1, 2. Раргомади киунугӕмӕ уӕлдай лӕмбунӕг ӕркӕсун хуарз цӕмӕн адтайдӕ?

 ДА ЦӔСТИТӔБӔЛ рауайун кӕнӕ, цума кедӕр хузти альбоммӕ кӕсис. Уӕд еу сифӕ рахатис, уӕд иннӕ. Фал еци хузтӕбӕл ци адӕн ес, уонӕй неке фӕсмӕрис. Уӕдмӕ си еу хузӕмӕ ӕрлӕмбунӕг дӕ, уомӕн ӕма си дӕхе фӕууидтай. Гъема сагъӕсти рандӕ дӕ аци хузӕ кӕд ӕма кӕми ист адтай, удта дӕ фарсмӕ ци адӕн ес, етӕ ка ’нцӕ. Ӕвӕдзи, ӕгас альбомӕй аци хузӕ ӕгасемӕй хъӕбӕрдӕр нигъгъуди кӕндзӕнӕ.

² Раргомади киунугӕ дӕр ӕнгъезуй рабарун гъе уӕхӕн хузи хӕццӕ. Цӕмӕн? Тӕккӕ минкъийдӕр дууӕ гъуддагей туххӕй. Фиццагидӕр уомӕн, ӕма махӕн финст ӕрцудӕй. Еци киунугӕ уӕхӕн дзурдтӕй райдайуй: «Ами ци хабӕрттӕ финст ес, уони Хуцау раргом кодта Йесо Киристей фӕрци, цӕмӕй ӕ цагъартӕн бавдеса, тагъд рӕстӕги цитӕ гъӕуама ӕрцӕуа, уони» (Рарг. 1:1). Мадта зӕгъӕн ес, ӕма аци киунугӕ ӕгас адӕнӕн нӕй, фал ӕ цард Хуцауӕн ка иснивонд кодта, уонӕн. Хуцауи адӕн ке ан, уомӕ гӕсгӕ нӕмӕ дессаг нӕ кӕсуй, еци киунуги ци пахампарӕдтӕ ес, етӕ куд ӕнхӕст кӕнунцӕ, уоми мах дӕр ке архайӕн. Ӕндӕр дзурдтӕй, еци хузӕбӕл нӕ бон ӕй нӕхе фӕууинун.

3, 4. Раргомади киунуги финст пахампарӕдтӕ ӕнхӕст кӕнун кӕд райдӕдтонцӕ ӕма е махӕн цӕбӕл дзорӕг ӕй?

³ Дуккаг гъуддаг ба баст ӕй, Раргомади киунуги финст пахампарӕдтӕ ӕнхӕст кӕнун кӕд райдӕдтонцӕ, уой хӕццӕ. Апостол Иоанн загъта, еци киунуги финст хабӕрттӕ ӕнхӕст кӕнун ке райдӕдтонцӕ «Хецау Йесой бони» (Рарг. 1:10). Апостол Иоанн Раргомади киунугӕ ниффинста нӕ эри 96 анзи,  «Хецау Йесой бонмӕ» ма берӕ рӕстӕг ку гъудӕй, уӕд (Матф. 25:14, 19; Лук. 19:12). Пахампарӕдтӕмӕ гӕсгӕ еци бон ралӕудтӕй 1914 анзи, Йесо Киристе уӕлӕрвти Паддзах ку иссӕй, уӕд. Ӕма гъе уӕдӕй фӕстӕмӕ, Хуцауи адӕнмӕ ка хауй, еци пахампарӕдтӕ ӕнхӕст кӕнун райдӕдтонцӕ. Мадта нур ци рӕстӕг цӕрӕн, е ӕй «Хецау Йесой бон»!

⁴ Мах цӕрӕн хъӕбӕр ӕхсидзгӕ рӕстӕги. Ӕма нӕ уомӕ гӕсгӕ уӕлдай лӕмбунӕг ӕркӕсун гъӕуй Раргомади 1:3 ци финст ес, уомӕ: «Амондгун ӕй, аци пахампар-дзурдтӕ гъӕрӕй ка кӕсуй, е, удта сӕмӕ ка игъосуй ӕма си ци финст ес, уони дӕр ка ӕнхӕст кӕнуй, етӕ дӕр, уомӕн ӕма нисангонд рӕстӕг ӕрхӕстӕг ӕй». Дӕ гъос ӕрдарай: аци пахампар-дзурдтӕ гъӕуй гъӕрӕй кӕсун, игъосун сӕмӕ ӕма сӕ ӕнхӕст кӕнун. Гъӕйдӕ мадта, уобӕл лӕмбунӕгдӕр радзорӕн.

5. Раргомади киунугӕй куд зиннуй, Йеговӕ цийфӕнди цӕстӕй ке нӕ кӕсуй, куд ин лӕггадӕ кӕнӕн, уомӕ?

⁵ Раргомади киунуги тӕккӕ фиццаг сӕрӕй дӕр бӕрӕг ӕй, Йесо Киристе хуарз ке зонуй, Хуцауи адӕни астӕу ци хабӕрттӕ цӕуй, уой (Рарг. 1:12–16, 20; 2:1). Е хуарз зиннуй, Азий авд ӕмбурдемӕн ци загъта, уомӕй. Киристе си алкӕмӕндӕр комкоммӕ загъта, ци кӕнун сӕ гъӕуй, цӕмӕй син Хуцау сӕ лӕггадӕй арази уа. Ци унаффитӕ син равардта, етӕ абони Хуцауи лӕггадгӕнгутӕй ӕгасемӕдӕр хаунцӕ. Е махӕн цӕбӕл дзорӕг ӕй? Йесо Киристе ӕй хъӕбӕр хуарз зонуй, не ’ууӕндундзийнадӕ цӕхуӕн уавӕри ӕй, уой. Е ӕй нӕ Разамонӕг ӕма нӕ гъӕуай кӕнуй, удта си римӕхст неци ӕй. Уомӕй хуӕздӕр ӕй неке зонуй, ци гъӕуама кӕнӕн, цӕмӕй Хуцауи хуарзӕнхӕй ма фенӕхай уӕн. Гъӕйдӕ мадта Киристей фӕдзӕхститӕй еуӕй-еуетӕмӕ ӕркӕсӕн.

6. а) Раргомади 2:3, 4 куд финст ӕй, уомӕ гӕсгӕ Киристе Ефеси киристӕнттӕн цӕй туххӕй бауайдзӕф кодта? б) Киристей дзурдтӕ махӕн цӕбӕл дзорӕг ӕнцӕ?

⁶ Бакӕсӕ Раргомадӕ 2:3, 4. Йегови райдайӕни куд уарзтай, еци уарзт ӕруазал ун ма бауадзӕ. Киристей дзурдтӕй бӕрӕг ӕй, Ефеси ӕмбурдтӕ Хуцауӕн фӕндфедарӕй ке лӕггадӕ кодтонцӕ, кӕд аллихузи зиндзийнӕдтӕбӕл ӕмбалдӕнцӕ, уӕддӕр. Фал сӕмӕ райдайӕни ци уарзондзийнадӕ адтӕй, уой ба фесафтонцӕ. Уомӕ гӕсгӕ сӕ гъудӕй еци уарзт нӕуӕгӕй сӕ реуи иссодзун кӕнун, кенӕ ба син Йеговӕ сӕ лӕггадӕй арази нӕбал адтайдӕ. Е махӕн цӕбӕл дзорӕг ӕй? Мах дӕр гъӕуама Хуцауӕн лӕггадӕ кӕнгӕй федар уӕн, фал айдагъ е фагӕ нӕй. Ӕхсидзгӕ ма ӕй, федар унмӕ нӕ ци разӕнгард кӕнуй, е дӕр. Хуцау кӕсуй, ци кӕнӕн, айдагъ уомӕ нӕ, фал, цӕмӕн кӕнӕн, уомӕ дӕр. Ке ин лӕггадӕ кӕнӕн, айдагъ уой фагӕбӕл нӕ нимайуй. Уой фӕндуй, цӕмӕй ин лӕггадӕ кӕнӕн, ке ’й уарзӕн ӕма си боз ке ан, уой туххӕй (Ӕмб. 16:2; Мар. 12:29, 30).

7. а) Раргомади 3:1–3 куд финст ӕй, уомӕ гӕсгӕ Киристе Сардиси ӕмбурдӕн цӕмӕн бауайдзӕф кодта? б) Мах ци кӕнун гъӕуй?

⁷ Бакӕсӕ Раргомадӕ 3:1–3. Хуцауи гъуддаги идарддӕр дӕр гъӕуама цӕрдӕг уӕн. Сардиси киристӕнттӕн ба Йесо ӕндӕр гъуддаги туххӕй бауайдзӕф кодта. Йеговӕн зингзӕрдӕй нӕбал лӕггадӕ кодтонцӕ. Уомӕ гӕсгӕ син Киристе загъта, цӕмӕй «райгъал» адтайуонцӕ. Е махӕн цӕбӕл дзорӕг ӕй? Дзубанди дӕр ибӕл нӕййес, «Хуцау мӕнгард нӕй, ӕма... [нин] нӕ феронх кӕндзӕй... [нӕ] хъиамӕт» (Дзиуит. 6:10). Фал нин уӕддӕр нурмӕти ци бантӕстӕй, уой фагӕбӕл гъӕуама ма нимайӕн. Кӕд нӕ надбӕл къахкъуӕрӕнтӕ фулдӕрӕй-фулдӕр кӕнунцӕ, уӕддӕр гъӕуама «Хецауи гъуддаги» берӕ хъиамӕт кӕнӕн ӕма кӕронмӕ дӕр ма бафунӕй уӕн (1 Кор. 15:58; Матф. 24:13; Мар. 13:33).

8. Раргомади 3:15–17 Киристе Лаодикий киристӕнттӕн ци загъта, е махӕн цӕбӕл дзорӕг ӕй?

 ⁸ Бакӕсӕ Раргомадӕ 3:15–17. Игъосун кӕнуни гъуддаги гъӕуама артау содзӕн. Лаодикий ка цардӕй, еци киристӕнттӕн ба Киристе ӕндӕр цӕйдӕр туххӕй бауайдзӕф кодта. Йеговӕн лӕггадӕ кӕнгӕй нӕдӕр уазал адтӕнцӕ, нӕдӕр тӕвдӕ. Сӕ лӕггадӕмӕ цийфӕнди цӕстӕй ке кастӕнцӕ, уомӕ гӕсгӕ сӕ Киристе исхудта нецӕййаг ӕма тӕрегъӕддаг. Гъудӕй сӕ нӕуӕгӕй Йеговӕн зингзӕрдӕй лӕггадӕ кӕнун райдайун (Рарг. 3:19) Е махӕн цӕбӕл дзорӕг ӕй? Адӕймаг Йеговӕн зингзӕрдӕй ку нӕбал фӕллӕггадӕ кӕнуй, уӕд е уобӕл дзорӕг фӕууй, ӕма боз нӕбал ӕй, Йеговӕ, удта ин ӕ организаци ци кӕнуй, уони туххӕй (Рарг. 3:18). Гъӕздуг ӕма ӕнӕмӕтӕ цардмӕ тундзун ку райдайӕн, уӕд нин Хуцауи гъуддӕгтӕ фиццаг бунати нӕбал уодзӕнцӕ. Мах ба уотӕ нӕ фӕндуй.

9. Киристе Пергами ӕма Феатири киристӕнттӕн ци загъта, уомӕ гӕсгӕ махӕн дӕр тӕссаг цӕмӕй ’й?

⁹ Раст дин ка ниууагъта, уони ахурӕдтӕй гъӕуама нӕхе гъӕуай кӕнӕн. Пергами киристӕнттӕн ба Киристе бауайдзӕф кодта, сӕ астӕу еудзийнадӕ ке нӕбал адтӕй ӕма сектитӕбӕл ке ниддехтӕ ’нцӕ, уой туххӕй (Рарг. 2:14–16). Феатири киристӕнтти ба растудта, «Сайтани сосӕгдзийнӕдтӕ» ке хонунцӕ, уонӕй сӕхе ке гъӕуай кӕнунцӕ. Ӕма сӕ баразӕнгард кодта, цӕмӕй идарддӕр дӕр рӕстдзийнадӕбӕл федар хуӕцонцӕ (Рарг. 2:24–26). Се ’ууӕндундзийнадӕ кӕмӕн ӕрлӕмӕгъ ӕй, ӕма раст дин ка ниууагъта, уони фӕдбӕл ка рацудӕй, уонӕн ба загъта, цӕмӕй ӕрфӕсмон кӕнонцӕ. Е махӕн цӕбӕл дзорӕг ӕй? Йеговӕ нӕ цӕбӕл ахур кӕнуй, уой нихмӕ цидӕриддӕр ӕй, уомӕй нӕхе гъӕуама еуварс дарӕн. Раст дин ка ниууагъта, етӕ сӕхе уотӕ февдесунцӕ, цума Хуцаубӕл еузӕрдон ӕнцӕ, фал сӕ гъуддӕгтӕ ба ӕндӕр цӕбӕлдӕр дзорӕг фӕуунцӕ (2 Тим. 3:5). Нӕ бон куд ӕй се ’скъӕппӕгӕй нӕхе багъӕуай кӕнун? Хуцауи Дзурд лӕмбунӕг ку ’ртасӕн ӕма рӕстдзийнадӕ дзӕбӕх ку зонӕн, уӕд нин мӕнгӕ ахурӕдтӕ исбӕрӕг кӕнун ӕма си нӕхе гъӕуай кӕнун ӕнцондӕр уодзӕй (2 Тим. 3:14–17; Иуди 3, 4).

10. Киристе Пергами ӕма Феатири киристӕнттӕн ци загъта, уомӕй ма никкидӕр цӕбӕл ахур кӕнӕн?

¹⁰ Гъӕуама нӕхе гъӕуай кӕнӕн, ӕнӕгъдау гъуддӕгтӕмӕ цидӕриддӕр хауй, уомӕй. Киристе ма еу цӕйдӕр туххӕй бауайдзӕф кодта Пергами ӕма Феатири киристӕнттӕн. Е загъта, еуӕй-еу хуӕртӕ ӕма ӕнсувӕртӕмӕ хӕтундзийнадӕ лӕгъуз гъуддаг ке нӕбал  кӕсуй (Рарг. 2:14, 20). Е махӕн цӕбӕл дзорӕг ӕй? Раст н’ адтайдӕ уотӕ гъуди кӕнун, ӕма нин Йеговӕ цӕхуӕндӕр ӕнӕгъдау гъуддӕгтӕ ӕма миутӕ хатир кӕндзӕй, уомӕн ӕма ин берӕ ӕнзти дӕргъи лӕггадӕ кӕнӕн кенӕ ба нин ӕмбурдти ӕма ӕ организаций цӕхуӕндӕр кадгин ихӕстӕ ес (1 Сам. 15:22; 1 Пет. 2:16). Кӕд аци дуйней адӕн, хуарз ӕма лӕгъуз ци ӕй, уой ӕгириддӕр нӕбал ӕртасунцӕ, уӕддӕр Йегови ба фӕндуй, цӕмӕй ӕ лӕггадгӕнгутӕн ци ӕгъдау ӕрфедар кодта, уомӕ гӕсгӕ цӕронцӕ (Еф. 6:11–13).

11. Аци статьяй нурмӕти ци гъудитӕмӕ ӕркастӕн, уонӕй цӕбӕл ахур кӕнӕн? (Кӕсӕ рамкӕ « Цӕбӕл ахур кӕнӕн?».)

¹¹ Мадта аци статьяй нурмӕти цӕмӕ ӕркастан, уомӕй бӕрӕг ӕй: нӕ ихӕс ӕй, Йеговӕн, уой куд фӕндуй, уотӕ лӕггадӕ кӕнун. Ести, уой куд фӕндуй, уотӕ ку нӕ бакӕнӕн, уӕдта гъӕуама байархайӕн, цӕмӕй гъуддаг исраст кӕнӕн (Рарг. 2:5, 16; 3:3, 16). Киристе ма Азий авд ӕмбурдемӕн ӕндӕр ӕхсидзгӕ гъудитӕ дӕр загъта. Гъӕйдӕ уонӕмӕ дӕр ӕркӕсӕн.

12. Киристе Смирни ӕма Филадельфий ӕмбурдтӕн ци загъта, е абони махмӕ куд хауй? (Раргомадӕ 2:10).

¹² Нур ба ӕркӕсӕн, Киристе Смирни ӕма Филадельфий ӕмбурдтӕн ци загъта, уомӕ. Киристе загъта, сӕ фӕдбӕл ке зелдзӕнцӕ, уомӕй сӕ тӕрсун ке нӕ гъӕуй ӕма син Хуцау сӕ еузӕрдондзийнади туххӕй ӕнӕмӕнгӕй ке райарфӕ кӕндзӕй. (Бакӕсӕ Раргомадӕ 2:10; 3:10.) Е махӕн цӕбӕл дзорӕг ӕй? Мах фӕдбӕл дӕр ӕнӕмӕнгӕй зелдзӕнцӕ, ӕма уомӕ гъӕуама цӕттӕ уӕн (Матф. 24:9, 13; 2 Кор. 12:10). Цума Киристей дзурдтӕ абони уӕлдай ӕхсидзгӕ цӕмӕн ӕнцӕ?

13, 14. Раргомади 12 сӕри ци хабӕрттӕ финст ес, етӕ Хуцауи адӕнбӕл куд рабӕрӕг ӕнцӕ?

¹³ Апостол Иоанн загъта, Хуцауи адӕни фӕдбӕл ке зелдзӕнцӕ, «хецау Йесой бон» ку ралӕууа, уӕд, гъома мах рӕстӕги. Раргомади 12 сӕри куд финст ӕй, уотемӕй Киристе Хуцауи Паддзахади паддзах ку иссӕй, уӕд уӕлӕрвти райдӕдта тугъд. Михаил, гъома Йесо Киристе е ’фсади хӕццӕ истухтонцӕ Сайтан ӕма ӕ сайтӕнтти хӕццӕ (Рарг. 12:7, 8). Еци тугъди Хуцауи знӕгтӕ фӕммулд ӕнцӕ ӕма зӕнхӕмӕ гӕлст ӕрцудӕнцӕ. Уой туххӕй дуйне фуддзийнадӕ ӕма гъезӕмӕрттӕй байдзаг ӕй (Рарг. 12:9, 12). Цума ӕгас еци хабӕрттӕ Хуцауи адӕнбӕл куд рабӕрӕг ӕнцӕ?

¹⁴ Раргомади киунугӕ аци фарстабӕл дӕр дзуапп дӕттуй. Сайтанӕн уӕлӕрвтӕмӕ ке нецибал барӕ адтӕй, уомӕ гӕсгӕ ӕ маст ӕгасӕйдӕр фӕккодта, зӕнхӕбӕл ка цардӕй, еци исӕрст киристӕнттӕбӕл. Уонӕбӕл ба цӕмӕн? Уомӕн ӕма етӕ ӕнцӕ Хуцауи Паддзахади минӕвӕрттӕ ӕма сӕбӕл ес «Йесой туххӕй игъосун кӕнуни ихӕс» (Рарг. 12:17; 2 Кор. 5:20; Еф. 6:19, 20). Цума Сайтан сӕ нихмӕ кутемӕй архайдта?

15. Раргомади 11 сӕри ци дууӕ ӕвдесӕней туххӕй финст ес, етӕ кӕмӕ амонунцӕ ӕма сӕбӕл ци ’рцудӕй?

 ¹⁵ Сайтан Хуцауи знӕгти баразӕнгард кодта, цӕмӕй сӕхе ниццавтайуонцӕ, игъосун кӕнуни гъуддагӕн разамунд ка лӕвардта, уонӕбӕл. 1918 анзи, организацийӕн разамунд ка лӕвардта, еци аст ӕнсувӕремӕй мӕнгӕттӕ фӕдздзурдтонцӕ ӕма сӕ ахӕстдони исбадун кодтонцӕ. Раргомади киунуги еци хабӕртти туххӕй финст ӕй, дууӕ ӕвдесӕнебӕл ке фӕууӕлахез уодзӕнцӕ ӕма сӕ ке рамардзӕнцӕ (Рарг. 11:3, 7–11) *. Ӕма ӕцӕгӕйдӕр, адӕймаги цӕстӕй кӕсгӕй уотӕ зиндтӕй, цума, разамунд ци гъуддагӕн лӕвардтонцӕ, е мард ӕрцудӕй.

16. 1919 анзи уавӕр куд феййивта ӕма уӕдӕй фӕстӕмӕ Сайтан куд архайуй?

¹⁶ Идарддӕр Раргомади 11 сӕри финст ӕй, цубур рӕстӕги фӕсте, еци дууӕ ӕвдесӕни ке райгас уодзӕнцӕ. Еци дзурдтӕ ба цума куд исӕнхӕст ӕнцӕ? Хабар ӕнӕнгъӕлти феййивта. Анз дӕр нӕма рацудӕй, уотемӕй 1919 анзи мартъий ӕнсувӕрти ахӕстдонӕй исуӕгъдӕ кодтонцӕ. Фӕстӕдӕр ба ма тӕрхондонӕ уӕхӕн унаффӕ дӕр рахаста, зӕгъгӕ, фудгин н’ адтӕнцӕ. Гъема ӕнсувӕртӕ дӕр еци фӕдбӕл архайун райдӕдтонцӕ – игъосун кӕнуни гъуддагӕн разамунд лӕвардтонцӕ. Фал е уобӕл дзорӕг н’ адтӕй, ӕма сӕ Сайтан уоййадӕбӕл ниууагъта. Уой фӕсте ӕ маст Хуцауи ӕгас лӕггадгӕнгутӕбӕл «цӕугӕдони» хузӕн фӕккодта (Рарг. 12:15). Уомӕ гӕсгӕ ни алкедӕр гъӕуама уа федар ӕма нӕмӕ гъӕуама уа ӕууӕндундзийнадӕ (Рарг. 13:10).

17. Кӕд Сайтан Хуцауи адӕни нихмӕ архайуй, уӕддӕр син устур ӕнхус ци фӕууй?

¹⁷ Раргомади 12 сӕри финст ӕй, Хуцауи адӕнмӕ ӕнӕнгъӕлти ӕнхус ке фӕззиндзӕй. Библий куд финст ӕй, уотемӕй «зӕнхӕ» ранихъуӕрдзӕй «цӕугӕдон» (Рарг. 12:16). Цума аци пахампарадӕ куд ӕнхӕст кӕнуй? Хатгай Сайтани дуйней кӕцидӕр хӕйттӕ, зӕгъӕн, тӕрхондӕнттӕ, Хуцауи адӕни сӕрбӕл рахуӕцунцӕ. Гъема Йегови Ӕвдесӕнтӕ тӕрхондони ке рамолунцӕ, уой фӕрци син сӕребарӕй лӕггадӕ кӕнуни фадуат фӕззиннуй. Цума еци сӕребарӕдзийнадӕй куд испайда кӕнунцӕ? Етӕ се ’гас хъауритӕ дӕр Йеговӕн лӕггадӕ кӕнунмӕ исаразунцӕ (1 Кор. 16:9). Цума е цӕхуӕн гъуддӕгтӕй фӕууй бӕрӕг?

18. Аци фӕстаг бӕнтти тӕккӕ ӕхсидзгӕдӕр гъуддаг цӕхуӕн ӕй?

 ¹⁸ Киристе куд загъта, уотемӕй, цалинмӕ аци дуйней кӕрон не ’рцӕуа, уӕдмӕ «хуарз хабар игъустгонд ӕрцӕудзӕй ӕгас зӕнхи цъарӕбӕл дӕр» (Матф. 24:14). Раргомади 14:6 ба финст ӕй изӕди туххӕй: «Уомӕ адтӕй ӕносон хуарз хабар, цӕмӕй зӕнхӕбӕл цӕргутӕн, гъома алли адӕнӕн, алли муггагӕн, алли ӕвзагӕн ӕма алли адӕнихаттӕн, игъосун кӕна цийни хабар». Мадта аци стихӕй бӕрӕг ӕй, игъосун кӕнуни гъуддаги нин изӕдтӕ дӕр ке ӕнхус кӕнунцӕ.

19. Йегови ка уарзуй, етӕ ма хуарз хабарӕй уӕлдай никкидӕр цӕхуӕн хабар гъӕуама игъосун кӕнонцӕ?

¹⁹ Фал Хуцауи лӕггадгӕнгутӕ айдагъ хуарз хабар не ’гъосун кӕнунцӕ. Гъӕуй ма сӕ изӕдтӕн ӕнхус кӕнун иннӕ гъуддаги дӕр. Уой туххӕй ба финст ӕй Раргомади 8–10 сӕри уӕнгӕ. Изӕдтӕ ма игъосун кӕнунцӕ, Хуцауи Паддзахади нихмӕ ка ӕй, уонӕмӕ ци ӕнгъӕлмӕ кӕсуй, уой. Уомӕ гӕсгӕ Йегови Ӕвдесӕнтӕ дӕр адӕнӕн дзорунцӕ, Хуцау Сайтани фуддуйнейӕн ци тӕрхӕнттӕ рахаста, уони. Библий етӕ барст цӕунцӕ «ех» ӕма «арти» хӕццӕ (Рарг. 8:7, 13). Адӕн ӕй гъӕуама зононцӕ, кӕрон хӕстӕг ке ӕй. Уотемӕй син уодзӕй фадуат, цӕмӕй сӕ цард раййевонцӕ ӕма «Йегови содзгӕ масти бон» фӕййервӕзонцӕ (Соф. 2:2, 3). Адӕнӕй берети зӕрдӕмӕ еци хабар нӕ цӕуй, ӕма нӕ уомӕ гӕсгӕ фӕгъгъӕуй нифсхастдзийнадӕ. Устур бӕллӕхи рӕстӕг ба тӕрхони хабар никки карздӕр уодзӕй (Рарг. 16:21).

20. Иннӕ дууӕ статьяй дзурд цӕбӕл цӕудзӕй?

²⁰ Раргомади киунуги ци «пахампар-дзурдтӕ» финст ес, уонӕмӕ гъӕуй лӕмбунӕг ӕркӕсун, уомӕн ӕма си ци хабӕртти туххӕй дзурд цӕуй, еци хабӕртти мах дӕр архайӕн (Рарг. 1:3). Дзубанди дӕр ибӕл нӕййес, нифсхаст ун ӕма Хуцауи хабӕрттӕ нифсгунӕй игъосун кӕнун алкӕд ӕнцон нӕ фӕууй. Фал Раргомади киунуги идарддӕр цӕмӕ ӕркӕсдзиан, е нин нӕ хъауритӕбӕл хъауритӕ бафтаудзӕй. Мах ӕркӕсдзиан дууӕ гъуддагемӕ. Фиццаг: Хуцауи знӕгтӕмӕ ци ӕнгъӕлмӕ кӕсуй? Дуккаг: Йеговӕ куд райарфӕ кӕндзӕй, еузӕрдонӕй ибӕл ка байзайа, уонӕн? Иннӕ дууӕ статьяй аци фарстатӕмӕ ӕркӕсдзиан.