1. Матфеййи 7:13, 14 финст дзурдтӕмӕ гӕсгӕ уотӕ зӕгъӕн цӕмӕн ес, ӕма ни алкедӕр цӕхуӕндӕр надбӕл цӕуй?

АЛКЕДӔР ни цӕуй, нӕуӕг дуйнемӕ ка кӕнуй, еци надбӕл. Еци надбӕл нӕ гъӕуй алли бон дӕр цӕун. Фал е ӕнцон нӕй, уомӕн ӕма Киристе куд загъта, уомӕ гӕсгӕ еци над унгӕг ӕй. (Бакӕсӕ Матфеййи 7:13, 14.) Ӕнӕнхӕст ке ан, уомӕ гӕсгӕ си ӕнцонтӕй радзӕгъӕл уӕн (Гал. 6:1).

2. Аци статьяй цӕмӕ ӕркӕсдзиан? (Кӕсӕ ма рамкӕ « Сӕрниллӕгдзийнадӕ нин царди унгӕг надбӕл цӕунмӕ ӕнхус кӕнуй».)

² Цӕмӕй царди надӕй ма радзӕгъӕл уӕн, уой туххӕй гъӕуама цӕттӕ уӕн нӕ зундахаст ӕма нӕ гъуддӕгтӕ ӕййевунмӕ. Апостол Павел Коринфи киристӕнтти разӕнгард кодта, идарддӕр дӕр «кӕми гъӕуй, уоми ӕййеветӕ», зӕгъгӕ (2 Кор. 13:11). Аци дзурдтӕ махмӕ дӕр хаунцӕ. Цӕмӕй царди надӕй ма радзӕгъӕл уӕн, уой туххӕй нин Библий унаффитӕ, удта фӕлтӕрдгун киристӕнттӕ куд банхус кӕндзӕнцӕ? Удта Йегови организаций амундтӕмӕ гӕсгӕ архайун зин ку уа, уӕд нин ци банхус кӕндзӕй? Нуртӕкки аци фарстатӕмӕ ӕркӕсдзиан. Удта ма базондзиан, сӕрниллӕгдзийнадӕ нин нӕхе ӕййевунмӕ ӕма нӕ цийнӕдзийнадӕ багъӕуай кӕнунмӕ куд банхус кӕндзӕй, уой.

3. Хуцауи Дзурд нин куд ӕнхус кӕнуй?

³ Зундахаст раййевун алкӕд ӕнцон нӕ фӕууй. Адӕймаги зӕрдӕ мӕнгард ӕй, ӕма нӕ цӕмӕ ӕркӕндзӕй, уой балӕдӕрун зин ӕй (Йер. 17:9). Ӕма нӕхе цидӕр «мӕнгӕ гъудитӕй» хъӕбӕр ӕнцонтӕй расайӕн (Иак. 1:22). Уомӕ гӕсгӕ Хуцауи Дзурди фӕрци нӕхемӕ гъӕуама еуварсӕй ракӕсӕн. Уотемӕй фӕууиндзиан нӕ зӕрди гъудитӕ ӕма фӕндтӕ (Дзиуит. 4:12, 13). Библи рабарӕн ес рентгени хӕццӕ, уомӕн ӕма нин ӕнхус кӕнуй, адӕймаги цӕстӕ ци  нӕ уинуй, уой фӕууинун. Фал нин цӕмӕй Библий унаффӕ кенӕ бӕрнон ӕнсувӕрти унаффӕ пайда ӕрхӕсса, уой туххӕй гъӕуама уӕн сӕрниллӕг.

4. Саул сӕрбӕрзонд ке иссӕй, е куд рабӕрӕг ӕй?

⁴ Адӕймагӕн сӕрниллӕгдзийнадӕ ку нӕ фагӕ кӕна, уӕд ӕй е цӕмӕ ӕркӕндзӕй, е хуарз зиннуй паддзах Саули хабарӕй. Саул гъе уӕхӕн сӕрбӕрзонд иссӕй ӕма ’й ӕ зундахаст раййевун ке гъудӕй, уобӕл нӕбал састӕй (Пс. 36:1, 2; Ав. 2:4). Йеговӕ ин комкоммӕ балӕдӕрун кодта, амаликӕгтӕбӕл ку фӕууӕлахез уа, уӕд ӕй ци кӕнун гъӕудзӕй, уой. Фал имӕ Саул нӕ байгъуста. Ӕма ин пахампар Самуил ӕ рӕдуд ку байамудта, уӕддӕр нӕ басастӕй. Ӕхе рӕститӕ кӕнун райдӕдта ӕма ма иннети дӕр фудгин кодта (1 Сам. 15:13–24). Уӕхӕн миутӕ ма раздӕр дӕр фӕккӕнидӕ (1 Сам. 13:10–14). Гъигагӕн, Саул ӕ мӕнгард зӕрди фӕдбӕл рацудӕй. Ӕ зундахаст ӕййевун ӕй ке нӕ бафӕндадтӕй, уомӕ гӕсгӕ ин Йеговӕ бауайдзӕф кодта ӕма ’й ӕ хуарзӕнхӕй фенӕхай кодта.

5. Саули хабарӕй цӕбӕл ахур кӕнӕн?

⁵ Мах нӕ фӕндуй Саули хузӕн сӕрбӕрзонд исун. Уомӕ гӕсгӕ гъӕуама нӕхе бафӕрсӕн: «Библи кӕсгӕй ӕй ку балӕдӕрун, кӕмидӕр мӕ цидӕр раййевун ке гъӕуй, уой, уӕд мӕхецӕн рӕуӕнттӕ агорун нӕ райдайун? Уотӕ мӕмӕ нӕ фӕккӕсуй, ӕма Библий унаффӕмӕ ку нӕ байгъосон, уӕд мин уомӕй неци уодзӕй? Мӕ фуд еске рагъмӕ нӕ багӕлдзун?» Кӕд аци фарстатӕй еунӕгебӕл дӕр «гъо» загътан, уӕд е уобӕл дзорӕг ӕй, ӕма нӕ цидӕр раййевун гъӕуй. Кенӕ ба нӕ е уомӕ ӕркӕндзӕй, ӕма Йегови хуарзӕнхӕй фенӕхай уодзиан (Иак. 4:6).

6. Давид Саулӕй цӕмӕй хецӕн кодта?

⁶ Давид Саули хузӕн н’ адтӕй. Е Йегови закъон уарзта (Пс. 1:1–3). Еухатт Йеговӕмӕ ковгӕй уӕхӕн дзурдтӕ загъта: «Сӕрниллӕг адӕни фӕййервӕзун кӕндзӕнӕ, сӕрбӕрзонд ка ӕй, уонӕн ба ду сӕ нихмӕ дӕ, ӕгадӕ бунатмӕ сӕ ӕргӕлдздзӕнӕ» (2 Сам. 22:28). Давид алкӕддӕр цӕттӕ адтӕй ӕ зундахаст Хуцауи закъонмӕ гӕсгӕ раййевунмӕ. Еухатт уӕхӕн дзурдтӕ ниффинста: «Ӕз арфӕ кӕндзӕн Йеговӕн, мӕнӕн унаффӕ ка дӕттуй, уомӕн. Сауӕнгӕ мин ӕхсӕвӕ дӕр мӕ арф римӕхст гъудитӕ фӕййамонунцӕ зунд» (Пс. 16:7).

7. Сӕрниллӕгдзийнадӕ нин куд ӕнхус кӕндзӕй?

⁷ Сӕрниллӕг ку уӕн, уӕд Библий унаффитӕмӕ игъосдзиан ӕма нӕ зунд ӕййевдзиан, цӕмӕй рӕдуд къахдзӕф ма искӕнӕн. Ескӕми ку радзӕгъӕл уӕн, уӕд нӕ Хуцауи Дзурд фӕдзӕхсдзӕй: «Мӕнӕ над, цотӕ аци надбӕл» (Ис. 30:21). Йеговӕмӕ ку игъосӕн, уӕд нин е пайдайӕй уӕлдай неци ӕрхӕсдзӕй (Ис. 48:17). Зӕгъӕн, нӕхецӕй нӕ ӕфсӕрми кӕнун нӕ гъӕудзӕй, унаффӕ дӕттун нин ке багъудӕй, уой туххӕй. Удта мӕ Йеговӕмӕ дӕр бахӕстӕг уодзиан, уомӕн ӕма ’й лӕдӕрдзиан, ӕ сувӕллӕнтти цӕстӕй нӕмӕ ке кӕсуй (Дзиуит. 12:7).

8. Иакови 1:22–25 куд финст ӕй, уомӕ гӕсгӕ Библи айдӕни хузӕн цӕмӕн ӕй?

⁸ Хуцауи Дзурд ӕй айдӕни хузӕн. (Бакӕсӕ Иакови 1:22–25.) Ӕвӕдзи ни алкедӕр хӕдзарӕй ӕндӕмӕ ку фӕццӕуй, уӕд бал фиццаг ӕхемӕ айдӕнӕмӕ бакӕсуй. Уотӕ Библи дӕр алли бон ку кӕсӕн, уӕд ӕй уиндзиан, раййевун нӕ кӕми гъӕуй, уой. Беретӕ аллибони стих сӕумӕй фӕккӕсунцӕ, хӕдзарӕй ку нӕма рацӕунцӕ, уӕд. Уой фӕрци еци гъудитӕ ӕгас бон дӕр сӕ сӕри фӕуунцӕ ӕма еци унаффитӕй испайда кӕнунмӕ фадуӕттӕ фӕййагорунцӕ. Гъӕуама нӕхе исахур кӕнӕн Библи алли бон дӕр ӕртасун ӕма ибӕл сагъӕс кӕнун. Кӕд еци гъуддаг уӕхӕн минкъий зиннуй, уӕддӕр гъе уомӕй кӕнгӕй, царди надбӕл байзайдзиан ӕви нӕ, е.

9. Де ’мбали унаффӕ дӕ кӕд багъӕудзӕй?

⁹ Ескӕд дин уотӕ адтӕй, ӕма раст надӕй радзӕгъӕл дӕ ӕма Йеговӕй идард кӕнун райдӕдтай? (Пс. 73:2, 3). Кӕд дӕмӕ уӕхӕн уавӕри де ’мбал бацудӕй ӕма дӕ бафӕдзахста, уӕд ин ӕ унаффӕмӕ байгъустай? Кӕд гъо, уӕд раст бакодтай. Удта си, ӕвӕдзи, боз дӕр куд н’ адтӕ, афойнадӕбӕл дӕ ке бафӕдзахста, уой туххӕй (Ӕмб. 1:5).

10. Де ’мбал дӕ рӕдуд къахдзӕфӕй ку фӕдзӕхса, уӕд уомӕ цӕхуӕн цӕстӕй гъӕуама кӕсай?

¹⁰ Хуцауи Дзурди финст ӕй: «Ка дӕ уарзуй, уомӕн ӕ цӕфтӕ ӕнцӕ е ’новуд зӕрдӕй» (Ӕмб. 27:6). Цума ами цӕй кой цӕуй? Дӕ цӕститӕбӕл рауайун кӕнӕ, цума машинттӕ кӕми дууердӕмӕ кӕнунцӕ, уӕхӕн надбӕл бахезунмӕ гъавис. Гъема дӕ телефонмӕ кӕсгӕ райзадтӕ, уотемӕй надмӕ ракъахдзӕф кодтай, де ’мбал ба дӕ райахӕста ӕма дӕ ӕвваст фӕстӕмӕ ӕрбатъӕпп кодта. Ресун дӕр ма дӕ фӕккодта. Фал уой фӕрци машини бунмӕ нӕ бахаудтӕ. Ка ’й зонуй, уой фӕсте дӕ къох цалдӕр бони дӕр фӕрресдзӕй. Фал уой туххӕй де ’мбалмӕ мӕстгун кӕндзӕнӕ? Боз дӕр ма си уодзӕнӕ! Гъе уотӕ фӕууй, де ’мбал дӕ рӕдуд къахдзӕфӕй багъӕуай кӕнунмӕ ку фӕгъгъавуй ӕма дин унаффӕ ку раттуй, уӕд дӕр. Фиццаг, ӕвӕдзи, зин фӕууй, фал уой туххӕй де ’мбалмӕ мӕстгун кӕнун ӕма ибӕл зӕрдихудтӕ кӕнун нӕ гъӕуй. Е зундбӕл дзорӕг нӕ уодзӕй (Еккл. 7:9). Уой бӕсти ин райарфӕ кӕнӕ, уомӕн ӕма ин, ӕвӕдзи, дӕ хӕццӕ радзорун ӕнцон н’ адтӕй.

11. Адӕймаги ӕ хуарз ӕмбали унаффӕмӕ байгъосунмӕ ци фӕхъхъор кӕнуй?

¹¹ Еуӕй-еуети хуарз ӕмбали унаффӕмӕ байгъосунмӕ ци фӕхъхъор кӕнуй? Сӕрбӕрзонддзийнадӕ. Сӕрбӕрзонд адӕймаги зӕрдӕмӕ фулдӕр цӕуй зӕрдӕлхӕнӕн дзубандитӕмӕ игъосун, Библибӕл арӕзт унаффитӕмӕ нӕ, фал (2 Тим. 4:3, 4). Еске унаффитӕ ӕ сӕрмӕ нӕ фӕххӕссуй. Фал апостол Павел ниффинста: «Кӕд еске ӕхецӕй цидӕр ӕнгъӕл ӕй, неци ӕй, уотемӕй, уӕд ӕхе сайуй» (Гал. 6:3). Паддзах Соломон ба загъта: «Мӕгур, фал зундгин биццеу хуӕздӕр ӕй, унаффӕмӕ ка нӕбал игъосуй, уӕхӕн зӕронд, фал ӕнӕзунд паддзахӕй» (Еккл. 4:13).

12. Галатӕгтӕмӕ 2:11–14 финст хабарӕй цӕбӕл ахур кӕнӕн?

¹² Ӕргъуди кӕнӕн, апостол Петур ӕхе куд бадардта, апостол Павел ин иннети размӕ карзӕй ку бауайдзӕф кодта, уӕд. (Бакӕсӕ Галатӕгтӕмӕ 2:11–14.) Петури бон адтӕй Павелӕн зӕгъун: «Еуварсмӕ мӕ цӕмӕннӕ рахудтай ӕма мин уотемӕй цӕмӕннӕ загътай дӕ зӕгъуйнаг?» Фал Петур зундгин адӕймаг адтӕй. Ӕ унаффӕмӕ ин байгъуста ӕма имӕ ӕ зӕрди маст нӕ ниддардта. Е бӕрӕг ӕй, фӕстӕдӕр Павели «уарзон ӕнсувӕр» ке исхудта, уомӕй (2 Пет. 3:15).

13. Де ’мбалӕн дӕ унаффӕ раттун ку фӕндӕуа, уӕд дӕ зӕрдӕбӕл ци гъӕуама дарай?

¹³ Де ’мбалӕн дӕ унаффӕ раттун ку фӕндӕуа, уӕд дӕ зӕрдӕбӕл ци гъӕуама дарай? Ӕ хӕццӕ радзоруни размӕ бал дӕхе бафӕрсӕ: «Мӕхемӕ ӕгӕр раст нӕ кӕсун?» (Еккл. 7:16). «Ӕгӕр раст» адӕймаг иннетӕн, ӕхемӕ раст куд кӕсуй, уомӕ гӕсгӕ фӕттӕрхон кӕнуй, Хуцауи уагӕвӕрдтӕмӕ гӕсгӕ нӕ, фал, удта иннетӕн тӕрегъӕд кӕнун дӕр нӕ фӕззонуй. Фал кӕд де ’мбалмӕ уӕддӕр дӕ зӕрдӕ дзоруй, уӕд ӕ хӕццӕ радзорӕ. Фарстатӕ имӕ дӕттӕ, цӕмӕй ӕхуӕдӕг балӕдӕра, рӕдуд къахдзӕф ке кӕнуй, уой. Дӕ дзурдтӕ Библибӕл арӕзт уӕнтӕ. Иронх ди ма уӕд, де ’мбал Йегови рази дӕттуй дзуапп, дӕу рази нӕ, фал (Ром. 14:10). Дӕ зӕрдӕ дӕхе зундбӕл ма дарӕ, фал Хуцауи Дзурдбӕл, удта Киристей фӕнзӕ ӕма адӕнӕн тӕрегъӕд  кӕнун зонӕ (Ӕмб. 3:5; Матф. 12:20). Е ӕхсидзгӕ цӕмӕн ӕй? Уомӕн ӕма ду куд уай иннетӕн, Йеговӕ дӕр дӕуӕн уотӕ уодзӕй (Иак. 2:13).

14. Йегови организаци нӕбӕл куд тухсуй?

¹⁴ Йеговӕ нӕ царди надбӕл ӕ зӕнхон организаций фӕрци хонуй. Нӕ литературӕ, видеоӕрмӕг, удта нин не ’мбурдтӕ ӕнхус кӕнунцӕ Библий унаффитӕмӕ гӕсгӕ цӕрун. Цидӕриддӕр си базонӕн, етӕ еугурӕйдӕр Хуцауи Дзурдбӕл арӕзт фӕуунцӕ. Разамонӕг совети ӕнсувӕртӕ ести унаффӕ ку фӕххӕссунцӕ, зӕгъӕн, игъосун кӕнуни гъуддаги фӕдбӕл, уӕд сӕ зӕрдӕ Хуцауи сугъдӕг хъаурӕбӕл фӕддарунцӕ. Фал уӕддӕр рӕстӕгӕй-рӕстӕгмӕ Разамонӕг совети ӕнсувӕртӕ еци унаффитӕмӕ нӕуӕгӕй ӕркӕсунцӕ. Цӕмӕн? Уомӕн ӕма дуйней уавӕртӕ алли бон дӕр ӕййевгӕ кӕнунцӕ ӕма нӕ уонӕмӕ гӕсгӕ архайун фӕгъгъӕуй (1 Кор. 7:31).

15. Еуӕй-еу ӕмбурдти цӕхуӕн ӕййивддзийнӕдтӕ ӕрцудӕй ӕма е хуӕртӕ ӕма ӕнсувӕртӕбӕл куд рабӕрӕг ӕй?

¹⁵ Йегови организаци цӕхуӕндӕр ахурадӕ ӕндӕрхузи лӕдӕрун кӕнун ку райдайуй, уӕд уобӕл ӕнцонтӕй исарази уӕн. Фал нӕ цардбӕл ка рабӕрӕг уодзӕй, уӕхӕн амундтӕбӕл дзурд ку фӕццӕуй, уӕдта куд фӕййархайӕн? Зӕгъӕн, фӕстаг ӕнзти Паддзахади залтӕ аразун ӕма сӕмӕ зелун хъӕбӕр хъазармӕ хезуй. Уомӕ гӕсгӕ Разамонӕг совети ӕнсувӕртӕ унаффӕ рахастонцӕ, кӕцидӕр ӕмбурдтӕ байеу кӕнун, ка исуӕгъдӕ ’й, еци залтӕ ба рауӕйӕ кӕнун, ӕма еци ӕхцайӕй Паддзахади залтӕ исаразун, хъӕбӕрдӕр кӕми гъӕунцӕ, уӕхӕн бунӕтти. Кӕд уӕхӕн ӕййивддзийнӕдтӕ дӕу ӕмбурди дӕр ӕрцудӕнцӕ, уӕд дин, ӕвӕдзи, ӕнцон н’ адтӕй нӕуӕг уавӕртӕбӕл исахур ун. Еуӕй-еуети нур фулдӕр рӕстӕг фӕгъгъӕуй, цӕмӕй ӕмбурдмӕ бахъӕртонцӕ. Кадӕртӕ ба ’й нӕ лӕдӕрунцӕ, уойбӕрцӕ хъауритӕ кӕбӕл бахарз кодтонцӕ, еци зал нур цӕмӕн рауӕйӕ кодтонцӕ, уой. Ӕвӕдзи сӕмӕ уотӕ фӕккӕсуй ӕма ибӕл дзӕгъӕли фӕхъхъиамӕт кодтонцӕ. Фал уӕддӕр нӕ организаций амундтӕмӕ гӕсгӕ архайунцӕ, ӕма уой туххӕй растауйнаг ӕнцӕ.

16. Колоссӕгтӕмӕ 3:23, 24 финст дзурдтӕ нин куд ӕнхус кӕнунцӕ, цӕмӕй нӕ цийнӕ ма исафӕн?

¹⁶ Уӕхӕн ӕййивддзийнӕдтӕ ку ӕрцӕуй,  уӕд нӕ бон ци ӕй кӕнун, цӕмӕй Йеговӕн лӕггадӕ кӕнгӕй нӕ цийнӕ ма исафӕн? Гъӕуама нӕ зӕрдӕбӕл дарӕн, цидӕриддӕр кӕнӕн, уой Йеговӕн ке кӕнӕн, ӕма ӕ организацийӕн дӕр разамунд ӕхуӕдӕг ке дӕттуй. (Бакӕсӕ Колоссӕгтӕмӕ 3:23, 24.) Паддзах Давид дӕр нин еци гъуддаги фӕнзуйнаг ӕй. Ковӕндонӕ искӕнунмӕ Давид дуйне нисайнаг равардта, фал уӕддӕр загъта: «Ка дӕн ӕз ӕма ка ’нцӕ мӕ адӕн, цӕмӕй нӕ бон уа уӕхӕн лӕвӕрттӕ кӕнун? Алцидӕр дӕуӕй цӕуй, ӕма дӕ къохӕй ци райстан, уой дин дӕттӕн» (1 Анз. 29:14). Мах дӕр нисайнӕгтӕ ку фӕддӕттӕн, уӕд Йеговӕн раттӕн, ӕхуӕдӕг нин ци равардта, уой. Ӕма ин хъӕбӕр ӕхцӕуӕн фӕууй, ци гъуддаг нин баихӕс кодта, уомӕн нӕ хъауритӕ, нӕ рӕстӕг ӕма не ’хца ку нӕ февгъау кӕнӕн, уӕд (2 Кор. 9:7).

17. Раййевун дӕ ке гъӕуй, уой ку балӕдӕрай, уӕд дӕ нифс цӕмӕннӕ гъӕуама сӕтта?

¹⁷ Цӕмӕй, цардмӕ ка кӕнуй, еци унгӕг надӕй ма радзӕгъӕл уӕн, уой туххӕй гъӕуама идарддӕр дӕр Киристей къахвӕдтӕбӕл цӕуӕн (1 Пет. 2:21). Кӕд ӕй балӕдӕрдтӕ, естӕми ма дӕ раййевун ке гъӕуй, уой, уӕд дӕ нифс ма сӕттӕд. Е уобӕл дзорӕг ӕй, ӕма Йегови амундтӕмӕ уӕлӕнгай цӕстӕй нӕ кӕсис. Иронх ди ма уӕд, Йеговӕ ӕнӕнхӕст адӕнӕй уой нӕ агоруй, цӕмӕй Киристей ӕнхӕстӕй фӕнзонцӕ.

18. Цӕмӕй нӕуӕг дуйнемӕ бахъӕртӕн, уой туххӕй нӕ ци кӕнун гъӕуй?

¹⁸ Нӕуӕг дуйнемӕ ка кӕнуй, еци надӕй макумӕ базелӕ. Ку багъӕуа, уӕд цӕттӕ уо дӕ зундахаст ӕма дӕ гъуддӕгтӕ раййевунмӕ (Ӕмб. 4:25; Лук. 9:62). Сӕрниллӕг уо, «идарддӕр дӕр цийнӕ кӕнӕ, кӕми гъӕуй, уоми ӕййевӕ». Ӕма гъе уӕд «уарзондзийнади ӕма фарни Хуцау уодзӕй дӕ хӕццӕ» (2 Кор. 13:11). Йегови фӕрци цийнгӕнгӕй царди надбӕл нӕуӕг дуйнемӕ бахъӕртдзӕнӕ.