1, 2. Йегови лӕггадгӕнгутӕй беретӕ цӕхуӕн зинтӕбӕл исӕмбӕлунцӕ?

АПОСТОЛ ПАВЕЛ Тимофеййӕн фӕдзахста, цӕмӕй ӕ лӕггади иронхуати маци уагътайдӕ (2 Тим. 4:5). Ӕма айдагъ уомӕн нӕ фӕдзахста, фал ӕгас киристӕнттӕн дӕр. Алкедӕр ни фӕндуй Павели унаффӕмӕ гӕсгӕ архайун. Фал е алкӕд ӕнцон нӕ фӕууй. Берӕ хуӕртӕ ӕма ӕнсувӕрти нифсхаст ун фӕгъгъӕуй, цӕмӕй игъосун кӕнунмӕ рацӕуонцӕ (2 Тим. 4:2). Расагъӕс кӕнӕ, нӕ гъуддаг ӕхгӕд кӕми ӕй, уӕхӕн бӕстити ка цӕруй, еци хуӕртӕ ӕма ӕнсувӕртӕбӕл. Етӕ игъосун кӕнунмӕ рацӕунцӕ, кӕд син, ке сӕ ниййахӕсдзӕнцӕ ӕма сӕ ке исбадун кӕндзӕнцӕ, уомӕй тӕссаг фӕууй, уӕддӕр.

² Йегови лӕггадгӕнгутӕ аллихузи зиндзийнӕдтӕбӕл ӕмбӕлунцӕ, ӕма уой туххӕй арӕх сӕ нифс басӕттуй. Зӕгъӕн, кедӕрти фӕгъгъӕуй берӕ косун, цӕмӕй сӕ бийнонтӕ естӕмӕйти даронцӕ. Бӕргӕ сӕ фӕффӕндуй фулдӕр лӕггадӕ кӕнун, фал сӕмӕ хъауритӕ нӕбал байзайуй. Кӕмӕндӕр ба нези туххӕй кенӕ ӕ карӕмӕ гӕсгӕ берӕ лӕггадӕ кӕнун ӕ бон нӕй, кедӕрти бон ба ма си хӕдзарӕй рацӕун дӕр нӕ фӕууй. Ес ма, ӕхемӕ нецӕййаг ка кӕсуй, уӕхӕнттӕ дӕр. Еу хуӕрӕ Марийӕ * зӕгъуй: «Тар сагъӕсти хӕццӕ тох кӕнгӕй гъе уотӕ бафӕллайун, ӕма мӕ нецибал фӕгъгъӕуй. Уой туххӕй мӕхе хуӕрун райдайун, уомӕн ӕма мин уой туххӕй игъосун кӕнунмӕ нӕдӕр рӕстӕг, нӕдӕр хъауритӕ байзайуй».

3. Аци статьяй цӕмӕ ӕркӕсдзиан?

³ Цийфӕнди зиндзийнӕдтӕбӕл ма исӕмбӕлӕн, уӕддӕр нин Йеговӕ хъауритӕ ратдзӕй, ӕма нӕ уавӕрти нӕ бон куд ӕй, уотӕ ин лӕггадӕ кӕндзиан. Йеговӕ нин куд ӕнхус  кӕнуй, уой базонуни размӕ бал ӕркӕсӕн, Павел ӕма Тимофеййӕн сӕ зиндзийнӕдти куд ӕнхус кодта, уомӕ.

4. Павел цӕхуӕн зинтӕ бавзурста?

⁴ Павел берӕ зинтӕ бавзурста. Нӕмгӕ дӕр ӕй фӕккӕниуонцӕ, ахӕстдони дӕр бадтӕй, удта ма ’й марунмӕ дӕр гъавтонцӕ. Уӕхӕн рӕстӕгути ’й Хуцауи ӕнхус уӕлдай хъӕбӕрдӕр фӕгъгъӕуидӕ (2 Кор. 11:23–25). Павел ма нифссӕттӕн сагъӕсти хӕццӕ дӕр тох кодта (Ром. 7:18, 19, 24). Уомӕй уӕлдай ма имӕ, ӕвӕдзи, цӕхуӕндӕр нез адтӕй, ӕма ’й е дӕр тухсун кодта. Хуцауӕй дӕр ма курдта, цӕмӕй ӕй еци незӕй исуӕгъдӕ кодтайдӕ (2 Кор. 12:7, 8).

5. Кад Павел зин уавӕрти адтӕй, уӕддӕр ӕ бон ци адтӕй кӕнун?

⁵ Кӕд Павел зиндзийнӕдтӕбӕл ӕмбалдӕй, уӕддӕр ин Йеговӕ идарддӕр лӕггадӕ кӕнунмӕ хъауритӕ лӕвардта. Зӕгъӕн, Павел Роми хӕдзари ахӕст ку адтӕй, уӕд зингзӕрдӕй игъосун кодта дзиуиттаг кадгин лӕгтӕн, удта устур бунат ка ахӕста, уӕхӕн адӕнӕн (Гъуд. 28:17; Фил. 4:21, 22). Удта ма рӕстдзийнадӕ дзурдта, ка имӕ ӕрбацӕуидӕ, уонӕн се ’гасемӕндӕр (Гъуд. 28:30, 31; Фил. 1:13). Уомӕй уӕлдай ма Хуцауи сугъдӕг хъаури разамундӕй ниффинста цалдӕр финстӕги. Еци финстӕгутӕ абони дӕр ӕцӕг киристӕнттӕн пайда ’нцӕ. Удта ма Павелмӕ кӕсгӕй Роми хуӕртӕ ӕма ӕнсувӕртӕ бафедар ӕнцӕ ӕма «Хуцауи дзурд никки нифсхастдӕрӕй дзурдтонцӕ» (Фил. 1:14). Павел, ӕ бон ци адтӕй, уой кодта, ӕма ма уой фӕрци ӕ уавӕртӕ «хуарз хабар игъосун кӕнунмӕ ӕнхус дӕр... фӕцӕнцӕ» (Фил. 1:12).

6. 2 Коринфӕгтӕмӕ 12:9, 10 куд финст ӕй, уомӕ гӕсгӕ Павелӕн ци банхус кодта, Хуцау ин ци баихӕс кодта, уой исӕнхӕст кӕнун?

⁶ Павел ӕй лӕдӕрдтӕй, цидӕриддӕр ин бантӕстӕй, етӕ еугурӕйдӕр Хуцауи сугъдӕг хъаури фӕрци ке адтӕнцӕ. Уотӕ дӕр ма ниффинста: «[Хуцауи] хъаурӕ ӕхе ӕнхӕстӕй ӕвдесуй... лӕмӕгъдзийнӕдти». (Бакӕсӕ 2 Коринфӕгтӕмӕ 12:9, 10.) Йеговӕ ин сугъдӕг хъаурӕ лӕвардта, цӕмӕй ин ци баихӕс кодта, уой исӕнхӕст кодтайдӕ, кӕд ахӕст адтӕй ӕма зинтӕ ӕвзурста, уӕддӕр.

7. Тимофей цӕхуӕн зиндзийнӕдтӕбӕл ӕмбалдӕй?

⁷ Тимофей дӕр Хуцауи сугъдӕг хъаурӕбӕл ӕ зӕрдӕ дардта. Павели хӕццӕ ӕ  балцити берӕ фӕццудӕй. Уомӕй уӕлдай ма ин Павел баихӕс кодта ӕмбурдтӕ бӕрӕг кӕнун ӕма сӕ федар кӕнун (1 Кор. 4:17). Тимофеймӕ, ӕвӕдзи, уотӕ кастӕй, ӕма еци гъуддагмӕ не ’сарӕхсдзӕй. Ӕма имӕ Павел дӕр уомӕ гӕсгӕ ниффинста: «Ӕригон ке дӕ, уой туххӕй дӕмӕ ӕнӕнвӕрсон каст макӕд маке кӕнӕд» (1 Тим. 4:12). Удта ма Тимофей арӕх расӕйгитӕ кӕнидӕ (1 Тим. 5:23). Фал ӕй зудта, Йегови сугъдӕг хъаури фӕрци ӕ бон ке исуодзӕй хуарз хабар игъосун кӕнун ӕма ӕнсувӕртӕн ӕнхус кӕнун (2 Тим. 1:7).

8. Абони Йеговӕ ӕ лӕггадгӕнгути куд федар кӕнуй?

⁸ Абони Йеговӕ ӕ лӕггадгӕнгутӕн, «адӕймагмӕ ка нӕййес, уӕхӕн хъаурӕ» раттуй, ӕма ин уой фӕрци еузӕрдонӕй лӕггадӕ кӕнунцӕ (2 Кор. 4:7). Гъӕйдӕ ӕркӕсӕн, Йеговӕ нӕ цӕхуӕн цуппар гъуддагей фӕрци федар кӕнуй, уомӕ: кувд, Библи, хуӕртӕ ӕма ӕнсувӕртӕ ӕма нӕ лӕггадӕ.

9. Кувд нин куд ӕнхус кӕнуй?

⁹ Кувд. Ефесӕгтӕмӕ 6:18 Павел разӕнгард кӕнуй, цӕмӕй Хуцаумӕ «алцӕй туххӕй дӕр» ковӕн. Йеговӕ нин нӕ кувдтитӕ игъосдзӕй ӕма нин ӕнхус кӕндзӕй. Боливий ка цӕруй, еу уӕхӕн ӕнсувӕр Джони Йегови ӕнхус ӕхебӕл бавзурста. Ӕ уосӕ, удта ӕ ниййергутӕ еци еу рӕстӕг хъӕбӕр фӕссӕйгӕ ’нцӕ, ӕма ин ӕнцон н’ адтӕй ӕртемӕ дӕр кӕсун. Гъигагӕн, ӕ мадӕ рамардӕй, ӕ уосӕ ӕма ӕ фидӕ ба хъӕбӕр ӕрӕгӕмӕ дзӕбӕх кодтонцӕ. Джони зӕгъуй: «Хъӕбӕр зин мин ку фӕууидӕ, уӕд Йеговӕмӕ раковинӕ ӕма ин комкоммӕ зӕгъинӕ, ци мӕ тухсун кӕнуй ӕма ма мӕ ци гъӕуй, уой». Йеговӕ Джонийӕн хъауритӕ лӕвардта, ӕма ӕ нифс нӕ басастӕй. Еу хестӕр нӕлгоймаг Ронӕльдӕн ба ӕ мадӕмӕ рак иссирдтонцӕ ӕма мӕйи фӕсте рамардӕй. Цума ин еци рӕстӕг ци банхус кодта? Ронӕльд зӕгъуй: «Йеговӕмӕ хъӕбӕр зӕрдибунӕй кувтон. Зонун ӕй, мӕхецӕй дӕр мӕ хуӕздӕр ке лӕдӕруй». Хатгай нӕмӕ уотӕ фӕккӕсуй, ӕма нӕмӕ нӕ зиндзийнӕдтӕн бухсунмӕ хъауритӕ нӕбал ес, удта Йеговӕмӕ цӕй туххӕй раковӕн, уой дӕр нӕ фӕззонӕн. Фал нин Йеговӕ зӕгъуй, цӕмӕй имӕ ковӕн, дзурдтӕ иссерун нин зин ку уа, уӕддӕр (Ром. 8:26, 27).

10. Дзиуиттӕгтӕмӕ 4:12 куд финст ӕй, уомӕ гӕсгӕ Библи кӕсун ӕма ибӕл сагъӕс кӕнун ӕхсидзгӕ цӕмӕн ӕй?

¹⁰ Библи. Павели хузӕн мах бон дӕр ӕй Хуцауи Дзурди уодӕнцойнӕ иссерун (Ром. 15:4). Библи ку кӕсӕн ӕма ибӕл ку сагъӕс кӕнӕн, уӕд нин Йеговӕ ӕ сугъдӕг хъаури фӕрци банхус кӕндзӕй, цӕмӕй ӕй фӕууинӕн, ци бакастан, е нӕ уавӕрмӕ куд хауй, уой. (Бакӕсӕ Дзиуиттӕгтӕмӕ 4:12.) Ронӕльд зӕгъуй: «Алли изӕр дӕр Библи ке фӕккӕсун, е мин хъӕбӕр ӕнхус кӕнуй. Йегови менеугутӕбӕл берӕ фӕссагъӕс кӕнун, куд нӕ уарзуй ӕма нӕбӕл куд тухсуй, уобӕл. Е мӕ хъӕбӕр бафедар кӕнуй».

11. Еу хуӕрӕн Библи куд банхус кодта?

¹¹ Хуцауи Дзурдбӕл ку сагъӕс кӕнӕн, уӕд нӕ зиндзийнӕдтӕмӕ раст цӕстӕй кӕсдзиан. Ӕркӕсӕн, ӕ лӕг ӕрӕги кӕмӕн рамардӕй, еу уӕхӕн хуӕрӕн Библи куд банхус кодта, уомӕ. Еу хестӕр нӕлгоймаг ин загъта, Иови киунугӕ, дан, нӕуӕгӕй бакӕсай. Хуӕрӕ дӕр имӕ байгъуста ӕма ’й кӕсун райдӕдта. Кӕсгӕ-кӕсгӕй ӕхенимӕр Иовӕн бауайдзӕф кӕнидӕ: «Иов, царди лӕгъузӕй ци ес, айдагъ уой цӕмӕн уинис?» Фал ӕй уой фӕсте ба балӕдӕрдтӕй, ӕхуӕдӕг дӕр цардмӕ уӕхӕн цӕстӕй ке кӕсуй.  Гъема ӕ царди хуарзӕй ци ес, уобӕл сагъӕс кӕнун райдӕдта. Сагъӕс кӕнун райдӕдта Йеговӕбӕл ӕма нин ци нифс равардта, уобӕл. Уой фӕрци ӕхецӕн уодӕнцойнӕ иссирдта ӕма имӕ нӕуӕг хъауритӕ бацудӕй.

12. Йеговӕ нӕ ӕмбурди хуӕртӕ ӕма ӕнсувӕрти фӕрци куд федар кӕнуй?

¹² Хуӕртӕ ӕма ӕнсувӕртӕ. Йеговӕ ма нӕ хуӕртӕ ӕма ӕнсувӕрти фӕрци дӕр федар кӕнуй. Апостол Павел е ’мкиристӕнттӕмӕ ниффинста: «Хъӕбӕр бӕллун уӕ фӕууинунмӕ... цӕмӕй кӕрӕдзей ӕууӕндундзийнадӕй бафедар уӕн» (Ром. 1:11, 12). Статьяй райдайӕни ке кой кодтан, еци хуӕрӕ Марийӕ дӕр хуӕртӕ ӕма ӕнсувӕртӕн хъӕбӕр аргъ кӕнуй. Е зӕгъуй: «Йеговӕ мин хуӕртӕ ӕма ӕнсувӕрти фӕрци хъӕбӕр банхус кӕнуй. Етӕ ’й, хатгай, лӕдӕргӕ дӕр нӕ бакӕнунцӕ, сӕ фӕлмӕн дзурдӕй, кенӕ мин ци открыткӕ рафинсунцӕ, уомӕй мӕ куд бафедар кӕнунцӕ, уой. Удта ма арӕх фӕдздзубанди кӕнун, мӕн хузӕн зиндзийнӕдтӕ кӕмӕн адтӕй, уӕхӕн хуӕрти хӕццӕ, ӕма мин радзорунцӕ, уонӕн ци банхус кодта, уой. Удта мин хестӕр нӕлгоймӕгтӕ дӕр арӕх мӕ зӕрди ӕрӕфтаунцӕ, ӕмбурди мин куд аргъ кӕнунцӕ, уой».

13. Нӕ бон куд ӕй не ’мбурдти фӕрци кӕрӕдзей федар кӕнун?

¹³ Кӕрӕдзей федар кӕнун нӕ бон ӕй ӕмбурдти фӕрци. Зӕгъӕн, ӕмбурди разӕй кенӕ ӕмбурди фӕсте нӕ бон ӕй еске хӕццӕ радзубандитӕ кӕнун ӕма ин зӕгъун, куд хъӕбӕр ин аргъ кӕнӕн, уой. Еухатт еу ӕнсувӕр Питер, ӕ лӕг Йегови Ӕвдесӕн кӕмӕн нӕй, еу уӕхӕн хуӕрӕн загъта: «Ӕмбурдтӕмӕ ке ӕрбацӕуис, уомӕй нӕ хъӕбӕр бафедар кӕнис. Де ’хсӕз сувӕллони дӕр алкӕддӕр дзӕбӕх рӕвдзӕ фӕуунцӕ, удта ӕмбурди дӕр дзуапп дӕттунмӕ алкӕддӕр цӕттӕ фӕуунцӕ». Хуӕрӕн ӕ цӕститӕ дони райвулдӕнцӕ ӕма загъта: «Еци дзурдтӕ мӕ абони хъӕбӕр гъудӕй фегъосун».

14. Нӕ лӕггадӕ нин куд ӕнхус кӕнуй?

¹⁴ Нӕ лӕггадӕ. Фӕнди нӕмӕ игъосонцӕ, фӕнди нӕ, уӕддӕр нин нӕ лӕггадӕ дӕттуй хъауритӕ (Ӕмб. 11:25). Уой ӕхебӕл бавзурста еу хуӕрӕ Стейси. Ӕ бийнонтӕй ин кедӕр ӕмбурдӕй ку рацох кодтонцӕ, уӕд ӕхецӕн бунат нӕбал ирдта ӕма сагъӕс кодта: «Ӕвӕдзи ма мӕ цидӕр гъудӕй бакӕнун, цӕмӕй ибӕл уӕхӕн хабар ма ’рцудайдӕ». Ӕ бон ӕндӕр нецӕбӕл бал адтӕй сагъӕс кӕнун. Цума ин ци банхус кодта? Лӕггадӕ. Игъосун кӕнгӕй фулдӕр сагъӕс кодта адӕнбӕл, ӕхебӕл нӕ, фал. Стейси зӕгъуй: «Еци рӕстӕг Библи ахур кӕнун райдӕдтон, рӕстдзийнади надбӕл къахдзӕфтӕ кӕнун тагъд ка райдӕдта, еу уӕхӕн силгоймаги хӕццӕ. Е мин ӕцӕгӕйдӕр адтӕй Йегови лӕвар. Мӕ лӕггадӕ мин ку н’ адтайдӕ, уӕд ци кодтайнӕ, уой нӕ зонун».

15. Марийи дзурдтӕй цӕбӕл ахур кӕнӕн?

¹⁵ Еуӕй-еу хуӕртӕ ӕма ӕнсувӕртӕн сӕ уавӕртӕ уотӕ ’нцӕ, ӕма сӕ бон нӕй берӕ лӕггадӕ кӕнун. Кӕд дӕу уавӕр дӕр уотӕ ’й, уӕд ӕй зонӕ: Йеговӕн ӕхцӕуӕн ӕй, дӕ бон ци ӕй, уой ке кӕнис, е. Минкъий раздӕр ке кой кодтан, еци хуӕрӕ Марийӕ, ӕндӕр ӕвзагбӕл кӕми дзорунцӕ, уӕхӕн рауӕнмӕ ку ралигъдӕй, уӕд имӕ уотӕ кӕсун райдӕдта, ӕма ӕ лӕггадӕй берӕ пайда нӕййес. Марийӕ зӕгъуй: «Фиццӕгти ӕмбурди мӕ бон адтӕй ӕрмӕстдӕр цубур дзуапп раттун кенӕ Библий стих бакӕсун, игъосун кӕнгӕй ба – буклет раттун». Уой туххӕй Марийӕ ӕхемӕ неци кастӕй, бунӕттон ӕвзагбӕл ка дзоруй, уони размӕ. Фал рӕстӕг рацудӕй ӕма ӕ гъуди раййивта. Марийӕ ӕй балӕдӕрдтӕй, уой фӕрци дӕр Йегови бон ке ӕй адӕнӕн банхус кӕнун, кӕд ӕвзаг дзӕбӕх нӕ зонуй, уӕддӕр. Марийӕ  зӕгъуй: «Йеговӕ адӕни цард ке фӕрци ӕййевуй, еци рӕстдзийнадӕ хъӕбӕр хумӕтӕг ӕй».

16. Хӕдзарӕй рацӕун ке бон нӕй, уонӕн хъауритӕ ци ратдзӕй?

¹⁶ Кӕд не ’нӕнездзийнадӕ лӕгъуз уавӕри ӕй ӕма хӕдзарӕй рацӕун дӕр нӕ бон нӕй, уӕддӕр ӕй Йеговӕ уинуй, куд хъӕбӕр нӕ фӕндуй лӕггадӕ кӕнун, ӕма нин аргъ кӕнуй. Йеговӕ нин игъосун кӕнунмӕ фадуӕттӕ дӕтдзӕй, зӕгъӕн, игъосун кӕндзиан, ка нӕмӕ ӕрбацӕуа, уонӕн кенӕ дохтиртӕн. Нур куд лӕггадӕ кӕнӕн, уой, раздӕр куд лӕггадӕ кодтан, уой хӕццӕ ку барӕн, уӕд нӕ нифс басӕтдзӕй. Фал нин Йеговӕ куд ӕнхус кӕнуй, уой ку уинӕн, уӕдта нӕмӕ нӕуӕг хъауритӕ бацӕудзӕй ӕма цийфӕнди зин уавӕри дӕр федар фӕллӕудзиан ӕма нӕ цийнӕ нӕ фесафдзиан.

17. Уотӕ нӕмӕ ку кӕса, ӕма нӕ лӕггадӕй неци пайда ес, уӕддӕр нӕ Екклесиасти 11:6 куд финст ӕй, уомӕ гӕсгӕ идарддӕр лӕггадӕ кӕнун цӕмӕн гъӕуй?

¹⁷ Мах ӕй, гӕнӕн ес, ӕма зонгӕ дӕр ма бакӕнӕн, ци рӕстдзийнади нӕмуг байтудтан, е едӕгтӕ куд рауагъта ӕма ирӕзун куд райдӕдта, уой. (Бакӕсӕ Екклесиаст 11:6.) Е бӕрӕг ӕй еу 80-анздзуд хуӕрӕ Барбӕри хабарӕй. Барбӕрӕ телефони ӕма финстӕгути фӕрци фегъосун кӕнуй. Еухатт ба финстӕг кӕмӕ рарвиста, етӕ разиндтӕнцӕ, ӕмбурдӕй ке рацох кодтонцӕ, уӕхӕн лӕг ӕма уосӕ. Еци финстӕги ниввардта 2014 анзи 1 мартъий «Гъӕуайгӕнӕн мӕсуг», ӕма си адтӕй уӕхӕн статья «Хуцау дӕу туххӕй ци искодта?». Еци лӕг ӕма уосӕ журнал цалдӕр хатти бакастӕнцӕ. Лӕг уой банимадта, цума имӕ Йеговӕ ӕхуӕдӕг дзурдта, уобӕл. Кӕд 27 анзи рацудӕй, кӕдӕй сӕ рацох кодтонцӕ, уӕдӕй, уӕддӕр нӕуӕгӕй райдӕдтонцӕ ӕмбурдтӕмӕ цӕун ӕма Йеговӕн лӕггадӕ кӕнун. Расагъӕс кӕнӕ, Барбӕрӕ куд цийнӕ кодта! Еци хабар ӕй хъӕбӕр бафедар кодта.

18. Цӕмӕй нӕ Йеговӕ федар кӕна, уой туххӕй нӕ ци кӕнун гъӕуй?

¹⁸ Аци статьяй куд базудтан, уотемӕй нӕ Йеговӕ аллихузи бафедар кӕнуй. Зӕгъӕн, ба нӕ федар кӕнуй ковгӕ имӕ ку фӕккӕнӕн, Библи ку фӕккӕсӕн, хуӕртӕ ӕма ӕнсувӕрти хӕццӕ рӕстӕг ку ферветӕн ӕма игъосун кӕнуни гъуддаги ку фӕййархайӕн. Йегови ӕнхусбӕл ку арази кӕнӕн, уӕд ӕй бавдесӕн, нӕ зӕрдӕ ибӕл ке дарӕн. Йеговӕн алкӕддӕр ӕхцӕуӕн фӕууй, «ӕ зӕрдӕ ӕнӕгъӕнӕйдӕр ӕ хӕццӕ кӕмӕн ӕй, уони туххӕй ӕ хъаурӕ равдесун» (2 Анз. 16:9).