Аци анзи «Гъӕуайгӕнӕн мӕсуг»-и ци статьятӕ адтӕй, уони лӕмбунӕг кастӕ? Цума дӕ бон исуодзӕй аци фарстатӕбӕл дзуапп раттун?

Цӕхуӕн арфӕдзийнӕдтӕй исхайгин уодзиан, Йегови хӕццӕ ку дзорӕн, ку имӕ игъосӕн ӕма ин ӕ менеугутӕбӕл ку сагъӕс кӕнӕн?

Хуарз унаффитӕ хӕсдзиан, арӕхстгундӕр ахургӕнгутӕ исуодзиан, не ’ууӕндундзийнадӕ бафедар кӕндзиан ӕма Йегови никки фулдӕр бауарздзиан (w22.01, 30, 31 фф.).

Цӕмӕн ӕй ӕхсидзгӕ Йеговӕбӕл нӕ зӕрдӕ дарун ӕма, разамунд ке фӕрци дӕттуй, уонӕбӕл ӕууӕндун?

Нур еци рӕстӕг ӕй, цӕмӕй Йеговӕбӕл нӕ зӕрдӕ дарӕн ӕма, хестӕр нӕлгоймӕгти фӕрци ци разамунд дӕттуй, уобӕл ӕууӕндӕн. Уотӕ ку кӕнӕн, уӕд нин устур бӕллӕхи рӕстӕг дӕр зин нӕ уодзӕй разамундмӕ игъосун, ӕнахур нӕмӕ ку кӕса, уӕд дӕр (w22.02, 4–6 фф.).

Изӕд Захарийӕн, «Зоровавели къохи ци урдугбарӕн ес», уой туххӕй ку загъта, уӕд ӕй ци зӕгъун фӕндадтӕй? (Зах. 4:8–10).

Еци цӕстӕбӕлуайӕн Хуцауи адӕнӕн уобӕл дзорӕг адтӕй, ӕма ци ковӕндонӕ кӕнунцӕ, е кӕд хумӕтӕг уодзӕй, уӕддӕр Йегови ӕнхӕст домӕнтӕмӕ гӕсгӕ ке неци гъӕуагӕ уодзӕй (w22.03, 16, 17 фф.).

Нӕ бон куд ӕй дзурдӕй фӕнзуйнаг ун? (1 Тим. 4:12).

Игъосун кӕнгӕй адӕни хӕццӕ уӕзданӕй ӕма фӕлмӕнӕй фӕдздзорӕн; ӕмбурди зӕрдиагӕй фӕззарӕн ӕма дзуӕппитӕ фӕддӕттӕн; еске хӕццӕ ку фӕдздзорӕн, уӕд нӕхе ӕфхуӕрӕн дзубандитӕй фӕххезӕн ӕма иннети нифс дзурдӕй фӕффедар кӕнӕн (w22.04, 6–9 фф.).

Данели 7 сӕри ци цуппар сирдей (паддзахей) туххӕй дзурд цӕуй, етӕ, Раргомади 13:1, 2 ци сирди туххӕй финст ес, уой хӕццӕ ӕмхузӕн цӕмӕй ӕнцӕ?

Раргомади 13 сӕри ци ӕнахур сирди туххӕй дзурд цӕуй, е еу кӕцидӕр дуйнеуон паддзахадӕмӕ нӕ амонуй, зӕгъӕн, Роммӕ, фал историй дӕргъи цидӕриддӕр хецӕуттӕ ӕма хецауӕдтӕ адтӕй, уонӕн се ’гасемӕдӕр (w22.05, 9 ф.).

Нӕ бон куд ӕй бавдесун, Йеговӕ алкӕддӕр рӕстӕй ке фӕййархайуй, уобӕл ке нӕ гурусхӕ кӕнӕн?

Еске нӕ зӕрдихудти ку бацӕуа кенӕ нӕ нихмӕ тӕрегъӕд ку искӕна, уӕд гъуддаг нӕхе къохмӕ райсуни бӕсти, гъуддаг Йегови барӕ бакӕндзиан. Е ӕнӕмӕнгӕй исраст кӕндзӕй, тӕрегъӕдгун адӕн нин ци зӕран ӕрхастонцӕ, уой (w22.06, 10, 11 фф.).

Ӕмбурди кенӕ игъосун кӕнуни фембӕлди фӕсте ка фӕкковуй, еци ӕнсувӕр ӕ зӕрдӕбӕл ци гъӕуама дара?

Кувди медӕг нӕ гъӕуй унаффитӕ дӕттун, удта игъосункӕнуйнӕгтӕ дзорун. Ӕнсувӕр гъӕуама ӕ кувд ма ниддаргъ кӕна, уӕлдайдӕр ба ӕмбурди райдайӕни (Матф. 6:7) (w22.07, 24, 25 фф.).

«Фудгъуддӕгтӕ ка кодта, етӕ... тӕрхон баййафунмӕ» ке райгас уодзӕнцӕ, е куд лӕдӕргӕ ’й? (Иоан. 5:29).

Е уобӕл дзорӕг нӕй, ӕма син сӕ раздӕриккон тӕрегъӕдтӕмӕ гӕсгӕ тӕрхон хаст цӕудзӕй. Киристе син тӕрхон кӕндзӕй, ку райгас уонцӕ, уой фӕсте ци гъуддӕгтӕ кӕндзӕнцӕ, уонӕмӕ гӕсгӕ (w22.09, 18 ф.).

1922 анзи сентябри конгресси ӕнсувӕр Рутерфорд хуӕртӕ ӕма ӕнсувӕрти цӕмӕ баразӕнгард кодта?

Конгресси Сидар-Пойнти (штат Огайо, АЕШ) ӕнсувӕр Рутерфорд загъта: «Йесо Киристе... [ӕй] паддзӕхти Паддзах! Сумах ба айтӕ ӕ минӕвӕрттӕ. Мадта игъосун кӕнтӕ, игъосун кӕнтӕ, игъосун кӕнтӕ Паддзах ӕма ӕ Паддзахади туххӕй!» (w22.10, 3–5 фф.).

Исаййи 30 сӕри куд финст ӕй, уомӕ гӕсгӕ Йеговӕ ӕ лӕггадгӕнгутӕн цӕхуӕн ӕртӕ мадзалей фӕрци ӕнхус кӕнуй?

Аци сӕрӕй бӕрӕг ӕй: 1) нӕ кувдтитӕмӕ нин ке игъосуй ӕма нин дзуапп ке дӕттуй, 2) разамунд нин ке дӕттуй ӕма 3) абони дӕр нин ке арфӕ кӕнуй ӕма нин федӕни дӕр ке райарфӕ кӕндзӕй (w22.11, 9 ф.).

Уотӕ зӕгъӕн цӕмӕн ес, ӕма Псалом 37:10, 11, 29 финст дзурдтӕ айдагъ Соломони рӕстӕгути ке не ’сӕнхӕст ӕнцӕ, фал ма федӕни дӕр ке исӕнхӕст уодзӕнцӕ?

Давиди дзурдтӕй бӕрӕг ӕй, Соломони хецаудзийнади рӕстӕг Израили адӕн куд хуарз цард кодтонцӕ, е. Киристе федӕни дзенети туххӕй ку дзурдта, уӕд 11 стихи дзурдтӕ ӕрхаста (Матф. 5:5; Лук. 23:43) (w22.12, 8–10, 14 фф.).