1. Йеговӕ ни алкӕмӕндӕр цӕхуӕн хуарздзийнадӕ искодта?

АЛКЕДӔР ни Йеговӕ ӕхемӕ ӕрбахудта (Иоан. 6:44). Расагъӕс кӕнӕ, миллиардгай адӕни ’хсӕн дӕу ниууидта. Фӕ ’й уидта, дӕ зӕрдӕ уой ӕрдӕмӕ ’здӕхт ке адтӕй (1 Анз. 28:9). Йеговӕ дӕ хуарз зонуй, лӕдӕруй дӕ ӕма дӕ уарзуй. Е нин уодӕнцойнӕ куд нӕ хӕссуй!

2. Йесо ӕй куд балӕдӕрун кодта, Йеговӕ ни алкӕмӕдӕр цӕхуӕн цӕстӕй кӕсуй, уой?

² Йеговӕ дӕу куд уарзуй, иннӕ хуӕртӕ ӕма ӕнсувӕрти дӕр уотӕ уарзуй. Йесо уой фиййауи цӕветтонӕй балӕдӕрун кодта. Сӕдӕ фусемӕй еу уӕриккӕ ку фесӕфа, уӕд фиййау куд бакӕндзӕй? Науӕдзӕ фараст фуси бал фӕууадздзӕй ӕма еци уӕриккӕ агорӕг рандӕ уодзӕй. Ку ’й иссера, уӕдта ’й лӕдзӕгӕй нӕмун нӕ райдайдзӕй, фал ибӕл бацийнӕ уодзӕй. Е нин цӕбӕл дзорӕг ӕй? Алли уӕриккӕн дӕр Йегови цӕсти устур аргъ ес. Йесо ма фӕстагмӕ загъта: «Мӕ уӕларвон Фиди дӕр нӕ фӕндуй, цӕмӕй аци минкъийтӕй еу дӕр фесӕфа» (Матф. 18:12–14).

3. Аци статьяй цӕхуӕн фарстатӕмӕ ӕркӕсдзиан?

³ Неке ни фӕндуй хуӕртӕ ӕма ӕнсувӕрти зӕрдихудти цӕун. Мадта нӕ бон ци ӕй кӕнун, цӕмӕй уотӕ ма уайа? Нӕхе зӕрдихудти нин еске ку бацӕуа, уӕдта нӕ бон ци ӕй кӕнун? Гъӕйдӕ ӕркӕсӕн аци фарстатӕмӕ. Фал бал фиццаг базонӕн, Матфеййи 18 сӕри ци «минкъийти» кой цӕуй, етӕ ка ’нцӕ, уой.

4. Йесо «минкъийтӕ» ке исхудта, етӕ ка ’нцӕ?

⁴ «Минкъийтӕ» ӕнцӕ Йесой фӕдбӕлдзӕугутӕ. Цийфӕнди кари ма уонцӕ, уӕддӕр Йесойӕн минкъий сувӕллӕнтти  хузӕн ӕнцӕ, уомӕн ӕма си алцӕбӕлдӕр ахур кӕнунцӕ (Матф. 18:3). Кӕд алли рауӕнти цӕрунцӕ ӕма аллихузи уавӕрти исгъомбӕл ӕнцӕ, удта син фӕйнӕхузи уодигъӕдӕ ӕма зундахаст ес, уӕддӕр Йесобӕл ӕууӕндунцӕ, ӕма сӕ е дӕр уарзуй (Матф. 18:6; Иоан. 1:12).

5. Йеговӕн куд фӕууй, ӕ лӕггадгӕнгути зӕрдихудти ин еске ку бацӕуй, уӕд?

⁵ Еци «минкъийтӕй» Йеговӕ алкӕмӕндӕр аргъ кӕнуй. Цӕмӕй ӕй хуӕздӕр балӕдӕрӕн, уой туххӕй расагъӕс кӕнӕн, сувӕллӕнттӕмӕ цӕхуӕн цӕстӕй фӕккӕсӕн, уобӕл. Сувӕллӕнттӕ ӕнцӕ нӕ хӕзна, ӕма сӕ гъӕуай фӕккӕнӕн, уомӕн ӕма минкъий ӕнцӕ ӕма берӕ цидӕртӕ нӕмӕ фӕллӕдӕрунцӕ. Устур адӕймаги дӕр ма ӕнӕфудӕй еске ку бафхуӕруй, уӕд нин зин ку фӕууй, сувӕллони ку бафхуӕрунцӕ, уӕдта мӕстӕй рафицӕн. Уотӕ Йегови дӕр фӕндуй ӕ лӕггадгӕнгути гъӕуай кӕнун. Ӕма си ескӕмӕн ӕ зӕрдихудти ку бацӕунцӕ, уӕд ин зин фӕууй, хатгай ба мӕстгун дӕр рауй (Ис. 63:9; Мар. 9:42).

6. 1 Коринфӕгтӕмӕ 1:26–29 куд финст ӕй, уомӕ гӕсгӕ аци дуйне Киристей фӕдбӕлдзӕугутӕмӕ цӕхуӕн цӕстӕй кӕсуй?

⁶ Киристей ахуркӕнуйнӕгти ма минкъий сувӕллӕнтти хӕццӕ рабарӕн цӕмӕн ес? Расагъӕс кӕнӕ: аци дуйней адӕни цӕсти кадгинбӕл нимад ка ӕй? Гъӕздуг, зундгонд ӕма хъаурӕгин ка ’нцӕ, етӕ. Киристей фӕдбӕлдзӕугутӕ ба аци дуйней цӕсти ӕнцӕ хумӕтӕг адӕн. (Бакӕсӕ 1 Коринфӕгтӕмӕ 1:26–29.) Фал сӕмӕ Йеговӕ бустӕги ӕндӕр цӕстӕй кӕсуй.

7. Нӕ хуӕртӕ ӕма ӕнсувӕртӕмӕ цӕхуӕн зӕрдӕ гъӕуама дарӕн?

⁷ Йеговӕ ӕ лӕггадгӕнгутӕй алкедӕр уарзуй. Уомӕн си уӕлдай нӕййес, донаргъуд раги райста ӕви ӕрӕги. Мадта кӕд Йеговӕ ӕгас хуӕртӕ ӕма ӕнсувӕрти уарзуй, уӕд сӕ мах дӕр гъӕуама уарзӕн. Библи зӕгъуй, «уе ’нсувӕрти ӕгасейдӕр уарзетӕ», айдагъ еуӕй-еуети нӕ, фал (1 Пет. 2:17). Гъӕуама нӕ хуӕртӕ ӕма ӕнсувӕрти уӕлдай мастӕй гъӕуай кӕнӕн. Еске зӕрдихудти си ку бацӕуӕн, уӕд гъӕуама нӕхе уотӕ ма дарӕн, цума неци ’рцудӕй, удта уотӕ дӕр гъӕуама ма сагъӕс кӕнӕн, хатир кӕнгӕ ин ӕй ӕма мин ниххатир кӕндзӕй, зӕгъгӕ. Адӕймаг зӕрдихудтӕгӕнагӕ цӕмӕн фӕууй? Ка ’й зонуй, ци уавӕрти исгъомбӕл ӕй, уой туххӕй ӕхемӕ нецӕййаг кӕсуй, кенӕ ба донаргъуд ӕрӕги райста ӕма нӕма исахур ӕй иннетӕн хатир кӕнун. Кудфӕнди ма уа, уӕддӕр гъӕуама адӕймаги хӕццӕ бафедаунбӕл байархайӕн. Ӕ зӕрдӕ арӕх кӕмӕн раходуй, еци адӕймаг дӕр ӕй гъӕуама лӕдӕра, ӕхебӕл ӕй косун ке гъӕуй. Уотемӕй ӕхецӕн дӕр хуӕздӕр уодзӕй, удта ин фулдӕр ӕмбӕлттӕ фӕззиндзӕй.

8. Киристей ахуркӕнуйнӕгтӕ, ка си уӕлдӕр уодзӕй, уобӕл цӕмӕн тухстӕнцӕ?

⁸ Киристе ӕ ахуркӕнуйнӕгтӕн минкъий сувӕллони цӕветтон цӕмӕн ӕрхаста? Уомӕн ӕма ’й уотӕ бафарстонцӕ: «Уӕларвон паддзахади уӕлдӕрбӕл нимад ка ӕй?» (Матф. 18:1). Уӕди рӕстӕги дзиуиттӕгтӕй беретӕ хъӕбӕр тухстӕнцӕ, адӕни астӕу син ци кадӕ адтӕй, уобӕл. Еу ӕртасӕг уой туххӕй загъта: «Адӕн цӕргӕ дӕр ӕма мӕлгӕ дӕр уой туххӕй кодтонцӕ, цӕмӕй син адӕни астӕу адтайдӕ кадӕ ӕма хуарз ном».

9. Киристей ахуркӕнуйнӕгти цӕбӕл гъудӕй архайун?

⁹ Йесо ӕй лӕдӕрдтӕй, ӕ ахуркӕнуйнӕгтӕн ӕнцон ке нӕ уодзӕй, адӕн ци зундбӕл хуӕст адтӕнцӕ, уомӕй исуӕгъдӕ ун, ӕма си ка уӕлдӕр ӕй, уобӕл мабал тухсун. Зӕгъгӕ дӕр син уомӕн кодта: «Уе ’хсӕн уӕлдӕр ка ӕй, е ӕхе уотӕ дарӕд, цума кӕстӕр ӕй, хестӕр ба – цума лӕггадгӕнӕг ӕй» (Лук.  22:26). Адӕймаг ӕхе кӕстӕри хузӕн ку дара, уӕд «иннети ӕхецӕй уӕлдӕр» ӕвӕрдзӕй (Фил. 2:3). Ӕма ин е куд хуӕздӕр уайа, уотӕ ба иннети зӕрдихудти дӕр минкъийдӕр цӕудзӕй.

10. Цӕхуӕн дзурдтӕбӕл гъӕуй лӕмбунӕг расагъӕс кӕнун?

¹⁰ Хуӕртӕ ӕма ӕнсувӕртӕй ни алкедӕр цӕмӕйдӕр хуӕздӕр ӕй. Цӕмӕй, уой ба фӕууиндзиан, сӕ хуарз менеугутӕмӕ син ку кӕсӕн, уӕд. Гъӕуама лӕмбунӕг расагъӕс кӕнӕн апостол Павели дзурдтӕбӕл: «Ке фӕрци хецӕн кӕнис иннемӕй? Цидӕриддӕр дӕмӕ ес, уой дин Хуцау нӕ равардта? Ӕма дин ӕй кӕд Хуцау равардта, уӕдта дӕхе ци ’стауис, цума дин дӕхе хъаури фӕрци ӕй?» (1 Кор. 4:7). Гъӕуама нӕхемӕ ӕгӕр берӕ ’ргом ма ’здахӕн ӕма нӕхемӕ иннетӕй хуӕздӕр ма кӕсӕн. Ӕнсувӕрӕн дессаги радзубандитӕ ку уа, хуӕрӕ ба Библий ахур райдайунмӕ хуарз ку арӕхса, уӕд сӕ еу дӕр ӕма сӕ иннӕ дӕр кадӕ гъӕуама Йеговӕн кӕнонцӕ.

11. Йесо паддзах ӕма цагъари хабар цӕмӕн радзурдта?

¹¹ Йесо ӕ фӕдбӕлдзӕугути кӕрӕдзей зӕрдихудти цӕунӕй ку бафӕдзахста, уӕд син ӕрхаста еу цӕветтон. Радзурдта син, еу паддзах ӕ цагъарӕн устур ӕфстау куд ниххатир кодта, уой. Еци ӕфстау уоййасӕ адтӕй, ӕма ’й цагъар некӕд бафистайдӕ. Фал фӕстӕдӕр еци цагъар ӕндӕр цагъарӕн дзӕвгарӕ минкъийдӕр ӕфстау ниххатир кӕнун нӕ бакумдта. Паддзах уой ку базудта, уӕд имӕ рамӕстгун ӕй ӕма ’й ахӕстдони багӕлста. Аци хабарӕй цӕбӕл ахур кӕнӕн? Йесо загъта: «Уотӕ бакӕндзӕй сумахӕн дӕр мӕ уӕларвон Фидӕ, алкедӕр уи е ’нсувӕрӕн зӕрдӕй ку нӕ хатир кӕна, уӕд» (Матф. 18:21–35).

12. Иннетӕн ку нӕ хатир кӕнӕн, уӕд е цӕмӕ ӕркӕндзӕй?

¹² Еци цагъар айдагъ ӕхецӕн зиан не ’рхаста. Еуӕрдиги е ’мбалӕн нӕ батӕрегъӕд кодта, ӕма ’й «ахӕстдони бакӕнун кодта, цалинмӕ ин е ’фстау нӕ бафистайдӕ, уӕдмӕ». Иннердиги ба, «иннӕ цагъартӕ уой ку фӕууидтонцӕ, уӕд син хъӕбӕр зин адтӕй». Уотӕ махӕн дӕр нӕ гъуддӕгтӕмӕ иннетӕ дӕр кӕсунцӕ. Ӕма нин кадӕр нӕ зӕрдихудти ку бацӕуа, мах ба ин ку нӕ хатир кӕнӕн, уӕд е цӕмӕ ӕркӕндзӕй? Еуӕрдиги хатир ни ка ракурдта, еци адӕймаги зӕрдӕ фӕрресун кӕндзиан, уазал цӕстӕй имӕ ке ракастан, уой туххӕй. Иннердиги ба ӕмбурди хуӕртӕ ӕма ӕнсувӕртӕн дӕр зин уодзӕй, еци адӕймаги хӕццӕ ке нӕ федауӕн, е.

13. Еу хуӕри хабарӕй цӕбӕл ахур кӕнӕн?

¹³ Хатир кӕнун ку зонӕн, уӕд уомӕй нӕхецӕн дӕр хуӕздӕр уодзӕй ӕма иннетӕн дӕр. Е бӕрӕг ӕй еу пионер хуӕри хабарӕй, ис ӕй хондзиан Кристӕл. Хъӕбӕр зин ин адтӕй ӕмбурди имӕ еу хуӕрӕ ци цӕстӕй кастӕй, е. Кристӕл зӕгъуй: «Гъе уӕхӕн загъд дин кодтайдӕ, цума дӕ кардӕй барӕхуста. Гъуддаг гъе уой уӕнгӕ бацӕй, ӕма мӕ ӕ хӕццӕ еу къуари игъосун кӕнун дӕр нӕбал фӕндадтӕй. Мӕ лӕггадӕ дӕр мин цийнӕ нӕбал хаста». Кристӕлмӕ уотӕ кастӕй, ӕма еци хуӕрӕмӕ дзӕгъӕли нӕ мӕстгун кӕнуй, фал уӕддӕр ӕхецӕн загъта, ӕ зӕрди маст ке нӕ дардзӕй ӕма ӕхецӕн тӕрегъӕд кӕнун ке нӕ райдайдзӕй. Цума ин ци банхус кодта? 1999 анзи 15 октябри «Гъӕуайгӕнӕн мӕсуг»-и бакастӕй статья «Зӕрдӕй хатир кӕнӕ» (урус.). Гъема статьяй ци унаффитӕ адтӕй, уонӕмӕ гӕсгӕ архайун райдӕдта. Кристӕл еци хуӕрӕн ниххатир кодта, ӕма зӕгъуй: «Нур ӕй лӕдӕрун, алкедӕр ни ӕхебӕл ке косуй, цӕмӕй ӕ уодигъӕдӕ нӕуӕгмӕ раййева. Ӕма нин Йеговӕ алкӕмӕндӕр  алли бон дӕр зӕрдӕй хатир кӕнуй. Цума мӕ рагъӕй цидӕр рахаудтӕй, гъе уотӕ мин фенцондӕр ӕй. Мӕ лӕггадӕ ба мин нӕуӕгӕй цийнӕ хӕссуй».

14. Матфеййи 18:21, 22 куд финст ӕй, уомӕ гӕсгӕ Петурӕн зин ци адтӕй? Ци нин банхус кӕндзӕй иннетӕн хатир кӕнун?

¹⁴ Мах ӕй зонӕн, хатир кӕнун ке гъӕуй, ӕма е раст ке ӕй. Фал е уотӕ ӕнцон нӕй. Апостол Петурӕн дӕр, ӕвӕдзи, зин адтӕй иннетӕн хатир кӕнун. (Бакӕсӕ Матфеййи 18:21, 22.) Цума нин ци банхус кӕндзӕй? Фиццаг: гъӕуама ма иронх кӕнӕн, Йеговӕ нин ӕхуӕдӕг хъӕбӕр берӕ ке хатир кӕнуй (Матф. 18:32, 33). Кӕд уой аккаг нӕ ан, уӕддӕр нин еу хаттӕй иннӕ хатмӕ ниххатир кӕнуй (Пс. 103:8–10). Уомӕй уӕлдай ма Хуцауи рази «ихӕсгин ан, цӕмӕй нӕ кӕрӕдзей уарзӕн» (1 Иоан. 4:11). Мадта хатир кӕнӕн ӕви нӕ, е фӕндонӕй нӕй. Е нӕ ихӕс ӕй хуӕртӕ ӕма ӕнсувӕрти рази. Дуккаг: расагъӕс кӕнӕ, хатир кӕнун ку зонӕн, уӕд е иннетӕн ци пайда ӕрхӕсдзӕй, уобӕл. Уотемӕй, нӕ зӕрдихудти ка бацудӕй, уомӕн банхус кӕндзиан, ӕмбурди фарнӕ багъӕуай кӕндзиан, Йеговӕй нӕ раидард уодзиан ӕма нӕбӕл уӕзӕ ка кӕнуй, еци мастӕй дӕр исуӕгъдӕ уодзиан (2 Кор. 2:7; Кол. 3:14). Ӕртиккаг: Йеговӕй ӕнхус корӕ, уомӕн ӕма уой фӕндуй, цӕмӕй хуӕртӕ ӕма ӕнсувӕртӕн хатир кӕнӕн. Сайтанӕн уӕхӕн барӕ ма дӕттӕ, цӕмӕй нӕ астӕу лӕса (Еф. 4:26, 27). Цӕмӕй Сайтан ӕмбурди фарнӕ ӕма еудзийнадӕ ма фехала, уой туххӕй нӕ Йегови ӕнхус гъӕуй.

15. Колоссӕгтӕмӕ 3:13 куд финст ӕй, уомӕ гӕсгӕ ци гъӕуама кӕнӕн, ӕмбурди нин нӕ зӕрдӕ еске хъӕбӕр ку фӕрресун кӕна, уӕд?

¹⁵ Фал дин зӕгъӕн, ӕмбурди кадӕр дӕ зӕрдӕ гъе уотӕ фӕрресун кодта, ӕма ’й дӕ бон байронх ун нӕй. Цума дин ци кӕнгӕ ’й? Фарнӕ багъӕуай кӕнунбӕл ӕгас хъауритӕй архайӕ. Йеговӕн алцидӕр радзорӕ. Еци адӕймаги туххӕй дӕр имӕ раковӕ, удта си корӕ, цӕмӕй ӕй фӕууинай, хуарзӕй имӕ  ци ес ӕма ’й ӕхемӕ цӕй туххӕй ӕрбахудта, уой (Лук. 6:28). Гъе уотемӕй дӕр дӕ зӕрдӕй маст ку не ’ссӕуа, уӕдта еци адӕймаги хӕццӕ радзорӕ. Ӕрмӕст бал фиццаг дзӕбӕх расагъӕс кӕнӕ, ци ӕма куд дзордзӕнӕ, уобӕл. Дӕ дзурдбӕл бӕрӕг уӕд, барӕй ке нӕ ракодта, уой ке лӕдӕрис (Матф. 5:23, 24; 1 Кор. 13:7). Фал ӕй дӕ хӕццӕ бафедаун ку нӕ бафӕндӕуа, уӕдта? Дӕ нифс ма сӕттӕд ӕма ма никкидӕр ӕвзарӕ ӕ хӕццӕ бафедаунбӕл. (Бакӕсӕ Колоссӕгтӕмӕ 3:13.) Ма бауадзӕ, цӕмӕй дин еци адӕймаг фенадӕ уа, уомӕн ӕма уӕд Йеговӕй раидард уодзӕнӕ. Аци унаффитӕмӕ гӕсгӕ ку архайай, уӕд ӕй бавдесдзӕнӕ, Йегови хӕццӕ дин ци лимӕндзийнадӕ ес, уомӕй хъазардӕр дин ке неци ес, уой (Пс. 119:165).

16. Алкӕбӕлдӕр ни цӕхуӕн ихӕс ес?

¹⁶ Мах нӕхецӕн хъӕбӕр устур кадӕбӕл нимайӕн, хуӕртӕ ӕма ӕнсувӕрти хӕццӕ нӕ бон Йеговӕн лӕггадӕ кӕнун ке ӕй, уой. Мах ан «еу дзогӕ» ӕма нин ес «еу Фиййау» (Иоан. 10:16). Киунуги «Организованы, чтобы исполнять волю Иеговы» 165 фарсбӕл финст ӕй: «Нур дӕубӕл дӕр ес ихӕс ӕмбурди еудзийнадӕбӕл архайун». Мадта гъӕуама архайӕн, «цӕмӕй хуӕртӕ ӕма ӕнсувӕртӕмӕ адӕймаги цӕстӕй нӕ, фал Йегови цӕстӕй кӕсӕн». Йеговӕн мах ан ӕ минкъий сувӕллӕнттӕ ӕма нӕ берӕ уарзуй. Ду дӕр хуӕртӕ ӕма ӕнсувӕртӕмӕ уӕхӕн цӕстӕй кӕсис? Ести хуарздзийнадӕ син ку ракӕнис, уӕд ӕй Йеговӕ алкӕддӕр фӕууинуй (Матф. 10:42).

17. Аци статья дӕ цӕмӕ баразӕнгард кодта?

¹⁷ Мах нӕ хуӕртӕ ӕма ӕнсувӕрти уарзӕн ӕма нӕ нӕ фӕндуй сӕ зӕрдихудти цӕун (Ром. 14:13). Гъӕуама нӕхе иннетӕй уӕлдӕр макӕд ӕвӕрӕн, удта зӕрдӕй хатир кӕнӕн. Гъӕуама ма бауадзӕн, цӕмӕй зӕрдихудти туххӕй Йеговӕй раидард уӕн. Гъӕйдӕ мадта «тундзӕн, фарнӕ ци хӕссуй ӕма кӕрӕдзей цӕй фӕрци ес бафедар кӕнӕн, уомӕ» (Ром. 14:19).