1, 2. Балӕдӕрун кӕнӕ, адӕймагӕн ӕ царди ести ку раййевуй, уӕд, хуарз ке зудта, еци уагӕвӕрдтӕмӕ ӕндӕр цӕстӕй цӕмӕн ракӕсуй.

 КИНДЗӔХСӔВӔРИ бон сиахс ӕма киндзӕ тӕмӕнтӕ калунцӕ ӕма, радзубанди ци ӕнсувӕрмӕ ес, уомӕ лӕмбунӕг игъосунцӕ. Уотӕ зӕгъӕн нӕййес, ӕма еци радзубандий ести нӕуӕг гъудитӕ фегъосдзӕнцӕ. Фал сӕмӕ нур ӕндӕр цӕстӕй ракӕсдзӕнцӕ. Цӕмӕн? Уомӕн ӕма аци бонӕй фӕстӕмӕ исуодзӕнцӕ лӕг ӕма уосӕ, ӕма сӕ амонд кӕнгӕ уодзӕй, ци унаффитӕ фегъустонцӕ, уонӕй пайда кӕндзӕнцӕ ӕви нӕ, уомӕй.

² Гъе уотӕ ма фӕууй, сувӕллон кӕмӕн гъӕуама райгура, уонӕн дӕр. Рӕстдзийнади кӕдӕй ӕнцӕ, уӕдӕй берӕ хуарз гъудитӕ фегъустонцӕ, сувӕллӕнтти куд гъомбӕл кӕнун гъӕуй, уой фӕдбӕл. Фал син нур еци уагӕвӕрдтӕ уӕлдай ӕхсидзгӕ ’нцӕ, уомӕн ӕма сӕхемӕ дӕр хаунцӕ. Нур исуодзӕнцӕ ниййергутӕ. Е ба хъӕбӕр устур ихӕс ӕй. Адӕймаги уавӕртӕ ку раййевунцӕ, уӕд, хуарз ке зудта, еци уагӕвӕрдтӕмӕ ӕндӕр цӕстӕй ракӕсуй. Уомӕ гӕсгӕ Йегови лӕггадгӕнгутӕн ӕхсидзгӕ ’й Библи кӕсун ӕма ибӕл сагъӕс кӕнун сӕ «царди алли бӕнтти дӕр» (Дук. з. 17:19).

3. Аци статьяй цӕмӕ ӕркӕсдзиан?

³ Ниййергутӕ, устур кадӕ уӕмӕ ӕрхаудтӕй. Гъӕуама уӕ сувӕллӕнтти Йегови хӕццӕ базонгӕ кӕнайтӕ. Фал син Хуцауи туххӕй уотид цидӕртӕ радзорун фагӕ нӕй. Гъӕуй син банхус кӕнун, цӕмӕй Хуцауи бауарзонцӕ ӕма еци уарзт сӕ  реуи артау содза. Еци гъуддаги уин ци банхус кӕндзӕй? Аци статьяй ӕркӕсдзиан, ниййергутӕй беретӕн ка банхус кодта, цуппар уӕхӕн уагӕвӕрдемӕ (2 Тим. 3:16). Удта ма ӕркӕсдзиан, еци ниййергутӕ ци зӕгъунцӕ, уомӕ дӕр.

4. Ниййергутӕн цӕхуӕн уагӕвӕрд банхус кӕндзӕй сувӕллӕнттӕн Йегови бауарзун кӕнун? (Иакови 1:5).

⁴ 1 уагӕвӕрд: Йеговӕй разамунд коретӕ. Уӕхе хъауритӕй уин нӕ бантӕсдзӕй сувӕллӕнттӕн Йегови бауарзун кӕнун. Уомӕ гӕсгӕ си зунд коретӕ. (Бакӕсӕ Иакови 1:5.) Уомӕй хуӕздӕр унаффӕ уин неке ратдзӕй. Ӕма уомӕн берӕ бӕлвурдгӕнӕнтӕ ес, фал си дууемӕ ӕркӕсӕн. Фиццаг: Йеговӕй фӕлтӕрдгундӕр ниййерӕг исхонӕн неке ес (Пс. 36:9). Дуккаг: ци унаффитӕ нин раттуй, етӕ алкӕддӕр нӕхе пайдайӕн фӕуунцӕ (Ис. 48:17).

5. а) Йегови организаци ниййергутӕн куд ӕнхус кӕнуй? б) Абилью ӕма Улӕ сӕ сувӕллӕнтти куд гъомбӕл кодтонцӕ, уомӕй зундӕн райсӕн ци ес? (Кӕсӕ феппайуйнаг.)

⁵ Йегови фӕндуй, цӕмӕй ӕй нӕ сувӕллӕнттӕ ӕгас зӕрдӕй бауарзонцӕ. Уомӕ гӕсгӕ нин нӕ сувӕллӕнтти ӕууӕндундзийнадӕ федар кӕнунмӕ берӕ аллихузи «хуӕруйнаг» дӕттуй. Йеговӕ нин балӕвар кодта Библи. Ӕ организаци ба нин ӕнхус кӕнуй, цӕмӕй ӕй хуӕздӕр лӕдӕрӕн (Матф. 24:45). Зӕгъӕн, ниййергутӕн устур ӕнхус уодзӕй рубрикӕ «Помощь семье». Раздӕр мухургонд цудӕй журнали «Пробудитесь!», нур ба ’й иссерӕн ес сайти jw.org. Уомӕй уӕлдай ма сайти ес интервьютӕ ӕма берӕ аллихузи видеороликтӕ. Ӕвдист си цӕуй, сувӕллӕнтти гъомбӕл кӕнгӕй уагӕвӕрдтӕй пайда кӕнун куд гъӕуй, е (Ӕмб. 2:4–6) *.

6. Йегови организаци сувӕллӕнтти гъомбӕл кӕнунмӕ куд ӕнхус кӕнуй, уой туххӕй еу бийнонтӕ ци зӕгъунцӕ?

⁶ Ниййергутӕ Йеговӕй хъӕбӕр бон ӕнцӕ, ӕ организаций фӕрци син ци разамунд дӕттуй, уой туххӕй. Еу ӕнсувӕр Джо зӕгъуй: «Ӕртӕ сувӕллони нин ес, ӕма сӕ рӕстдзийнади гъомбӕл кӕнун ӕнцон нӕй. Уомӕ гӕсгӕ мӕ бийнойнаги хӕццӕ  алкӕддӕр ковгӕ фӕккӕнӕн. Арӕх уотӕ рауайуй, ӕма ести зиндзийнадӕбӕл куддӕр исӕмбӕлӕн, уотӕ рацӕуй, мах уавӕрмӕ ка хауй, уӕхӕн статья кенӕ видеоролик. Уотӕ нӕмӕ фӕккӕсуй, цума нӕмӕ Йеговӕ е ’нхуси къох ӕрбадаруй». Джо ӕма ӕ бийнойнаг Йеговӕй хъӕбӕр боз ӕнцӕ, сӕ сувӕллӕнттӕбӕл син уотӕ ке тухсуй, уой туххӕй.

7. Ниййергутӕ сӕ сувӕллӕнттӕн фӕнзуйнаг цӕмӕн гъӕуама уонцӕ? (Ромӕгтӕмӕ 2:21).

⁷ 2 уагӕвӕрд: уӕ сувӕллӕнттӕн фӕнзуйнаг уотӕ. Сувӕллӕнттӕ алцӕмӕйдӕр сӕ ниййергути фӕффӕнзунцӕ. Ке зӕгъун ӕй гъӕуй, ниййергутӕ дӕр ӕнӕнхӕст ӕнцӕ (Ром. 3:23). Фал уӕддӕр гъӕуама сӕ сувӕллӕнттӕн фӕнзуйнаг уонцӕ. (Бакӕсӕ Ромӕгтӕмӕ 2:21.) Уой туххӕй еу ӕнсувӕр уотӕ загъта: «Сувӕллӕнттӕ губкити хузӕн ӕнцӕ. Ӕма мӕ гъуддӕгтӕ мӕ дзурдтӕй ку хецӕн кӕнонцӕ, уӕд мин ӕй еци фӕдбӕл мӕ цӕстӕмӕ бадардзӕнцӕ». Мадта дӕ кӕд фӕндуй, цӕмӕй дӕ сувӕллӕнттӕ Йегови бауарзонцӕ, уӕд ӕй гъӕуама уинонцӕ, дӕхуӕдӕг дӕр ӕй берӕ ке уарзис.

8, 9. Эндрю ӕма Эмми хабӕрттӕй ци ес базонӕн?

⁸ Гъӕйдӕ нур ба радзорӕн, ниййергути цӕветтон сувӕллӕнттӕн куд банхус кодта, уобӕл. Эндрюбӕл цӕуй 17 анзи ӕма зӕгъуй: «Мӕ мадӕ ӕма мин мӕ фидӕ арӕх фӕдздзориуонцӕ, Йеговӕмӕ ковун куд ӕхсидзгӕ ’й, уой. Алли изӕр дӕр мӕ фидӕ мӕ хӕццӕ фӕкковидӕ, кӕд мӕхуӕдӕг раковинӕ, уӕд дӕр. Мӕнӕн ӕма мӕ хуӕрӕн уотӕ фӕззӕгъиуонцӕ: „Йегови хӕццӕ уӕ бон ӕй дзорун, цӕйбӕрцӕ уӕ фӕндуй, уойбӕрцӕ“. Мӕ минкъийӕй ардӕмӕ ковун ахур ке дӕн, уой фӕрци мин Йегови хӕццӕ дзубанди кӕнун ӕнцон ӕй, ӕма ’й нимайун, берӕ мӕ ка уарзуй, уӕхӕн фидӕбӕл». Ниййергутӕ, аци хабарӕй цӕбӕл ахур кӕнтӕ? Уӕхуӕдтӕ Йегови берӕ ке уарзетӕ, е уӕ сувӕллӕнттӕн дӕр банхус кӕндзӕй, цӕмӕй Йеговӕмӕ бахӕстӕг уонцӕ.

⁹ Нур ба ӕркӕсӕн нӕ хуӕрӕ Эмми хабармӕ. Сувӕллон ма ку адтӕй, уӕд сӕ сӕ фидӕ ӕфстӕутти хӕццӕ ниууагъта. Эммӕ зӕгъуй: «Ӕхцайӕй арӕх нӕ фӕхъхъӕртианӕ. Фал мӕ мадӕ алкӕддӕр уотӕ фӕззӕгъидӕ: „Йеговӕ ӕ лӕггадгӕнгути тухст уавӕри некӕд ниууаддзӕй“. Ӕма уобӕл е ’гас зӕрдӕй ке ӕууӕндуй, е бӕрӕг адтӕй. Мӕн цӕбӕл ахур кодта, цӕргӕ дӕр уомӕ гӕсгӕ кодта». Эмми хабарӕй бӕрӕг ӕй, зин уавӕрти дӕр ниййергутӕн сӕ бон ке ӕй сӕ сувӕллӕнттӕн фӕнзуйнаг ун (Гал. 6:9).

10. Израили ниййергутӕн цӕхуӕн фадуӕттӕ адтӕй сӕ сувӕллӕнтти хӕццӕ рӕстӕг ӕрветунмӕ? (Дуккаг закъон 6:6, 7).

¹⁰ 3 уагӕвӕрд: уӕ сувӕллӕнтти хӕццӕ рӕстӕг ӕрвететӕ. Уой туххӕй Йеговӕ израилӕгтӕн комкоммӕ загъта ӕ Закъони. (Бакӕсӕ Дуккаг закъон 6:6, 7.) Уӕди рӕстӕги цард ӕндӕрхузи адтӕй ӕма ниййергутӕ сӕ сувӕллӕнтти хӕццӕ дзӕвгарӕ фулдӕр рӕстӕг ӕрвистонцӕ. Биццеу ӕ фиди хӕццӕ будури фӕккосидӕ, кизгӕ ба ӕ мади хӕццӕ хӕдзари куститӕ фӕккӕнидӕ. Гъема косгӕ-косгӕй сӕ бон адтӕй хабӕрттӕ кӕнун. Уой фӕрци ниййергутӕн берӕ фадуӕттӕ адтӕй, цӕмӕй сӕ сувӕллӕнттӕн Йегови бауарзун кодтайуонцӕ. Зӕгъӕн, сӕ бон адтӕй сӕ сувӕллӕнтти ӕргом раздахун, Йеговӕ куд фӕлмӕнзӕрдӕ ӕй ӕма син сӕ бийнонтӕн куд ӕнхус кӕнуй, уомӕ.

11. Абони ниййергутӕн цӕхуӕн фадуат ес сӕ сувӕллӕнтти хӕццӕ рӕстӕг ӕрветунмӕ?

¹¹ Фал абони цард бустӕги ӕндӕрхузи ӕй. Арӕхдӕр ниййергутӕ кусти фӕуунцӕ, сувӕллӕнттӕ ба – скъолай. Уомӕ гӕсгӕ бийнонтӕн сӕ бон нӕ фӕууй берӕ рӕстӕг еумӕ ӕрветун. Ӕма ниййергути байархайун фӕгъгъӕуй, цӕмӕй сувӕллӕнтти хӕццӕ  фӕуунмӕ рӕстӕг иссеронцӕ (Еф. 5:15, 16; Фил. 1:10). Уомӕн хуарз фадуат ӕй бийнонти ахур. Еу ӕригон ӕнсувӕр Александр зӕгъуй: «Нӕ фидӕн бийнонти ахур фиццаг бунати ӕй. Кӕд ин хъӕбӕр берӕ гъуддӕгтӕ фӕууй, уӕддӕр бийнонти ахур алли къуӕре дӕр рауадзуй. Ахури фӕсте ба дзӕбӕх алцӕбӕлти фӕххабӕрттӕ кӕнӕн».

12. Бийнонти хестӕр ӕ зӕрдӕбӕл ци гъӕуама дара бийнонти ахури рӕстӕг?

¹² Бийнонти хестӕр гъӕуама расагъӕс кӕна, ци кӕнун ӕй гъӕуй, цӕмӕй бийнонти ахур сувӕллӕнтти зӕрдӕмӕ хъӕбӕрдӕр цӕуа. Ӕрӕги нӕмӕ фӕззиндтӕй замманай киунугӕ «Радуйтесь жизни сейчас и вечно!». Еци киунуги фӕрци ӕнцон ӕй Библий туххӕй дзубанди кӕнун. Уӕ бон ӕй уӕ бийнонти ахур еци киунуги фӕрци уадзун. Ӕвӕдзи, сумах дӕр фӕндуй, цӕмӕй уӕ сувӕллӕнттӕ сӕ тухститӕ ӕма сӕ сагъӕстӕ ӕргом дзоронцӕ. Уомӕ гӕсгӕ, уӕ хуарзӕнхӕй, байархайетӕ, цӕмӕй син бийнонти ахури рӕстӕг хилӕ ма кӕнайтӕ, Библи цӕбӕл ахур кӕнуй, уой нихмӕ ести ку зӕгъонцӕ, уӕд дӕр. Ци гъуди кӕнунцӕ, уой уи ке нӕ римӕхсунцӕ, уобӕл цийнӕ кӕнун гъӕуй. Ниййергутӕ, уӕ сувӕллӕнттӕ ци гъуди кӕнунцӕ, уой ку нӕ зонайтӕ, уӕд син куд банхус кӕндзиайтӕ?

13. Ниййергути бон ма куд ӕй сувӕллӕнттӕн ӕнхус кӕнун, цӕмӕй Йеговӕмӕ хӕстӕгдӕр кӕнонцӕ?

¹³ Ниййергутӕ, алли фадуатӕй дӕр пайда кӕнтӕ, цӕмӕй уӕ сувӕллӕнттӕн Йеговӕмӕ хӕстӕг кӕнун ӕнхус кӕнайтӕ. Уой туххӕй Библий ахурмӕ кенӕ бийнонти ахурмӕ ӕнгъӕлмӕ кӕсун нӕ гъӕуй. Кизгӕ ӕма ӕртӕ биццеуи кӕмӕн ес, еу уӕхӕн хуӕрӕ Лизӕ зӕгъуй: «Цӕмӕй нӕ сувӕллӕнттӕ Йегови хуӕздӕр базудтайуонцӕ, уой туххӕй син мӕ сӕрихецауи хӕццӕ се ’ргом ӕздахтан, ци сфӕлдиста, уомӕ. Зӕгъӕн, нӕ куй хъӕбӕр фудаг ӕй. Ӕма ин ӕ миутӕбӕл нӕ сувӕллӕнттӕ арӕх фӕхходиуонцӕ. Мах ба еци фадуатӕй испайда кӕнианӕ, цӕмӕй син балӕдӕрун кӕнӕн, Йеговӕ дӕр мах хузӕн раходун ке уарзуй».

14. Ниййергутӕ сувӕллӕнттӕн цӕмӕн гъӕуама ӕнхус кӕнонцӕ хуарз ӕмбӕлттӕ иссерунмӕ? (Ӕмбесӕндтӕ 13:20).

¹⁴ 4 уагӕвӕрд: уӕ сувӕллӕнттӕн ӕнхус кӕнтӕ хуарз ӕмбӕлттӕ иссерунмӕ.  Библий ӕргом финст ӕй, не ’мбӕлттӕ нӕбӕл кенӕ хуарзӕрдӕмӕ рабӕрӕг унцӕ, кенӕ ба лӕгъузӕрдӕмӕ. (Бакӕсӕ Ӕмбесӕндтӕ 13:20.) Ниййергутӕ, уӕ сувӕллӕнттӕ сӕ рӕстӕг ке хӕццӕ ӕрветунцӕ, уой зонетӕ? Се ’мбӕлтти син фӕсмӕретӕ? Ескӕд рӕстӕг еумӕ ӕрвистайтӕ? Уӕ бон ци ӕй кӕнун, цӕмӕй уӕ сувӕллӕнттӕ, Йегови ка уарзуй, уони хӕццӕ лимӕн кӕнонцӕ? (1 Кор. 15:33). Зӕгъӕн, уӕ бон ӕй уӕхӕн хуӕртӕ ӕма ӕнсувӕрти уӕхемӕ иуазӕгуати хонун (Пс. 119:63).

15. Ниййергути бон куд ӕй сувӕллӕнттӕн банхус кӕнун хуарз ӕмбӕлттӕ иссерунмӕ?

¹⁵ Тони ӕма ӕ бийнойнагӕн ес ӕртӕ кизги ӕма дууӕ биццеуи. Етӕ сӕ сувӕллӕнттӕн хуарз ӕмбӕлттӕ иссерунмӕ банхус кодтонцӕ. Тони зӕгъуй: «Берӕ ӕнзти дӕргъи нӕхемӕ ӕрбахонианӕ аллихузи хуӕртӕ ӕма ӕнсувӕрти – каргунти дӕр ӕма ӕригӕнтти дӕр, айдагъ рамийнасӕ кӕнунмӕ нӕ, фал ма нӕ бийнонти ахурмӕ дӕр. Балимӕн унмӕ уомӕй хуӕздӕр фадуат не ’ссердзӕнцӕ. Уомӕй уӕлдай ма нӕмӕ ӕхсӕвеуатӕй байзайиуонцӕ районон цӕстӕдаргутӕ, миссионертӕ, удта ӕндӕр хуӕртӕ ӕма ӕнсувӕртӕ дӕр. Нӕ сувӕллӕнттӕн е куд пайда адтӕй, уомӕн зӕгъӕн дӕр нӕййес. Еци еузӕрдон лӕггадгӕнгутӕ Йеговӕн сӕ хъауритӕ не ’вгъау кодтонцӕ ӕма ин зингзӕрдӕй лӕггадӕ кодтонцӕ. Сӕ цӕветтон нӕ сувӕллӕнттӕн дӕр банхус кодта Йегови бауарзун». Ниййергутӕ, уӕ сувӕллӕнтти уе ’нхус гъӕуй, цӕмӕй хуарз ӕмбӕлттӕ иссеронцӕ.

16. Кӕд уӕ сувӕллони Йеговӕн лӕггадӕ кӕнун нӕ фӕндуй, уӕд уӕ зӕрдӕбӕл ци гъӕуама дарайтӕ?

¹⁶ Гӕнӕн ес, ӕма уӕ сувӕллӕнттӕй кедӕр Йеговӕн лӕггадӕ кӕнун нӕ бафӕнддзӕй, кӕд ӕгас хъауритӕй архайдтайтӕ, уӕддӕр. Фал е уобӕл дзорӕг нӕй, ӕма лӕгъуз ниййергутӕ айтӕ. Йеговӕ алкӕмӕндӕр, уой хӕццӕ ба ма уӕ сувӕллӕнттӕн дӕр, равардта равзаруни барӕ. Уомӕ гӕсгӕ алли адӕймагӕн дӕр ӕхе бон ӕй ниллух кӕнун, Йеговӕн лӕггадӕ кӕндзӕй ӕви нӕ. Кӕд уӕ сувӕллон Йегови надӕй райеуварс ӕй, уӕд дӕр еу афони, ка ’й зонуй, фӕстӕмӕ ӕрбаздӕхдзӕй. Киристе исӕфт фурти туххӕй  ци фӕсномуг хабар радзурдта, уой уӕ зӕрдӕбӕл даретӕ (Лук. 15:11–19, 22–24). Еци биццеу хъӕбӕр ӕгадӕ уавӕрмӕ ӕрхаудтӕй, фал фӕстагмӕ ӕхемӕ ӕрцудӕй. Кадӕр зӕгъдзӕй: «Е рӕсугъд аргъау ӕй. Царди уотӕ нӕ фӕууй». Фал е уотӕ нӕй. Ӕма е бӕрӕг ӕй еу ӕригон биццеу Элий хабарӕй.

17. Элий хабар цӕбӕл дзорӕг ӕй?

¹⁷ Эли радзурдта: «Мӕ ниййергутӕ хъӕбӕр архайдтонцӕ, цӕмӕй Йегови ӕма ӕ Дзурд Библи бауарзтайнӕ. Фал ирӕзгӕ кари ку адтӕн, уӕд мӕ ниййергутӕмӕ нӕбал игъустон». Эли сосӕггай цидӕр лӕгъуз гъуддӕгтӕ кӕнун райдӕдта. Ӕ ниййергутӕ бӕргӕ архайдтонцӕ, цӕмӕй фӕррӕстмӕ уа, фал сӕ гъуди дӕр нӕ кодта. Эли хӕдзарӕй рандӕ ’й ӕма ’й куддӕриддӕр фӕндадтӕй, уотӕ цардӕй. Фал уӕддӕр еуӕй-еухатт е ’мбӕлттӕй еуемӕн игъосун кодта. Эли зӕгъуй: «Ме ’мбалӕн Йегови туххӕй куд фулдӕр дзурдтон, уотӕ ибӕл мӕхуӕдӕг дӕр фулдӕр сагъӕс кодтон. Мӕ ниййергутӕ мин мӕ зӕрди ци рӕстдзийнади нӕмуг ниййаразтонцӕ, е сабургай ирӕзун райдӕдта». Рӕстӕг рацудӕй ӕма Эли фӕстӕмӕ ӕмбурдмӕ ӕрбаздахтӕй. Дӕ цӕститӕбӕл рауайун кӕнӕ, ӕ ниййергутӕ куд цийнӕ кодтонцӕ! Етӕ Элийӕн ӕ минкъийӕй фӕстӕмӕ ӕнхус кодтонцӕ Йегови бауарзун, ӕма сӕ хъиамӕттӕ дзӕгъӕли нӕ фӕцӕнцӕ! (2 Тим. 3:14, 15) *.

18. Ӕгас хъауритӕй ка архайуй, цӕмӕй сувӕллӕнттӕн Йегови бауарзун кӕна, еци ниййергути туххӕй ци гъуди кӕнис?

¹⁸ Ниййергутӕ, расагъӕс кӕнайтӕ, цӕхуӕн кадӕй исхайгин айтӕ – Йеговӕн лӕггадӕ кӕнунмӕ нӕуӕг фӕлтӕр исгъомбӕл кӕнун! (Пс. 78:4–6). Е ӕнцон нӕй. Фал сумах растауйнаг айтӕ, уомӕн ӕма еци кустмӕ уӕлӕнгай цӕстӕй нӕ кӕсетӕ. Мадта идарддӕр дӕр уӕ сувӕллӕнтти гъомбӕл кӕнтӕ, Йеговӕ куд амонуй, уотӕ. Уотемӕй нӕ уӕларвон Фидӕ Йегови зӕрдӕ рохс кӕндзиайтӕ (Еф. 6:4).