1. Алкедӕр ни цӕхуӕн ӕхсидзгӕ гъуддаг гъӕуй ниллух кӕнун?

 АЛКЕДӔР ни гъӕуй еу ӕхсидзгӕ гъуддаг ниллух кӕнун. Гъӕуй нӕ равзарун: кенӕ Дун-дуйней хецау Йегови фарс уодзиан, кенӕ ба ӕ фуддӕр знаг Сайтани фарс. Унаффӕ гъӕуама алкедӕр рахӕсса. Маке фарс ислӕууай, уомӕн гӕнӕн нӕййес. Уомӕй кӕнгӕ уодзӕй, ӕносмӕ цӕрдзӕнӕ ӕви нӕ (Матф. 25:31–33, 46). «Устур бӕллӕхи» рӕстӕг ӕгас адӕнбӕл дӕр нисӕнттӕ ӕвӕрд ӕрцӕудзӕй – еуетӕбӕл фӕййервӕзуни нисан, иннетӕбӕл ба исӕфти нисан (Рарг. 7:14; 14:9–11; Йез. 9:4, 6).

2. а) Дзиуиттӕгтӕмӕ 10:35–39 финст дзурдтӕ нӕ цӕмӕ разӕнгард кӕнунцӕ? б) Раргомади киунугӕ нин устур ӕнхус цӕхуӕн гъуддаги фӕууодзӕй?

² Бакӕсӕ Дзиуиттӕгтӕмӕ 10:35–39. Кӕд Йегови фарс ислӕудтӕ, уӕд зундгин унаффӕ рахастай, ӕма дӕ фӕндуй, цӕмӕй иннетӕ дӕр раст унаффӕ рахӕссонцӕ. Еци гъуддаги нин устур ӕнхус уодзӕй Раргомади киунугӕ. Уомӕн ӕма си комкоммӕ финст ӕй, Йегови знӕгти цӕхуӕн тӕрхон баййафдзӕй, ӕ хецаудзийнади фарс ка ислӕудтӕй, етӕ ба цӕхуӕн дессаги арфӕдзийнӕдтӕй исхайгин уодзӕнцӕ, е. Еци гъуддагмӕ уӕлӕнгай цӕстӕй кӕсӕн нӕййес. Раргомади киунуги финст хабӕрттӕмӕ лӕмбунӕг ӕркӕсун гъӕуй, цӕмӕй нӕхе дӕр фӕндӕуа Йеговӕн лӕггадӕ кӕнун ӕма уӕхӕн унаффӕ рахӕссунмӕ иннетӕн дӕр банхус кӕнӕн.

3. Аци статьяй цӕмӕ ’ркӕсдзиан?

³ Аци статьяй ӕркӕсдзиан дууӕ фарстайемӕ. Фиццаг:  Хуцау цӕхуӕн федӕн ӕрцӕттӕ кодта, ӕ хецаудзийнади фарс ка ислӕудтӕй, уонӕн. Дуккаг: Раргомади киунуги ци сурх-сурхид сирди туххӕй финст ес, уой фарс ка ислӕудтӕй, уонӕбӕл ци ӕрцӕудзӕй, уомӕ.

4. Иоанн Киристей хӕццӕ уӕлӕрвти ке фӕууидта?

⁴ Иоанн цӕстӕбӕлуайӕни фӕууидта дууӕ адӕни къуари. Етӕ Йегови фарс ислӕудтӕнцӕ ӕма райстонцӕ сӕ хуӕрзеуӕг – ӕносон цард. Фиццаг къуармӕ хаунцӕ, Киристей хӕццӕ уӕлӕрвти паддзӕхтӕ ка уодзӕй, етӕ. Ист ӕнцӕ зӕнхӕй ӕма ӕнцӕ 144 000 (Рарг. 7:4). Етӕ зӕнхӕн уодзӕнцӕ паддзӕхтӕ Йесо Киристей хӕццӕ (Рарг. 5:9, 10; 14:3, 4). Иоанн куд загъта, уотемӕй етӕ Киристей фарсмӕ лӕуунцӕ Сиони хонхбӕл (Рарг. 14:1).

5. Исӕрст киристӕнттӕй ма зӕнхӕбӕл ка байзадӕй, уонӕмӕ тагъд рӕстӕги ци ӕнгъӕлмӕ кӕсуй?

⁵ Апостолти рӕстӕгутӕй абони уӕнгӕ мингай киристӕнттӕ исӕрст ӕрцудӕнцӕ Йегови сугъдӕг хъаурӕй (Лук. 12:32; Ром. 8:17). Ӕ мӕлӕти уӕнгӕ Йеговӕбӕл еузӕрдонӕй ка байзадӕй, етӕ нур ӕнцӕ уӕлӕрвти. Апостол Иоанн куд загъта, уотемӕй ма фӕстаг бӕнтти рӕстӕг исӕрст киристӕнттӕй зӕнхӕбӕл минкъий къуар байзайдзӕй (Рарг. 12:17). Устур бӕллӕхи размӕ еци киристӕнттӕбӕл фӕстаг хатт уодӕгас «Хуцауи мухур» ӕвӕрд ӕрцӕудзӕй (Рарг. 7:2, 3). Уой фӕсте ба устур бӕллӕхӕн ӕ кӕцидӕр афони етӕ дӕр зӕнхӕй ист ӕрцӕудзӕнцӕ, цӕмӕй Киристей хӕццӕ паддзӕхтӕ уонцӕ (Матф. 24:31; Рарг. 5:9, 10).

6, 7. а) Иоанн ма никкидӕр цӕхуӕн къуар фӕууидта, ӕма еци къуари туххӕй ци зонӕн? б) Раргомади 7 сӕр исӕрст киристӕнттӕн дӕр ӕма «хъӕбӕр берӕ адӕнӕн» дӕр пайда цӕмӕй ӕй?

⁶ Уой фӕсте ба Иоанн фӕууидта «хъӕбӕр берӕ адӕн». Уӕлӕрвти ка цӕрдзӕй, уонӕй уӕлдай аци къуарӕн банимайӕн н’ адтӕй (Рарг. 7:9, 10). Уони туххӕй ба ци зонӕн? Иоанн ниффинста: «Етӕ ӕнцӕ, устур бӕллӕхи сӕрти ка рахизтӕй, еци адӕн. Етӕ сӕ дарӕстӕ нихснадтонцӕ ӕма сӕ исуорс кодтонцӕ Уӕрикки тогӕй» (Рарг. 7:14). «Хъӕбӕр берӕ адӕн» цӕрдзӕнцӕ зӕнхӕбӕл, ӕма сӕ цард уодзӕй фарнӕй ӕма арфӕдзийнӕдтӕй идзаг (Пс. 37:9–11, 27–29; Ӕмб. 2:21, 22; Рарг. 7:16, 17).

⁷ Раргомади киунуги 7 сӕри ӕвдист ӕнцӕ, уӕлӕрвти паддзӕхтӕ ка уодзӕнцӕ, етӕ дӕр, ӕма ӕносмӕ зӕнхӕбӕл ка цӕрдзӕй, етӕ дӕр. Ду ба уони астӕу дӕхе уинис? Гъӕуама уинай. Зӕгъӕн дӕр ин нӕййес, еци дууӕ къуари куд амондгун уодзӕнцӕ, афойнадӕбӕл Йегови фарс ке ислӕудтӕнцӕ, уой туххӕй. Цума ма Раргомади киунуги устур бӕллӕхи туххӕй ци финст ес? (Матф. 24:21).

8. Устур бӕллӕх цӕмӕй райдайдзӕй ӕма адӕнӕн сӕ фулдӕр сӕхе куд бадардзӕнцӕ?

⁸ Айразиккон статьяй куд загъд адтӕй, уотемӕй тагъд рӕстӕги хецауӕдтӕ Устур Вавилонбӕл, гъома ӕгас дуйней мӕнгӕ динтӕбӕл, сӕхе ниццӕвдзӕнцӕ (Рарг. 17:16, 17). Ӕма гъе уомӕй райдайдзӕй устур бӕллӕх. Цума еци хабӕрттӕ ку райдайонцӕ, уӕд адӕн Йегови Ӕвдесӕнти ӕмбурдтӕмӕ ниггулф кӕндзӕнцӕ? Нӕъ. Е бӕрӕг ӕй Раргомади 6 сӕрӕй. Еци тухст рӕстӕг адӕн ӕнхус Йеговӕй нӕ агордзӕнцӕ, фал аци дуйней политики ӕма коммерций хӕццӕ баст организацитӕй. Уотӕ сӕмӕ кӕсдзӕй, цума еци организацитӕ ӕнцӕ хуӕнхти хузӕн федар ӕма син фесӕфӕн нӕййес. Мадта еци адӕн Хуцауи Паддзахади фарс ке не ’слӕудзӕнцӕ, уомӕ гӕсгӕ сӕ Йеговӕ е знӕгтӕбӕл банимайдзӕй (Лук. 11:23; Рарг. 6:15–17).

9. Устур бӕллӕхи рӕстӕг Йегови лӕггадгӕнгутӕ иннӕ адӕнӕй цӕмӕй хецӕн кӕндзӕнцӕ ӕма е цӕмӕ ӕркӕндзӕй?

 ⁹ Устур бӕллӕхи рӕстӕг Йегови еузӕрдон лӕггадгӕнгутӕ иннӕ адӕнӕй хъӕбӕр хецӕн кӕндзӕнцӕ. Иннӕ адӕнӕй уӕлдай етӕ лӕггадӕ кӕндзӕнцӕ Йеговӕ Хуцауӕн ӕма «сирдӕн» баковун нӕ бакомдзӕнцӕ (Рарг. 13:14–17). Уой туххӕй Хуцауи знӕгтӕ хъӕбӕр исмӕстгун уодзӕнцӕ. Гъема Йеговӕн кадӕриддӕр лӕггадӕ кӕнуй, уонӕбӕл зӕнхон хецауӕдти цӕдес ӕхе ниццӕвдзӕй. Адӕн уотӕ ке исагъуйдзӕнцӕ, уой туххӕй Библий финст адтӕй, зӕгъгӕ, дан, Магоги зӕнхӕй Гог ӕхе Хуцауи адӕнбӕл ниццӕвдзӕй (Йез. 38:14–16).

10. Раргомади 19:19–21 куд финст ӕй, уомӕ гӕсгӕ Йеговӕ куд архайдзӕй, Гог ӕ адӕни нихмӕ ку рацӕуа, уӕд?

¹⁰ Цума Йеговӕ ба еци хабӕрттӕмӕ цӕхуӕн цӕстӕй ракӕсдзӕй? Пахампар Йезекил ниффинста Йегови дзурдтӕ: «Фурмӕстӕй мӕ финдзихъӕлтӕй кӕлдзӕй арт» (Йез. 38:18, 21–23). Раргомади 19 сӕри еци хабӕртти туххӕй фулдӕр финст ес. Гог Хуцауи адӕнбӕл ӕхе ку ниццӕва, уӕд Йеговӕ еци фӕдбӕл Киристей рарветдзӕй, цӕмӕй ин ӕ адӕни багъӕуай кӕна ӕма е ’знӕгти хӕццӕ истоха. Еци тугъди Киристей фарсмӕ уодзӕнцӕ «уӕларвон ӕфсӕдтӕ», гъома Хуцауи еузӕрдон изӕдтӕ ӕма 144 000 исӕрст киристони (Рарг. 17:14; 19:11–15). Еци тугъд цӕбӕл фӕууодзӕй, е бӕрӕг ӕй? Гъо. Йегови нихмӕ цидӕриддӕр адӕн ӕма организацитӕ ес, етӕ зӕнхи цъарӕй исӕфт ӕрцӕудзӕнцӕ! (Бакӕсӕ Раргомадӕ 19:19–21.)

11. Раргомади киунуги финст хабӕрттӕй тӕккӕ ӕхсидзгӕдӕр кӕци ӕй?

¹¹ Дӕ цӕститӕбӕл рауайун кӕнӕ, зӕнхӕбӕл Хуцауи еузӕрдон лӕггадгӕнгутӕ куд цийнӕ кӕндзӕнцӕ, Йеговӕ е ’гас знӕгти дӕр ке фесафта, уобӕл. Е хъӕбӕр амондгун рӕстӕг уодзӕй! Уӕлӕрвти ба уӕд цума цитӕ цӕудзӕй? Еци рӕстӕг еугурӕйдӕр цийнӕ кӕндзӕнцӕ, Устур Вавилон исӕфт ке ӕрцудӕй, уобӕл. Фал ма си еу ӕхсидзгӕ хабар дӕр ӕрцӕудзӕй (Рарг. 19:1–3). Е уодзӕй, Раргомади киунуги ци хабӕрттӕ финст ес, уонӕй тӕккӕ ӕхсидзгӕдӕр – «Уӕрикки киндзӕхсӕвӕр» (Рарг. 19:6–9).

12. «Уӕрикки киндзӕхсӕвӕр» кӕд уодзӕй? (Раргомадӕ 21:1, 2).

¹² Цума «Уӕрикки киндзӕхсӕвӕр» кӕд уодзӕй? 144 000 исӕрст киристони уӕлӕрвти ӕрӕмбурд уодзӕнцӕ Армагеддони хуӕдразмӕ. Фал киндзӕхсӕвӕрӕн еци рӕстӕг хуарз исхонӕн нӕ уодзӕй. (Бакӕсӕ Раргомадӕ 21:1, 2.) Мадта еци цийни хабар ӕрцӕудзӕй Армагеддони фӕсте, Хуцауи знӕгтӕ еугурӕйдӕр исӕфт ку ’рцӕуонцӕ, уӕд (Пс. 45:3, 4, 13–17).

13. «Уӕрикки киндзӕхсӕвӕр» цӕбӕл дзорӕг ӕй?

¹³ «Уӕрикки киндзӕхсӕвӕр» цӕбӕл дзорӕг ӕй? Лӕхъуӕн ӕма кизгӕ киндзӕхсӕвӕри бон сӕ цард куд байеу кӕнунцӕ, уотӕ «Уӕрикки киндзӕхсӕвӕри» дӕр Паддзах Йесо Киристе ӕма ӕ киндзаг, гъома 144 000, рахӕсгӕ хузи байеу уодзӕнцӕ. Еци ӕхсидзгӕ хабари фӕсте Киристе ӕма 144 000 разамунд дӕттун райдайдзӕнцӕ ӕма зӕнхӕн паддзӕхтӕ уодзӕнцӕ 1 000 анзей дӕргъи (Рарг. 20:6).

14, 15. Раргомади 21 сӕри 144 000 цӕй хӕццӕ барст цӕунцӕ? (Кӕсӕ хузӕмӕ ӕндаг цъарӕбӕл.)

¹⁴ Идарддӕр Раргомади 21 сӕри 144 000 барст цӕунцӕ дессаги рӕсугъд горӕти хӕццӕ, «Нӕуӕг Йерусалим», зӕгъгӕ (Рарг. 21:2, 9). Еци горӕтӕн ӕ бундори адтӕй 12 дори. Уонӕбӕл ба финст адтӕнцӕ «Уӕрикки дууадӕс апостолей нӕмттӕ». Дӕ  цӕститӕбӕл рауайун кӕнӕ, Иоанн еци дортӕмӕ куд десгӕнгӕй кастӕй, уой, уомӕн ӕма си сӕ еуебӕл уой ном дӕр финст адтӕй. Е ба хъӕбӕр устур кадӕ ’й! (Рарг. 21:10–14; Еф. 2:20).

¹⁵ Нӕуӕг Йерусалим еунӕг горӕти хузӕн дӕр нӕй. Еци готӕт ӕй цуппӕрдегъон. Ӕ сӕйраг гъӕунгӕ адтӕй ирд авги хузӕн, кӕдзос сугъзӕрийнӕй конд. Ӕ 12 колдуаремӕй ба алкӕцидӕр адтӕй згъӕрдорӕй конд. Горӕти фӕрстӕн ӕ бундортӕ рӕсугъдгонд адтӕнцӕ аллихузи хъазар дортӕй (Рарг. 21:15–21). Фал Иоанн горӕти ковӕндонӕ нӕ фӕууидта. Ӕма е дессаг дӕр нӕй, уомӕн ӕма Нӕуӕг Йерусалиммӕ ка хауй, етӕ уодзӕнцӕ Йегови фарсмӕ (Дзиуит. 7:27; Рарг. 22:3, 4). Иоанн идарддӕр ниффинста: «Алцигъон Хуцау Йеговӕ ӕма Уӕриккӕ ӕнцӕ ӕ ковӕндонӕ. Горӕти нӕдӕр хори рохс гъӕуй, нӕдӕр мӕйи рохс, уомӕн ӕма ’й Хуцауи кадӕ рохс кодта, Уӕриккӕ ба адтӕй ӕ цирагъ» (Рарг. 21:22, 23).

16. Хуцауи Паддзахади Минанзон хецаудзийнади рӕстӕг адӕнмӕ ци ’нгъӕлмӕ кӕсуй?

¹⁶ Исӕрст киристӕнттӕн хъӕбӕр ӕхцӕуӕн фӕууй Нӕуӕг Йерусалимбӕл сагъӕс кӕнун. Фал еци пахампарадӕ айдагъ уонӕмӕ нӕ хауй. Е хауй, ӕносмӕ зӕнхӕбӕл ка цӕрдзӕй, уонӕмӕ дӕр, уомӕн ӕма Минанзон хецаудзийнади рӕстӕг Хуцауи Паддзахадӕ зӕнхӕн дессаги арфӕдзийнӕдтӕ ӕрхӕсдзӕй. Еци арфӕдзийнӕдтӕ гъе уойбӕрцӕ уодзӕнцӕ, ӕма Раргомади киунуги хунд ӕнцӕ «царди дони цӕугӕдон». Еци цӕугӕдонӕн ӕ фӕйнӕ фарсеми адтӕнцӕ «царди бӕлӕстӕ». Еци бӕлӕстӕн ба сӕ сифтӕр адтӕй «адӕни дзӕбӕх кӕнунмӕ» (Рарг. 22:1, 2). Уӕди рӕстӕг зӕнхӕбӕл ка цӕра, етӕ исхайгин уодзӕнцӕ, Хуцауи Паддзахадӕ цидӕриддӕр арфӕдзийнӕдтӕ ӕрхӕсса, уонӕй. Гъе уотемӕй минкъийгай ӕгас коммӕгӕс адӕн дӕр исуодзӕнцӕ ӕнхӕст. Нӕбал уодзӕй нӕдӕр незтӕ, нӕдӕр рист, нӕдӕр маст (Рарг. 21:3–5).

17. Минанзон хецаудзийнади рӕстӕг зӕнхӕбӕл ка цӕрдзӕй? (Раргомадӕ 20:11–13).

¹⁷ Минанзон хецаудзийнади рӕстӕг зӕнхӕбӕл ка цӕрдзӕй? Армагеддони сӕрти ка рахездзӕй, еци адӕн, удта нӕуӕг дуйней ци сувӕллӕнттӕ райгура, етӕ. Уомӕй уӕлдай ма Раргомади 20 сӕри финст ӕй, мӕрдтӕ ке райгас уодзӕнцӕ. (Бакӕсӕ Раргомадӕ 20:11–13.) Ка райгас уодзӕй? «Рӕстгӕнгутӕ», гъома Йеговӕн еузӕрдонӕй ка лӕггадӕ  кодта, еци адӕн ӕма «фудгӕнгутӕ», гъома сӕ мӕлӕти размӕ Йегови базонуни фадуат кӕмӕн нӕ фӕцӕй, етӕ (Гъуд. 24:15; Иоан. 5:28, 29). Мадта е уобӕл дзорӕг ӕй, ӕма, ка рамардӕй, етӕ ӕгасӕйдӕр райгас уодзӕнцӕ? Нӕъ. Йегови базонунмӕ фадуат кӕмӕн адтӕй, фал ке нӕ бафӕндадтӕй ӕма ма ӕ нихмӕ дӕр ка рацудӕй, етӕ нӕ райгас уодзӕнцӕ. Уӕхӕн адӕни Йеговӕ нӕуӕг дуйней цӕруни аккагбӕл нӕ банимайдзӕй (Матф. 25:46; 2 Фес. 1:9; Рарг. 17:8; 20:15).

18. Минанзон хецаудзийнади кӕрон ци ’рцӕудзӕй?

¹⁸ Минанзон хецаудзийнади кӕронмӕ ӕгас адӕн дӕр исуодзӕнцӕ ӕнхӕст. Адами тӕрегъӕд ци зӕран ӕрхаста, уомӕй фӕд дӕр нӕбал байзайдзӕй (Ром. 5:12). Ӕгас адӕн дӕр ӕносон цардӕй ке исхайгин уодзӕнцӕ, уомӕ гӕсгӕ Библий финст ӕй, зӕгъгӕ, райгас уодзӕнцӕ (Рарг. 20:5).

19. Фӕстаг хатт фӕлвӕрд цӕмӕн ӕрцӕудзиан?

¹⁹ Сайтан аллихузти архайдта, цӕмӕй Киристей фӕррӕдуйун кодтайдӕ. Фал ӕй мах зонӕн, Киристе Йеговӕбӕл кӕронмӕ дӕр еузӕрдонӕй ке байзадӕй. Фал цума Минанзон хецаудзийнади кӕрон ӕгас адӕн дӕр цӕттӕ уодзӕнцӕ Сайтани нихмӕ гъе уотӕ федар фӕллӕуун? (Рарг. 20:7). Аци фарстабӕл ни алкедӕр исдзуапп кӕндзӕй, Сайтан нӕ фӕстаг хатт ку фӕлвара, уӕд. Еци рӕстӕг Хуцаубӕл еузӕрдонӕй ка байзайа, етӕ ӕносон цардӕй ӕма ӕцӕг сӕребарӕдзийнадӕй исхайгин уодзӕнцӕ (Ром. 8:21). Йегови нихмӕ ка рацӕуа, етӕ ба Сайтан ӕма ӕ сайтӕнтти хӕццӕ ӕносмӕ исӕфт ӕрцӕудзӕнцӕ (Рарг. 20:8–10).

20. Раргомади киунуги финст хабӕртти туххӕй ци гъуди кӕнис?

²⁰ Дӕ зӕрдӕмӕ фӕццудӕй Раргомади киунуги финст хабӕрттӕ кӕсун? Еци хабӕртти дӕхе ба фӕууидтай? Мах фӕндуй иннӕ адӕнӕн дӕр ӕнхус кӕнун, цӕмӕй етӕ дӕр ӕцӕг Хуцау Йегови фарс ислӕууонцӕ (Рарг. 22:17). Мадта ’й аци ӕртӕ статьяй фӕрци фӕууидтан, федӕни цӕхуӕн хабӕрттӕ ӕрцӕудзӕй, уой. Еци хабӕрттӕ не ’гасейдӕр деси ’фтаунцӕ ӕма мах дӕр апостол Иоанни хузӕн зӕгъӕн: «Амменӕ! Ӕрцо, Хецау Йесо» (Рарг. 22:20).