1. Матфеййи 28:18–20 куд финст ӕй, уомӕ гӕсгӕ Йесо ӕ фӕдбӕлдзӕугутӕн ци баихӕс кодта?

КИРИСТЕ ку райгас ӕй, уӕд ӕ ахуркӕнуйнӕгтӕн ӕхе бавдиста, Галилейи ку ӕрӕмбурд ӕнцӕ, уӕд. Гъӕуама син еу ӕхсидзгӕ гъуддаг баихӕс кодтайдӕ. Ӕ дзурдтӕ финст ӕнцӕ Матфеййи 28:18–20. (Ба сӕ кӕсӕ.)

2. Цӕхуӕн фарстатӕмӕ ӕркӕсдзиан?

² Ахуркӕнуйнӕгтӕ цӕттӕ кӕнуни ихӕс абони Хуцауи лӕггадгӕнгутӕй алкӕмӕдӕр хауй. Ӕркӕсӕн, еци гъуддагмӕ ка хауй, ӕртӕ уӕхӕн фарстайемӕ. Фиццаг: Библи ке хӕццӕ ахур кӕнӕн, еци адӕймагӕн Хуцауи фӕдзӕхститӕ уотид балӕдӕрун кӕнун фагӕ ’й? Дуккаг: ӕмбурди иннӕ хуӕртӕ ӕма ӕнсувӕрти бон куд ӕй уӕхӕн адӕймагӕн ӕнхус кӕнун? Ӕртиккаг: игъосун кӕнунмӕ ка нӕбал цӕуй, уонӕн нӕ бон куд ӕй банхус кӕнун, цӕмӕй нӕуӕгӕй Киристей фӕдзӕхст ӕнхӕст кӕнун райдайонцӕ?

3. Киристей фӕдзӕхсти цӕхуӕн ӕхсидзгӕ гъуди ес?

³ Куд нин архайгӕ ӕй, уой Йесо хуарз балӕдӕрун кодта: гъӕуама адӕнӕн ӕ фӕдзӕхститӕ амонӕн. Фал еу ӕхсидзгӕ гъуддаг иронх кӕнун нӕ гъӕуй. Йесо уотӕ нӕ загъта, «цотӕ ӕма адӕнӕн амонетӕ, ӕз уин цидӕриддӕр ниффӕдзахстон, уой», фал, дан сӕ «ахур кӕнтӕ, ӕз уин цидӕриддӕр ниффӕдзахстон, уой ӕнхӕст кӕнунбӕл». Мадта сӕ айдагъ ахур гъӕуама ма кӕнӕн, фал син лӕдӕрун дӕр кӕнӕн, ци базудтонцӕ, уомӕй царди пайда кӕнун сӕ бон куд ӕй, уой (Гъуд. 8:31). Цума е ӕхсидзгӕ цӕмӕн ӕй?

4. Библи ке хӕццӕ ахур кӕнӕн, уонӕн нӕ бон куд ӕй ӕнхус кӕнун, цӕмӕй Киристей фӕдзӕхститӕ ӕнхӕст кӕнонцӕ. Ӕрхӕссӕ цӕветтон.

 ⁴ Библи ке хӕццӕ ахур кӕнӕн, е гъӕуама Библий фӕдзӕхститӕ ӕнхӕст кӕнун базона. Ӕма ин нӕ бон куд ӕй еци гъуддаги банхус кӕнун? Ӕрхӕссӕн цӕветтон. Иннети машинӕбӕл цӕун ка фӕййахур кӕнуй, е куд фӕййархайуй? Фиццаг бал адӕймагӕн байамонуй надбӕл цӕуни уагӕвӕрдтӕ. Фал е фагӕ нӕй, цӕмӕй адӕймаг машинӕбӕл цӕун райдайа. Машинӕбӕл ку рабада, уӕд ӕ ахургӕнӕг дӕр гъӕуама ӕ фарсмӕ бада ӕма ин амона, ци уагӕвӕрдтӕ исахур кодта, уонӕй надбӕл куд пайда кӕнун гъӕуй, уой. Аци цӕветтон нин цӕбӕл дзорӕг ӕй?

5. а) Иоанни 14:15 ӕма 1 Иоанни 2:3 куд финст ӕй, уомӕ гӕсгӕ Библи ке хӕццӕ фӕййахур кӕнӕн, уонӕн ци гъӕуама амонӕн? б) Нӕ бон куд ӕй ахуркӕнуйнагӕн банхус кӕнун, цӕмӕй Библий уагӕвӕрдтӕй пайда кӕнун райдайа?

⁵ Адӕймаги хӕццӕ Библи ку фӕййахур кӕнӕн, уӕд ин Хуцауи уагӕвӕрдтӕ фӕллӕдӕрун кӕнӕн. Фал айдагъ е фагӕ нӕй. Гъӕуама ин байамонӕн, еци уагӕвӕрдтӕй царди медӕги куд пайда кӕнун гъӕуй, уой. (Бакӕсӕ Иоанни 14:15; 1 Иоанни 2:3.) Махбӕл ӕй уинӕд, Библий сӕйраг уагӕвӕрдтӕй ӕ бон пайда кӕнун куд ӕй, уой, зӕгъӕн, скъолай, кусти кенӕ уолӕфуни рӕстӕг. Ра ин дзорисӕ, еци уагӕвӕрдтӕ дӕ цӕмӕйти багъӕуай кодтонцӕ ӕма дин раст унаффитӕ рахӕссунмӕ куд банхус кодтонцӕ, уой. Удта ӕ хӕццӕ ковгӕй дӕ бон ӕй Йеговӕй корун, цӕмӕй ин сугъдӕг хъаурӕ ратта ӕма ӕ бон уа раст унаффитӕ хӕссун (Иоан. 16:13).

6. Никкидӕр ма нӕ бон ци ӕй кӕнун, цӕмӕй нӕ ахуркӕнуйнаги Киристей фӕдзӕхститӕ ӕнхӕст кӕнунмӕ разӕнгард кӕнӕн?

⁶ Никкидӕр ма нӕ бон ци ӕй кӕнун, цӕмӕй нӕ ахуркӕнуйнаги Библий уагӕвӕрдтӕ ӕнхӕст кӕнунмӕ разӕнгард кӕнӕн? Гъӕуама ин ӕнхус кӕнӕн, цӕмӕй уой дӕр бафӕндӕуа ахуркӕнуйнӕгтӕ цӕттӕ кӕнун. Еуӕй-еуетӕ, игъосун кӕнун сӕ ке гъӕудзӕй, уомӕн айдагъ ӕ сагъӕсӕй дӕр фӕттӕрсунцӕ. Уомӕ гӕсгӕ нӕ фӕразондзийнадӕ фӕгъгъӕуй, цалинмӕ Библий рӕстдзийнадӕ сӕ зӕрдӕмӕ нӕ багъара ӕма сӕхе нӕ бафӕндӕуа еци гъуддаги архайун. Цума нӕ уой туххӕй ци кӕнун гъӕуй?

7. Цӕмӕй адӕймаги хуарз хабар игъосун кӕнун бафӕндӕуа, уой туххӕй нӕ ци кӕнун гъӕуй?

⁷ Дӕ бон ӕй ахуркӕнуйнагмӕ уӕхӕн фарстатӕ раттун: Библийӕй ци базудтай, е дин дӕ цард хуӕздӕрӕрдӕмӕ куд раййивта? Куд дӕмӕ кӕсуй, еци гъуддӕгтӕ иннети дӕр зонун гъӕуй? Дӕ бон син куд ӕй банхус кӕнун? (Ӕмб. 3:27; Матф. 9:37, 38). Дӕ ахуркӕнуйнагӕн бавдесӕ, игъосун кӕнгӕй кӕмӕй фӕппайда кӕнӕн, еци буклеттӕ ӕма ’й бафӕрсӕ, ӕ хеуӕнттӕн, е ’мбӕлттӕн кенӕ е ’мкосгутӕн си кӕцитӕ равардтайдӕ. Уой фӕсте ба ин си цалдӕр раттӕ, ӕма дӕубӕл бавзарӕд, куд сӕ дӕтдзӕй, уой. Ӕнаргъуд игъосунгӕнӕг ку исуа, уӕдтӕ ӕ хӕццӕ игъосун кӕнунмӕ цӕудзӕнӕ ӕма ин уотемӕй ӕнхус кӕндзӕнӕ (Еккл. 4:9, 10; Лук. 6:40).

8. Ахуркӕнуйнаги Хуцауи ӕма адӕни бауарзун цӕмӕн гъӕуй? (Кӕсӕ рамкӕ « Дӕ бон куд ӕй ахуркӕнуйнагӕн банхус кӕнун, цӕмӕй Хуцауи бауарза?».)

⁸ Йесо нин баихӕс кодта, цӕмӕй иннетӕн амонӕн, цидӕриддӕр нин бафӕдзахста, уой ӕнхӕст кӕнун. Уонӕмӕ хаунцӕ дууӕ сӕйраг фӕдзӕхсти дӕр: Хуцауи уарзун ӕма адӕни уарзун (Матф. 22:37–39). Еци дууӕ фӕдзӕхсти баст ӕнцӕ ахуркӕнуйнӕгтӕ цӕттӕ кӕнуни гъуддаги хӕццӕ, уомӕн ӕма нӕ игъосун кӕнунмӕ фиццагидӕр разӕнгард кӕнуй, Йегови ке уарзӕн, удта адӕни  ке уарзӕн, е. Библи ке хӕццӕ ахур кӕнӕн, уонӕмӕ фиццӕгти уотӕ фӕккӕсуй, ӕма сӕ бон не ’соудзӕй игъосун кӕнун. Фал син нӕ бон ӕй дзорун, Йеговӕ син ке ӕнхус кӕндзӕй ӕма ке нӕбал тӕрсдзӕнцӕ (Пс. 18:1–3; Ӕмб. 29:25). Аци статьямӕ ци рамкӕ ес, уоми дзурд цӕуй, нӕ бон куд ӕй адӕймагӕн банхус кӕнун, цӕмӕй Хуцауи никки фулдӕр бауарза. Фал ин ӕмбурди бон ба куд ӕй банхус кӕнун?

9. Машинӕбӕл ка рабадуй, е хуӕздӕр цӕй фӕрци балӕдӕруй, надбӕл ин ӕхе куд даргӕ ’й, уой?

⁹ Нӕуӕгӕй ӕркӕсӕн, раздӕр ци цӕветтон ӕрхастан, уомӕ. Адӕймаг фиццаг хатт машинӕбӕл ку рабадуй, уӕд ин ӕ ахургӕнӕг ци дзоруй, айдагъ уомӕ нӕ фегъосуй, фал иннӕ шофертӕмӕ дӕр фӕккӕсуй. Ӕвӕдзи ин ӕ ахургӕнӕг дӕр фӕззӕгъуй, «уӕртӕ кӕсай, еци шофер ӕ цирӕгътӕ куд фӕббундӕр кодта, цӕмӕй дӕ ма нихъхъӕрӕу кӕна», кенӕ ба, «кӕсай, уӕртӕ е иннӕ машинӕн над куд равардта». Уой фӕрци ’й адӕймаг хуӕздӕр балӕдӕруй, надбӕл ин ӕхе куд даргӕ ’й, уой.

10. Ахуркӕнуйнагӕн къахдзӕфтӕ кӕнунмӕ ци банхус кӕндзӕй?

¹⁰ Уотӕ, Библи ке хӕццӕ ахур кӕнӕн, еци адӕймаг дӕр царди надбӕл цӕун ку райдайуй, уӕд айдагъ махмӕ нӕ фегъосуй, фал Йегови иннӕ лӕггадгӕнгутӕмӕ дӕр фӕккӕсуй. Мадта къахдзӕфтӕ кӕнун кӕд райдайдзӕй? Ӕмбурдтӕмӕ цӕун ку райдайа, уӕд. Ӕмбурдтӕмӕ ку цӕуа, уӕд Библи никки хуӕздӕр балӕдӕрдзӕй, е ’ууӕндундзийнадӕ бафедар уодзӕй, удта Хуцауи никки фулдӕр бауарздзӕй (Гъуд. 15:30–32). Уомӕй уӕлдай ма базонгӕ уодзӕй, еумӕйагӕй имӕ берӕ цидӕртӕ ке хӕццӕ ес, уӕхӕн хуӕртӕ ӕма ӕнсувӕрти хӕццӕ. Ӕмбурди ма фӕууиндзӕй, Йегови лӕггадгӕнгути астӕу ци уарзондзийнадӕ ес, уой. Ӕркӕсӕн цалдӕр уавӕремӕ.

11. Библи ка ахур кӕнуй, етӕ ӕмбурди ке хӕццӕ базонгӕ уодзӕнцӕ ӕма син е куд банхус кӕндзӕй?

¹¹ Зӕгъӕн, ӕ сувӕллони еунӕгӕй ка гъомбӕл кӕнуй, уӕхӕн силгоймаг Библи ахур кӕнуй, ӕма ӕмбурди базонгӕ ’й, уой хузӕн уавӕри ка ӕй, уӕхӕн хуӕри хӕццӕ. Еци силгоймаг ӕй уинуй, минкъий сувӕллӕнтти хӕццӕ дӕр хуӕрӕ ӕмбурдтӕ куд нӕ цох кӕнуй, уой. Кенӕ ба зӕгъӕн, Библи ахур кӕнуй, ӕ тамаку ниууадзун ӕ бон кӕмӕн нӕй, уӕхӕн нӕлгоймаг. Ӕмбурди ба базонгӕ ’й, кӕддӕр уой хузӕн уавӕри ка адтӕй, уӕхӕн ӕнсувӕри хӕццӕ. Еци ӕнсувӕр ин радзурдта, тамаку ниууадзунмӕ ин ци банхус кодта, уой. Йегови куд фулдӕр уарзта, уотӕ ’й хъӕбӕрдӕр фӕндадтӕй ӕ зӕрдӕ рохс кӕнун (2 Кор. 7:1; Фил. 4:13). Уой фӕсте ба ин уотӕ: «Мӕн бон кӕми иссӕй, уоми дӕу бон дӕр исуодзӕй». Еци дзурдтӕй нӕлгоймаги нифс бафедар ӕй. Кенӕ ба, зӕгъӕн, Библи ахур кӕнуй ӕригон кизгӕ, ӕма ӕмбурди фӕууидта, ӕхе кари ка ’й, еу уӕхӕн хуӕри. Еци хуӕрӕн ӕ лӕггадӕ хъӕбӕр устур цийнӕ хӕссуй, ӕма кизги бафӕндадтӕй базонун, уӕхӕн амондгун цӕй фӕрци ӕй, уой.

12. Уотӕ зӕгъӕн цӕмӕн ес, ӕма ӕмбурди алке бон дӕр ӕй, Библи ка ахур кӕнуй, уонӕн ӕнхус кӕнун?

¹² Ахуркӕнуйнаг аллихузи хуӕртӕ ӕма ӕнсувӕрти хӕццӕ ку базонгӕ уа, уӕд ӕй хуӕздӕр лӕдӕрдзӕй, Киристей фӕдзӕхст – Хуцауи уарзун ӕма адӕни уарзун – куд ӕнхӕст кӕнун гъӕуй, уой (Иоан. 13:35; 1 Тим. 4:12). Уомӕй уӕлдай ма уой хузӕн уавӕрти ка адтӕй, еци хуӕртӕ ӕма ӕнсувӕрти фӕрци дӕр ӕй балӕдӕрдзӕй, уой бон дӕр ке ӕй ӕ царди ӕййивддзийнӕдтӕ искӕнун ӕма Киристей ахуркӕнуйнаг исун (Дук. з. 30:11). Ӕмбурди алке бон дӕр ӕй, Библи ка ахур кӕнуй, уомӕн ӕнхус кӕнун (Матф. 5:16). Ду ба куд ӕнхус кӕнис, нӕуӕг ахуркӕнуйнӕгтӕй уе ’мбурдмӕ ка ӕрбацӕуй, уонӕн?

13, 14. Йесо ӕ апостолтӕмӕ цӕхуӕн зӕрдӕ дардта, ку ӕрлӕмӕгъ ӕнцӕ, уӕд?

¹³ Мах фӕндуй, цӕмӕй ка ӕрлӕмӕгъ ӕй, еци хуӕртӕ ӕма ӕнсувӕртӕ нӕуӕгӕй игъосун кӕнуни гъуддаги архайун райдайонцӕ. Цӕмӕй син банхус кӕнӕн, уой туххӕй нӕ Йесой фӕнзун гъӕуй. Гъӕйдӕ ӕркӕсӕн, апостолтӕ ку ӕрлӕмӕгъ ӕнцӕ, уӕд сӕмӕ Йесо цӕхуӕн зӕрдӕ дардта, уомӕ.

¹⁴ Киристейӕн ӕ мӕлӕти сахат ку ӕрхӕстӕг ӕй, уӕд ӕй ӕ апостолтӕ «ниууагътонцӕ ӕма ралигъдӕнцӕ» (Мар. 14:50; Иоан. 16:32). Цума сӕмӕ уой фӕсте Йесо цӕхуӕн зӕрдӕ дардта? Ку райгас ӕй, уӕд ӕ ахуркӕнуйнаг силгоймӕгтӕн загъта: «Ма тӕрсетӕ! Цотӕ ӕма ме ’нсувӕртӕн зӕгъетӕ, цӕмӕй Галилейӕмӕ рацӕуонцӕ. Уоми мӕ фӕууиндзӕнцӕ» (Матф. 28:10а). Йесо ӕ апостолтӕй нӕ фӕффудӕнгъӕл ӕй. Кӕд ӕй ниууагътонцӕ, уӕддӕр ма сӕ е ’нсувӕртӕ худта. Ӕ Фиди хузӕн Йесо дӕр цӕттӕ адтӕй хатир кӕнунмӕ (2 Пад. 13:23).

15. Ка ӕрлӕмӕгъ ӕй, еци хуӕртӕ ӕма ӕнсувӕртӕмӕ цӕхуӕн зӕрдӕ дарӕн?

¹⁵ Мах дӕр, ка ӕрлӕмӕгъ ӕй, уонӕбӕл уотӕ фӕттухсӕн. Етӕ нӕ хуӕртӕ ӕма ӕнсувӕртӕ ӕнцӕ, ӕма сӕ берӕ уарзӕн. Иронх ни нӕй, куд зӕрдиагӕй лӕггадӕ кодтонцӕ, е, кадӕртӕ ба ма дӕсгай ӕнзти дӕргъи дӕр (Дзиуит. 6:10). Хъӕбӕр сӕбӕл ӕрхун кӕнӕн! (Лук. 15:4–7). Нӕ бон куд ӕй Йесой фӕнзун ӕма уӕхӕн хуӕртӕ ӕма ӕнсувӕртӕн ӕнхус кӕнун?

16. Ка ӕрлӕмӕгъ ӕй, еци хуӕрӕтӕ ӕма ӕнсувӕртӕбӕл ке тухсӕн, уой нӕ бон куд ӕй ӕвдесун?

¹⁶ Зӕрдиагӕй сӕ ӕмбурдтӕмӕ хонетӕ. Йесо ӕ апостолти Галилейи фембӕлдмӕ ӕрбахудта, цӕмӕй сӕ бафедар кодтайдӕ (Матф. 28:10б; 1 Кор. 15:6). Мах бон дӕр ӕй, ка ӕрлӕмӕгъ ӕй, еци хуӕртӕ ӕма ӕнсувӕрти ӕмбурдтӕмӕ хонун. Ӕвӕдзи син цалдӕр хатти дӕр багъӕудзӕй зӕгъун. Йесойӕн хъӕбӕр ӕхцӕуӕн адтӕй, ӕ ахуркӕнуйнӕгтӕ ку ӕрбацудӕнцӕ, уӕд. Ӕма мах дӕр гъе уотӕ цийнӕ кӕндзиан, еци хуӕртӕ ӕма ӕнсувӕртӕ ку ӕрбацӕуонцӕ, уӕд. (Рабарӕ Матфеййи 28:16 ӕма Лукай 15:6.)

17. Ка ӕрлӕмӕгъ ӕй, уӕхӕн хуӕрӕ кенӕ ӕнсувӕр ӕмбурдмӕ ку ӕрбацӕуа, уӕд имӕ цӕхуӕн цӕстӕй гъӕуама ракӕсӕн?

¹⁷ Зӕрдӕй сӕбӕл бацийнӕ кӕнтӕ. Йесо байархайдта, цӕмӕй ӕ ахуркӕнуйнӕгтӕ ма истухстайуонцӕ, ку ӕрбацудӕнцӕ, уӕд. Кӕд имӕ бацӕудзӕнцӕ, уой нӕ хизтӕ, фал сӕмӕ ӕхуӕдӕг бацудӕй ӕма сӕ хӕццӕ дзорун райдӕдта (Матф. 28:18). Ка ӕрлӕмӕгъ ӕй, уӕхӕн хуӕрӕ кенӕ ӕнсувӕр ӕмбурдмӕ ку ӕрбацӕуа, уӕд имӕ мах ба цӕхуӕн цӕстӕй ракӕсдзиан? Гъӕуама имӕ бацӕуӕн ӕма ин зӕрдиагӕй расалам кӕнӕн. Ӕвӕдзи, фиццаг тухсгӕ кӕндзиан, уомӕн ӕма ин ци зӕгъӕн, уой нӕ зондзиан. Фал ин нӕ бон ӕй зӕгъун, ӕ уинд нин ӕхцӕуӕн ке ӕй.

18. Ка ӕрлӕмӕгъ ӕй, еци хуӕртӕ ӕма ӕнсувӕртӕн нӕ бон куд ӕй ӕнхус кӕнун?

¹⁸ Банхус кӕнунмӕ цӕттӕ ке айтӕ, уой син ӕвдесетӕ. Йесой ахуркӕнуйнӕгтӕмӕ, ӕвӕдзи, уотӕ кастӕй, ӕма паддзахади хабар ӕгас дуйнебӕл фегъосун кӕнун сӕ бон не ’суодзӕй. Фал син Йесо зӕрдӕ байвардта: «Ӕз алли бон дӕр уодзӕн уӕ хӕццӕ» (Матф. 28:20). Цума сӕ ӕ дзурдтӕ ескуд бафедар кодтонцӕ? Уобӕл берӕ нӕ рацудӕй, ӕма хуарз хабар зингзӕрдӕй игъосун кӕнун райдӕдтонцӕ (Гъуд. 5:42). Ка ӕрлӕмӕгъ ӕй, еци хуӕртӕ ӕма ӕнсувӕрти дӕр не ’нхус гъӕуй. Ка ’й зонуй, тӕрсгӕ кӕнунцӕ нӕуӕгӕй игъосун кӕнунмӕ рацӕун. Фал син нӕ бон ӕй зӕгъун, сӕ хӕццӕ ке уодзиан ӕма син ке ӕнхус кӕндзиан. Цӕттӕ ку уонцӕ, уӕдта сӕ нӕ бон ӕй нӕ хӕццӕ игъосун кӕнунмӕ райсун. Уӕхӕн ӕнхуси туххӕй  ни, ӕвӕдзи, хъӕбӕр боз уодзӕнцӕ. Ка ӕрлӕмӕгъ ӕй, еци хуӕртӕ ӕма ӕнсувӕртӕмӕ уӕхӕн зӕрдӕ ку дарӕн, уӕд, ка ’й зонуй, нӕуӕгӕй дӕр райдайдзӕнцӕ игъосун кӕнун, ӕма е цийнӕ ӕрхӕсдзӕй ӕгас ӕмбурдӕн дӕр.

19. Ӕгас зӕрдӕй нӕ ци фӕндуй ӕма цӕмӕн?

¹⁹ Ахуркӕнуйнӕгтӕ цӕттӕ кӕнуни гъуддаг ма цӕйбӕрцӕ рахӕсдзӕй? Йесо загъта: «Цалинмӕ аци цардӕвӕрди кӕрон не ’рцӕуа, уӕдмӕ» (Матф. 28:20). Цума нин рауайдзӕй еци гъуддаг исӕнхӕст кӕнун? Нӕ зӕрдӕ дарӕн, уотӕ ке уодзӕй. Удта нӕ хъауритӕ, нӕ рӕстӕг ӕма нӕ есбон не ’вгъау кӕнӕн, цӕмӕй ӕносон царди надбӕл цӕун ке фӕндуй, еци адӕни иссерӕн (Гъуд. 13:48). Уотемӕй Йесой фӕнзӕн. Йесо ба загъта: «Мӕнӕн мӕ хуӕруйнаг ӕй, ка мӕ рарвиста, уомӕн ӕ фӕндон ӕнхӕст кӕнун ӕма ин ӕ гъуддаг кӕронмӕ рахъӕртун кӕнун» (Иоан. 4:34; 17:4). Мах дӕр ӕгас зӕрдӕй фӕндуй ахуркӕнуйнӕгтӕ цӕттӕ кӕнуни гъуддаг кӕронмӕ рахъӕртун кӕнун (Иоан. 20:21). Удта нӕ фӕндуй, цӕмӕй нӕ хӕццӕ еци гъуддаги архайун райдайонцӕ, Библи ке хӕццӕ ахур кӕнӕн етӕ, удта ка ӕрлӕмӕгъ ӕй, еци хуӕртӕ ӕма ӕнсувӕртӕ дӕр (Матф. 24:13).

20. Филиппӕгтӕмӕ 4:13 куд финст ӕй, уомӕ гӕсгӕ уотӕ зӕгъӕн цӕмӕн ес, ӕма нӕ бон исуодзӕй Йесой фӕдзӕхст исӕнхӕст кӕнун?

²⁰ Киристей фӕдзӕхст ӕнхӕст кӕнун ӕнцон нӕй. Фал еунӕгӕй нӕ ан. Йесо зӕрдӕ байвардта, ӕнхус нин ке кӕндзӕй. Уомӕй уӕлдай ма нӕ Йеговӕ дӕр федар кӕнуй, уомӕн ӕма е ’мкосгутӕ ан (1 Кор. 3:9; 2 Кор. 2:17). Мадта нӕ бон ӕй еци ихӕс ӕнхӕст кӕнун ӕма ма иннетӕн дӕр ӕнхус кӕнун. Е махӕн ӕй устур цийнӕ ӕма кадӕ! (Бакӕсӕ Филиппӕгтӕмӕ 4:13.)