Зудтай ӕй?
Рагидзаманти папирусӕй бӕлӕгътӕ дӕр кодтонцӕ
Papyrus plant
РАГОН Египети адӕн арӕхдӕр папирусбӕл ке финсиуонцӕ, уой беретӕ зонунцӕ. Грекъӕгтӕ дӕр ӕма ромӕгтӕ дӕр финстонцӕ папирусбӕл *. Фал рагидзаманти папирусӕй бӕлӕгътӕ дӕр ке кодтонцӕ, уой ба беретӕ нӕ зонунцӕ.
Папирусӕй конд дууӕ бӕлӕгъей макеттӕ, Египети дзӕппӕзти ке иссирдтонцӕ, уӕхӕнттӕ
Еу 2 500 анзи размӕ пахампар Исай ниффинста, «Эфиопий цӕугӕдӕнтти алливарс» ка цардӕй, еци адӕн «папирусӕй конд наутӕбӕл» минӕвӕрттӕ ке ӕрвистонцӕ (Ис. 18:1, 2; Йер. 51:32).
Библи Хуцауи разамундӕй финст ӕй, ӕма ’й ка фертасуй, уонӕмӕ дессаг нӕ кӕсуй, археологтӕ бӕлвурдгӕнӕнтӕ ке иссирдтонцӕ, рагидзаманти папирустӕй бӕлӕгътӕ дӕр ке кодтонцӕ, уомӕн (2 Тим. 3:16). Зӕгъӕн, уӕхӕн бӕлвурдгӕнӕнтӕ иссирдтонцӕ Египети.
ПАПИРУСӔЙ БӔЛӔГЪТӔ КУД ИСКӔНИУОНЦӔ?
Египеттӕгти дзӕппӕзтӕбӕл ци хузтӕ ес, уонӕбӕл ӕнгъезуй фӕууинун, папирус куд карстонцӕ ӕма си бӕлӕгътӕ куд искӕниуонцӕ, уой. Нӕлгоймӕгтӕ папирус ӕркӕрдиуонцӕ, курестӕ си искӕниуонцӕ ӕма еци курестӕ кӕрӕдзебӕл федар бабӕттиуонцӕ. Папирусӕн ӕ гъӕдӕ ӕй ӕртӕтегъон. Ӕма папируси гъӕдтӕ кӕрӕдзебӕл ку бабӕттунцӕ, уӕд си рауайуй федар курес. Еу киунуги куд финст ӕй, уомӕ гӕсгӕ папирусӕй конд бӕлӕгъӕн ӕ дӕргъӕ уидӕ 17 метри бӕрцӕ дӕр. Ӕма сӕбӕл дууердигӕй дӕр адтӕй фӕйнӕ 10 кенӕ 12 къохари (весло).
Египеттаг рельеф. Ӕвдист си цӕуй, папирусӕй бӕлӕгътӕ куд кодтонцӕ, е
ПАПИРУСӔЙ БӔЛӔГЪТӔ ЦӔМӔН КОДТОНЦӔ?
Нили дӕлфӕзи папирус берӕ задӕй. Удта папирусӕй бӕлӕгътӕ кӕнун дӕр ӕнцон адтӕй. Наутӕ гъӕдӕй кӕнун ку райдӕдтонцӕ, уӕддӕр ма кӕсалгахӕсгутӕ ӕма цауӕйнонтӕ донбӕл папирусӕй конд минкъий бӕлӕгътӕбӕл цудӕнцӕ.
Уӕдӕй фӕстӕмӕ ма адӕн берӕ ӕнзти дӕргъи фӕццудӕнцӕ папирустӕй конд бӕлӕгътӕбӕл. Рагон грекъаг финсӕг Плутарх (цардӕй фиццаг киристӕнтти рӕстӕги) ниффинста, еци рӕстӕги дӕр ма ке адтӕй папирустӕй конд бӕлӕгътӕ.
^ 3 абз. Папирус зайуй цъимарати кенӕ дон хъӕбӕр сабургай кӕми фӕццӕуй, уӕхӕн цӕугӕдӕнтти алливарс. Папирус хӕрдмӕ исирӕзуй 5 метрей уӕнгӕ, зӕнхӕй кӕми искӕсуй, еци бунати ба фӕууй 15 сантиметри стӕвдӕн дӕр.
