ФИЛИППИНТИ горӕт Багиой дууӕ кизги фӕццӕйцудӕнцӕ, аллихузи кустуӕттӕ кӕми ес, уӕхӕн райони, ӕма си рауидтонцӕ стенд нӕ литератури хӕццӕ. Стенди рази лӕудтӕй нӕ хуӕрӕ Хелен, ӕма сӕмӕ бахудтӕй. Кизгуттӕ ӕ рӕзти рацудӕнцӕ, фал сӕмӕ Хелен ке бахудтӕй, е ба син ӕхцӕуӕн адтӕй.

Фӕстӕдӕр хӕдзарӕмӕ автобусбӕл ку цудӕнцӕ, уӕд рауидтонцӕ, нӕ залтӕй еуебӕл устур дамугъатӕй финст jw.org ӕма сӕ зӕрдӕбӕл ӕрлӕудтӕй, стендбӕл дӕр еци дамугъатӕ ке адтӕй. Уӕд автобусӕй рахизтӕнцӕ ӕма зали размӕ бацудӕнцӕ. Ӕндегӕй си ауигъд адтӕй ӕмбурдти график, ӕма имӕ ӕркастӕнцӕ.

Уой фӕсте кизгуттӕ ӕмбурдмӕ ӕрбацудӕнцӕ. Залмӕ ку бацудӕнцӕ, уӕд си Хелени рауидтонцӕ. Кизгуттӕ ’й рафӕсмардтонцӕ ӕма имӕ бауадӕнцӕ. Хелен зӕгъуй: «Фиццаг еу минкъий ратухстӕн, ӕвӕдзи, зӕгъун, сӕ зӕрдӕмӕ цидӕр нӕ фӕццудӕй». Фал ин кизгуттӕ балӕдӕрун кодтонцӕ хабар цӕй медӕг ӕй уой.

Ӕмбурди сӕ зӕрдӕмӕ хъӕбӕр фӕццудӕй. Цума сӕхе бийнонти астӕу адтӕнцӕ, уотӕ. Ӕмбурди фӕсте еугурӕйдӕр ке ӕфснайунцӕ, уой ку фӕууидтонцӕ, уӕд уони дӕр бафӕндадтӕй банхус кӕнун. Фӕстӕдӕр еци кизгуттӕй сӕ еу Филиппинтӕй рандӕ ’й. Фал иннӕ ба ӕмбурдтӕмӕ цӕун ӕма Библи ахур кӕнун райдӕдта. Цӕй фӕрци? Хуӕрӕ сӕмӕ ке бахудтӕй, уой фӕрци!