1–3. Йегови лӕггадгӕнгутӕ дӕр хатгай цӕй туххӕй фӕккӕунцӕ?

 ФӔСТАГ хатт кӕд кудтӕ? Фӕууй уотӕ, ӕма адӕймагӕн ӕ фурцийнӕй ӕ цӕстисугтӕ ӕруайунцӕ. Фал арӕхдӕр фӕккӕуӕн, нӕ зӕрдӕ естӕбӕл ку фӕрресуй, уӕд. Зӕгъӕн, нӕ хеуӕнттӕй еске ку рамӕлуй, уӕд нӕ цӕстисугтӕн бауорамӕн нӕбал фӕууй. Еугонд Штаттӕй еу хуӕрӕ Лорӕ загъта: «Мӕ кизгӕ ку рамардӕй, уӕд мӕбӕл дуйне гъе уотӕ баталингӕ ’й, ӕма мӕмӕ рохси цъирт некӕцӕйбал калдӕй. Мӕ зӕрдӕ гъе уотӕ скъудтӕ кодта, ӕма ма цӕргӕ куд кӕнун, уобӕл дес кодтон» *.

² Фал арӕх ӕндӕр цӕйдӕрти туххӕй дӕр фӕккӕуӕн. Японийӕй еу пионер хуӕрӕ Хироми зӕгъуй: «Игъосун кӕнгӕй мӕмӕ ку неке байгъосуй, уӕд мин е уотӕ зин фӕууй, ӕма мӕ зӕрдӕ бамӕгур уй. Ӕма уӕд Йеговӕн кӕугӕй фӕллигъстӕ кӕнун, цӕмӕй, рӕстдзийнадӕ базонун ке фӕндуй, уонӕй уӕддӕр еу ескӕбӕл исӕмбӕлон».

³ Аци хуӕртӕ цӕй кой ракодтонцӕ, уой беретӕ сӕхецӕй дӕр зонунцӕ (1 Пет. 5:9). Мах фӕндуй Йеговӕн цийнӕгӕнгӕй лӕггадӕ кӕнун. Фал фӕууй уотӕ дӕр, ӕма Йеговӕн цӕстисуг калгӕй фӕллӕггадӕ кӕнӕн, зӕгъӕн, ести зиан нӕбӕл ку ’рцӕуй, естӕмӕй ку фӕффудӕнгъӕл уӕн кенӕ ести зин уавӕри ку бахауӕн ӕма, Хуцаубӕл еузӕрдон ан ӕви нӕ, уой бавдесун нӕ ку фӕгъгъӕуй, уӕд (Пс. 6:6; 100:2). Уӕхӕн ӕнкъарӕнтӕ нӕмӕ ку фӕззиннуй, уӕд нин ци банхус кӕндзӕй?

4. Аци статьяй цӕмӕ ӕркӕсдзиан?

⁴ Йесо Киристейӕй берӕ цӕбӕлдӕрти ахур кӕнӕн. Хатгай уой зӕрдӕ дӕр рахъурмӕ уидӕ ӕма ма ӕ цӕстисугтӕ дӕр ӕруайиуонцӕ (Иоан. 11:35; Лук. 19:41; 22:44; Дзиуит. 5:7). Гъӕйдӕ ӕркӕсӕн ӕртӕ уӕхӕн хабаремӕ. Еци хабӕрттӕмӕ ку ’ркӕсӕн, уӕд Йесой ӕма ӕ уӕларвон Фидӕ Йегови никки  хуӕздӕр зондзиан. Уомӕй уӕлдай ма ӕркӕсдзиан, ци нин банхус кӕндзӕй, цӕйбӕрцӕдӕр рӕстӕг нӕ цӕстисуг ку нӕбал фӕссор кӕнуй, уӕд.

5. Иоанни 11:32–36 финст дзурдтӕй нӕ бон ци ӕй Киристей туххӕй базонун?

⁵ Нӕ эри 32 анзи, зумӕги, Киристей хуарз ӕмбал Лазӕр хъӕбӕр фӕссӕйгӕ ’й ӕма рамардӕй (Иоан. 11:3, 14). Лазӕрӕн адтӕй дууӕ хуӕри: Марфӕ ӕма Марийӕ. Йесо еци бийнонтӕ берӕ уарзта. Лазӕри мӕлӕт Марфӕ ӕма Марийӕн хъӕбӕр устур маст ӕрхаста. Цалдӕр боней фӕсте сӕмӕ Йесо Вифанимӕ ’рбацудӕй. Марфӕ уой ку фегъуста, уӕд ӕ размӕ рацудӕй. Дӕ цӕститӕбӕл рауайун кӕнӕ, ӕ цӕстисугтӕ гӕр-гӕрӕй куд уайунцӕ ӕма уотемӕй Киристейӕн куд зӕгъуй: «Хецау, ду ами ку адтайсӕ, уӕд ме ’нсувӕр нӕ рамардайдӕ» (Иоан. 11:21). Йесо ку фӕууидта, Марфӕ, Марийӕ ӕма ма иннӕ адӕн Лазӕрбӕл куд маст кӕнунцӕ, уӕд ӕхе зӕрдӕ дӕр исхъурмӕ ’й ӕма ӕ цӕстисугтӕ ӕруадӕнцӕ. (Бакӕсӕ Иоанни 11:32–36.)

6. Киристейӕн ӕ цӕстисугтӕ цӕмӕн ӕруадӕнцӕ?

⁶ Цума Киристейӕн ӕ цӕстисугтӕ цӕмӕн ӕруадӕнцӕ? Энциклопедий «Понимание Писания» уотӕ финст ӕй: «Ӕ хъазар ӕмбал Лазӕри мӕлӕт ӕма ибӕл ӕ хуӕртӕ куд маст кӕнунцӕ, е Йесойӕн гъе уотӕ зин адтӕй, ӕма ӕ зӕрдӕ исунгӕг ӕй ӕма никкудтӕй» *. Ӕвӕдзи, Йесойӕн ӕ цӕститӕбӕл рауадӕй, Лазӕр ӕ нези туххӕй куд гъезӕмарӕ кодта ӕма, ӕ кӕрон хӕстӕг ке ӕй, уобӕл куд маст кодта, е. Удта Марфӕ ӕма Марийӕ се ’нсувӕрбӕл куд гъарӕнгӕ кӕнунцӕ, уомӕ кӕсун дӕр ӕнцон кӕцӕй адтайдӕ. Ӕма кӕд махӕй дӕр ескӕбӕл уӕхӕн зиан ӕрцудӕй, уӕд нин еци хабӕрттӕ ӕнӕзонгӕ нӕ ’нцӕ. Аци хабарӕй нӕ бон ӕй ӕртӕ ӕхсидзгӕ гъуддагебӕл исахур ун. Гъӕйдӕ сӕмӕ ӕркӕсӕн.

7. Киристейӕн ӕ цӕстисугтӕ ке ӕруадӕнцӕ, уомӕй Йегови туххӕй ци ес базонӕн?

⁷ Йеговӕ нӕ хуарз лӕдӕруй. Йесо алцӕмӕйдӕр ӕ Фиди хузӕн ӕй (Дзиуит. 1:3). Мадта Йесойӕн ӕ цӕстисугтӕ ке ӕруадӕнцӕ, е  уобӕл дзорӕг ӕй, ӕма Йеговӕн дӕр хъӕбӕр зин адтӕй (Иоан. 14:9). Кӕд дӕуӕн дӕр дӕ хеуӕнттӕй еске нӕбал ӕй, уӕд ӕй федарӕй зонӕ: Йеговӕ дин дӕ рист айдагъ уингӕ нӕ кӕнуй, фал, дӕуӕн куд зин ӕй, уомӕн дӕр гъе уотӕ зин фӕууй. Е ӕй зонуй, куд зӕрдӕрист ан, уой, ӕма ’й фӕндуй еци рист исесун (Пс. 34:18; 147:3).

8. Нӕ бон цӕмӕн ӕй федарӕй ӕууӕндун, берӕ ке уарзтан, уони Киристе ке райгас кӕндзӕй?

⁸ Киристей хъӕбӕр фӕндуй райгас кӕнун, берӕ ке уарзтан, уони. Гъуди ма ’й кӕнис, Киристе Марфӕн ци загъта, ку нӕма никкудтӕй, уӕд? Йесо ин загъта: «Де ’нсувӕр райгас уодзӕй» (Иоан. 11:23–27). Марфӕ Киристебӕл ӕууӕндтӕй. Е Йеговӕн еузӕрдонӕй лӕггадӕ кодта ӕма ’й зудтайдӕ, ӕностӕ раздӕр пахампартӕ Илья ӕма Елисей кедӕрти ке райгас кодтонцӕ (1 Пад. 17:17–24; 2 Пад. 4:32–37). Удта Киристе ӕхуӕдӕг дӕр кедӕрти ке райгас кодта, уой дӕр куд нӕ фегъустайдӕ (Лук. 7:11–15; 8:41, 42, 49–56). Ӕма мах бон дӕр ӕй федарӕй ӕууӕндун, ка нин рамардӕй, уонӕбӕл нӕуӕгӕй ке фембӕлдзиан. Киристе еци уавӕри ке искудтӕй, е уобӕл дзорӕг ӕй, ӕма ӕхуӕдӕг дӕр хъӕбӕр ӕнгъӕлмӕ кӕсуй, берӕ ке уарзтан, уони кӕд райгас кӕндзӕй, еци рӕстӕгмӕ.

9. Киристей хузӕн мах бон дӕр куд ӕй, зиан кӕбӕл ӕрцудӕй, уони фарсмӕ балӕуун? Ӕрхӕссӕ цӕветтон.

⁹ Зиан кӕбӕл ӕрцудӕй, уой фарсмӕ балӕууӕ. Йесо Киристе Марфӕ ӕма Марийи хӕццӕ айдагъ кӕугӕ нӕ кодта, фал ма сӕмӕ байгъуста ӕма сӕ ӕрсабур кодта. Мах бон дӕр ӕй уотӕ архайун. Австралийӕй еу хестӕр нӕлгоймаг Дэн радзурдта: «Мӕ бийнойнаг ку рамардӕй, уӕд мин хъӕбӕр зин адтӕй. Еци рӕстӕг цалдӕр бийнонти мӕ фарсмӕ ӕрбалӕудтӕнцӕ. Ӕхсӕвӕй-бонӕй байгъосунмӕ цӕттӕ адтӕнцӕ. Сӕ рази кӕунмӕ дӕр не ’фсӕрми кӕнинӕ ӕма мӕ зӕрди цидӕриддӕр фӕууидӕ, уой син радзоринӕ. Арӕх мин хъауритӕ ӕгириддӕр нецӕмӕн фӕууидӕ, нӕдӕр машинӕ нихснунмӕ, нӕдӕр туканмӕ фӕццӕунмӕ, нӕдӕр ба хуӕруйнаг искӕнунмӕ. Ӕма мин уӕд ме ’мбӕлттӕ хъӕбӕр ӕнхус кодтонцӕ. Мӕ хӕццӕ ковгӕ дӕр арӕх фӕккӕниуонцӕ. Еци рӕстӕг мин ӕцӕг ӕмбӕлттӕ иссӕнцӕ, „зин сахат адӕймаги фарсмӕ балӕуунмӕ ка райгуруй“, уӕхӕн ӕмбӕлттӕ» (Ӕмб. 17:17).

10. Радзорӕ Лукай 19:36–40 финст хабӕрттӕ ӕма, уой фӕсте ци ’рцудӕй, уой.

¹⁰ Иннӕ хабар ба ӕрцудӕй нӕ эри 33 анзи 9 нисани. Йесо Йерусалиммӕ фӕххӕстӕг кӕнуй. Ӕ размӕ хъӕбӕр берӕ адӕн рацӕунцӕ ӕма сӕ уӕледарӕс надбӕл итаунцӕ. Уотемӕй ӕй ӕвдесунцӕ, Киристей сӕ паддзахбӕл ке нимайунцӕ. Адӕн еугурӕйдӕр хъӕбӕр цийнӕ кӕнунцӕ. (Бакӕсӕ Лукай 19:36–40.) Уомӕ гӕсгӕ, идарддӕр ци ’рцудӕй, е Киристей ахуркӕнуйнӕгтӕмӕ ӕнахур фӕккастӕй. Киристе «горӕтмӕ ку бахъӕрдтӕй ӕма имӕ ку бакастӕй, уӕд никкудтӕй» ӕма загъта, федӕни Йерусалимбӕл цӕхуӕн ӕнамонд хабар ӕрцӕудзӕй, уой (Лук. 19:41–44).

11. Йесо Йерусалими цӕргутӕбӕл цӕмӕн никкудтӕй?

¹¹ Йесойӕн хъӕбӕр зин адтӕй, уомӕн ӕма ’й зудта, кӕд имӕ адӕн нур уӕхӕн дзӕбӕх цӕстӕй ракастӕнцӕ, уӕддӕр Паддзахади хабармӕ ба сӕ фулдӕр ке нӕ байгъосдзӕнцӕ. Уой туххӕй Йерусалим пурхӕгонд ӕрцӕудзӕй, берети рамардзӕнцӕ, ка ма си байзайа, уони ба уацари ке фӕккӕндзӕнцӕ (Лук. 21:20–24). Ӕма, ӕцӕгӕйдӕр, уотӕ рауадӕй – адӕнӕй сӕ фулдӕр Киристей фӕдбӕл нӕ рацудӕнцӕ. Ду кӕми цӕрис, уоми ба адӕн хуарз хабармӕ ци цӕстӕй кӕсунцӕ? Кӕд дӕумӕ дӕр беретӕ нӕ байгъосунцӕ, уӕд дин Лукай 19 сӕри финст хабар куд банхус кӕндзӕй? Гъӕйдӕ ӕркӕсӕн, цӕхуӕн ӕртӕ гъуддагебӕл си ахур кӕнӕн, уомӕ.

12. Йесо ке никкудтӕй, уомӕй Йегови туххӕй ци ес базонӕн?

¹² Йеговӕ адӕнбӕл тухсуй. Киристе ке никкудтӕй,  уомӕй рабӕрӕг ӕй, Йеговӕ дӕр адӕнмӕ цийфӕнди цӕстӕй ке нӕ кӕсуй. 2 Петури 3:9 финст ӕй, Йегови ке «нӕ фӕндуй, цӕмӕй еске фесӕфа, фал ӕй фӕндуй, цӕмӕй алкӕмӕндӕр уа ӕрфӕсмон кӕнуни фадуат». Мах дӕр адӕнмӕ Йегови хузӕн зӕрдӕ ке дарӕн, е бӕрӕг уодзӕй, алли фадуатӕй дӕр ку пайда кӕнӕн, цӕмӕй хуарз хабар фулдӕр адӕнӕн фегъосун кӕнӕн ӕма сӕ зӕрдӕмӕ багъара (Матф. 22:39).

13, 14. Киристе адӕнӕн ке тӕрегъӕд кодта, е цӕмӕй бӕрӕг адтӕй ӕма ’й мах бон куд ӕй фӕнзун?

¹³ Йесо Киристе игъосун кӕнунмӕ ӕ хъауритӕ не ’вгъау кодта. Е алли фадуатӕй дӕр пайда кодта, цӕмӕй адӕни ахур кодтайдӕ (Лук. 19:47, 48). Хатгай имӕ байгъосунмӕ гъе уойбӕрцӕ адӕн ӕрӕмбурд уидӕ, ӕма ин ӕ ахуркӕнуйнӕгти хӕццӕ ести ракомидзаг кӕнунмӕ дӕр рӕстӕг нӕбал байзаидӕ (Мар. 3:20). Адӕймаги хӕццӕ фембӕлунмӕ ӕхсӕви дӕр цӕттӕ фӕууидӕ (Иоан. 3:1, 2). Цума цӕмӕн? Уомӕн ӕма адӕни уарзта ӕма син тӕрегъӕд кодта. Гъигагӕн, ка имӕ игъуста, уонӕй сӕ фулдӕр киристӕнттӕ не ’ссӕнцӕ, фал ибӕл цӕмӕй баууӕндонцӕ, уой туххӕй ба си алкедӕр фагӕ зудта. Мах дӕр куд нӕ фӕндуй, цӕмӕй хуарз хабар ӕгасемӕндӕр фегъосун кӕнӕн (Гъуд. 10:42). Уой туххӕй ба гъӕуама цӕттӕ уӕн, игъосун кӕнунбӕл куд исахур ан, уой еуӕй-еухатт феййевунмӕ дӕр.

¹⁴ Куд ахур дӕ, уой феййевунмӕ цӕттӕ уо. Рӕстдзийнадӕмӕ байгъосун ке фӕндуй, уӕхӕн адӕн ма берӕ ес. Фал ӕрмӕстдӕр еци еу афони ку игъосун кӕнай, уӕд, гӕнӕн ес, ӕма еци адӕнбӕл макӕд исӕмбӕлай. Еу пионер хуӕрӕ Матильдӕ радзурдта: «Мӕ сӕрихецауи хӕццӕ архайӕн, цӕмӕй аллихузи афони игъосун кӕнӕн. Сӕумӕй, адӕн косгӕ кӕми кӕнунцӕ, уоми фегъосун кӕнӕн. Рӕфти адӕн ӕндӕмӕ ку ракӕлунцӕ, уӕдта стенди хӕццӕ рацӕуӕн. Изӕригӕнтти ба адӕн арӕхдӕр хӕдзари фӕуунцӕ ӕма уӕд участокки игъосун кӕнунмӕ рандӕ уӕн». Алкӕмӕндӕр ни, ӕвӕдзи, игъосун кӕнунмӕ ӕхе график ес. Фал фиццагидӕр адӕнбӕл ку сагъӕс кӕнӕн ӕма, куд ахур ан, уой феййевунмӕ цӕттӕ ку уӕн, уӕд нӕ хъиамӕттӕ тиллӕг ӕрхӕсдзӕнцӕ ӕма Йегови зӕрдӕ дӕр барохс кӕндзиан.

15. Лукай 22:39–44 финст дзурдтӕмӕ гӕсгӕ Йесо ӕ мӕлӕти размӕ, еци ’хсӕвӕ цӕбӕл кувта?

¹⁵ Нӕ эри 33 анзи 14 нисани ӕхсӕвӕ Йесо Гефсиманий рӕзӕдонӕмӕ ӕрбацудӕй. Уоми  Йеговӕмӕ зӕрдибунӕй искувта. (Бакӕсӕ Лукай 22:39–44.) Дзиуиттӕгтӕмӕ 5:7 финст ӕй, Йесо «дзиназгӕй ӕма цӕстисуг калгӕй» Йеговӕн ке лигъстӕ кодта. Цӕбӕл? Е адтӕй ӕ мӕлӕти размӕ фӕстаг ӕхсӕвӕ. Гъема Йеговӕй курдта, цӕмӕй ибӕл еузӕрдонӕй байзадайдӕ ӕма ин ӕ фӕндон кӕронмӕ исӕнхӕст кодтайдӕ. Йеговӕ ’й уидта, ӕ Фурт куд хъӕбӕр тухст адтӕй, уой ӕма имӕ изӕди рарвиста, цӕмӕй ӕй бафедар кодтайдӕ.

16. Цума Йесо Гефсиманий рӕзӕдони ку кувта, уӕд цӕмӕн кудтӕй?

¹⁶ Цума Йесо Гефсиманий рӕзӕдони ку кувта, уӕд цӕмӕн кудтӕй? Зин ин адтӕй, уомӕн ӕма ’й адӕн нимайдзӕнцӕ, Хуцауи ном ка ӕгадӕ кӕнуй, уӕхӕн адӕймагбӕл. Йесо ’й лӕдӕрдтӕй, цӕхуӕн устур ихӕс ибӕл ес, уой. Гъӕуама Йеговӕбӕл кӕронмӕ дӕр еузӕрдонӕй байзадайдӕ ӕма ин уомӕй ӕ хуарз ном искадгин кодтайдӕ. Махӕй дӕр абони кадӕртӕ цӕхуӕндӕр фӕлварӕнтӕбӕл исӕмбӕлунцӕ. Уӕхӕн уавӕрти нӕхе куд фӕддарӕн, уомӕй рабӕрӕг уй, Йеговӕбӕл еузӕрдон ан ӕви нӕ, е. Цума нин еци рӕстӕгути Киристей цӕветтон куд банхус кӕндзӕй? Гъӕйдӕ ӕркӕсӕн ӕртӕ ӕхсидзгӕ гъуддагемӕ.

17. Йеговӕ Киристей зӕрдиаг кувдбӕл ке исдзуапп кодта, уомӕй цӕбӕл ахур кӕнӕн?

¹⁷ Йеговӕ нин нӕ зӕрдиаг кувдтитӕмӕ игъосуй. Йеговӕ ӕ фурти кувдмӕ хъӕбӕр лӕмбунӕг байгъуста. Цӕмӕн? Уомӕн ӕма ’й уидта, Йесойӕн тӕккӕ ӕхсидзгӕдӕр ке ӕй ӕ Фидӕбӕл еузӕрдонӕй байзайун ӕма ин ӕ ном искӕдзос кӕнун. Мадта федарӕй зӕгъӕн ес, ӕма махӕн дӕр нӕ царди еци гъуддӕгтӕй ӕхсидзгӕдӕр ку неци уа, уӕд нин Йеговӕ нӕ кувдтитӕ игъосдзӕй ӕма нин сӕбӕл дзуапп дӕтдзӕй (Пс. 145:18, 19).

18. Йесой цӕмӕн ес исхонӕн, хуарз нӕ ка лӕдӕруй, уӕхӕн ӕмбал?

¹⁸ Йесо нӕ хуарз лӕдӕруй. Зиндзийнӕдтӕн бухсун нин ӕнцондӕр уодзӕй, хуарз ӕмбал нӕ фарсмӕ ку уа, уӕлдайдӕр ба кӕд е дӕр уӕхӕн цидӕртӕ бавзурста, уӕд. Ӕма Йесо Киристей раст гъе уӕхӕн ӕмбал исхонӕн ес. Е ӕй зонуй, адӕймагӕн куд зин фӕууй, ӕхемӕ ӕнӕхъаурӕ ку фӕккӕсуй ӕма ’й еске ӕнхус ку фӕгъгъӕуй, уӕд. Е ӕй зонуй, медӕгӕй цӕхуӕн ан ӕма нӕ зӕрди ци ес, уой, ӕма нӕ багъӕуаги сахат ӕнӕ ӕнхусӕй неци хузи ниууадздзӕй (Дзиуит. 4:15, 16). Йеговӕ Йесойӕн ӕ кувдбӕл куд исдзуапп кодта, уомӕй Йесо хъӕбӕр боз адтӕй. Йеговӕ имӕ изӕди рарвиста,  цӕмӕй ӕй бафедар кодтайдӕ. Уомӕй цӕбӕл ахур кӕнӕн? Махӕн дӕр Йеговӕ нӕ кувдтитӕбӕл аллихузи исдзуапп кӕнуй, зӕгъӕн, нӕ публикацити, видеороликти, радзубандити кенӕ хестӕр нӕлгоймӕгти ӕма хуарз ӕмбӕлтти фӕрци. Ӕма мах дӕр Киристей хузӕн гъӕуама уӕхӕн ӕнхусбӕл арази кӕнӕн ӕма си боз уӕн.

19. Ци дин банхус кӕндзӕй, естӕбӕл хъӕбӕр ку тухсай, уӕд? Ӕрхӕссӕ цӕветтон.

¹⁹ Йеговӕ уӕ ӕ фарнӕй исхайгин кӕндзӕй. Йеговӕ нӕ куд бафедар кӕнуй? Ку имӕ фӕкковӕн, уӕд нин раттуй фарнӕ, «зунд кӕбӕл нӕ хъӕртуй, еци фарнӕ» (Фил. 4:6, 7). Хуцауи фарнӕ нин ӕнхус кӕнуй, цӕмӕй нӕ зӕрдӕ ӕрсабур уа ӕма нӕ тухст сагъӕстӕй исуӕгъдӕ уӕн. Уой ӕхебӕл бавзурста еу хуӕрӕ Люсийӕ. Е радзурдта: «Хатгай мӕхемӕ гъе уотӕ еунӕг фӕккӕсун, ӕма мӕ нецибал фӕгъгъӕуй. Уотӕ кӕсун дӕр ма мӕмӕ райдайуй, цума мӕ Йеговӕ нӕ уарзуй. Ӕма уӕхӕн рӕстӕгути Йеговӕмӕ ку раковун ӕма мӕ цидӕриддӕр тухсун кӕнуй, уой ин ку радзорун, уӕд мӕ уод ӕрсабур уй». Мадта бӕрӕг ӕй, кувди фӕрци нӕ зӕрди ӕцӕгӕйдӕр фарнӕ ке ӕрцӕруй.

20. Киристей цардӕй ци ӕртӕ хабаремӕ ӕркастан, уонӕй цӕбӕл ахур кӕнӕн?

²⁰ Аци статьяй ӕркастан Йесо Киристей цардӕй ӕртӕ хабаремӕ. Еци хабӕрттӕй берӕ цӕбӕлдӕрти ахур кӕнӕн, удта нин уодӕнцойнӕ дӕр хӕссунцӕ. Мах ӕркастан, куд ӕхсидзгӕ ӕй, зиан кӕбӕл ӕрцудӕй, уӕхӕн адӕймаги фарсмӕ балӕуун. Удта ма нӕ бон ке ӕй федарӕй ӕууӕндун, уӕхӕн зиан нӕхебӕл ку ’рцӕуа, уӕд Йеговӕ ӕма Йесо нӕ фарсмӕ ке уодзӕнцӕ. Уомӕй уӕлдай ма нӕ аци статья баразӕнгард кодта, цӕмӕй, кӕмӕн игъосун кӕнӕн, еци адӕни лӕдӕрӕн ӕма син тӕрегъӕд кӕнӕн, уомӕн ӕма сӕмӕ Йеговӕ ӕма Йесо раст гъе уӕхӕн зӕрдӕ дарунцӕ. Удта ма нин аци статья нӕ зӕрдӕбӕл ӕрлӕуун кодта, уодӕнцойнӕ нин ка хӕссуй, еу уӕхӕн гъуди: Йеговӕ ӕма нӕ ӕ Фурт хуарз лӕдӕрунцӕ, нӕ тухститӕмӕ нин цийфӕнди цӕстӕй нӕ кӕсунцӕ ӕма нин багъӕуаги рӕстӕг ӕнӕмӕнгӕй ке банхус кӕндзӕнцӕ. Мадта нин аци гъудитӕ идарддӕр дӕр федарӕй лӕуунмӕ ӕнхус кӕнӕнтӕ, цалинмӕ Йеговӕ ӕ дессаги зӕрдӕвӕрд не ’сӕнхӕст кӕна ӕма нин нӕ цӕстисугтӕ ма ниссӕрфа, уӕдмӕти! (Рарг. 21:4).