1, 2. 1 Петури 2:21 финст дзурдтӕ балӕдӕрунмӕ нин цӕхуӕн цӕветтон ӕнхус кӕнуй?

ДӔ ЦӔСТИТӔБӔЛ рауайун кӕнӕ, цума зумӕги де ’мбӕлтти хӕццӕ тар гъӕди фӕццотӕ. Уӕ разӕй ба фӕццӕуй, над уин ка амонуй, е. Еу афони кӕсетӕ, ӕма уӕ надамонӕг фӕййаууон ӕй. Фал катай кӕнун нӕ райдӕдтайтӕ, уомӕн ӕма ӕ къахвӕдтӕ дзӕбӕх зиннунцӕ, ӕма гъе уонӕбӕл над ердзиайтӕ.

² Ӕцӕг киристӕнттӕ ке ан, уомӕ гӕсгӕ, зӕгъӕн ес, ӕма мах дӕр тар гъӕди фӕццӕуӕн. Еци тар гъӕдӕ ба ӕй аци дуйне. Фал нин Йеговӕ равардта тӕккӕ хуӕздӕр надамонӕги – ӕ Фурт Йесо Киристей. 1 Петури 2:21 финст ӕй, ӕ къахвӕдтӕбӕл нӕ цӕун ке гъӕуй. Аци стихи Петур Йесой рабарста надамонӕги хӕццӕ. Надамонӕги хузӕн Йесо дӕр ӕ фӕсте къахвӕдтӕ ниууагъта, ӕма сӕбӕл гъӕуама цӕуӕн. Гъӕйдӕ уомӕ гӕсгӕ ба ӕркӕсӕн ӕртӕ фарстайемӕ: Киристей къахвӕдтӕбӕл цӕунмӕ ци хауй? Цӕмӕн сӕбӕл гъӕуама цӕуӕн? Ӕма сӕбӕл нӕ бон куд ӕй цӕун?

3. Еске къахвӕдтӕбӕл цӕунмӕ ци хауй?

³ Еске къахвӕдтӕбӕл цӕунмӕ ци хауй? Библий дзурдтӕ «цӕун» ӕма «къахдзӕфтӕ кӕнун» еуӕй-еухатт фӕййамонунцӕ, адӕймаг ӕ цард куд ӕрветуй, уомӕ (Райд. 6:9; Ӕмб. 4:26). Ци гъуддӕгтӕ кодта, уони ӕнгъезуй рабарун, ӕ фӕсте ци фӕдтӕ ниууагъта, уони хӕццӕ. Мадта еске къахвӕдтӕбӕл цӕун нисан кӕнуй адӕймагӕн ӕ гъуддӕгтӕ фӕнзун.

4. Йесой къахвӕдтӕбӕл цӕунмӕ ци хауй?

⁴ Мадта уӕд Киристей къахвӕдтӕбӕл цӕунмӕ ци хауй?  Цубур загъдӕй ин ӕ гъуддӕгтӕ фӕнзун. Аци статьяй сӕйраг стихи апостол Петур загъта, мах бон дӕр ке ӕй Киристей фӕнзун, фӕлварӕнти рӕстӕг куд федар фӕллӕудтӕй, уомӕй (1 Пет. 2:18–25). Ӕма нин айдагъ уомӕй фӕнзуйнаг нӕй, фал ӕ алли дзурд ӕма гъуддагӕй дӕр.

5. Ӕнӕнхӕст адӕймаги бон ӕй Киристей фӕнзун? Ба ’й лӕдӕрун кӕнӕ.

⁵ Фал цума ӕнӕнхӕст адӕймаги бон ӕй Киристей фӕнзун? Гъо. Кӕд уой хузӕн ӕнхӕст нӕ ан, уӕддӕр ин ӕ къахвӕдтӕ ӕргъӕвунбӕл ку архайӕн, уӕд мах дӕр, «Йесо куд цардӕй, уотӕ» цӕрдзиан (1 Иоан. 2:6).

6, 7. Уотӕ зӕгъӕн цӕмӕн ес, ӕма Йесой къахвӕдтӕбӕл ку цӕуӕн, уӕд Йеговӕмӕ хӕстӕг кӕнӕн?

⁶ Киристей къахвӕдтӕбӕл ку цӕуӕн, уӕд Йеговӕмӕ хӕстӕгдӕр кӕндзиан. Цӕмӕн ес уотӕ зӕгъӕн? Фиццагидӕр уомӕн, ӕма Йесо ӕ алли гъуддагӕй дӕр Хуцауи зӕрдӕ рохс кодта (Иоан. 8:29). Ӕма ’й мах дӕр ку фӕнзӕн, уӕд Йегови зӕрдӕ рохс кӕндзиан. Мадта нӕ бон ӕй федарӕй зӕгъун, ӕма нӕ уӕларвон Фиди зӕрдӕ рохс кӕнунбӕл ӕгас хъауритӕй ку архайӕн, уӕд имӕ бонӕй-бонмӕ хӕстӕгдӕр кӕндзиан (Иак. 4:8).

⁷ Уомӕй уӕлдай ма Йесо алли гъуддаги дӕр ӕ Фиди фӕнзта. Зӕгъгӕ дӕр уомӕ гӕсгӕ кодта: «Мӕн ка фӕууидта, е фӕууидта Фиди дӕр» (Иоан. 14:9). Нӕ бон ӕй Йесой фӕнзун ӕма адӕнмӕ уой хузӕн зӕрдӕ дарун. Зӕгъӕн, Йесо хъотургинӕн, удта ӕ нез берӕ рӕстӕг ке тухсун кодта, уӕхӕн силгоймагӕн ӕртӕрегъӕд кодта. Уомӕй уӕлдай ма ӕ хеуӕнттӕ кӕмӕн фӕззиан ӕнцӕ, уонӕбӕл дӕр ӕ зӕрдӕ ристӕй (Мар. 1:40, 41; 5:25–34; Иоан. 11:33–35). Мадта Йесой ку фӕнзӕн, уӕд уомӕй Йеговӕн ӕхе фӕнздзиан. Йегови менеугутӕ нӕмӕ куд  фулдӕр уа, уотӕ ба имӕ хӕстӕгдӕр кӕндзиан.

8. Цӕмӕн ес зӕгъӕн, ӕма Киристей къахвӕдтӕбӕл ку цӕуӕн, уӕд фӕууӕлахез уодзиан?

⁸ Киристей къахвӕдтӕбӕл ку цӕуӕн, уӕд нӕ аци дуйне нӕ никъкъулумпи кӕндзӕй. Ӕ мӕлӕти размӕ еци ӕхсӕвӕ Йесо загъта: «Ӕз фӕууӕлахез дӕн аци дуйнебӕл» (Иоан. 16:33). Е цӕбӕл дзорӕг ӕй? Йесо ӕй уидта, ӕ рӕстӕги адӕн ци зундбӕл хуӕст ӕнцӕ, цӕмӕ тундзунцӕ ӕма цӕхуӕн гъуддӕгтӕ кӕнунцӕ, уой, фал уони хузӕн не ’ссӕй. Е некӕд иронх кодта, зӕнхӕмӕ цӕмӕн ӕрцудӕй, уой – цӕмӕй Йегови ном исрохс кодтайдӕ. Махӕй ба ци ес зӕгъӕн? Аци дуйне ци дӕттуй, уомӕ ку кӕсӕн, уӕд ни байронх уодзӕй, сӕйрагдӕр ци ӕй, е. Фал махӕн дӕр Йесой хузӕн Йеговӕн лӕггадӕ кӕнун царди фиццаг бунати ку уа, уӕд мах дӕр аци дуйнебӕл фӕууӕлахез уодзиан (1 Иоан. 5:5).

9. Цӕмӕй, ӕносон цардмӕ ка кӕнуй, еци надӕй ма радзӕгъӕл уӕн, уой туххӕй нӕ ци кӕнун гъӕуй?

⁹ Киристей къахвӕдтӕбӕл ку цӕуӕн, уӕд ӕносон цардӕй исхайгин уодзиан. Еу гъӕздуг лӕг Йесой бафарста, цӕмӕй, дан, ӕносон цардӕй исхайгин уон, уой туххӕй мӕ ци кӕнун гъӕуй. Ӕма ин Йесо загъта: «Цо мӕ фӕдбӕл» (Матф. 19:16–21). Ка ибӕл не ’ууӕндтӕй, еци дзиуиттӕгтӕн ба загъта: «Мӕ фустӕ... цӕунцӕ мӕ фӕдбӕл. Ӕз син ратдзӕн ӕносон цард» (Иоан. 10:24–29). Сӕйраг тӕрхондони лӕгтӕй еуемӕн, Никодимӕн, Йесо загъта, Хуцауи Фуртбӕл ка ӕууӕндуй, е ке исхайгин уодзӕй ӕносон цардӕй (Иоан. 3:16). Йесобӕл ке ӕууӕндӕн, е бӕрӕг уодзӕй, цӕбӕл ахур кодта, уомӕ гӕсгӕ ку цӕрӕн ӕма ’й алли гъуддаги дӕр ку фӕнзӕн, уӕд. Гъе уӕд нӕ, ӕносон цардмӕ ка кӕнуй, еци надӕй еуварсмӕ нӕ рахӕсдзӕй (Матф. 7:14).

10. Йесой хуӕздӕр кутемӕй базондзиан? (Иоан. 17:3).

¹⁰ Цӕмӕй Йесой къахвӕдтӕбӕл цӕуӕн, уой туххӕй бал ӕй гъӕуама фиццагидӕр зонгӕ бакӕнӕн. (Бакӕсӕ Иоанни 17:3.) Уобӕл ба алли бон дӕр гъӕуй архайӕун. Гъӕуама ин базонӕн ӕ менеугутӕ, куд сагъӕс кодта, уой ӕма царди цӕхуӕн уагӕвӕрдтӕмӕ гӕсгӕ архайдта, уой. Кӕд рӕстдзийнади надбӕл хъӕбӕр рагӕй цӕуӕн, уӕддӕр гъӕуама идарддӕр дӕр архайӕн Йегови ӕма ӕ Фурти хуӕздӕр базонунбӕл.

11. Евангелити дзурд цӕбӕл цӕуй?

¹¹ Йегови фӕндуй, цӕмӕй ин ӕ Фурти хуӕздӕр базонӕн, ӕма цуппар Евангелий дӕр уой туххӕй ниффинсун кодта. Уоми дзурд цӕуй ӕ цард ӕма ӕ лӕггади туххӕй. Евангелитӕй хуӕздӕр ӕнгъезуй базонун ӕ ахурӕдтӕ, ӕ гъуддӕгтӕ ӕма ӕ сагъӕстӕ. Еци киунугути фӕрци нӕ бон ӕй Йесой цардбӕл арфдӕр сагъӕс кӕнун (Дзиуит.  12:3). Уотемӕй, ӕ фӕсте ци къахвӕдтӕ ниууагъта, уони хуӕздӕр уиндзиан. Евангелитӕ ӕртасгӕй Йесой хуӕздӕр базондзиан ӕма ин ӕ къахвӕдтӕ дӕр хуӕздӕр ӕргъӕвдзиан.

12. Евангелитӕ нин фулдӕр пайда кӕд ӕрхӕсдзӕнцӕ?

¹² Цӕмӕй нин Евангелитӕ пайда ӕрхӕссонцӕ, уой туххӕй сӕ айдагъ кӕсун фагӕ нӕй. Гъӕуама рӕстӕг хецӕн кӕнӕн, цӕмӕй сӕ лӕмбунӕг ӕртасӕн ӕма сӕбӕл арф сагъӕс кӕнӕн. (Рабарӕ Йесо Навин 1:8.) Гъӕйдӕ ӕркӕсӕн, еци гъуддаги нин ка банхус кӕндзӕй, дууӕ уӕхӕн унаффемӕ.

13. Евангелити хабӕрттӕ дин дӕ цӕститӕбӕл рауайун кӕнунмӕ ци банхус кӕндзӕй?

¹³ Фиццаг: хабӕрттӕ дӕ цӕститӕбӕл уайун кӕнӕ. Цума дӕхуӕдӕг дӕр гъе уоми дӕ, уотӕ фегъосӕ, фӕууинӕ ӕма балӕдӕрӕ, ци хабӕрттӕ си цӕуй, уой. Еци гъуддаги дин, Йегови организаци ци публикацитӕ уадзуй, етӕ банхус кӕндзӕнцӕ. Дӕ гъос дарӕ контекстмӕ, гъома ци хабар кӕсис, уомӕн ӕ разӕй ӕма ӕ фӕсте ци хабӕрттӕ цудӕй, уомӕ. Ци адӕни ӕма ци бунӕтти туххӕй кӕсис, уонӕбӕл фулдӕр ӕрмӕг иссерӕ. Ӕркӕсӕ, еци хабар иннӕ Евангелити куд финст ӕй, уомӕ. Еуӕй-еухатт еу Евангелий ци листӕг хабӕрттӕ финст фӕууй, етӕ иннеми финст нӕ фӕуунцӕ.

14, 15. Евангелитӕй ци базонӕн, уомӕй царди пайда кӕнунмӕ нин ци банхус кӕндзӕй?

¹⁴ Дуккаг: ци базудтай, уомӕй испайда кӕнӕ (Иоан. 13:17). Евангелий скъуддзаг лӕмбунӕг ку бакӕсай, уӕд дӕхе бафӕрсӕ: ци бакастӕн, уомӕй цӕбӕл ахур кӕнун ӕма си мӕ бон куд ӕй испайда кӕнун? Аци скъуддзаги гъудитӕй мӕ бон куд ӕй ескӕмӕн банхус кӕнун? Кӕд еци гъудитӕ пайда кӕмӕн ӕрхӕсдзӕнцӕ, уӕхӕн адӕймаги зонис, уӕд дзӕбӕх рӕстӕг равзарӕ ӕма ин радзорӕ, ци гъудитӕ базудтай, уой.

¹⁵ Гъӕйдӕ нур ба бавзарӕн аци дууӕ унаффемӕй испайда кӕнун. Ӕркӕсӕн,  Йесо ковӕндони ке фӕууидта, еци мӕгур идӕдзӕ силгоймаги хабармӕ.

16. Марки 12:41 цӕхуӕн хабар финст ес?

¹⁶ Хабар дӕ цӕститӕбӕл рауайун кӕнӕ. (Бакӕсӕ Марки 12:41.) Дӕ цӕститӕбӕл рауайун кӕнӕ, цума ду дӕр уоми дӕ. Цӕуй нӕ эри 33 анз, 11 нисан. Йесой мӕлӕтмӕ еу къуӕре дӕр нӕбал байзадӕй. Ӕма нур бони фулдӕр ӕрдӕг Йесо ковӕндони адӕни ахур кӕнуй, дини разамонгутӕ ба имӕ мӕстӕй фицунцӕ. Минкъий раздӕр си кадӕртӕ, Йесо ци гъуддӕгтӕ кодта, уой туххӕй бафарстонцӕ: «Кӕцӕй дӕмӕ ес аци гъуддӕгтӕ кӕнуни барӕ?» Иннетӕ ба имӕ ӕндӕр къахӕн фарстатӕ лӕвардтонцӕ (Мар. 11:27–33; 12:13–34). Уой фӕсте Йесо ковӕндони иннӕ хаймӕ бацудӕй, силгоймӕгти тургъӕ ке худтонцӕ, уордӕмӕ. Фӕрсрӕбун си лӕууй нисайнагдӕнттӕ. Йесо дӕр исбадтӕй ӕма еуварсӕй кӕсуй, нисайнӕгтӕ ка гӕлдзуй, уонӕмӕ. Гъӕздугутӕ берӕ гӕлдзунцӕ, ӕма еци ’хцай дзӕгъ-дзӕгъ, ӕвӕдзи, ӕгас ковӕндонӕбӕл дӕр райгъусуй.

17. Марки 12:42 ке туххӕй финст ӕй, еци мӕгур идӕдзӕ силгоймаг ци бакодта?

¹⁷ Бакӕсӕ Марки 12:42. Цӕйбӕрцӕдӕр рӕстӕги фӕсте Йесо фӕууидта еу мӕгур идӕдзӕ силгоймаги (Лук. 21:2). Еци силгоймагӕн ӕнцон цӕрӕн н’ адтӕй. Ӕвӕдзи, ӕ къапеккитӕ хъӕртгӕ дӕр нецӕмӕн кодтонцӕ. Фал уӕддӕр нисайнагдӕнттӕй еуемӕ бацудӕй ӕма си дууӕ листӕг ӕхцай ниггӕлста. Куд ниххаудтӕнцӕ, уой дзӕгъ-дзӕгъ игъусгӕ дӕр некӕмӕ фӕккодтайдӕ. Йесо ӕй зудта еци ’хцайӕн хъӕбӕр минкъий аргъ ке адтӕй. Еу тӕхгӕцъеу балхӕнуни фагӕ дӕр н’ адтӕнцӕ. Еци цъеу ба, хуӕрунмӕ ка бӕзтӕй, уонӕй тӕккӕ асландӕр адтӕй.

18. Марки 12:43, 44 Йесо идӕдзӕ силгоймаги туххӕй ци загъта?

¹⁸ Бакӕсӕ Марки 12:43, 44. Еци силгоймаг ци бакодта, уой фӕууингӕй Йесо ӕ ахуркӕнуйнӕгтӕмӕ фӕдздзурдта ӕма син загъта: «Уӕртӕ еци мӕгур идӕдзӕ уосӕ ӕхцавӕрӕни се ’гасемӕй фулдӕр ниггӕлста». Цӕмӕн, уой ба син уотӕ балӕдӕрун кодта: «Етӕ си уой туххӕй гӕлстонцӕ, ӕма сӕмӕ фагӕй фулдӕр ес. Еци идӕдзӕ уосӕ ба, кӕд мӕгур ӕй, уӕддӕр ниггӕлста, цидӕриддӕр имӕ адтӕй, уой, ӕ фӕстаг ӕхцатӕ». Еци еузӕрдон силгоймаг ӕ фӕстаг ӕхцатӕ нисайнаг дони ку ниггӕлста, уӕд ӕ цард уарзӕгой Хуцауи бӕрагӕ бакодта (Пс. 26:3).

19. Йесо мӕгур идӕдзӕ силгоймаги туххӕй ци хабар радзурдта, уомӕй цӕбӕл ахур кӕнӕн?

¹⁹ Ци базудтай, уомӕй испайда кӕнӕ. Дӕхе бафӕрсӕ: Йесо ци мӕгур идӕдзӕ силгоймаги кой ракодта, уомӕй цӕбӕл ахур кӕнӕн? Еци хабарбӕл лӕмбунӕг расагъӕс кӕнӕ. Фулдӕр имӕ ку адтайдӕ, уӕддӕр ӕй ӕнӕ фӕстӕмӕ фӕккӕсгӕй равардтайдӕ. Фал нур дӕр, ӕ бон ци адтӕй, уой бакодта – хуӕздӕрӕй имӕ ци адтӕй, уой равардта. Йесо ӕй зудта, ӕ нисайнагӕн Йегови цӕсти хъӕбӕр устур аргъ ке ес. Аци хабарӕй еу ӕхсидзгӕ гъуддагбӕл ахур кӕнӕн: Йеговӕн хъӕбӕр ӕхцӕуӕн фӕууй, хуӕздӕрӕй нӕмӕ ци ес, уой ин ку фӕддӕттӕн, гъома ин ӕгас зӕрдӕй ӕма ӕгас уодӕй ку фӕллӕггадӕ кӕнӕн (Матф. 22:37; Кол. 3:23). Нӕ игъосун кӕнуни гъуддаг ӕма не ’мбурдтӕ дӕр уомӕ хаунцӕ.

20. Мӕгур идӕдзӕ силгоймаги хабарӕй ци базудтай, уомӕй дӕ бон куд ӕй испайда кӕнун? Ӕрхӕссӕ цӕветтон.

²⁰ Дӕ бон куд ӕй, мӕгур идӕдзӕ силгоймаги туххӕй ци базудтай, уомӕй испайда кӕнун? Расагъӕс кӕнӕ, еци хабари фӕрци дӕ бон бафедар кӕнун ке ӕй, уӕхӕн хуӕрӕ  кенӕ ӕнсувӕрбӕл. Фӕууй уотӕ, ӕма адӕймагӕй нӕ феруагӕс кӕнуй, Йеговӕ ин ӕ хъиамӕттӕн аргъ ке кӕнуй. Зӕгъӕн, каргун хуӕри бон нӕбал ӕй, раздӕр цӕйбӕрцӕ кодта, уойбӕрцӕ кӕнун. Ӕвӕдзи, уой туххӕй ӕхе хуӕруй ӕма ӕхемӕ ӕнӕпайда кӕсуй. Кенӕ ба зонис, ӕ нези туххӕй ка гъезӕмарӕ кӕнуй, уӕхӕн ӕнсувӕри. Ка ’й зонуй, ӕ нифс басастӕй, алли ӕмбурдмӕ цӕун ӕ бон ке нӕбал ӕй, уой туххӕй. Дӕ бон ӕй уӕхӕн хуӕрӕ кенӕ ӕнсувӕри дзурдӕй бафедар кӕнун (Еф. 4:29). Мӕгур идӕдзӕ силгоймаги хабарӕй ци базудтай, уой ин радзорӕ. Уой фӕрци ӕй балӕдӕрдзӕй, ӕ уавӕрти ӕ бон ци ӕй, уой ке кӕнуй, уомӕн Йегови цӕсти хъӕбӕр устур аргъ ке ес (Ӕмб. 15:23; 1 Фес. 5:11). Иннети ӕстауӕ, Хуцауи гъуддаги сӕ бон ци ӕй, уой ке кӕнунцӕ, уой туххӕй, цийфӕнди минкъий гъуддаг ма уа, уӕддӕр. Уотӕ ку кӕнай, уӕд, зӕгъӕн ес, ӕма Йесой къахвӕдтӕбӕл цӕуис.

21. Аци статья дӕ цӕмӕ баразӕнгард кодта?

²¹ Хъӕбӕр ӕхцӕуӕн нин ӕй, Евангелити Киристей царди туххӕй уотӕ берӕ цидӕртӕ базонун ке ӕнгъезуй, е. Уой фӕрци нӕ бон ӕй ӕ къахвӕдтӕбӕл цӕун ӕма ’й фӕнзун. Нӕ бон ӕй еци киунугутӕ рартасунмӕ фулдӕр рӕстӕг рахецӕн кӕнун кенӕ сӕ бийнонти ахури рӕстӕг ӕртасун. Цӕмӕй нин Евангелити финст хабӕрттӕ фулдӕр пайда хӕссонцӕ, уой туххӕй сӕ гъӕуама нӕ цӕститӕбӕл уайун кӕнӕн, ӕма си ци базонӕн, уомӕй царди пайда кӕнӕн. Фал Йесойӕн айдагъ ӕ гъуддӕгтӕ фӕнзун фагӕ нӕй. Гъӕуама ин ӕ дзурдтӕмӕ дӕр лӕмбунӕг уӕн. Иннӕ статьяй ӕркӕсдзиан, Йесой фӕстаг дзурдтӕй цӕбӕл ахур кӕнӕн, уомӕ.