕр гъӕуама Киристей фӕдзӕхст ӕнхӕст кӕнунбӕл архайӕн. Аци статьяй базондзиан, уарзондзийнадӕ нин куд ӕнхус кӕнуй, цӕмӕй иннети хӕццӕ фӕрнӕй цӕрӕн, маке гъолон кӕнӕн ӕма иуазӕгуарзон уӕн. Ӕркӕсӕн хуӕртӕ ӕма ӕнсувӕрти цӕветтонтӕмӕ. Статья ӕртасгӕй расагъӕс кӕнӕ: «Мӕ бон сӕ куд ӕй фӕнзун ӕма иннети уарзун, е ӕнцон ку нӕ уа, уӕддӕр?»

4. Матфеййи 5:23, 24 куд финст ӕй, уомӕ гӕсгӕ цӕбӕлдӕр нӕмӕ ка ниххӕран ӕй, еци ӕнсувӕри хӕццӕ бафедаун цӕмӕн гъӕуй?

⁴ Йесо куд загъта, уомӕ гӕсгӕ гъӕуама, цӕбӕлдӕр нӕмӕ ка ниххӕран ӕй, еци ӕнсувӕри хӕццӕ бафедауӕн. (Бакӕсӕ Матфеййи 5:23, 24.) Ба ’й лӕдӕрун кодта, цӕмӕй Хуцауи зӕрдӕ рохс кӕнӕн, уой туххӕй нӕ иннети хӕццӕ фӕрнӕй цӕрун ке гъӕуй. Йеговӕн хъӕбӕр ӕхцӕуӕн фӕууй, еци гъуддаги нӕ бон цидӕриддӕр ӕй, уой ку фӕккӕнӕн, уӕд.  Нӕ зӕрди ескӕмӕ маст ку дарӕн, ӕма ӕ хӕццӕ бафедаунбӕл ку нӕ архайӕн, уӕд нин Йеговӕ нӕ лӕггадӕй арази нӕ уодзӕй (1 Иоан. 4:20).

5. Маркӕн еу ӕнсувӕри хӕццӕ бафедаун ӕнцон цӕмӕннӕ адтӕй?

⁵ Иннети хӕццӕ фӕрнӕй цӕрун алкӕд ӕнцон нӕ фӕууй. Цӕмӕн? Ӕркӕсӕн, Маркбӕл * ци хабар ӕрцудӕй, уомӕ. Еухатт ин еу ӕнсувӕр карзӕй цидӕртӕ нидздзурдта, удта ӕмбурди хуӕртӕ ӕма ӕнсувӕртӕн дӕр ӕ кой фӕккодта. Цума Марк ӕхе куд бадардта? Рамӕстгун ӕй ӕма е дӕр ӕ хӕццӕ карзӕй радзурдта. Уой фӕсте Марк рафӕсмон кодта, ӕнсувӕрӕй хатир ракурдта ӕма байархайдта, цӕмӕй ӕ хӕццӕ бафедауа. Фал еци ӕнсувӕри нӕ фӕндадтӕй Марки хӕццӕ бафедаун. Фиццаг Марк расагъӕс кодта: «Кӕд уой нӕ фӕндуй бафедаун, уӕд ӕз ба мӕхе цӕбӕл марун?» Фал ӕй районон цӕстӕдарӕг баразӕнгард кодта, цӕмӕй ӕ къохтӕ ма уагътайдӕ. Цума Марк куд бакодта?

6. а) Марк ци бакодта, цӕмӕй ӕнсувӕри хӕццӕ бафедудтайдӕ? б) Марк Колоссӕгтӕмӕ 3:13, 14 финст уагӕвӕрдмӕ гӕсгӕ куд архайдта?

⁶ Марк ӕхемӕ еуварсӕй ракастӕй ӕма балӕдӕрдтӕй, хатгай ӕхемӕ иннетӕй хуӕздӕр ке фӕккӕсуй ӕма ’й ӕ зундахаст раййевун ке гъӕуй (Кол. 3:8, 9, 12). Гъема еци ӕнсувӕрмӕ нӕуӕгӕй бацудӕй ӕма бабӕй си хатир ракурдта. Цалдӕр финстӕги дӕр имӕ ниффинста, ӕхе куд бадардта, уобӕл хъӕбӕр ке фӕсмон кӕнуй ӕма ’й ӕ хӕццӕ нӕуӕгӕй лимӕн кӕнун ке фӕндуй. Цӕхуӕндӕр минкъий лӕвӕрттӕ дӕр ма ин искодта, кӕд ӕ зӕрдӕ ӕрфӕлмӕн уидӕ, зӕгъгӕ. Гъигагӕн ин еци ӕнсувӕр уӕддӕр нӕ хатир кодта. Фал Марк идарддӕр дӕр Киристей фӕдзӕхстмӕ гӕсгӕ архайдта ӕма е ’нсувӕри уарзта, удта ин хатир кодта. (Бакӕсӕ Колоссӕгтӕмӕ 3:13, 14.) Адӕймаги хӕццӕ бафедаунбӕл ку архайӕн, фал нин уӕддӕр ӕ зӕрдӕ ӕрфӕлмӕн кӕнун ку нӕ уайа, уӕд нин уарзондзийнадӕ ӕнхус кӕндзӕй, цӕмӕй ин идарддӕр дӕр хатир кӕнӕн ӕма ковӕн, цӕмӕй ӕ хӕццӕ бафедауӕн (Матф. 18:21, 22; Гал. 6:9).

7. а) Йесо нӕ цӕмӕ разӕнгард кодта? б) Ларӕ цӕхуӕн уавӕри бахаудтӕй?

 ⁷ Йесо загъта, алли гъуддаги дӕр уӕ куд фӕндуй, цӕмӕй уин адӕн уонцӕ, уотӕ син уотӕ уӕхуӕдтӕ дӕр, зӕгъгӕ. Удта ма ӕ дзурдтӕбӕл бафтудта, мах ка уарзуй, айдагъ уони ке гъӕуама ма уарзӕн (Лук. 6:31–33). Фал, зӕгъӕн, ӕмбурди ни кадӕр ӕхе еуварс дарун райдӕдта ӕма нин салам нӕбал дӕттуй. Уӕхӕн хабӕрттӕ ӕмбурди ефстагмӕ фӕууй, фал Ларӕбӕл гъе уӕхӕн хабар ӕрцудӕй. Ларӕ зӕгъуй: «Еу хуӕрӕ ми ӕхе еуварс дарун райдӕдта ӕма ’й нӕ лӕдӕрдтӕн, уотӕ цӕмӕн кӕнуй, уой. Раст зӕгъгӕй, мин зин адтӕй. Ӕмбурдтӕ мин цийнӕдзийнадӕ нӕбал хастонцӕ». Фиццаг Ларӕ расагъӕс кодта: «Лӕгъузӕй неци ракодтон. Удта ’й ӕмбурди иннетӕ дӕр уинунцӕ, ӕхе цидӕр ӕнахур дард ке фӕккӕнуй, уой».

8. Ларӕ еу хуӕри хӕццӕ бафедаунбӕл куд архайдта ӕма ӕ хабарӕй цӕбӕл ахур кӕнӕн?

⁸ Ларӕ Йеговӕмӕ ракувта, цӕмӕй ин еци хуӕри хӕццӕ бафедаунмӕ банхус кодтайдӕ. Уой фӕсте ба имӕ бацудӕй ӕма ӕ хӕццӕ радзурдта. Фиццаг бакастӕй уотӕ зиндтӕй, ӕма бафедудтонцӕ, уомӕн ӕма радзурдтонцӕ ӕма кӕрӕдземӕн рахъури кодтонцӕ. «Фал бабӕй цӕйбӕрцӕдӕр рӕстӕги фӕсте ба цидӕр кодта,– зӕгъуй Ларӕ.– Гъема мӕ къохтӕ ӕрхаудтӕнцӕ». Фиццаг Ларӕмӕ уотӕ кастӕй, ӕма ӕ бон цийнӕгӕнгӕй лӕггадӕ кӕнун нӕ уодзӕй, цалинмӕ имӕ еци хуӕрӕ ӕ цӕстингас нӕ раййева, уӕдмӕ. Фал ӕй уой фӕсте ба балӕдӕрдтӕй, уӕхӕн уавӕри хуӕздӕр ке уодзӕй, идарддӕр дӕр еци хуӕри уарзун ӕма ин зӕрдӕй хатир кӕнун (Еф. 4:32–5:2). Ларӕ нӕ иронх кодта, ӕцӕг уарзондзийнадӕ, «лӕгъузӕй ин ка ци ракодта, уони [ке] нӕ нимайуй», фал «алцӕмӕндӕр бухсуй, алцӕбӕлдӕр ӕууӕндуй, алцӕбӕлдӕр ӕ нифс даруй, алцӕмӕндӕр федар лӕууй» (1 Кор. 13:5, 7). Уой фӕрци ӕ зӕрди нӕуӕгӕй фарнӕ ӕрцардӕй. Рӕстӕг рацудӕй ӕма еци хуӕрӕ дӕр ӕрфӕлмӕн ӕй ӕма Ларӕмӕ хуӕздӕр зӕрдӕ дарун райдӕдта. Адӕймаги хӕццӕ бафедаунбӕл ку архайай ӕма имӕ идарддӕр дӕр хуарз зӕрдӕ ку дарай, уӕд «уарзондзийнади ӕма фарни Хуцау» уодзӕй дӕ хӕццӕ (2 Кор. 13:11).

9. Гъуддӕгти 10:34, 35 куд финст ӕй, уомӕ гӕсгӕ цӕмӕн гъӕуама маке гъолон кӕнӕн?

⁹ Йеговӕ неке гъолон кӕнуй. (Бакӕсӕ Гъуддӕгтӕ 10:34, 35.) Мах дӕр ку неке гъолон кӕнӕн, уӕд ӕвдесдзиан, ӕ сувӕллӕнттӕ ке ан. Мах архайӕн Киристей фӕдзӕхстмӕ гӕсгӕ, «иннети уарзӕ, дӕхе куд уарзис, уотӕ», зӕгъгӕ, удта нӕ хуӕртӕ ӕма ӕнсувӕрти астӕу ци фарнӕ ес, уой гъӕуай кӕнӕн (Ром. 12:9, 10; Иак. 2:8, 9).

10, 11. Рут ӕ цӕстингас кутемӕй раййивта?

¹⁰ Еуӕй-еуетӕн ӕнцон нӕ фӕууй алкӕмӕдӕр ӕмхузӕн цӕстӕй кӕсун. Ӕркӕсӕн Рути хабармӕ. Рут ма ӕригон ку адтӕй, уӕд ин еу ӕндӕрбӕстаг силгоймаг ӕ бийнонти зӕрдихудти хъӕбӕр бацудӕй. Цума е Рутбӕл куд рабӕрӕг ӕй? «Еци силгоймаг кӕцӕй адтӕй, еци бӕсти хӕццӕ цидӕриддӕр баст адтӕй, уомӕй ме ’сӕфт уидтон,– зӕгъуй Рут.– Уотӕ мӕмӕ кастӕй, ӕма уоми ка цӕруй, етӕ еугурӕйдӕр уӕхӕнттӕ ’нцӕ, сауӕнгӕ ма хуӕртӕ ӕма ӕнсувӕртӕ дӕр». Цума Рутӕн ӕ гъуди раййевунмӕ ци банхус кодта?

¹¹ Рут ӕй балӕдӕрдтӕй, уӕхӕн сагъӕсти хӕццӕ ’й тох кӕнун ке гъӕуй, уой. Гъема райдӕдта «Ӕрвиланзон киунуги» еци бӕсти туххӕй кӕсун. Рут зӕгъуй: «Хъӕбӕр архайдтон, цӕмӕй еци адӕнмӕ хуарз цӕстӕй кӕсун райдӕдтайнӕ. Еци бӕсти хуӕртӕ ӕма ӕнсувӕртӕ дӕр Йеговӕн зингзӕрдӕй ке лӕггадӕ кӕнунцӕ, уой уинун райдӕдтон. Ба ’й лӕдӕрдтӕн, етӕ дӕр, ӕгас дуйнебӕл нин ци хуӕртӕ ӕма ӕнсувӕртӕ ес, уонӕй ке ’нцӕ». Фӕстӕдӕр Рут балӕдӕрдтӕй, никкидӕр ма ’й цидӕр бакӕнун ке гъӕуй. Е зӕгъуй: «Еци бӕстӕй ка адтӕй, еци хуӕртӕ ӕма ӕнсувӕртӕбӕл ку рамбӕлинӕ, уӕд уӕлдай хъӕбӕрдӕр архайдтон, цӕмӕй сӕмӕ хӕларзӕрдӕ адтайнӕ. Сӕ хӕццӕ дзубанди кӕнгӕй архайдтон, цӕхуӕн адӕн ӕнцӕ, уой хуӕздӕр базонунбӕл». Фӕстагмӕ Рут еци адӕнмӕ ӕндӕр цӕстӕй кӕсун райдӕдта.

12. Сарӕ ӕхемӕ ци балӕдӕрдтӕй?

¹² Кадӕртӕ ’й лӕдӕргӕ дӕр нӕ фӕккӕнунцӕ, адӕни гъолон ке кӕнунцӕ, уой. Зӕгъӕн, Сарӕмӕ уотӕ кастӕй, ӕма неке гъолон кӕнуй, уомӕн ӕма некӕд кастӕй, адӕймаг кӕцӕй ӕй, гъӕздуг ӕй ӕви нӕ, удта ин ӕмбурди цӕхуӕн ихӕстӕ ес, уомӕ. Фал уотӕ зӕгъуй: «Еухатт мӕмӕ багъардта, адӕни ке гъолон кӕнун, е». Цӕмӕ гӕсгӕ загъта уотӕ? Сарӕн ӕ бийнонтӕй алкедӕр уӕлдӕр ахур фӕцӕй ӕма ӕхуӕдӕг дӕр фулдӕр уӕхӕн адӕни хӕццӕ лимӕн кодта. Еухатт ба ма е ’мбалӕн уотӕ дӕр загъта: «Ӕз мӕ рӕстӕг ферветун, уӕлдӕр ахур ка фӕцӕй, уӕхӕн хуӕртӕ ӕма ӕнсувӕрти хӕццӕ. Иннети хӕццӕ ба нӕ лимӕн кӕнун». Бӕрӕг ӕй, Сари ӕ зундахаст раййевун ке гъудӕй. Кутемӕй?

13. Сари хабарӕй цӕбӕл ахур кӕнӕн?

¹³ Районон цӕстӕдарӕг Сарӕн банхус кодта хуӕртӕ ӕма ӕнсувӕртӕмӕ ӕ цӕстингас раййевун. Сарӕ зӕгъуй: «Районон цӕстӕдарӕг мӕ растудта, Йеговӕн еузӕрдонӕй ке лӕггадӕ кӕнун, ӕмбурди хуарз дзуӕппитӕ ке фӕддӕттун ӕма Библи хуарз ке зонун, уой туххӕй. Уой фӕсте ба мин балӕдӕрун кодта, зонундзийнӕдтӕ фулдӕр кӕнунӕй уӕлдай ма мӕ киристон менеугутӕбӕл дӕр архайун ке гъӕуй, зӕгъӕн, сӕрниллӕгдзийнадӕбӕл, бонзонгӕдзийнадӕбӕл ӕма хӕларзӕрдӕдзийнадӕбӕл». Сарӕ районон цӕстӕдарӕги унаффӕмӕ байгъуста ӕма зӕгъуй: «Ба ’й лӕдӕрдтӕн, сӕйрагдӕр ке ӕй иннетӕмӕ хӕларзӕрдӕ ун ӕма сӕ уарзун». Гъема Сарӕ хуӕртӕ ӕма ӕнсувӕртӕмӕ ӕндӕр цӕстӕй кӕсун райдӕдта. Е зӕгъуй: «Ӕз архайдтон, цӕмӕй ӕй фӕууидтайнӕ, Йеговӕ син цӕхуӕн менеугути туххӕй аргъ кӕнуй, уой». Мах туххӕй ба ци ес зӕгъӕн? Уӕлдӕр ахур ка фӕцӕй, е гъӕуама ӕхемӕ иннетӕй хуӕздӕр ма кӕса. Хуӕртӕ ӕма ӕнсувӕрти ӕгас зӕрдӕй ку уарзӕн, уӕд некӕд неке гъолон кӕндзиан (1 Пет. 2:17).

14. Дзиуиттӕгтӕмӕ 13:16 куд финст ӕй, уомӕ гӕсгӕ иуазӕгуарзон ку фӕууӕн, уӕд уомӕ Йеговӕ цӕхуӕн цӕстӕй фӕккӕсуй?

¹⁴ Иуазӕгуарзон ку фӕууӕн, уӕд е Йеговӕн хъӕбӕр ӕхцӕуӕн фӕууй. (Бакӕсӕ Дзиуиттӕгтӕмӕ 13:16.) Уой дӕр нӕ лӕггадӕбӕл нимайуй, уӕлдайдӕр ба тухст уавӕри ка ӕй, уони ку баиуазӕг кӕнӕн, уӕд (Иакови 1:27; 2:14–17). Библи дӕр нӕ уомӕ гӕсгӕ разӕнгард кӕнуй, «алкӕддӕр уотӕ иуазӕгуарзон», зӕгъгӕ (Ром. 12:13). Иуазӕгуарзон ку уӕн, уӕд уомӕй ӕвдесдзиан, иннетӕбӕл ке тухсӕн, ке сӕ уарзӕн, ӕма нӕ уотӕ ке фӕндуй, цӕмӕй не ’мбӕлттӕ уонцӕ. Йеговӕн ӕхцӕуӕн фӕууй, хуӕртӕ ӕма ӕнсувӕрти нӕхемӕ рабадунмӕ ку ӕрбахонӕн, удта сӕ хӕццӕ рӕстӕг ку ферветӕн, уӕд (1 Пет. 4:8–10). Фал нин иуазӕгуарзон ун алкӕд ӕнцон нӕ фӕууй.

15, 16. а) Еуӕй-еуетӕ иуазӕг ӕрбахонунмӕ сӕ нифс цӕмӕннӕ фӕххӕссунцӕ? б) Эдит иуазӕгуарзон цӕй фӕрци иссӕй?

¹⁵ Еуӕй-еуетӕ цӕхуӕндӕр уавӕрти туххӕй еске баиуазӕг кӕнунмӕ сӕ нифс нӕ фӕххӕссунцӕ. Ӕркӕсӕн еу идӕдзӕ хуӕрӕ Эдити хабармӕ. Эдит Йегови Ӕвдесӕн ку нӕма иссӕй, уӕд адӕнӕй ӕхе еуварс дардта. Уотӕ имӕ кастӕй, ӕма иуазгутӕ хонун уомӕ нӕ хауй.

¹⁶ Фал Ӕвдесӕн ку иссӕй, уӕдта ӕ гъуди раййивта. Минкъийгай архайун райдӕдта, цӕмӕй иуазӕгуарзон иссайдӕ. Эдит зӕгъуй: «Зал кӕнун нӕмӕ ку райдӕдтонцӕ, уӕд мин хестӕр нӕлгоймаг загъта, еу лӕг ӕма уосӕ нӕмӕ ӕнхус кӕнунмӕ ке иссӕудзӕнцӕ. Ӕма, дан, кӕд гӕнӕн ес, уӕд еу дууӕ къуӕрей дӕумӕ ку бацӕриуонцӕ. Еци рӕстӕг мӕ зӕрди ӕрӕфтудӕй, Сарептӕй ка адтӕй, еци идӕдзӕ силгоймагӕн Йеговӕ куд райарфӕ кодта, е, ӕма исарази дӕн» (1 Пад. 17:12–16). Цума Эдит естӕбӕл рафӕсмон кодта? Йеговӕ ин ӕцӕгӕйдӕр райарфӕ кодта? «Нӕ дууӕ къуӕрей дууӕ мӕйи иссӕнцӕ,– зӕгъуй Эдит.– Ӕма еци рӕстӕгмӕ хъӕбӕр балимӕн ан». Уомӕй уӕлдай ма ин ӕмбурди дӕр берӕ ӕмбӕлттӕ фӕззиндтӕй. Нур пионерӕй лӕггадӕ кӕнуй ӕма ӕ зӕрдӕмӕ  хъӕбӕр цӕуй, игъосун кӕнгӕй е ’мбали сӕхемӕ ести ракомидзаг кӕнунмӕ ку ӕрбахонуй. Эдит зӕгъуй: «Махецӕй ӕй зонун, ескӕмӕн ести хуарз ку ракӕнай, уӕд дӕхуӕдӕг дууӕ хатти фулдӕр арфӕдзийнӕдтӕй исхайгин уодзӕнӕ» (Дзиуит. 13:1, 2).

17. Люк ӕма ӕ бийнойнаг ци балӕдӕрдтӕнцӕ?

¹⁷ Ка ’й зонуй, ӕной дӕр иуазӕгуарзон адӕймаг дӕ. Фал цума дӕ бон куд ӕй никки иуазӕгуарзондӕр ун? Зӕгъӕн, Люк ӕма ӕ бийнойнаг арӕх ӕрбахониуонцӕ сӕ ниййергути, хеуӕнтти, хӕстӕг ӕмбӕлтти ӕма районон цӕстӕдарӕги ӕ бийнойнаги хӕццӕ. Фал Люк зӕгъуй: «Еу бон ӕй балӕдӕрдтӕн, хуарз ке зонӕн, ӕрмӕстдӕр уони ке фӕххонӕн». Цума Люк ӕма ӕ бийнойнаг ци бакодтонцӕ, цӕмӕй никки иуазӕгуарзондӕр иссайуонцӕ?

18. Люк ӕма ӕ бийнойнаг никки иуазӕгуарзондӕр цӕй фӕрци иссӕнцӕ?

¹⁸ Люк ӕма ӕ бийнойнаг расагъӕс кодтонцӕ Йесой дзурдтӕбӕл: «Кӕд сумах, ка уӕ уарзуй, уони уарзетӕ, уӕд уин цӕй хуӕрзеуӕг уодзӕй?» Ӕма ’й уӕд балӕдӕрдтӕнцӕ, ӕцӕг уарзондзийнадӕ ци ӕй, уой (Матф. 5:45–47). Ба ’й лӕдӕрдтӕнцӕ, ӕгас адӕнӕн дӕр ӕ хуарздзийнӕдтӕ рӕдауӕй ка дӕттуй, еци Хуцау Йегови сӕ фӕнзун ке гъӕуй. Гъема Люк ӕма ӕ бийнойнаг унаффӕ рахастонцӕ, ка сӕмӕ некӕд адтӕй, еци хуӕртӕ ӕма ӕнсувӕрти дӕр ке хондзӕнцӕ. Люк зӕгъуй: «Не ’гасей зӕрдӕмӕ дӕр цӕуй рӕстӕг еумӕ ӕрветун. Уой фӕрци кӕрӕдземӕ дӕр ӕма Йеговӕмӕ дӕр хӕстӕгдӕр кӕнӕн».

19. Йесой фӕдбӕлдзӕугутӕ ке ан, уой нӕ бон куд ӕй бавдесун? Идарддӕр куд архайдзӕнӕ?

¹⁹ Мадта нӕ хуӕртӕ ӕма ӕнсувӕрти ӕгас зӕрдӕй ку уарзӕн, уӕд сӕ хӕццӕ фӕрнӕй цӕрдзиан, гъолон неке кӕндзиан ӕма иуазӕгуарзон уодзиан. Гъӕуама нӕ маци хъор кӕна нӕ хуӕртӕ ӕма ӕнсувӕрти ӕгас зӕрдӕй уарзунмӕ. Уотӕ ку архайӕн, уӕд уодзиан амондгун ӕма ’й ӕвдесдзиан, ӕцӕгӕйдӕр Йесой фӕдбӕлдзӕугутӕ ке ан (Иоан. 13:17, 35).