1. Хеуӕнттӕй еске ӕмбурдӕй ку рацох кӕнунцӕ, уӕд е цӕхуӕн маст ӕрхӕссуй?

ХЕУӔНТТӔЙ еске ӕмбурдӕй ку рацох кӕнунцӕ, уӕд е хъӕбӕр зин фӕууй. Ка ’й зонуй, е дӕуӕн дӕр ӕвзурст ӕй. Еу хуӕрӕ Хильдӕ * зӕгъуй: «Мӕ сӕрихецау ку рамардӕй, еумӕ ба 41 анзи фӕццардан, уӕд мӕмӕ уотӕ кастӕй, ӕма уомӕй устурдӕр маст нӕбал бавзардзӕн. Фал мӕ фурт ӕмбурдӕй ку рандӕ ’й, удта ӕ уоси ӕма ӕ сувӕллӕнтти ку ниууагъта, уӕд ци маст бавзурстон, е ба уомӕй дӕр фуддӕр адтӕй».

2, 3. Йегови ӕ лӕггадгӕнгутӕй еске ку ниууадзуй, уӕд ин е куд фӕууй? (Псалом 78:40, 41).

² Расагъӕс кӕнӕ, Йеговӕн куд зин адтӕй, еуӕй-еу изӕдтӕ си сӕхе ку рахадтонцӕ, уӕд (Иуд. 6). Кенӕ ба израилӕгтӕ еу хаттӕй иннӕ хатмӕ ӕ нихмӕ ку рацӕуиуонцӕ. (Бакӕсӕ Псалом 78:40, 41.) Нӕ уӕларвон Фидӕн хъӕбӕр зин фӕууй, нӕ хеуӕнттӕй дӕр ӕй еске ку ниууадзуй, уӕд. Куд зин уин ӕй, уой уомӕй хуӕздӕр неке лӕдӕруй. Ӕма уин нӕ тӕрегъӕдгӕнагӕ Хуцау ӕнӕмӕнгӕй банхус кӕндзӕй.

³ Аци статьяй ӕркӕсдзиан, ци кӕнун нӕ гъӕуй, цӕмӕй нин Йеговӕ еци зин исфӕразунмӕ хъауритӕ ратта. Уомӕй уӕлдай ма базондзиан, ӕ хеуони кӕмӕн рацох кодтонцӕ, еци хуӕрӕ кенӕ ӕнсувӕрӕн банхус кӕнун нӕ бон куд ӕй, уой. Фал бал фиццаг ӕркӕсӕн, нӕхе нӕ цӕхуӕн сагъӕстӕй хезун гъӕуй, уомӕ.

4. Еуӕй-еу ниййергутӕ куд фӕссагъӕс кӕнунцӕ, сӕ сувӕллон Йегови ку ниууадзуй, уӕд?

⁴ Арӕх, сӕ сувӕллон Йегови кӕмӕн ниууагъта, уӕхӕн ниййергутӕ сӕхе хуӕрун райдайунцӕ. Уотӕ сӕмӕ фӕккӕсуй, ӕма кӕмидӕр цидӕр раст нӕ бакодтонцӕ. Ӕ фурти ӕмбурдӕй  кӕмӕн рацох кодтонцӕ, еу уӕхӕн ӕнсувӕр Льюис зӕгъуй: «Мӕхе хъӕбӕр фудгин кодтон, ӕхсӕвӕ дӕр нӕ фунӕй кӕнинӕ. Мӕ зӕрдӕ фур ристӕй скъунгӕ кодта. Хатгай мӕ цӕстисугтӕ ниууорамун дӕр мӕ бон нӕбал уидӕ». Уӕхӕн хабар ма ӕрцудӕй хуӕрӕ Элизӕбети бийнонти дӕр. Ӕхецӕн бунат нӕ ирдта ӕма сагъӕс кодта: «Раст ци нӕ бакодтон? Мӕ фурт Йегови ке нӕ бауарзта, е мӕн фуд ӕй».

5. Адӕймаг Йегови ку ниууадзуй, уӕд фудгин ка фӕууй?

⁵ Йеговӕ ни алкӕмӕндӕр сӕребарӕдзийнадӕ равардта, ӕма нӕхе бон ӕй ӕвзарун, игъосдзиан имӕ ӕви нӕ. Еуӕй-еу сувӕллӕнттӕн сӕ ниййергутӕ фӕнзуйнаг н’ адтӕнцӕ, фал уӕддӕр Йеговӕн лӕггадӕ кӕнунцӕ ӕма ибӕл абони уӕнгӕ дӕр еузӕрдон ӕнцӕ. Кӕцидӕр ниййергутӕ ба, сӕ бон ци адтӕй, уой кодтонцӕ, цӕмӕй сӕ сувӕллӕнттӕн Библий рӕстдзийнадӕ бауарзун кодтайуонцӕ. Фал ку исустур ӕнцӕ, уӕдта Йегови ниууагътонцӕ. Кудфӕнди ма уа, уӕддӕр алкедӕр ӕхуӕдӕг лух кӕнуй, лӕггадӕ кӕндзӕй Йеговӕн ӕви нӕ (Йес. Н. 24:15). Мадта нӕ хъазар ниййергутӕ, кӕд уӕ сувӕллӕнттӕ рӕстдзийнадӕ ниууагътонцӕ, уӕд уӕхе ма фудгин кӕнтӕ.

6. Ниййергутӕй еске ӕмбурдӕй ку рандӕ уй, уӕд е сувӕллӕнттӕбӕл куд рабӕрӕг уй?

⁶ Фал фӕууй уотӕ, ӕма рӕстдзийнадӕ сувӕллон нӕ, фал ниййерӕг ниууадзуй. Бийнонтӕй дӕр ма рандӕ уй (Пс. 27:10). Уой туххӕй, гӕнӕн ес, ӕма сувӕллонӕн ӕ нифс басӕтта, уомӕн ӕма сувӕллон фиццагидӕр ӕ ниййерӕгмӕ фӕккӕсуй. Ӕ фиди ӕмбурдӕй кӕмӕн рацох кодтонцӕ, еу уӕхӕн хуӕрӕ Эстер зӕгъуй: «Хъӕбӕр арӕх фӕккӕуинӕ, уомӕн ӕма ’й уидтон, мӕ фидӕ ци косуй, уой хуарз ке лӕдӕруй, ӕма Йегови уотемӕй ке ниууагъта. Берӕ ’й уарзун, ӕма ибӕл гъе уой туххӕй хъӕбӕр тухстӕн. Фур тухстӕй ма зӕрдӕгъӕрдтӕ дӕр бауинӕ».

7. Ӕ ниййергути ӕмбурдӕй кӕмӕн рацох кодтонцӕ, уонӕмӕ Йеговӕ цӕхуӕн цӕстӕй кӕсуй?

⁷ Нӕ хъазар хуӕртӕ ӕма ӕнсувӕртӕ, кӕд уӕ ниййергутӕ ӕмбурд ниууагътонцӕ, уӕд ӕй зонетӕ, е махӕн дӕр хъӕбӕр зин ӕй. Ӕппундӕр ма гурусхӕ кӕнтӕ: Йеговӕ уин уӕ рист хуарз лӕдӕруй. Е уӕ уарзуй ӕма уин аргъ кӕнуй, уомӕн ӕма ибӕл еузӕрдон айтӕ. Ӕма уин мах дӕр гъе уотӕ аргъ кӕнӕн. Удта уи иронх ма уӕд: уӕ ниййергутӕ ци унаффӕ рахастонцӕ, уобӕл дзуапп сумах нӕ дӕттетӕ. Куд загътан, уотемӕй Йеговӕ сӕребарӕдзийнадӕ алкӕмӕндӕр равардта. Ӕма ин ӕхе ка иснивонд кодта ӕма донаргъуд ка райста, уонӕй алкедӕр ӕхе уаргъ хӕсдзӕй (Гал. 6:5).

8. Ӕмбурдӕй ке рацох кодтонцӕ, еци хеуон цалинмӕ фӕстӕмӕ нӕ раздӕха, уӕдмӕ нӕ бон ци ӕй кӕнун? (Кӕсӕ ма рамкӕ  «Йеговӕмӕ раздӕхӕ».)

⁸ Нӕ хеуӕнттӕй еске Йегови ку ниууадзуй, уӕд нӕ зӕрдӕ фӕддарӕн, ескӕд фӕстӕмӕ ке раздӕхдзӕй. Фал цалинмӕ нӕма раздахтӕй, уӕдмӕ ба нӕ бон ци ӕй кӕнун? Гъӕуама не ’гас хъауритӕй архайӕн, цӕмӕй Йеговӕмӕ хӕстӕгдӕр кӕнӕн. Уотемӕй фӕнзуйнаг уодзиан нӕ хеуӕнттӕн дӕр, удта ма ӕмбурдӕй ке рацох кодтонцӕ, уомӕн дӕр. Уой фӕрци ма нӕмӕ фулдӕр хъауритӕ уодзӕй, цӕмӕй нӕ бон уа, нӕ нифс нин ка сӕттуй, еци сагъӕсти хӕццӕ тох кӕнун. Гъӕйдӕ ӕркӕсӕн, еци гъуддаги ма нин ци банхус кӕндзӕй, уомӕ.

9. Нӕ бон куд ӕй Йеговӕн фадуат дӕттун, цӕмӕй нӕ федар кӕна? (Кӕсӕ ма рамкӕ  «Ӕ хеуӕнттӕй еске рӕстдзийнадӕ кӕмӕн ниууагъта, уони ка бафедар кӕндзӕй, уӕхӕн стихтӕ Библийӕй».)

⁹ Идарддӕр дӕр де ’ууӕндундзийнадӕ федар кӕнӕ, удта дӕ бийнонти ӕууӕндундзийнадӕ дӕр. Цума уомӕн куд ес гӕнӕн? Алли бон дӕр Хуцауи Дзурд кӕсӕ ӕма ибӕл сагъӕс кӕнӕ. Удта ӕмбурдтӕ дӕр ма цох кӕнӕ. Уотемӕй Йеговӕн фадуат дӕтдзӕнӕ, цӕмӕй дӕ федар кӕна. Джоуаннӕн ӕ фидӕ ӕма ӕ хестӕр хуӕрӕ рӕстдзийнадӕ ниууагътонцӕ, ӕма зӕгъуй: «Авигейи, Есфири, Иови, Иосифи ӕма Йесой туххӕй ку фӕккӕсун, уӕд мин фенцондӕр уй. Сӕ хабӕрттӕ кӕсгӕй мӕ рист фӕмминкъийдӕр уй, удта мӕ мӕ лӕгъуз сагъӕстӕ дӕр ниууадзунцӕ. Уомӕй уӕлдай ма мин нӕ интернет-телеуинунади зартӕ дӕр мӕ нифс хъӕбӕр бафедар кӕнунцӕ».

10. Псалом 32:6–8 финст дзурдтӕ нин куд банхус кӕндзӕнцӕ лӕгъуз сагъӕсти хӕццӕ тох кӕнун?

¹⁰ Уӕ тухститӕ Йеговӕн дзоретӕ. Коретӕ, цӕмӕй уин банхус кӕна уавӕрмӕ уой цӕстӕй ракӕсун. Йеговӕ уин зунд ратдзӕй ӕма уӕ раст надбӕл исараздзӕй. (Бакӕсӕ Псалом 32:6–8.) Ке зӕгъун ӕй гъӕуй, зӕрди ци рист фӕууй, уой дзурдтӕй зӕгъун алкӕд ӕнцон нӕ фӕууй. Йеговӕ ’й уинуй, уӕ зӕрдӕ цӕйбӕрцӕбӕл рист ӕй, уой. Берӕ уӕ уарзуй ӕма уин зӕгъуй, цӕмӕй ин уӕ тухститӕ дзорайтӕ (Рац. 34:6; Пс. 62:7, 8).

11. Дзиуиттӕгтӕмӕ 12:11 куд финст ӕй, уомӕ гӕсгӕ ӕмбурдӕй еске ку рацох кӕнунцӕ, уӕд Йегови унаффӕбӕл цӕмӕн гъӕуама исарази уӕн? (Кӕсӕ ма рамкӕ  «Йегови уарзондзийнадӕбӕл дзорӕг ка ӕй, еци зундамунд».)

¹¹ Хестӕр нӕлгоймӕгти унаффӕбӕл арази кӕнтӕ. Адӕймаги ӕмбурдӕй ке рацох кӕнунцӕ, е Йегови зундамунд ӕй. Ӕма еци зундамунд ӕ уарзондзийнадӕбӕл дзорӕг ӕй. Удта пайда хӕссуй, тӕрегъӕд ка искодта, уомӕн дӕр ӕма иннетӕн дӕр. (Бакӕсӕ Дзиуиттӕгтӕмӕ  12:11.) Хатгай кедӕрти зӕрдӕмӕ нӕ фӕццӕуй, барадон комитет ци унаффӕ рахаста, е. Фал ӕй гъӕуама лӕдӕрӕн, мах алци ке нӕ зонӕн ӕма гъуддаг аллирдиги ке нӕ уинӕн, уой. Хестӕр нӕлгоймӕгти унаффӕбӕл ка нӕ фӕййарази кӕнуй, етӕ ба хатгай цӕхуӕндӕр гъуддӕгтӕ не ’ской кӕнунцӕ, цӕмӕй, дан ин ӕ уавӕр ма фӕффуддӕр кӕнон. Мах ба гъӕуама ма гурусхӕ кӕнӕн, хестӕр нӕлгоймӕгтӕ еци унаффӕ Библий уагӕвӕрдтӕмӕ гӕсгӕ ке рахастонцӕ ӕма ин «Йегови номӕй» ке истӕрхон кодтонцӕ (2 Анз. 19:6).

12. Йеговӕ ци унаффӕ рахӕссуй, уобӕл арази кӕнун цӕхуӕн пайда хӕссуй? Дӕнцӕг ӕрхӕссӕ.

¹² Хестӕр нӕлгоймӕгти унаффӕбӕл ку арази кӕнайтӕ, уӕд уотемӕй, ке рацох кодтонцӕ, уомӕн ӕнхус кӕндзиайтӕ Йеговӕмӕ раздӕхунмӕ. Уӕлдӕр ке кой кодтан, еци хуӕрӕ Элизабет зӕгъуй: «Хъӕбӕр зин мин адтӕй мӕ фурти хӕццӕ мабал дзорун. Фал фӕстӕдӕр ӕмбурдмӕ ку раздахтӕй, уӕд ӕхуӕдӕг загъта, еци зундамунд дзӕгъӕли ке н’ адтӕй ӕма си берӕ цӕбӕлдӕрти ке исахур ӕй. Нур ибӕл ӕппундӕр нӕ дузӕрдуг кӕнун, Йеговӕ алкӕддӕр раст ке фӕууй». Элизабети лӕг Марк ба загъта: «Рӕстӕг ку рацудӕй, уӕд мин мӕ фурт загъта, ӕ хӕццӕ ке нӕ дзурдтан, уой фӕрци дӕр ӕй ке бафӕндадтӕй фӕстӕмӕ раздӕхун. Йегови фӕрци мӕ бийнойнаги хӕццӕ, раст куд ӕй, уотӕ архайдтан!»

13. Цӕмӕй нӕ нифс ма сӕтта, уой туххӕй ма нин ци банхус кӕндзӕй?

¹³ Дӕ сагъӕстӕ ӕма дӕ тухститӕ де ’мбӕлттӕн дӕр радзорисӕ. Фӕлтӕрдгун киристӕнтти хӕццӕ нӕ рӕстӕг ку ’рветӕн, уӕд нин етӕ дӕр банхус кӕндзӕнцӕ, цӕмӕй нӕ нифс ма басӕтта (Ӕмб. 12:25; 17:17). Уӕлдӕр ке кой кодтан, еци хуӕрӕ Джоаннӕ зӕгъуй: «Мӕ зӕрдӕ ’скъунгӕ кодта! Фал мӕ еузӕрдон ӕмбӕлттӕ мӕ фарсмӕ ӕрбалӕудтӕнцӕ, ӕма мин дзӕвгарӕ ӕнцондӕр адтӕй». Фал дӕ ӕмбурди еске дзурдтӕ ӕрмӕстдӕр ресун ку кӕнонцӕ, уӕдта?

14. Хуӕртӕ ӕма ӕнсувӕртӕбӕл нӕ зӕрдӕ цӕмӕн гъӕуама ма хода?

¹⁴ Хуӕртӕ ӕма ӕнсувӕртӕбӕл уӕ зӕрдӕ ма ходӕт. Ӕнӕнхӕст ке ан, уомӕ гӕсгӕ дес кӕнун нӕ гъӕуй, еуӕй-еухатт адӕймаг раст дзурдтӕ ке нӕ равзаруй кенӕ ба ма ӕ дзурдтӕй ресун дӕр ке фӕккӕнуй (Иак. 3:2). Гъӕуама нӕ зӕрдӕбӕл дарӕн апостол Павели дзурдтӕ: «Еске уин естӕмӕй уӕ зӕрдӕ ку фӕхходун кӕна, уӕддӕр кӕрӕдземӕн бухсетӕ ӕма зӕрдӕй хатир кӕнтӕ» (Кол. 3:13). Ӕ фурти ӕмбурдӕй кӕмӕн рацох кодтонцӕ, еу уӕхӕн хуӕрӕ зӕгъуй: «Йегови фӕрци мӕ бон адтӕй ӕнсувӕртӕн хатир кӕнун, уомӕн ӕма ’й уидтон, раст куд ӕй, уотӕ архайун сӕ ке фӕндуй, кӕд син ӕнхӕст нӕ уадӕй, уӕддӕр». Гъӕйдӕ нур ба ӕркӕсӕн, ӕмбурдӕй ке рацох кодтонцӕ, уони хеуӕнтти федар кӕнун нӕ бон куд ӕй, уомӕ.

15. Ӕмбурдӕй ке рацох кодтонцӕ, уой хеуӕнтти нӕ бон куд ӕй бафедар кӕнун?

¹⁵ Ӕмбурдӕй ке рацох кодтонцӕ, уой бийнонтӕн бавдесетӕ, ке сӕ уарзетӕ ӕма сӕбӕл ке тухсетӕ, уой. Мириамӕн ӕ кӕстӕр ӕнсувӕр  Йегови Ӕвдесӕн ку нӕбал адтӕй, уӕд ӕхуӕдӕг дӕр ӕфсӕрми кодта ӕмбурдтӕмӕ цӕун. Мириам зӕгъуй: «Аллихузи дзубандитӕй тарстӕн. Фал мин мӕ хуарз ӕмбӕлттӕ мӕ рист балӕдӕрдтӕнцӕ ӕма мин ме ’нсувӕри фудкой некӕд кодтонцӕ. Гъе уони фӕрци мӕхемӕ нӕ нийгъустон». Ӕндӕр хуӕрӕ ба зӕгъуй: «Нӕ фурти нин ӕмбурдӕй ку рацох кодтонцӕ, уӕд нӕмӕ не ’мбӕлттӕ ӕрбацудӕнцӕ, цӕмӕй мӕн дӕр ӕма мӕ сӕрихецауи дӕр бафедар кодтайуонцӕ. Еуӕй-еуетӕ ’й нӕ зудтонцӕ, ци дзоронцӕ, уой. Кадӕр мӕ хӕццӕ кудтӕй, кадӕр ба мин фӕстӕдӕр открыткӕ ӕрбарвиста. Е мин хъӕбӕр устур ӕнхус адтӕй!»

16. Ӕмбурди бон куд ӕй, ке рацох кодтонцӕ, уой хеуӕнтти федар кӕнун?

¹⁶ Идарддӕр дӕр федар кӕнтӕ, ӕмбурдӕй ке рацох кодтонцӕ, уони хеуӕнтти. Нур сӕ куд гъӕуй уе ’нхус, уотӕ некӕдма (Дзиуит. 10:24, 25). Гъигагӕн сӕмӕ еуӕй-еухатт уотӕ фӕккӕсуй, цума ӕмбурдӕй уони рацох кодтонцӕ. Архайетӕ, цӕмӕй сӕмӕ уӕхӕн сагъӕстӕ ма уа. Уӕлдай ӕхсидзгӕдӕр ба ӕй, сӕ ниййергути кӕмӕн рацох кодтонцӕ, уӕхӕн ӕригон хуӕртӕ ӕма ӕнсувӕрти ӕстаун ӕма сӕ федар кӕнун. Марийӕн ӕ лӕг рӕстдзийнадӕ ку ниууагъта ӕма бийнонтӕй ку рандӕ ’й, уӕд ин хуӕртӕ ӕма ӕнсувӕртӕ хъӕбӕр ӕнхус кодтонцӕ. Марийӕ зӕгъуй: «Нӕхемӕ нӕмӕ ӕрбацӕуиуонцӕ, хуӕруйнаг нин искӕниуонцӕ, удта бийнонти ахур нӕ хӕццӕ рауадзиуонцӕ. Лӕдӕрдтӕнцӕ, куд зин мин ӕй, уой ӕма мӕ хӕццӕ дӕр кудтӕнцӕ. Мӕ фудкой мин еске ку кӕнидӕ, уӕдта мӕ сӕрбӕл исдзориуонцӕ. Етӕ мин ку н’ адтайуонцӕ, уӕд куд адтайнӕ магъа!» (Ром. 12:13, 15).

17. Хестӕр нӕлгоймӕгти бон куд ӕй, ке рацох кодтонцӕ, уони бийнонти федар кӕнун?

¹⁷ Хестӕр нӕлгоймӕгтӕ, алли фадуатӕй дӕр пайда кӕнтӕ, ке рацох кодтонцӕ, уони бийнонти федар кӕнунмӕ. Еци ихӕс фиццагидӕр сумахбӕл ӕй (1 Фес. 5:14). Ӕмбурди разӕй дӕр ӕма ӕмбурди фӕсте дӕр сӕ хӕццӕ дзубанди кӕнтӕ. Бӕрӕг сӕ кӕнтӕ ӕма сӕ хӕццӕ еумӕ коветӕ. Уӕ хӕццӕ сӕ рӕстӕгӕй-рӕстӕгмӕ игъосун кӕнунмӕ есетӕ, удта сӕ уӕ бийнонти ахурмӕ дӕр хонетӕ. Еци хуӕртӕ ӕма ӕнсувӕрти нуртӕккӕ уӕлдай хъӕбӕрдӕр гъӕуй уарзун, федар сӕ кӕнун ӕма сӕбӕл тухсун (1 Фес. 2:7, 8).

18. 2 Петури 3:9 куд финст ӕй, уомӕ гӕсгӕ, тӕрегъӕд ка искодта, уонӕмӕ Йеговӕ цӕмӕ ӕнгъӕлмӕ кӕсуй?

¹⁸ Йегови «нӕ фӕндуй, цӕмӕй еске фесӕфа, фал ӕй фӕндуй, цӕмӕй алкӕмӕндӕр уа ӕрфӕсмон кӕнуни фадуат». (Бакӕсӕ 2 Петури 3:9.) Адӕймаг уӕззау тӕрегъӕд ку искӕнуй, уӕддӕр ма ӕ цард Йегови цӕсти хъазар фӕууй. Расагъӕс кӕнӕ, Йеговӕ цӕхуӕн аргъ бафиста, цӕмӕй нӕ нӕ тӕрегъӕдтӕй исуӕгъдӕ кӕна: ӕ Фурти цард равардта! Нӕ тӕрегъӕдгӕнагӕ Хуцау е ’нхуси къох бадаруй, ка ’й ниууадзуй, уонӕмӕ дӕр, цӕмӕй имӕ фӕстӕмӕ раздӕхонцӕ. Йеговӕ сӕмӕ куд фенгъӕлмӕ кӕсуй, уой Йесо исӕфт фурти хабарӕй хуарз балӕдӕрун кодта (Лук. 15:11–32). Рӕстдзийнадӕ ка ниууагъта, уонӕй беретӕ фӕстӕмӕ раздахтӕнцӕ, ӕма сӕбӕл хуӕртӕ ӕма ӕнсувӕртӕ дӕр хъӕбӕр бацийнӕ ’нцӕ. Элизабети царди дӕр гъе уӕхӕн хабар ӕрцудӕй: ӕ фурт раздахтӕй ӕма нӕуӕгӕй Йегови Ӕвдесӕн иссӕй. Элизабет зӕгъуй: «Хъӕбӕр боз дӕн, нӕ нифс сӕттун нин ка нӕ бауагъта, уонӕй!»

19. Нӕ бон цӕмӕн ӕй алкӕддӕр нӕ зӕрдӕ Йеговӕбӕл дарун?

¹⁹ Нӕ бон ӕй нӕ зӕрдӕ алкӕддӕр Йеговӕбӕл дарун. Зӕран нин аци ’рхӕсса, уӕхӕнӕй ни некӕд неци байагордзӕй. Йеговӕ рӕдау ӕма тӕрегъӕдгӕнагӕ Хуцау ӕй ӕма ӕ лӕггадгӕнгути берӕ уарзуй. Е нӕ некӕд ниууадздзӕй, уӕлдайдӕр ба зин уавӕри ку уӕн, уӕд (Дзиуит. 13:5, 6). Е бӕрӕг ӕй, уӕлдӕр ке кой кодтан, еци Марки дзурдтӕй: «Зин нин ку фӕууй, уӕд Йеговӕ алкӕддӕр нӕ фарсмӕ фӕууй». Нӕ Фидӕ дин алкӕддӕр дӕтдзӕй хъауритӕ – адӕймагмӕ ка нӕййес, уӕхӕн хъауритӕ (2 Кор. 4:7). Кӕд дӕ хеуӕнттӕй еске ӕмбурдӕй рацох кодтонцӕ, уӕддӕр Йеговӕн идарддӕр дӕр еузӕрдонӕй лӕггадӕ кӕнӕ ӕма дӕ нифс сӕттун ма уадзӕ!