РАГИДЗАМАНТИ израилӕгти ӕхца федун гъудӕй, цӕмӕй раст дини гъуддӕгтӕ размӕ цудайуонцӕ. Ӕма еци хъалон федунбӕл ахур адтӕнцӕ. Фал Киристей рӕстӕги ба федуйнӕгтӕ исберӕ ’нцӕ, ӕма адӕн тухсун райдӕдтонцӕ.

Цӕмӕй сугъдӕг цатури, уой фӕсте ба ковӕндони дӕр куст ма ӕрлӕудтайдӕ, уой туххӕй алли дзиуиттаг нӕлгоймаги дӕр алли анз дӕр федун гъудӕй хъалон еу сикли ӕрдӕг (дууӕ драхми). Фиццаг ӕноси еци ӕхца харзгонд цудӕнцӕ нивӕндтӕ хӕссунбӕл ӕма ковӕндонӕмӕ зелунбӕл. Еци ковӕндонӕ паддзах Ирод нӕуӕгӕй исрӕвдзӕ кодта. Еухатт дзиуиттӕгтӕ Петури бафарстонцӕ, Йесо ба, дан, ци зӕгъуй, еци хъалон федуни туххӕй. Йесой дзуаппӕй бӕрӕг адтӕй, уой туххӕй лӕгъузӕй ке неци гъуди кодта. Петурӕн ма амонгӕ дӕр бакодта, еци хъалон бафедунмӕ ӕхца кӕцӕй райса, уой (Матф. 17:24–27).

Уомӕй уӕлдай ма Хуцауи адӕни федун гъудӕй, ци сӕмӕ хаудтӕй, уомӕй дӕсӕймаг хай, ӕхца уа ӕви тиллӕг (Лев. 27:30–32; Ним. 18:26–28). Дини разамонгутӕ ба еци закъон гъе уотӕ ниддессаг кодтонцӕ, ӕма ма адӕнӕн «бетъинайӕй, фидхуасӕй ӕма зирайӕй» дӕр дӕсӕймаг хай федун кодтонцӕ. Ӕной дӕсӕймаг хай федун ке гъудӕй, уой нихмӕ Йесо неци дзурдта, фал фарисейтӕ ӕма киунугидӕснитӕн ба бауайдзӕф кодта, дудзӕсгӕнттӕ ке адтӕнцӕ, уой туххӕй, уомӕн ӕма сӕмӕ «Закъони сӕйрагдӕр гъуддӕгтӕ» финст дӕр некӕми адтӕнцӕ (Матф. 23:23).

Фиццаг ӕноси ма дзиуиттӕгти федун гъудӕй, ромӕгтӕ син ке федун кодтонцӕ, еци хъалон. Зӕгъӕн, зӕнхи куст ка кодта, уони федун гъудӕй сӕ тиллӕгӕй 20–25 процентти кенӕ ба сӕ ӕхцайӕй дӕттун. Удта ма алли адӕймаги дӕр хецӕн хъалон федун гъудӕй. Фарисейтӕ дӕр еци хъалони туххӕй фарстонцӕ Йесой. Ӕма син Йесо загъта: «Паддзахи ци ӕй, уой паддзахӕн дӕттетӕ, Хуцауи ци ӕй, уой ба – Хуцауӕн» (Матф. 22:15–22).

Хъалон федун ма гъудӕй, арӕнтӕбӕл ци ӕрбаласиуонцӕ, уобӕл дӕр. Ӕмбурд ба сӕ кодтонцӕ, наулӕууӕнти, хедтӕбӕл, дууӕ нади кӕми фӕййеу уайонцӕ, уоми, горӕти колдуӕртти рази ӕма базарти.

Роми хецаудзийнади рӕстӕг хъалонтӕ хъӕбӕр берӕ адтӕнцӕ ӕма си адӕн нӕбал фӕразтонцӕ. Ромаг историк Тацит куд загъта, уомӕ гӕсгӕ, император Тибериййи рӕстӕги «Сири ӕма Иудейӕ сӕ хъалонтӕ фӕмминкъийдӕр кӕнуни туххӕй курдиадӕ балӕвардтонцӕ». Е адтӕй Йесой рӕстӕги.

Уавӕр ма никки фуддӕр кодта, еци хъалонтӕ куд ӕмбурд кодтонцӕ, уомӕй дӕр. Хъалон ӕмбурдгӕнӕги бунат ӕнгъизтӕй балхӕнун аукциони. Ка фулдӕр ӕхца бафистайдӕ, уомӕн ӕй рауӕйӕ кодтайуонцӕ. Ка ’й балхӕнидӕ, етӕ ба, хъалонтӕ ка ӕмбурд кодтайдӕ, уӕхӕн адӕни байхуӕрсиуонцӕ. Ӕма уотемӕй се ’гасдӕр адӕни харзӕй цардӕнцӕ. Закхкей дӕр, ӕвӕдзи, уӕхӕн хъалон ӕмбурдгӕнгутӕ ка байхуӕрста, уонӕй сӕ еу адтӕй (Лук. 19:1, 2). Мадта дессаг нӕй, уӕди рӕстӕги адӕн хъалонти туххӕй мӕстгун ке кодтонцӕ ӕма сӕ ка ӕмбурд кодта, уонӕй се ’сӕфт ке уидтонцӕ.