1. Нӕ зонгитӕ ӕма нӕ хеуӕнттӕ рӕстдзийнадӕмӕ ци цӕстӕй ракӕсунцӕ, е нӕмӕ дессаг цӕмӕн фӕккӕсуй?

РӔСТДЗИЙНАДӔ ке иссирдтай, уой ку балӕдӕрдтӕ, уӕд кунӕг нӕ цийнӕ кодтай! Ӕвӕдзи дӕмӕ дессаг фӕккастӕй, Библий ахурӕдтӕ куд хумӕтӕг ӕма ӕнцонлӕдӕрӕн ӕнцӕ, е. Удта, ӕвӕдзи, уотӕ ӕнгъалдтай, ӕма дӕ зонгитӕн ӕма хеуӕнттӕн дӕр ӕхцӕуӕн уодзӕй Библий ахурӕдтӕ базонун. Федарӕй ӕй зудтай, рӕстдзийнадӕ ку базононцӕ, уӕд сӕ цард амондгундӕр ке исуодзӕй ӕма син дессаги нифс ке фӕззиндзӕй. Гъема син дзорун райдӕдтай (Пс. 119:105). Фал дӕмӕ, ӕвӕдзи, дессаг фӕккастӕй сӕ фулдӕр дӕмӕ ке нӕ байгъустонцӕ, е.

2, 3. Киристемӕ фулдӕр адӕн цӕхӕун цӕстӕй ракастӕнцӕ?

² Ци хуарз хабар игъосун кӕнӕн, уомӕ фулдӕр адӕн ке нӕ игъосунцӕ, е нӕмӕ дессаг гъӕуама ма кӕса. Киристемӕ дӕр беретӕ нӕ игъустонцӕ, кӕд устур дессӕгтӕ кодта ӕма Хуцауӕй ӕрвист ке ӕй, е бӕрӕг адтӕй, уӕддӕр. Зӕгъӕн, Йесо Лазӕри ке райгас кодта, уобӕл е знӕгтӕ дӕр нӕ гурусхӕ кодтонцӕ. Фал уӕддӕр нӕ састӕнцӕ, Йесо Мессийӕ ке ӕй, уобӕл. Марунмӕ дӕр ма сӕ гъавтонцӕ – ӕхе дӕр ӕма Лазӕри дӕр! (Иоан. 11:47, 48, 53; 12:9–11).

³ Йесо ӕй зудта, фулдӕр адӕн ибӕл ке нӕ баууӕнддзӕнцӕ (Иоан. 5:39–44). Еухатт Аргъауӕг Иоанни ахуркӕнуйнӕгтӕн загъта: «Амондгун ӕй еци адӕймаг, мӕнбӕл ка нӕ гурусхӕ кӕнуй» (Матф. 11:2, 3, 6). Цума Йесобӕл беретӕ цӕмӕннӕ баууӕндтӕнцӕ?

4. Аци статьяй ци базондзиан?

 ⁴ Аци ӕма иннӕ статьяй базондзиан, фиццаг ӕноси Йесобӕл беретӕ цӕмӕннӕ баууӕндтӕнцӕ, ӕма абони мах ци хабар хӕссӕн, уомӕ дӕр фулдӕр адӕн цӕмӕннӕ игъосунцӕ, уой. Удта ма базондзиан, Йесобӕл федарӕй ӕууӕндун нӕ бон цӕмӕн ӕй, уой дӕр.

5. Еуӕй-еуетӕ Йесой зӕрдӕвӕрд Мессийӕбӕл цӕмӕннӕ банимадтонцӕ?

⁵ Беретӕ Йесобӕл нӕ баууӕндтӕнцӕ, уомӕн ӕма ’й зудтонцӕ, кӕцӕй ӕй, уой. Уидтонцӕ ’й, хуарз ахургӕнӕг ке ӕй ӕма берӕ дессӕгтӕ ке кӕнуй. Фал хумӕтӕг гъӕдиндзаумӕуттӕгӕнӕги фурт ке адтӕй, уомӕ гӕсгӕ ба имӕ ӕнӕнвӕрсон каст кодтонцӕ. Уомӕй уӕлдай ма цардӕй Назарети. Назарет ба уӕхӕн дессаги горӕт дӕр н’ адтӕй. Нафанаил Йесой ахуркӕнуйнаг ку нӕма иссӕй, уӕд ма е дӕр уотӕ загъта: «Назаретӕй хуарзӕй ести рацӕуа?» (Иоан. 1:46). Ӕвӕдзи, еци горӕт ӕ зӕрдӕмӕ нӕ цудӕй. Кенӕ ба, ка ’й зонуй, уотӕ уомӕн загъта, ӕма ’й зудта, пахампарадӕмӕ гӕсгӕ, Мессийӕ Вифлееми ке гъӕуама райгурдайдӕ, Назарети нӕ, фал (Мих. 5:2).

6. Йесой рӕстӕги ка цардӕй, еци адӕн цӕй фӕрци баууӕндтайуонцӕ, Йесо Мессийӕ ке ӕй, уобӕл?

⁶ Библий ци финст ес? Пахампар Исай ниффинста, беретӕ Мессийӕн «ӕ равзурди хабӕрттӕбӕл» лӕмбунӕг ке нӕ сагъӕс кӕндзӕнцӕ (Ис. 53:8). Мессийи туххӕй берӕ листӕг хабӕрттӕ финст ӕрцудӕй. Ӕма адӕн еци хабӕрттӕмӕ лӕмбунӕгдӕр ку ’ркастайуонцӕ, уӕд ӕй балӕдӕрдтайуонцӕ, Йесо ӕцӕгӕйдӕр Вифлееми ке райгурдӕй, удта паддзах Давиди байзӕддаг ке адтӕй (Лук. 2:4–7). Фал сӕмӕ лӕмбунӕг сагъӕс кӕнун нӕ цудӕй.

7. Абони берети рӕстдзийнадӕ базонунмӕ ци хъор кӕнуй?

⁷ Абони ба хабар куд ӕй? Йегови Ӕвдесӕнтӕй сӕ фулдӕр ӕнцӕ хумӕтӕг адӕн (Гъуд. 4:13). Еуӕй-еуети гъудимӕ гӕсгӕ Йегови Ӕвдесӕнти бон нӕй адӕнӕн Библи амонун, уомӕн ӕма дини скъолатӕ нӕ фӕцӕнцӕ. Кадӕртӕ ба сӕ хонунцӕ америкаг дин, уотемӕй ба Йегови Ӕвдесӕнтӕн ӕрмӕстдӕр сӕ 14 проценттей бӕрцӕ цӕрунцӕ Еугонд Штатти. Иннети гъудимӕ гӕсгӕ ба Йегови Ӕвдесӕнтӕ Киристебӕл не ’ууӕндунцӕ. Берӕ ӕнзти дӕргъи Йегови Ӕвдесӕнти уӕд комуниститӕ худтонцӕ, уӕд америкаг шпионтӕ, уӕд экстремиститӕ. Ӕма беретӕ уӕхӕн цӕбӕлдӕрти ке феууӕндунцӕ ӕма гъуддаг кӕронмӕ ке нӕ балӕдӕрунцӕ, уой туххӕй рӕстдзийнадӕмӕ сӕхе нӕ рахатунцӕ.

8. Гъуддӕгти 17:11 куд финст ӕй, уомӕ гӕсгӕ абони Хуцауӕн ка лӕггадӕ кӕнуй, уони куд ес базонӕн?

⁸ Ци дин банхус кӕндзӕй, цӕмӕй ма фӕкъкъулумпи уай? Хабӕрттӕ лӕмбунӕг ӕртасӕ. Лука дӕр уотӕ архайдта. Евангели ку финста, уӕд «алцидӕр кӕрӕй-кӕронмӕ исбӕрӕг кодта», цӕмӕй адӕн федарӕй зудтайуонцӕ, Йесой туххӕй ци фегъустонцӕ, е ӕцӕг хабар ке ӕй, уой (Лук. 1:1–4). Верий ка цардӕй, еци дзиуиттӕгтӕ дӕр уотӕ архайдтонцӕ. Йесой туххӕй хуарз хабар ку фегъустонцӕ, уӕд сӕхе фӕндадтӕй исбӕрӕг кӕнун, ци син радзурдтонцӕ, е Дзиуиттаг финститӕмӕ гӕсгӕ раст ӕй ӕви нӕ, уой. (Бакӕсӕ Гъуддӕгтӕ 17:11.) Ду дӕр уотӕ архайӕ. Йегови Ӕвдесӕнтӕ Библимӕ гӕсгӕ раст дзорунцӕ ӕви нӕ, уомӕ гъӕуама дӕхуӕдӕг ӕркӕсай. Удта Йегови адӕн нӕ рӕстӕги куд архайунцӕ, уой туххӕй дӕр фулдӕр базонӕ. Адӕймаг еци хабӕрттӕмӕ ӕхуӕдӕг лӕмбунӕг ку ’ркӕса, уӕд ӕй, иннетӕ ци дзорунцӕ, е нӕ бакъулумпи кӕндзӕй.

9. Йесо арвӕй дессаг ку нӕ бавдиста, уӕд еуӕй-еуетӕ ци бакодтонцӕ?

⁹ Йесо цӕбӕл ахур кодта, е беретӕн фагӕ н’ адтӕй, дессӕгтӕ дӕр ма си агурдтонцӕ. Кӕд, дан, Мессийӕ дӕ, уӕд нин «арвӕй дессаг бавдесӕ» (Матф. 16:1). Ӕвӕдзи, Данели 7:13, 14 финст дзурдтӕ раст нӕ лӕдӕрдтӕнцӕ. Йегови фӕндонмӕ гӕсгӕ еци пахампарадӕ гъӕуама федӕни исӕнхӕст адтайдӕ. Йесо Мессийӕ ке ӕй, уобӕл баууӕндунмӕ ба син, цӕбӕл ахур кодта, е дӕр фагӕ адтӕй. Ци дессаг си агурдтонцӕ, уой син нӕ бавдиста, ӕма ибӕл уой туххӕй сӕ къох ракъуӕрдтонцӕ (Матф. 16:4).

10. Исаййи 42:1, 2 Мессийи туххӕй ци финст ес, е Йесобӕл куд исӕнхӕст ӕй?

¹⁰ Библий ци финст ес? Пахампар Исай Мессийи туххӕй ниффинста: «Е гъӕрдзурд нӕ кӕндзӕй, ӕ гъӕр нӕ райгъусдзӕй ӕма ин гъӕунгти ӕ дзорун неке фегъосдзӕй» (Ис. 42:1, 2). Йесо адӕни ӕргом ӕхемӕ некӕд ӕздахта. Ӕхецӕн устур ковӕндӕнттӕ нӕ аразта, ӕнахур дарӕс нӕ дардта, удта ӕхемӕ кадгин нӕмттӕй некӕд дзорун кодта. Паддзах Ироди рази ӕй ку ӕрлӕуун кодтонцӕ, уӕд уомӕн дӕр дессаг нӕ бавдиста (Лук. 23:8–11). Ӕной Киристе берӕ дессӕгтӕ кодта, фал ӕ сӕйраг ихӕс ба адтӕй хуарз хабар игъосун кӕнун. Зӕнхӕмӕ, дан, уой туххӕй ӕрцудтӕн, дзурдта ӕ ахуркӕнуйнӕгтӕн (Мар. 1:38).

11. Беретӕ дини туххӕй цӕхуӕн рӕдуд гъудитӕбӕл хуӕст ӕнцӕ?

¹¹ Абони ба хабар куд ӕй? Берети деси ’фтаунцӕ, аргъауӕнтӕ куд гъӕздуг конд фӕуунцӕ, е. Сӕ дини разамонгути дӕр хумӕтӕг нӕмттӕй нӕ фӕххонунцӕ. Мадта сӕмӕ сӕ дини ’гъдӕуттӕ дӕр дессаг фӕккӕсунцӕ, кӕд кӕцӕй рацудӕнцӕ ӕма сӕ цӕмӕн фӕккӕнунцӕ, уой сӕ фулдӕр зонгӕ дӕр нӕ фӕккӕнунцӕ, уӕддӕр. Фал адӕн аргъауӕнмӕ ку ’рбацӕунцӕ, уӕд цума Хуцауи ӕма ӕ фӕндони туххӕй ести базонунцӕ? Йегови Ӕвдесӕнти ӕмбурдмӕ ка ’рбацӕуй, етӕ ’й базонунцӕ, Йеговӕ сӕмӕ цӕмӕ ӕнгъӕлмӕ кӕсуй, уой. Нӕ залтӕ  фӕуунцӕ хумӕтӕг ӕма кӕдзос. Разамунд нӕмӕ ка дӕттуй, еци нӕлгоймӕгтӕ сӕ уӕледарӕсӕй адӕни ’ргом сӕхемӕ нӕ фездахунцӕ. Удта сӕмӕ иннетӕ цӕхуӕндӕр кадгин нӕмттӕй нӕ фӕдздзорунцӕ. Нӕ ахурӕдтӕ еугурӕйдӕр ист ӕнцӕ Библийӕй. Фал уӕддӕр беретӕ, ци хабар хӕссӕн, уомӕ нӕ игъосунцӕ, уомӕн ӕма иннӕ динти ци фӕууинунцӕ, уӕхӕнӕй нӕмӕ неци фӕууй.

12. Дзиуиттӕгтӕмӕ 11:1, 6 куд финст ӕй, уомӕ гӕсгӕ не ’ууӕндундзийнадӕ цӕбӕл гъӕуама уа арӕзт?

¹² Ци дин банхус кӕндзӕй, цӕмӕй ма фӕкъкъулумпи уай? Апостол Павел Роми цӕрӕг киристӕнттӕмӕ ниффинста: «Мадта адӕймагмӕ ӕууӕндундзийнадӕ уӕд фӕззиннуй, ӕма еци хабар ку фегъосуй. Ӕма ’й игъосгӕ ба фӕккӕнуй, еске Киристей туххӕй ку фӕдздзоруй, уӕд» (Ром. 10:17). Цӕмӕй не ’ууӕндундзийнадӕ федар уа, уой туххӕй нӕ дини дессаги ’гъдӕуттӕ кӕнун нӕ гъӕуй, фал Библи ӕртасун. Ӕууӕндундзийнадӕ федар кӕнун хъӕбӕр ӕхсидзгӕ ӕй, уомӕн ӕма «ӕнӕ ӕууӕндундзийнадӕй... Хуцауи зӕрдӕ барохс кӕнӕн нӕййес». (Бакӕсӕ Дзиуиттӕгтӕмӕ 11:1, 6.) Рӕстдзийнадӕ ке иссирдтан, уой балӕдӕруни туххӕй нӕ уӕларвӕй дессӕгтӕ нӕ гъӕуй. Гъӕуй нӕ Библий ахурӕдтӕ лӕмбунӕг ӕртасун.

13. Беретӕ цӕмӕннӕ баууӕндтӕнцӕ, Йесо Мессийӕ ке ӕй, уобӕл?

¹³ Аргъауӕг Иоанни ахуркӕнуйнӕгтӕ ’й нӕ лӕдӕрдтӕнцӕ, Йесой ахуркӕнуйнӕгтӕ ком цӕмӕннӕ дарунцӕ, уой. Йесо син балӕдӕрун кодта, цалинмӕ сӕ хӕццӕ ӕй, уӕдмӕ сӕ ком дарун ке нӕ гъӕуй (Матф. 9:14–17). Фарисейтӕ ӕма ӕ иннӕ знӕгтӕ ба ӕ фудкой кодтонцӕ, се ’гъдӕуттӕ син ке ихалдта, уой туххӕй. Сабати сӕйгити ке исдзӕбӕх кӕнидӕ, е дӕр сӕ зӕрдӕмӕ нӕ цудӕй (Мар. 3:1–6; Иоан. 9:16). Сӕхемӕ хъӕбӕр ковӕг адӕн кастӕнцӕ Сабати закъон ке ӕнхӕст кодтонцӕ, уой туххӕй, фал ковӕндонӕй базар ке рауайун кодтонцӕ, е ба  сӕмӕ неци кастӕй. Ӕма син Йесо уой туххӕй ку бауайдзӕф кодта, уӕд е сӕ зӕрдӕмӕ хъӕбӕр нӕ фӕццудӕй (Матф. 21:12, 13, 15). Еухатт ба ’й Назарети ӕмбурдгӕнӕни адӕн марунмӕ гъавтонцӕ, уомӕн ӕма син Финстадӕй еу хабар ӕрхаста ӕма син балӕдӕрун кодта, хеуарзон ке ’нцӕ ӕма син ӕууӕндундзийнадӕ ке нӕ фагӕ кӕнуй (Лук. 4:16, 25–30). Беретӕ Йесомӕ ӕндӕр цӕмӕдӕрти ӕнгъӕлмӕ кастӕнцӕ, ӕма ’й Мессийӕбӕл дӕр уой туххӕй нӕ банимадтонцӕ (Матф. 11:16–19).

14. Йесо, Хуцауи Дзурдбӕл арӕзт ка н’ адтӕй, еци ӕгъдӕутти нихмӕ цӕмӕн дзурдта?

¹⁴ Библий ци финст ес? Йеговӕ пахампар Исаййӕн ниффинсун кодта: «Аци адӕн мӕмӕ ӕрмӕстдӕр цъухӕй хӕстӕг кӕнунцӕ ӕма мӕ ӕрмӕстдӕр цъухӕй кадгин кӕнунцӕ, сӕ зӕрдитӕ ба мӕнӕй раидард ӕнцӕ. Етӕ адӕни имисгӕ фӕдзӕхститӕ базудтонцӕ, ӕма сӕмӕ уотӕ кӕсуй, ӕма е ӕй Хуцауӕй тӕрсун» (Ис. 29:13). Йесо, Хуцауи Дзурдбӕл арӕзт ка н’ адтӕй, уӕхӕн ӕгъдӕутти нихмӕ дзӕгъӕли нӕ дзурдта. Адӕни ӕримисгӕ ӕгъдӕуттӕ Хуцауи дзурдӕй уӕлдӕр ка нимадта, етӕ Йегови ӕма Мессийи ӕппундӕр нӕ нимадтонцӕ.

15. Йегови Ӕвдесӕнтӕ берети зӕрдӕмӕ цӕмӕннӕ цӕунцӕ?

¹⁵ Абони ба хабар куд ӕй? Берети зӕрдӕмӕ нӕ цӕуй, Йегови Ӕвдесӕнтӕ бӕрӕгбӕнттӕ ке нӕ бӕрӕг кӕнунцӕ, е, зӕгъӕн, игурӕнбӕнттӕ кенӕ нӕуӕг анз. Иннетӕ ба сӕмӕ фӕммӕстгун кӕнунцӕ, зиани кӕцидӕр ӕгъдӕуттӕ ке нӕ фӕккӕнунцӕ, уой туххӕй. Уотӕ сӕмӕ фӕккӕсуй, ӕма сӕхуӕдтӕ, Хуцауӕн куд ӕмбӕлуй, уотӕ ковунцӕ. Фал аци дуйней ӕгъдӕуттӕ, Хуцау ци зӕгъуй, уомӕй уӕлдӕр ка ӕвӕруй, етӕ Хуцауи хуарзӕнхӕ некӕд иссердзӕнцӕ (Мар. 7:7–9).

16. Цӕбӕл гъӕуама архайӕн ӕма нӕхе еуварс цӕмӕй гъӕуама дарӕн? (Пс. 119:97, 113, 163–165).

¹⁶ Ци дин банхус кӕндзӕй, цӕмӕй ма фӕкъкъулумпи уай? Гъӕуй архайун, цӕмӕй Йегови закъӕнттӕ ӕма уагӕвӕрдтӕ ӕгас зӕрдӕй бауарзай. (Бакӕсӕ Псалом 119:97, 113, 163–165.) Нӕ уӕларвон Фиди ку уарзӕн, уӕд, ӕ зӕрдӕмӕ ка нӕ цӕуй, уӕхӕн ӕгъдӕуттӕ некӕд кӕндзиан, удта нӕхе еуварс дардзиан, ӕ уарзтӕй нӕ ка фенӕхай кӕндзӕй, уӕхӕн гъуддӕгтӕй.

17. Киристей рӕстӕг берети ци къулумпи кодта ӕ фӕдбӕл рацӕунмӕ?

¹⁷ Йесой рӕстӕги адӕни фӕндадтӕй политики гъуддӕгти ести ӕййивддзийнӕдтӕ фӕууинун. Уонӕмӕ уотӕ кастӕй, ӕма сӕ Мессийӕ Роми дӕлбарӕй исуӕгъдӕ кӕндзӕй. Ӕма сӕ уой туххӕй фӕндадтӕй Йесой паддзахӕй исӕвӕрун. Фал син Йесо сӕ фӕндӕ ку базудта, уӕд ӕхе еуварсмӕ райста (Иоан. 6:14, 15). Саугинтӕ ӕма ӕндӕр баргин лӕгтӕ ба тарстӕнцӕ, Йесо ’змӕнтун ку райдайа, уомӕй. Уой туххӕй сӕмӕ ромӕгтӕ исмӕстгун адтайуонцӕ, ӕма сӕ сӕ бунӕттӕй исистун кодтайуонцӕ. Беретӕ политики хабӕрттӕбӕл уотӕ карз ке адтӕнцӕ, уой туххӕй Йесой фӕдбӕл нӕ рацудӕнцӕ.

18. Киристей рӕстӕг адӕн Мессийи туххӕй ци пахампарӕдтӕ зудтонцӕ, уонӕй се ’ргом фулдӕр кӕцитӕмӕ ’здахтонцӕ?

¹⁸ Библий ци финст ес? Еуӕй-еу пахампарӕдти финст адтӕй, Мессийӕ уӕлахездзау ӕфсӕддон ке уодзӕй. Фал иннетими ба загъд адтӕй, фиццаг бал адӕнӕн сӕ тӕрегъӕдти туххӕй ке рамӕлдзӕй (Ис. 53:9, 12). Мадта уӕд адӕн цӕмӕн фӕффудӕнгъӕл ӕнцӕ? Уомӕн ӕма сӕ тагъддӕр фӕндадтӕй сӕ зиндзийнӕдтӕй исуӕгъдӕ ун. Федӕнмӕ  ка хаудтӕй, еци пахампарӕдтӕмӕ ба се ’ргом не ’здахтонцӕ (Иоан. 6:26, 27).

19. Беретӕ ма хуарз хабармӕ цӕмӕннӕ фегъосунцӕ?

¹⁹ Абони ба хабар куд ӕй? Мах дӕр политики гъуддӕгти ке нӕ архайӕн, уой туххӕй, ци хабар хӕссӕн, уомӕ беретӕ нӕ игъосунцӕ. Ӕвзарӕнтӕмӕ ке нӕ цӕуӕн, е син къахкъуӕрӕн ӕй. Фал ӕй мах лӕдӕрӕн, Йегови цӕсти е раст ке нӕй, уомӕн ӕма адӕймаги ку равзарӕн хецауӕй, уӕд уотӕ уайуй, ӕма Йегови нӕ хецаубӕл нӕ нимайӕн (1 Сам. 8:4–7). Кӕмӕдӕрти ба уотӕ кӕсуй, ӕма гъӕуама скъолатӕ кенӕ сӕйгӕдӕнттӕ аразӕн, ӕма уотемӕй адӕнӕн ӕнхус кӕнӕн. Фал уотӕ ке нӕ кӕнӕн ӕма не ’гас хъауритӕ дӕр игъосун кӕнуни гъуддагмӕ ке аразӕн, е ба беретӕн къахкъуӕрӕн исуй.

20. Киристе Матфеййи 7:21–23 ци загъта, уомӕ гӕсгӕ нин царди ӕхсидзгӕдӕр ци гъӕуама уа?

²⁰ Ци дин банхус кӕндзӕй, цӕмӕй ма фӕкъкъулумпи уай? (Бакӕсӕ Матфеййи 7:21–23.) Йесо нин ке баихӕс кодта, еци гъуддагӕй ӕхсидзгӕдӕр неци ес (Матф. 28:19, 20). Аци дуйне ниллух кӕнун ке нӕ фӕразуй, еци гъуддӕгтӕбӕл нӕ рӕстӕг гъӕуама ма харз кӕнӕн. Мах адӕни уарзӕн ӕма син нӕ зӕрдӕ хуарз зӕгъуй. Фал син тӕккӕ устурдӕр ӕнхус ба уодзӕй, Хуцауи Паддзахади хабар син ку дзорӕн. Уой фӕрци Йегови базондзӕнцӕ ӕма имӕ бахӕстӕг уодзӕнцӕ.

21. Нӕ федар фӕндӕ ци гъӕуама уа?

²¹ Аци статьяй ӕркастан, фиццаг ӕноси Киристей фӕдбӕл цӕунмӕ адӕни ка хъор кодта, цуппар уӕхӕн гъуддагемӕ. Еци гъуддӕгтӕ абони дӕр берети къулумпи кӕнунцӕ. Цума ма сӕ ести къулумпи кӕнуй? Гъо. Иннӕ статьяй ма никкидӕр цуппар гъуддагемӕ ӕркӕсдзиан. Гъӕйдӕ мадта архайӕн, цӕмӕй не ’ууӕндундзийнадӕ алкӕддӕр федар уа ӕма макӕд гурусхӕ кӕнӕн, Йесо Хуцауӕй ӕрвист ке ӕй, уобӕл.