Павел финста: «Мӕхе кой ку кӕнон, уӕд, закъон ӕхуӕдӕг ци дзоруй, уомӕ гӕсгӕ ӕз закъонӕн рамардтӕн, цӕмӕй Хуцауи туххӕй райгас уон» (Гал. 2:19).

Цӕмӕй, Павели дзурдтӕ цӕбӕл дзорӕг ӕнцӕ, уой балӕдӕрӕн, уой туххӕй бал гъӕуама базонӕн, ромаг провинций Галатий ӕмбурдтӕн ци зӕгъуйнаг адтӕй, уой. Уоми ка цардӕй, еци киристӕнттӕй еуӕй-еуетӕ мӕнгӕ ахургӕнгутӕмӕ игъосун райдӕдтонцӕ. Уони гъудимӕ гӕсгӕ, цӕмӕй фӕййервӕзай, уой туххӕй Моисеййи закъон ӕнхӕст кӕнун гъудӕй. Сонӕт кӕнун дӕр уомӕ хаудтӕй. Фал ӕй Павел зудта, Хуцау еци закъон ке нӕбал ӕнхӕст кӕнун кодта. Ӕма уомӕн ӕ финстӕги федар бӕлвурдгӕнӕнтӕ ӕрхаста, ӕма уотемӕй ӕнсувӕрти бафедар кодта, цӕмӕй Киристей нивондбӕл ӕууӕндтайуонцӕ (Гал. 2:4; 5:2).

Библий куд финст ӕй, уомӕ гӕсгӕ адӕймаг ку рамӕлуй, уӕд нӕбал фӕууй ӕма ибӕл неке барӕ бал фӕццӕуй (Еккл. 9:5). Мадта Павел уотӕ ку загъта, «закъонӕн рамардтӕн», зӕгъгӕ, уӕд ӕй уой зӕгъун фӕндадтӕй, ӕма Моисеййи закъони дӕлбарӕ нӕбал ӕй. Фал ӕй федарӕй зудта, Киристей нивондбӕл ке баууӕндтӕй, уой туххӕй Хуцауӕн ке райгас ӕй.

Мадта кӕд Закъони дӕлбарӕ нӕбал адтӕй, уӕд уотӕ ба цӕмӕн загъта, «закъон ӕхуӕдӕг ци дзоруй, уомӕ гӕсгӕ», зӕгъгӕ? Цалдӕр стихи уӕлдӕр Павел балӕдӕрун кодта: «Закъон ци гъуддӕгтӕ домуй, адӕймаг уони фӕрци не ’рцӕуй рӕстгӕнӕгбӕл нимад, фал, Йесо Киристебӕл ке ӕууӕндуй, ӕрмӕстдӕр уой фӕрци» (Гал. 2:16). Дзурд дӕр ибӕл нӕййес, Моисеййи закъон дӕр гъӕугӕ кодта. Павел балӕдӕрун кодта, еци Закъон лӕвӕрд цӕмӕн ӕрцудӕй, уой: «Цӕмӕй зӕрдӕ кӕмӕн байвардта, еци байзӕддаг цалинмӕ не ’рцудайдӕ, уӕдмӕ адӕни фудракӕндтӕ раргом кодтайдӕ» (Гал. 3:19). Мадта Закъони фӕрци бӕрӕг адтӕй, тӕрегъӕдгун адӕнӕн сӕ бон ке нӕй Хуцауи уагӕвӕрдтӕмӕ гӕсгӕ ӕнхӕстӕй цӕрун, ӕма цӕмӕй сӕ тӕрегъӕдтӕ хатиргонд цӕуонцӕ, уой туххӕй сӕ ӕнхӕст нивонд ке гъудӕй. Гъе уотемӕй сӕ Закъон ӕрбахудта «байзӕддагмӕ», гъома Киристемӕ. Киристей нивонди фӕрци Хуцауи бон адтӕй адӕймаги рӕстгӕнӕгбӕл банимайун, еци нивондбӕл ку баууӕндтайдӕ, уӕд (Гал. 3:24). Павел дӕр еци адӕнӕй сӕ еу адтӕй. Закъон хуарз ке зудта, уой фӕрци ӕй балӕдӕрдтӕй, Йесо Мессийӕ ке ӕй, уой ӕма ибӕл баууӕндтӕй. Гъе уотемӕй Павел «закъонӕн рамардӕй» ӕма «Хуцауи туххӕй райгас» ӕй. Моисеййи закъони дӕлбарӕ нӕбал адтӕй, фал Хуцауи.

Уӕхӕн гъуди ма Павел ниффинста ромӕгтӕмӕ финстӕги дӕр: «Раст уотӕ сумах дӕр, ме ’нсувӕртӕ, Киристей бауӕри фӕрци Закъонӕн рамардайтӕ... Фал нӕмӕ нур Закъон нецибал барӕ даруй, уомӕн ӕма нӕбӕл федар ци хуӕстӕй, уомӕн рамардан» (Ром. 7:4, 6). Аци стихти, удта Галатӕгтӕмӕ 2:19 дӕр Павел, Моисеййи закъон ка фехалдтайдӕ, уой ци мӕлӕт баййафтайдӕ, уой кой нӕ кодта, фал ӕхуӕдӕг дӕр ӕма иннӕ киристӕнттӕ дӕр Закъони дӕлбарӕ ке нӕбал адтӕнцӕ, уой кой. Ӕма уомӕн гӕнӕн адтӕй, Йесо Киристей нивондбӕл ке ӕууӕндтӕнцӕ, уой фӕрци.