1. Ци нин банхус кӕндзӕй, зиндзийнӕдти ци кӕнгӕ ’й, уой ку нӕ лӕдӕрӕн, уӕд? (Псалом 118:5–7).

ЕСКӔД дӕмӕ уотӕ кастӕй, ӕма дин некебал ӕма нецибал банхус кӕндзӕй? Уӕхӕн сагъӕстӕ Йегови еузӕрдон лӕггадгӕнгутӕмӕ дӕр фӕззиннуй (1 Пад. 19:14). Уӕхӕн уавӕри ку бахауай, уӕд ди иронх ма уӕд Йегови зӕрдӕвӕрд: «Некӕд дӕ ниууадздзӕн ӕма дӕ некӕд феронх кӕндзӕн». Дӕу бон дӕр ӕй зӕгъун: «Йеговӕ ӕй ме ’нхусгӕнӕг, ӕз нецӕмӕй фӕттӕрсдзӕн» (Дзиуит. 13:5, 6). Аци дзурдтӕ апостол Павел ниффинста Иуди киристӕнттӕмӕ нӕ эри еу 61 анзи. Уӕхӕн дзурдтӕ ма кӕддӕр загъта псаломзаргӕнӕг дӕр. (Бакӕсӕ Псалом 118:5–7.)

2. Аци статьяй цӕмӕ ӕркӕсдзиан ӕма цӕмӕн?

² Псаломзаргӕнӕги хузӕн ӕй Павел дӕр зудта, Йеговӕ е ’нхусгӕнӕг ке ӕй. Зӕгъӕн, Павел дзиуиттӕгтӕмӕ ӕ финстӕг ку ниффинста, уомӕй еу дууӕ анзи раздӕр ци науӕбӕл цудӕй, е хъӕбӕр тухдунги бахаудтӕй (Гъуд. 27:4, 15, 20). Еци балций рӕстӕг дӕр ӕма уой размӕ дӕр Йеговӕ Павелӕн аллихузи ӕнхус кодта, зӕгъӕн: 1) Киристе ӕма изӕдти фӕрци, 2) бартӕ ке къохти ’нцӕ, еци адӕни фӕрци, удта 3) хуӕртӕ ӕма ӕнсувӕрти фӕрци. Павели царди хабӕрттӕмӕ ку ӕркӕсӕн, уӕд махӕн дӕр нӕ нифс бафедар уодзӕй ӕма ’й федарӕй зондзиан, ести уӕд нин Йеговӕ ке банхус кӕндзӕй ӕма нин нӕ кувдтитӕ ке игъосдзӕй.

3. Павел цӕбӕл расагъӕс кодтайдӕ ӕма цӕмӕн?

³ Павел адтӕй тӕссаг уавӕри. Нӕ эри еу 56 анзи Йерусалими ковӕндонӕмӕ ку ӕрбацудӕй, уӕд ибӕл фудзӕрдӕ адӕн сӕхе ниццавтонцӕ ӕма ’й марунмӕ гъавтонцӕ. Иннӕ бон ба Павели ӕрлӕуун кодтонцӕ Сӕйраг тӕрхондони рази ӕма имӕ знӕгтӕ рапъӕскъутӕ кӕнунмӕ тухӕй лӕудтӕнцӕ (Гъуд. 21:30–32; 22:30; 23:6–10). Еци рӕстӕг Павел, ӕвӕдзи, уотӕ дӕр расагъӕс кодтайдӕ: «Цӕйбӕрцӕ ма бафӕраздзӕн?»

4. Йеговӕ Павелӕн Йесой фӕрци куд банхус кодта?

⁴ Павелӕн куд банхус кодтонцӕ? Павели ку ниййахӕстонцӕ, уӕд имӕ ӕхсӕвӕ Киристе фӕззиндтӕй ӕма ин загъта: «Федар лӕууӕ! Мӕн туххӕй Йерусалими куд бӕстон игъосун кодтай, уотӕ гъӕуама игъосун кӕнай Роми дӕр» (Гъуд. 23:11). Еци дзурдтӕ куд афойнадӕбӕл адтӕнцӕ! Киристе ӕй растудта, Йерусалими бӕстон ке игъосун кодта, уой туххӕй. Удта ма ин зӕрдӕ байвардта, Роммӕ дзӕбӕхӕй ке бахъӕртдзӕй ӕма уоми дӕр ке игъосун кӕндзӕй. Уӕхӕн дзурдти фӕсте Павел нецӕмӕйбал тарстӕй, сувӕллон ӕ фиди къохти куд нецӕмӕй фӕттӕрсуй, уотӕ.

5. Йеговӕ Павелӕн изӕди фӕрци куд банхус кодта? (Кӕсӕ хузӕмӕ ӕндаг цъарӕбӕл.)

⁵ Павел ма цӕхуӕн зиндзийнӕдтӕбӕл исӕмбалдӕй? Йерусалими хабӕрттӕбӕл дууӕ анзи ку рацудӕй, уӕд Павели рарвистонцӕ Италимӕ. Ци науӕбӕл цудӕнцӕ, е уӕхӕн лӕгъуз тухдунги бахаудтӕй, ӕма ке фӕййервӕздзӕнцӕ, уой ӕнгъӕл нӕбал адтӕнцӕ. Фал Павел нӕ фӕттарстӕй. Цӕмӕннӕ? Науӕбӕл кадӕриддӕр адтӕй, уонӕн загъта: «Ӕз ке цагъар дӕн ӕма кӕмӕн лӕггадӕ кӕнун, еци Хуцауи изӕд ӕхсӕвӕ мӕ рази ӕрлӕудтӕй ӕма мин загъта: „Ма тӕрсӕ, Павел. Ду гъӕуама ӕрлӕууай Роми паддзахи рази, ӕма, науӕбӕл дӕ хӕццӕ ка ес, уони се ’гасейдӕр Хуцау фӕййервӕзун кӕндзӕй“». Дууӕ анзей размӕ Йеговӕ Павели Йесой фӕрци куд бафедар кодта, уотӕ ’й нур дӕр изӕди фӕрци бафедар кодта. Ӕма ӕцӕгӕйдӕр Роммӕ бахъӕрдтӕнцӕ (Гъуд. 27:20–25; 28:16).

6. Киристе зӕрдӕ цӕмӕй байвардта ӕма нин е нӕ нифс куд федар кӕнуй?

⁶ Махӕн куд ӕнхус кӕнунцӕ? Йесо Павелӕн куд ӕнхус кодта, уотӕ махӕн дӕр ӕнхус кӕндзӕй. Е бӕрӕг ӕй ӕ дзурдтӕй: «Цалинмӕ аци цардӕвӕрди кӕрон не ’рцӕуа, уӕдмӕ ӕз алли бон дӕр уодзӕн уӕ хӕццӕ» (Матф. 28:20). Аци дзурдтӕ нин нӕ нифс хъӕбӕр федар кӕнунцӕ. Царди хъӕбӕр устур мӕститӕ дӕр бавзарӕн, зӕгъӕн, нӕ хеуӕнттӕй еске рамӕлуй. Ӕма еци рист цалдӕр ӕнзей дӕргъи дӕр нӕ фӕссабур кӕнуй. Уомӕй уӕлдай ма адӕймаг фӕммаст  кӕнуй, ӕнзтӕ ибӕл сӕ уӕзӕ ку ӕруадзунцӕ кенӕ ба ӕй тухст сагъӕстӕ сӕ буни ку искӕнунцӕ, уӕд. Фал нӕ бон ӕй еци зинтӕн ниббухсун, уомӕн ӕма ’й зонӕн, Йесо «алли бон» дӕр нӕ хӕццӕ ке ӕй, цийфӕнди зин рӕстӕгути дӕр (Матф. 11:28–30).

7. Раргомади 14:6 финст дзурдтӕмӕ гӕсгӕ нин Йеговӕ абони куд ӕнхус кӕнуй?

⁷ Хуцауи Дзурд нин зӕрдӕ ӕвӕруй, Йеговӕ нин ӕ изӕдти фӕрци ке ӕнхус кӕндзӕй (Дзиуит. 1:7, 14). Зӕгъӕн, изӕдтӕ нин фенхус кӕнунцӕ Паддзахади туххӕй хуарз хабар игъосун кӕнун «алли муггагӕн, алли ӕвзагӕн ӕма алли адӕнихаттӕн» (Матф. 24:13, 14; бакӕсӕ Раргомадӕ 14:6).

8. Йеговӕ Павелӕн, бартӕ ке къохти адтӕнцӕ, уони фӕрци куд банхус кодта?

⁸ Павелӕн куд банхус кодтонцӕ? Уӕлдӕр куд загътан, уотемӕй нӕ эри 56 анзи Йесо Павелӕн зӕрдӕ байвардта, Роммӕ дзӕбӕхӕй ке бахъӕртдзӕй. Фал Йерусалими еуӕй-еу дзиуиттӕгтӕ исфӕндӕ кодтонцӕ Павели рамарун. Уой ӕфсади сӕргълӕууӕг Клавдий Лисий ку базудта, уӕд Павелмӕ ӕнхусмӕ фӕззиндтӕй. Еци фӕдбӕл ӕй цалдӕр сӕдӕ ӕфсӕддонемӕн бабарӕ кодта ӕма ’й Йерусалимӕй рарвиста еу 105 километри идарддӕр – Кесаримӕ. Уоми ба ’й хецау Феликс Ироди галауани бакӕнун кодта ӕма загъта, цӕмӕй ӕй гъӕуай кодтайуонцӕ. Уой фӕрци Павелӕн е знӕгтӕй тӕссаг нӕбал адтӕй (Гъуд. 23:12–35).

9. Фест Павелӕн куд банхус кодта?

⁹ Дууӕ анзей фӕсте дӕр ма Павел бадтӕй Кесарий. Уӕдмӕ ба Феликси бӕсти хецау иссӕй Фест. Дзиуиттӕгтӕ ин лигъстӕ кодтонцӕ, цӕмӕй Павели Йерусӕлиммӕ ӕрӕрвистайдӕ, ӕма ин уоми истӕрхон кодтайуонцӕ. Фал син Фест не ’сарази ӕй. Ӕвӕдзи ӕй зудта, Павели нихмӕ фудвӕндӕ ке искодтонцӕ ӕма ’й надбӕл рамарунмӕ ке гъавунцӕ (Гъуд. 24:27–25:5).

10. Фест куд бакодта, Павел Роми паддзахи тӕрхон ку байагурдта, уӕд?

¹⁰ Фӕстӕдӕр Павелӕн тӕрхон кодтонцӕ Кесарий. Фести фӕндадтӕй дзиуиттӕгти зӕрдӕ балхӕнун, ӕма уомӕ гӕсгӕ Павели бафарста: «Фӕндуй дӕ Йерусалиммӕ рандӕ ун, цӕмӕй дин аци гъуддӕгти туххӕй мӕ рази уоми тӕрхон кӕнонцӕ?» Фал ӕй Павел лӕдӕрдтӕй, уордӕмӕ ку ниццӕуа, уӕд уодӕгасӕй ке нӕ байзайдзӕй ӕма цӕмӕй фӕййервӕза, уой туххӕй ӕй Роммӕ рандӕ ун ке гъӕуй. Гъема Фестӕн загъта: «Ӕз седун Роми паддзахи тӕрхонмӕ!» Фест ӕ унаффӕгӕнгути хӕццӕ ку радзубанди кодта, уӕд Павелӕн загъта: «Роми паддзахи тӕрхонмӕ седис? Гъема Роми паддзахмӕ рандӕ уодзӕнӕ». Еци унаффӕ Павелӕн ӕ цард фӕййервӕзун кодта. Берӕ нӕ рацудӕй, ӕма балӕудтӕй Роми, ӕ уод ин ка агурдта, уонӕй идард (Гъуд. 25:6–12).

11. Павел Исаййи киунугӕй цӕхуӕн дзурдтӕбӕл сагъӕс кодтайдӕ?

¹¹ Павел ӕнгъӕлмӕ кӕсуй, Италимӕ ’й кӕд рарветдзӕнцӕ, уомӕ. Еци рӕстӕг, ӕвӕдзи, ӕ зӕрдӕбӕл ӕрлӕууиуонцӕ, пахампар Исай Йегови знӕгтӕн ци дзурдтӕ загъта, етӕ: «Кӕнтӕ фӕндтӕ, кӕнтӕ – уӕддӕр уин фехӕлдзӕнцӕ! Цийфӕнди дӕр дзоретӕ – неци уин си рауайдзӕй, уомӕн ӕма Хуцау нӕ хӕццӕ ӕй!» (Ис. 8:10). Павел федарӕй ӕууӕндтӕй, Йеговӕ ин ке банхус кӕндзӕй, ӕма федӕни фӕлварӕнтӕмӕ цӕттӕ адтӕй.

12. Юлий Павелмӕ цӕхуӕн зӕрдӕ дардта ӕма уомӕ гӕсгӕ Павел ци балӕдӕрдтайдӕ?

¹² Нӕ эри 58 анзи Павели рарвистонцӕ Италимӕ. Еци балций Павели бабарӕ кодтонцӕ ӕфсади хецау Юлийӕн. Уӕдӕй  фӕстӕмӕ Павели цард уой къохти адтӕй: ӕ бон адтӕй Павелӕн ӕ уавӕр никки фуддӕр фӕккӕнун кенӕ ба ин ӕ уаргъ фӕррӕуӕгдӕр кӕнун. Цума Юлий ӕ бартӕй куд испайда кодта? Иннӕ бон, науӕ фиццаг наулӕууӕни ку ӕрлӕудтӕй, уӕд «Юлий Павелӕн уӕхӕн хуарздзийнадӕ ракодта, ӕма ’й е ’мбӕлттӕмӕ рауагъта, цӕмӕй имӕ фӕккастайуонцӕ». Уой фӕсте ба ма Павелӕн ӕ цард дӕр фӕййервӕзун кодта. Кутемӕй? Ци науӕбӕл цудӕнцӕ, е ниппурхӕ ’й ӕма цӕмӕй ахӕститӕ ма фӕллигъдайуонцӕ, уой туххӕй сӕ ӕфсӕддонтӕ марунмӕ гъавтонцӕ. Фал сӕ Юлий нӕ бауагъта, уомӕн ӕма ’й фӕндадтӕй Павели багъӕуай кӕнун. Аци уавӕри дӕр бабӕй Павел Йегови къох фӕууидта (Гъуд. 27:1–3, 42–44).

13. Йеговӕ, бартӕ ке къохти ’нцӕ, уонӕй куд испайда кӕнуй?

¹³ Махӕн куд ӕнхус кӕнунцӕ? Ку багъӕуа, уӕд Йегови бон ӕй ӕ сугъдӕг хъаури фӕрци, бартӕ ке къохти ’нцӕ, уони баразӕнгард кӕнун, цӕмӕй ӕ фӕндонмӕ гӕсгӕ архайонцӕ. Паддзах Соломон ниффинста: «Паддзахи зӕрдӕ Йегови къохи ӕй цӕугӕдони хузӕн – кӕцирдӕмӕ ’й фӕндуй, ецирдӕмӕ ’й ӕздахуй» (Ӕмб. 21:1). Аци дзурдтӕ цӕбӕл дзорӕг ӕнцӕ? Цӕмӕй цӕугӕдон ӕндӕр ӕрдӕмӕ раздахай, уой туххӕй фӕгъгъӕуй къанау искъахун. Гъе уотӕ Йеговӕ дӕр ӕ сугъдӕг хъаури фӕрци хецӕутти гъудитӕ, ци ’рдӕмӕ гъӕуй, еци ’рдӕмӕ раздахуй, цӕмӕй ци унаффитӕ рахӕссунцӕ, етӕ ӕ адӕни пайдайӕн уонцӕ. (Рабарӕ Ездрӕ 7:21, 25, 26.)

14. Гъуддӕгтӕ 12:5 финст дзурдтӕмӕ гӕсгӕ нӕ бон цӕй туххӕй ӕй ковун?

¹⁴ Мах бон ци ӕй кӕнун? Нӕ бон ӕй ковун «паддзӕхти ӕма, устур бунӕттӕ кадӕриддӕр ахӕссуй, уони туххӕй», зӕгъӕн, нӕ хуӕртӕ ӕма ӕнсувӕрти цардбӕл кенӕ лӕггадӕбӕл ка рабӕрӕг уодзӕй, уӕхӕн унаффитӕ ку хӕссонцӕ, уӕд (1 Тим. 2:1, 2; Неем. 1:11). Фиццаг ӕноси киристӕнтти хузӕн мах дӕр зӕрдиагӕй фӕкковӕн, нӕ хуӕртӕ ӕма ӕнсувӕртӕй ахӕст ка ӕй, уони туххӕй. (Бакӕсӕ Гъуддӕгтӕ 12:5; Дзиуит. 13:3.) Уомӕй уӕлдай ма нӕ бон ӕй ковун, цӕмӕй ахӕстдӕнтти ка косуй, етӕ сӕмӕ хуарз зӕрдӕ даронцӕ, Юлий Павелмӕ цӕхуӕн зӕрдӕ дардта, уӕхӕн (Гъуд. 27:3).

15, 16. Йеговӕ Павелӕн Аристарх ӕма Лукай фӕрци куд банхус кодта?

¹⁵ Павелӕн куд банхус кодтонцӕ? Цалинмӕ Павел Роммӕ цудӕй, уӕдмӕти ин Йеговӕ  хуӕртӕ ӕма ӕнсувӕрти фӕрци еу ӕма дууӕ хатти нӕ банхус кодта. Гъӕйдӕ еу цалдӕр хабаремӕ ӕркӕсӕн.

¹⁶ Павели еузӕрдон ӕмбӕлттӕ, Аристарх ӕма Лука, исфӕндӕ кодтонцӕ ӕ хӕццӕ Роммӕ фӕццӕун *. Кӕд сӕ цардӕн тӕссаг адтӕй, уӕддӕр цӕттӕ адтӕнцӕ Павели фарсмӕ балӕуунмӕ. Удта ’й етӕ нӕ зудтонцӕ, уодӕгасӕй бахъӕртдзӕнцӕ ӕви нӕ, уой. Тухдунги ку бахаудтӕнцӕ, ӕрмӕстдӕр син ӕй уӕд загъта Павел, етӕ дӕр ке фӕййервӕздзӕнцӕ. Аристарх ӕма Лука Кесарий науӕбӕл ку рабадтӕнцӕ, уӕд Павел, ӕвӕдзи, Йеговӕй хъӕбӕр боз адтӕй, еци нифсхаст ӕнсувӕрти имӕ ке рарвиста, уой туххӕй (Гъуд. 27:1, 2, 20–25).

17. Йеговӕ Павелӕн хуӕртӕ ӕма ӕнсувӕрти фӕрци куд ӕнхус кодта?

¹⁷ Еци даргъ балций рӕстӕг хуӕртӕ ӕма ӕнсувӕртӕ Павелӕн арӕх ӕнхус кодтонцӕ. Зӕгъӕн, наулӕууӕн горӕт Сидони Юлий Павели е ’мбӕлттӕмӕ рауагъта, «цӕмӕй имӕ фӕккастайуонцӕ». Фӕстӕдӕр, горӕт Путеоли, Павел ӕма е ’мбӕлттӕ иссирдтонцӕ ӕнсувӕрти, ӕма син етӕ ба ниллигъстӕ кодтонцӕ, цӕмӕй сӕмӕ авд бони байзадайуонцӕ. Еци горӕтти хуӕртӕ ӕма ӕнсувӕртӕ Павел ӕма е ’мбӕлттӕбӕл зӕрдиагӕй батухсиуонцӕ, Павел ба син, ӕвӕдзи, аллихузи цаутӕ дзурдта, адӕн хуарз хабармӕ куд игъосунцӕ, уой туххӕй. (Рабарӕ Гъуддӕгтӕ 15:2, 3.) Павел, Аристарх ӕма Лука сӕ фӕллад ку исуагътонцӕ, уӕд сӕ балци раидарддӕр кодтонцӕ (Гъуд. 27:3; 28:13, 14).

18. Павел Хуцауӕн цӕмӕн райарфӕ кодта ӕма ӕ нифс цӕмӕн бафедар ӕй?

¹⁸ Роммӕ цӕугӕй Павел, ӕвӕдзи, сагъӕс кодта, ӕртӕ анзей размӕ Роми киристӕнттӕмӕ ци дзурдтӕ ниффинста, уобӕл: «Нур мӕ цалдӕр анзи хъӕбӕр фӕндуй сумахмӕ ӕрцӕун» (Ром. 15:23). Фал, ӕвӕдзи, уой ӕнгъӕл ба н’ адтӕй, ӕма уордӕмӕ ахӕстӕй ниццӕудзӕй. Роммӕ куд хӕстӕгдӕргӕнгӕ цудӕнцӕ, уотемӕй Павел рауидта бунӕттон ӕнсувӕрти. Расагъӕс кӕнӕ, куд  цийнӕ кодтайдӕ! Библий финст ӕй: «Павел сӕ ку рауидта, уӕд Хуцауӕн райарфӕ кодта ӕма ӕ нифс бафедар ӕй» (Гъуд. 28:15). Павел уой туххӕй Хуцауӕн цӕмӕн райарфӕ кодта? Уомӕн ӕма бабӕй аци уавӕри дӕр Йегови къох фӕууидта.

19. 1 Петури 4:10 куд финст ӕй, уомӕ гӕсгӕ Йегови бон куд ӕй мах фӕрци ескӕмӕн банхус кӕнун?

¹⁹ Мах бон ци ӕй кӕнун? Незтӕ кенӕ ӕндӕр зиндзийнӕдтӕй ка тухсуй, уӕхӕнттӕй де ’мбурди еске зонис? Кенӕ ба ӕ хеуон кӕмӕн рамардӕй, уӕхӕн? Кедӕр ӕнхус ке гъӕуй, уой ку базонай, уӕд Йеговӕмӕ ковӕ, цӕмӕй дӕ бон уа еци адӕймагӕн ести хуарздзийнадӕ ракӕнун. Дӕ дзурдтӕ кенӕ дӕ гъуддӕгтӕ, гӕнӕн ес, ӕма разиннонцӕ, еци рӕстӕг адӕймаги ци ӕнхус гъудӕй, еци ӕнхус. (Бакӕсӕ 1 Петури 4:10.) * Уотемӕй ӕй адӕймаг фӕууиндзӕй, Йегови дзурдтӕ, «некӕд дӕ ниууадздзӕн ӕма дӕ некӕд феронх кӕндзӕн», уомӕ дӕр ке хаунцӕ. Е дӕхецӕн дӕр ӕхцӕуӕн куд нӕ уодзӕй!

20. Нӕ бон цӕмӕн ӕй федарӕй зӕгъун, Йеговӕ не ’нхусгӕнӕг ке ӕй?

²⁰ Царди ци зиндзийнӕдтӕбӕл исӕмбӕлӕн, уони рабарӕн ес, Павел, Аристарх ӕма Лука ци тухдунги бахаудтӕнцӕ, уой хӕццӕ. Фал нӕ тӕрсун нӕ гъӕуй, уомӕн ӕма Йеговӕ нӕ фарсмӕ ’й. Е нин ӕнхус кӕнуй Йесой ӕма изӕдти фӕрци. Уомӕй уӕлдай мӕ, ку фӕгъгъӕуй, уӕд хецӕуттӕй дӕр испайда кӕнуй. Удта ма ’й нӕхецӕй зонӕн, Йеговӕ ӕ сугъдӕг хъаури фӕрци хуӕртӕ ӕма ӕнсувӕрти ке баразӕнгард кӕнуй ӕнхус кӕнунмӕ. Уомӕ гӕсгӕ мах бон дӕр ӕй Павели хузӕн федарӕй зӕгъун: «Йеговӕ ӕй ме ’нхусгӕнӕг, ӕз нецӕмӕй фӕттӕрсдзӕн. Ци мин бакӕндзӕй адӕймаг?» (Дзиуит. 13:6).