1. Йеговӕ ӕ лӕггадгӕнгути туххӕй ци зонуй?

«ЙЕГОВӔ уарзуй ӕ адӕни» (2 Анз. 2:11). Библий нин ауӕхӕн дзурдтӕ кӕсун ӕхцӕуӕн фӕууй. Йеговӕ нин нӕ хуарз менеугутӕ зонуй, удта ’й уинуй, нӕ бон ци ӕй, уой ӕма нин ӕнхус кӕнуй, цӕмӕй имӕ бахӕстӕг уӕн. Еузӕрдон ибӕл ку уӕн, уӕд ӕносмӕ дӕр уодзиан е ’мбӕлттӕ (Иоан. 6:44).

2. Еуӕй-еуетӕй цӕмӕннӕ феруагӕс кӕнуй, Йеговӕ сӕ ке уарзуй, е?

² Фал кадӕр зӕгъдзӕй: «Гъо, Йеговӕ ӕ адӕни уарзуй, фал мӕн ке уарзуй, уой ба кӕцӕй гъӕуама зонон?» Цума еуӕй-еуетӕмӕ уӕхӕн сагъӕстӕ цӕмӕн фӕззиннуй? Еу хуӕрӕ Оксанӕбӕл * сувӕллонӕй цидӕр лӕгъуз хабӕрттӕ ӕрцудӕй, ӕма зӕгъуй: «Донаргъуд ку райстон ӕма пионерӕй лӕггадӕ кӕнун ку райдӕдтон, уӕд хъӕбӕр амондгун адтӕн. Фал 15 анзей фӕсте мӕ зӕрди ӕфтуйун райдӕдтонцӕ, сувӕллонӕй мӕбӕл ци хабӕрттӕ ӕрцудӕй, етӕ, ӕма мӕ уӕгъдӕ нӕ уагътонцӕ. Уотӕ кӕсун мӕмӕ райдӕдта, ӕма ми Йеговӕ арази нӕбал ӕй, удта ӕ уарзти аккаг дӕр нӕ дӕн». Иннӕ пионер хуӕрӕ Юайӕн дӕр ӕ сувӕллони бонтӕ хуӕрзтӕй н’ адтӕнцӕ, ӕма зӕгъуй: «Мӕ цард Йеговӕн уой туххӕй иснивонд кодтон, ӕма мӕ фӕндадтӕй ӕ зӕрдӕ рохс кӕнун, фал мӕ ескӕд бауарздзӕй – е ба ми не ’руагӕс кодта».

3. Аци статьяй дзурд цӕбӕл цӕудзӕй?

³ Ӕвӕдзи, сумах дӕр, аци еузӕрдон хуӕрти хузӕн Йегови уарзетӕ, фал уӕ е дӕр ке уарзуй, е ба уи кӕронмӕ не ’руагӕс кӕнуй. Йеговӕ нин хъӕбӕр устур аргъ ке кӕнуй, уобӕл федарӕй ӕууӕндун цӕмӕн гъӕуй? Удта нӕмӕ уотӕ ку кӕса, ӕма нӕ Йеговӕ нӕ уарзуй, уӕд нин ци банхус кӕндзӕй? Гъӕйдӕ ӕркӕсӕн аци фарстатӕмӕ.

4. Йеговӕ нӕ ке уарзуй, уобӕл гурусхӕ кӕнун тӕссаг цӕмӕн ӕй?

⁴ Уарзондзийнадӕ адӕймагӕн устур хъаурӕ дӕттуй. Йеговӕ нӕ ке уарзуй ӕма нин ке ӕнхус кӕндзӕй, уобӕл ку ’ууӕндӕн, уӕд ин цийфӕнди зин рӕстӕги дӕр ӕгас зӕрдӕй лӕггадӕ кӕндзиан. Фал уобӕл гурусхӕ ку кӕнӕн, уӕдта нӕмӕ «хъаурӕ кӕцӕй уодзӕй»? (Ӕмб. 24:10). Мадта нӕ нифс ку басӕтта ӕма нӕ Хуцау ке уарзуй, уобӕл ку нӕбал ӕууӕндӕн, уӕд Сайтани амӕттаг ӕнцонтӕй бауодзиан (Еф. 6:16).

5. Еуӕй-еу хуӕртӕ ӕма ӕнсувӕртӕ, Йеговӕ сӕ ке уарзуй, уобӕл ку фӕггурусхӕ кӕнунцӕ, уӕд сӕ е цӕмӕ ӕркӕнуй?

⁵ Еуӕй-еу хуӕртӕ ӕма ӕнсувӕртӕ, Хуцау сӕ ке уарзуй, уобӕл гурусхӕ кӕнун ке райдӕдтонцӕ, уой туххӕй ӕрмӕтъӕл ӕнцӕ. Еу хестӕр нӕлгоймаг Джеймс зӕгъуй: «Ӕз лӕггадӕ кодтон Вефили, удта ма фӕсарӕйнаг ӕвзагбӕл кӕми дзорунцӕ, уӕхӕн ӕмбурди. Фал ми Йеговӕ арази ке ӕй, е ба ми не ’руагӕс кодта. Еу рӕстӕг ба мин мӕ кувдтитӕ ке игъосуй, уобӕл дӕр гурусхӕ кӕнун райдӕдтон». Евӕ дӕр Вефили лӕггадӕ кӕнуй, ӕма зӕгъуй: «Ӕз ӕй балӕдӕрдтӕн, Йеговӕ дӕ ке уарзуй, уобӕл гурусхӕ кӕнун тӕссаг ке ӕй, уомӕн ӕма уӕд адӕймаг ӕ къохтӕ ӕруадзуй. Нӕбал ӕй фӕффӕндуй Йегови гъуддӕгти архайун, удта ин ӕ лӕггадӕ дӕр цийнӕ нӕбал фӕххӕссуй». Майкл ба лӕггадӕ кӕнуй пионерӕй, удта хестӕр нӕлгоймагӕй, ӕма зӕгъуй: «Йегови цӕсти хъазар ке дӕ, уобӕл ку не ’ууӕндай, уӕд си раидард уодзӕнӕ».

6. Йеговӕ дӕ ке уарзуй, уобӕл гурусхӕ кӕнун ку райдайай, уӕд дӕ ци гъӕуй бакӕнун?

⁶ Бӕрӕг ӕй, Йеговӕ нӕ ке уарзуй, уобӕл ку гурусхӕ кӕнӕн, уӕд е не ’ууӕндундзийнадӕн тӕссаг ке уодзӕй. Фал дӕмӕ уӕхӕн сагъӕстӕ ку фӕззинна, уӕд ци гъӕуама кӕнай? Йеговӕмӕ ковӕ, цӕмӕй дин ратта ӕ фарнӕ, «зунд кӕбӕл нӕ хъӕртуй, еци фарнӕ» ӕма дин е дӕ зӕрдӕ ӕма дӕ зунд багъӕуай кӕндзӕй (Пс. 139:23; Фил. 4:6, 7). Удта дӕ зӕрдӕбӕл дарӕ, уӕхӕн сагъӕстӕ иннӕ еузӕрдон хуӕртӕ ӕма ӕнсувӕртӕмӕ дӕр ке фӕззиннуй. Уӕхӕн сагъӕстӕ рагидзаманти Йегови еузӕрдон лӕггадгӕнгутӕмӕ дӕр фӕззиннидӕ. Сӕ еу адтӕй апостол Павел. Гъӕйдӕ ӕркӕсӕн, ӕ хабарӕй ин цӕбӕл ахур кӕнӕн, уомӕ.

7. Павел цӕхуӕн зиндзийнӕдтӕбӕл ӕмбалдӕй?

⁷ Ескӕд дӕмӕ уотӕ фӕккӕсуй, ӕма дӕбӕл ӕгӕр берӕ ихӕстӕ ес ӕма се ’гасебӕл нӕ хъӕртис? Апостол Павел дӕр уӕхӕн уавӕри адтӕй. Айдагъ еу ӕмбурди мӕтӕ имӕ н’ адтӕй, фал загъта: «Еунӕг бон дӕр [мин] ӕнцойнӕ нӕ дӕттуй ӕгас ӕмбурдти мӕтӕ» (2 Кор. 11:23–28). Кенӕ ба дӕ, ка ’й зонуй, цӕхуӕндӕр нез тухсун кӕнуй. Е дӕр Павелӕн ӕнӕзонгӕ н’ адтӕй. Еу цидӕр ӕй тухсун кодта, ӕма ’й исхудта бауӕри синдзӕ. Е, ӕвӕдзи, адтӕй, хъӕбӕр кӕмӕй тухстӕй, уӕхӕн нез (2 Кор. 12:7–10). Кадӕр ба ӕ рӕдудтитӕй уотӕ бафӕллайуй ӕма ӕ къохтӕ ӕруадзуй. Павел дӕр адтӕй уӕхӕн уавӕри. Еу хатт загъта: «Мӕнӕ ци мӕгур дӕн!» Уотӕ уомӕн загъта, ӕма ’й алкӕддӕр гъудӕй ӕхе хӕццӕ тох кӕнун, цӕмӕй раст ци ӕй, уой кодтайдӕ (Ром. 7:21–24).

8. Павелӕн ци ӕнхус кодта зиндзийнӕдти рӕстӕг дӕр Йеговӕбӕл еузӕрдонӕй байзайунмӕ?

⁸ Кӕд Павел берӕ зинтӕ ӕвзурста, уӕддӕр Йеговӕн лӕггадӕ кодта. Цума ин хъауритӕ ци лӕвардта? Ӕ рӕдудтитӕ хуарз зудта, фал Киристей нивондбӕл федар ӕууӕндтӕй. Павел нӕ иронх кодта Йесой дзурдтӕ: «Хуцау... ӕ еунӕг Фурти равардта, цӕмӕй ибӕл кадӕриддӕр ӕууӕндуй, е ма фесӕфа, фал ӕносон цардӕй хайгин уа» (Иоан. 3:16; Ром. 6:23). Павел ӕй федарӕй зудта, Йеговӕ ке хатир кӕнуй, уӕззау тӕрегъӕд ка искодта, фал ка ӕрфӕсмон кодта, уонӕн дӕр (Пс. 86:5).

9. Галатӕгтӕмӕ 2:20 финст дзурдтӕ нин цӕбӕл дзорӕг ӕнцӕ?

⁹ Павел ӕй зудта, Хуцауи уарзтӕн устур хъаурӕ ке ес, уомӕн ӕма ’й лӕдӕрдтӕй, Хуцау ӕ Фурти уой туххӕй дӕр ке равардта. (Бакӕсӕ Галатӕгтӕмӕ 2:20.) Дӕ гъос ӕрдарай Йесой туххӕй цӕхуӕн дзурдтӕ ниффинста, уомӕ: «Мӕн ка бауарзта ӕма мӕн туххӕй ӕ цард ка равардта». Павел ӕхемӕ уойбӕрцӕбӕл лӕгъуз нӕ кастӕй, цӕмӕй ӕй Хуцау ма уарза. Удта уотӕ дӕр нӕ сагъӕс кодта: «Йеговӕ хуӕртӕ ӕма ӕнсувӕрти цӕмӕн уарзуй, уой лӕдӕрун, фал мӕн ба цӕй туххӕй гъӕуама уарза?» Роми киристӕнттӕн сӕ зӕрдӕбӕл ӕрлӕуун кодта: «Киристе мах туххӕй, тӕрегъӕдгунтӕ ма ку адтан, уӕд... рамардӕй» (Ром. 5:8). Мадта федарӕй зӕгъӕн ес, ӕма Йеговӕ ӕ лӕггадгӕнгутӕй алкедӕр уарзуй!

10. Ромӕгтӕмӕ 8:38, 39 финст дзурдтӕй цӕбӕл ахур кӕнӕн?

¹⁰ Бакӕсӕ Ромӕгтӕмӕ 8:38, 39. Павел ӕппундӕр нӕ гурусхӕ кодта, Хуцауи уарзтӕн  устур хъаурӕ ке ес, уобӕл. Е ӕй федарӕй зудта, Хуцауи уарзтӕй нӕ ке неци рахецӕн кӕндзӕй. Павел ӕй зудта, Йеговӕ израилӕгтӕн, удта ӕхецӕн дӕр цӕйбӕрцӕ ниххатир кодта, уой. Ӕндӕр дзурдтӕй Павел загъта: «Йеговӕ ӕ Фурти рарвиста, цӕмӕй мӕн туххӕй рамардайдӕ. Мадта ма ибӕл уӕд куд гъӕуама гурусхӕ кӕнон, ке мӕ уарзуй, уобӕл?» (Ром. 8:32).

11. 1 Тимофеймӕ 1:12–15 куд финст ӕй, уомӕ гӕсгӕ кӕд Павел берӕ тӕрегъӕдтӕ искодта, уӕддӕр федарӕй цӕмӕн ӕууӕндтӕй, Йеговӕ ’й ке уарзуй, уобӕл?

¹¹ Бакӕсӕ 1 Тимофеймӕ 1:12–15. Рӕстӕгӕй-рӕстӕгмӕ Павелӕн ӕ зӕрди ӕрифтуиуонцӕ ӕ раздӕри гъуддӕгтӕ ӕма ӕхе хуӕрун райдаидӕ. Ӕхе туххӕй загъта: «Тӕрегъӕдгунтӕй ӕз дӕн сӕ фиццаг». Павел ӕхецӕй уотӕ ке загъта, е дессаг нӕй. Киристон ку нӕма иссӕй, уӕд Киристей ахуркӕнуйнӕгти хъӕбӕр ӕфхуардта. Кедӕрти си ахӕстдони бакӕнидӕ, кӕмӕндӕрти ба сӕ мӕлӕти тӕрхонбӕл ӕ къох исдаридӕ (Гъуд. 26:10, 11). Павели фудӕй ке рамардтонцӕ, еци киристӕнттӕн цӕуӕт дӕр куд н’ адтайдӕ. Ӕма си кӕд ӕмбурди ескӕбӕл рамбалдӕй, уӕд, расагъӕс кӕнӕ, куд рацайдӕ. Павел ӕ раздӕриккон гъуддӕгтӕбӕл хъӕбӕр фӕсмон кодта. Фал ӕй зудта, рӕстӕгӕн раздахӕн ке нӕййес. Е федарӕй ӕууӕндтӕй, Йесо уой туххӕй дӕр ке рамардӕй ӕма загъта: «Аци ихӕс мӕбӕл ес Хуцауи ’стур хуарзӕнхи фӕрци» (1 Кор. 15:3, 10). Мадта ’й ду дӕр дӕхецӕн балӕдӕрун кӕнӕ, Йесо дӕу туххӕй ке рамардӕй ӕма дин уой фӕрци Йегови хуарзӕнхӕ иссерунмӕ фадуат ке фӕззиндтӕй (Гъуд. 3:19). Йеговӕ фиццагидӕр кӕсуй, нур ци кӕнӕн ӕма федӕни ци искӕндзиан, уомӕ, раздӕр ци рӕдудтитӕ искодтан, уомӕ нӕ, фал. Уӕлдай нӕй, Йегови Ӕвдесӕнтӕ адтан ӕви нӕ, е (Ис. 1:18).

12. 1 Иоанни 3:19, 20 финст дзурдтӕ нин куд банхус кӕндзӕнцӕ, нӕхемӕ уарзти аккаг ку нӕ кӕсӕн, уӕд?

 ¹² Фал уӕддӕр, ӕвӕдзи, зӕгъис: «Зонун ӕй, Киристе мӕн туххӕй ке рамардӕй, фал уӕддӕр ӕз уой аккаг нӕ дӕн». Уӕхӕн сагъӕстӕ цӕмӕн фӕззиннуй? Уомӕн ӕма ӕнӕнхӕст ан ӕма нин нӕ зӕрдӕ фӕззӕгъуй, неке гъӕуис ӕма уарзти аккаг нӕ дӕ, зӕгъгӕ. (Бакӕсӕ 1 Иоанни 3:19, 20.) Фал ӕй гъӕуама ма иронх кӕнӕн, «Хуцау нӕ зӕрдитӕй устурдӕр [ке] ӕй». Йеговӕ нӕ берӕ ке уарзуй ӕма нин ке хатир кӕнуй, уой гъӕуама нӕ сӕри ниффедар кӕнӕн. Йеговӕ нӕмӕ цӕхуӕн цӕстӕй кӕсуй, уой цӕмӕй лӕдӕрӕн, уой туххӕй ин гъӕуама ӕ Дзурд ахур кӕнӕн, ковӕн имӕ ӕма ин ӕ адӕнбӕл нӕхе бӕттӕн. Е ӕхсидзгӕ цӕмӕн ӕй?

13. Хуцауи Дзурд ку ӕртасӕн, уӕд нин е ци пайда ӕрхӕсдзӕй? (Кӕсӕ ма рамкӕ « Хуцауи Дзурд син куд банхус кодта?».)

¹³ Библи алли бон дӕр ӕртасӕ, ӕма Йегови дессаги менеугутӕ хуӕздӕр базондзӕнӕ. Фӕ ’й уиндзӕнӕ, куд берӕ дӕ уарзуй, уой. Хуцауи Дзурдбӕл алли бон дӕр ку сагъӕс кӕнай, уӕд дӕ «раст зундбӕл араздзӕй» (2 Тим. 3:16). Ӕхемӕ нецӕййаг ка кастӕй, еу уӕхӕн хестӕр нӕлгоймаг Кевин загъта: «103 псалом ку бакастӕн ӕма ибӕл ку расагъӕс кодтон, уӕд мӕхемӕ ӕндӕр цӕстӕй ракастӕн ӕма ’й балӕдӕрдтӕн, Йеговӕ мӕмӕ ӕцӕгӕй цӕхуӕн цӕстӕй кӕсуй, уой». Уӕлдӕр ке кой кодтан, еци хуӕрӕ Евӕ ба зӕгъуй: «Алли изӕр дӕр фӕссагъӕс кӕнун, Йеговӕн ӕхсидзгӕдӕр ци ӕй, уобӕл. Уой фӕрци ме ’ууӕндундзийнадӕ бафедар уй ӕма мӕ зӕрдӕ ӕрсабур уй».

14. Кувд нин куд ӕнхус кӕнуй?

¹⁴ Арӕх ковӕ (1 Фес. 5:17). Адӕймаги хӕццӕ дӕ лимӕн кӕнун ку фӕндӕуа, уӕд, ӕвӕдзи, ӕ хӕццӕ фулдӕр рӕстӕг ӕрветдзӕнӕ, удта ин дӕ сагъӕстӕ дзордзӕнӕ. Уотӕ Йеговӕн дӕр кувди медӕг нӕ сагъӕстӕ ӕма нӕ тухститӕ ку дзорӕн, уӕд ӕй ӕвдесдзиан, ке ибӕл ӕууӕндӕн ӕма ин ӕ уарзтбӕл ке нӕ гурусхӕ кӕнӕн (Пс. 94:17–19; 1 Иоан. 5:14, 15). Уӕлдӕр ке кой кодтан, еци хуӕрӕ Юа зӕгъуй: «Йеговӕмӕ ку фӕкковун, уӕд ин, бони дӕргъи мӕбӕл ци ’рцудӕй, айдагъ уой нӕ радзорун, фал ма мӕ зӕрди ци ес, уой дӕр. Римӕхсгӕ си неци фӕккӕнун. Уой фӕрци Йеговӕмӕ устур хецауи цӕстӕй нӕ кӕсун, фал ӕй нимайун, ӕ сувӕллӕнтти ка уарзуй, уӕхӕн фидӕбӕл». (Кӕсӕ рамкӕ « Ду ба аци киунугӕ кастӕ?».)

15. Йеговӕн хъазар ке ан, е цӕмӕй бӕрӕг ӕй?

¹⁵ Дӕхе бӕттӕ, Йегови ка уарзуй, уонӕбӕл. Уӕхӕн ӕмбӕлттӕ ӕнцӕ Йегови лӕвар (Иак. 1:17). Йеговӕн хъазар ке ан, е бӕрӕг ӕй, цӕхуӕн хуӕртӕ ӕма ӕнсувӕртӕ нин равардта, уомӕй (Ӕмб. 17:17).  Павел, ӕнхус ин ка кодта, еци хуӕртӕ ӕма ӕнсувӕрти туххӕй колоссӕгтӕмӕ финстӕги ниффинста: «Етӕ мин иссӕнцӕ устур ӕнхус ӕма нифси хуасӕ» (Кол. 4:10, 11). Йесой дӕр багъӕуидӕ ӕмбӕлтти ӕнхус. Ӕмбӕлттӕ ба ин изӕдти астӕу дӕр адтӕй ӕма адӕни астӕу дӕр (Лук. 22:28, 43).

16. Еузӕрдон ӕмбӕлттӕ нин куд ӕнхус кӕнунцӕ Йеговӕмӕ хӕстӕг кӕнун?

¹⁶ Дӕу ба де ’мбӕлтти ӕнхус некӕд багъӕуй? Дӕ тухститӕ ескӕмӕн ке радзорис, е уобӕл дзорӕг нӕй, ӕма де ’ууӕндундзийнадӕ ӕрлӕмӕгъ ӕй. Е дӕ кӕмидӕр гъӕуай дӕр бакӕндзӕй. Уӕлдӕр ке кой кодтан, еци ӕнсувӕр Джеймс зӕгъуй: «Фӕлтӕрдгун киристӕнтти хӕццӕ ке лимӕн кӕнун, е мин хъӕбӕр ӕнхус кӕнуй. Нифс кӕмӕй сӕттуй, уӕхӕн сагъӕстӕ мӕбӕл хъӕбӕрдӕр кӕнун ку райдайунцӕ, уӕд мӕмӕ ме ’мбӕлттӕ алкӕддӕр байгъосунцӕ ӕма мин мӕ зӕрдӕбӕл ӕрлӕуун кӕнунцӕ, берӕ мӕ ке уарзунцӕ, уой. Се ’нхуси фӕрци ӕй уинун, Йеговӕ дӕр мӕ берӕ ке уарзуй ӕма мӕбӕл тухсгӕ ке кӕнуй, уой». Ӕцӕгӕйдӕр, хъӕбӕр ӕхсидзгӕ ӕй, цӕмӕй нин хуӕртӕ ӕма ӕнсувӕрти астӕу ӕмбӕлттӕ уа.

17, 18. Кӕмӕ гъӕуама игъосӕн ӕма цӕмӕн?

¹⁷ Сайтани фӕндуй, цӕмӕй нӕ къохтӕ ӕруадзӕн ӕма раст надӕй радзӕгъӕл уӕн. Нӕ сӕри нин еци гъуди уадзуй, цума нӕ Йеговӕ нӕ уарзуй ӕма уой аккаг нӕ ан, цӕмӕй нӕ фӕййервӕзун кӕна. Фал ӕй куд фӕууидтан, уотемӕй е уотӕ нӕй.

¹⁸ Йеговӕ дӕ берӕ уарзуй ӕма ин хъӕбӕр хъазар дӕ. Йесой хузӕн имӕ ду дӕр ку игъосай, уӕд ӕ уарзтӕй ӕнӕхай некӕд фӕууодзӕнӕ (Иоан. 15:10). Мадта Сайтанмӕ дӕр ма игъосӕ, удта дин дӕ мӕнгард зӕрдӕ ци дзоруй, уомӕ дӕр, фал игъосӕ Йеговӕмӕ. Е ӕй уинуй, алкӕмӕдӕр ни хуарзӕй ци ес, уой. Йегови цӕсти дин устур аргъ ке ес, уобӕл ӕппундӕр ма гурусхӕ кӕнӕ!