1. Цийфӕнди адӕймагӕн дӕр тӕккӕ зундгиндӕр унаффӕ ци уодзӕй?

АРӔХ ниййергутӕ ци унаффитӕ рахӕссунцӕ, етӕ сӕ сувӕллӕнттӕн се ’гас цардбӕл дӕр рабӕрӕг унцӕ. Раст унаффитӕ ку нӕ рахӕссунцӕ, уӕд сувӕллон гъезӕмари бафтуйуй. Фал зундгин унаффитӕ ку рахӕссунцӕ, уӕдта сувӕллонӕн фадуат раттунцӕ, цӕмӕй исуа амондгун ӕма ӕ цардӕй ӕ зӕрдӕ рохс кӕна. Сувӕллӕнттӕ сӕхуӕдтӕ дӕр гъӕуама зундгин унаффитӕ хӕссонцӕ. Тӕккӕ зундгиндӕр унаффӕ ба цийфӕнди адӕймагӕн дӕр уодзӕй нӕ уарзӕгой Фидӕ Йеговӕн лӕггадӕ кӕнун райдайун (Пс. 73:28).

2. Йесо ӕма ӕ ниййергутӕ цӕхуӕн унаффитӕ хастонцӕ?

² Иосиф ӕма Марийӕ ӕгас хъауритӕй архайдтонцӕ, цӕмӕй Йесо дӕр, удта сӕ иннӕ сувӕллӕнттӕ дӕр Йегови лӕггадгӕнгутӕ иссайуонцӕ. Ци унаффитӕ хастонцӕ, уонӕй бӕрӕг ӕй, Йеговӕн лӕггадӕ кӕнун син царди фиццаг бунати ке адтӕй (Лук. 2:40, 41, 52). Йесо дӕр зундгин унаффитӕ хаста, ӕма уой фӕрци ӕ бон иссӕй, Йеговӕ ин ци гъуддаг баихӕс кодта, уой исӕнхӕст кӕнун (Матф. 4:1–10). Йесо ку исустур ӕй, уӕд си рауадӕй хӕларзӕрдӕ, еузӕрдон ӕма нифсгун адӕймаг. Йегови ка уарзуй уӕхӕн ниййергутӕй алкӕмӕндӕр ӕхцӕуӕн адтайдӕ, уӕхӕн фурт син ку адтайдӕ, уӕд, ӕма си сӕрустур адтайуонцӕ.

3. Аци статьяй цӕхуӕн фарстатӕмӕ ӕркӕсдзиан?

³ Аци статьяй ӕркӕсдзиан уӕхӕн фарстатӕмӕ: Йеговӕ Киристей туххӕй цӕхуӕн унаффитӕ хаста? Иосиф ӕма Марийӕ киристон ниййергутӕн фӕнзуйнаг цӕмӕй ӕнцӕ? Ӕригон киристӕнттӕн Йесо фӕнзуйнаг цӕмӕй ӕй?

4. Йеговӕ ӕ Фурти туххӕй цӕхуӕн ӕхсидзгӕ унаффӕ рахаста?

⁴ Йеговӕ Йесойӕн дзӕбӕх ниййергути равзурста (Матф. 1:18–23; Лук. 1:26–38). Марийи зӕрдиаг дзурдтӕ финст ӕнцӕ Библий, ӕма ӕвдесунцӕ, Йегови дӕр ӕма ин ӕ Дзурд дӕр куд берӕ уарзта, уой (Лук. 1:46–55). Иосиф дӕр Хуцауи ке уарзта ӕма имӕ ке игъуста, е бӕрӕг ӕй, ӕ ихӕсмӕ цӕхуӕн цӕстӕй ракастӕй, уомӕй (Матф. 1:24).

5, 6. Йеговӕ ӕ Фурти цӕхуӕн зиндзийнӕдтӕй нӕ бахизта?

⁵ Йеговӕ Йесойӕн гъӕздуг ниййергутӕ нӕ равзурста. Йесо ку райгурдӕй, уӕд Иосиф ӕма Марийӕ ковӕндони цӕхуӕн нивонд ӕрхастонцӕ, уомӕй бӕрӕг ӕй, мӕгур бийнонтӕ ке адтӕнцӕ (Лук. 2:24). Назарети Иосифӕн, ӕвӕдзи, ӕ хӕдзари рази ести косӕн бунат адтӕй, гъӕдин дзаумӕуттӕ кӕми кодта, уӕхӕн. Удта сӕ бийнонтӕ, ӕвӕдзи, хъӕбӕр хумӕтӕг цард кодтонцӕ, уомӕн ӕма хӕдзари тӕккӕ минкъийдӕр авд сувӕллони адтӕй (Матф. 13:55, 56).

⁶ Йеговӕ ӕ Фурти цӕхуӕндӕр тӕссаг уавӕртӕй багъӕуай кодта, фал ӕй еугур зиндзийнӕдтӕй не ’суӕгъдӕ кодта (Матф. 2:13–15). Зӕгъӕн, ӕ хеуӕнттӕ фиццӕгти не ’ууӕндтӕнцӕ, Мессийӕ ке ӕй, уобӕл. Ӕма расагъӕс кӕнӕ, е ин куд зин адтайдӕ (Мар. 3:21; Иоан. 7:5). Уомӕй уӕлдай ма Йесойӕн ӕ зӕнхон фидӕ, ӕвӕдзи, раги рамардӕй, ӕма куд хестӕр фурт, уотӕ ӕ фиди куст уомӕн байзадӕй (Мар. 6:3). Куд устурдӕргӕнгӕ цудӕй, уотӕ ба бийнонтӕ даруни ихӕс дӕр ӕхемӕ райста. Ӕма ’й уой туххӕй, ӕвӕдзи, берӕ хъиамӕт кӕнун гъудӕй. Мадта уӕззау куст кӕнун ци ӕй, е ин ӕнӕзонгӕ н’ адтӕй.

7. а) Ниййергути цӕхуӕн фарстатӕбӕл гъӕуй расагъӕс кӕнун? б) Ӕмбесӕндти 2:1–6 куд финст ӕй, уомӕ гӕсгӕ ниййергутӕ сӕ сувӕллӕнтти цӕбӕл гъӕуама ахур кӕнонцӕ?

⁷ Кӕд дин цардӕмбал ес ӕма сувӕллӕнттӕбӕл сагъӕс кӕнтӕ, уӕд уӕхемӕ уӕхӕн фарстатӕ раттетӕ: «Йегови ӕма ин ӕ Дзурд ка уарзуй, уӕхӕн сӕрниллӕг ӕма хӕларзӕрдӕ адӕймӕгтӕ исхонӕн нӕ ес? Йеговӕ нин сувӕллони цард нӕ барӕ бакодтайдӕ?» (Пс. 127:3, 4). Кӕд уин ес сувӕллӕнттӕ, удта уӕхӕн фарстабӕл расагъӕс кӕнтӕ: Куст уарзунбӕл сӕ ахур кӕнун? (Еккл. 3:12, 13). Сайтани дуйней син тӕссаг цӕмӕй ӕй, уомӕй сӕ дзӕбӕх гъӕуай кӕнун? (Ӕмб. 22:3).  Уӕ сувӕллӕнтти алцӕмӕй нӕ багъӕуай кӕндзиайтӕ, удта уомӕн гӕнӕн дӕр нӕййес. Фал сӕ уӕ бон ӕй сабургай цӕттӕ кӕнун, царди ци зиндзийнӕдтӕ фӕууй, уонӕмӕ ӕма сӕ ахур кӕнун, цӕмӕй зунд Библий агоронцӕ. (Бакӕсӕ Ӕмбесӕндтӕ 2:1–6.) Зӕгъӕн, кӕд уӕ хеуӕнттӕй еске рӕстдзийнадӕ ниууагъта, уӕд уӕ сувӕллӕнттӕн Библий фӕрци балӕдӕрун кӕнтӕ, идарддӕр дӕр Йеговӕн еузӕрдонӕй лӕггадӕ кӕнун ӕхсидзгӕ цӕмӕн ӕй, уой (Пс. 31:23). Кенӕ ба уин кӕд еске рамардӕй, уӕдта сувӕллӕнттӕн бавдесетӕ, Хуцауи Дзурди уодӕнцойнӕ иссерӕн куд ес, уой (2 Кор. 1:3, 4; 2 Тим. 3:16).

8. Дуккаг закъони 6:6, 7 куд финст ӕй, уомӕ гӕсгӕ Иосиф ӕма Марийи куд гъудӕй архайун?

⁸ Йесо ку исустур ӕй, уӕд си Хуцауи цӕсти хуарз адӕймаг рауадӕй, уомӕн ӕма ’й Иосиф ӕма Марийӕ гъомбӕл кодтонцӕ, Йеговӕ куд амудта, уотӕ. (Бакӕсӕ Дуккаг закъон 6:6, 7.) Иосиф ӕма Марийӕ Йегови берӕ уарзтонцӕ ӕма сӕ фӕндадтӕй, цӕмӕй сӕ сувӕллӕнттӕ дӕр сӕ уӕларвон Фиди бауарзтайуонцӕ.

9. Иосиф ӕма Марийӕ ци кодтонцӕ, цӕмӕй Йеговӕй ма раидард адтайуонцӕ?

⁹ Иосиф ӕма Марийӕ сӕ сувӕллӕнтти хӕццӕ Йеговӕн кувтонцӕ. Етӕ алли къуӕре дӕр Назарети ӕмбурдгӕнӕнмӕ цудӕнцӕ, анзмӕ еу хатт ба цудӕнцӕ Йерусалиммӕ, Комуадзӕни бӕрӕгбонмӕ (Лук. 2:41; 4:16). Надбӕл, ӕвӕдзи, ӕмбалдӕнцӕ, Финстади ци бунӕтти кой цӕуй, уонӕбӕл, ӕма си Хуцауи адӕнбӕл ци хабӕрттӕ цудӕй, уони туххӕй Йесойӕн, удта ӕ хуӕртӕ ӕма е ’нсувӕртӕн дӕр дзурдтонцӕ. Иосиф ӕма Марийӕн сӕ цӕуӕтбӕл куд ӕфтуйгӕ цудӕй, уотӕ син зиндӕр адтӕй Йеговӕн ӕмбурд бийнонтӕй ковун. Фал сӕ хъиамӕттӕ дзӕгъӕли н’ адтӕнцӕ! Йегови гъуддӕгтӕ син фиццаг бунати ке адтӕнцӕ, уой фӕрци си нӕ раидард ӕнцӕ.

10. Хуцауи ка уарзуй, еци ниййергутӕ Иосиф ӕма Марийи хабарӕй цӕбӕл ахур кӕнунцӕ?

¹⁰ Хуцауи ка уарзуй, еци ниййергутӕ Иосиф ӕма Марийи хабарӕй цӕбӕл ахур кӕнунцӕ? Фиццагидӕр уӕ сувӕллӕнттӕн дзурдтӕй ӕма гъуддӕгтӕй ӕвдесетӕ, Йегови куд берӕ уарзетӕ, уой. Йегови бауарзунмӕ син ӕнхус кӕнтӕ. Уомӕй хуӕздӕр лӕвар син не ’скандзиайтӕ. Сумах фӕрци уӕ сувӕллӕнттӕ еу ӕхсидзгӕ гъуддаг балӕдӕрдзӕнцӕ:  царди син фиццаг бунати Хуцауи гъуддӕгтӕ ке гъӕуама уонцӕ – Библи ахур кӕнун, ковун, ӕмбурдтӕмӕ цӕун ӕма игъосун кӕнуни гъуддаги архайун (1 Тим. 6:6). Удта уобӕл дӕр куд нӕ архайетӕ, цӕмӕй уӕ сувӕллӕнттӕ маци гъӕуагӕ уонцӕ (1 Тим. 5:8). Фал уи иронх ма уӕд, аци фуддуйней кӕрони рӕстӕг фӕййервӕздзӕнцӕ ӕма Хуцауи нӕуӕг дуйней цӕрдзӕнцӕ ӕви нӕ, е кӕнгӕ уодзӕй, Йегови хӕццӕ син ци лимӕндзийнадӕ ес, уомӕй, цӕйбӕрцӕ мулк ӕма ӕхца сӕмӕ ес, уомӕй нӕ, фал * (Йез. 7:19; 1 Тим. 4:8).

11. а) 1 Тимофеймӕ 6:17–19 финст дзурдтӕ ниййергутӕн зундгин унаффитӕ хӕссунмӕ куд ӕнхус кӕнунцӕ? б) Цӕхуӕн нисӕнттӕ уӕ бон ӕй исӕвӕрун ӕма е уӕ бийнонтӕн цӕхуӕн арфӕдзийнӕдтӕ ӕрхӕсдзӕй? (Кӕсӕ рамкӕ « Цӕхуӕн нисӕнттӕ ес исӕвӕрӕн?».)

¹¹ Киристон ӕмбурди берӕ ес, раст унаффитӕ ка хӕссуй ӕма сӕ сувӕллӕнттӕн Йеговӕмӕ хӕстӕг кӕнун ка ӕнхус кӕнуй, уӕхӕн ниййергутӕ. Еци бийнонтӕ Йеговӕн еумӕ лӕггадӕ кӕнунцӕ: ӕмбурдтӕмӕ ӕма конгресстӕмӕ цӕунцӕ, хуарз хабар игъосун кӕнунцӕ, сауӕнгӕ ма е ’фстагмӕ кӕми фегъосун кӕнунцӕ, уӕхӕн территорити дӕр. Уомӕй уӕлдай ма Вефилмӕ дӕр экскурсимӕ ӕрбацӕунцӕ, удта арӕзтадон гъуддӕгти дӕр фӕййархайунцӕ. Уой туххӕй сӕ ӕхца бахарз кӕнун дӕр куд нӕ фӕгъгъӕуй, кӕмидӕр ба цидӕр зин уавӕрти сӕрти дӕр рахезун, фал еци бийнонтӕ ци арфӕдзийнӕдтӕй исхайгин унцӕ, етӕ уой аргъ ӕнцӕ. (Бакӕсӕ 1 Тимофеймӕ 6:17–19.) Уӕхӕн бийнонти ка гъомбӕл кӕнуй, еци сувӕллӕнттӕ ку исустур унцӕ, уӕд дӕр ма Хуцауи гъуддӕгти фӕййархайунцӕ, удта сӕ ниййергутӕй дӕр боз фӕуунцӕ, гъе уотӕ сӕ ке исахур кодтонцӕ, уой туххӕй! * (Ӕмб. 10:22).

12. Йесо ку исустур ӕй, уӕд ӕй ци гъудӕй кӕнун?

¹² Йесойӕн ӕ уӕларвон Фидӕ, удта ӕ зӕнхон ниййергутӕ дӕр ци унаффитӕ хастонцӕ, етӕ алкӕддӕр ӕ пайдайӕн адтӕнцӕ. Фал ку исустур ӕй, уӕдта унаффитӕ хӕссун ӕхе гъудӕй (Гал. 6:5). Йеговӕ Йесойӕн дӕр мах хузӕн равардта сӕребарӕдзийнадӕ. Ӕ бон адтӕй зӕрдидзӕбӕхӕн цӕрун, фал уотӕ нӕ бакодта. Йесо ци цард равзурста, уомӕй бӕрӕг ӕй, Йегови фӕндон ин тӕккӕ сӕйраг ке адтӕй (Иоан. 8:29). Йесой цӕветтон ӕригӕнттӕн куд банхус кӕндзӕй?

13. Йесо цӕхуӕн сувӕллон адтӕй?

¹³ Йесо ма сувӕллон ку адтӕй, уӕд ӕ ниййергутӕмӕ алкӕддӕр игъуста. Уотӕ некӕд сагъӕс кодта, ӕз уонӕй фулдӕр лӕдӕрун ӕма мӕ сӕ зундамунд некӕми гъӕуй, зӕгъгӕ. Фал син алкӕддӕр «адтӕй коммӕгӕс» (Лук. 2:51). Удта бийнонти медӕг хестӕр фурт ке адтӕй, уомӕ гӕсгӕ ибӕл цӕхуӕндӕр ихӕстӕ дӕр адтӕй ӕма уони дӕр  ӕнхӕст кодта. Ӕвӕдзи ’й ӕ зӕнхон фидӕ гъӕдин дзаумӕуттӕ кӕнунбӕл исахур кодта, цӕмӕй е дӕр бийнонтӕ дарун базудтайдӕ.

14. Кӕцӕй ӕй зонӕн, Йесо Финстадӕ лӕмбунӕг ке ӕртаста, уой?

¹⁴ Иосиф ӕма Марийӕ, ӕвӕдзи, Йесойӕн дзориуонцӕ, куд дессаги хузи райгурдӕй ӕма си Хуцауи минӕвӕрттӕ ци дзурдтонцӕ, уой (Лук. 2:8–19, 25–38). Фал Йесойӕн ӕ ниййергутӕ ке дзурдтонцӕ, уомӕй уӕлдай ма ӕхуӕдӕг дӕр Финстадӕ лӕмбунӕг ӕртаста. Кӕцӕй ӕй зонӕн? Йесобӕл 12 анзи ку цудӕй, уӕд ибӕл Йерусалими ахургӕнгутӕ десӕй мардӕнцӕ, «куд лӕдӕргӕ ӕй ӕма ци дзуӕппитӕ дӕттуй», зӕгъгӕ (Лук. 2:46, 47). Еци кари дӕр ӕй Йесо Финстади фӕрци балӕдӕрдтӕй, Йеговӕ ӕ Фидӕ ке ӕй (Лук. 2:42, 43, 49).

15. Йесойӕн Йегови фӕндон ӕнхӕст кӕнунӕй ӕхсидзгӕдӕр ке неци адтӕй, уой куд бавдиста?

¹⁵ Йесо ӕй ку базудта, Йеговӕ ин цӕхуӕн гъуддаг баихӕс кодта, уой, уӕд цӕттӕ адтӕй ӕ Фиди фӕндон исӕнхӕст кӕнунмӕ (Иоан. 6:38). Зудта ӕй, беретӕ си се ’сӕфт ке уиндзӕнцӕ, ӕма ин е дӕр зин куд н’ адтайдӕ. Фал уӕддӕр Йеговӕн коммӕгӕс адтӕй. Нӕ эри 29 анзи донаргъуд ку райста, уӕд е ’гас хъауритӕ дӕр, ӕ Фидӕ ин ке баихӕс кодта, еци гъуддаг исӕнхӕст кӕнунмӕ исаразта (Дзиуит. 10:5–7). Гъезӕмӕртти гъӕдӕбӕл мӕлгӕ ку кодта, уӕд дӕр ӕй федарӕй зудта, ӕ Фиди фӕндон исӕнхӕст кӕнунӕй ӕхсидзгӕдӕр ке неци ес (Иоан. 19:30).

16. Ӕригон киристӕнттӕ Йесойӕй цӕбӕл ахур кӕнунцӕ?

¹⁶ Дӕ ниййергутӕмӕ игъосӕ. Иосиф ӕма Марийи хузӕн дӕу ниййергутӕ дӕр ӕнӕнхӕст ӕнцӕ. Фал Йеговӕ уонӕн баихӕс кодта дӕу гъӕуай кӕнун ӕма дӕ ахур кӕнун. Ӕма сӕ ку нимайай, удта син сӕ унаффитӕн ку аргъ кӕнай, уӕд амондгун уодзӕнӕ (Еф. 6:1–4).

17. Йесо Навини 24:15 куд финст ӕй, уомӕ гӕсгӕ ӕригон киристӕнтти цӕхуӕн унаффӕ гъӕуй рахӕссун?

¹⁷ Кӕмӕн лӕггадӕ кӕндзӕнӕ, уой ниллух кӕнӕ. Гъӕуама ’й лӕдӕрай, Йеговӕ ка ӕй, цӕхуӕн фӕндӕ имӕ ес, ӕма е дӕумӕ ку хауй, уой (Ром. 12:2). Гъе уӕд дӕ бон исуодзӕй царди тӕккӕ ӕхсидзгӕдӕр унаффӕ рахӕссун – Йеговӕн лӕггадӕ кӕнун райдайун. (Бакӕсӕ Йесо Навин 24:15; Еккл. 12:1.) Библи алли бон дӕр ку кӕсай ӕма ’й ку ’ртасай, уӕд Йегови фулдӕр уарздзӕнӕ ӕма ибӕл хъӕбӕрдӕр ӕууӕнддзӕнӕ.

18. Ӕригӕнттӕ цӕхуӕн унаффӕ гъӕуама рахӕссонцӕ ӕма е сӕ цардбӕл куд рабӕрӕг уодзӕй?

 ¹⁸ Йеговӕн лӕггадӕ кӕнун дин царди фиццаг бунати уӕд. Сайтани дуйней зунд уотӕ ӕй, ӕма адӕймаг е ’скурдиӕдтӕй ӕрмӕстдӕр ӕхе хуарзӕн гъӕуама пайда кӕна, ӕма гъе уӕд уодзӕй амондгун. Фал ӕцӕгӕй ба ӕ царди тӕккӕ сӕйрагдӕр мулк кӕмӕн фӕууй, етӕ сӕхе берӕ мӕстити хай бакӕнунцӕ (1 Тим. 6:9, 10). Йеговӕмӕ ку игъосай ӕма ин ку лӕггадӕ кӕнай, уӕд дӕ царди зундгин унаффитӕ хӕсдзӕнӕ ӕма уодзӕнӕ амондгун (Йес. Н. 1:8).

19. Ниййергутӕ ци гъӕуама ма иронх кӕнонцӕ?

¹⁹ Ниййергутӕ, уӕ бон цидӕриддӕр ӕй, уой кӕнтӕ, цӕмӕй уӕ сувӕллӕнттӕ Йегови лӕггадгӕнгутӕ исуонцӕ. Уӕ зӕрдӕ Йеговӕбӕл даретӕ ӕма уӕ бон уодзӕй зундгин унаффитӕ хӕссун (Ӕмб. 3:5, 6). Иронх уи ма уӕд, сувӕллӕнттӕ уин фиццагидӕр уӕ гъуддӕгтӕмӕ ке кӕсунцӕ, ци дзоретӕ, уомӕ нӕ, фал. Мадта уӕ унаффитӕй уӕ сувӕллӕнттӕн ӕнхус кӕнтӕ, цӕмӕй Йегови хуарзӕнхӕ иссеронцӕ.

20. Йеговӕн лӕггадӕ кӕнун ка равзара, еци ӕригӕнттӕмӕ цӕхуӕн арфӕдзийнӕдтӕ ӕнгъӕлмӕ кӕсуй?

²⁰ Ӕригӕнттӕ, уӕ ниййергутӕ уин раст унаффитӕ рахӕссунмӕ банхус кӕндзӕнцӕ. Фал уи Йегови зӕрдӕ рохс кӕндзӕй ӕви нӕ, е ба уӕхецӕй кӕнгӕ ’й. Мадта Йесой фӕнзетӕ, ӕма уӕ царди над исуӕд нӕ уарзӕгой уӕларвон Фидӕн лӕггадӕ кӕнун. Ӕма гъе уӕд уӕ цард ӕцӕгӕйдӕр амондгун ӕма цийнӕйдзаг уодзӕй (1 Тим. 4:16). Йеговӕ уин арфӕ кӕндзӕй, федӕни ба уӕмӕ ӕнгъӕлмӕ кӕсдзӕй дессаги цард!