1, 2. Нӕ эри 33 анзи Фӕндзайӕймаг бон цӕхуӕн дессаги хабар ӕрцудӕй?

НӔ ЭРИ 33 анзи ралӕудтӕй Фӕндзайӕймаг бон. Хуцаубони сӕумӕй Йерусалими хӕдзӕрттӕй еуеми уӕллаг уати ӕрӕмбурд ӕнцӕ 120 ахуркӕнуйнаги (Гъуд. 1:13–15; 2:1). Цалдӕр боней размӕ син Йесо бафӕдзахста, цӕмӕй Йерусалимӕй макумӕ рандӕ адтайуонцӕ, уомӕн ӕма гъӕуама цидӕр дессаги лӕварӕй исхайгин адтайуонцӕ (Гъуд. 1:4, 5). Цума уой фӕсте ци ’рцудӕй?

² Библий финст ӕй: «Ӕвваст уӕларвӕй уӕхӕн унӕр ӕригъустӕй, цума тухдунгӕ исистадӕй, ӕма, ци хӕдзари бадтӕнцӕ, е унӕрӕй байдзаг ӕй». Уой фӕсте ахуркӕнуйнӕгтӕй алке сӕрмӕ дӕр фӕззиндтӕй «арти ӕвзаг» ӕма «еугурӕйдӕр Хуцауи сугъдӕг хъаурӕй исхайгин ӕнцӕ» (Гъуд. 2:2–4). Гъе уотемӕй сӕ Йеговӕ дессаги хузи ӕ сугъдӕг хъаурӕй исхайгин кодта (Гъуд. 1:8). Етӕ адтӕнцӕ, сугъдӕг хъаурӕй исӕрст ка ӕрцудӕй *, уонӕй фиццӕгтӕ ӕма син лӕвӕрд ӕрцудӕй нифс, Йесой хӕццӕ уӕлӕрвти паддзӕхтӕ ке уодзӕнцӕ.

3. Фӕндзайӕймаг бон ка ӕрӕмбурд ӕй, еци ахуркӕнуйнӕгтӕ цӕмӕннӕ дузӕрдуг кодтонцӕ, сугъдӕг хъаурӕй исӕрст ке ӕрцудӕнцӕ, уобӕл?

³ Ду дӕр еци бон ахуркӕнуйнӕгти астӕу ку адтайсӕ, уӕд ди е, ӕвӕдзи, некӕд байронх адтайдӕ. Дӕ цӕститӕбӕл рауайун кӕнӕ: дӕ сӕрмӕ арти ӕвзаг цӕфсуй ӕма ӕндӕр ӕвзӕгтӕбӕл дзорун райдӕдтай (Гъуд. 2:5–12). Хуцау дӕ ӕ сугъдӕг  хъаурӕй ке байсарста, уобӕл ӕппундӕр нӕ дузӕрдуг кодтайсӕ. Фал цума сугъдӕг хъаурӕй исӕрст ка ӕрцудӕй, уонӕй алкӕбӕлдӕр уӕхӕн дессаги хабар ӕрцӕуй? Нӕъ. Кӕцӕй ӕй зонӕн?

4. Фиццаг ӕноси киристӕнттӕ сугъдӕг хъаурӕй цӕхуӕндӕр бӕлвурд рӕстӕги исхайгин уиуонцӕ? Ба ’й лӕдӕрун кӕнӕ.

⁴ Ӕркӕсӕн адӕймаг исӕрст кӕд ӕрцӕуидӕ. Нӕ эри 33 анзи Фӕндзайӕймаг бон сугъдӕг хъаурӕй исӕрст айдагъ еци 120 киристони не ’рцудӕнцӕ. Еци бон ма фӕстӕдӕр никкидӕр 3 000 адӕймаги исхайгин ӕнцӕ сугъдӕг хъаурӕй. Етӕ исӕрст ӕрцудӕнцӕ донаргъуд ку райстонцӕ, уӕд (Гъуд. 2:37, 38, 41). Фал сугъдӕг хъаурӕй исӕрст ка ӕрцудӕй, уонӕй алке донаргъуди рӕстӕг исӕрст не ’рцудӕй. Зӕгъӕн, самарийӕгтӕ донаргъуд райстонцӕ, фал сугъдӕг хъаурӕй ба фӕстӕдӕр исхайгин ӕнцӕ (Гъуд. 8:14–17). Корнилий ӕма ӕ хӕдзаронтӕ ба исӕрст ӕрцудӕнцӕ, донаргъуд ку нӕма райстонцӕ, уӕд, фал уӕхӕн хабар ӕрмӕстдӕр еунӕг хатт адтӕй (Гъуд. 10:44–48).

5. 2 Коринфӕгтӕмӕ 1:21, 22 куд финст ӕй, уомӕ гӕсгӕ адӕймаг кутемӕй ӕрцӕуй исӕрст?

⁵ Нур ба ӕркӕсӕн, адӕймаг сугъдӕг хъаурӕй кутемӕй ӕрцӕуй исӕрст, уомӕ. Сугъдӕг хъаурӕй исӕрст ка ӕрцӕуй, уонӕй еуӕй-еуетӕй зинтӕй феруагӕс кӕнуй, Йеговӕ уони ке равзурста, е. Еуӕй-еуетӕ си фӕззӕгъунцӕ: «Хуцау мӕн цӕмӕн равзурста»? Иннетӕмӕ ба ӕндӕрхузи сагъӕстӕ фӕззиннуй. Кудфӕнди ма уа, уӕддӕр ӕй апостол Павел балӕдӕрун кодта, адӕймаг сугъдӕг хъаурӕй исӕрст кутемӕй ӕрцӕуй, уой. Павел загъта: «Ӕма ку баууӕндтайтӕ, уӕд сумахбӕл дӕр Киристей фӕрци Хуцау мухур * исӕвардта, зӕрдӕ кӕмӕй байвардта, еци сугъдӕг хъаурӕй» (Еф. 1:13, 14). Мадта Йегови сугъдӕг хъаури фӕрци еци киристӕнттӕ бӕлвурдӕй фӕззонунцӕ, ӕвзурст ке ӕрцудӕнцӕ, уой. Гъе уотемӕй син сугъдӕг хъаурӕ ӕвдесӕн фӕууй, ӕма ’й федарӕй фӕззонунцӕ федӕни ӕносмӕ уӕлӕрвти ке цӕрдзӕнцӕ, зӕнхӕбӕл нӕ фал. (Бакӕсӕ 2 Коринфӕгтӕмӕ 1:21, 22.)

6. Цӕмӕй киристон ӕ уӕларвон хуӕрзеуӕг райса, уой туххӕй ӕй ци кӕнун гъӕуй?

⁶ Киристон сугъдӕг хъаурӕй исӕрст ке ’рцудӕй, е цума уобӕл дзорӕг ӕй, ӕма уӕларвон  хуӕрзеуӕг ӕ къохи ӕй? Нӕъ. Уӕхӕн киристон ӕй федарӕй фӕззонуй, Йеговӕ ’й уӕларвон цардмӕ ке равзурста. Фал уӕддӕр гъӕуама ӕ зӕрдӕбӕл дара аци дзурдтӕ: «Ӕнсувӕртӕ, никки зӕрдиагдӕрӕй архайетӕ, цӕмӕй, Хуцау уӕ цӕмӕ ӕрхудта ӕма цӕмӕн равзурста, уомӕй ӕцӕгӕйдӕр хайгин уайтӕ. Уотӕ ку кӕнайтӕ, уӕд некӕд фӕккеудзиайтӕ» (2 Пет. 1:10). Мадта кӕд киристон уӕларвон цардмӕ ӕвзурст ӕрцудӕй, уӕддӕр цӕмӕй еци хуӕрзеуӕг райса, уой туххӕй гъӕуама кӕронмӕ дӕр еузӕрдонӕй байзайа (Фил. 3:12–14; Дзиуит. 3:1; Рарг. 2:10).

7. Киристон ӕй куд базонуй, уӕларвон цардмӕ ӕвзурст ке ’рцудӕй, уой?

⁷ Фал ӕй киристон куд базонуй, уӕларвон цардмӕ ӕвзурст ке ’рцудӕй, уой? Бӕлвурд дзуапп ес, Павел Роми киристӕнттӕмӕ ке ниффинста, еци дзурдти. Еци киристӕнтти «Хуцау... ӕрхудта, цӕмӕй сугъдӕгутӕ уонцӕ». Ӕма сӕмӕ Павел ниффинста: «Ци сугъдӕг хъаурӕй исхайгин ан, е ни цагъартӕ нӕ кӕнуй ӕма нӕ нӕуӕгӕй таси не ’фтауй. Фал ни еци сугъдӕг хъаури фӕрци Хуцау ӕхецӕн искодта фурттӕ. Ӕма нӕ еци сугъдӕг хъаурӕ разӕнгард кӕнуй, цӕмӕй дзорӕн: „Аввӕ, нӕ Фидӕ!“ Хуцауи сугъдӕг хъаурӕ нӕ уоди хӕццӕ еумӕ ӕвдесӕн лӕууй, мах Хуцауи сувӕллӕнттӕ ке ан, уомӕн» (Ром. 1:7; 8:15, 16). Мадта Хуцау ӕ сугъдӕг хъаури фӕрци исӕрст киристӕнттӕн бӕлвурдӕй лӕдӕрун кӕнуй, уӕларвон цардмӕ хунд ке ӕрцудӕнцӕ, уой (1 Фес. 2:12).

8. 1 Иоанни 2:20, 27 куд финст ӕй, уомӕ гӕсгӕ исӕрст киристӕнтти еске загъд цӕмӕннӕ гъӕуй, исӕрст ке ӕрцудӕнцӕ, уомӕн?

⁸ Йеговӕ син ӕй гъе уотӕ бӕлвурдӕй балӕдӕрун кӕнуй ӕма ӕппундӕр нӕ фӕггурусхӕ кӕнунцӕ, уӕлӕрвтӕмӕ ӕвзурст ке ӕрцудӕнцӕ, уобӕл. (Бакӕсӕ 1 Иоанни 2:20, 27.) Ке зӕгъун ӕй гъӕуй, исӕрст киристӕнттӕ дӕр гъӕуама иннети хузӕн игъосонцӕ, Йеговӕ ӕмбурди фӕрци ци разамунд дӕттуй, уомӕ. Фал исӕрст ке ӕрцудӕнцӕ, уомӕн ба сӕ еске загъд нӕ гъӕуй. Йеговӕ Дун-дуйней тӕккӕ устурдӕр хъаурӕй, ӕ сугъдӕг хъаурӕй испайда кодта, цӕмӕй ӕй бӕлвурдӕй балӕдӕрдтайуонцӕ, уӕларвон цардмӕ хунд ке ӕрцудӕнцӕ, уой!

9. Ефесӕгтӕмӕ 1:18 куд финст ӕй, уомӕ гӕсгӕ, киристон сугъдӕг хъаурӕй исӕрст ку ӕрцӕуй, уӕд си цӕхуӕн ӕййивддзийнӕдтӕ ӕрцӕуй?

⁹ Хуцауи лӕггадгӕнгутӕй беретӕн зин балӕдӕрӕн ӕй, киристон Хуцауи сугъдӕг хъаурӕй исӕрст ку ӕрцӕуй, уӕд ӕ хурфи цитӕ фӕццӕуй, уой. Ӕма е дессаг дӕр нӕй, уомӕн ӕма уой беретӕ сӕхебӕл нӕ бавзурстонцӕ. Удта ӕной дӕр адӕймаг зӕнхӕбӕл цӕрунмӕ конд ӕй (Райд. 1:28; Пс. 37:29). Фал кедӕрти ба Йеговӕ уӕлӕрвти цӕрунмӕ равзурста. Ӕма адӕймаг сугъдӕг хъаурӕй исӕрст ку ӕрцӕуй, уӕд ин Йеговӕ ӕ нифс раййевуй ӕма ӕндӕрхузи сагъӕс кӕнун райдайуй. Уой фӕсте адӕймаг фенгъӕлмӕ кӕсуй уӕларвон цардмӕ. (Бакӕсӕ Ефесӕгтӕмӕ 1:18.)

10. Нӕуӕгӕй райгурун ци нисан кӕнуй? (Кӕсӕ ма феппайуйнаг дӕр.)

¹⁰ Киристон сугъдӕг хъаурӕй исӕрст ку ’рцӕуй, уӕд нӕуӕгӕй райгуруй *. Йесо куд загъта, уомӕ гӕсгӕ исӕрст ка нӕй, уонӕн ӕй кӕронмӕ нӕ балӕдӕрун кӕндзӕнӕ, нӕуӕгӕй райгурун кенӕ сугъдӕг хъаурӕй райгурун ци нисан кӕнуй, уой (Иоан. 3:3–8, феп.).

11. Киристон исӕрст ку ’рцӕуй, уӕд ӕндӕрхузи сагъӕс кӕнун куд райдайуй?

¹¹ Киристӕнттӕ исӕрст ку ’рцӕунцӕ, уӕд ӕндӕрхузи сагъӕс кӕнун куд райдайунцӕ? Цалинмӕ син Йеговӕ уӕларвон царди нифс нӕ раттуй, уӕдмӕ сӕ нифс фӕууй ӕносон цард зӕнхӕбӕл. Етӕ дӕр хъӕбӕр ӕнгъӕлмӕ  кастӕнцӕ, Йеговӕ ӕгас зӕнхӕ дӕр фудгъуддӕгтӕй кӕд искӕдзос кӕндзӕй ӕма си дзенет кӕд рауайун кӕндзӕй, еци рӕстӕгмӕ. Ка ’й зонуй, сӕ цӕститӕбӕл уадӕй, ка син рамардӕй, еци хеуӕнтти ӕма ӕмбӕлтти нӕуӕгӕй куд фӕууиндзӕнцӕ, е. Фал сугъдӕг хъаурӕй исӕрст ку ’рцудӕнцӕ, уӕдта ӕндӕрхузи сагъӕс кӕнун райдӕдтонцӕ. Цума цӕмӕн? Уотӕ зӕгъӕн нӕййес, ӕма зӕнхон царди нифс сӕ зӕрдӕмӕ нӕбал цӕуй. Удта цӕхуӕндӕр зиндзийнӕдти туххӕй дӕр нӕ райдӕдтонцӕ ӕндӕрхузи сагъӕс кӕнун. Мадта сӕмӕ уотӕ кӕсун дӕр нӕ райдӕдта, ӕма зӕнхӕбӕл цард ӕнкъард уодзӕй. Уӕхӕн ӕййивддзийнӕдтӕ сӕбӕл уомӕн ӕрцудӕй, ӕма син Йеговӕ ӕ сугъдӕг хъаури фӕрци сӕ зундахаст раййивта ӕма син ӕндӕр нифс равардта.

12. 1 Петури 1:3, 4 куд финст ӕй, уомӕ гӕсгӕ исӕрст киристӕнттӕ сӕ нифсмӕ цӕхуӕн цӕстӕй кӕсунцӕ?

¹² Исӕрст ка ’рцӕуй, еци киристӕнттӕй кадӕртӕ сӕхе уӕхӕн кади аккагбӕл нӕ фӕннимайунцӕ. Фал Йеговӕ уони ке равзурста, уобӕл ба ӕппундӕр нӕ фӕггурусхӕ кӕнунцӕ. Сӕ уӕларвон нифсбӕл ку фӕссагъӕс кӕнунцӕ, уӕд сӕ зӕрдитӕ цийнӕй байдзаг унцӕ. (Бакӕсӕ 1 Петури 1:3, 4.)

13. Исӕрст киристӕнттӕ сӕ зӕнхон цардмӕ цӕхуӕн цӕстӕй кӕсунцӕ?

¹³ Мадта цума е уобӕл дзорӕг ӕй, ӕма исӕрст киристӕнтти тагъддӕр рамӕлун фӕндуй? Апостол Павел дзуапп дӕттуй аци фарстабӕл. Е исӕрст киристони бауӕр рабарста цатури хӕццӕ ӕма загъта: «Аци цатури медӕг уаргъи буни гъзӕмарӕй мӕлӕн. Уой туххӕй нӕ, ӕма си ку фӕййервӕзианӕ, е нӕ фӕндуй, фал нӕ фӕндуй ӕндӕри бацӕрун, цӕмӕй цард ранихъуӕра, мӕлӕти барӕ цӕбӕл цӕуй, уой» (2 Кор. 5:4). Еци киристӕнттӕ сӕ зӕнхон цардӕй нӕ багъигӕ ’нцӕ ӕма сӕ тагъддӕр рамӕлун дӕр нӕ фӕндуй. Етӕ сӕ цардбӕл цийнӕ кӕнунцӕ ӕма сӕ фӕндуй аллибон дӕр Йеговӕн лӕггадӕ кӕнун сӕ бийнонти ӕма се ’мбӕлтти хӕццӕ. Фал син ци дессаги нифс ес, уой дӕр некӕд иронх кӕнунцӕ (1 Кор. 15:53; 2 Пет. 1:4; 1 Иоан. 3:2, 3; Рарг. 20:6).

14. Адӕймаг исӕрст ке ӕрцудӕй, е цӕмӕй нӕ фӕууй бӕрӕг?

¹⁴ Кӕд дӕмӕ уотӕ кӕсуй, ӕма Йегови сугъдӕг хъаурӕй исӕрст ӕрцудтӕ, уӕд расагъӕс кӕнӕ аци ӕхсидзгӕ фарстатӕбӕл: уотӕ зӕгъӕн ес, ӕма дӕ Йегови фӕндон ӕнхӕст кӕнун хъӕбӕр фӕндуй? Игъосун кӕнуни гъуддаги зингзӕрдӕй архайис? Дӕ зӕрдӕмӕ цӕуй Библи ӕртасун ӕма «Хуцауи арф зунд» хуӕздӕр лӕдӕрун? (1 Кор. 2:10). Уотӕ зӕгъӕн ес, ӕма дин Йегови фӕрци игъосун кӕнуни гъуддаги берӕ бантӕстӕй? Иннетӕн Йегови туххӕй базонунмӕ ӕнхус кӕнун дӕ ихӕсбӕл нимайис? Федарӕй ӕй зонис, Йеговӕ дин царди медӕги еу ӕма дууӕ хатти ке нӕ банхус кодта? Кӕд аци фарстатӕбӕл еугуребӕлдӕр «гъо» загътай, уӕд е уобӕл дзорӕг ӕй, ӕма дин уӕларвон нифс ес? Нӕ, е уобӕл дзорӕг нӕй. Цӕмӕннӕ? Уомӕн ӕма Йегови лӕггадгӕнгутӕй алке бон дӕр ӕй аци фарстатӕбӕл «гъо» зӕгъун. Йеговӕ ӕ сугъдӕг хъаури фӕрци ӕ лӕггадгӕнгутӕй кӕмӕнфӕнди дӕр банхус кӕндзӕй, цӕмӕй аци гъуддӕгтӕ ӕ къохи бафтуйонцӕ, фӕнди ин зӕнхон нифс уа, фӕнди уӕларвон. Кӕд исӕрст ке ӕрцудтӕ, уобӕл еу минкъийдӕр дузӕрдуг кӕнис, уӕд айдагъ е дӕр уобӕл дзорӕг ӕй, ӕма дин уӕларвон нифс нӕййес. Йеговӕ ке равзуста, етӕ дузӕрдуг нӕ фӕккӕнунцӕ, исӕрст ке ӕрцудӕнцӕ, уобӕл. Етӕ уой федарӕй фӕззонунцӕ!

15. Кӕцӕй ӕй зонӕн, сугъдӕг хъаурӕй ка исхайгин ӕй, етӕ еугурӕй уӕларвон цардмӕ ӕвзурст ке не ’рцудӕнцӕ?

¹⁵ Йеговӕ ӕ сугъдӕг хъаурӕй ке исхайгин кодта, фал уӕларвон нифс кӕмӕн н’ адтӕй, уӕхӕн лӕггадгӕнгути хабӕрттӕ Библий берӕ ес. Зӕгъӕн, паддзах Давид дӕр сугъдӕг хъаури разамундӕй архайдта (1 Сам. 16:13). Сугъдӕг хъаури фӕрци Давид Йегови туххӕй  берӕ цидӕртӕ базудта, удта Библий кӕцидӕр хӕйттӕ дӕр ниффинста (Мар. 12:36). Фал си уӕддӕр апостол Петур загъта «Давид... уӕларвмӕ не ’ссудӕй», зӕгъгӕ (Гъуд. 2:34). Аргъауӕг Иоанн дӕр Хуцауи сугъдӕг хъаурӕй хайгин адтӕй (Лук. 1:13–16). Киристе си уотӕ загъта, силгоймагӕй ка райгурдӕй, уонӕй, дан, Аргъауӕг Иоаннӕй уӕлдӕр н’ адтӕй, фал, дан, уӕларвон Паддзахадӕмӕ ба нӕ бацӕудзӕй (Матф. 11:10, 11). Йеговӕ еци лӕггадгӕнгутӕн ӕ сугъдӕг хъаурӕ дессаги гъуддӕгтӕ кӕнунмӕ лӕвардта, фал е уобӕл дзорӕг нӕй, ӕма сӕ уӕларвон цардмӕ равзурста. Цума уотӕ зӕгъӕн ес, ӕма уӕларвон цардмӕ ӕвзурст ка ӕрцудӕй, уони хузӕн еузӕрдон н’ адтӕнцӕ? Нӕ. Е ӕрмӕстдӕр уобӕл дзорӕг ӕй, ӕма сӕ Йеговӕ зӕнхӕбӕл дзенети цӕрунмӕ райгас кӕндзӕй (Иоан. 5:28, 29; Гъуд. 24:15).

16. Хуцауи лӕггадгӕнгутӕй беретӕ цӕмӕ ӕнгъӕлмӕ кӕсунцӕ?

¹⁶ Абони Хуцауи лӕггадгӕнгутӕй сӕ фулдӕр уӕларвон царди нифсӕй хайгин нӕ ’нцӕ. Етӕ дӕр, Авраам, Саррӕ, Давид, Аргъауӕг Иоанн ӕма ма рагидзаманти ка цардӕй, уонӕй берӕ ӕндӕр еузӕрдон нӕлгоймӕгтӕ ӕма силгоймӕгти хузӕн ӕнгъӕлмӕ кӕсунцӕ, зӕнхӕ Хуцауи Паддзахади дӕлбарӕ кӕд исуодзӕй, еци рӕстӕгмӕ (Дзиуит. 11:10).

17. Иннӕ статьяй дзурд цӕбӕл цӕудзӕй?

¹⁷ Исӕрст киристӕнттӕ ма абони дӕр не ’хсӕн ке ’нцӕ, уомӕ гӕсгӕ нӕмӕ фӕззиннуй цӕхуӕндӕр фарстатӕ (Рарг. 12:17). Исӕрст киристӕнттӕ сӕхемӕ цӕхуӕн цӕстӕй гъӕуама кӕсонцӕ? Имисӕн изӕри рӕстӕг уе ’мбурдӕй еске нисӕнттӕй ахуадун ку райдайа, уӕд имӕ цӕхуӕн цӕстӕй кӕсун гъӕуй? Удта уӕхӕн киристӕнтти нимӕдзӕ фулдӕр ке кӕнуй, уобӕл нӕ тухсун гъӕуй? Аци фарстатӕбӕл дзурд цӕудзӕй иннӕ статьяй.