1. Йегови бийнонти астӕу еудзийнадӕ цӕй фӕрци ес?

ЙЕГОВИ бийнонти астӕу ке ан, е нин хъӕбӕр ӕхцӕуӕн ӕй. Цума нӕ астӕу фарнӕ ӕма еудзийнадӕ цӕй фӕрци ес? Еу гъуддаг уой медӕги ӕй ӕма не ’гасдӕр аргъ кӕнӕн, Йеговӕ ӕ бийнонти астӕу ци ӕгъдау ӕрфедар кодта, уомӕн. Йеговӕ кӕмӕн цӕхуӕн бартӕ равардта, уой куд хуӕздӕр лӕдӕрӕн, уотӕ кӕрӕдземӕ дӕр ӕнгомдӕр кӕндзиан.

2. Аци статьяй цӕхуӕн фарстатӕбӕл иссердзиан дзуапп?

² Аци статьяй радзордзиан, ӕмбурди кӕмӕн цӕхуӕн бартӕ ес, уобӕл. Удта ма ӕркӕсдзиан уӕхӕн фарстатӕмӕ: хуӕртӕбӕл ӕмбурди цӕхуӕн ихӕстӕ ес? Уотӕ зӕгъӕн ес, ӕма ӕмбурди алли ӕнсувӕр дӕр алли хуӕрӕн дӕр хецау ӕй? Бийнонти хестӕрӕн ӕ бийнонти медӕг цӕхуӕн бартӕ ес, хестӕр нӕлгоймӕгтӕн дӕр ӕмбурди уӕхӕн бартӕ ес? Фал бал фиццаг радзорӕн, хуӕртӕмӕ цӕхуӕн цӕстӕй гъӕуама кӕсӕн, уобӕл.

3. Ӕмбурди хуӕртӕн никки хъӕбӕрдӕр кӕд аргъ кӕндзиан?

³ Мах нӕ хуӕртӕн хъӕбӕр устур аргъ кӕнӕн, уомӕн ӕма етӕ сӕ бийнонтӕбӕл дӕр тухсунцӕ, игъосун кӕнуни гъуддаги дӕр архайунцӕ, удта ӕмбурди хуӕртӕ ӕма ӕнсувӕртӕн дӕр ӕнхус кӕнунцӕ. Фал син никки хъӕбӕрдӕр ба аргъ кӕндзиан, Йеговӕ ӕма сӕмӕ Йесо ци цӕстӕй кӕсунцӕ, мах дӕр сӕмӕ уӕхӕн цӕстӕй ку кӕсӕн. Апостол Павел сӕмӕ цӕхуӕн цӕстӕй кастӕй, уомӕй дӕр нӕ бон берӕ цидӕртӕ ӕй базонун.

4. Библийӕй куд зиннуй, Йеговӕ силгоймӕгтӕн дӕр нӕлгоймӕгтӕй минкъийдӕр ке нӕ аргъ кӕнуй?

 ⁴ Библийӕй бӕрӕг ӕй, Йеговӕ силгоймӕгтӕн дӕр нӕлгоймӕгтӕй минкъийдӕр ке нӕ аргъ кӕнуй. Зӕгъӕн, фиццаг ӕноси Йеговӕ ӕ сугъдӕг хъаурӕй нӕлгоймӕгти дӕр ӕма силгоймӕгти дӕр исхайгин кодта, цӕмӕй сӕ бон адтайдӕ аллихузи ӕвзӕгтӕбӕл дзорун (Гъуд. 2:1–4, 15–18). Киристей хӕццӕ уӕлӕрвти паддзӕхтӕ ка уодзӕй, уони астӕу дӕр ес силгоймӕгтӕ (Гал. 3:26–29). Удта зӕнхӕбӕл цӕруни нифс дӕр Йеговӕ айдагъ нӕлгоймӕгтӕн нӕ равардта (Рарг. 7:9, 10, 13–15). Уомӕй уӕлдай ма ахуркӕнуйнӕгтӕ цӕттӕ кӕнуни гъуддаг Киристе силгоймӕгтӕн дӕр баихӕс кодта (Матф. 28:19, 20). Зӕгъӕн, Гъуддӕгти киунуги финст ӕй Прискиллӕ ӕ сӕрихецау Акили хӕццӕ ахургонд лӕг Апполосӕн ке банхус кодтонцӕ рӕстдзийнадӕ хуӕздӕр балӕдӕрунмӕ (Гъуд. 18:24–26).

5. Лукай 10:38, 39, 42 финст дзурдтӕй куд зиннуй, Йесо силгоймӕгтӕн кадӕ ке кодта, е?

⁵ Йесо силгоймӕгтӕн кадӕ кодта. Уӕди рӕстӕги фарисейтӕ силгоймӕгтӕмӕ сӕрӕй бунмӕ кастӕнцӕ ӕма адӕни астӕу сӕ хӕццӕ дзоргӕ дӕр нӕ кодтонцӕ, уӕлдайдӕр ба Финстадӕбӕл. Фал сӕмӕ Йесо ба уӕхӕн цӕстӕй нӕ кастӕй. Е рӕстдзийнадӕ амудта нӕлгоймӕгтӕн дӕр ӕма силгоймӕгтӕн дӕр *. (Бакӕсӕ Лукай 10:38, 39, 42.) Удта хуарз хабар игъосун кӕнунмӕ ку цӕуидӕ, уӕд ӕ хӕццӕ силгоймӕгтӕ дӕр цудӕнцӕ (Лук. 8:1–3). Уомӕй уӕлдай ма сӕ уӕхӕн кади аккаг дӕр искодта, цӕмӕй апостолтӕн фегъосун кодтайуонцӕ, ке райгас ӕй, уой (Иоан. 20:16–18).

6. Павел силгоймӕгтӕн ке кадӕ кодта, е цӕмӕй бӕрӕг ӕй?

⁶ Апостол Павел Тимофеймӕ ниффинста, силгоймӕгтӕн кадӕ ке гъӕуама кодтайдӕ. Каргун силгоймӕгти хӕццӕ, дан, уотӕ дзорӕ, цума дӕ мади хӕццӕ дзорис, ӕригон силгоймӕгти хӕццӕ ба – цума дӕ хуӕртӕ ’нцӕ, уотӕ (1 Тим. 5:1, 2). Павел Тимофеййӕн банхус кодта фӕлтӕрдгун киристон исунмӕ, фал си е дӕр иронх н’ адтӕй, ӕма Тимофеййӕн рӕстдзийнадӕ ӕ мадӕ ӕма ӕ мадимадӕ ке бауарзун кодтонцӕ (2 Тим. 1:5; 3:14, 15). Павел ромӕгтӕмӕ ци финстӕг ниффинста, уоми хуӕрти номгай ранимадта. Ӕма син айдагъ сӕ хуарз гъуддӕгтӕ нӕ ранимадта, фал ма сӕ уой туххӕй ӕстаугӕ дӕр ракодта (Ром. 16:1–4, 6, 12; Фил. 4:3).

7. Цӕхуӕн фарстатӕбӕл ма гъӕуй дзуапп базонун?

⁷ Мадта Библий уотӕ финст некӕми ес, ӕма хуӕртӕн ӕнсувӕртӕй минкъийдӕр кадӕ ес. Нӕ уарзӕгой ӕма рӕдау хуӕртӕ ӕмбурдӕн хъӕбӕр ӕнхус кӕнунцӕ. Хестӕр нӕлгоймӕгтӕ дӕр хуӕртӕн устур аргъ кӕнунцӕ, уомӕн ӕма ’й лӕдӕрунцӕ, ӕмбурди фарнӕ ӕма еудзийнадӕн устур агъаз ке ’нцӕ. Фал ма гъӕуама уӕхӕн фарстатӕмӕ ӕркӕсӕн: Йегови уотӕ цӕмӕн фӕндуй, цӕмӕй цӕхуӕндӕр уавӕрти хуӕртӕ сӕ сӕртӕ ӕмбӕрзонцӕ? Ӕмбурди кадгин ихӕстӕ ӕрмӕстдӕр ӕнсувӕртӕн ке фӕууй, е уобӕл дзорӕг ӕй, ӕма ӕмбурди алли ӕнсувӕр дӕр алли хуӕрӕн дӕр хецау ӕй?

8. Ефесӕгтӕмӕ 5:23 ци финст ес, уомӕ гӕсгӕ уотӕ зӕгъӕн ес, ӕма ӕмбурди алли ӕнсувӕр дӕр цийфӕнди хуӕрӕн дӕр хецау ӕй? Ба ’й лӕдӕрун кӕнӕ.

⁸ Цума уотӕ зӕгъӕн ес, ӕма ӕмбурди алли ӕнсувӕр дӕр цийфӕнди хуӕрӕн дӕр хецау ӕй? Цубуртӕй ӕй ку зӕгъӕн, уӕд нӕ. Ӕмбурди сӕр Киристе ӕй, ӕма хуӕртӕ дӕр уой дӕлбарӕ ’нцӕ. (Бакӕсӕ Ефесӕгтӕмӕ 5:23.) Йеговӕ ци ӕгъдау ӕрфедар кодта, уомӕ гӕсгӕ силгоймагӕн ӕ хецау ӕрмӕстдӕр ӕ лӕг ӕй. Донаргъуд фурт ӕ мадӕн хецау нӕй (Еф. 6:1, 2). Кӕд ӕмбурди хестӕр нӕлгоймӕгтӕн цӕхуӕндӕр бартӕ ес, уӕддӕр е уобӕл дзорӕг нӕй, ӕма сӕ бон ӕй хуӕртӕ  ӕма ӕнсувӕртӕн цийфӕнди гъуддаги дӕр унаффӕ кӕнун (1 Фес. 5:12; Дзиуит. 13:17). Ӕ ниййергути хӕццӕ ка нӕбал цӕруй, еци ӕнӕцуд хуӕртӕй ба ци ес зӕгъӕн? Етӕ сӕ ниййергути ӕма хестӕр нӕлгоймӕгти нимайунцӕ, фал сӕ хецау ба ӕрмӕстдӕр Киристе ӕй.

9. Цӕхуӕндӕр уавӕрти хуӕри ӕ сӕр бамбӕрзун цӕмӕн багъӕуй?

⁹ Йеговӕ нӕлгоймӕгтӕн баихӕс кодта, цӕмӕй ӕмбурдӕн разамунд дӕттонцӕ. Фал силгоймӕгтӕн ба уӕхӕн барӕ нӕ равардта (1 Тим. 2:12). Цӕмӕннӕ? Уомӕн ӕма Йеговӕмӕ алцидӕр уагӕ ӕма ӕгъдаумӕ гӕсгӕ ӕй. Гъе уотӕ нӕлгоймагӕн дӕр хецауӕй исӕвардта Киристей. Цӕхуӕндӕр уавӕрти хуӕрти ӕнсувӕрти ихӕстӕ ӕнхӕст кӕнун ку багъӕуа, уӕд гъӕуама сӕ сӕр бамбӕрзонцӕ * (1 Кор. 11:4–7). Е уобӕл дзорӕг нӕй, ӕма Йеговӕ хуӕртӕн минкъийдӕр аргъ кӕнуй, фал син уотемӕй фадуат дӕттуй, цӕмӕй бавдесонцӕ, Йеговӕ ци ӕгъдау ӕрфедар кодта, уой ке нимайунцӕ. Гъӕйдӕ нур ба ӕркӕсӕн уӕхӕн фарстамӕ: бийнонти хестӕртӕн ӕма ӕмбурди хестӕр нӕлгоймӕгтӕн цӕхуӕн бартӕ ес?

10. Хатгай хестӕр нӕлгоймӕгти цӕмӕн фӕффӕндуй ӕмбурди хуӕртӕ ӕма ӕнсувӕртӕн унаффӕ кӕнун?

¹⁰ Хестӕр нӕлгоймӕгтӕ уарзунцӕ Киристей, удта син Йеговӕ ӕма Йесо сӕ барӕ ке бакодтонцӕ, еци уӕриккити (Иоан. 21:15–17). Хестӕр нӕлгоймӕгтӕ ӕмбурдбӕл ке фӕттухсунцӕ, уомӕ гӕсгӕ сӕмӕ, гӕнӕн ес, ӕма уотӕ кӕсун райдайа, цума ӕмбурдӕн, фидӕ ӕ сувӕллӕнттӕн куд фӕууй, уотӕ гъӕуама уонцӕ. Ӕвӕдзи, уотӕ фӕссагъӕс кӕнунцӕ: «Кӕд бийнонти хестӕрӕн  барӕ ес ӕ бийнонтӕн унаффӕ кӕнун, уӕд хестӕр нӕлгоймагӕн дӕр ес барӕ хуӕртӕ ӕма ӕнсувӕртӕн унаффӕ кӕнун, цӕмӕй сӕ багъӕуай кӕна». Хестӕр нӕлгоймӕгтӕ ма уотӕ уомӕн фӕссагъӕс кӕнунцӕ, ӕма еуӕй-еу хуӕртӕ ӕма ӕнсувӕрти фӕффӕндуй, цӕмӕй унаффӕ сӕ бӕсти етӕ рахӕссонцӕ. Фал цума хестӕр нӕлгоймӕгтӕн ӕма бийнонти хестӕртӕн ӕмхузӕн бартӕ ес?

11. Бийнонти хестӕртӕн ӕма хестӕр нӕлгоймӕгтӕн ци бартӕ ес, етӕ ӕмхузӕн цӕмӕй ӕнцӕ?

¹¹ Апостол Павел ӕ финстӕгутӕй еуеми ниффинста, бийнонти хестӕртӕн ӕма хестӕр нӕлгоймӕгтӕн ци бартӕ ес, етӕ цӕмӕйдӕр ӕмхузӕн ке ’нцӕ (1 Тим. 3:4, 5). Зӕгъӕн, Йегови фӕндуй, цӕмӕй бийнонти хестӕрмӕ ӕ бийнонтӕ игъосонцӕ (Кол. 3:20). Хестӕр нӕлгоймӕгтӕмӕ ба ӕмбурди хуӕртӕ ӕма ӕнсувӕртӕ игъосонцӕ. Удта бийнонти хестӕртӕ дӕр ӕма хестӕр нӕлгоймӕгтӕ дӕр гъӕуама, Йеговӕ син сӕ барӕ ке бакодта, уонӕн се ’ууӕндундзийнадӕ федар кӕнонцӕ ӕма сӕ уарзонцӕ. Удта хестӕр нӕлгоймӕгтӕ дӕр гъӕуама ӕнхус кӕнонцӕ, ӕмбурди зин уавӕри ка бахаудтӕй, уонӕн, бийнонти хестӕртӕ сӕ бийнонтӕй ескӕмӕн куд фенхус кӕнунцӕ, уотӕ (Иак. 2:15–17). Уомӕй уӕлдай ма Йегови фӕндуй, цӕмӕй еци ӕнсувӕртӕ сӕ цӕстӕ даронцӕ, хуӕртӕ ӕма ӕнсувӕртӕ Йегови уагӕвӕрдтӕ куд ӕнхӕст  кӕнунцӕ, уомӕ, ӕма Библий ци финст ес, уой сӕрти ма хезонцӕ (1 Кор. 4:6).

12, 13. Ромӕгтӕмӕ 7:2 куд финст ӕй, уомӕ гӕсгӕ бийнонти хестӕртӕн ӕма хестӕр нӕлгоймӕгтӕн ци бартӕ ес, етӕ цӕмӕй хецӕн кӕнунцӕ?

¹² Фал Йеговӕ хестӕр нӕлгоймӕгтӕн ци бартӕ равардта, етӕ цӕмӕйдӕрти хецӕн кӕнунцӕ, бийнонти хестӕртӕн ци бартӕ равардта, уонӕй. Зӕгъӕн, хестӕр нӕлгоймагӕн ес ӕмбурди тӕрхон кӕнуни барӕ, ӕма сӕ ихӕс ӕй, ӕ тӕрегъӕдбӕл ка нӕ фӕсмон кӕнуй, уой ӕмбурдӕй рацох кӕнун (1 Кор. 5:11–13).

¹³ Иннердиги ба Йеговӕ бийнонти хестӕртӕн ци бартӕ равардта, уӕхӕн бартӕ хестӕр нӕлгоймӕгтӕн нӕ равардта. Зӕгъӕн, бийнонти хестӕрӕн барӕ ес, цӕмӕй ӕ бийнонти медӕг цӕхуӕндӕр закъӕнттӕ ӕрфедар кӕна ӕма сӕ куд ӕнхӕст кӕндзӕнцӕ, уомӕ ӕ цӕстӕ дара. (Бакӕсӕ Ромӕгтӕмӕ 7:2.) Бийнонти хестӕрӕн ӕ бон ӕй ӕ сувӕллонӕн зӕгъун, гъе уалебӕл ӕрбацо хӕдзарӕмӕ, зӕгъгӕ. Ӕма ку не ’рбацӕуа, уӕд ӕй ӕ бон бафхуӕрун дӕр ӕй (Еф. 6:1). Фал хӕдзари уӕхӕн закъӕнттӕ ӕвӕруни размӕ бийнонти хестӕр ӕ бийнойнаги хӕццӕ дӕр радзордзӕй, уомӕн ӕма еу бауӕр ӕнцӕ (Матф. 19:6) *.

14. а) Марки 10:45 куд финст ӕй, уомӕ гӕсгӕ Йеговӕ Йесой ӕмбурди сӕргълӕууӕгӕй цӕмӕн исӕвардта? б) Разамонӕг советӕн ӕ ихӕс ци ӕй? (Кӕсӕ рамкӕ « Разамонӕг советӕн ӕ ихӕс ци ӕй?».)

¹⁴ Йеговӕ не ’гасейдӕр ӕ хъазар Фурти цардӕй балхӕдта, ма уомӕ гӕсгӕ не ’гасдӕр уой ан. (Бакӕсӕ Марки 10:45; Гъуд. 20:28; 1 Кор. 15:21, 22.) Йесо мах туххӕй ӕ цард ке  равардта, уомӕ гӕсгӕ ба ’й Йеговӕ исӕвардта ӕмбурди сӕргълӕууӕгӕй. Ӕма Йесойӕн ес барӕ, цӕмӕй закъӕнттӕ ӕма уагӕвӕрдтӕ федар кӕна алли адӕймагӕн дӕр, бийнонтӕн дӕр ӕма ӕгас ӕмбурдӕн дӕр, удта ӕ цӕстӕ дара, куд сӕ ӕнхӕст кӕнунцӕ, уомӕ (Гал. 6:2). Фал Йесо айдагъ закъӕнттӕ не ’вӕруй. Е ма ни алкедӕр уарзуй ӕма ни алкӕбӕлдӕр тухсуй (Еф. 5:29).

15, 16. Марли ӕма Бенжамини дзурдтӕй ци ес базонӕн?

¹⁵ Хуӕртӕ Киристей ке нимайунцӕ, уой бавдесдзӕнцӕ, ке барӕ ’нцӕ, еци нӕлгоймӕгти разамундмӕ гӕсгӕ ку архайонцӕ, уӕд. Хуӕртӕй беретӕ исарази уодзӕнцӕ, Еугонд Штаттӕй еу хуӕрӕ Марли ци загъта, уой хӕццӕ: «Ӕз устур аргъ кӕнун, Йеговӕ мин бийнонти дӕр ӕма ӕмбурди дӕр ци бунат рахецӕн кодта, уомӕн. Мӕхебӕл дӕр мӕ косун куд нӕ фӕгъгъӕуй, цӕмӕй Йеговӕ ци ӕгъдау ӕрфедар кодта, уой нимайон. Фал мин ци сӕрихецау ес ӕма не ’мбурди ци хестӕр нӕлгоймӕгтӕ ес, уони фӕрци еци фӕдзӕхст ӕнхӕст кӕнун зин нӕй, уомӕн ӕма мӕ нимайунцӕ ӕма мин мӕ хуарз гъуддӕгти туххӕй алкӕддӕр райарфӕ кӕнунцӕ».

¹⁶ Йеговӕ ӕ бийнонти астӕу ци ӕгъдау ӕрфедар кодта, уой ӕнсувӕртӕ хуарз лӕдӕрунцӕ, ӕма уомӕ гӕсгӕ хуӕртӕн аргъ кӕнунцӕ ӕма сӕ нимайунцӕ. Английӕй еу ӕнсувӕр Бенжамин загъта: «Ӕмбурди хуӕртӕ ци дзуӕппитӕ фӕддӕттунцӕ, уонӕй берӕ цидӕртӕ базонун. Удта игъосун кӕнгӕй ӕма Библи ахур кӕнгӕй ци мадзӕлттӕй фӕппайда кӕнунцӕ, уонӕй ӕз дӕр уой фӕсте испайда кӕнун. Хуӕрти хъиамӕтӕн хъӕбӕр устур аргъ кӕнун».

17. Йеговӕ ци ӕгъдау ӕрфедар кодта, уой нимайун цӕмӕн гъӕуй?

¹⁷ Не ’гасдӕр – хуӕртӕ, ӕнсувӕртӕ, бийнонти хестӕртӕ ӕма хестӕр нӕлгоймӕгтӕ – Йеговӕ ци ӕгъдау ӕрфедар кодта, уой ку лӕдӕрӕн ӕма уомӕ гӕсгӕ ку архайӕн, уӕд ӕмбурди уодзӕй фарнӕ. Фал уомӕй ӕхсидзгӕ дӕр ба е ӕй, ӕма уомӕй нӕ уӕларвон Фидӕ Йегови ном кадгин кӕндзиан (Пс. 150:6).