1, 2. Матфеййи 5:11 куд финст ӕй, уомӕ гӕсгӕ фӕлварӕнтӕмӕ цӕхуӕн цӕстӕй гъӕуама кӕсӕн?

ЙЕСО ӕ фӕдбӕлдзӕугутӕн зӕрдӕ байвардта, ӕцӕгӕйдӕр амондгун ке уодзӕнцӕ. Фал ма сӕ бафӕдзахста, ӕфхуӕрд дӕр ке ӕййафдзӕнцӕ (Матф. 10:22, 23; Лук. 6:20–23). Киристей фӕдбӕлдзӕугутӕ ке ан, е нин хъӕбӕр ӕхцӕуӕн ӕй, фал нӕ хеуӕнттӕ, хецауадӕ, ӕмкосгутӕ кенӕ ӕмкъласонтӕ нӕ нихмӕ ку фӕццӕунцӕ кенӕ ба нӕ тухӕй дӕр сӕ зундбӕл ку фӕййаразунцӕ, уӕдта нин ӕхцӕуӕн нӕбал фӕууй. Мадта дессаг нӕй, уӕхӕн цӕбӕлдӕрти тухсгӕ ке фӕккӕнӕн, е.

² Зиндзийнӕдтӕ ӕхцӕуӕн некӕмӕн фӕуунцӕ, фал нӕ Хуцауи Дзурд ба разӕнгард кӕнуй, цӕмӕй уӕхӕн уавӕрти дӕр цийнӕ кӕнӕн. Зӕгъӕн, Иаков финста, фӕлварӕнти ку бахауайтӕ, уӕд, дан, цийнӕ кӕнтӕ (Иак. 1:2, 12). Йесо ба ӕ ахуркӕнуйнӕгтӕн загъта, амондгун, дан, уодзиайтӕ, уӕ фӕдбӕл ку зелонцӕ. (Бакӕсӕ Матфеййи 5:11.) Цума нӕ бон ци ӕй кӕнун, цӕмӕй зиндзийнӕдти рӕстӕг нӕ цийнӕ ма фесӕфа? Гъӕйдӕ ӕркӕсӕн, Иаков киристӕнттӕн цӕхуӕн унаффитӕ равардта, уомӕ. Фал бал ӕркӕсӕн, фиццаг ӕноси киристӕнттӕ цӕхуӕн фӕлварӕнтӕбӕл ӕмбалдӕнцӕ, уомӕ.

3. Иаков киристон ку иссӕй, уӕд Йерусалими цӕхуӕн хабӕрттӕ райдӕдтонцӕ?

³ Йесой ӕнсувӕр Иаков киристон ку иссӕй, уой фӕсте Йерусалими киристӕнтти фӕдбӕл зелун райдӕдтонцӕ (Гъуд. 1:14; 5:17, 18). Стефани ку рамардтонцӕ, уӕдта киристӕнттӕ горӕтӕй фӕллигъдӕнцӕ ӕма ӕгас Иудӕ ӕма Самарибӕл  рапурх ӕнцӕ. Кадӕртӕ ба ма си Кипр ӕма Антиохимӕ дӕр бахъӕрдтӕнцӕ (Гъуд. 7:58–8:1; 11:19). Еци рӕстӕг син ӕнцон кӕми адтайдӕ, фал уӕддӕр кӕми адтӕнцӕ, уоми хуарз хабар зингзӕрдӕй игъосун кодтонцӕ, ӕма уой фӕрци еци бунӕтти нӕуӕг ӕмбурдтӕ фӕззиндтӕй (1 Пет. 1:1). Фал ма сӕмӕ разӕй устурдӕр фӕлварӕнтӕ ӕнгъӕлмӕ кастӕй.

4. Фиццаг ӕноси киристӕнттӕ цӕхуӕн зиндзийнӕдтӕбӕл ӕмбалдӕнцӕ?

⁴ Фиццаг ӕноси киристӕнттӕ аллихузи зиндзийнӕдтӕ ӕвзурстонцӕ. Зӕгъӕн, нӕ эри еу 50 анзи ромаг император Клавдий еугур дзиуиттӕгти дӕр Ромӕй рарвиста. Уомӕ гӕсгӕ дзиуиттаг киристӕнтти сӕ хӕдзӕрттӕ ниууадзун багъудӕй (Гъуд. 18:1–3). Нӕ эри еу 61 анзи апостол Павел ниффинста, хуӕртӕ ӕма ӕнсувӕрти ке ӕфхуардтонцӕ, ахӕстдӕнттӕмӕ сӕ ке гӕлстонцӕ, удта син сӕ мулк дӕр ке байсиуонцӕ (Дзиуит. 10:32–34). Уомӕй уӕлдай ма киристӕнттӕ иннӕ адӕни хузӕн гъезӕмарӕ кодтонцӕ, мӕгур цардӕй ӕма незтӕй (Ром. 15:26; Фил. 2:25–27).

5. Цӕхуӕн фарстатӕмӕ ӕркӕсдзиан?

⁵ Иаков ӕ финстӕг нӕ эри 62 анзӕй раздӕр ниффинста, ӕма ’й хуарз зудта, хуӕртӕ ӕма ӕнсувӕртӕ цӕхуӕн зиндзийнӕдтӕбӕл ӕмбалдӕнцӕ, уой. Йеговӕ Иакови баразӕнгард кодта еци финстӕг ниффинсунмӕ, цӕмӕй киристӕнттӕн сӕ бон адтайдӕ уӕхӕн зинтӕ ӕвзаргӕй дӕр цийнӕ кӕнун. Гъӕйдӕ ӕркӕсӕн Иакови финстӕгмӕ ӕма дзуапп иссерӕн уӕхӕн фарстатӕбӕл: Иаков цӕхуӕн цийни кой кодта? Киристонӕн ӕ цийнӕ цӕй туххӕй фесӕфуй? Зунд, ӕууӕндундзийнадӕ ӕма нин нифсхастдзийнадӕ куд банхус кӕндзӕнцӕ цийфӕнди зин уавӕрти дӕр нӕ цийнӕ ма фесафун?

6. Лукай 6:22, 23 финст дзурдтӕмӕ гӕсгӕ уотӕ зӕгъӕн цӕмӕн ес, ӕма киристони бон ӕй зин уавӕрти дӕр цийнӕ кӕнун?

⁶ Беретӕмӕ уотӕ фӕккӕсуй, ӕма адӕймаг амондгун уодзӕй, ӕнӕнез ку уа, берӕ ӕхца имӕ ку уа ӕма ӕ бийнонти хӕццӕ дзӕбӕх ку цӕра, уӕд. Фал Иаков ци цийни кой кодта, е хауй, Хуцауи сугъдӕг хъаурӕ ке дӕттуй, еци рӕзӕмӕ, ӕма адӕймаг ци уавӕрти фӕууй, уомӕй кӕнгӕ нӕй (Гал. 5:22). Киристон ӕй ку фӕззонуй, Хуцауи зӕрдӕ ке рохс кӕнуй, уӕд ин е цийнӕ фӕххӕссуй. (Бакӕсӕ Лукай 6:22, 23; Кол. 1:10, 11.) Рохсгӕнӕни хурфи ци арт фӕццӕфсуй, уомӕн нӕдӕр дунгӕй, нӕдӕр уарунӕй тӕссаг куд нӕ фӕууй, уотӕ нӕ цийнӕн дӕр тӕссаг нецӕмӕй уодзӕй. Нӕ цийни рохс нӕ ниххусдзӕй нӕдӕр незти туххӕй, нӕдӕр мӕгур царди туххӕй. Еске нӕбӕл ку хода кенӕ нӕ хеуӕнттӕ нӕ нихмӕ ку цӕуонцӕ, уӕд дӕр нӕ цийнӕ нӕ фесӕфдзӕй. Не знӕгтӕ нӕ нихмӕ ку фӕццӕунцӕ, уӕд нӕ цийни рохс хусгӕ нӕ, фал ма никки карздӕр цӕфсун райдайуй. Не ’ууӕндундзийнади туххӕй ӕфхуӕрд ке ӕййафӕн, е, ӕцӕг киристӕнттӕ ке ан, уобӕл дзорӕг ӕй (Матф. 10:22; 24:9; Иоан. 15:20). Иаков дӕр уомӕ гӕсгӕ ниффинста: «Ме ’нсувӕртӕ, аллихузи фӕлварӕнти ку бахауайтӕ, уӕд цийнӕ кӕнтӕ» (Иак. 1:2).

7, 8. Фӕлварӕнти рӕстӕг не ’ууӕндундзийнадӕ федардӕр цӕмӕн исуй?

⁷ Киристӕнттӕ ма зиндзийнӕдтӕн бухсунмӕ цӕттӕ цӕмӕн фӕуунцӕ, уой туххӕй Иаков ниффинста: «Уе ’ууӕндундзийнадӕ фӕлвӕрд ку ’рцӕуй, уӕд си... равзуруй федардзийнадӕ» (Иак. 1:3). Фӕлварӕнтӕ рабарӕн ес, ӕфсӕйнаг куд фӕффедар кӕнунцӕ, уой хӕццӕ. Фиццаг бал ӕй хъӕбӕр истӕвдӕ кӕнунцӕ, уой фӕсте ба ӕй уазал дони рацӕвунцӕ, ӕма гъе уотемӕй федардӕр фӕккӕнуй. Гъе уотӕ махӕн дӕр зиндзийнӕдти рӕстӕг не ’ууӕндундзийнадӕ федардӕр фӕккӕнуй. Иаков дӕр уомӕ гӕсгӕ ниффинста: «Уадзӕ ӕмӕ уӕ федардзийнадӕ ӕ куст бакӕнӕд кӕронмӕ, цӕмӕй алцӕмӕйдӕр уайтӕ ӕнхӕст» (Иак. 1:4). Ӕма ’й нӕхуӕдтӕ дӕр ку фӕууинӕн, зиндзийнӕдти рӕстӕг не ’ууӕндундзийнадӕ куд исфедар уй, уой, уӕд нӕ цийнӕ нӕ фесӕфуй.

⁸ Иаков ма финста, хатгай нӕ цийнӕ цӕмӕн фесӕфуй, уой туххӕй дӕр. Цӕхуӕн зиндзийнӕдти кой кодта ӕма нӕ бон куд ӕй сӕ сӕрти хезун?

9. Зунд нӕ цӕхуӕн уавӕрти фӕгъгъӕуй?

⁹ Ци дин кӕнгӕ ’й, уой ку нӕ зонай. Зин уавӕри гъӕуама Йеговӕмӕ ковӕн, цӕмӕй нӕ бон уа раст унаффӕ рахӕссун, еузӕрдонӕй байзайун ӕма хуӕртӕ ӕма ӕнсувӕрти бафедар кӕнун (Йер. 10:23). Цӕмӕй ӕй лӕдӕрӕн,  не знӕгти хӕццӕ нин нӕхе куд даргӕ ’й ӕма куд дзоргӕ ’й, уой туххӕй нӕ фӕгъгъӕуй зунд. Фал нин ци кӕнгӕ ’й, уой ку нӕ фӕззонӕн, уӕдта нӕ нифс басӕттуй ӕма нӕ цийнӕ фесафӕн.

10. Иакови 1:5 куд финст ӕй, уомӕ гӕсгӕ нӕ ци кӕнун гъӕуй, цӕмӕй фӕлварӕнти рӕстӕг зундӕй архайӕн?

¹⁰ Ци ес бакӕнӕн: Йеговӕй зунд корӕ. Цӕмӕй фӕлварӕнти рӕстӕг нӕ цийнӕ ма фесафӕн, уой туххӕй фиццагидӕр Йеговӕй зунд корун гъӕуй, ӕма гъе уӕд нӕ бон уодзӕй раст унаффитӕ хӕссун. (Бакӕсӕ Иакови 1:5.) Фал нӕмӕ уотӕ ку кӕса, ӕма нин Йеговӕ нӕ кувдтитӕбӕл цидӕр ӕрӕгӕмӕ дзуапп кӕнуй, уӕдта? Иаков уотӕ нӕ загъта, Хуцауӕй зунд «ракорӕд», зӕгъгӕ, фал, дан, «корӕд». Йеговӕ нин нӕ кувдтитӕй некӕд фӕллайуй, удта нин уой туххӕй уайдзӕф дӕр некӕд бакӕндзӕй. Зин уавӕрти си зунд ку фӕккорӕн, уӕд нин ӕй алкӕддӕр рӕдауӕй раттуй (Пс. 25:12, 13). Уинуй ӕй, цӕхуӕн уавӕрти ан, уой, тухсуй нӕбӕл, ӕма ’й фӕндуй банхус кӕнун. Айдагъ е дӕр нин цӕйбӕрцӕ цийнӕ хӕссуй! Фал нин цума Йеговӕ зунд кутемӕй раттуй?

11. Никкидӕр ма нӕ ци кӕнун гъӕуй, цӕмӕй нӕ бон уа зундӕй архайун?

¹¹ Йеговӕ нин зунд амонуй ӕ Дзурди (Ӕмб. 2:6). Ӕма цӕмӕй еци зундӕй исхайгин уӕн, уой туххӕй нӕ гъӕуй Библи ӕма нӕ публикацитӕ ӕртасун, удта ци базонӕн, уомӕ гӕсгӕ архайун. Иаков финста: «Еци дзурд ӕнхӕст дӕр кӕнтӕ, ма уотӕ, ӕрмӕстдӕр ӕй игъосгӕ ка кӕнуй... уӕхӕнттӕ» (Иак. 1:22). Хуцауи Дзурди унаффитӕмӕ гӕсгӕ ку фӕййархайӕн, уӕд исуӕн фарнӕуарзагӕ, лӕдӕргӕ ӕма хӕларзӕрдӕ (Иак. 3:17). Аци менеугутӕ нӕмӕ ку уа, уӕд цийфӕнди фӕлварӕнти дӕр нӕ цийнӕ нӕ фесӕфдзӕй.

12. Библи хуарз зонун ӕхсидзгӕ цӕмӕн ӕй?

¹² Библи рабарӕн ес айдӕни хӕццӕ – нӕ бон си ӕй фӕууинун, исраст кӕнун нӕ ци  гъӕуй, уой (Иак. 1:23–25). Зӕгъӕн, Библи кӕсгӕй ӕй фӕууидтай, хебӕлхуӕцундзийнадӕ дӕ ке гъӕуй, уомӕн ӕма естӕбӕл дӕр ӕма нецӕбӕл дӕр рамӕстгун уис. Йегови фӕрци исахур уодзӕнӕ хебӕл хуӕцун ӕма иннети хӕццӕ фӕлмӕнӕй дзубанди кӕнун. Фӕлмӕн уодигъӕдӕ дин ку уа, уӕд дин ӕнцондӕр уодзӕй зиндзийнӕдтӕн бухсун. Уотемӕй дӕ бон уодзӕй уавӕрбӕл расагъӕс кӕнун ӕма раст унаффӕ рахӕссун (Иак. 3:13). Куд ӕй уинӕн, уотемӕй Библи хуарз зонун ӕцӕгӕйдӕр ӕхсидзгӕ ӕй!

13. Библий хабӕрттӕбӕл сагъӕс кӕнун цӕмӕн гъӕуй?

¹³ Еуӕй-еухатт нӕ рӕдудтитӕй естӕбӕл исахур уӕн. Фал хуӕздӕр уайдӕ иннети рӕдудтитӕбӕл ахур кӕнун. Уотемӕй минкъийдӕр рист бавзардзиан. Уомӕй уӕлдай ма нӕ бон ӕй ахур кӕнун, иннетӕ ци зундгин унаффитӕ рахӕссионцӕ, уонӕй дӕр. Иаков дзӕгъӕли нӕ ниффинста, цӕмӕй Авраами, Раави, Иови ӕма Илийай царди хабӕрттӕбӕл расагъӕс кӕнӕн (Иак. 2:21–26; 5:10, 11, 17, 18). Еци еузӕрдон лӕггадгӕнгутӕ фӕлварӕнти рӕстӕг сӕ цийнӕ нӕ фесафтонцӕ. Мадта мах бон дӕр ӕй Йегови фӕрци фӕлварӕнти рӕстӕг федар фӕллӕуун.

14, 15. Дузӕрдуг сагъӕстӕмӕ уӕлӕнгай цӕстӕй кӕсӕн цӕмӕннӕ ес?

¹⁴ Естӕбӕл ку дузӕрдуг кӕнай. Еуӕй-еухатт Библийӕй цӕхуӕндӕр гъудитӕ нӕ балӕдӕрӕн. Кенӕ ба нин Йеговӕ нӕ кувдбӕл, куд ӕнгъӕл адтан, уотӕ не ’сдзуапп кӕнуй. Уой туххӕй, гӕнӕн ес, ӕма дузӕрдуг кӕнун райдайӕн. Дузӕрдуг сагъӕстӕ нӕмӕ ку фӕззинна ӕма син афойнадӕбӕл ку неци бакӕнӕн, уӕд Йеговӕй раидард уодзиан (Иак. 1:7, 8). Гӕнӕн ес, ӕма ма нӕ нифс дӕр фесафӕн.

¹⁵ Ци нифс нин ес, уой апостол Павел рабарста науӕнгури хӕццӕ (Дзиуит. 6:19). Тухдунги рӕстӕг науӕнгурӕ науӕ багъӕуай кӕнуй, цӕмӕй къӕдзӕхтӕбӕл ма ниппурх уа. Фал еци науӕнгурӕй неци пайда уодзӕй, ӕ рӕхис федар ку нӕ уа, уӕд. Рӕхис изгӕ куд бахуӕруй, уотӕ нин дузӕрдуг сагъӕстӕ дӕр не ’ууӕндундзийнадӕ бахуӕрунцӕ. Рӕстдзийнадӕбӕл ка дузӕрдуг кӕнуй, уӕхӕн адӕймаг фӕлварӕнти ку бахауа, уӕд Йегови зӕрдӕвӕрдтӕбӕл дӕр нӕбал ӕууӕнддзӕй. Уонӕбӕл ку нӕбал ӕууӕндӕн, уӕдта нин нифс дӕр нӕбал уодзӕй. Иаков загъта, дузӕрдуггӕнагӕ, дан, ӕй, «дунгӕ ке исесуй ӕма ке соруй, уӕхӕн денгизи улӕни хузӕн» (Иак. 1:6). Уӕхӕн адӕймаги бон цийнӕ кӕнун нӕ фӕууй.

16. Дузӕрдуг сагъӕстӕ дӕмӕ ку фӕззинна, уӕд дӕ ци кӕнун гъӕуй?

¹⁶ Ци ес бакӕнӕн: архайӕ, цӕмӕй дӕмӕ дузӕрдуг сагъӕстӕ мабал уа ӕма де ’ууӕндундзийнадӕ федар кӕнӕ. Еци гъуддагмӕ куд тагъддӕр ӕркӕсай, уотӕ хуӕздӕр. Пахампар Илийай рӕстӕги адӕн дузӕрдуг кодтонцӕ, Йеговӕбӕл ӕууӕндонцӕ ӕви нӕ. Ӕма син Илийа загъта: «Кӕдмӕ ма цӕудзиайтӕ къулух уӕ дууӕ къахебӕл, кӕдмӕ ма дууердӕмӕ кӕндзиайтӕ? Кӕд Йеговӕ ӕй ӕцӕг Хуцау, уӕд ӕ фӕдбӕл цотӕ, кӕд Ваал ӕй, уӕдта уой фӕдбӕл цотӕ» (1 Пад. 18:21). Дузӕрдуг сагъӕстӕ дӕмӕ ку фӕззинна, уӕд сӕ уотӕ ма уадзӕ. Дӕхецӕн нӕуӕгӕй исбӕлвурд кӕнӕ, Йеговӕ ӕцӕг Хуцау ке ӕй, Библи ӕ Дзурд ке ӕй ӕма Йегови Ӕвдесӕнтӕ ӕ адӕн ке ’нцӕ (1 Фес. 5:21). Уой фӕрци де ’ууӕндундзийнадӕ бафедар уодзӕй. Хестӕр нӕлгоймӕгтӕй дӕр дӕ бон ӕй ӕнхус ракорун. Мадта ӕвӕстиатӕй архайун райдайӕ, цӕмӕй Йеговӕн лӕггадӕ кӕнгӕй дӕ цийнӕдзийнадӕ ма фесӕфа!

17. Нӕ нифс ку басӕтта, уӕд е цӕмӕ ӕркӕндзӕй?

¹⁷ Дӕ нифс ку басӕтта. Хуцауи Дзурди финст ӕй: «Зин сахат дӕ нифс ку басӕтта, уӕд дӕмӕ хъаурӕ кӕцӕй уодзӕй?» (Ӕмб. 24:10). Адӕймагӕн ӕ нифс ку басӕтта, уӕд ӕ цийнӕ дӕр тагъд фесӕфдзӕй.

18. Федар фӕллӕуун ци нисан кӕнуй?

 ¹⁸ Ци ес бакӕнӕн: Йеговӕбӕл дӕ зӕрдӕ дарӕ ӕма дин нифсхастдзийнадӕ ке ратдзӕй, уобӕл ӕппундӕр ма гурусхӕ кӕнӕ. Нифсхастдзийнадӕ нӕ гъӕуй, цӕмӕй фӕлварӕнти рӕстӕги федар фӕллӕууӕн (Иак. 5:11). Иакови финстӕги дзурдбаст «федар ка фӕллӕудтӕй» комкоммӕ амонуй, ӕ бунат ка нӕ ниууадзуй, уӕхӕн адӕймагмӕ. Зӕгъӕн, дӕ цӕститӕбӕл рауайун кӕнӕ, нифсхаст ӕфсӕддон знаги нихмӕ куд федар фӕллӕууй, уой.

19. Апостол Павели хабарӕй цӕбӕл ахур кӕнӕн?

¹⁹ Апостол Павел хъӕбӕр нифсхаст ӕма федар лӕг адтӕй. Кӕд хатгай ӕхемӕ лӕмӕгъ фӕккӕсидӕ, уӕддӕр ӕ бон адтӕй федар фӕллӕуун, уомӕн ӕма ӕ зӕрдӕ Йеговӕбӕл дардта, ӕма ин е хъауритӕ лӕвардта (2 Кор. 12:8–10; Фил. 4:13). Махӕн дӕр Йеговӕ уӕхӕн хъаурӕ ӕма нифсхастдзийнадӕ ратдзӕй, ӕнӕ уой ӕнхусӕй нӕ бон ке нӕй, уой ку лӕдӕрӕн, уӕд (Иак. 4:10).

20, 21. Федарӕй ци зонӕн?

²⁰ Мах ӕй федарӕй зонӕн, ци фӕлварӕнтӕбӕл исӕмбӕлӕн, уони нӕбӕл Йеговӕ ке не ’руадзуй. Иаков ниффинста: «Фӕлварӕни бахаугӕй уотӕ маке зӕгъӕд: „Хуцау мӕ фӕлваруй“. Хуцауи фуддзийнадӕй бафӕлварӕн нӕййес, ӕма е ӕхуӕдӕг дӕр фуддзийнадӕй неке фӕлваруй» (Иак. 1:13). Аци дзурдтӕбӕл федарӕй ку ӕууӕндӕн, уӕд нӕ уарзӕгой Фидӕмӕ никки хӕстӕгдӕр исуодзиан (Иак. 4:8).

²¹ Йеговӕ ӕййевгӕ нӕ кӕнуй (Иак. 1:17). Фиццаг ӕноси киристӕнттӕн куд ӕнхус кодта, уотӕ абони махӕн дӕр ӕнхус кӕндзӕй. Корӕ си, цӕмӕй дин ратта зунд, ӕууӕндундзийнадӕ ӕма нифсхастдзийнадӕ. Йеговӕ дин ӕнӕмӕнгӕй дӕ кувдбӕл дзуапп ратдзӕй. Ӕма ’й гъе уӕд федарӕй зондзӕнӕ, цийфӕнди фӕлварӕнти дӕр дин Йеговӕ ке банхус кӕндзӕй ӕма дӕ цийнӕ ке нӕ фесӕфдзӕй!