1. Йесо куд игъосун кодта ӕма ’й ӕ ахуркӕнуйнӕгтӕ куд бафӕнзтонцӕ? (Кӕсӕ хузӕмӕ ӕндаг цъарӕбӕл.)

ЙЕСО зӕнхӕбӕл ку адтӕй, уӕд хуарз хабар игъосун кодта. Ӕма имӕ кӕд беретӕ нӕ игъустонцӕ, уӕддӕр ӕ нифс нӕ састӕй ӕма ’й фӕндадтӕй, цӕмӕй ӕ фӕдбӕлдзӕугутӕ дӕр уой туххӕй сӕ къохтӕ ма уадзонцӕ (Иоан. 4:35, 36). Цалинмӕ сӕ хӕццӕ адтӕй, уӕдмӕ хъӕбӕр зингзӕрдӕй игъосун кодтонцӕ (Лук. 10:1, 5–11, 17). Фал ӕй ку ниййахӕстонцӕ ӕма ’й ку рамардтонцӕ, уӕдта сӕ зинг фӕццидӕр ӕй (Иоан. 16:32). Йесо ку райгас ӕй, уӕд син бафӕдзахста, цӕмӕй се ’гас хъауритӕ дӕр игъосун кӕнунмӕ исаразтайуонцӕ. Ӕма уӕларвмӕ ку иссудӕй, уӕд еци кустмӕ уотӕ зингзӕрдӕй бавналдтонцӕ, ӕма син се знӕгтӕ загътонцӕ: «Йерусалим уӕ ахурадӕй байдзаг кодтайтӕ» (Гъуд. 5:28).

2. Йеговӕ ӕ лӕггадгӕнгутӕн куд арфӕ кӕнуй?

² Фиццаг ӕноси игъосун кӕнуни гъуддагӕн разамунд лӕвардта Йесо, Йеговӕ ба син еци гъуддаг ӕнхӕст кӕнунмӕ ӕнхус кодта. Уой фӕрци беретӕ хуарз хабар сӕ зӕрдӕмӕ райстонцӕ. Зӕгъӕн, 33 анзи Фӕндзайӕймаг бони донаргъуд райстонцӕ 3 000 адӕймаги (Гъуд. 2:41). Ӕма уой фӕсте сӕ нимӕдзӕ тагъд ирӕзун райдӕдта (Гъуд. 6:7). Удта ма Йесо загъта, фӕстаг бӕнтти хуарз хабар ӕгас зӕнхӕбӕл дӕр игъустгонд ке цӕудзӕй (Иоан. 14:12; Гъуд. 1:8).

3, 4. Еуӕй-еу рауӕнти игъосун кӕнун зиндӕр цӕмӕн ӕй? Аци статьяй ци базондзиан?

³ Алкедӕр ни фӕндуй, цӕмӕй нӕ къохтӕ ма уадзӕн. Еуӕй-еу бӕстити е уотӕ зин нӕй, уомӕн ӕма си Библи ахур кӕнун ке фӕндуй, уӕхӕнттӕ берӕ ес. Сауӕнгӕ ма адӕни ӕнгъӕлмӕ кӕсун дӕр фӕгъгъӕуй, цалинмӕ сӕмӕ игъосунгӕнгутӕй еске райевдӕла, уӕдмӕ. Ӕндӕр бӕстити ба  уотӕ ӕнцон нӕй игъосун кӕнун, уомӕн ӕма адӕни хӕдзари баййафун зин фӕууй. Хӕдзари ке баййафай, етӕ ба дӕмӕ игъосгӕ нӕ бакӕндзӕнцӕ.

⁴ Ду кӕми цӕрис, уоми дӕр кӕд уавӕр уотӕ ’й, уӕд дин аци статьяй унаффитӕ гъӕуама банхус кӕнонцӕ. Мах базондзиан, еуӕй-еу хуӕртӕ ӕма ӕнсувӕртӕ куд архайунцӕ, цӕмӕй син фулдӕр адӕни хӕццӕ радзорун бантӕса. Удта ма радзубанди кӕндзиан, нӕ бон ци ӕй кӕнун, цӕмӕй идарддӕр дӕр цийнӕгӕнгӕй лӕггадӕ кӕнӕн, адӕн нӕмӕ ку нӕ игъосонцӕ, уӕддӕр.

5. Берӕ хуӕртӕ ӕма ӕнсувӕртӕ игъосун кӕнгӕй цӕхуӕн зиндзийнӕдтӕбӕл ӕмбӕлунцӕ?

⁵ Берӕ хуӕртӕ ӕма ӕнсувӕртӕн нӕ фентӕсуй адӕни хӕдзари баййафун. Еуӕй-еу игъосунгӕнгути территоримӕ хаунцӕ, гъӕуай ке кӕнунцӕ, уӕхӕн хӕдзӕрттӕ. Ӕма сӕ арӕх еци хӕдзӕрттӕмӕ медӕмӕ нӕ фӕууадзунцӕ, цалинмӕ сӕмӕ цӕргутӕй еске нӕ фӕдздзора, уӕдмӕ. Кӕмидӕрти ба сӕребарӕй ӕнгъезуй хӕдзарӕй-хӕдзарӕмӕ игъосун кӕнун, фал си хӕдзари неке баййафдзӕнӕ. Еуӕй-еу хуӕртӕ ӕма ӕнсувӕртӕ ба фӕллӕггадӕ кӕнунцӕ, еугай-еугай хӕдзӕрттӕ кӕми ес, уӕхӕн бунӕтти. Ӕма цӕмӕй еу адӕймаги хӕццӕ радзоронцӕ, уой туххӕй сӕ дзӕвгарӕ рауайунтӕ фӕгъгъӕуй, уой дӕр ӕй хӕдзари ку баййафонцӕ, уӕд. Мах дӕр кӕд уӕхӕн зиндзийнӕдтӕбӕл ӕмбӕлӕн, уӕд гъӕуама нӕ къохтӕ ма уадзӕн. Нӕ бон ци ӕй кӕнун, цӕмӕй нин фулдӕр адӕни хӕццӕ дзорун ӕнтӕса?

6. Игъосунгӕнӕги кӕсалгахӕссӕги хӕццӕ рабарӕн цӕмӕн ес?

⁶ Йесо игъосун кӕнуни куст рабарста кӕсалгӕ ахӕссуни хӕццӕ (Мар. 1:17). Фӕууй уотӕ, ӕма кӕсалгахӕссӕг цалдӕр боней дӕргъи дӕр неци ниййахӕссуй, фал уой туххӕй ӕ къохтӕ не ’руадзуй. Зӕгъӕн, ӕ рӕстӕг кенӕ ӕ бунат раййевуй, кенӕ ба ӕндӕр мадзӕлттӕй испайда кӕнуй. Мах бон дӕр ӕй нӕ лӕггади еститӕ раййевун. Гъӕйдӕ ӕркӕсӕн цалдӕр гъуддагемӕ.

7. Аллихузи рӕстӕг ку игъосун кӕнӕн, уӕд нин ци бантӕсдзӕй?

⁷ Игъосун кӕнунмӕ аллихузи рӕстӕг ӕвзарӕ. Адӕн хӕдзӕртти ку фӕуунцӕ, еци рӕстӕг рацӕуисӕ. Гӕрр еу афон сӕхемӕ нӕ уодзӕнцӕ? Уомӕ гӕсгӕ хуӕртӕ ӕма ӕнсувӕртӕй кадӕртӕ участокмӕ ӕрбацӕунцӕ фӕсрӕфтӕ кенӕ изӕрӕй. Адӕн дӕр уӕд хуӕздӕр фегъосунцӕ, уомӕн ӕма хӕлӕф некумӕ фӕккӕнунцӕ. Кенӕ ба ӕнгъезуй, еу хестӕр нӕлгоймаг Давид куд архайуй, уотӕ бакӕнун. Е ’мбали хӕццӕ участокки ку фӕууй, уӕд хӕдзари ке нӕ баййафуй, уонӕмӕ еу кенӕ дууӕ сахатти фӕсте нӕуӕгӕй ӕрбацӕуй. Давид зӕгъуй: «Мӕхемӕ дӕр дессаг кӕсуй, фал дуккаг хатт ку ’рбацӕуӕн, уӕд берети ӕрбаййафӕн» *.

8. Екклесиасти 11:6 финст дзурдтӕ нӕ игъосун кӕнуни гъуддагмӕ рахӕссӕн куд ес?

⁸ Гъӕуама нӕ къохтӕ ма уадзӕн. Аци статьяй сӕйраг стих дӕр нӕ уомӕ разӕнгард кӕнуй. (Бакӕсӕ Екклесиаст 11:6.) Ӕнсувӕр Давид дӕр ӕ къохтӕ нӕ уагъта. Еу хӕдзари берӕ рӕстӕг неке баййафидӕ. Фал бабӕй еу уӕхӕни ку ’рбацудӕй, уӕд имӕ нӕлгоймаг ракастӕй, ӕма ин ӕ хӕццӕ дзӕбӕх дзубанди рауадӕй. Еци нӕлгоймаг загъта: «Аци хӕдзари аст анзи цӕрун, фал мӕмӕ Йегови Ӕвдесӕнтӕ некӕдма ӕрбацудӕнцӕ». Давид ба зӕгъуй: «Еу гъуддаг балӕдӕрдтӕн. Хӕдзари зинтӕй ке ӕрбаййафӕн,  уони хӕццӕ нин арӕхдӕр дзӕбӕх дзубанди рауайуй».

9. Еуӕй-еу Ӕвдесӕнтӕ куд архайунцӕ, цӕмӕй, хӕдзари ке нӕ баййафунцӕ, уони хӕццӕ дӕр радзоронцӕ?

⁹ Аллихузи рауӕнти игъосун кӕнӕ. Йегови Ӕвдесӕнтӕй беретӕ игъосун кӕнунцӕ гъӕунгти кенӕ стенди хӕццӕ, цӕмӕй, зин бахауӕн кӕмӕ ӕй, еци адӕни хӕццӕ дӕр радзубанди кӕнонцӕ. Берӕ хуӕртӕ ӕма ӕнсувӕртӕ ба зӕгъунцӕ, паркти, базарти ӕма кустуӕтти ку фегъосун кӕнунцӕ, уӕд сӕмӕ дзӕвгарӕ хуӕздӕр ке байгъосунцӕ ӕма литературӕ дӕр ке райсунцӕ. Боливийӕй еу районон цӕстӕдарӕг Флойран зӕгъуй: «Мах фӕсрӕфтӕ еу сахаттӕй ӕртӕ сахаттемӕ фегъосун кӕнӕн базарти ӕма тукӕнтти. Еци афони сӕмӕ ӕлхӕнӕг минкъийдӕр фӕууй. Берети хӕццӕ нин дзӕбӕх дзубанди рауайуй, хатгай ба Библи ахур кӕнун дӕр райдайӕн».

10. Цӕхуӕн мадзӕлттӕй ма нӕ бон ӕй пайда кӕнун?

¹⁰ Аллихузи мадзӕлттӕй пайда кӕнӕ. Зӕгъӕн, адӕймагмӕ уӕд еу рӕстӕг ӕрбацӕуис, уӕд иннӕ рӕстӕг, фал ӕй уӕддӕр хӕдзари не ’рбаййафис. Цума ин ӕндӕр ескуд дӕ бон ӕй хуарз хабар фегъосун кӕнун? Еу хуӕрӕ Катринӕ зӕгъуй: «Адӕймаги хӕццӕ мӕ цӕбӕл фӕндадтӕй радзорун, уой ин финстӕги ниффинсун». Мадта игъосун кӕнгӕй аллихузи мадзӕлттӕй пайда кӕнӕ.

11. Ци хабар хӕссӕн, уомӕ еуӕй-еуетӕ цӕмӕннӕ фегъосунцӕ?

¹¹ Еуӕй-еуети ба, ци хабар хӕссӕн, уомӕ игъосун нӕ фӕффӕндуй. Нӕдӕр сӕ Хуцау  фӕгъгъӕуй, нӕдӕр Библи. Зӕнхӕбӕл уойбӕрцӕ гъезӕмӕрттӕ ке ес, уой туххӕй си не феруагӕс кӕнуй, Хуцау ке ес, е. Библибӕл ба сӕ къох ракъуӕрунцӕ, уомӕн ӕма ’й уинунцӕ, дини разамонгутӕ сӕхе куд дарунцӕ, уой. Кедӕрти ба кустӕй кенӕ хӕдзари гъуддӕгтӕй нӕ фӕййевдӕлуй. Кадӕр ба цардӕй гъе уотӕ истухсуй, ӕма си нӕ феруагӕс кӕнуй, Библи ин ке банхус кӕндзӕй, е. Нӕ бон ци ӕй кӕнун, цӕмӕй уӕхӕн адӕнӕн игъосун кӕнгӕй нӕ нифс ма сӕтта?

12. Филиппӕгтӕмӕ 2:4 ци унаффӕ ес, е нин игъосун кӕнгӕй куд банхус кӕндзӕй?

¹² Адӕнбӕл ке тухсис, е дӕбӕл бӕрӕг уӕд. Хуарз хабармӕ ка нӕ игъуста, уонӕй нӕмӕ беретӕ фӕстӕдӕр байгъустонцӕ, уомӕн ӕма ’й уидтонцӕ, нӕ зӕрдӕ син хуарз ке зӕгъуй. (Бакӕсӕ Филиппӕгтӕмӕ 2:4.) Минкъий раздӕр ке кой кодтан, еци Давид ма зӕгъуй: «Адӕймаг нин уотӕ ку фӕззӕгъуй, уобӕл мӕ дзорун нӕ фӕндуй, зӕгъгӕ, уӕд еци фӕдбӕл нӕ Библитӕ ӕма нӕ публикацитӕ нӕ сумкити райвӕрӕн, ӕма ’й уӕзданӕй бафӕрсӕн, цӕмӕннӕ, уобӕл». Адӕнбӕл зӕрдиагӕй ку тухсӕн, уӕд ӕй етӕ дӕр уой лӕдӕрдзӕнцӕ. Ци син дзурдтан, уой, ӕвӕдзи, гъуди дӕр нӕбал кӕндзӕнцӕ, фал сӕмӕ куд хӕларзӕрдӕ адтан, уой ба нӕ байронх уодзӕнцӕ. Адӕймаг нин дзурди барӕ ку нӕ ратта, уӕддӕр нӕхе куд бадарӕн, уомӕй нӕ бон ӕй бавдесун, нӕ зӕрдӕ ин хуарз ке зӕгъуй, уой.

13. Нӕ бон ци ӕй кӕнун, цӕмӕй нӕмӕ адӕймаг хуӕздӕр байгъоса?

¹³ Игъосун кӕнгӕй адӕни хӕццӕ дзорӕ, фулдӕр сӕ ци тухсун кӕнуй, уобӕл. Зӕгъӕн, адӕймагӕн сувӕллӕнттӕ ку уа, уӕд дӕ бон ӕй ӕ хӕццӕ радзорун, Библий унаффитӕ сувӕллӕнттӕ гъомбӕл кӕнунмӕ, удта бийнонти цард фӕххуӕздӕр кӕнунмӕ куд ӕнхус кӕнунцӕ, уобӕл. Кенӕ ба ’й уинис, хӕдзари дуарбӕл цалдӕр къумай ке ес. Дӕ бон ӕй адӕймаги хӕццӕ радзорун, фудгъуддӕгтӕ куд исберӕ ’нцӕ ӕма син кӕрон кӕд ӕрцӕудзӕй, уобӕл. Цӕбӕлфӕнди ма райдайай дзорун, уӕддӕр байархайӕ, цӕмӕй адӕймаг фӕууина, Библий унаффитӕ ин пайда ке уодзӕнцӕ. Минкъий раздӕр ке кой кодтан, еци Катринӕ зӕгъуй: «Библи мин мӕхецӕн куд банхус кодта, уобӕл арӕх фӕссагъӕс кӕнун». Уой фӕрци Катринӕ адӕни хӕццӕ нифсгунӕй фӕдздзоруй ӕма ’й етӕ дӕр фӕууинунцӕ, ци дзоруй, уобӕл ӕхуӕдӕг дӕр федарӕй ке ӕууӕндуй.

14. Ӕмбесӕндти 27:17 куд финст ӕй, уомӕ гӕсгӕ нӕ бон куд ӕй кӕрӕдземӕн ӕнхус кӕнун?

¹⁴ Хуӕртӕ ӕма ӕнсувӕрти ӕнхусӕй пайда кӕнӕ. Апостол Павел Тимофеййӕн  лӕдӕрун кодта, адӕнӕн игъосун кӕнун ӕма син рӕстдзийнадӕ амонун куд гъӕуй, уой. Удта ин бафӕдзахста, цӕмӕй, ци базудта, уой иннӕ киристӕнттӕн дӕр амудтайдӕ (1 Кор. 4:17). Мах бон дӕр ӕй фӕлтӕрдгун ӕнсувӕртӕй ахур кӕнун. (Бакӕсӕ Ӕмбесӕндтӕ 27:17.) Зӕгъӕн, еу ӕнсувӕр Шон кӕцидӕр рӕстӕг лӕггадӕ кодта еу гъӕубӕсти. Уоми фулдӕр адӕн сӕхе динбӕл баст адтӕнцӕ ӕма сӕ сӕ царди ӕййевун неци фӕндадтӕй. Цума ӕ цийнӕ цӕй фӕрци нӕ фесавдӕй? Шон зӕгъуй: «Фадуат мин ку уидӕ, уӕд алкӕддӕр рацӕуинӕ ӕмбали хӕццӕ. Цалинмӕ еу хӕдзарӕй иннемӕ цудан, уӕдмӕ ба дзурдтан, нӕ бон фӕххуӕздӕр кӕнун ци ӕй, уӕхӕн дзубанди ма нин ку рауайа, уӕд».

15. Игъосун кӕнуни размӕ бал фиццаг Йеговӕмӕ раковун цӕмӕн фӕгъгъӕуй?

¹⁵ Йеговӕмӕ ковӕ. Игъосун кӕнунмӕ ку рацӕуис, уӕд бал фиццаг Йеговӕмӕ раковисӕ. Ци гъуддаги архайӕн, уоми нин ӕнӕ сугъдӕг хъаури ӕнхусӕй неци бантӕсдзӕй (Пс. 127:1; Лук. 11:13). Йеговӕй ӕнхус ку корай, уӕд комкоммӕ дзорӕ, ци дӕ фӕндуй, уой. Дӕ бон ракорун, цӕмӕй дӕбӕл рамбӕла, рӕстдзийнадӕ базонун ке фӕндуй, уӕхӕн адӕймаг. Уой фӕсте ба архайун райдайӕ ӕма дӕбӕл ка ӕмбӕлуй, уонӕн игъосун кӕнӕ.

16. Цӕмӕй игъосун кӕнгӕй ӕнтӕстгундӕр уӕн, уой туххӕй нӕ Библи ӕртасун цӕмӕн гъӕуй?

¹⁶ Библи ӕртасунмӕ рӕстӕг хецӕн кӕнӕ. Библи нӕ разӕнгард кӕнуй, цӕмӕй лӕдӕрӕн, «ци ӕй Хуцауи фӕндон: ци имӕ кӕсуй хуарз, ци ин ӕй ӕхцӕуӕн ӕма ци ӕй ӕ цӕсти ӕнхӕст» (Ром. 12:2). Рӕстдзийнадӕ ке иссирдтан, уобӕл федарӕй ку ’ууӕндӕн, уӕд адӕни хӕццӕ дӕр нифсгунӕй дзордзиан. Катринӕ зӕгъуй: «Еу рӕстӕги ’й балӕдӕрдтӕн, Библий сӕйраг ахурӕдтӕ кӕронмӕ ке нӕ лӕдӕрун. Уомӕ гӕсгӕ мӕхе бафарстон: кӕцӕй ӕй зонун, Сфӕлдесӕг ке ес, Библи Хуцауи Дзурд ке ӕй ӕма Йеговӕн абони организаци ке ес? Уой фӕсте ба аци фарстатӕ лӕмбунӕг рартастон». Уотемӕй Катринӕн е ’ууӕндундзийнадӕ бафедар ӕй ӕма ин игъосун кӕнуни гъуддаг никки фулдӕр цийнӕ хӕссун райдӕдта.

17. Йесо зӕнхӕбӕл лӕггадӕ кӕнгӕй ӕ къохтӕ цӕй фӕрци не ’руагъта?

¹⁷ Йесо адӕнӕн ци хабар хаста, уомӕ беретӕ нӕ байгъустонцӕ, фал уӕддӕр ӕ къохтӕ не ’руагъта. Цума цӕй фӕрци? Е ӕй зудта, хуарз хабар дзорун куд ӕхсидзгӕ ӕй, уой ӕма архайдта, цӕмӕй ӕй фулдӕр адӕн фегъустайуонцӕ. Удта ’й лӕдӕрдтӕй, ка имӕ нӕ игъосуй, уонӕй беретӕ фӕстӕдӕр рӕстдзийнадӕ сӕ зӕрдӕмӕ ке райсдзӕнцӕ. Райсӕн ин ӕ хеуӕнтти. Цалинмӕ ӕртӕ анзи ӕма ’рдӕг зӕнхӕбӕл лӕггадӕ кодта, уӕдмӕ е ’нсувӕртӕй ӕ ахуркӕнуйнаг неке иссӕй (Иоан. 7:5). Фал ку райгас ӕй, уӕдта ибӕл баууӕндтӕнцӕ (Гъуд. 1:14).

18. Игъосун кӕнгӕй нӕ къохтӕ цӕмӕннӕ уадзӕн?

¹⁸ Мах ӕй нӕ зонӕн, кӕмӕн игъосун кӕнӕн, уонӕй рӕстдзийнадӕ ӕ зӕрдӕмӕ ка райсдзӕй ӕма ка нӕ райсдзӕй, уой. Еуети фулдӕр рӕстӕг фӕгъгъӕуй, иннети ба – минкъийдӕр. Ӕппундӕр нӕмӕ ка нӕ игъосуй, етӕ дӕр нӕ хуарз гъуддӕгтӕмӕ кӕсгӕй, ка ’й зонуй, «Хуцауи искадгин кӕнонцӕ» (1 Пет. 2:12).

19. 1 Коринфӕгтӕмӕ 3:6, 7 куд финст ӕй, уомӕ гӕсгӕ нӕ гъудий ци гъӕуама дарӕн?

¹⁹ Рӕстдзийнади муггӕгтӕ аразгӕ дӕр нӕхуӕдтӕ кӕнӕн, удта сӕбӕл дон дӕр нӕхуӕдтӕ ӕвгӕнӕн, фал сӕ ирӕзун ба кӕнуй Хуцау. (Бакӕсӕ 1 Коринфӕгтӕмӕ  3:6, 7.) Эфиопий ка цӕруй, еу уӕхӕн ӕнсувӕр Гетахун зӕгъуй: «20 анзей дӕргъи нӕ территорий еунӕг ӕз адтӕн Йегови Ӕвдесӕн. Нур ба си ес 14 игъосунгӕнӕги. 13 си, донаргъуд ка райста, уӕхӕнттӕ ’нцӕ. Уонӕмӕ хаунцӕ мӕ бийнойнаг ӕма ме ’ртӕ сувӕллони дӕр. Ӕмбурдмӕ ба ӕрбацӕуй 32 адӕймаги. Гетахун абони хъӕбӕр цийнӕ кӕнуй, фӕразонӕй ке ӕнгъӕлмӕ кастӕй, Йеговӕ ӕ организацимӕ кӕдзосзӕрдӕ адӕни хонун кӕд райдайдзӕй, уомӕ (Иоан. 6:44).

20. Нӕ лӕггадӕ цардервӕзунгӕнӕн кусти хӕццӕ рабарӕн цӕмӕн ес?

²⁰ Йегови цӕсти алли адӕймаги цард дӕр хъазар ӕй. Уой туххӕй нин баихӕс кодта, цӕмӕй ӕ Фурти хӕццӕ ӕмгуст кӕнӕн ӕма алли адӕнихӕттитӕй адӕни ӕмбурд кӕнӕн, цалинмӕ аци дуйней кӕрон нӕма ӕрцудӕй, уӕдмӕ (Аг. 2:7). Игъосун кӕнуни гъуддаг ӕнгъезуй рабарун цардервӕзунгӕнӕн кусти хӕццӕ. Мах ба ан, кӕлӕддзӕгти бунӕй адӕни ка исласуй, уӕхӕн ервӕзунгӕнгути хузӕн. Ервӕзунгӕнгутӕй алке уодӕгас адӕни не ’ссеруй, фал се ’гасей хъиамӕт дӕр ӕхсидзгӕ ӕй. Уотӕ ’й нӕ лӕггади гъуддаг дӕр. Мах ӕй нӕ зонӕн, Сайтани дуйнейӕй ма цал адӕймаги фӕййервӕзун кӕндзиан. Фал Йегови бон ӕй кӕмӕйфӕнди дӕр испайда кӕнун, цӕмӕй син банхус кӕна. Боливий ка цӕруй, еу уӕхӕн ӕнсувӕр Андреас зӕгъуй: «Ӕз ӕй федарӕй зонун, адӕймаг рӕстдзийнадӕ ку базонуй ӕма донаргъуд ку райсуй, уӕд е еу адӕймаги хъиамӕт нӕ фӕууй, фал не ’гасей хъиамӕт дӕр». Гъӕйдӕ мадта мах дӕр нӕ игъосун кӕнуни гъуддагмӕ гъе уӕхӕн цӕстӕй кӕсӕн. Уӕд нин Йеговӕ арфӕ кӕндзӕй, нӕ лӕггадӕ ба нин берӕ цийнӕ хӕсдзӕй.