Еци ’хсӕвӕ мӕбӕл ци хабар ӕрцудӕй, е мин мӕ цард хъӕбӕр раййивта, уомӕн ӕма мӕ уӕд бафӕндадтӕй Сфӕлдесӕги хуӕздӕр базонун. Идарддӕр ци адтӕй, уой уин цалинмӕ радзорон, уӕдмӕ бал мӕ фӕндуй радзорун, минкъий ма ку адтӕн, уӕд цӕбӕл исахур дӕн, е мӕ куд баразӕнгард кодта фӕстӕдӕр Хуцауи агорунмӕ.

Ӕз райгурдтӕн 1937 анзи Франций цӕгат хаййи, шахтерти горӕт Генени. Мӕ фидӕ адтӕй шахтер. Ӕма куд хъиамӕт кӕнуй, уой уингӕй ӕй балӕдӕрдтӕн, ӕнӕ косгӕй цӕрӕн ке нӕййес. Удта уидтон мӕ фидӕ хӕран гъуддӕгтӕй е ’сӕфт ке уинуй. Шахтертӕй беретӕ лӕгъуз уавӕрти кустонцӕ, ӕма ’й фӕндадтӕй, цӕмӕй син банхус кодтайдӕ. Гъема профсоюзтӕмӕ бацудӕй ӕма шахтерти бартӕбӕл тох кодта. Уомӕй уӕлдай ма хъӕбӕр мӕстгун кодта, саугинтӕ ци цӕстӕмӕ миутӕ кодтонцӕ, уомӕ дӕр. Беретӕ си хуарз цардӕнцӕ, фал сӕ уӕддӕр фӕндадтӕй, цӕмӕй син шахтертӕ ӕхца ӕма хуӕруйнӕгтӕ хастайуонцӕ. Уотемӕй ба шахтертӕ сӕхуӕдтӕ гъӕуагӕ ӕййафтонцӕ. Мӕ фидӕн саугинти миутӕ уотӕ ӕнадӕ адтӕнцӕ, ӕма мин дини туххӕй некӕд  неци дзурдта. Нӕ хӕдзари Хуцауи кой некӕд адтӕй.

Ӕз дӕр куд устурдӕр кодтон, уотӕ хӕран гъуддӕгтӕй ме ’сӕфт уинун райдӕдтон. Франций беретӕ ӕндӕрбӕстӕгти нӕ уарзтонцӕ. Ӕз ба сӕ уарзтон. Сӕ сувӕллӕнтти хӕццӕ футболӕй дӕр гъазинӕ. Мӕхецӕн дӕр мӕ мадӕ Польшӕй адтӕй, ӕма мӕ хъӕбӕр фӕндадтӕй, цӕмӕй аллихузи адӕн фӕрнӕй ӕма лимӕнӕй цардайуонцӕ.

1957 анзи мӕ ӕфсадмӕ байагурдтонцӕ ӕма Алжирмӕ дӕр уотемӕй бахаудтӕн. Уӕлдӕр ке кой кодтон, еци хабар дӕр мӕбӕл гъе уӕд ӕрцудӕй. Фуртӕссӕй ку фӕгъгъӕр кодтон, о Хуцау банхус мин кӕнӕ, зӕгъгӕ, уӕд мӕмӕ уотӕ кастӕй, ӕма мӕмӕ знаги ӕфсӕддон ӕрбацӕуй, фал е ба гъӕддаг хӕрӕг разиндтӕй. Ӕма уӕд исуолӕфтӕн. Еци хабари фӕсте фулдӕр сагъӕс кӕнун райдӕдтон, адӕймаг цӕмӕн цӕруй, уобӕл. Сагъӕс кодтон: «Цума нӕбӕл Хуцау тухсуй? Ескӕд сабур цард уодзӕй?»

Фӕстӕдӕр отпуски мӕ ниййергутӕмӕ ку адтӕн, уӕд базонгӕ дӕн еу Йегови Ӕвдесӕни хӕццӕ, ӕма мин Библи равардта. Алжирмӕ ку раздахтӕн, уӕд ӕй кӕсун райдӕдтон. Мӕ зӕрдӕмӕ уӕлдай хъӕбӕрдӕр багъардтонцӕ Раргомади 21:3, 4 финст дзурдтӕ: «Ӕма мӕмӕ паддзахбадӕнӕй райгъустӕй тухгин гъӕлӕс: „Хуцауи цатур ӕй адӕни астӕу, ӕма Хуцау цӕрдзӕй сӕ хӕццӕ, ӕма етӕ уодзӕнцӕ ӕ адӕн. Ӕма Хуцау ӕхуӕдӕг уодзӕй сӕ хӕццӕ. Ӕма син ниссӕрфдзӕй сӕ цӕстисугтӕ, ӕма нӕбал уодзӕй нӕдӕр мӕлӕт, нӕдӕр маст, нӕдӕр гъарӕнгӕ, нӕдӕр рист. Раздӕр ци адтӕй, е райевгъудӕй“». Аци дзурдтӕ мӕ сагъӕсти бафтудтонцӕ. «Нур цума уомӕн ӕцӕгӕйдӕр гӕнӕн ес?»,– рагъуди кодтон ӕз. Еци рӕстӕг Хуцауи ӕма Библий туххӕй ӕппундӕр неци зудтон.

1959 анзи ӕфсадӕй ку исцудтӕн, уӕд базонгӕ дӕн Франсуай хӕццӕ. Е адтӕй Йегови Ӕвдесӕн, ӕма мин Библийӕй берӕ цидӕртӕ балӕдӕрун кодта. Зӕгъӕн, Библий мин бавдиста Хуцауи ном – Йеговӕ (Пс. 83:18). Удта мин балӕдӕрун кодта, Йеговӕ хӕран гъуддӕгтӕн кӕрон ке искӕндзӕй, зӕнхӕй дзенет ке рауайун кӕндзӕй ӕма Раргомади 21:3, 4 финст дзурдтӕ ке исӕнхӕст кӕндзӕй.

Библийӕй ци базудтон, е мӕ зӕрди арф ниххизтӕй. Саугинтӕмӕ ба хъӕбӕр мӕстгун кодтон, ӕма мӕ фӕндадтӕй, цӕмӕй еугурӕйдӕр базудтайуонцӕ, ци амонунцӕ, е Библимӕ гӕсгӕ раст ке нӕй. Мӕн дӕр мӕ фиди хузӕн фӕндадтӕй хӕран гъуддӕгти нихмӕ тох кӕнун. Хезун мӕ нӕ фӕндадтӕй.

Франсуа ӕма ма Ӕвдесӕнтӕй ке хӕццӕ балимӕн дӕн, етӕ мин банхус кодтонцӕ, цӕмӕй мӕхебӕл хуӕцун исахур адтайнӕ. Ба мин ӕй лӕдӕрун кодтонцӕ, киристӕнттӕн сӕ ихӕс е ке нӕй, цӕмӕй иннетӕн уайдзӕф кӕнонцӕ. Сӕ ихӕс ӕй Хуцауи Паддзахади туххӕй хуарз хабар игъосун кӕнун, цӕмӕй адӕнӕн фӕззинна нифс. Йесо дӕр еци гъуддаг кодта, ӕма ӕ фӕдбӕлдзӕугутӕн дӕр уой баихӕс кодта (Матф. 24:14; Лук. 4:43). Гъудӕй ма мӕ мӕхе ахур кӕнун адӕни хӕццӕ фӕлмӕнӕй ӕма сабурӕй дзорунбӕл, сӕ хӕццӕ арази ку нӕ уайнӕ, уӕддӕр. Библий дӕр уотӕ финст ӕй: «Хецауи цагъар ба гъӕуама хилӕ ма кӕна, фал гъӕуама алке хӕццӕ дӕр уа фӕлмӕн» (2 Тим. 2:24).

Мӕ царди мӕ раййевун ци гъудӕй, уой раййивтон  ӕма 1959 анзи Районон конгресси донаргъуд райстон. Уоми базонгӕ дӕн еу ӕригон хуӕри хӕццӕ, Анжель, зӕгъгӕ. Мӕ зӕрдӕмӕ хъӕбӕр фӕццудӕй. Анжель ци ӕмбурдмӕ цудӕй ӕз дӕр уордӕмӕ цӕун райдӕдтон, ӕма 1960 анзи нӕ цард байеу кодтан. Анжель ӕй дессаги бийнойнаг – Йегови лӕвар (Ӕмб. 19:14).

Йеговӕн лӕггадӕ кӕнгӕй лӕдӕргӕ ӕма фӕлтӕрдгун ӕнсувӕртӕй берӕ цӕбӕлдӕрти исахур дӕн. Зӕгъӕн, балӕдӕрдтӕн Йегови организаци дин ци гъуддаг баихӕс кӕна, уой цӕмӕй ӕнтӕстгунӕй ӕнхӕст кӕнай, уой туххӕй гъӕуама уай сӕрниллӕг ӕма дӕ зӕрдӕбӕл дарай Ӕмбесӕндти 15:22 финст дзурдтӕ: «Берӕ унаффӕгӕнгутӕ кӕми уа, уоми... алцидӕр рауайдзӕй».

1964 анзи райдӕдтон районон цӕстӕдарӕгӕй лӕггадӕ кӕнун, ӕма мин еци унаффӕ гъе уӕд устур ӕнхус фӕцӕй. Ӕмбурдтӕ ку бӕрӕг кодтон, уӕд мӕ ихӕс адтӕй хуӕртӕ ӕма ӕнсувӕрти федар кӕнун. Фал мӕбӕл уӕд 27 анземӕй ӕндӕр нӕ цудӕй, ӕма мин фӕлтӕрддзийнадӕ нӕ фагӕ кодта. Архайдтон, цӕмӕй мӕ рӕдудтитӕй естӕбӕл исахур адтайнӕ. Фал берӕ цӕбӕлдӕрти исахур дӕн фӕлтӕрдгун ӕнсувӕрти унаффити фӕрци.

Еу хабар уин радзордзӕн. Парижи еу ӕмбурд ку бӕрӕг кодтон, уӕд мӕмӕ къуӕрей кӕрон еу ӕнсувӕр бацудӕй ӕма мин загъта: «Луи, еу цидӕр дин зӕгъон. Куд дӕмӕ кӕсуй, дохтир кӕмӕ ӕрбацӕуй?» Ӕз дӕр ин загътон: «Сӕйгӕмӕ». Ӕма мин е ба уотӕ: «Раст зӕгъис. Фал ду ба фулдӕр рӕстӕг ӕрветис, е ’ууӕндундзийнадӕ федар кӕмӕн ӕй, уӕхӕнтти хӕццӕ, зӕгъӕн, не ’мбурди цӕстӕдарӕги хӕццӕ. Фал ма не ’мбурди ес, ӕнхус ке гъӕуй, берӕ уӕхӕн хуӕртӕ ӕма ӕнсувӕртӕ. Ка си нифссаст ӕй, ка Йеговӕн ӕрӕги райдӕдта лӕггадӕ кӕнун, кадӕр ба ӕфсӕрмигӕнагӕ ӕй. Уонӕн дӕр хъӕбӕр ӕхцӕуӕн адтайдӕ, сӕ хӕццӕ рӕстӕг ку рарвистайсӕ кенӕ сӕмӕ рӕфтад ракӕнунмӕ ку бауадайсӕ, уӕд».

Еци ӕнсувӕрӕй хъӕбӕр боз дӕн, уомӕн ӕма мин раст загъта. Йегови «фусти» куд берӕ уарзуй, е мӕ сагъӕсти бафтудта. Раст зӕгъгӕй мин зин дӕр адтӕй, кадӕр мин унаффӕ ке равардта, фал уӕддӕр еци унаффӕмӕ гӕсгӕ еци фӕдӕй архайун райдӕдтон. Уӕхӕн ӕнсувӕрти туххӕй Йеговӕй хъӕбӕр боз дӕн.

 1969 анзи, уой фӕсте ба 1973 анзи дӕр Парижмӕ хӕстӕг горӕт Коломби адтӕй ӕхсӕнадӕмон конгресс. Ӕма дууӕ конгрессеми дӕр мӕ ихӕс адтӕй хуӕруйнаги гъуддаг бакӕнун. 1973 анзи конгресмӕ гъӕуама ӕрбацудайдӕ еу 60 000 адӕймаги, ӕма син фондз боней дӕргъи гъудӕй хуӕруйнаг кӕнун. Алцидӕр куд гъӕуама испълан кодтайнӕ, уой мӕ сӕр нӕ ахӕста. Ӕма бабӕй Ӕмбесӕндти 15:22 финст дзурдтӕ мӕ зӕрдӕбӕл ӕрлӕудтӕнцӕ. Уӕхӕн гъуддӕгти фӕлтӕрдгун ка адтӕй, еци ӕнсувӕртӕй ӕнхус байагурдтон. Ка си фид уӕйӕ кодта, ка халсарти куст кодта, ка ба хуӕруйнаггӕнӕг адтӕй, кадӕртӕ ба хуарз зудтонцӕ, кӕми ци ес балхӕнӕн, уой. Ӕма еумӕ еци зин гъуддаг бакодтан.

1973 анзи нӕ фӕххудтонцӕ Франций Вефилмӕ. Ӕма мин фиццаг ци гъуддаг баихӕс кодтонцӕ, е дӕр ӕнцон н’ адтӕй. Гъӕуама Камеруни (Африкӕ) ӕнсувӕртӕмӕ литературӕ хъӕртун кодтайнӕ. Уоми ба 1970 анзӕй 1993 анзмӕ нӕ гъуддаг ӕхгӕд адтӕй. Ӕма бабӕй ратухстӕн. Уой, ӕвӕдзи, балӕдӕрдтӕй, еци рӕстӕг Франций филиали цӕстӕдарӕг ка адтӕй, еци ӕнсувӕр. Ӕма цӕмӕй фӕннифсгундӕр адтайнӕ, уой туххӕй мин загъта: «Камеруни не ’нсувӕрти хъӕбӕр гъӕуй ӕууӕндундзийнадӕ федаргӕнӕн хуӕруйнаг. Ӕстонгӕй ниууадзӕн сӕ нӕййес». Гъема сӕ ’стонгӕй нӕ ниууагътан.

Цалдӕр хатти фӕццудтӕн Камеруни синхаг бӕститӕмӕ, цӕмӕй Камеруни хестӕр нӕлгоймӕгти хӕццӕ фембалдайнӕ. Еци нифсхаст ӕма лӕдӕргӕ ӕнсувӕрти хӕццӕ еумӕ расагъӕс кодтан, Камерунмӕ литературӕ куд ӕрветдзиан, уобӕл. Ӕма нин Йеговӕ арфӕ кодта. Расагъӕс кӕнтӕ, 20 анземӕ еунӕг хатт дӕр уотӕ н’ адтӕй, цӕмӕй ӕ лӕггадгӕнгутӕ «Гъӕуайгӕнӕн мӕсуг» кенӕ «Нӕ игъосун кӕнуни гъуддаг» ма райсонцӕ!

Анжельбӕл мӕ цӕстӕ ку ӕрӕвардтон, уӕд ӕй уайтагъд балӕдӕрдтӕн, Йегови куд берӕ уарзуй, уой. Нӕ киндзӕхсӕвӕри бон изӕрӕй  мин Анжель загъта, цӕмӕй Йеговӕмӕ ракувтайнӕ ӕма ин загътайнӕ, уотӕ нӕ ке фӕндуй, цӕмӕй ин нур ба еумӕ идарддӕр дӕр зӕрдиагӕй лӕггадӕ кӕнӕн. Ӕма нин Йеговӕ нӕ кувд фегъуста.

Анжели фӕрци ма исахур дӕн мӕ нифс Йеговӕбӕл никки хъӕбӕрдӕр дарун. Еу цӕветтон уин ӕрхӕсдзӕн. 1973 анзи нӕ Вефилмӕ ку худтонцӕ, уӕд мӕ нӕ фӕндадтӕй уордӕмӕ цӕун, уомӕн ӕма мӕ зӕрдӕмӕ хъӕбӕр цудӕй районон цӕстӕдарӕгӕй лӕггадӕ кӕнун. Фал мин Анжель мӕ зӕрдӕбӕл ӕрлӕуун кодта, нӕ цард Йеговӕн ке иснивонд кодтан. Йегови организаци, дан, нин цийфӕнди ма баихӕс кӕна, уой гъӕуама ма исӕнхӕст кӕнӕн? (Дзиуит. 13:17). Ӕма ма ӕз дӕр ци гъӕуама загътайнӕ, ӕма Вефилмӕ рандӕ ан. Анжель лӕдӕргӕ, зундгин ӕма Йегови берӕ ка уарзуй, уӕхӕн адӕймаг ӕй. Уал анзи дӕр дзӕбӕхӕй уой фӕрци фӕццардан, ӕма раст унаффитӕ хастан.

Анжель мин нур дӕр ӕй мӕ хуарз ӕмбал ӕма ме ’нхусгӕнӕг. Нӕ организаций скъолатӕй кӕцидӕртӕ фӕццӕунцӕ англисаг ӕвзагбӕл. Ӕма цӕмӕй нӕ бон адтайдӕ еци скъолатӕй ескӕци рацӕун, уой туххӕй исфӕндӕ кодтан англисаг ӕвзаг хуӕздӕр исахур кӕнун, удта рахизтан англисаг ӕмбурдмӕ. Уӕд мӕнбӕл дӕр ӕма Анжельбӕл дӕр 70 анземӕй фулдӕр цудӕй. Ӕвзаг ахур кӕнун мин ӕнцон н’ адтӕй, уомӕн ӕма Франций филиали комитети лӕггадӕ кӕнун ӕма мин берӕ ихӕстӕ ес. Фал Анжели хӕццӕ кӕрӕдземӕн ӕнхус кодтан. Нур нӕ дууебӕл дӕр 80 анземӕй фулдӕр цӕуй. Фал уӕддӕр ӕмбурдтӕмӕ нӕхе фӕццӕттӕ кӕнӕн англисаг ӕвзагбӕл дӕр ӕма французаг ӕвзагбӕл дӕр. Удта ма архайӕн, цӕмӕй не ’мбурди хӕццӕ арӕхдӕр игъосун кӕнӕн ӕма фембӕлдти дӕр нӕ бон ци ӕй, уой кӕнӕн, ӕма нин Йеговӕ дӕр ӕнхус кӕнуй англисаг ӕвзаг ахур кӕнунмӕ.

2017 анзи исхайгин ан устур арфӕдзийнадӕй. Анжели хӕццӕ нӕ фӕххудтонцӕ, филиалти комитетти иуӕнгтӕ ӕма сӕ бийнойнӕгтӕ кӕми фӕййахур кӕнунцӕ, уӕхӕн скъоламӕ. Еци скъола фӕццӕуй Гъӕуайгӕнӕн мӕсуги ахурадон центри Паттерсони (штат Нью-Йорк).

Йеговӕ ӕй тӕккӕ хуӕздӕр Зундамонӕг (Ис. 30:20). Е ӕ лӕггадгӕнгутӕй алкедӕр ахур кӕнуй – зӕрӕндти дӕр, ӕригӕнтти дӕр ӕма сувӕллӕнтти дӕр. Уомӕй хуӕздӕр ахурадӕ дин неке ратдзӕй (Дук. з. 4:5–8). Йеговӕмӕ, удта фӕлтӕрдгун хуӕртӕ ӕма ӕнсувӕртӕмӕ ка фегъосуй, уӕхӕн ӕригӕнттӕ исунцӕ ӕнтӕстгун. Ӕмбесӕндтӕ 9:9 финст ӕй: «Зундгинӕн зунд байамонӕ, ӕма никки зундгиндӕр исуодзӕй. Рӕстгӕнӕгӕн зонундзийнӕдтӕй бахай кӕнӕ, ӕма никки фулдӕр базондзӕй».

Еуӕй-еухатт мӕ зӕрди ӕрӕфтуйуй, 60 анзей размӕ мӕбӕл Алжири хуӕнхти еци тар ӕхсӕвӕ ци цау ӕрцудӕй, е. Уӕд ӕй ӕнгъӕл дӕр н’ адтӕн ӕма мӕ цард уотӕ хуарз рауайдзӕй. Иннетӕй берӕ цӕбӕлдӕрти исахур дӕн! Йеговӕ мӕн дӕр ӕма мӕ бийнойнаги дӕр берӕ арфӕдзийнӕдтӕй исхайгин кодта. Ӕма нӕ идарддӕр дӕр фӕндуй нӕ уӕларвон Фидӕй ӕма ’й ка уарзуй, еци фӕлтӕрдгун хуӕртӕ ӕма ӕнсувӕртӕй ахур кӕнун.