Ӕз райгурдтӕн 1983 анзи. Дӕс анзей уӕнгӕ мӕмӕ неци лазӕ адтӕй, фал фӕстӕдӕр ме ’гас бауӕр дӕр ресун байдӕдта, гъема еци рист нӕбал ӕнцадӕй. Уобӕл еу дууӕ анзи ку рацудӕй, уӕдта еу сӕумӕ райгъал дӕн ӕма ’й балӕдӕрдтӕн, мӕ бон фезмӕлун дӕр ке нӕй. Аллихузти архайдтон, фал мӕмӕ мӕ къӕхтӕ не ’гъустонцӕ. Уӕдӕй фӕстӕмӕ мӕ бон цӕун нӕбал ӕй. Удта ма нези туххӕй ирӕзгӕ дӕр нӕбал кодтон ӕма гъеци минкъийӕй байзадтӕн.

Еухатт нӕмӕ ӕрбацудӕнцӕ дууӕ силгоймаги, Йегови Ӕвдесӕнтӕ адтӕнцӕ. Уӕдмӕти еу цалдӕр мӕйи хӕдзарӕй гъӕунгӕмӕ нӕбал цудтӕн. Ӕнӕуой мӕхе иннетӕй римӕхсгӕ фӕккӕнинӕ, фал анӕмӕ ба ракастӕн. Еци силгоймӕгтӕ мин дзенети туххӕй радзурдтонцӕ, ӕма мӕ зӕрди ӕрбафтудӕй, фондз анзи мӕбӕл ку цудӕй, уӕд ци фегъустон, е. Уӕди рӕстӕги нӕ гъӕумӕ мӕйӕмӕ еу хатт Суринамӕй еу миссионер исцӕуидӕ, Джетро хундтӕй. Мӕ фиди хӕццӕ Библи ахур кодта. Алкӕддӕр мӕмӕ хӕларзӕрдӕ фӕууидӕ ӕма ’й уой туххӕй берӕ уарзтон. Удта мӕ баба ӕма нана дӕр ӕмбурдтӕмӕ цудӕнцӕ ӕма еуӕй-еухатт мӕн дӕр сӕ хӕццӕ райсиуонцӕ. Уомӕ гӕсгӕ мӕ еци силгоймӕгтӕй еу, Флоренс, Библий ахури туххӕй ку бафарста, уӕд исарази дӕн.

Иннӕ хатт Флоренс ӕрбацудӕй ӕ сӕрихецауи хӕццӕ, хундтӕй Джастус, ӕма мӕ хӕццӕ Библи ахур кӕнун райдӕдтонцӕ. Кӕсун ке нӕ зудтон, уой ку балӕдӕрдтӕнцӕ, уӕд мӕ кӕсунбӕл исахур кодтонцӕ. Фал цӕйбӕрцӕдӕр рӕстӕги фӕсте Джастус ӕма Флоренси Суринами лӕггадӕ кӕнунмӕ иснисан кодтонцӕ, Ореалли ба мӕ хӕццӕ Библи ка ахур кодтайдӕ, уӕхӕн неке адтӕй. Фал Йеговӕй иронх некӕд адтӕн.

Минкъий фӕстӕдӕр Ореалмӕ исцудӕй еу пионер ӕнсувӕр Флойд. Игъосун кӕнгӕй махмӕ дӕр арбацудӕй. Библий ахури туххӕй мин ку загъта, уӕд имӕ бахудтӕн ӕма мӕ е ба рафарста, цӕбӕл, дан, ходис. Ӕз дӕр ин радзурдтон, брошюрӕ «Хуцау ни ци домуй?» ахур ке фӕдтӕн ӕма киунугӕ «Ӕносон цардмӕ ка кӕнуй, еци зонундзийнадӕ» * ахур кӕнун ке райдӕдтон. Удта ин радзурдтон, ахур цӕмӕн ӕрлӕудтӕй, уой дӕр. Флойд мӕ хӕццӕ еци киунугӕ кӕронмӕ рацудӕй, фал уой фӕсте ба уой дӕр ӕндӕр рауӕнмӕ иснисан кодтонцӕ. Гъема бабӕй еунӕгӕй райзадтӕн.

2004 анзи Ореалмӕ иснисан кодтонцӕ дууӕ сӕрмагонд пионери, Гранвилл ӕма Джошуай. Игъосун кӕнгӕй нӕмӕ етӕ дӕр ӕрбацудӕнцӕ ӕма мин Библий ахури туххӕй загътонцӕ. Уонӕмӕ  дӕр бахудтӕн ӕма син загътон, цӕмӕй мӕ хӕццӕ райдӕдтайуонцӕ ахур кӕнун киунугӕ «Ӕносон цардмӕ ка кӕнуй, еци зонундзийнадӕ», ӕрмӕст райдайӕнӕй. Дессаг мӕмӕ кастӕй, етӕ дӕр мӕ цума уотӕ ахур кӕндзӕнцӕ ӕви нӕ. Гранвилл мин загъта, нӕ гъӕуи ӕмбурдтӕ ке фӕццӕуй. Уӕдмӕти еу дӕс анзи хӕдзарӕй нӕ цудтӕн, фал мӕ уордӕмӕ ба хъӕбӕр бафӕндтадтӕй. Гъема мӕмӕ Гранвилл ӕмбурди разӕй ӕрбауадӕй, инвалиди кресли ма рабадун кодта ӕма мӕ залмӕ фӕлласта.

Фӕстӕдӕр мӕ Гранвилл баразӕнгард кодта, цӕмӕй мӕхе Игъосунгӕнгути скъоламӕ ниффинстайнӕ. Уотӕ мин загъта: «Дӕ бон цӕун нӕй, фал дзорун ба дӕ бон ӕй. Ескӕд уодзӕй уӕхӕн бон, ӕма ду дӕр ӕмбурди радзубандий хӕццӕ рацӕудзӕнӕ. Фӕ ’й уиндзӕнӕ!» Ӕ дзурдтӕ ми нифс бауагътонцӕ.

Гранвилли хӕццӕ еумӕ игъосун кӕнун райдӕдтан. Инвалиди кресли мин зин фӕууидӕ нӕ пурхитӕ нӕдтӕбӕл цӕун, фал Гранвиллӕн зӕгъинӕ, цӕмӕй мӕ минкъий уӕрдуни рабадун кодтайдӕ, гъема уотемӕй игъосун кӕнианӕ. 2005 анзи апрели донаргъуд райстон. Уомӕй минкъий фӕстӕдӕр мин ӕнсувӕртӕ байамудтонцӕ литератури хабӕрттӕ ӕма, зали аппаратурӕмӕ куд зелун гъӕуй, уой, ӕма мин еци гъуддӕгтӕ бабарӕ кодтонцӕ.

2007 анзи нӕбӕл зиан ӕрцудӕй: мӕ фидӕ лодкабӕл цӕугӕй фидбилизи бахаудтӕй ӕма цалдӕр боней фӕсте рамардӕй. Не ’гас бийнонтӕн дӕр еци хабар хъӕбӕр зин адтӕй. Гранвилл нӕ хӕццӕ кувта, удта нин Библийӕй уодӕнцойни дзурдтӕ кастӕй. Дууӕ анзей фӕсте ба ма еу фидбилиз дӕр ӕрцудӕй: Гранвилл ци лодкабӕл цудӕй, е фӕддӕлдон ӕй, ӕма фӕммардӕй.

Нӕ минкъий ӕмбурд хъӕбӕр маст кодта. Не ’мбурд ӕнӕ хестӕр нӕлгоймагӕй байзадӕй. Ӕрмӕстдӕр ма нӕмӕ еу кӕстӕреуӕггӕнӕг ӕнсувӕр адтӕй. Гранвилли зиан мин куд зин адтӕй, уомӕн зӕгъӕн дӕр нӕййес. Уӕдмӕти мӕ хуарз ӕмбал иссӕй. Цийфӕнди ӕнхус мӕ ма багъудайдӕ – алкӕддӕр мӕ фарсмӕ адтӕй. Ӕ мӕлӕти фӕсте фиццаг ӕмбурди «Гъӕуайгӕнӕн мӕсуг»-и ахури рӕстӕг кӕсгӕ мӕнӕн адтӕй. Фиццаг дууӕ абзаци бакастӕн, уой фӕсте ба мӕ зӕрдӕ исхъурмӕ ’й ӕма идарддӕр кӕсун нӕбал бафӕразтон.

Минкъий фӕстӕдӕр не ’мбурдӕн ӕнхус кӕнунмӕ исцудӕнцӕ ӕнсувӕртӕ иннӕ ӕмбурдӕй ӕма гъе уӕд иу минкъий фӕигъӕлдзӕгдӕр дӕн. Удта ма нӕмӕ филиал иснисан кодта сӕрмагонд пионер Коджой. Хъӕбӕр ӕхцӕуӕн ма мин адтӕй, мӕ мадӕ ӕма мӕ кӕстӕр ӕнсувӕр дӕр Библи ахур кӕнун ке райдӕдтонцӕ ӕма донаргъуд ке райстонцӕ. 2015 анзи мартъий мӕ иснисан кодтонцӕ кӕстӕреуӕггӕнӕг ӕнсувӕрӕй. Уобӕл берӕ нӕ рацудӕй, ӕма ӕмбурди мӕ фиццаг радзубандий хӕццӕ рацудтӕн. Еци бон мӕ зӕрди ӕрбафтудӕнцӕ, ӕнсувӕр Гранвилл мин кӕддӕр ци дзурдтӕ загъта, етӕ: «Ескӕд уодзӕй уӕхӕн бон, ӕма ду дӕр ӕмбурди радзубандий хӕццӕ рацӕудзӕнӕ. Фӕ ’й уиндзӕнӕ!». Мӕ цӕститӕ дони райвулдӕнцӕ ӕма мӕ медбилти бахудтӕн.

Нӕ интернет-телеуинунадӕй ма базудтон, мӕн хузӕн уавӕрти ка ӕй, уӕхӕн Йегови Ӕвдесӕнти туххӕй. Кӕд сӕ се ’нӕнездзийнадӕ хъӕбӕр тухсун кӕнуй, уӕддӕр берӕ аллихузи гъуддӕгти архайунцӕ, ӕма ӕнцӕ амондгун. Ӕма мӕн дӕр уони хузӕн фӕндуй ме ’гас хъауритӕ дӕр Йеговӕн дӕттун. Уомӕ гӕсгӕ райдӕдтон пионерӕй лӕггадӕ кӕнун. 2019 анзи ба дессаги арфӕдзийнадӕй исхайгин дӕн: хестӕр нӕлгоймагӕй мӕ иснисан кодтонцӕ. Ӕма нур не ’мбурди 40 игъосунгӕнӕгемӕн ӕнхус кӕнун.

Мӕ хӕццӕ Библи ка ахур кодта ӕма мин игъосун кӕнунмӕ ка ӕнхус кодта, еци хуӕртӕ ӕма ӕнсувӕртӕй хъӕбӕр боз дӕн. Фал никки фулдӕр ба боз дӕн Йеговӕй. Е мӕ некӕд иронх кодта!