1. Йеговӕн лӕггадӕ кӕнун зиндӕр кӕд фӕууй?

ЙЕГОВӔН лӕггадӕ кӕнун ӕнцондӕр кӕд фӕууй, зиндзийнӕдтӕ ку ӕвзарай ӕви алцидӕр хуарз ку уа, уӕд? Зиндзийнӕдти рӕстӕг нӕ зӕрдӕ ӕной дӕр Йеговӕмӕ ’здӕхт фӕууй. Фал царди ку нецӕбӕл фӕттухсӕн, уӕдта? Ӕхсидзгӕдӕр ци ӕй, е ни нӕ феронх уй? Рагидзаманти Йеговӕ израилӕгти фӕдзахста, уомӕй син тӕссаг ке ӕй (Дук. з. 6:10–12).

2. Паддзах Асӕ нин цӕхуӕн цӕветтон ниууагъта?

² Ӕркӕсӕн паддзах Аси хабармӕ. Асӕ зундӕй архайдта, удта ӕ зӕрдӕ ӕгасӕйдӕр Йеговӕбӕл дардта. Йеговӕн айдагъ зин рӕстӕги нӕ лӕггадӕ кодта, фал сабур рӕстӕгути дӕр. Библий финст ӕй: «Цалинмӕ ӕгас адтӕй, уӕдмӕ ӕ зӕрдӕ ӕнӕгъӕнӕйдӕр адтӕй Йегови хӕццӕ» (1 Пад. 15:14). Зӕгъӕн, Асӕ Иуди зӕнхӕ мӕнгӕ хуцӕуттӕй искӕдзос кодта. Библи зӕгъуй: «Асӕ ниппурхӕ кодта ӕцӕгӕлон хуцӕутти нивондхӕссӕнтӕ ӕма ковӕн бунӕттӕ, басаста ковӕн дортӕ ӕма рахъан кодта ковӕн цӕгиндзитӕ» (2 Анз. 14:3, 5). «Ӕ мадимадӕ Маахӕн ба ӕ бартӕ байста, ӕма уосӕ-паддзах нӕбал адтӕй», уомӕн ӕма адӕни мӕнгӕ хуцӕуттӕмӕ ӕздахта (1 Пад. 15:11–13).

3. Аци статьяй цӕмӕ ӕркӕсдзиан?

³ Асӕ Иуди зӕнхӕ мӕнгӕ хуцӕуттӕй ке искӕдзос кодта,  уомӕй уӕлдай ма адӕни дӕр разӕнгард кодта, цӕмӕй Йеговӕмӕ раздахтайуонцӕ. Уомӕ гӕсгӕ Йеговӕ Асӕн дӕр ӕма израилӕгтӕн дӕр райарфӕ кодта ӕма «дӕс анзи зӕнхӕбӕл адтӕй сабурдзийнадӕ» (2 Анз. 14:1, 4, 6). Аци статьяй ӕркӕсдзиан, Асӕ, удта фиццаг ӕноси киристӕнттӕ куд архайдтонцӕ, цалинмӕ сабур рӕстӕг адтӕй, уӕдмӕ *. Фӕстагмӕ ба базондзиан, мах бон дӕр куд ӕй нӕ рӕстӕгӕй зундӕй пайда кӕнун, цалинмӕ нин Йеговӕн сӕребарӕй лӕггадӕ кӕнунмӕ фадуат ес, уӕдмӕ.

4. 2 Анзфинстити 14:2, 6, 7 куд финст ӕй, уомӕ гӕсгӕ Асӕ сабур рӕстӕгӕй куд пайда кодта?

⁴ Бакӕсӕ 2 Анзфинстити 14:2, 6, 7. Асӕ Иуди адӕнӕн загъта, Йеговӕ нин «аллирдиги ӕнцойадӕ равардта», зӕгъгӕ. Фал е уобӕл дзорӕг н’ адтӕй, ӕма нур сӕ бон ӕй ӕнӕмӕтӕ цард кӕнун. Еци рӕстӕги федаргонд горӕттӕ аразунмӕ февналдта. Асӕ Иуди цӕргутӕн загъта: «Зӕнхӕ нӕ къохи ӕй». Цума ’й ци зӕгъун фӕндадтӕй? Се знӕгтӕ сӕмӕ ке ӕрбампурсдзӕнцӕ, уомӕй син тӕссаг н’ адтӕй ӕма сӕ бон адтӕй сабурбӕл сӕ куст кӕнун. Асӕ адӕни баразӕнгард кодта, цӕмӕй сабур рӕстӕгӕй раст пайда кодтайуонцӕ.

5. Асӕ е ’фсад тохунмӕ цӕмӕн цӕттӕ кодта?

⁵ Удта ма Асӕ, цалинмӕ ин рӕстӕг адтӕй, уӕдмӕ е ’фсад дзӕбӕх бацӕттӕ кодта (2 Анз. 14:8). Цума е уобӕл дзорӕг адтӕй, ӕма Йеговӕбӕл ӕ зӕрдӕ нӕ дардта? Нӕ, е уобӕл дзорӕг н’ адтӕй. Е ӕй зудта, ӕ ихӕс ке ӕй ӕ адӕни зиндзийнӕдтӕмӕ бацӕттӕ кӕнун. Удта ма ’й лӕдӕрдтӕй, Иуди уӕхӕн сабур рӕстӕг алкӕд ке нӕ уодзӕй. Ӕма раст разиндтӕй.

6. Фиццаг ӕноси киристӕнттӕ сабур рӕстӕгӕй куд пайда кодтонцӕ?

⁶ Фиццаг ӕноси киристӕнттӕ ӕфхуӕрд арӕх ӕййафтонцӕ, фал сӕ царди сабур рӕстӕгутӕ дӕр уидӕ. Цума еци рӕстӕгӕй куд пайда кодтонцӕ? Еци еузӕрдон нӕлгоймӕгтӕ ӕма силгоймӕгтӕн Йеговӕн лӕггадӕ кӕнунӕй сӕйрагдӕр неци адтӕй, ӕма идарддӕр дӕр хуарз хабар зингзӕрдӕй игъосун кодтонцӕ. Ӕма уой фӕрци сӕ нимӕдзӕ дӕр фулдӕр кодта. Сабур рӕстӕгӕй раст ке пайда кодтонцӕ, уой туххӕй син Йеговӕ арфӕ кодта (Гъуд. 9:26–31).

7, 8. Павел ӕма иннӕ киристӕнттӕ куд архайдтонцӕ, игъосун кӕнунмӕ фадуат ку фӕззиннидӕ, уӕд?

⁷ Еци киристӕнттӕ хуарз хабар игъосун кӕнунмӕ алли фадуатӕй дӕр пайда кодтонцӕ. Зӕгъӕн, апостол Павел ӕй ку балӕдӕрдтӕй, Эфеси «лӕггадӕ кӕнунмӕ устур дуар [ке] райгон ӕй», уӕд еци горӕти байзадӕй ӕма си игъосун кодта (1 Кор. 16:8, 9).

⁸ Павел ӕма иннӕ киристӕнттӕ нӕ эри 49 анзи хъӕбӕр берӕ адӕнӕн игъосун кодтонцӕ. Еци анз апостолтӕ ӕма Йерусалими хестӕр нӕлгоймӕгтӕ сонӕт кӕнуни туххӕй фарста ниллух кодтонцӕ (Гъуд. 15:23–29). Ӕмбурдти хуӕртӕ ӕма ӕнсувӕртӕ еци унаффи туххӕй ку фегъустонцӕ, уӕд «Йегови дзурд» игъосун кӕнунмӕ никки зӕрдиагӕйдӕр февналдтонцӕ (Гъуд. 15:30–35). Цума син уой фӕрци ци бантӕстӕй? Библий финст ӕй: «Ӕмбурдти ахуркӕнуйнӕгти ӕууӕндундзийнадӕ федардӕр кодта ӕма бонӕй-бонмӕ фулдӕр кодтонцӕ» (Гъуд. 16:4, 5).

9. Берӕ бӕстити Йегови Ӕвдесӕнтӕн цӕхуӕн фадуат ес ӕма нӕхемӕ цӕхуӕн фарста гъӕуама раттӕн?

⁹ Абони берӕ бӕстити нӕ бон ӕй Йеговӕн сӕребарӕй лӕггадӕ кӕнун. Кӕд ду дӕр уӕхӕн рауӕн цӕрис, уӕд дӕхе бафӕрсӕ: «Еци фадуатӕй куд пайда кӕнун?» Мах хъӕбӕр дессаги рӕстӕг цӕрӕн. Аци дуйнейӕн ӕ кӕрон хӕстӕгӕй-хӕстӕгдӕр кӕнуй. Ӕма нӕ бон ӕй архайун историй тӕккӕ устурдӕр ӕма ӕхсидзгӕдӕр гъуддаги – игъосун кӕнуни ӕма ахуркӕнуйнӕгтӕ цӕттӕ кӕнуни гъуддаги (Мар. 13:10). Ӕма нин уомӕн берӕ аллихузи фадуӕттӕ ес.

10. 2 Тимофеймӕ 4:2 финст дзурдтӕ нӕ цӕмӕ разӕнгард кӕнунцӕ?

¹⁰ Нӕ бон куд ӕй сабур рӕстӕгӕй раст пайда кӕнун? (Бакӕсӕ 2 Тимофеймӕ 4:2.) Расагъӕс кӕнӕ, дӕ бон н’ адтайдӕ дӕ царди ести раййевун, цӕмӕй дӕхуӕдӕг кенӕ дӕ бийнонтӕй еске фулдӕр лӕггадӕ кӕнун райдайа, зӕгъӕн, пионерӕй? Абони еци рӕстӕг нӕй, цӕмӕй ӕхца кенӕ мулк ӕмбурд кӕнӕн. Устур бӕллӕхи рӕстӕг нин етӕ неци пайда уодзӕнцӕ (Ӕмб. 11:4; Матф. 6:31–33; 1 Иоан. 2:15–17).

11. Хуӕртӕ ӕма ӕнсувӕртӕй еуӕй-еуетӕ куд архайунцӕ, цӕмӕй фулдӕр адӕнӕн Йегови базонунмӕ банхус кӕнонцӕ?

¹¹ Хуӕртӕ ӕма ӕнсувӕртӕй беретӕ ӕндӕр ӕвзаг исахур кодтонцӕ, цӕмӕй фулдӕр адӕнӕн Йегови базонунмӕ банхус кӕнонцӕ. Хуцауи организаци дӕр еци игъосунгӕнгутӕн устур ӕнхус ӕй, уомӕн ӕма Библибӕл арӕзт ӕрмӕг хъӕбӕр берӕ ӕвзӕгтӕбӕл уадзуй. Зӕгъӕн, 2010 анзи нӕ литературӕ адтӕй 500 ӕвзагебӕл. Абони ба еци нимӕдзӕ 1 000 ӕвзагемӕй рахизтӕй!

12. Адӕн Библий рӕстдзийнадӕ сӕхе ӕвзагбӕл ку фегъосунцӕ, уӕд имӕ ци цӕстӕй ракӕсунцӕ? Ӕрхӕссӕ цӕветтон.

¹² Адӕн Библий рӕстдзийнадӕ сӕхе ӕвзагбӕл ку фегъосунцӕ, уӕд сӕмӕ хуӕздӕр багъаруй. Зӕгъӕн, еу хуӕрӕ адтӕй Регионалон конгресси Мемфиси (штат Теннесси,  АЕШ). Еци конгресс цудӕй ӕ мадӕлон киньяруандӕ ӕвзагбӕл. Еци ӕвзагбӕл ба дзорунцӕ Руандӕ, Конго ӕма Уганди. Хуӕрӕ зӕгъуй: «Америкӕмӕ 17 анзей размӕ ӕрлигъдтӕн. Ӕма гъе уал анземӕ конгресси алцидӕр фиццаг хатт балӕдӕрдтӕн». Еци хуӕрӕн ӕхе ӕвзагбӕл конгресс ӕ зӕрдӕбӕл хъӕбӕр бамбалдӕй. Дӕу бон ба н’ адтайдӕ ӕндӕр ӕвзаг исахур кӕнун ӕма уе ’мбурди территорий еци ӕвзагбӕл ка дзоруй, уонӕн игъосун кӕнун? Ка ’й зонуй, сӕмӕ сӕхе ӕвзагбӕл ку исдзорай, уӕд дӕмӕ никки хуӕздӕр байгъосдзӕнцӕ. Е дин ӕнӕмӕнгӕй устур цийнӕ ӕрхӕсдзӕй.

13. Уӕрӕсей хуӕртӕ ӕма ӕнсувӕртӕ сабур рӕстӕгӕй куд пайда кодтонцӕ?

¹³ Сӕребарӕй игъосун кӕнуни барӕ нин алкӕми нӕййес. Еуӕй-еу бӕстити нин хецауадӕ нӕ гъуддаг нихгӕнунцӕ. Зӕгъӕн, Уӕрӕсей берӕ ӕнзти дӕргъи Йегови Ӕвдесӕнти ӕфхуардтонцӕ. Фал син 1991 анзи ба сӕребарӕй игъосун кӕнуни барӕ равардтонцӕ. Уӕди рӕстӕги Уӕрӕсей хуарз хабар игъосун кодтонцӕ 16 000 игъосунгӕнӕги. 20 анзей фӕсте ба иссӕнцӕ 160 000 игъосунгӕнӕгемӕй фулдӕр. Бӕрӕг ӕй, хуӕртӕ ӕма ӕнсувӕртӕ сӕ рӕстӕг дзӕгъӕли ке нӕ исафтонцӕ. Ӕма син кӕд еци сабур рӕстӕг фӕцӕй, уӕддӕр сӕ зинг нӕ ниххустӕй. Сӕ уавӕрти сӕ бон ци ӕй, уой зӕрдиагӕй кӕнунцӕ.

14, 15. Йеговӕ Асӕн банхус кӕнунмӕ ӕ хъаурӕ куд бавдиста?

¹⁴ Паддзах Аси дзамани сабур рӕстӕг фӕцӕй, Иуди зӕнхӕмӕ эфиопӕгтӕ ку ӕрбампурстонцӕ, уӕд. Се ’фсади адтӕй еу милиуан ӕфсӕддони. Сӕ сӕргълӕууӕг Зарӕ ӕппундӕр нӕ гурусхӕ кодта, ке сӕ ниппурхӕ кӕндзӕй, уобӕл. Фал Асӕ ефиопаг ӕфсади нимӕдзӕмӕ нӕ кастӕй – е ӕ  зӕрдӕ дардта Йеговӕбӕл. Аса кувта: «Банхус нин кӕнӕ, о Йеговӕ, нӕ Хуцау, уомӕн ӕма дӕубӕл дарӕн нӕ зӕрдӕ ӕма дӕу номӕй рацудан аци берӕ адӕни нихмӕ» (2 Анз. 14:11).

¹⁵ Кӕд эфиопаг ӕфсад дууӕ хатти устурдӕр адтӕй, уӕддӕр ӕй Асӕ зудта, Алцигъон Хуцау Йеговӕ ӕ адӕнӕн ке банхус кӕндзӕй. Ӕма ’й Йеговӕ нӕ фӕффудӕнгъӕл кодта: эфиопӕгтӕ цагъди фӕцӕнцӕ (2 Анз. 14:8–13).

16. Тагъд сабур рӕстӕг ке фӕууодзӕй, уой кӕцӕй зонӕн?

¹⁶ Нӕ царди уавӕртӕ идарддӕр куд уодзӕнцӕ, е бӕрӕг нӕй. Фал сабур рӕстӕг берӕ ке нӕ рахӕсдзӕй, уой ба федарӕй зонӕн. Йесо загъта, фӕстаг бӕнтти ни ӕгас адӕн дӕр се ’сӕфт ке уиндзӕнцӕ (Матф. 24:9). Апостол Павел дӕр дзурдта: «Хуцаубӕл еузӕрдон ка ӕй ӕма Йесо Киристей хӕццӕ еудзийнади цӕрун ке фӕндуй, етӕ ӕгасӕйдӕр ӕфхуӕрд ӕййафдзӕнцӕ» (2 Тим. 3:12). Библи куд зӕгъуй, уомӕ гӕсгӕ Сайтан «хъӕбӕр мӕстгун ӕй», ӕма нӕмӕ кӕд уотӕ кӕсуй, ӕма ин ӕ мастбӕл не ’сӕмбӕлдзиан, уӕд нӕхе сайӕн (Рарг. 12:12).

17. Тагъд рӕстӕги цӕхуӕн фӕлварӕнтӕбӕл исӕмбӕлдзиан?

¹⁷ Тагъд ни алкӕмӕндӕр е ’ууӕндундзийнадӕ фӕлвӕрд ӕрцӕудзӕй, уомӕн ӕма уодзӕй, «дуйней фӕззиндӕй нурмӕ ка некӕдма адтӕй, уӕхӕн устур бӕллӕх» (Матф. 24:21). Ка ’й зонуй, еци рӕстӕги нӕ хеуӕнттӕ дӕр нӕ нихмӕ рацӕудзӕнцӕ, хецауадӕ ба нин нӕ гъуддаг нихгӕндзӕй (Матф. 10:35, 36). Ду дӕр Аси хузӕн федарӕй ӕууӕнддзӕнӕ, Йеговӕ дин ке банхус кӕндзӕй ӕма дӕ ке багъӕуай кӕндзӕй, уобӕл?

18. Дзиуиттӕгтӕмӕ 10:38, 39 куд финст ӕй, уомӕ гӕсгӕ федӕни хабӕрттӕмӕ цӕттӕ цӕй фӕрци уодзиан?

¹⁸ Йеговӕ нин алцидӕр дӕттуй, цӕмӕй нӕ бацӕттӕ кӕна, ци нӕмӕ ӕнгъӕлмӕ кӕсуй, уомӕ. Ӕууӕнкгун ӕма зундгин цагъари фӕрци нин «хуӕруйнаг афойнадӕбӕл дӕттуй», цӕмӕй не ’ууӕндундзийнадӕ федар уа (Матф. 24:45). Фал не ’ууӕндундзийнадӕ федар кӕнунбӕл нӕхуӕдтӕ дӕр гъӕуама архайӕн. (Бакӕсӕ Дзиуиттӕгтӕмӕ 10:38, 39.)

19, 20. 1 Анзфинстити 28:9 ци финст ес, уомӕ гӕсгӕ дӕхемӕ цӕхуӕн фарстатӕ гъӕуама раттай ӕма сӕбӕл расагъӕс кӕнун ӕхсидзгӕ цӕмӕн ӕй?

 ¹⁹ Паддзах Аси хузӕн мах дӕр гъӕуама «Йегови агорӕн» (2 Анз. 14:4; 15:1, 2). Йегови агорун ба райдайӕн, ку ’й базонӕн ӕма донаргъуд ку райсӕн, уӕд. Уой фӕсте дӕр не ’гас хъауритӕй фӕййархайӕн, цӕмӕй Йеговӕмӕ хӕстӕгӕй-хӕстӕгдӕр кӕнӕн. Дӕхе бафӕрсӕ: «Ӕмбурдтӕ нӕ фӕццох кӕнун?» Не ’мбурдти фӕрци нӕ бон фӕууй Йеговӕн идарддӕр лӕггадӕ кӕнун, нӕ хуӕртӕ ӕма ӕнсувӕртӕ ба нин нӕ нифс бафедар кӕнунцӕ (Матф. 11:28). Удта ма аци фарстатӕбӕл дӕр расагъӕс кӕнӕ: Библи алли бон дӕр фӕккӕсис? Кӕд дин бийнонтӕ ес, уӕд уӕмӕ алли къуӕре дӕр бийнонти ахур фӕууй? Кӕд еунӕгӕй цӕрис, уӕдта алли къуӕре дӕр рӕстӕг рахецӕн кӕнис, цӕмӕй Библи ӕма нӕ публикацитӕ лӕмбунӕг ӕртасай? Хуарз хабар игъосун кӕнунмӕ ӕма ахуркӕнуйнӕгтӕ цӕттӕ кӕнунмӕ дӕ уавӕрти дӕ бон ци ӕй, уой кӕнис?

²⁰ Аци фарстатӕбӕл расагъӕс кӕнун цӕмӕн гъӕуй? Библий финст ӕй, Йеговӕ алке зӕрдӕмӕ дӕр ке кӕсуй, цӕмӕй ин ӕ гъудитӕ ӕма ӕ фӕндтӕ базона. (Бакӕсӕ 1 Анзфинстити 28:9.) Ӕма нӕхе дӕр уотӕ архайун гъӕуй. Кӕд ӕй уинӕн, нӕ нисӕнттӕ кенӕ нӕ зундахаст раййевун гъӕуй, уӕд гъӕуама Йеговӕй ӕнхус корӕн. Нур уӕлдай ӕхсидзгӕдӕр ӕй федӕни фӕлварӕнтӕмӕ нӕхе цӕттӕ кӕнун. Мадта сабур рӕстӕгӕй раст пайда кӕнӕ!