1, 2. Пахампар Аггей цӕхуӕн зӕнхизмӕлди кой кодта?

«ЦАЛДӔР минуттемӕ тукӕнттӕ ӕма хӕдзӕрттӕ ӕрӕгъзалдӕнцӕ». «Адӕн фӕттарстӕнцӕ... Беретӕ дзурдтонцӕ, дууӕ минуттемӕй ӕндӕр дан нӕ рацудӕй. Фал мӕнмӕ ба уотӕ фӕккастӕй, цума еци рӕстӕгӕн фӕууӕн н’ адтӕй» – уотӕ дзурдтонцӕ, 2015 анзи Непали зӕнхизмӕлди ка бахаудтӕй, етӕ. Кӕд дӕубӕл дӕр ести уӕхӕн хабар ӕрцудӕй, уӕд, ӕвӕдзи, еци рӕстӕг некӕд байронх уодзӕнӕ.

² Фал нур нӕ цӕстити рази ӕндӕрхузи зӕнхизмӕлд цӕуй. Ӕма еци змӕлд еу кӕмидӕр нӕ цӕуй, фал ӕй ӕгас адӕн дӕр лӕдӕрунцӕ, удта цӕуй берӕ ӕнзти дӕргъи. Пахампар Аггей еци хабари туххӕй ниффинста: «Уотӕ зӕгъуй ӕфсӕдти хецау Йеговӕ: „Еу хатт ма базмӕлун кӕндзӕн арв ӕма зӕнхӕ, денгиз ӕма сор зӕнхӕ, ӕма е уодзӕй тагъд“» (Аг. 2:6).

3. Аггей ци «змӕлди» кой кодта, е ӕнӕуой зӕнхизмӕлдӕй цӕмӕй хецӕн кӕнуй?

³ Аггей цӕхуӕндӕр ӕрдзон бӕллӕхи кой нӕ кодта. Еци хабарӕн хуарз фӕстеугутӕ уодзӕй, уомӕн ӕма Йеговӕ загъта: «Ӕз ӕгас адӕнти дӕр базмӕлун кӕндзӕн, ӕма ӕгас адӕнихӕттити хъазар хӕзнатӕ аци хӕдзарӕмӕ ӕрцӕудзӕнцӕ, ӕма ӕз аци хӕдзарӕ кадӕй байдзаг кӕндзӕн» (Аг. 2:7). Аци пахампарадӕ, Аггеййи рӕстӕги ка цардӕй, уонӕн цӕбӕл дзорӕг адтӕй? Абони махӕн цӕбӕл дзорӕг ӕй? Гъӕйдӕ аци фарстатӕмӕ ӕркӕсӕн, удта ма базонӕн, Аггей ци «змӕлди» кой кодта, уоми мах бон дӕр куд ӕй архайун, уой.

4. Йеговӕ Пахампар Аггеййи ӕ адӕнмӕ цӕмӕн рарвиста?

⁴ Йеговӕ Аггеййӕн ӕхсидзгӕ гъуддаг баихӕс кодта. Ӕркӕсӕн бал, уой разӕй цӕхуӕн хабӕрттӕ ӕрцудӕй, уомӕ. Аггей дӕр, ӕвӕдзи, нӕ эри размӕ 537 анзи Вавилонӕй Йерусалиммӕ ка ӕрӕздахтӕй, уони астӕу адтӕй. Гъема Хуцауи еузӕрдон лӕггадгӕнгутӕ еци фӕдбӕл Йегови ковӕндонӕ нӕуӕгӕй аразунмӕ февналдтонцӕ ӕма ин бундор райвардтонцӕ (Езд. 3:8, 10). Фал бери фагӕ нӕ рацӕнцӕ. Сӕ синхаг адӕнихӕттитӕ сӕ нихмӕ цӕун райдӕдтонцӕ ӕма, уой туххӕй сӕ куст фӕууагътонцӕ (Езд. 4:4; Аг. 1:1, 2). Гъе уомӕ гӕсгӕ нӕ эри размӕ 520 анзи Йеговӕ Аггеййӕн баихӕс кодта израилӕгтӕн сӕ нифс бафедар кӕнун, цӕмӕй сӕ куст кӕронмӕ фӕцайуонцӕ (Езд. 6:14, 15) *.

5. Аггеййи хабар Хуцауи адӕнӕн сӕ нифс цӕмӕн гъӕуама бафедар кодтайдӕ?

⁵ Пахампар Аггей израилӕгтӕн ци хабар фегъосун кодта, е сӕ гъӕуама бафедар кодтайдӕ. Аггей еци нифссаст адӕнӕн уӕхӕн дзурдтӕ загъта: «„Федар уотӕ, аци бӕсти адӕн,– зӕгъуй Йеговӕ,– ӕма косетӕ“. „Ӕз уӕ хӕццӕ дӕн,– зӕгъуй ӕфсӕдти хецау Йеговӕ“» (Аг. 2:4). Цума Йеговӕ ӕхе «ӕфсӕдти хецау» цӕмӕн исхудта? Цӕмӕй израилӕгтӕн сӕ зӕрдӕбӕл ӕрлӕуун кодтайдӕ, ӕ рӕбун алкӕддӕр изӕдти ӕнӕгъӕнӕ ӕфсад ке лӕууй, уой. Мадта дзиуиттӕгтӕ гъӕуама сӕ зӕрдӕ сӕ Хуцаубӕл дардтайуонцӕ, ӕма ин гъе уӕд ӕ фӕндон кӕронмӕ исӕнхӕст кодтайуонцӕ.

6. Йегови зӕрдӕвӕрд, «ӕгас адӕнти дӕр базмӕлун кӕндзӕн», зӕгъгӕ, цӕмӕ гъӕуама ӕркодтайдӕ?

⁶ Йеговӕ загъта: «Ӕз ӕгас адӕнти дӕр базмӕлун кӕндзӕн». Аци дзурдтӕй Йеговӕ израилӕгтӕн нифс равардта, Персий паддзахадӕ ке базмӕлун кӕндзӕй. Уӕди рӕстӕги ба Персий дӕлбарӕ берӕ адӕнихӕттитӕ цардӕнцӕ. Е Хуцауи адӕнӕн ци пайда ӕрхастайдӕ? Фиццагидӕр бал ковӕндонӕ кӕронмӕ конд фӕцайуонцӕ. Уой фӕсте ба сӕмӕ ӕндӕр адӕнтӕ дӕр ӕрбайеу адтайуонцӕ ӕма сӕ хӕццӕ еци ковӕндони Йеговӕн лӕггадӕ кодтайуонцӕ. Еци хабар Хуцауи адӕни хъӕбӕр бафедар кодтайдӕ! (Зах. 8:9).

7. Абони мах цӕхуӕн гъуддаги архайӕн?

⁷ Мах рӕстӕги ба Аггеййи пахампарадӕ куд ӕнхӕст кӕнуй? Йеговӕ абони дӕр ӕгас адӕнихӕттитӕ дӕр «змӕлун кӕнуй», мах ба ин еци гъуддаги ӕнхус кӕнӕн. Кутемӕй? Гъӕйдӕ ибӕл расагъӕс кӕнӕн. 1914 анзи Йеговӕ Киристей ӕ уӕларвон Паддзахади паддзахӕй исӕвардта (Пс. 2:6). Еци хабар зӕнхон паддзӕхтӕн хуарзӕй неци ӕрхастайдӕ. Е уобӕл дзорӕг адтӕй, ӕма адӕнихӕттитӕн сӕ рӕстӕг фӕцӕй. Ӕндӕр дзурдтӕй, зӕнхӕбӕл Йеговӕй ӕвӕрд паддзах ци рӕстӕг н’ адтӕй, еци рӕстӕгутӕ фӕцӕнцӕ (Лук. 21:24). Хуцауи адӕн уой балӕдӕрдтӕнцӕ, ӕма игъосун кӕнун райдӕдтонцӕ, ӕрмӕстдӕр еци Паддзахадӕ ке фӕййервӕзун кӕндзӕй адӕни. 1919 анзи Паддзахади хабар уӕлдай зингзӕрдӕй игъосун кӕнунцӕ, ӕма еци хабар ӕгас адӕнти дӕр «змӕлун» кӕнуй (Матф. 24:14).

8. Псаломи 2:1–3 куд финст ӕй, уомӕ гӕсгӕ фулдӕр адӕн Паддзахади хабармӕ цӕхуӕн цӕстӕй кӕсунцӕ?

⁸ Цума адӕн ба ци цӕстӕй кӕсунцӕ, ци хабар игъосун кӕнӕн, уомӕ? Сӕ фулдӕрей зӕрдӕмӕ хъӕбӕр нӕ цӕуй. (Бакӕсӕ Псалом 2:1–3.) Нӕ сӕ фӕндуй Йеговӕй ӕвӕрд Паддзахи нимайун, ӕма змӕнтунцӕ. Уонӕмӕ Паддзахади хабар хуарз хабар нӕ кӕсуй. Еуӕй-еу хецауӕдтӕ ба ма нин нӕ гъуддаг  ӕхгӕнгӕ дӕр никкодтонцӕ! Ӕма кӕд сӕхе Хуцаубӕл ӕууӕндӕг адӕн хонунцӕ, уӕддӕр сӕ сӕ бунӕттӕ уӕгъдӕ кӕнун ба нӕ фӕндуй. Абони дӕр, фиццаг ӕноси куд адтӕй, уотӕ, хецауӕдтӕ Киристей ахуркӕнуйнӕгти фӕдбӕл зелунцӕ, ӕма гъе уотемӕй Йеговӕй ӕвӕрд Паддзахи нихмӕ цӕунцӕ (Гъуд. 4:25–28).

9. Йеговӕ ци зӕгъуй, ӕ Паддзахади нихмӕ ка цӕуй, еци адӕнӕн?

⁹ Цума Йеговӕ ба ци зӕгъуй, ӕ Паддзахади нихмӕ ка цӕуй, еци адӕнтӕн? Псаломи 2:10–12 финст ӕй: «Мадта лӕдӕргӕ уотӕ, паддзӕхтӕ. Зундзонӕн уин фӕууӕд, зӕнхон тӕрхонгӕнгутӕ. Лӕггадӕ кӕнтӕ Йеговӕн, тӕрсетӕ си. Цийнӕ кӕнтӕ ӕма ’й нимайетӕ. Искадгин кӕнтӕ фурти, цӕмӕй уӕмӕ Хуцау ма исмӕстгун уа ӕма ма фесӕфайтӕ, уомӕн ӕма ӕ маст уайтагъд иссодздзӕй. Амондгун ӕнцӕ, ӕхе ӕ иуазӕг ка бакодта, етӕ еугурӕйдӕр». Йеговӕ е знӕгтӕн рӕстӕг равардта, цӕмӕй ӕрсагъӕс кӕнонцӕ ӕма ӕ Паддзахади фарс ислӕууонцӕ. Фал еци рӕстӕгӕй берӕ нӕбал байзадӕй. Мах абони аци дуйнейӕн ӕ фӕстаг бӕнтти цӕрӕн (2 Тим. 3:1; Ис. 61:2). Адӕн гъӕуама рӕстдзийнадӕ базононцӕ ӕма Йегови лӕггадгӕнгутӕ исуонцӕ. Рӕстӕг ивазӕн нӕбал ес!

10. Аггеййи 2:7–9 куд финст ӕй, уомӕ гӕсгӕ, адӕнти ка змӕлун кӕнуй, еци хабармӕ беретӕ цӕхуӕн цӕстӕй ракӕсунцӕ?

¹⁰ Фал Паддзахади хабар ӕ зӕрдӕмӕ ка райсуй, уӕхӕн адӕн дӕр берӕ ес. Аггей куд загъта, уомӕ гӕсгӕ Йеговӕ зӕнхӕ ке змӕлун кӕнуй, уой фӕрци ӕгас адӕнихӕттитӕй «хъазар хӕзнатӕ», гъома кӕдзосзӕрдӕ адӕн, ӕмбурд кӕнунцӕ, цӕмӕй еумӕ Йеговӕн лӕггадӕ кӕнонцӕ *. (Бакӕсӕ Аггей 2:7–9.) Аци гъуддаг фӕстаг бӕнтти ке цӕудзӕй, уой туххӕй ба пахампартӕ Исай ӕма Михей дӕр финстонцӕ (Ис. 2:2–4; Мих. 4:1, 2).

11. Ӕнсувӕр Кен Хуцауи Паддзахади хабармӕ цӕхуӕн цӕстӕй ракастӕй?

¹¹ Ӕркӕсӕн, адӕнти ка базмӕлун кӕнуй, еци хабармӕ еу ӕнсувӕр Кен цӕхуӕн цӕстӕй ракастӕй, уомӕ. Нур Кен лӕггадӕ кӕнуй  сӕйраг хайади. Абони дӕр ма ’й гъуди кӕнуй, еу 40 анзей размӕ фиццаг хатт Хуцауи Паддзахади хабар куд фегъуста, уой. Кен зӕгъуй: «Аци дуйнейӕн ӕ фӕстаг бӕнтти ке цӕрӕн, уой ку базудтон, уӕд хъӕбӕр цийнӕ кодтон. Ба ’й лӕдӕрдтӕн, цӕмӕй Хуцауи хуарзӕнхӕ иссерон ӕма нӕуӕг дуйней цардӕй исхайгин уон, уой туххӕй гъӕуама аци дуйнебӕл мӕ зӕрдӕ мабал дарон ӕма Йегови фарс ислӕууон. Гъема мӕ фӕндӕ Йеговӕн радзурдтон ӕма еци фӕдбӕл архайун райдӕдтон. Аци дуйне ниууагътон ӕма Хуцауи Паддзахади фарс ислӕудтӕн».

12. Фӕстаг бӕнтти Йегови ӕнӕуингӕ ковӕндонӕ кадӕй куд идзаг кӕнуй?

¹² Бӕрӕг ӕй, абони Йеговӕ ӕ лӕггадгӕнгутӕн ке арфӕ кӕнуй. Фӕстаг бӕнтти сӕ нимӕдзӕ хъӕбӕр исирӕзтӕй. 1914 анзи цалдӕр минемӕй ӕндӕр н’ адтӕнцӕ. Абони ба цалдӕр милиуанемӕй дӕр рахизтӕнцӕ! Уомӕй фулдӕр адӕн ба алли анз дӕр ӕрбацӕунцӕ Киристей мӕлӕт имисӕн изӕр исбӕрӕг кӕнунмӕ. Ӕцӕгӕйдӕр, Йегови ӕнӕуингӕ ковӕндони зӕнхон тургътӕ «ӕгас адӕнихӕттити хъазар хӕзнатӕй» идзаг кӕнунцӕ. Берӕ адӕн Йеговӕн лӕггадӕ кӕнун райдайунцӕ ӕма сӕ уодигъӕдӕ нӕуӕгмӕ раййевунцӕ, ӕма гъе уотемӕй Йегови номӕн кадӕ хӕссунцӕ (Еф. 4:22–24).

13. Йегови адӕн фулдӕр ке кӕндзӕнцӕ, е ма цӕхуӕн пахампарӕдти финст адтӕй? (Кӕсӕ хузӕмӕ ӕндаг цъарӕбӕл.)

¹³ Йегови адӕн фулдӕрӕй-фулдӕр ке кӕндзӕнцӕ, уой туххӕй айдагъ Аггей нӕ финста. Уӕхӕн пахампарадӕ ма финст ӕрцудӕй Исаййи киунуги 60 сӕри. Зӕгъӕн, 22 стихи финст ӕй: «Армидзаг адӕнӕй равзурдзӕй мин, зингӕ дӕр ка нӕ кӕнуй, уонӕй – хъаурӕгин адӕн. Ӕз, Йеговӕ, еци гъуддаг ӕ рӕстӕги фӕттагъд кӕндзӕн». «Адӕнихӕттити хъазар хӕзнатӕ» Хуцауи адӕнмӕ ке ӕрбайеу унцӕ, уомӕ гӕсгӕ дессаги хабӕрттӕ цӕуй. Паддзахади хабар игъосун кӕнуни гъуддаги туххӕй адӕн цӕттӕ ’нцӕ сӕ искурдиӕдтӕй испайда кӕнун. Уой фӕрци Йегови лӕггадгӕнгутӕ, Исай куд загъта, уотемӕй сӕхе ӕфсадунцӕ «адӕнти ӕхсирӕй» (Ис. 60:5, 16). Мах хъӕбӕр боз ан еци хуӕртӕ ӕма ӕнсувӕртӕй сӕ хъиамӕти туххӕй. Нур игъосун кӕнӕн 240 бӕстеми ӕма территорий, нӕ литературӕ ба уадзӕн 1 000 ӕвзагемӕй фулдӕрбӕл.

14. Алли адӕймаги дӕр цӕхуӕн унаффӕ гъӕуй рахӕссун?

¹⁴ Адӕни ка «базмӕлун» кӕнуй, еци игъосун кӕнуни гъуддаг ке цӕуй, уомӕ гӕсгӕ алкедӕр гъӕуй равзарун, кенӕ Хуцауи Паддзахади фарс уодзӕнцӕ, кенӕ идарддӕр дӕр сӕ зӕрдӕ дардзӕнцӕ аци дуйней хецауӕдтӕбӕл. Унаффӕ рахӕссун гъӕудзӕй алли адӕймаги дӕр. Ӕной Йегови лӕггадгӕнгутӕ ци бӕсти цӕрунцӕ, еци бӕсти закъӕнттӕ ӕнхӕст кӕнунцӕ, фал политики гъуддӕгти ба неке фарс фӕуунцӕ (Ром. 13:1–7). Етӕ ’й зонунцӕ, адӕни зиндзийнӕдтӕ ӕрмӕстдӕр Хуцауи Паддзахадӕ ке ниллух кӕндзӕй. Еци Паддзахадӕн ба аци дуйней хӕццӕ еумӕйагӕй неци ес (Иоан. 18:36, 37).

15. Раргомади киунуги куд финст ӕй, уомӕ гӕсгӕ нӕ еузӕрдондзийнадӕ фӕлвӕрд куд цӕудзӕй?

¹⁵ Раргомади киунуги куд финст ӕй, уомӕ гӕсгӕ фӕстаг бӕнтти нӕ еузӕрдондзийнадӕ фӕлвӕрд ӕрцӕудзӕй. Дуйней хецауӕдтӕ бабӕй нӕ нихмӕ исуодзӕнцӕ, ӕма сӕ фӕнддзӕй, цӕмӕй етӕ ци зӕгъонцӕ, ӕрмӕстдӕр уой кӕнӕн. Сӕ дзурдмӕ син ка нӕ игъоса, уони ба карзӕй ӕфхуӕрдзӕнцӕ (Рарг. 13:12, 15). Етӕ «ӕгас адӕнӕй дӕр – хумӕтӕгтӕй ӕма номдзудтӕй, гъӕздугутӕй ӕма мӕгуртӕй, сӕребарӕ адӕнӕй ӕма цагъартӕй – домунцӕ, цӕмӕй син сӕ рахес къохтӕбӕл кенӕ сӕ тӕрнихтӕбӕл нисан исӕвӕронцӕ» (Рарг. 13:16). Рагидзаманти цагъартӕбӕл нисан исӕвӕриуонцӕ, ӕма еци нисан ӕвдиста, адӕймаг ке цагъар ӕй, уой. Уотӕ абони дӕр дуйней хецӕутти фӕндуй, цӕмӕй адӕн сӕ зӕрдӕ уонӕбӕл даронцӕ (тӕрнихтӕбӕл нисан), ӕма сӕ гъуддӕгтӕй дӕр уой ӕвдесонцӕ (рахес къохтӕбӕл нисан).

16. Абони уӕлдай ӕхсидзгӕдӕр цӕмӕн ӕй Йеговӕбӕл еузӕрдон ун?

¹⁶ Ду ба дӕхебӕл еци нисан исӕвӕрун бауадздзӕнӕ? Кӕд нӕ, уӕд зиндзийнӕдтӕмӕ цӕттӕ уо. Библи куд зӕгъуй, уомӕ гӕсгӕ нисан кӕбӕл уа, уонӕй ӕндӕр «ӕлхӕнун дӕр ӕма уӕйӕ кӕнун дӕр» неке бон уодзӕй (Рарг. 13:17). Фал Хуцау еци адӕнӕн тӕрхон раги рахаста (Рарг. 14:9, 10). Мах ба нӕхебӕл ӕндӕр нисан исӕвардтан. Зӕгъӕн ес, ӕма нӕ къохбӕл ниффинстан: «Ӕз Йегови дӕн» (Ис. 44:5). Алкедӕр ни гъӕуама ӕхе бафӕрса: «Хуцаубӕл кӕронмӕ дӕр еузӕрдон дӕн?» Кӕд гъо, уӕд нӕ Йеговӕ банимайдзӕй ӕ хеуӕнттӕбӕл!

17. Йегови фӕразондзийнади туххӕй ци гъӕуама ма иронх кӕнӕн?

¹⁷ Аци фуддуйней фӕстаг бӕнтти Йеговӕ дессаги фӕразондзийнадӕ ӕвдесуй. Уой «нӕ фӕндуй, цӕмӕй еске фесӕфа» (2 Пет. 3:9). Йеговӕ алкӕмӕндӕр фадуат дӕттуй ӕрфӕсмон кӕнунмӕ ӕма раст над равзарунмӕ. Фал ӕносмӕ нӕ бухсдзӕй. Ӕ Паддзахади фарс ислӕуун ке нӕ бафӕндӕуа, уонӕбӕл дӕр фараони хабар ӕрцӕудзӕй. Йеговӕ ин загъта: «Мӕнӕн мӕ бон раги адтӕй дӕумӕ мӕ къох исесун ӕма дӕубӕл дӕр ӕма дӕ адӕнбӕл дӕр фуднез бафтаун, ӕма дӕ зӕнхи цъарӕй фесафтайнӕ. Фал дӕ уой туххӕй ниууагътон уодӕгасӕй, цӕмӕй дин бавдесон мӕ хъаурӕ ӕма цӕмӕй мӕ ном райгъуса ӕгас зӕнхӕбӕл дӕр» (Рац. 9:15, 16). Фӕстагмӕ ’й ӕгас адӕн дӕр балӕдӕрдзӕнцӕ, ӕрмӕстдӕр Йеговӕ ке ӕй еунӕг ӕцӕг Хуцау (Йез. 38:23). Кутемӕй?

18. а) Аггеййи 2:6, 20–22 цӕхуӕн змӕлди кой цӕуй? б) Аггеййи дзурдтӕ ма еу хатт дӕр ке исӕнхӕст уодзӕнцӕ, уой кӕцӕй зонӕн?

¹⁸ Бакӕсӕ Аггеййи 2:6, 20–22. Ӕностӕ фӕстӕдӕр апостол Павел Хуцауи сугъдӕг хъаури разамундӕй балӕдӕрун кодта, Аггеййи дзурдтӕ ма еу хатт дӕр ке исӕнхӕст уодзӕнцӕ. Фиццаг бал Павел ӕрхаста Йегови  дзурдтӕ: «Еу хатт дӕр ма ӕз базмӕлун кӕндзӕн ӕрмӕст зӕнхӕ нӕ, фал ма арв дӕр». Уой фӕсте ба ниффинста: «Аци дзурдтӕ, „еу хатт дӕр ма“, зӕгъгӕ, уобӕл дзорӕг ӕнцӕ, ӕма ци базмалдӕй, гъома Хуцау ке нӕ искодта, етӕ фесӕфдзӕнцӕ, цӕмӕй базмӕлӕн кӕмӕн нӕййес, е байзайа ӕностӕмӕ» (Дзиуит. 12:26, 27). Аци стихти дзурдбаст «базмӕлун кӕндзӕн» Аггеййи 2:7 ци змӕлди кой цӕуй, уомӕй хецӕн кӕнуй. Мадта фараони хузӕн Йегови ӕ Хецаубӕл ка нӕ банимайа, етӕ ӕносмӕ исӕфт ӕрцӕудзӕнцӕ, Йеговӕ арв ӕма зӕнхӕ ку базмӕлун кӕна, уӕд.

19. Йеговӕ арв ӕма зӕнхӕ ку базмӕлун кӕна, уӕд ӕнӕбазмӕлгӕ ци байзайдзӕй ӕма уой кӕцӕй зонӕн?

¹⁹ Павели дзурдтӕ, «цӕмӕй фенкъусӕн цӕмӕн нӕййес, е байзайа», зӕгъгӕ, цӕбӕл дзорӕг ӕнцӕ? Павел идарддӕр ниффинста: «Мадта, базмӕлӕн кӕмӕн нӕййес, еци паддзахадӕмӕ ке бацӕудзиан, уой зонгӕй, идарддӕр дӕр федар хуӕцӕн Хуцауи ’стур хуарзӕнхӕбӕл – уой фӕрци ин нӕ бон ӕй, ӕ фӕндон куд ӕй, уотӕ лӕггадӕ кӕнун, Хуцауӕй тӕрсгӕй ӕма ’й нимайгӕй» (Дзиуит. 12:28). Йеговӕ арв ӕма зӕнхӕ ку базмӕлун кӕна, уӕд аци фуддуйне ругӕ фестдзӕй Хуцауи Паддзахадӕ ба федарӕй лӕудзӕй ӕносмӕ! (Дан. 2:44; Пс. 110:5, 6).

20. Адӕн ци гъӕуама равзаронцӕ ӕма син мах бон куд ӕй банхус кӕнун?

²⁰ Рӕстӕг берӕ нӕбал байзадӕй! Адӕн гъӕуама равзаронцӕ, кенӕ ӕносон царди надбӕл цӕудзӕнцӕ, кенӕ, мӕлӕтмӕ ка кӕнуй, еци надбӕл. Ӕндӕр загъдӕй, кенӕ Хуцауи фӕндонмӕ гӕсгӕ сӕ цард раййевдзӕнцӕ, кенӕ ба идарддӕр дӕр аци дуйней зундбӕл цӕудзӕнцӕ (Дзиуит. 12:25). Игъосун кӕнуни гъуддаги архайгӕй мах адӕнӕн раст над равзарунмӕ ӕнхус кӕнӕн. Зӕнхӕбӕл ма, Хуцауи Паддзахади фарс ислӕуун ке фӕндуй, берӕ уӕхӕн «хъазар хӕзнатӕ» ес. Гъӕйдӕ мадта еци хӕзнатӕ агорӕн ӕма нӕ зӕрдӕбӕл дарӕн Киристей дзурдтӕ: «Хуцауи Паддзахади туххӕй аци хуарз хабар игъустгонд ӕрцӕудзӕй ӕгас зӕнхи цъарӕбӕл дӕр, цӕмӕй ӕй еугур адӕнихӕттитӕ дӕр фегъосонцӕ. Ӕма уӕд ӕрцӕудзӕй кӕрон» (Матф. 24:14).