1, 2. 1 Тимофеймӕ 6:20 куд финст ӕй, уомӕ гӕсгӕ Тимофеййӕн ӕ барӕ ци бакодтонцӕ?

АДӔЙМАГ аргъ цӕмӕн фӕккӕнуй, уой арӕх еске бӕрагӕ бакӕнуй. Зӕгъӕн, беретӕ се ’хцатӕ банкки ниввӕрунцӕ, ке син сӕ багъӕуай кӕндзӕнцӕ ӕма син ке нӕ фесӕфдзӕнцӕ, уой нифсӕй. Мадта ести хъазар дзаума еске барӕ ку ниууадзӕн, уӕд е уобӕл дзорӕг фӕууй, ӕма ибӕл ӕууӕндӕн.

² Бакӕсӕ 1 Тимофеймӕ 6:20. Апостол Павел Тимофеййӕн ӕ зӕрдӕбӕл ӕрлӕуун кодта, ӕ барӕ ин дессаги лӕвар ке бакодтонцӕ – Хуцауи фӕндон зонун ӕма хуарз хабар игъосун кӕнун (2 Тим. 4:2, 5). Павел ӕй разӕнгард кодта, цӕмӕй еци лӕвар гъӕуай кодтайдӕ. Махӕн ба Йеговӕ нӕ барӕ ци бакодта? Ӕма уомӕн аргъ кӕнун цӕмӕн гъӕуй?

3, 4. Библий рӕстдзийнадӕн устур аргъ цӕмӕн ес?

³ Йеговӕ нин ӕ Дзурди ци рӕстдзийнадӕ раргом кодта, е ӕй хӕзна. Еци зонундзийнӕдтӕн устур аргъ ес, уомӕн ӕма уони фӕрци нӕ бон ӕй Йегови хӕццӕ лимӕн кӕнун ӕма ӕцӕг амондгун цард кӕнун. Библий ци финст ес, уобӕл ку ӕууӕндӕн, уӕд мӕнгӕ ахурӕдти цагъартӕ нӕ уодзиан, удта Хуцау е ’сӕфт кӕмӕй уинуй, уӕхӕн гъуддӕгтӕ дӕр нӕ кӕндзиан (1 Кор. 6:9–11).

⁴ Библий рӕстдзийнадӕн ма устур аргъ цӕмӕн ес? Уомӕн ӕма ’й Йеговӕ ӕрмӕстдӕр, «ӕносон царди надбӕл цӕун ке фӕндуй», уӕхӕн сӕрниллӕг адӕнӕн раргом кодта (Гъуд. 13:48). Уӕхӕн адӕн арази фӕуунцӕ, зундгин ӕма ӕууӕнкгун цагъар цӕбӕл ахур кӕнуй, уобӕл (Матф. 11:25; 24:45). Ӕнӕ еске ӕнхусӕй нӕ бон нӕй Библи балӕдӕрун – уомӕй устурдӕр хӕзна ба нӕййес (Ӕмб. 3:13, 15).

5. Йеговӕ ма нин нӕ барӕ цӕхуӕн хӕзна бакодта?

 ⁵ Адӕнӕн Йегови ӕма ӕ фӕндони туххӕй дзорун нӕ бон ке ӕй, е дӕр ӕй хӕзна (Матф. 24:14). Ци хабар игъосун кӕнӕн, уомӕн аргъ дӕр нӕййес, уомӕн ӕма уой фӕрци адӕн Йеговӕмӕ ӕрбахӕстӕг унцӕ ӕма син фӕззиннуй ӕносон царди нифс (1 Тим. 4:16). Игъосун кӕнуни гъуддаги кӕмӕндӕр ӕ бон фулдӕр ӕй, кӕмӕндӕр ба – минкъийдӕр, фал ни алкедӕр архайуй зӕнхӕбӕл тӕккӕ ӕхсидзгӕдӕр гъуддаги (1 Тим. 2:3, 4). «Хуцауи ӕмкосгутӕ» ке ан, е нин устур кадӕ ӕй (1 Кор. 3:9).

6. Еуӕй-еу киристӕнтти цӕмӕ ӕркодта, Хуцауи ӕмкосгутӕ ке адтӕнцӕ, уомӕн ке нӕбал аргъ кодтонцӕ, е?

⁶ Тимофеййи рӕстӕги еуӕй-еу киристӕнттӕ, Хуцауи ӕмкосгутӕ ке адтӕнцӕ, уомӕн нӕбал аргъ кодтонцӕ. Зӕгъӕн, Павели хӕццӕ ка лӕггадӕ кодта, еци Димас аци дуйне бауарзта ӕма ӕ лӕггадӕ ниууагъта (2 Тим. 4:10). Фигел ӕма Ермоген ба, ӕвӕдзи, фӕттарстӕнцӕ, етӕ дӕр Павели хузӕн ӕфхуӕрд ке баййафдзӕнцӕ, уомӕй ӕма нӕбал игъосун кодтонцӕ (2 Тим. 1:15). Именей, Александр ӕма Филит ба раст дини нихмӕ ка цудӕй, уонӕбӕл баууӕндтӕнцӕ ӕма рӕстдзийнадӕ ниууагътонцӕ (1 Тим. 1:19, 20; 2 Тим. 2:16–18). Кӕддӕр се ’гасемӕндӕр, ӕвӕдзи, се ’ууӕндундзийнадӕ федар адтӕй, фал сӕ барӕ ци хӕзна адтӕй, уой нӕ багъӕуай кодтонцӕ.

7. Сайтан нӕ нихмӕ цӕхуӕн мадзӕлттӕй пайда кӕнуй?

⁷ Сайтан архайуй, цӕмӕй нин Йеговӕ ци бабарӕ кодта, уобӕл нӕ къох ракъуӕрӕн. Ӕркӕсӕн ӕ мадзӕлттӕй цалдӕремӕ. Сайтан пайда кӕнуй телевизор, интернет, кинотӕ, газзеттӕ, журналтӕ ӕма киунугутӕй, цӕмӕй нин нӕ зундахаст исусхъуммӕ кӕна, ӕма нӕхе бафӕндӕуа рӕстдзийнадӕ ниууадзун. Уомӕй уӕлдай ма нӕ тӕрсун кӕнуй, не ’нгӕрттӕ нӕбӕл ке ходдзӕнцӕ кенӕ не знӕгтӕ нӕ фӕдбӕл ке зелдзӕнцӕ, уомӕй. Удта ма хийнӕй дӕр архайуй, ӕма нӕ сайуй, раст дин ка ниууагъта, уони «мӕнгӕ зонундзийнӕдтӕй» (1 Тим. 6:20, 21).

8. Ӕнсувӕр Данели хабарӕй цӕбӕл ахур кӕнис?

⁸ Лӕмбунӕг ку нӕ уӕн, уӕд нин тӕссаг уодзӕй, рӕстдзийнадӕн ке нӕбал аргъ кӕндзиан, уомӕй. Ӕркӕсӕн, видеогъӕзтитӕбӕл ка фӕййахур ӕй, еу уӕхӕн ӕнсувӕр Данели * хабармӕ. Данел зӕгъуй: «Видеогъӕзтитӕй гъазун райдӕдтон, 10 анзи мӕбӕл ку цудӕй, уӕд. Фиццӕгти си лӕгъузӕй неци адтӕй. Фал сабургай рахизтӕн, тухмиуӕ ӕма сайтӕнтти хӕццӕ баст гъуддӕгтӕ кӕми фӕууй, уӕхӕн гъӕзтитӕмӕ». Гъема  Данел бонмӕ еу 15 сахатти фӕббадидӕ еци гъӕзтитӕбӕл. Идарддӕр ба зӕгъуй: «Кӕмидӕр ӕй лӕдӕрдтӕн, уӕхӕн гъӕзтитӕй ке гъазун ӕма сӕбӕл уойбӕрцӕ рӕстӕг ке харз кӕнун, уой туххӕй Йеговӕй ке идард кӕнун. Фал мӕхецӕн дзурдтон, Библимӕ гӕсгӕ лӕгъузӕй неци кӕнун, зӕгъгӕ, ӕма уомӕй мӕхе сайдтон». Гӕнӕн ес, ӕма ерхӕфсӕнти туххӕй сабургай рӕстдзийнадӕй райеуварс уӕн ӕма ин мабал аргъ кӕнӕн. Уотемӕй нин Йеговӕ нӕ барӕ ци хӕзна бакодта, уомӕй фенӕхай уодзиан.

9. 1 Тимофеймӕ 1:18, 19 куд финст ӕй, уомӕ гӕсгӕ Павел Тимофеййи цӕмӕ разӕнгард кодта?

⁹ Бакӕсӕ 1 Тимофеймӕ 1:18, 19. Павел Тимофеййи разӕнгард кодта, «нифсгунӕй тох кӕнӕ», зӕгъгӕ. Фал ин ӕнӕуой тугъди кой нӕ кодта. Цума киристон адӕймаги ӕфсӕддони хӕццӕ рабарӕн цӕмӕн ес ӕма имӕ цӕхуӕн менеугутӕ гъӕуама уа? Ӕркӕсӕн, Павели цӕветтонӕй цӕхуӕн фондз гъуддагебӕл ахур кӕнӕн, уомӕ. Етӕ нин банхус кӕндзӕнцӕ, цӕмӕй нӕ барӕ ци хӕзна ес, уой багъӕуай кӕнӕн.

10. Хуцаубӕл еузӕрдон цӕмӕн гъӕуама уӕн?

¹⁰ Йеговӕбӕл еузӕрдон уо. Хуарз ӕфсӕддон еузӕрдондзийнадӕй бӕрӕг фӕууй. Е ӕгас хъауритӕй фӕттохуй, цӕмӕй ке уарзуй ӕма аргъ цӕмӕн кӕнуй, уой багъӕуай кӕна. Павел дӕр Тимофеййи разӕнгард кодта, цӕмӕй Хуцаубӕл еузӕрдон адтайдӕ (1 Тим. 4:7). Хуцауи ӕгас зӕрдӕй ку уарзӕн ӕма ибӕл еузӕрдон ку уӕн, уӕд нин нӕ барӕ ци бакодта, уой гъӕуай кӕндзиан (1 Тим. 4:8–10; 6:6).

11. Нӕхебӕл хъӕбӕрдӕр кӕнун цӕмӕн гъӕуама зонӕн?

¹¹ Дӕхебӕл хъӕбӕрдӕр кӕнӕ. Ӕфсӕддон гъӕуама федӕрттӕ арӕзт адтайдӕ, цӕмӕй цийфӕнди рӕстӕги дӕр тугъди будурмӕ рацӕунмӕ цӕттӕ адтайдӕ. Тимофей дӕр ӕууӕндундзийнади гъуддаги федӕрттӕй адтӕй, уомӕн ӕма Павели унаффӕмӕ гӕсгӕ, лӕгъуз фӕндти хӕццӕ тох кодта, Хуцауи зӕрдӕмӕ ка цӕуй уӕхӕн менеугутӕбӕл архайдта ӕма ӕ рӕстӕг хуӕртӕ ӕма ӕнсувӕрти хӕццӕ ӕрвиста (2 Тим. 2:22). Е ба ин ӕнтӕстӕй ӕхебӕл хъӕбӕрдӕр кӕнун ке зудта, уой фӕрци. Мах дӕр гъӕуама нӕхебӕл хъӕбӕрдӕр кӕнун зонӕн, цӕмӕй нӕ бон уа не ’нӕнхӕст бауӕри нихмӕ тох кӕнун (Ром. 7:21–25). Уой фӕрци нӕ бон уодзӕй идарддӕр дӕр нӕхебӕл косун ӕма нӕ зӕронд уодигъӕдӕ нӕуӕгмӕ ӕййевун (Еф. 4:22, 24). Изӕрӕрдӕмӕ ку бафӕллайӕн, уӕд нин ӕнцон нӕ фӕууй нӕхе исрӕвдзӕ кӕнун ӕма ӕмбурдмӕ фӕццӕун. Ӕма нӕ гъе уӕд дӕр фӕгъгъӕуй нӕхебӕл хъӕбӕрдӕр кӕнун (Дзиуит. 10:24, 25).

12. Нӕ бон ци ӕй кӕнун, цӕмӕй Библийӕй дзӕбӕх пайда кӕнун зонӕн?

¹² Цӕмӕй ӕфсӕддон хъӕмайӕй арӕхстгунӕй пайда кодтайдӕ, уой туххӕй ӕй алли бон дӕр архайун гъудӕй. Мах дӕр уотӕ архайун гъӕуй, цӕмӕй Хуцауи Дзурдӕй дзӕбӕх пайда кӕнун зонӕн (2 Тим. 2:15). Еци гъуддаги нин устур ӕнхус ӕнцӕ не ’мбурдтӕ. Фал нӕ кӕд фӕндуй, цӕмӕй Библий рӕстдзийнадӕн цӕхуӕн аргъ ес, уой иннетӕ дӕр базононцӕ, уӕд ӕй гъӕуама нӕхуӕдтӕ дӕр ӕдзох ӕртасӕн. Уой фӕрци не ’ууӕндундзийнадӕ федардӕр кӕндзӕй. Фал Библи уотид кӕсун фагӕ нӕй. Гъӕуама ци бакастан, уобӕл лӕмбунӕг сагъӕс кӕнӕн, удта ’й нӕ литератури фӕрци ӕртасӕн. Уотемӕй Библи нӕхуӕдтӕ дӕр раст лӕдӕрдзиан ӕма ’й иннетӕн дӕр лӕдӕрун кӕнун зондзиан (1 Тим. 4:13–15). Фал адӕймагӕн Библий стих бакӕсун фагӕ нӕ фӕууй. Гъӕуама ин ӕй балӕдӕрун кӕнӕн, еци стихи  дзурд цӕбӕл цӕуй ӕма уомӕ куд хауй, уой. Мадта Библи нӕхуӕдтӕ лӕмбунӕг ку ӕртасӕн, уӕд иннети ахур кӕнунмӕ дӕр хуӕздӕр арӕхсдзиан (2 Тим. 3:16, 17).

13. Дзиуиттӕгтӕмӕ 5:14 куд финст ӕй, уомӕ гӕсгӕ арфуинӕг цӕмӕн гъӕуама уӕн?

¹³ Арфуинӕг уо. Ӕфсӕддон ӕй гъӕуама рагацау зудтайдӕ, тӕссаг ин кӕми уодзӕй, уой ӕма уӕхӕн уавӕртӕй ӕхе гъӕуай кодтайдӕ. Мах дӕр гъӕуама арфуинӕг уӕн, цӕмӕй тӕссаг уавӕри ма бахауӕн (Ӕмб. 22:3; бакӕсӕ Дзиуиттӕгтӕмӕ 5:14). Зӕгъӕн, ерхӕфсӕнтӕ ӕвзаргӕй гъӕуама лӕмбунӕг уӕн. Арӕх телешоутӕ ӕма киноти ӕгъдауӕн ӕ кой дӕр нӕ фӕууй. Фал уӕхӕн миутӕ Хуцауи ӕгадӕ кӕнунцӕ, удта царди ристӕй уӕлдай неци хӕссунцӕ. Мадта гъӕуама нӕхе еуварс дарӕн, Хуцауӕй сабургай ке туххӕй раидард уодзиан, уӕхӕн ерхӕфсӕнтӕй (Еф. 5:5, 6).

14. Данел арфуинӕг ке адтӕй, е ин куд банхус кодта?

¹⁴ Уӕлдӕр ке кой кодтан, еци ӕнсувӕр Данел ӕй лӕдӕрун райдӕдта, тухмиуӕ ӕма сайтӕнтти хӕццӕ баст гъӕзтитӕ ’й хуарзӕй ке нецӕмӕ ӕркӕндзӕнцӕ. Ӕма нӕ электронон библиотеки (Watchtower Library) еци фарста дзӕбӕх рартаста. Цума ин е куд банхус кодта? Еци гъӕзтитӕ ниууагъта, цӕмӕй Йеговӕй ма раидард адтайдӕ. Данел зӕгъуй: «Мӕ рӕстӕг видеогъӕзтитӕбӕл харз кӕнуни бӕсти гъӕунгӕмӕ ракӕсинӕ, удта ӕмбурдӕй ме ’мбӕлтти хӕццӕ дӕр фулдӕр рӕстӕг ӕрветун райдӕдтон». Нур Данел лӕггадӕ кӕнуй пионерӕй ӕма хестӕр нӕлгоймагӕй.

15. Раст дин ка ниууагъта, уонӕмӕ игъосун тӕссаг цӕмӕн ӕй?

¹⁵ Мах дӕр ӕй Тимофеййи хузӕн гъӕуама лӕдӕрӕн, раст дин ка ниууагъта, уони дзубандитӕмӕ игъосун тӕссаг ке ӕй (1 Тим. 4:1, 7; 2 Тим. 2:16). Зӕгъӕн, етӕ аллихузи мӕнгӕттӕ фӕдздзорунцӕ, цӕмӕй не ’нсувӕртӕбӕл ӕма Йегови организацибӕл мабал ӕууӕндӕн. Уӕхӕн мӕнгӕтти туххӕй, гӕнӕн ес, ӕма не ’ууӕндундзийнадӕ ӕрлӕмӕгъ уа. Мадта гъӕуама нӕхе еци скъӕппӕгӕй гъӕуай кӕнӕн. Уӕхӕн хабӕрттӕ фӕккӕнунцӕ, «ӕ зунд усхъуммӕ кӕмӕн ӕй ӕма рӕстдзийнадӕй ӕхе ӕнӕхай ка фӕккодта», уӕхӕн адӕн. Сӕ нисан ӕй, цӕмӕй буцӕути бафтуйӕн (1 Тим. 6:4, 5). Уотӕ сӕ фӕндуй, цӕмӕй син сӕ мӕнгӕттӕбӕл баууӕндӕн ӕма не ’нсувӕртӕбӕл гурусхӕ кӕнун райдайӕн.

16. Нӕхе цӕмӕй гъӕуама хезӕн?

 ¹⁶ Ӕхсидзгӕдӕр ци ӕй, уой ма иронх кӕнӕ. Тимофей «Йесо Киристей бӕгъатӕр ӕфсӕддон» ке адтӕй, уомӕ гӕсгӕ ин царди фиццаг бунати адтӕй ӕ лӕггадӕ, ӕма аци дуйней гъӕздугдзийнадӕмӕ кенӕ ӕндӕр гъуддӕгтӕмӕ е ’ргом не ’здахта (2 Тим. 2:3, 4). Мах дӕр Тимофеййи хузӕн гъӕуама лӕмбуӕнӕг уӕн, цӕмӕй нӕ гъӕздугдзийнадӕ ӕ фӕдбӕл ма расайа, ӕндӕра Йеговӕй раидард уодзиан, Библийӕн нӕбал аргъ кӕндзиан ӕма нӕ хуарз хабар игъосун кӕнун нӕбал фӕнддзӕй (Матф. 13:22). Гъӕуама хумӕтӕг цард кӕнӕн, удта нӕ рӕстӕг ӕма нӕ хъауритӕ фиццагидӕр Хуцауи гъуддӕгтӕн дӕттӕн (Матф. 6:22–25, 33).

17, 18. Цӕмӕй Йегови хӕццӕ нӕ лимӕндзийнадӕ багъӕуай кӕнӕн, уой туххӕй нӕ ци кӕнун гъӕуй?

¹⁷ Ӕвӕстиатӕй архайунмӕ цӕттӕ уо. Ӕфсӕддони гъудӕй рагацау расагъӕс кӕнун, знаг ку ’рбалӕбора, уӕд куд архайдзӕй, уобӕл. Мах дӕр гъӕуама тӕссаг уавӕри ӕвӕстиатӕй архайӕн, цӕмӕй нин Йеговӕ ци бабарӕ кодта, уой багъӕуай кӕнӕн. Уой туххӕй ба гъӕуй рагацау расагъӕс кӕнун тӕссаг уавӕри куд архайдзиан, уобӕл.

¹⁸ Ӕрхӕссӕн цӕветтон. Хуӕдтӕхӕг цалинмӕ нӕма истӕхуй, уӕдмӕ адӕнӕн бавдесунцӕ, хӕстӕгдӕр рацӕуӕнтӕ кӕми ’нцӕ, уой. Цӕмӕн? Цӕмӕй ӕй, ести уӕд, зононцӕ, кӕбӕлти син лӕдзгӕ уодзӕй, уой. Уотӕ мах дӕр «кӕбӕлти ледздзиан», уой гъӕуама рагацау исбӕрӕг кӕнӕн, зӕгъӕн, киной, телепередачи кенӕ интернети тухмиуӕ кенӕ ӕнӕгъдау гъуддӕгтӕ ку фӕууинӕн, кенӕ ба, раст дин ка ниууагъта, уони мӕнгӕттӕбӕл ку исӕмбӕлӕн, уӕд. Уӕхӕн уавӕртӕмӕ нӕхе ку бацӕттӕ кӕнӕн, уӕд нӕ бон уодзӕй ӕвӕстиатӕй архайун, Йегови хӕццӕ нин ци лимӕндзийнадӕ ес, уой багъӕуай кӕнун ӕма ӕ цӕсти кӕдзосӕй байзайун (Пс. 101:3; 1 Тим. 4:12).

19. Йеговӕ нин ци бабарӕ кодта, уомӕн ку аргъ кӕнӕн, уӕд цӕхуӕн арфӕдзийнӕдтӕй исхайгин уодзиан?

¹⁹ Гъӕуама аргъ кӕнӕн, Йеговӕ нин нӕ барӕ ци бакодта, уомӕн – Библий рӕстдзийнадӕн ӕма нӕ бон иннети ахур кӕнун ке ӕй, уомӕн. Гъе уӕд нин Йегови рази уодзӕй кӕдзос цӕсгон, нӕ цард дзӕгъӕли нӕ уодзӕй, удта цийнӕ кӕндзиан, адӕнӕн Йегови базонунмӕ ке ӕнхус кӕнӕн, уобӕл. Йеговӕ нин ӕнӕмӕнгӕй банхус кӕндзӕй, цӕмӕй нин нӕ барӕ ци бакодта, уой багъӕуай кӕнӕн (1 Тим. 6:12, 19).