1. Нӕ бон куд ӕй Йегови хӕццӕ рӕстӕг ӕрветун?

 АЛКЕ зӕрдӕмӕ дӕр ни цӕуй, берӕ ке уарзӕн, уони хӕццӕ рӕстӕг ӕрветун. Зӕгъӕн, лӕг ӕма уосӕн ӕхцӕуӕн фӕууй изӕригӕнтти еумӕ рабадун кенӕ еститӕ ракосун. Ӕригӕнттӕ ба уарзунцӕ се ’нгӕртти хӕццӕ фембӕлун. Ӕма ни ӕгасей зӕрдӕмӕ дӕр хъӕбӕр цӕуй, хуӕртӕ ӕма ӕнсувӕрти хӕццӕ еумӕ ку ӕрӕмбурд уӕн. Фал алцӕмӕй фулдӕр ба уарзӕн нӕ Хуцау Йегови хӕццӕ рӕстӕг ӕрветун. Фал кадӕр зӕгъдзӕй: «Ке нӕ уинис, уой хӕццӕ куд ес рӕстӕг ӕрветӕн?» Йеговӕмӕ ку фӕкковӕн, ӕ Дзурд ин ку фӕккӕсӕн, удта ин ӕ менеугутӕбӕл ӕма нин ци федӕн ӕрцӕттӕ кодта, уобӕл ку фӕссагъӕс кӕнӕн, уӕд, зӕгъӕн ес, ӕма ӕ хӕццӕ рӕстӕг ферветӕн. Ӕма еци рӕстӕгӕн ӕцӕгӕйдӕр устур аргъ ес (Пс. 139:17).

2. Алкӕд нин ӕнцон ци нӕ фӕууй?

² Фал еци гъуддӕгтӕн рӕстӕг иссерун алкӕд ӕнцон нӕ фӕууй. Адӕймаги бони дӕргъи гъе уойбӕрцӕ гъуддӕгтӕ фӕгъгъӕуй бакӕнун, ӕма ин Йегови гъуддӕгтӕн фагӕ рӕстӕг иссерун зин фӕууй. Беретӕн ни кусти ӕма хӕдзари берӕ ихӕстӕ ес. Уомӕ гӕсгӕ нӕмӕ, гӕнӕн ес, ӕма уотӕ кӕсун райдайа, цума нин ковунмӕ, Библи кӕсунмӕ ӕма сагъӕс кӕнунмӕ рӕстӕг нӕбал ес.

3. Нӕ рӕстӕг ма нин ци радавуй?

³ Нӕ рӕстӕг ма нин еу цидӕр радавуй. Фӕууй уотӕ, ӕма цӕхуӕндӕр гъуддӕгти уотӕ ранигъулӕн, ӕма ’й лӕдӕргӕ дӕр нӕ бакӕнӕн, цӕйбӕрцӕ рӕстӕг сӕбӕл бахарз кодтан, уой. Еци рӕстӕг ба нӕ бон адтӕй Йегови хӕццӕ рарветун. Райсӕн ерхӕфсӕнтӕ ӕма уолӕфт. Дзубанди дӕр ибӕл нӕййес, алкедӕр ни уолӕфун фӕгъгъӕуй. Фал ерхӕфсӕнтӕ ӕма  уолӕфт цийфӕнди хуарз ма уонцӕ, уӕддӕр сӕбӕл ӕгӕр берӕ рӕстӕг ку харз кӕнӕн, уӕд нин Йегови гъуддӕгтӕн рӕстӕг нӕбал фагӕ кӕндзӕй. Мадта алцӕмӕндӕр гъӕуама ӕхе афонӕ уа (Ӕмб. 25:27; 1 Тим. 4:8).

4. Аци статьяй цӕмӕ ӕркӕсдзиан?

⁴ Аци статьяй ӕркӕсдзиан, цӕмӕн ӕй ӕхсидзгӕ, царди нин фиццаг бунати ци уодзӕй, уой ниллух кӕнун. Удта ма базондзиан, Йегови гъуддӕгтӕн ци рӕстӕг рахецӕн кӕнӕн, уомӕй хуӕздӕр куд уодзӕй пайда кӕнун ӕма е нӕхецӕн дӕр цӕхуӕн пайда ӕрхӕсдзӕй.

5. Ефесӕгтӕмӕ 5:15–17 финст дзурдтӕ ӕригӕнттӕн куд банхус кӕндзӕнцӕ тӕккӕ хуӕздӕр над равзарунмӕ?

⁵ Царди тӕккӕ хуӕздӕр над равзарӕ. Ӕригӕнттӕй беретӕ сагъӕс кӕнунцӕ, сӕ цардӕй куд хуӕздӕр ӕй, уотӕ куд испайда кӕнонцӕ, уобӕл. Еуӕрдиги сӕ сӕ ахургӕнгутӕ ӕма, Йегови Ӕвдесӕн ка нӕй, еци хеуӕнттӕ разӕнгард кӕнунцӕ, цӕмӕй уӕлдӕр ахурадӕ райсонцӕ ӕма сӕхецӕн хуарз ном искӕнонцӕ. Фал е еу бони куст нӕй – уобӕл берӕ рӕстӕг бахарз кӕнун гъӕудзӕй. Иннердиги ба сӕ сӕ ниййергутӕ ӕма ӕмбурди ӕмбӕлттӕ разӕнгард кӕнунцӕ, цӕмӕй сӕ цард Йеговӕн лӕггадӕ кӕнунмӕ иснивонд кӕнонцӕ. Йегови ка уарзуй, еци фӕсевӕд, ци уин банхус кӕндзӕй тӕккӕ хуӕздӕр унаффӕ рахӕссун? Гъӕйдӕ расагъӕс кӕнӕн Ефесӕгтӕмӕ 5:15–17 финст дзурдтӕбӕл. (Ба сӕ кӕсӕ.) Дӕхе бафӕрсӕ: «Йегови фӕндон цӕй медӕг ӕй? Цӕхуӕн унаффӕ ин барохс кӕндзӕй ӕ зӕрдӕ? Цӕмӕй мӕ рӕстӕгӕй, хуӕздӕр куд ӕй, уотӕ пайда кӕнон, уой туххӕй мӕ цӕхуӕн унаффӕ гъӕуй рахӕссун?» Иронх ди ма уӕд: лӕгъуз рӕстӕги цӕрӕн ӕма Сайтани дуйнейӕн тагъд ӕ кӕрон ӕрцӕудзӕй. Уомӕ гӕсгӕ хуӕздӕр уайдӕ, Йегови хӕццӕ фӕрсӕй-фарсмӕ кӕбӕл цӕудзӕнӕ, уӕхӕн над равзарун.

6. Марийӕ ци равзурста ӕма е хуӕздӕр хай цӕмӕн адтӕй?

⁶ Ӕхсидзгӕдӕр ци ӕй, уой фиццаг бунати ӕвӕрӕ. Еуӕй-еухатт, цӕмӕй Ефесӕгтӕмӕ 5:15–17 ци дзурдтӕ финст ес, уонӕмӕ гӕсгӕ архайӕн, уой туххӕй нӕ фӕгъгъӕуй равзарун, хуарз ци ӕй ӕма никки хуӕздӕр ци ӕй, уони астӕу. Цӕмӕй еци гъуди хуӕздӕр балӕдӕрӕн, уой туххӕй гъӕйдӕ ӕркӕсӕн еу хабармӕ. Еухатт Киристе Марфӕ ӕма Марийӕмӕ ӕрбацудӕй. Гъема Марфӕн е гъе уотӕ ӕхцӕуӕн адтӕй, ӕма Киристей цӕмӕй фӕххинца, уобӕл фӕцӕй. Цума Марийӕ ба еци рӕстӕг ци куста? Йесой къӕхти рази исбадтӕй ӕма имӕ лӕмбунӕг игъуста. Дзубанди дӕр ибӕл нӕййес, Марфи, куд хуӕздӕр ӕй, уотӕ фӕндадтӕй, фал Марийӕ хуӕздӕр хай равзурста (Лук. 10:38–42). Еци бон фингӕбӕл ци адтӕй, уой Марийӕ, ӕвӕдзи, гъуди дӕр нӕбал кодта. Фал Йесойӕй ци фегъуста, е ба си цӕргӕ-цӕрӕнбонти нӕ феронх ӕй. Марийӕ хъӕбӕр аргъ кодта, ӕ бон ке адтӕй Йесо Киристей хӕццӕ рӕстӕг ӕрветун. Ӕма мах дӕр гъе уотӕ фӕййаргъ кӕнӕн, Йегови хӕццӕ ци рӕстӕг ферветӕн, уомӕн. Цума нин ци банхус кӕндзӕй еци рӕстӕгӕй, хуӕздӕр куд ӕй, уотӕ пайда кӕнун?

7. Ковунмӕ, Библи ахур кӕнунмӕ ӕма сагъӕс кӕнунмӕ рӕстӕг хецӕн кӕнун ӕхсидзгӕ цӕмӕн ӕй?

⁷ Дӕ гъудий дарӕ: Йеговӕмӕ ке фӕкковӕн, Библи ке фӕййахур кӕнӕн ӕма ибӕл ке фӕссагъӕс кӕнӕн, е дӕр нӕ лӕггадӕмӕ хауй. Ку фӕкковӕн, уӕд нӕ уӕларвон Фиди хӕццӕ фӕдздзорӕн, е ба нӕ хъӕбӕр берӕ уарзуй (Пс. 5:7). Библи ку фӕййахур кӕнӕн, уӕд «Хуцауи туххӕй зонундзийнӕдтӕ» иссерӕн. Нӕ Хуцау ба ӕй зонундзийнӕдти Сауӕдонӕ  (Ӕмб. 2:1–5). Ци бакӕсӕн, уобӕл ку фӕссагъӕс кӕнӕн, уӕдта никки хуӕздӕр базонӕн, Йеговӕ цӕхуӕн Хуцау ӕй ӕма нин ци федӕн ӕрцӕттӕ кодта, уой. Цума уомӕй хуӕздӕр нӕ бон ӕй естӕбӕл нӕ рӕстӕг харз кӕнун? Мадта нӕ бон куд ӕй, нӕ лӕггадӕн ци рӕстӕг рахецӕн кӕнӕн, уомӕй хуӕздӕр пайда кӕнун?

8. Йесо дууинсӕй боней дӕргъи ӕдзӕрӕг будури ке фӕцӕй, уомӕй цӕбӕл ахур кӕнӕн?

⁸ Байархайӕ, цӕмӕй сабур бунат иссерай. Ӕркӕсӕн Йесой хабармӕ. Донаргъуд ку райста, уӕд ӕдзӕрӕг будури дууинсӕй боней дӕргъи фӕцӕй (Лук. 4:1, 2). Уоми Йесойӕн ӕ бон адтӕй сабурбӕл Йеговӕмӕ ковун ӕма расагъӕс кӕнун, ӕ фӕндон ин куд исӕнхӕст кӕна, уобӕл. Уотемӕй Хуцауи Фурт ӕхе бацӕттӕ кодта, федӕни имӕ ци зиндзийнӕдтӕ ӕнгъӕлмӕ кастӕй, уонӕмӕ. Уомӕй цӕбӕл ахур кӕнӕн? Кӕд нин устур бийнонтӕ ес, уӕд нин, ӕвӕдзи, уотӕ ӕнцон нӕ фӕууй сабур бунат иссерун. Францийӕй еу хуӕрӕ Жули уой ӕхецӕй зонуй. Ӕ сӕрихецауи хӕццӕ цӕрунцӕ хъӕбӕр минкъий къвартири, сӕ синхӕнттӕ ба хъӕбӕр хъӕлӕбагӕнагӕ ’нцӕ. Уой туххӕй Жулийӕн Йеговӕмӕ раковунмӕ сабур бунат иссерун хъӕбӕр зин фӕууй. Цума ци ’ргъуди кодта? Жули зӕгъуй: «Алли бон дӕр паркмӕ рацӕун. Уоми мӕ неке фӕхъхъор кӕнуй ӕма мӕ бон фӕууй Йегови хӕццӕ сабурбӕл зӕрдибунӕй радзубандитӕ кӕнун».

9. Йесо кувдӕн ке аргъ кодта, е цӕмӕй бӕрӕг адтӕй?

⁹ Арӕх Йесойӕн рауолӕфунмӕ рӕстӕг дӕр нӕ фӕууидӕ. Кумӕфӕнди ма рандадтайдӕ, уӕддӕр ӕ фӕдбӕл дуйне адӕн цудӕй, ӕма си алкедӕр ӕнхус агурдта. Еухатт ба, ци хӕдзари ӕрлӕудтӕй, уомӕ «ӕнӕгъӕнӕ горӕт» ӕрӕмбурд ӕй, ӕма си алкӕмӕндӕр гъудӕй рӕстӕг рахецӕн кӕнун. Фал ин кӕд уойбӕрцӕ гъуддӕгтӕ адтӕй, уӕддӕр рӕстӕг иссирдта, цӕмӕй ӕ Фиди хӕццӕ радзурдтайдӕ: «Сӕумӕ раги, талингӕ ма адтӕй, уотемӕй исистадӕй, ӕндӕмӕ рацудӕй, рандӕ ’й хебарӕ рауӕнмӕ ӕма уоми кувта» (Мар. 1:32–35).

10, 11. Матфеййи 26:40, 41 финст дзурдтӕмӕ гӕсгӕ Йесо ӕ апостолтӕн цӕхуӕн унаффӕ равардта ӕма идарддӕр ци ӕрцудӕй?

¹⁰ Ӕ мӕлӕти размӕ еци ӕхсӕвӕ Йесо байархайдта, цӕмӕй хебарӕ рауӕн иссирдтайдӕ ӕма имӕ ци ӕнгъӕлмӕ кӕсуй, уобӕл расагъӕс кодтайдӕ, удта ракувтайдӕ. Уомӕ гӕсгӕ Гефсиманий рӕзӕдонӕмӕ рандӕ ’й (Матф. 26:36). Еци изӕр Йесо ӕ апостолтӕн кувди туххӕй ӕхсидзгӕ унаффитӕ равардта.

¹¹ Гъӕйдӕ еци ӕхсӕвӕ нӕ зӕрдӕбӕл ӕрлӕуун кӕнӕн. Йесо ӕ апостолти хӕццӕ Гефсиманий рӕзӕдонӕмӕ рандӕ ’й. Уӕд ӕмбесӕхсӕвӕ адтӕй. Йесо ӕ ахуркӕнуйнӕгтӕн загъта, цӕмӕй ма бафунӕй адтайуонцӕ. Ӕхуӕдӕг ба еуварс рацудӕй, цӕмӕй ракувтайдӕ (Матф. 26:37–39). Фал «ӕ ахуркӕнуйнӕгтӕмӕ ку ӕрбаздахтӕй, уӕд сӕ хусгӕй ӕрбаййафта».  Ӕма бабӕй син загъта: «Ма бафунӕй уотӕ ӕма ӕдзох коветӕ». (Бакӕсӕ Матфеййи 26:40, 41.) Йесо ӕй лӕдӕрдтӕй, еци бон берӕ хабӕрттӕ ке ӕрцудӕй ӕма ӕ апостолтӕ хъӕбӕр ке бафӕлладӕнцӕ. Ӕма син уомӕ гӕсгӕ загъта: «Уод бӕргӕ федар ӕй, фал бауӕр ба лӕмӕгъ ӕй». Уой фӕсте ма син Йесо дууӕ хатти загъта, цӕмӕй ма бафунӕй адтайуонцӕ ӕма кувтайуонцӕ, фал сӕ алли хатт дӕр хусгӕй ӕрбаййафидӕ (Матф. 26:42–45).

12. Фӕллад кенӕ тухст ку уай, ӕма дӕмӕ ковунмӕ хъауритӕ ку нӕ уа, уӕд дӕ бон ци ӕй кӕнун?

¹² Кувдӕн хуӕздӕр рӕстӕг рахецӕн кӕнисӕ. Еуӕй-еухатт уотӕ бафӕллайӕн кенӕ гъе уӕхӕн тухст фӕууӕн, ӕма ковунгъон дӕр нӕбал фӕууӕн. Ка ’й зонуй, дӕуӕн дӕр уотӕ фӕууй. Цума уӕд дӕр дӕ бон ци ӕй бакӕнун? Зӕгъӕн, еуӕй-еуетӕ фӕкковунцӕ хуссуни размӕ. Кӕд ду дӕр уотӕ ахур дӕ, уӕд дӕ бон н’ адтайдӕ минкъий раздӕр ковун, уотӕ фӕллад ку нӕма фӕууис, уӕд? Удта ма берӕ кӕнгӕ ’й, кутемӕй фӕкковис, уомӕй дӕр. Еуӕй-еу хуӕртӕ ӕма ӕнсувӕртӕ куд зӕгъунцӕ, уотемӕй, бадгӕй кенӕ сӕ уӕргутӕбӕл лӕугӕй ку фӕкковунцӕ, уӕд син ӕнцондӕр фӕууй сӕ гъудитӕ кувдмӕ исаразун. Фал зӕгъӕн, нифссаст кенӕ хъӕбӕр тухст дӕ, ӕма ’й нӕ зонис, цӕбӕл ковай, уой. Уӕдта дӕ бон ци ӕй бакӕнун? Алцидӕр Йеговӕн радзорӕ ӕма ма гурусхӕ кӕнӕ: нӕ фӕлмӕнзӕрдӕ Фидӕ дӕ балӕдӕрдзӕй (Пс. 139:4).

13. Йегови гъуддӕгти ку фӕййархайӕн, уӕд нӕ нӕ телефонтӕ кенӕ планшеттӕ куд фӕхъхъор кӕнунцӕ?

¹³ Йегови гъуддӕгти ку фӕййархайис, уӕд дӕ маци хъор кӕнӕд. Нӕ рӕстӕг Йегови хӕццӕ ферветӕн, айдагъ ковгӕ имӕ ку фӕккӕнӕн, уӕд нӕ, фал ма Библи ку фӕййахур кӕнӕн ӕма ӕмбурдтӕмӕ ку фӕццӕуӕн, уӕд дӕр. Еци рӕстӕгӕй нӕ бон куд ӕй, куд хуӕздӕр ӕй, уотӕ пайда кӕнун? Дӕхе бафӕрсӕ: «Неци мӕ фӕхъхъор кӕнуй, Библи ку фертасун кенӕ ӕмбурди ку фӕуун, уӕд?» Зӕгъӕн, еске дӕмӕ ӕрбадзурдта кенӕ ба дӕмӕ финсуй. Нӕ рӕстӕги беретӕ сӕ телефонтӕбӕл гъе уотӕ исахур ӕнцӕ, ӕма ӕнӕ уонӕй нӕбал фӕффӕразунцӕ. Ӕрӕги ахургӕндтӕ куд исбӕрӕг кодтонцӕ, уомӕ гӕсгӕ телефонӕн ӕ звук ӕма ӕ экран хуст ку уонцӕ, уӕддӕр ин айдагъ ӕ уиндӕй дӕр адӕймагӕн ӕрлӕмбунӕг ун зин фӕууй. Конгресси райдайӕни нин фӕззӕгъунцӕ, цӕмӕй нӕ телефонтӕ кенӕ планшеттӕ уӕхӕн уавӕри исӕвӕрӕн, цӕмӕй иннети ма хъор кӕнонцӕ. Ӕмбурди ку уай кенӕ Библи ку ӕртасай, уӕд дӕр дӕ бон нӕй уотӕ кӕнун, цӕмӕй дин дӕхе ма хъор кӕнонцӕ?

14. Филиппӕгтӕмӕ 4:6, 7 финст дзурдтӕмӕ гӕсгӕ нин Йеговӕ куд банхус кӕндзӕй?

 ¹⁴ Йеговӕй корӕ, цӕмӕй дӕ бон уа лӕмбунӕг ун. Кӕд ӕй балӕдӕрдтӕ, ӕма ӕмбурди рӕстӕг кенӕ Библи ӕртасгӕй дӕхе гъудити рандӕ уис, уӕд Йеговӕй ӕнхус корӕ. Адӕймаг естӕбӕл ку фӕттухсуй, уӕд ин ӕнцон нӕ фӕууй ӕ гъудитӕ еу цӕмӕдӕр исаразун. Фал уомӕн уотӕ уадзӕн нӕййес. Йеговӕй фарнӕ корӕ, цӕмӕй дин еци фарнӕ дӕ зӕрдӕ дӕр ӕма дӕ зунд дӕр гъӕуай кӕна. (Бакӕсӕ Филиппӕгтӕмӕ 4:6, 7.)

15. Нӕ рӕстӕг Йегови хӕццӕ ке ферветӕн, е нин ци пайда хӕссуй?

¹⁵ Махӕн хъӕбӕр ӕхцӕуӕн ӕй Йегови хӕццӕ дзорун, игъосун имӕ ӕма ин ӕ гъуддӕгтӕбӕл сагъӕс кӕнун. Ӕма нин е пайда дӕр хӕссуй. Цӕхуӕн? Фиццаг: хуарз унаффитӕ хӕсдзиан. Уой туххӕй Библий финст ӕй: «Зундгинти хӕццӕ ка цӕуй, е исуодзӕй зундгин» (Ӕмб. 13:20). Мадта нӕ рӕстӕг Дун-дуйней ӕгасемӕй зундгиндӕр Хуцау Йегови хӕццӕ ку ферветӕн, уӕд нӕхуӕдтӕ дӕр исуӕн зундгин, уомӕн ӕма ’й уотемӕй базонӕн, ӕ зӕрдӕмӕ цӕхуӕн унаффитӕ цӕуй, цӕхуӕнттӕ ба – нӕ.

16. Йегови хӕццӕ нӕ рӕстӕг ке ферветӕн, уой фӕрци хуӕздӕр ахургӕнгутӕ куд исуӕн?

¹⁶ Дуккаг: арӕхстгундӕр ахургӕнгутӕ исуӕн. Еске хӕццӕ Библи ку фӕййахур кӕнӕн, уӕд нӕ сӕйраг нисан фӕууй, цӕмӕй адӕймагӕн банхус кӕнӕн Йегови хӕццӕ балимӕн ун. Нӕ уӕларвон Фиди хӕццӕ куд фулдӕр рӕстӕг ферветӕн, уотӕ ’й фулдӕр бауарзӕн. Ӕма, Библи ке хӕццӕ ахур кӕнӕн, е ӕй ку уина, нӕхуӕдтӕ Йегови куд берӕ уарзӕн, уӕд нин ӕнцондӕр уодзӕй еци уарзти зинг уой реуи дӕр иссодзун кӕнун. Еци гъуддаги нин Йесо фӕнзуйнаг ӕй. Ӕ Фиди туххӕй гъе уотӕ фӕлмӕнӕй фӕдздзоридӕ, ӕма ӕ фӕдбӕлдзӕугутӕн дӕр зин н’ адтӕй Йегови бауарзун (Иоан. 17:25, 26).

17. Уотӕ зӕгъӕн цӕмӕн ес, ӕма Йеговӕмӕ ке фӕкковӕн, удта Библи ке фертасӕн, уой фӕрци не ’ууӕндундзийнадӕ федардӕр фӕккӕнуй?

¹⁷ Ӕртиккаг: не ’ууӕндундзийнадӕ бафедар кӕндзиан. Ӕвӕдзи ни алкедӕр исарази уодзӕй, Йеговӕй разамунд, уодӕнцойнӕ кенӕ ести гъуддаги разамунд ку фӕккорӕн, ӕма нин нӕ кувдбӕл ку исдзуапп кӕнуй, уӕд ибӕл нӕ зӕрдӕ никки хъӕбӕрдӕр дарун ке райдайӕн (1 Иоан. 5:15). Уомӕй уӕлдай ма нин не ’ууӕндундзийнадӕ федар кӕнунмӕ ци банхус кӕндзӕй? Гъӕуй Библи ӕртасун. Библий дӕр дзӕгъӕли финст нӕй, цӕмӕй, дан, адӕймагмӕ ӕууӕндундзийнадӕ фӕззинна, уой туххӕй бал гъӕуама хабар игъосгӕ фӕккӕна (Ром. 10:17). Фал айдагъ зонундзийнӕдтӕ фагӕ нӕ ’нцӕ. Еу цидӕр ма си ес.

18. Сагъӕс кӕнун куд ӕхсидзгӕ ’й, е цӕхуӕн хабарӕй бӕрӕг ӕй?

¹⁸ Ци базонӕн, уобӕл сагъӕс кӕнун ӕхсидзгӕ  ’й. 77 псалом ка ниффинста, е дӕр уотӕ кодта. Еу рӕстӕг имӕ уотӕ кӕсун райдӕдта, ӕма Йеговӕ ӕ адӕнӕй ӕхе рахадта. Еци гъудитӕ ’й гъе уотӕ тухсун кодтонцӕ, ӕма ма ӕ хуссӕг дӕр фӕллигъдӕй (2–8 стихтӕ). Цума ин ци банхус кодта? Йеговӕн загъта: «Ӕз сагъӕс кӕндзӕн де ’гас гъуддӕгтӕбӕл. Мӕ гъудитӕ уодзӕнцӕ, ци кӕнис, уобӕл» (12 стих). Дзубанди дӕр ибӕл нӕййес, ӕности дӕргъи Йеговӕ ӕ адӕни хӕццӕ куд фӕууидӕ, уой псаломзаргӕнӕг хуарз зудта. Фал имӕ уӕддӕр дессаг кастӕй: «Гӕрр, Хуцауӕй ӕ хуарзӕнхӕ иронх фӕцӕй? Кенӕ мӕстгунӕй фӕлмӕнзӕрдӕ нӕбал фӕууй?» (9 стих). Уомӕ гӕсгӕ сагъӕс кӕнун райдӕдта, Йеговӕ аллихузи уавӕрти ӕ адӕнмӕ куд фӕлмӕнзӕрдӕ фӕууидӕ, уобӕл (11 стих). Ӕма уой фӕрци ци балӕдӕрдтӕй? Рагидзаманти Йеговӕ ӕ адӕни некӕд ниууадзидӕ, ӕма сӕ федӕни дӕр некӕд ниууадздзӕй (15 стих). Мадта мах дӕр ку сагъӕс кӕнӕн, Йеговӕ ӕ адӕнӕн, удта нӕхецӕн дӕр ци искодта, уобӕл, уӕд не ’ууӕндундзийнадӕ федардӕр кӕндзӕй.

19. Йегови хӕццӕ рӕстӕг сӕйрагидӕр цӕмӕн ферветӕн?

¹⁹ Цуппӕрӕймаг: Йегови никки фулдӕр бауарздзиан. Ӕма уомӕй ӕхсидзгӕдӕр ба неци ес, уомӕн ӕма Йегови ке уарзӕн, уой фӕрци имӕ игъосӕн, нӕхе цӕмӕйдӕрти фӕццох кӕнунмӕ цӕттӕ фӕууӕн, удта ибӕл аллихузи фӕлварӕнти еузӕрдонӕй байзайӕн (Матф. 22:37–39; 1 Кор. 13:4, 7; 1 Иоан. 5:3). Ӕцӕгӕйдӕр, Йегови хӕццӕ нин ци лимӕндзийнадӕ ес, е ӕй нӕ тӕккӕ хъазардӕр хӕзна! (Пс. 63:1–8).

20. Цӕмӕй дин Йегови хӕццӕ фулдӕр рӕстӕг ӕрветун ӕнтӕса, уой туххӕй дӕ куд фӕндуй архайун?

²⁰ Дӕ гъудий дарӕ: Йеговӕмӕ ке ковӕн, Библи ке ӕртасӕн ӕма, ци базонӕн, уобӕл ке фӕссагъӕс кӕнӕн, е нӕ лӕггадӕмӕ хауй. Киристей хузӕн сабур бунат иссерисӕ, цӕмӕй уоми Йегови хӕццӕ рӕстӕг рарветай. Байархайӕ, цӕмӕй дӕ маци хъор кӕна. Йегови хӕццӕ рӕстӕг ку ферветис, уӕд си ӕнхус корӕ, цӕмӕй лӕмбунӕг уай. Абони дӕ рӕстӕгӕй, куд хуӕздӕр ӕй, уотӕ ку пайда кӕнай, уӕд дин федӕни ба Йеговӕ балӕвар кӕндзӕй ӕносон цард (Мар. 4:24).