1. Йегови фӕндон цӕй медӕг ӕй?

 ХУЦАУИ фӕндон уой медӕг ӕй, цӕмӕй Паддзахади туххӕй хуарз хабар ӕгас зӕнхӕбӕл дӕр игъустгонд ӕрцӕуа (Мар. 13:10; 1 Тим. 2:3, 4). Еци гъуддаг гъе уойбӕрцӕбӕл ӕхсидзгӕ ’й, ӕма ин разамунд дӕттунмӕ Йеговӕ исӕвардта ӕ Фурт Киристей. Нӕ бон ӕй федарӕй ӕууӕндун, Йесо аци гъуддаг ке исӕнхӕст кӕндзӕй, цалинмӕ дуйней кӕрон нӕ ралӕууа, уӕдмӕ (Матф. 24:14).

2. Аци статьяй цӕбӕл радзубанди кӕндзиан?

² Аци статьяй радзубанди кӕндзиан, Киристе «ӕууӕнкгун ӕма зундгин» цагъарӕй куд пайда кӕнуй, цӕмӕй нин не ’ууӕндундзийнадӕ федар кӕнунмӕ хуӕруйнаг дӕтта (Матф. 24:45). Уомӕй уӕлдай ма ӕркӕсдзиан, еци цагъари фӕрци ӕ фӕдбӕлдзӕугутӕн разамунд куд дӕттуй, цӕмӕй игъосун кӕнуни гъуддаги архайонцӕ. Удта ма радзубанди кӕндзиан, алке бон дӕр ни куд ӕй Киристейӕн ӕма ӕууӕнкгун цагъарӕн ӕнхус кӕнун.

3. Киристейӕн цӕхуӕн бартӕ лӕвӕрд ӕнцӕ?

³ Киристе игъосун кӕнуни гъуддагӕн разамунд ке дӕттуй, уой кӕцӕй зонӕн? Уӕлӕрвтӕмӕ ку иссудӕй, уомӕй минкъий раздӕр, Галилейи ӕ еузӕрдон фӕдбӕлдзӕугутӕн загъта: «Лӕвӕрд мин ӕнцӕ еугур бартӕ уӕлӕрвти дӕр ӕма зӕнхӕбӕл дӕр». Дӕ гъос ӕрдарай, аци дзурдти хуӕдфӕсте ци загъта, уомӕ: «Мадта цотӕ ӕма мин ӕгас адӕнихӕттитӕй дӕр цӕттӕ кӕнтӕ ахуркӕнуйнӕгтӕ» (Матф. 28:18, 19). Е ба уобӕл дзорӕг ӕй, ӕма Киристейӕн ци бартӕ ес, уомӕ хауй игъосун кӕнуни гъуддагӕн разамунд дӕттун дӕр.

4. Киристе игъосун кӕнуни гъуддагӕн абони дӕр разамунд ке дӕттуй, уой кӕцӕй зонӕн?

⁴ Киристе ӕ фӕдбӕлдзӕугутӕн загъта, цӕмӕй «ӕгас адӕнихӕттитӕй  дӕр» ахуркӕнуйнӕгтӕ цӕттӕ кӕнонцӕ. Удта ма син зӕрдӕ байвардта: «Цалинмӕ аци цардӕвӕрди кӕрон не ’рцӕуа, уӕдмӕ ӕз алли бон дӕр уодзӕн уӕ хӕццӕ» (Матф. 28:20). Аци дзурдтӕй бӕрӕг ӕй, абони дӕр Киристе игъосун кӕнуни гъуддагӕн разамунд ке дӕттуй.

5. Псаломи 110:3 финст дзурдтӕ махбӕл куд ӕнхӕст кӕнунцӕ?

⁵ Кӕрони рӕстӕг игъосунгӕнгутӕ фагӕ ке уодзӕй, уобӕл Киристе нӕ тухстӕй. Зудта ӕй, псаломзаргӕнӕги пахампар-дзурдтӕ ке исӕнхӕст уодзӕнцӕ: «Дӕ тугъди бон дӕ адӕн лӕудзӕнцӕ цӕттӕй» (Пс. 110:3). Кӕд ду дӕр Паддзахади туххӕй хуарз хабар игъосун кӕнис, уӕд уомӕй ӕнхус кӕнис Киристейӕн ӕма ӕууӕнкгун цагъарӕн, удта уомӕй аци пахампарадӕ ӕнхӕст кӕнис. Игъосун кӕнуни гъуддаг размӕ цӕуй, фал хатгай цӕхуӕндӕр зиндзийнӕдтӕбӕл дӕр исӕмбӕлӕн.

6. Хуарз хабар игъосун кӕнгӕй цӕхуӕн зиндзийнӕдтӕбӕл исӕмбӕлӕн?

⁶ Еци зиндзийнӕдтӕй сӕ еу ӕй, Паддзахади туххӕй хуарз хабар ке игъосун кӕнӕн, уой нихмӕ ке цӕунцӕ, е. Зӕгъӕн, раст дин ка ниууагъта, политиктӕ ӕма дини разамонгутӕ ни мӕнгӕттӕ фӕдздзорунцӕ. Нӕ хӕстӕгутӕ, зонгитӕ ӕма ӕмкосгутӕ син сӕ мӕнгӕттӕбӕл ку баууӕндонцӕ, уӕд нин, гӕнӕн ес, ӕма дзордзӕнцӕ, цӕмӕй Йеговӕн мабал лӕггадӕ кӕнӕн, удта игъосун кӕнуни гъуддаги дӕр мабал архайӕн. Еуӕй-еу бӕстити нӕ фӕдбӕл карзӕй фӕззелунцӕ. Берети ниййахӕссунцӕ кенӕ ба ма сӕ ахӕстдони дӕр исбадун кӕнунцӕ. Ӕма уӕхӕн хабӕрттӕ ке цӕуй, е дессаг нӕй, уомӕн ӕма Киристе уотӕ загъта: «Мӕ номи туххӕй [уи] ӕгас адӕн дӕр се ’сӕфт уиндзӕнцӕ» (Матф. 24:9). Мадта ни адӕн се ’сӕфт ке уинунцӕ, е уобӕл дзорӕг ӕй, ӕма мах дӕр Киристей фӕдбӕл цӕуӕн, удта ни Йеговӕ арази ӕй (Матф. 5:11, 12). Мах ӕй зонӕн, адӕни уӕхӕн зундбӕл Сайтан ке ардауй. Фал Киристей нихмӕ ӕ бон неци ӕй! Киристей разамунди фӕрци хуарз хабар ӕгас адӕнихӕттити астӕу игъустгонд цӕуй.

7. Раргомади 14:6, 7 финст дзурдтӕ ке ӕнхӕст кӕнунцӕ, е цӕмӕй бӕрӕг ӕй?

⁷ Игъосун кӕнгӕй ма ци зиндзийнӕдтӕбӕл исӕмбӕлӕн, уонӕй иннӕ ӕй, аллихузи адӕнихӕттитӕй ке ан ӕма аллихузи ӕвзӕгтӕбӕл ке дзорӕн, е. Фал Йесо Киристе апостол Иоаннӕн цӕстӕбӕлуайӕни бавдиста, аллихузи ӕвзӕгтӕ игъосун кӕнуни гъуддагӕн хъори хуасӕ ке нӕ уодзӕнцӕ. (Бакӕсӕ Раргомадӕ 14:6, 7.) Аци цӕстӕбӕлуайӕн куд ӕнхӕст кӕнуй? Мах Паддзахади туххӕй хуарз хабар ӕгас адӕнӕн дӕр игъосун кӕнӕн. Зӕгъӕн, нӕ сайти ци ӕрмӕг ес, е тӕлмацгонд ӕрцудӕй мин ӕвзагемӕй фулдӕрмӕ, ӕма ’й уомӕ гӕсгӕ ӕгас зӕнхӕбӕл цӕрӕг адӕни бон дӕр ӕй кӕсун. Уомӕй уӕлдай ма Разамонӕг совет унаффӕ рахаста, цӕмӕй нин абони адӕни хӕццӕ Библи ахур кӕнунмӕ ци киунугӕ ес, «Радуйтесь жизни сейчас и вечно!», уой 700 ӕвзагемӕй фулдӕрмӕ ратӕлмац кӕнонцӕ. Удта ма хъӕрӕутӕн нӕ публикацитӕ мухургонд цӕунцӕ Брайли шрифтбӕл, удта ма рацӕунцӕ берӕ аллихузи видеороликтӕ къуӕттитӕн. Мадта Библий пахампарӕдтӕ куд ӕнхӕст кӕнунцӕ, уой нӕхе цӕститӕй уинӕн. «Алли ӕвзӕгтӕбӕл дзорӕг» адӕн ахур кӕнунцӕ «кӕдзос ӕвзаг», гъома рӕстдзийнади ӕвзаг (Зах. 8:23; Соф. 3:9). Ӕгас еци гъуддӕгтӕ нин ӕнтӕсунцӕ, нӕ Разамонӕг Йесо Киристе ке ӕй, уой фӕрци.

8. Игъосун кӕнуни гъуддаг нурмӕти цӕхуӕн тиллӕг ӕрхаста?

⁸ Абони Йегови организаций ес аст милиуан адӕймагемӕй фулдӕр ӕма ӕнцӕ 240 бӕстемӕй. Удта ма алли анз дӕр мингай адӕн донаргъуд райсунцӕ. Фал цӕйбӕрцӕ  ан, е уотӕ ӕхсидзгӕ нӕй. Дзӕвгарӕ ӕхсидзгӕдӕр ӕй, нӕ уодигъӕдӕ нӕуӕгмӕ ке ӕййевӕн, е. Беретӕ ни ниууагътонцӕ се ’нӕгъдау цард ӕма ӕнӕхатир гъуддӕгтӕ, удта гъолон некебал кӕнунцӕ ӕма иннӕ адӕнихӕттитӕй се ’сӕфт нӕбал уинунцӕ (Кол. 3:8–10). Уомӕй уӕлдай ма нӕбӕл ӕнхӕст кӕнунцӕ Исаййи 2:4 финст пахампар-дзурдтӕ: «Адӕн... тохунбӕл дӕр нӕбал ахур кӕндзӕнцӕ». Нӕ уагӕ ӕма не ’гъдаумӕ кӕсгӕй берети бафӕндуй Хуцауи организацимӕ ӕрбацӕун. Удта ма уомӕй бӕрӕг ӕй, нӕ Разамонӕг Йесо Киристей фӕдбӕлдзӕугутӕ ке ан (Иоан. 13:35; 1 Пет. 2:12). Ӕгас еци гъуддӕгтӕ нин цӕй фӕрци ӕнтӕсунцӕ? Йесо Киристе нин ке ӕнхус кӕнуй, уой фӕрци.

9. Фӕстаг бӕнтти рӕстӕг ци уодзӕй, уой туххӕй Матфеййи 24:45–47 ци финст ес?

⁹ Бакӕсӕ Матфеййи 24:45–47. Киристе загъта, фӕстаг бӕнтти рӕстӕг «ӕууӕнкгун ӕма зундгин» цагъари ке иснисан кӕндзӕй, цӕмӕй ӕ фӕдбӕлдзӕугутӕн ӕууӕндундзийнадӕ федар кӕнунмӕ хуӕруйнаг дӕтта. Ӕма ’й абони нӕхе цӕститӕй уинӕн, еци цагъар е ’гас хъауритӕй ке архайуй. Нӕ Разамонӕг Киристе пайда кӕнуй исӕрст нӕлгоймӕгти минкъий къуарӕй, цӕмӕй Хуцауи лӕггадгӕнгутӕн ӕма, рӕстдзийнадӕ базонун ке фӕндуй, еци адӕнӕн, ӕууӕндундзийнадӕ федар кӕнунмӕ «хуӕруйнаг афойнадӕбӕл дӕтта». Еци исӕрст киристӕнттӕ не ’ууӕндундзийнадӕн сӕхе хецау нӕ кӕнунцӕ (2 Кор. 1:24). Хуцауи адӕни «хецау ӕма разамонӕгбӕл» нимайунцӕ Киристей (Ис. 55:4).

10. Ӕносон царди надбӕл ислӕуунмӕ дин цӕхуӕн киунугӕ банхус кодта? (Кӕсӕ ма хузтӕмӕ.)

¹⁰ Ӕууӕнкгун цагъар 1919 анзи нисангонд ку ’рцудӕй, уӕдӕй фӕстӕмӕ берӕ киунугутӕ рауагъта, цӕмӕй кӕдзосзӕрдӕ адӕнӕн рӕстдзийнадӕ базонунмӕ банхус кодтайдӕ. Зӕгъӕн, 1921 анзи ӕууӕнкгун цагъар рауагъта  киунугӕ «Арфа Божия». Рӕстӕг цудӕй, ӕма аллихузи нӕуӕг публикацитӕ рацӕуиуонцӕ. Дӕуӕн ба нӕ уӕларвон Фиди базонунмӕ ӕма бауарзунмӕ цӕхуӕн киунугӕ банхус кодта? «Бог верен», «Истина, ведущая к вечной жизни» ӕви «Ты можешь жить вечно в раю на земле»? Кенӕ ба «Познание, ведущее к вечной жизни», «Библийӕй ци ес базонӕн?» кенӕ ба нӕ нӕуӕг киунугӕ «Радуйтесь жизни сейчас и вечно!»? Аци киунугутӕ нин ӕнхус кодтонцӕ Киристей ахуркӕнуйнӕгтӕ цӕттӕ кӕнунмӕ, ӕма си алкӕцидӕр раст ӕ афони рацӕуидӕ.

11. Алкӕмӕндӕр ни ӕхсидзгӕ цӕмӕн ӕй Йегови ӕма Библий туххӕй фулдӕр базонун?

¹¹ Рӕстдзийнадӕ ӕрӕги ка базудта, айдагъ уони нӕ фӕгъгъӕуй архайун, цӕмӕй Йегови ӕма Библий туххӕй фулдӕр базононцӕ. Е не ’гасемӕндӕр ӕхсидзгӕ ’й. Апостол Павел ниффинста: «Хъӕбӕр хуӕруйнаг ба ӕй фӕлтӕрдгун адӕймӕгтӕн». Павел куд загъта, уомӕ гӕсгӕ уой фӕрци нӕ бон уодзӕй, «раст ци ӕй ӕма ци нӕй», уой лӕдӕрун (Дзиуит. 5:14). Аци дуйней ӕгъдауӕн ӕ кой дӕр ке нӕбал ес, е алцӕмӕйдӕр бӕрӕг ӕй. Уой туххӕй Йегови уагӕвӕрдтӕмӕ гӕсгӕ цӕрун алкӕд ӕнцон нӕ фӕууй. Фал Киристе ӕ цӕстӕ даруй, цӕмӕй нин алкӕддӕр уа, не ’ууӕндундзийнадӕ ке фӕрци федар кӕндзӕй, уӕхӕн хуӕруйнаг, ӕма арӕзт фӕууй Хуцауи Дзурд Библибӕл. Ӕууӕнкгун цагъар еци хуӕруйнаг цӕттӕ кӕнуй ӕма ’й иуаруй Киристей разамундмӕ гӕсгӕ.

12. Уотӕ зӕгъӕн цӕмӕн ес, ӕма мах дӕр Киристей хузӕн Хуцауи номӕн устур кадӕ кӕнӕн?

¹² Мах дӕр Киристей хузӕн Хуцауи номӕн устур кадӕ кӕнӕн (Иоан. 17:6, 26). Зӕгъӕн, 1931 анзи нӕ ном раййивтан ӕма Библимӕ гӕсгӕ хуннун райдӕдтан Йегови Ӕвдесӕнтӕ (Ис. 43:10–12). Уомӕй бавдистан, Хуцауи номмӕ уӕлӕнгай цӕстӕй ке нӕ кӕсӕн. Еци анзӕй октябри мӕйӕй фӕстӕмӕ алли «Гъӕуайгӕнӕн мӕсуг»-и ӕндаг цъарӕбӕл дӕр фӕууинӕн адтӕй Йегови  ном. Уомӕй уӕлдай ма, Хуцауи ном Библий «Нӕуӕг дуйней тӕлмац»-и финст ӕрцудӕй, кӕмидӕриддӕр гъӕуама уа, уоми. Уомӕй ци хъӕбӕр хецӕн кӕнӕн, сӕхе киристон ка хонуй, еци аргъауӕнтӕй. Етӕ Йегови ном сӕ Библий тӕлмацтӕй рандӕ кӕнунцӕ.

13. Киристе ӕууӕнкгун ӕма зундгин цагъарӕй ке пайда кӕнуй, уой кӕцӕй зонис? (Иоанни 6:68).

¹³ Киристе ӕууӕнкгун ӕма зундгин цагъарӕй пайда кӕнуй, цӕмӕй зӕнхӕбӕл ӕ фӕдбӕлдзӕугутӕн разамунд дӕтта ӕма адӕнӕн Хуцауи базонунмӕ ӕнхус кӕна. Хуцауи организаци уотӕ конд ке ӕй, уомӕ ду ба ци цӕстӕй кӕсис? Ка ’й зонуй, ду дӕр, апостол Петур Киристейӕн ци дзурдта загъта, уони загътайсӕ. «Кӕмӕ гъӕуама рандӕ уӕн? Дӕумӕ ку ’нцӕ, ӕносон цардмӕ ка кӕнуй, еци дзурдтӕ» (Иоан. 6:68). Нур кӕми адтайсӕ, Йегови Ӕвдесӕнти хӕццӕ ку нӕ базонгӕ адтайсӕ, уӕд? Хуцауи организаций фӕрци нин Киристе алцидӕр дӕттуй, цӕмӕй Йеговӕбӕл нӕ бон уа еузӕрдонӕй байзайун. Уомӕй уӕлдай ма нӕ ахур кӕнуй, цӕмӕй нӕ лӕггади дӕр ӕнтӕстгун уӕн. Удта ма нин амонуй, нӕ бон куд ӕй нӕ уодигъӕдӕ нӕуӕгмӕ ӕййевун, цӕмӕй нӕ бон уа Йегови зӕрдӕ рохс кӕнун (Еф. 4:24).

14. Йегови организаций ке лӕггадӕ кӕнис, е дин коронавируси пандемийи рӕстӕг ци пайда ӕрхаста?

¹⁴ Киристе нин зин рӕстӕгути дӕр хуарз разамунд ке раттуй, е уӕлдай хъӕбӕрдӕр рабӕрӕг ӕй коронавируси пандемийи рӕстӕг. Зӕгъӕн, аци дуйней ӕй беретӕ зонгӕ дӕр нӕ кодтонцӕ, куд ӕма син ци кӕнгӕ ӕй, уой. Махӕн ба Киристе комкоммӕ амундтӕ равардта, цӕмӕй нӕ багъӕуай кодтайдӕ. Загътонцӕ нин, цӕмӕй маскитӕ дарӕн ӕма кӕрӕдземӕ хӕстӕг ма цӕуӕн. Хестӕр нӕлгоймӕгти ба баразӕнгард кодтонцӕ, цӕмӕй ӕмбурди хуӕртӕ ӕма ӕнсувӕрти иронхуати  ма уадзонцӕ, удта батухсонцӕ, цӕмӕй маци гъӕуагӕ уонцӕ ӕма се ’ууӕндундзийнадӕ уа федар (Ис. 32:1, 2). Разамонӕг советӕй ӕнсувӕртӕ ба нин фӕстаг хабӕрттӕ радзориуонцӕ ӕма нин нӕ нифс бафедар кӕниуонцӕ.

15. Пандемийи рӕстӕг нӕ организаци ӕмбурдтӕ ӕма игъосун кӕнуни гъуддаги фӕдбӕл цӕхуӕн разамунд равардта ӕма е цӕхуӕн пайда ӕрхаста?

¹⁵ Пандемийи рӕстӕг ма нин комкоммӕ амундтӕ адтӕй, не ’мбурдтӕ куд гъӕуама уадзӕн ӕма игъосун кӕнуни гъуддаги куд гъӕуама архайӕн, уой туххӕй. Еци фӕдбӕл не ’мбурдтӕ ӕма конгресстӕ видеосвязӕй уадзун райдӕдтан. Игъосун ба кодтан телефонӕй кенӕ финстӕгути фӕрци, ӕма нин Йеговӕ дӕр райарфӕ кодта. Берӕ бӕстити игъосунгӕнгути нимӕдзӕ дзӕвгарӕ фулдӕр фӕцӕй. Кӕбӕлдӕрти ба игъосун кӕнгӕй дзӕбӕх цаутӕ ӕрцудӕй. (Кӕсӕ рамкӕ « Йеговӕ игъосун кӕнуни гъуддагӕн арфӕ кӕнуй».)

16. Нӕ бон цӕбӕл ӕй федарӕй ӕууӕндун?

¹⁶ Ка ’й зонуй, кӕмӕдӕрти уотӕ кастӕй, ӕма нӕ организаци пандемийи хабар ӕгӕр ниддессаг кодта. Фал ӕй еу хаттӕй иннӕ хатмӕ балӕдӕрианӕ, ци амундтӕ нин дӕттунцӕ, етӕ раст ке ’нцӕ (Матф. 11:19). Мадта нӕ бон ӕй федарӕй ӕууӕндун, федӕни цийфӕнди хабӕрттӕ ма ’рцӕуа, уӕддӕр Йеговӕ ӕма ӕ уарзон Фурт нӕ фарсмӕ ке уодзӕнцӕ. (Бакӕсӕ Дзиуиттӕгтӕмӕ 13:5, 6.)

17. Киристе нӕ Разамонӕг ке ӕй, уой туххӕй ци гъуди кӕнис?

¹⁷ Махӕн хъӕбӕр ӕхцӕуӕн ӕй, Йесо Киристе нӕ Разамонӕг ке ӕй. Кӕд аллихузи адӕнихӕттитӕй ӕн ӕма аллихузи ӕвзӕгтӕбӕл дзорӕн, уӕддӕр нӕ организаций ес дессаги еудзийнадӕ. Ӕууӕндундзийнадӕ федаргӕнӕн хуӕруйнаг нин фагӕй фулдӕр ес, удта ни алкедӕр игъосун кӕнуни гъуддагмӕ дзӕбӕх цӕттӕ ӕй. Уомӕй уӕлдай ма ни алкедӕр архайуй, цӕмӕй ӕ уодигъӕдӕ хуӕздӕрӕрдӕмӕ ӕййева ӕма иннети уодуӕлдай уарзтӕй уарза. Мадта дессаг нӕй, нӕ Разамонӕг Йесо Киристейӕй сӕрустур ке ан, е!