1. Нӕ бон ковун ке ӕй, уомӕ цӕхуӕн цӕстӕй гъӕуама кӕсӕн?

 ЙЕГОВӔ нӕ устур кадӕй исхайгин кодта – нӕ бон имӕ ӕй ковун, арв ӕма зӕнхӕ Сфӕлдесӕгмӕ. Нӕ бон имӕ ӕй цийфӕнди ӕвзагбӕл дӕр ковун ӕма нӕ зӕрди цидӕриддӕр ес, уой ин дзорун. Удта имӕ ковуни размӕ нӕхе рагацау финсун нӕ фӕгъгъӕуй. Кӕмифӕнди ма уӕн, сӕйгӕдони кенӕ ахӕстдони, уӕддӕр нӕ нӕ уарзӕгой уӕларвон Фидӕ фегъосдзӕй. Мах си уой туххӕй хъӕбӕр боз ан.

2. Паддзах Давид кувдӕн ке аргъ кодта, е цӕмӕй бӕрӕг ӕй?

² Паддзах Давид дӕр кувдӕн хъӕбӕр аргъ кодта. Ӕ псаломтӕй еуеми Йеговӕн уотӕ зардта: «Мӕ кувд дин ӕхцӕуӕн уӕд боди смаги хузӕн» (Пс. 141:1, 2). Давиди рӕстӕгути бодӕй саугинтӕ пайда кодтонцӕ Йеговӕн лӕггадӕ кӕнунмӕ, ӕма еци бодӕ кӕнгӕй уӕлдай лӕмбунӕг фӕууиуонцӕ (Рац. 30:34, 35). Давид боди кой дзӕгъӕли не ’скодта. Ӕвӕдзи, ӕ уӕларвон Фидӕн ци зӕгъдзӕй, уобӕл рагацау лӕмбунӕг расагъӕс кӕнидӕ. Дзубанди дӕр ибӕл нӕййес, мах дӕр фӕндуй, цӕмӕй нӕ кувдтитӕ Йеговӕн ӕхцӕуӕн уонцӕ.

3. Ковгӕй нӕ зӕрдӕбӕл ци гъӕуама дарӕн ӕма цӕмӕн?

³ Ковгӕ ку фӕккӕнӕн, уӕд нӕ зӕрдӕбӕл гъӕуама дарӕн Йегови хӕццӕ ке дзорӕн. Ӕма нӕ дзурдтӕй гъӕуама бӕрӕг уа, ке ’й нимайӕн, е. Исай, Йезекил, Данел ӕма Иоанн ци цӕстӕбӕлуайӕнтӕ фӕууидтонцӕ, уони нӕ зӕрдӕбӕл ӕрлӕуун кӕнӕн. Кӕд еци цӕстӕбӕлуайӕнтӕ фӕйнӕхузи адтӕнцӕ, уӕддӕр си еумӕйагӕй дӕр цидӕр адтӕй. Алли цӕстӕбӕлуайӕни дӕр Хуцауи кадӕ адӕймаги деси бафтауидӕ. Исай загъта: «Е бадтӕй бӕрзонд ӕма кадгин паддзахбадӕнбӕл» (Ис. 6:1–3). Йезекил ба ӕ цӕстӕбӕлуайӕни фӕууидта Йегови ӕ уӕларвон уӕрдунбӕл  бадгӕй, ӕ алливарс ка адтӕй, еци рохс ба адтӕй арвӕрдуни хузӕн (Йез. 1:26–28). Данел ба фӕууидта, «рагидзамантӕй фӕстӕмӕ Ка ӕй», уой. Ӕ дарӕс адтӕй мети хузӕн уорс, ӕ паддзахбадӕн ба адтӕй пеллон арти хузӕн (Дан. 7:9, 10). Иоанн Йегови фӕууидта паддзахбадӕнбӕл ӕ «алливарс ба адтӕй арвӕрдунӕ, изумруди хузӕн» (Рарг. 4:2–4). Йеговӕ куд кадгин ӕй, уобӕл ку фӕссагъӕс кӕнӕн, уӕд никки хъӕбӕрдӕр фӕййаргъ кӕнӕн, нӕ бон имӕ ковун ке ӕй, уомӕн. Уомӕй уӕлдай ма нӕ зӕрдӕбӕл фӕддарӕн, куд ӕхсидзгӕ ’й, цӕмӕй нӕ дзурдтӕй бӕрӕг уа, Йегови ке нимайӕн, е. Фал цӕй туххӕй гъӕуама ковӕн?

4. Киристе ковун ку ахур кодта, уӕд фиццагидӕр цӕй кой искодта, уомӕй цӕбӕл ахур кӕнӕн? (Матфеййи 6:9, 10).

⁴ Бакӕсӕ Матфеййи 6:9, 10. Киристе адӕни хонхбӕл ку ахур кодта, уӕд син байамудта, ковун куд гъӕуй, цӕмӕй сӕ кувдтитӕ Хуцауи зӕрдӕмӕ цӕуонцӕ. Киристе уотӕ ку загъта, «ковгӕ ба кӕнтӕ атӕ», зӕгъгӕ, уӕд фиццагидӕр Хуцауи фӕндони хӕццӕ баст ци ӕй, уой кой искодта: цӕмӕй Хуцауи ном исрохс уа, цӕмӕй, Хуцау е ’гас знӕгти дӕр ке фӕрци фесафдзӕй, еци Паддзахадӕ ӕрцӕуа, ӕма цӕмӕй федӕни адӕни арфӕдзийнӕдтӕй исхайгин кӕна. Еци гъуддӕгтӕбӕл ковун ку нӕ иронх кӕнӕн, уӕд ӕй ӕвдесдзиан, Йегови фӕндонмӕ цийфӕнди цӕстӕй ке нӕ кӕсӕн.

5. Нӕхе ци тухсун кӕнуй, уой туххӕй ку фӕкковӕн, уӕд нӕ Йеговӕ фегъосуй?

⁵ Уой фӕсте Киристе бавдиста, дӕхе ци гъӕуй ӕма дӕ ци тухсун кӕнуй, уой туххӕй ковун дӕр раст ке ӕй. Зӕгъӕн, нӕ бон ӕй Йеговӕй корун, цӕмӕй нин бони фагӕ хуӕруйнаг ратта, нӕ тӕрегъӕдтӕ нин хатир кӕна, цӕмӕй нӕ рӕдуд къахдзӕфӕй ӕма фидбилизӕй багъӕуай кӕна (Матф. 6:11–13). Уӕхӕн цӕбӕлдӕрти ке фӕкковӕн, уомӕй ӕй бавдесӕн, нӕ цард Хуцауӕй кӕнгӕ ке ӕй, уой ке лӕдӕрӕн ӕма нӕ ке фӕндуй, цӕмӕй ни арази уа.

6. Киристе ковгӕй ци дзурдтӕ загъта, мах дӕр гъӕуама еци дзурдтӕ дзорӕн? Ба ’й лӕдӕрун кӕнӕ.

⁶ Киристей уотӕ зӕгъун нӕ фӕндадтӕй, ӕма, е ци дзурдтӕ загъта, ӕ фӕдбӕлдзӕугутӕ дӕр гъӕуама еци дзурдтӕ дзоронцӕ.  Киристе ӕхуӕдӕг ку фӕкковидӕ, уӕд фӕдздзоридӕ, еци рӕстӕг ӕй ци тухсун кӕнидӕ, уой туххӕй (Матф. 26:39, 42; Иоан. 17:1–26). Мах бон дӕр ӕй, ци нӕ тухсун кӕнуй, уой туххӕй ковун. Зӕгъӕн, унаффӕ рахӕссун нӕ ку фӕгъгъӕуй, уӕд ӕхсидзгӕ фӕууй, цӕмӕй Йеговӕй разамунд корӕн (Пс. 119:33, 34). Ести нин ку баихӕс кӕнонцӕ, удта хуарз уайдӕ, цӕмӕй Йеговӕй зунд корӕн еци ихӕс, куд хуӕздӕр ӕй, уотӕ исӕнхӕст кӕнунмӕ (Ӕмб. 2:6). Ниййергути бон ӕй сувӕллӕнтти туххӕй ковун, сувӕллӕнтти бон ба ӕй ниййергути туххӕй ковун. Удта ма гъӕуама ковӕн, Библи ке хӕццӕ ахур кӕнӕн ӕма кӕмӕн игъосун кӕнӕн, уони туххӕй дӕр. Фал ковгӕ ку фӕккӕнӕн, уӕд гъӕуама айдагъ коргӕ ма кӕнӕн.

7. Ковгӕй Йегови кадгин кӕнун ӕхсидзгӕ цӕмӕн ӕй?

⁷ Ӕхсидзгӕ ма ӕй, Йегови нӕ кувдтити кадгин кӕнун дӕр. Уой хузӕн кади аккаг ӕндӕр неке ӕй. Йеговӕ ӕй «хӕларзӕрдӕ» ӕма «цӕттӕ хатир кӕнунмӕ». Е ӕй «фӕлмӕнзӕрдӕ ӕма тӕрегъӕдгӕнагӕ Хуцау, мӕстгун кӕнунмӕ тагъд нӕ кӕнуй ӕнӕкӕрон ӕй е ’новуд уарзт» (Пс. 86:5, 15). Мадта ӕцӕгӕйдӕр, Йеговӕ уой аккаг ӕй, цӕмӕй ӕй кадгин кӕнӕн ӕ менеугутӕ ӕма ӕ гъуддӕгти туххӕй.

8. Йеговӕн нӕ бон цӕй туххӕй ӕй арфӕ кӕнун? (Псалом 104:12–15, 24).

⁸ Нӕ бон ма ӕй Йеговӕн арфӕ кӕнун ӕ берӕ аллихузи лӕвӕртти туххӕй. Зӕгъӕн, боз си ан рӕсугъд дидингути туххӕй, хуӕрзадӕ хуӕруйнӕгти туххӕй ӕма нӕ хуарз ӕмбӕлтти туххӕй дӕр. Ани дӕр ӕма нин берӕ ӕндӕр лӕвӕрттӕ дӕр Йеговӕ равардта, цӕмӕй цардбӕл цийнӕ кӕнӕн. (Бакӕсӕ Псалом 104:12–15, 24.) Фал тӕккӕ хъӕбӕрдӕр ба Йеговӕй боз ан, ӕууӕндундзийнадӕ федаргӕнӕн хуӕруйнаг нин ке ес, удта нин федӕнӕй нифс ке балӕвар кодта, уой туххӕй дӕр.

9. Ци нин банхус кӕндзӕй, цӕмӕй ма иронх кӕнӕн Йеговӕн арфӕ кӕнун? (1 Фессалоникӕгтӕмӕ 5:17, 18).

⁹ Раст зӕгъгӕй ни еуӕй-еухатт феронх уй, Йеговӕн райарфӕ кӕнун. Кӕд дӕуӕн дӕр уотӕ рауайуй, уӕд дӕ бон ци ӕй бакӕнун? Йеговӕй ци фӕккорис, уой дӕхемӕ рафинсисӕ, цӕмӕй ӕй уинай, куд дин исдзуапп  кӕнуй, уой. Ӕма ин уой фӕсте ба райарфӕ кӕнисӕ. (Бакӕсӕ 1 Фессалоникӕгтӕмӕ 5:17, 18.) Расагъӕс кӕнай, ӕхцӕуӕн дин нӕ фӕууй, естӕй туххӕй дин ку райарфӕ кӕнунцӕ, уӕд? Йеговӕн дӕр гъе уотӕ ӕхцӕуӕн фӕууй, райарфӕ кӕнун ни ку нӕ феронх уй, уӕд (Кол. 3:15). Йеговӕн ма еу ӕхсидзгӕ гъуддаги туххӕй дӕр гъӕуама арфӕ кӕнӕн.

10. Йеговӕ Киристей зӕнхӕмӕ ке рарвиста, уой туххӕй ин цӕмӕн гъӕуама арфӕ кӕнӕн? (1 Петури 2:21).

¹⁰ Бакӕсӕ 1 Петури 2:21. Ӕхсидзгӕ ма ӕй, цӕмӕй Йеговӕн арфӕ кӕнӕн ӕ уарзон Фурти ке рарвиста, цӕмӕй нӕ ахур кӕна. Киристей царди хабӕрттӕ ку фӕккӕсӕн, уӕд нӕ уӕларвон Фиди дӕр хуӕздӕр базонӕн ӕма ’й фӕллӕдӕрӕн, ӕ зӕрдӕ рохс кӕнун нӕ бон куд ӕй, уой. Кӕд нӕ фӕндуй, цӕмӕй Йегови хӕццӕ фӕрнӕй цӕрӕн ӕма е ’мбӕлттӕ уӕн, уӕд гъӕуама Киристей нивондбӕл ӕууӕндӕн (Ром. 5:1).

11. Йеговӕмӕ Киристей номӕй цӕмӕн фӕкковӕн?

¹¹ Мах Йеговӕй хъӕбӕр боз ан, ӕ Фурти номӕй имӕ нӕ бон ковун ке ӕй, уой туххӕй. Киристей номӕй имӕ ку фӕкковӕн, уӕд нин нӕ кувд фегъосуй ӕма нин дзуапп дӕр уой фӕрци раттуй. Киристе уой туххӕй уотӕ загъта: «Мӕ номӕй цийфӕнди ма ракорайтӕ,– искӕндзӕн уин ӕй, цӕмӕй Фурт искадгин кӕна Фиди» (Иоан. 14:13, 14).

12. Киристей нивонди туххӕй ма никкидӕр боз цӕмӕн ан?

¹² Йеговӕ нин Киристей нивонди фӕрци нӕ тӕрегъӕдтӕ хатир кӕнуй. Библий финст ӕй, «махӕн ес Цитгин Хуцауи паддзахбадӕни рахес фарс ка ӕрбадтӕй, уӕхӕн хестӕр саугин», зӕгъгӕ (Дзиуит. 8:1). Уомӕй уӕлдай ма Библи Киристей хонуй не ’нхусгӕнӕг нӕ Фиди рази (1 Иоан. 2:1). Йеговӕй хъӕбӕр боз ан, уӕхӕн фӕлмӕнзӕрдӕ Хестӕр саугини нин ке исӕвардта. Е нин нӕ гъӕндзийнӕдтӕ хуарз лӕдӕруй, удта мах туххӕй Хуцауӕн «фӕллигъстӕ кӕнуй» (Ром. 8:34; Дзиуит. 4:15). Ӕнхӕстдзийнадӕй уотӕ идард ан, ӕма ӕнӕ Киристей нивондӕй нӕ бон ковун дӕр н’ адтайдӕ. Мах ӕй лӕдӕрӕн, Йеговӕ ӕ Фурти нивондӕн ке равардта, е устур лӕвар ке ӕй ӕма ин ӕй бафедун нӕ бон некӕд исуодзӕй!

13. Киристе ӕ ахуркӕнуйнӕгти ке уарзуй, уой ӕ мӕлӕти размӕ еци ӕхсӕвӕ куд бавдиста?

¹³ Ӕ мӕлӕти размӕ еци ӕхсӕвӕ Киристе ӕ ахуркӕнуйнӕгти туххӕй кувта ӕма Хуцауӕй курдта, цӕмӕй сӕ «Фидбилизӕй гъӕуай кӕна» (Иоан. 17:15). Кӕд еци ӕхсӕвӕ берӕ зинтӕ гъӕуама бавзурстайдӕ, уӕддӕр ӕхе сагъӕс нӕ кодта, фал ӕ апостолтӕбӕл тухстӕй. Уомӕй рабӕрӕг ӕй, куд берӕ сӕ уарзта, е.

14. Хуӕртӕ ӕма ӕнсувӕрти ке уарзӕн, е цӕмӕй бӕрӕг уодзӕй?

¹⁴ Мах дӕр фӕндуй Киристей хузӕн архайун, ӕма уомӕ гӕсгӕ айдагъ нӕхе сагъӕс нӕ фӕккӕнӕн. Арӕх фӕкковӕн нӕ хуӕртӕ ӕма ӕнсувӕрти туххӕй, ӕма уомӕй ӕнхӕст кӕнӕн Киристей фӕдзӕхст: «Уӕ кӕрӕдзей уарзетӕ» (Иоан. 13:34). Йеговӕн хъӕбӕр ӕхцӕуӕн фӕууй, нӕ хуӕртӕ ӕма ӕнсувӕрти ке уарзӕн ӕма сӕбӕл ке тухсӕн, е. Нӕ хуӕртӕ ӕма ӕнсувӕрти туххӕй ке ковӕн, е син, ка ’й зонуй, устур пайда фӕууодзӕй, уомӕн ӕма Библий уотӕ финст ӕй: «Рӕстгӕнӕги зӕрдиаг кувдӕн устур хъаурӕ ес» (Иак. 5:16).

15. Хуӕртӕ ӕма ӕнсувӕрти туххӕй ковун ӕхсидзгӕ цӕмӕн ӕй?

¹⁵ Хуӕртӕ ӕма ӕнсувӕртӕ берӕ зиндзийнӕдтӕбӕл ӕмбӕлунцӕ. Уомӕ гӕсгӕ  ӕхсидзгӕ фӕууй, цӕмӕй уони туххӕй ковӕн. Зӕгъӕн, кадӕр си ӕрдзон бӕллӕхи бахаудтӕй, кӕмидӕр тугъд цӕуй, кедӕр фӕдбӕл ба карзӕй зелунцӕ, кадӕр ба нези хӕццӕ тох кӕнуй кенӕ ба ӕндӕрхузи зиндзийнӕдтӕбӕл ӕмбӕлуй. Уомӕй уӕлдай ма ӕхсидзгӕ ’й ковун, иннетӕн ӕнхус кӕнунмӕ ӕхебӕл ка нӕ ауӕрдуй, еци хуӕртӕ ӕма ӕнсувӕрти туххӕй. Ӕвӕдзи си кедӕрти дӕхуӕдӕг дӕр зонис. Дӕ бон н’ адтайдӕ еци хуӕртӕ ӕма ӕнсувӕрти туххӕй номдарӕй ковун? Уотӕ ку кӕнӕн, уӕд бӕрӕг уодзӕй, ӕцӕгӕйдӕр сӕ ке уарзӕн.

16. Ӕмбурди разамунд ка дӕттуй, уони туххӕй цӕмӕн гъӕуама ковӕн?

¹⁶ Ӕмбурди разамунд ка дӕттуй, еци ӕнсувӕртӕ дӕр хъӕбӕр боз фӕуунцӕ, уони туххӕй ку фӕкковӕн, уӕд. Ӕнӕ уомӕй син дзӕвгарӕ зиндӕр адтайдӕ сӕ ихӕстӕ ӕнхӕст кӕнун. Апостол Павел уой туххӕй ниффинста: «Коветӕ мӕн туххӕй дӕр, цӕмӕй мин Хуцау банхус кӕна ӕма мӕ бон уа сӕребарӕй игъосун кӕнун, хуарз хабари сосӕгдзийнадӕ адӕнӕн куд ӕргом кӕнон» (Еф. 6:19). Павели хузӕн уодуӕлдай ка ’й, уӕхӕн ӕнсувӕртӕ абони дӕр берӕ ес. Еци ӕнсувӕрти ке уарзӕн, е бӕрӕг уодзӕй, Йеговӕй ку корӕн, цӕмӕй син сӕ лӕггадӕн арфӕ кӕна.

17, 18. Цӕхуӕн уавӕрти нин фӕззӕгъунцӕ иннети рази раковун ӕма нӕ зӕрдӕбӕл ци гъӕуама дарӕн?

¹⁷ Еуӕй-еухатт нин фӕззӕгъунцӕ, цӕмӕй иннети рази раковӕн. Зӕгъӕн, еу хуӕрӕ инней ӕ Библий ахурмӕ фӕххудта ӕма ин загъта, цӕмӕй ракова. Фал, гӕнӕн ес, ӕма еци хуӕрӕ адӕймаги нӕ зонуй ӕма ’й, ӕвӕдзи, бафӕнддзӕй Библий ахури фӕсте раковун. Уотемӕй ин уодзӕй рӕстӕг, цӕмӕй балӕдӕра, еци адӕймаги туххӕй ковгӕй ци зӕгъа, уой.

¹⁸ Еуӕй-еухатт ӕнсувӕрӕн баихӕс кӕнунцӕ игъосун кӕнуни фембӕлди кенӕ ӕмбурди раковун. Уӕд ӕ зӕрдӕбӕл ци гъӕуама дара? Гъӕуама си иронх ма уа, адӕн цӕй туххӕй ӕрӕмбурд ӕнцӕ, е. Уомӕй уӕлдай ма кувди медӕг нӕ гъӕуй унаффитӕ дӕттун, удта игъосункӕнуйнӕгтӕ дзорун. Кувдӕн ӕма зарӕн арӕхдӕр фондз минуттемӕй ӕндӕр лӕвӕрд нӕ фӕууй. Е ба уобӕл дзорӕг ӕй, ӕма ци ӕнсувӕр  фӕкковуй, е гъӕуама ӕ кувд ма ниддаргъ кӕна, уӕлдайдӕр ба ӕмбурди райдайӕни (Матф. 6:7).

19. Ци нин банхус кӕндзӕй, цӕмӕй Йегови тӕрхони бонмӕ цӕттӕ уӕн?

¹⁹ Йегови бон куд хӕстӕгдӕр кӕнуй, уотӕ имӕ никки ӕхсидзгӕдӕр ӕй ӕдзох ковун. Киристе загъта: «Мадта ма бафунӕй уотӕ. Ӕдзохдӕр зӕрдиагӕй коветӕ, цӕмӕй уӕ бон бауа, ӕрцӕуйнаг ци ӕй, уони сӕрти рахезун» (Лук. 21:36). Ӕдзох Йеговӕмӕ ку ковӕн, уӕд не ’ууӕндундзийнадӕ федар уодзӕй ӕма тӕрхони бонмӕ цӕттӕ уодзиан.

20. Нӕ кувдтитӕ Йеговӕн боди смаги хузӕн ӕхцӕуӕн кӕд уодзӕнцӕ?

²⁰ Аци статьяй ци базудтан? Ӕхсидзгӕ ’й, цӕмӕй, нӕ бон ковун ке ӕй, уомӕн аргъ кӕнӕн. Фиццагидӕр гъӕуама ковӕн, Йегови фӕндони хӕццӕ баст ци ӕй, уой туххӕй. Удта гъӕуама Хуцауӕй боз уӕн ӕ Фурти туххӕй ӕма ӕ Паддзахади туххӕй. Уомӕй уӕлдай ма гъӕуама нӕ хуӕртӕ ӕма ӕнсувӕрти туххӕй дӕр ковӕн. Нӕ бон ма ӕй Йеговӕй корун, цӕрунмӕ нӕ ци гъӕуй, уой, удта цӕмӕй не ’ууӕндундзийнадӕ федар уа. Йеговӕн кувди ци дзордзиан, уобӕл рагацау ку сагъӕс кӕнӕн, уӕд е уобӕл дзорӕг уодзӕй, ӕма еци лӕварӕн аргъ кӕнӕн. Уотӕ ку кӕнӕн, уӕд нӕ кувдтитӕ Йеговӕн уодзӕнцӕ боди смаги хузӕн ӕхцӕуӕн (Ӕмб. 15:8).