Йесо мӕлгӕ ку кодта, уӕд Псалом 22:1 финст дзурдтӕ цӕмӕн загъта?

Йесой фӕстаг дзурдтӕй еуетӕ финст ӕнцӕ Матфеййи 27:46 ӕма Марки 15:34. Уоми финст ӕй: «Мӕ Хуцау, мӕ Хуцау, цӕмӕн мӕ ниууагътай?» Йесо еци дзурдтӕ ку загъта, уӕд исӕнхӕст кодта Псалом 22:1 финст дзурдтӕ. Еци дзурдтӕ ниффинста псаломзаргӕнӕг Давид. Уотӕ зӕгъӕн нӕййес, ӕма Йесо Йеговӕй фӕффудӕнгъӕл ӕй кенӕ ибӕл нӕбал ӕууӕндтӕй. Йесо ӕй хуарз лӕдӕрдтӕй, цӕмӕн гъӕуама рамӕла, ӕма еци гъуддаг барвӕндӕй искодта (Матф. 16:21; 20:28). Удта ма ’й зудта, мӕлгӕ ку кӕна, уӕд ӕй Йеговӕ ке нӕбал гъӕуай кӕндзӕй ӕма ин ке нӕбал ӕнхус кӕндзӕй (Иов 1:10). Уотемӕй ӕй Йесо бавдистайдӕ, цийфӕнди гъезӕмайраг мӕлӕт ӕй бавзарун ма багъӕуа, уӕддӕр еузӕрдонӕй ке байзайдзӕй (Мар. 14:35, 36).

Мадта Йесо еци Псаломи дзурдтӕ цӕмӕн загъта? Аци фарстабӕл комкоммӕ дзуапп нӕ бон раттун нӕй. Фал гъӕйдӕ расагъӕс кӕнӕн, уотӕ цӕмӕн загътайдӕ, уобӕл *.

Ка ’й зонуй ӕй еци дзурдтӕй фӕндадтӕй бавдесун, Йеговӕ ’й мӕлӕтӕй ке нӕ багъӕуай кӕндзӕй. Йесо гъӕуама адӕни туххӕй ахӕсти аргъ бафистайдӕ. Ӕма еци гъуддаг ӕхуӕдӕг гъӕуама бакодтайдӕ. Йеговӕ ин ӕнхус нӕ кодтайдӕ. Е гъӕуама ӕнӕмӕнгӕй рамардайдӕ, цӕмӕй «мӕлӕт бавзурстайдӕ алке туххӕй дӕр» (Дзиуит. 2:9).

Еци псаломӕй цӕхуӕндӕр дзурдтӕ ке загъта, уомӕй ӕй, ка ’й зонуй, фӕндадтӕй адӕни зӕрдӕбӕл ӕнӕгъӕнӕ псалом ӕрлӕуун кӕнун. Еци рӕстӕг дзиуиттӕгтӕ берӕ псаломтӕ зудтонцӕ, уомӕн ӕма сӕ исахур  кӕниуонцӕ. Ӕма кӕцидӕр псаломӕй еу стих ку фегъустайуонцӕ, уӕд ӕнӕгъӕнӕ псалом дӕр сӕ зӕрди ӕрӕфтудайдӕ. Ӕма кӕд Йесой дӕр фӕндадтӕй, цӕмӕй ӕнӕгъӕнӕ псалом дӕр сӕ зӕрдӕбӕл ӕрлӕудтайдӕ, уӕд, ӕвӕдзи, дзиуиттӕгтӕй ӕ фӕдбӕлдзӕугутӕ ка иссӕй, етӕ ӕргъуди кодтайуонцӕ, еци псаломи ӕ мӕлӕти хӕццӕ баст ка адтӕй, еци пахампарӕдтӕ (Пс. 22:7, 8, 15, 16, 18, 24). Удта ма сӕ зӕрдӕбӕл ӕрлӕудтайуонцӕ еци псаломи фӕстаг дзурдтӕ дӕр. Уоми финст ӕй, Йеговӕ ӕгас зӕнхӕн дӕр Паддзах ке ӕй, уой туххӕй (Пс. 22:27–31).

Еци дзурдтӕй Йесой, ка ’й зонуй, фӕндадтӕй бавдесун, ке неци фудгин адтӕй, уой. Дзиуиттӕгти сӕйраг тӕрхондони ка адтӕй, етӕ Йесой фӕффудгин кодтонцӕ. Хуцауи фауй, зӕгъгӕ (Матф. 26:65, 66). Фал ин куд тӕрхон кодтонцӕ, уомӕй закъон фехалдтонцӕ. Ӕхсӕвӕ тагъд-тагъдӕй ӕрӕмбурд ӕнцӕ, ӕма ин ӕ гъуддаг, сӕхе куд фӕндадтӕй, уотӕ равзурстонцӕ, закъонмӕ гӕсгӕ нӕ, фал (Матф. 26:59; Мар. 14:56–59). Йесо Псаломи 22:1 финст дзурдтӕ ке загъта, уомӕй ӕй, ӕвӕдзи, фӕндадтӕй бавдесун, уӕхӕн тӕрхон ин ӕнӕфудӕй ке рахастонцӕ.

Йесо Псаломи дзурдтӕ ке ӕрхаста, уомӕй ӕй, ӕвӕдзи, фӕндадтӕй Давидмӕ ’ргом раздахун. Йеговӕ бауагъта, цӕмӕй Давид зиндзийнӕдтӕ бавзурстайдӕ, фал е уобӕл дзорӕг н’ адтӕй, ӕма си Йеговӕ ӕхе рахадта. Давид ӕ Псалом уӕхӕн фарстайӕй ке райдӕдта, е уобӕл дзорӕг н’ адтӕй, ӕма Йеговӕбӕл нӕбал ӕууӕндтӕй, уомӕн ӕма ’й идарддӕр федарӕй загъта, Йегови бон ке ӕй ӕ адӕни ервӕзун кӕнун. Йеговӕ си ӕхе ке нӕ рахадта, е ма бӕрӕг адтӕй идарддӕр дӕр ин ке арфӕ кодта, уомӕй (Пс. 22:23, 24, 27). Уотӕ Йесо дӕр, «Давиди Фурт», гъезӕмӕртти гъӕдӕбӕл ке рамардӕй, е уобӕл дзорӕг н’ адтӕй, ӕма Йегови хуарзӕнхӕ фесафта (Матф. 21:9).

Йеговӕ гъӕуама Йесой рӕстӕгмӕ ниууагътайдӕ, цӕмӕй рабӕрӕг адтайдӕ, кӕронмӕ ибӕл еузӕрдонӕй байзайдзӕй, ӕви нӕ, е. Ӕма Йесо еци дзурдтӕ ӕ фур тухстӕй дӕр загътайдӕ. Йеговӕмӕ тӕккӕ райдайӕни уӕхӕн фӕндӕ н’ адтӕй, цӕмӕй Йесо фӕгъгъезӕмарӕ кодтайдӕ ӕма рамардайдӕ. Киристей нивонд багъудӕй, Адам ӕма Евӕ Хуцауи нихмӕ ку рацудӕнцӕ, уӕд. Йесо лӕгъузӕй неци бакодта. Фал гъӕуама фӕгъгъезӕмарӕ кодтайдӕ ӕма рамардайдӕ, цӕмӕй, Сайтан ци фарстатӕ исдзурддаг кодта, уонӕбӕл дзуапп лӕвӕрд ӕрцудайдӕ, ӕма адӕн ӕнӕхай цӕмӕй фӕцӕнцӕ, уой син фӕстӕмӕ балхӕдтайдӕ (Мар. 8:31; 1 Пет. 2:21–24). Уомӕн ба гӕнӕн адтӕй, Йеговӕ ӕ Фурти цӕйбӕрцӕдӕр рӕстӕг ку нӕбал гъӕуай кодтайдӕ ӕма ин ку не ’нхус кодтайдӕ, ӕрмӕстдӕр уӕд. Йесой царди уӕхӕн хабар фиццаг хатт ӕрцудӕй.

Ка ’й зонуй, Йесой фӕндадтӕй, цӕмӕй ӕ фӕдбӕлдзӕугутӕ балӕдӕрдтайуонцӕ, Йеговӕ ин уӕхӕн мӕлӕт бавзарун цӕмӕн бауагъта, уой *. Йесо ӕй зудта, фудгӕнӕги хузӕн ӕй гъезӕмӕртти гъӕдӕбӕл ке ниййауиндздзӕнцӕ, е беретӕн къахкъуӕрӕн ке исуодзӕй (1 Кор. 1:23). Фал ӕ фӕдбӕлдзӕугутӕ фиццагидӕр, цӕмӕн рамардӕй, уобӕл ку сагъӕс кодтайуонцӕ, уӕд ӕй фудгӕнӕгбӕл нӕ, фал сӕ Ервӕзунгӕнӕгбӕл нимадтайуонцӕ (Гал. 3:13, 14).

Йесо аци стихи дзурдтӕ цӕмӕн загъта, уой бӕлвурдӕй нӕ зонӕн. Фал ӕй зонӕн, цитӕ бавзурста, етӕ еугурӕйдӕр Хуцауи фӕндонмӕ гӕсгӕ ке адтӕнцӕ. Еци дзурдти фӕсте Йесо загъта: «Цидӕриддӕр мин бафӕдзахстай, уой исӕнхӕст кодтон!» (Иоан. 19:30; Лук. 22:37). Йеговӕ цубур рӕстӕгмӕ Йесой ке ниууагъта, гъома ’й ке нӕбал гъӕуай кодта, уой фӕрци ӕ бон иссӕй, зӕнхӕмӕ цӕй туххӕй ӕрцудӕй, уой кӕронмӕ исӕнхӕст кӕнун. Удта ма уой фӕрци ӕ бон иссӕй, «Моисеййи закъони, Пахампарти киунугути ӕма Псаломти» уой туххӕй ци финст адтӕй, уони еугурейдӕр исӕнхӕст кӕнун (Лук. 24:44).