▪ Киристӕнттӕй беретӕ пайда кӕнунцӕ нури технологитӕй, цӕмӕй сӕ бийнонтӕмӕ кенӕ се ’мкиристӕнттӕмӕ финсонцӕ ӕма сӕ хӕццӕ дзубандитӕ кӕнонцӕ. Фал фӕлтӕрдгун киристон алкӕддӕр ӕ зӕрдӕбӕл дардзӕй Библий унаффӕ: «Лӕдӕргӕ адӕймаг фидбилиз ку фӕууинуй, уӕд си ӕхе багъӕуай кӕнуй, ӕвӕлтӕрдтӕ ба размӕ цӕунцӕ ӕма бӕллӕхи бахаунцӕ» (Ӕмб. 27:12).

Мах ӕй лӕдӕрӕн, Йегови ӕ адӕни багъӕуай кӕнун ке фӕндуй. Уомӕ гӕсгӕ, «еуети иннети нихмӕ ка кӕнуй», ӕмбурдӕй цох ка ӕй кенӕ рӕстдзийнадӕ ка усхъуммӕ кӕнуй, уӕхӕнтти хӕццӕ нӕ лимӕн кӕнӕн (Ром. 16:17; 1 Кор. 5:11; 2 Иоан. 10, 11). Кӕд адӕймаг ӕмбурдтӕмӕ цӕуй кенӕ Йегови Ӕвдесӕнтӕй кӕмӕндӕр ӕ зонгӕ ӕй, уӕддӕр е уобӕл дзорӕг нӕма ӕй, ӕма Библий закъӕнттӕмӕ гӕсгӕ цӕруй (2 Тим. 2:20, 21). Ӕма нӕхецӕн ӕмбӕлттӕ ӕвзаргӕй гъӕуама уой нӕ зӕрдӕбӕл дарӕн. Фал мессенджерти финсгӕй уотӕ ӕнцон базонӕн нӕй, адӕймаг цӕхуӕн ӕй, уой.

Еуӕй-еухатт мессенджерти устур къуӕрттӕ искӕнунцӕ, ӕма уӕхӕн уавӕри уӕлдай лӕмбунӕгдӕр гъӕуама уӕн. Киристӕнттӕй кедӕрти уӕхӕн къуӕрттӕмӕ бафтудтонцӕ, ӕма сӕ е хуарзӕй нецӕмӕ ӕркодта. Удта ӕнӕуойдӕр адӕймаг къӕрцгъос кутемӕй гъӕуама уа, къуари цалдӕр сӕдӕ кенӕ цалдӕр мин адӕймаги ку уа, уӕд? Уомӕн нӕййес гӕнӕн, цӕмӕй си алке туххӕй дӕр базонай, ӕцӕгӕй ка ӕй, цӕхуӕн адӕймаг ӕй, удта е ’ууӕндундзийнадӕ федар ӕй ӕви нӕ. Псаломи 26:4 финст ӕй: «Ӕз некӕд бадтӕн мӕнгард адӕни хӕццӕ ӕма, е ’цӕг цӕсгон ка римӕхсуй, уони хӕццӕ нӕ лимӕн кӕнун». Аци дзурдтӕй бӕрӕг ӕй, хуӕздӕр ке адтайдӕ, дӕхуӕдӕг ке зонис, ӕрмӕстдӕр уонӕмӕ финсун.

Мессенджери минкъий къуар ку уа, уӕддӕр киристон гъӕуама ӕ гъос дара, цӕбӕл си фӕдздзорунцӕ, удта си ӕхуӕдӕг дӕр цӕйбӕрцӕ фӕббадуй, уомӕ. Иннетӕ еститӕ ку финсонцӕ, уӕд гъӕуама уотӕ ма сагъӕс кӕнӕн, ӕма син цийфӕнди зинӕй дӕр гъӕуама радзуапп кӕнӕн. Павел Тимофеймӕ финста, цӕмӕй ӕхе еуварс дардтайдӕ, иннети кой ка кодта ӕма ӕхе адӕни гъуддӕгти ка тъунста, уонӕй (1 Тим. 5:13). Ӕма абони дӕр, беретӕ кӕрӕдземӕ финсгӕй сӕхе гъе уотӕ фӕддарунцӕ.

Фӕлтӕрдгун киристон мессенджерти хуӕртӕ ӕма ӕнсувӕрти фудкой некӕд кӕндзӕй, удта уони туххӕй, иннетӕн дзорӕн ке нӕййес, уӕхӕн хабӕрттӕ дӕр нӕ дзордзӕй. Уӕхӕн миутӕ ка фӕккӕнуй, уони финститӕ дӕр нӕ кӕсдзӕй (Пс. 15:3; Ӕмб. 20:19). Уомӕй уӕлдай ма цидӕр хабӕрттӕ нӕ ниддессаг кӕндзӕй ӕма, бӕлвурдӕй ке нӕ зонуй, уӕхӕн хабӕрттӕ дӕр не ’рветдзӕй (Еф. 4:25). Кӕд нӕ, ӕууӕнкӕ кӕбӕл ес, уӕхӕн хабӕрттӕбӕл дзорун фӕндуй, уӕд сӕ иссерӕн ес сайти jw.org ӕма JW Broadcasting^®-и алли мӕйи программити.

Йегови Ӕвдесӕнтӕй еуӕй-еуетӕ мессенджертӕй фӕппайда кӕнунцӕ, цӕмӕй ести балхӕнонцӕ кенӕ рауӕйӕ кӕнонцӕ. Мессенджерти фӕрци цӕмӕндӕр рекламӕ искӕнунцӕ кенӕ ба косгутӕ фӕййагорунцӕ. Фал еци гъуддӕгтӕ нӕ лӕггади хӕццӕ бӕттун нӕ гъӕуй. Мах нӕ фӕндуй, ӕхцауарзагӕ ун. Уомӕ гӕсгӕ хуӕртӕ ӕма ӕнсувӕртӕмӕ, ӕхца бакосун кӕбӕл ӕнгъезуй, уӕхӕн цӕстӕй нӕ кӕсдзиан (Дзиуит. 13:5).

Зин уавӕрти кенӕ ӕрдзон бӕллӕхи ка бахаудтӕй, уӕхӕн хуӕртӕ ӕма ӕнсувӕртӕн банхус кӕнун нӕ ку фӕндӕуа, уӕдта? Раст уодзӕй ӕхца ӕмбурд кӕнунмӕ мессенджертӕй пайда кӕнун? Мах хуӕртӕ ӕма ӕнсувӕрти берӕ уарзӕн ӕма кӕрӕдземӕн ӕнхус дӕр фӕккӕнӕн (Иак. 2:15, 16). Фал мессенджертӕй ӕхца ӕмбурд кӕнунмӕ ку пайда кӕнӕн, уӕд филиалӕн кенӕ ӕмбурди хестӕр нӕлгоймӕгтӕн зиндӕр уодзӕй, ӕнхус ке гъӕуй, еци киристӕнттӕн банхус кӕнун (1 Тим. 5:3, 4, 9, 10, 16). Удта нӕ нӕ фӕндуй, цӕмӕй ескӕмӕ уотӕ фӕккӕса, цума нин уӕлдай бартӕ лӕвӕрд ӕрцудӕй Хуцауи дзогӕмӕ кӕсунмӕ.

Мах фӕндуй нӕ алли гъуддагӕй дӕр Хуцауи кадгин кӕнун (1 Кор. 10:31). Мадта мессенджертӕй кенӕ ӕндӕр уӕхӕн мадзӕлттӕй ку пайда кӕнай, уӕд расагъӕс кӕнисӕ, дӕхе дӕ гъӕуай кӕнун цӕмӕй гъӕуй, уобӕл, ӕма лӕмбунӕг уо.