Ӕз райгурдтӕн Нидерландти 1948 анзи. Анз мӕбӕл ку цудӕй, уӕд нӕ бийнонтӕ ралигъдӕнцӕ Бразилимӕ, горӕт Сан-Паулумӕ. Мӕ ниййергутӕ Хуцаубӕл хъӕбӕр ӕууӕндтӕнцӕ ӕма арӕх изӕрхуари фӕсте ӕгас бийнонтӕй Библи фӕккӕсианӕ. 1959 анзи ба нӕуӕгӕй ӕндӕр бунатмӕ ралигъдан, аци хатт Америки Еугонд Штаттӕмӕ, ӕма ӕрбунат кодтан штат Массачусетси.

Ӕхсӕз сувӕллони адтан, ӕма уомӕ гӕсгӕ нӕ фиди берӕ косун гъудӕй. Ци хузи кусти ба нӕ куста, уӕд уӕйӕгӕнӕг адтӕй, уӕд нӕдтӕ кодта, удта ма еу устур авиакомпаний дӕр куста. Уӕхӕн бунати ке куста, уой фӕрци берӕ аллихузи бӕститӕ фӕууидтан, ӕма е нӕ зӕрдӕмӕ хъӕбӕр цудӕй.

Скъолай ма ку ахур кодтон, уӕд арӕх фӕссагъӕс кӕнинӕ, ку исустур уон, уӕд ци куст кӕндзӕн, уобӕл. Ме ’мбӕлттӕй кедӕрти фӕндадтӕй уӕлдӕр ахурадӕ райсун, иннети ба фӕндадтӕй ӕфсади лӕггадӕ кӕнун, фал мӕнӕн ба е мӕ зӕрди къуми дӕр н’ адтӕй. Ӕз уӕхӕн адӕймаг дӕн, ӕма тохун нӕ, фал тухдзурд кӕнун дӕр нӕ уарзун. Ӕма мӕмӕ цӕмӕй ӕфсадмӕ ма фӕдздзурдтайуонцӕ, уой туххӕй университетмӕ бацудтӕн. Фал мӕ ӕцӕгӕй ба фӕндадтӕй адӕнӕн ӕнхус кӕнун. Уотӕ мӕмӕ кастӕй, ӕма уӕд мӕхуӕдӕг дӕр амондгундӕр уодзӕн.

Цард куд фӕззиндтӕй, е мӕмӕ алкӕддӕр дессаг кастӕй. Уомӕ гӕсгӕ университети уӕлдай ӕргом раздахтон антропологимӕ. Нӕ ахургӕнгутӕ нин эволюций теори уотӕ амудтонцӕ, цума уомӕй растдӕр неци ес. Фал мӕнмӕ ба ӕ кӕцидӕр фӕззелӕнтӕ ӕнахур кастӕнцӕ, уомӕн ӕма сӕ наукӕмӕ гӕсгӕ балӕдӕрун кӕнӕн н’ адтӕй. Кӕд сӕбӕл уотид ӕууӕндгӕ бакӕнай, уӕд хуарз.

Университети студентти хуӕрзӕгъдау цардбӕл ахур кӕнонцӕ, уомӕн ба ӕ кой дӕр н’ адтӕй. Нӕ ахургӕнгутӕ нин дзурдтонцӕ, сӕйрагдӕр ке ӕй, цӕмӕй нӕ нисан нӕ къохи бафтуйа, кутемӕй, уомӕй ба уӕлдай нӕййес. Гъема мӕ рӕстӕг ерхӕфсӕнтӕбӕл ӕма наркотиктӕбӕл цъӕхуӕл кодтон. Ӕма кӕд уомӕй мӕхе баигъӕлдзӕг кӕнинӕ, уӕддӕр мин бери фагӕ нӕ уидӕ. Гъема арӕхӕй-арӕхдӕр сагъӕс кодтон: «Гӕрр, ауӕхӕн цардмӕ бӕлдтӕн?»

Фӕстӕдӕр Бостонмӕ рандӕ дӕн ӕма уоми еу университетмӕ бацудтӕн. Цӕмӕй ахурбӕл мӕ бон федун адтайдӕ, уой туххӕй ба еу кусти ниллӕудтӕн ӕма уоми фиццаг хатт исӕмбалдтӕн Йегови Ӕвдесӕнтӕбӕл. Ке хӕццӕ кустон, е мин бавдиста, Данели 4-аг сӕрӕй пахампарадӕ «авд рӕстӕгей» туххӕй ӕма мин балӕдӕрун кодта фӕстаг бӕнтти рӕстӕг ке цӕрӕн (Дан. 4:13–17). Тагъд ӕй балӕдӕрдтӕн, уӕхӕн цӕбӕлдӕрти ма идарддӕр ку дзорон, уӕд мӕ мӕ цард цӕхгӕрмӕ ӕййевун ке багъӕудзӕй. Гъема си ӕз дӕр мӕхе еувӕрстӕ дарун райдӕдтон.

Еци университети адтӕй курситӕ, Хонсар Америкӕмӕ адӕнӕн ӕнхус кӕнунмӕ рандӕ ун ке фӕндадтӕй, уонӕн. Гъема ӕз дӕр еци курситӕмӕ бацудтӕн. Уотӕ мӕмӕ кастӕй ӕма уомӕй аккагдӕр куст мӕ царди не ’ссердзӕн. Фал еци курситӕй дӕр фӕффудӕнгъӕл дӕн. Нӕбал ӕй лӕдӕрдтӕн, амондгун цард кӕми агоргӕ ’й, уой. Гъема мӕ ахур ниууагътон.

1970 анзи маййи Амстердаммӕ ӕрлигъдтӕн ӕма, мӕ фидӕ ци авиакомпаний куста, ӕз дӕр уоми кусти ниллӕудтӕн. Кӕмити ба не ’рзилдтӕн. Адтӕн Азий, Цӕгат ӕма Хонсар Америки ӕма ӕгас Европи дӕр. Фал ӕй тагъд рӕстӕги балӕдӕрдтӕн: цийфӕнди бӕсти дӕр адӕн еци еухузи зинтӕбӕл ӕмбӕлунцӕ, куд сӕ ниллух кӕнонцӕ, уой ба неке зонуй. Гъема бабӕй мӕ нӕуӕгӕй ӕрфӕндадтӕй мӕ царди аккаг ести искӕнун. Ӕма уой туххӕй Бостонмӕ раздахтӕн ӕма ци университети ахур кодтон, уордӕмӕ нӕуӕгӕй бацудтӕн.

Фал бабӕй уомӕй дӕр неци рауадӕй. Мӕ царди сӕйраг фарстатӕбӕл дзуапп нӕ ирдтон. Идарддӕр мин ци кӕнгӕ ’й, уой нӕ зудтон ӕма унаффӕмӕ нӕ антропологийи ахургӕнӕгмӕ бацудтӕн. Е ба мин уотӕ: «Мадта ма дӕ ахур ци ӕй? Ни ’й уадзӕ». Гъема мин дуккаг загъд кӕнун нӕбал багъудӕй.

Мӕ цард дзӕгъӕли ке цӕуй, еци сагъӕс мин ӕнцойнӕ нӕ лӕвардта. Гъема хиппити философимӕ мӕхе раздахтон. Ме ’мбӕлтти хӕццӕ ӕрзилдан ӕгас Америкӕ ӕма Мексикӕбӕл. Уӕд еу машинӕ ӕрахӕссианӕ, уӕд иннӕ, ӕма уотемӕй Акапульки уӕнгӕ нихъхъӕрттан. Надбӕл арӕх ӕрлӕууианӕ, иннӕ хиппитӕ кӕми цардӕнцӕ, уӕхӕн бунӕтти. Фиццаг бакастӕй уотӕ зиндтӕй, ӕма дзӕбӕх ӕнӕмӕтӕ цард кӕнунцӕ. Фал ӕй тагъд рӕстӕги балӕдӕрдтӕн, ани цард дӕр ӕцӕг амондгун исхонӕн ке нӕййес. Кӕрӕдзебӕл ӕновуд уонцӕ ӕма кӕрӕдзей ма сайуонцӕ, уомӕн сӕмӕ ӕ кой дӕр н’ адтӕй.

Минкъийӕй мӕ алкӕддӕр фӕндадтӕй денгизбӕл ӕрзелун. Ӕрмӕст еске науӕбӕл нӕ, фал мин, цӕмӕй мӕхе науӕ адтайдӕ. Гъема бабӕй нур дӕр уобӕл сагъӕс кӕнун райдӕдтон. Цӕттӕ адтӕн ӕгас зӕнхӕбӕл дӕр ӕрзелун, цӕмӕй ести минкъий сакъадахбӕл мӕхецӕн рӕсугъд бунат иссирдтайнӕ ӕма си мӕхуӕдӕг мӕхецӕн хецау адтайнӕ. Адтӕй мин еу ӕмбал, Том, зӕгъгӕ, ӕма уомӕн дӕр раст гъе уӕхӕн фӕндон адтӕй. Фал нӕ уой туххӕй гъудӕй яхтӕ исамал кӕнун.

Томи хӕццӕ рараст ан Ареньс-де-Мармӕ, Барселонӕмӕ хӕстӕг. Уоми минкъий яхтӕ исамал кодтан, хундтӕй «Лигрӕ». Дӕргъӕй адтӕй 9 метрӕй минкъий устурдӕр. Цӕмӕй ӕй уӕхӕн идард балцимӕ бацӕттӕ кодтайанӕ, уой туххӕй ибӕл ракосунтӕ гъудӕй. Некумӕ тагъд кодтан ӕма расагъӕс кодтан, сабургай ӕнӕ моторӕй дӕр ке бахъӕртдзиан. Уомӕ гӕсгӕ нӕ яхтӕн ӕ мотор исистан ӕма нин си уой фӕрци ниуазунмӕ дон ниввӕрунмӕ бунат фӕззиндтӕй. Цӕмӕй нин минкъий наулӕууӕнти ӕнцондӕр ’змӕлӕн адтайдӕ, уой туххӕй ба нӕ яхтӕбӕл ниссагътан, фӕйнӕ 5 метри ка адтӕй, уӕхӕн беслеутӕ (вёсла). Гъема нӕ парус исистан ӕма Индий океани Сейшели сакъадӕхтӕмӕ ранӕхстӕр ан. Денгизи уогӕй нӕ над аразтан стъалутӕмӕ гӕсгӕ. Хъӕбӕр дессаг мӕмӕ фӕккӕсидӕ, стъалутӕмӕ гӕсгӕ кӕми ан, уой исбӕрӕг кӕнун нин алкӕддӕр раст куд рауаидӕ, е.

Хъӕбӕр тагъд ӕй балӕдӕрдтан, аци зӕронд тасбӕл идард ке нӕ рандӕ уодзиан. Нӕ яхтӕмӕ дон гъарун райдӕдта, сахатмӕ 22 литри дон рамбурд уидӕ. Гъема райдӕйӕни куд загътон, уотемӕй уӕхӕн тарст фӕккодтон, ӕма ма ковун дӕр райдӕдтон. Хуцауӕн дзурд равардтон, ку фӕййервӕзӕн, уӕд ӕнӕмӕнгӕй ке байархайдзӕн, цӕмӕй ка ӕй, уой туххӕй фулдӕр базонон. Гъема денгиз ӕрсабур ӕй, ӕма ӕз дӕр мӕ дзурд исӕнхӕст кодтон.

Денгизи ма ку адтан, уӕд райдӕдтон Библи кӕсун. Расагъӕс кӕнайтӕ: дӕ алливарс денгиз, дельфинтӕ, ӕндӕр аллихузи кӕсӕлгитӕ, донӕн ӕ кӕрон зингӕ дӕр нӕ кӕнуй, ӕхсӕвигӕнтти ба Ӕрфӕнифӕд гъе уотӕ дзӕбӕх фӕззиннидӕ, ӕма ин зӕгъӕн дӕр нӕййес. Алцидӕр куд рӕсугъд конд ӕй, уомӕ кӕсгӕй ӕй лӕдӕрдтӕн, Хуцау ӕцӕгӕйдӕр ке ес ӕма адӕнбӕл ке тухсуй.

Цалдӕр къуӕрей фӕсте ӕрлӕудтан ӕндӕр испайнаг горӕт Аликантей наулӕууӕни. Фӕндадтӕй нӕ нӕ яхтӕ рауӕйӕ кӕнун ӕма хуӕздӕр ести балхӕнун. Фал ка ниддӕлтӕ-уӕлтӕ ’й, еци яхтӕбӕл неци уоййасӕ дзоргутӕ адтӕй. Иннердиги ба мин Библи кӕсунмӕ берӕ рӕстӕг фӕззиндтӕй.

Куд фулдӕр ӕй кастӕн, уотӕ ’й хуӕздӕр лӕдӕрдтӕн: аци киунугӕ ӕй, ӕцӕг амондгун куд исуай, уой туххӕй. Хъӕбӕр дессаг мӕмӕ фӕккастӕй, Библий ӕгъдаугин цард кӕнуни туххӕй ци финст ес, е. Нӕ ’й лӕдӕрдтӕн, уойбӕрцӕ адӕн, уой хӕццӕ ба ма ӕз мӕхуӕдӕг дӕр, сӕхе киристӕнттӕ куд хонунцӕ, кӕд, Библий ци финст ес, е нимади дӕр некӕмӕ ӕй.

Гъема ӕз дӕр мӕхецӕн федарӕй загътон, мӕ цард ке ӕррӕвдзӕ кӕндзӕн, ӕма наркотиктӕ ниууагътон. Удта ма сагъӕс кодтон, Библий ци финст ес, уомӕ гӕсгӕ ка цӕруй, уӕхӕн адӕн ке гъӕуама уа. Уӕд Хуцаумӕ дуккаг хатт искувтон ӕма си ракурдтон, цӕмӕй уӕхӕн адӕн иссерун мӕ бон исуа.

Цӕмӕй раст дин иссерон, уой туххӕй мӕхецӕн испълан кодтон, Аликантей ци аргъауӕнтӕ адтӕй, уонӕй ӕгасебӕл дӕр ӕрзелун ӕма сӕмӕ ӕркӕсун.  Берӕ аллихузи аргъауӕнтӕмӕ бацӕуинӕ, фал си алкӕмидӕр хузтӕмӕ кувтонцӕ. Ӕма уой ку фӕууининӕ, уӕд сӕбӕл ма къох ракъуӕринӕ.

Еу уӕхӕни хуцаубони мӕхецӕн къубурбӕл бадтӕн ӕма Библий кастӕн Иакови 2:1–5. Финст си ес, зӕгъгӕ, гъӕздуг ка ӕй, уони иннетӕй уӕлдӕр ӕвӕрун, раст ке нӕ адтайдӕ. Фӕстӕмӕ мӕ яхтӕмӕ ку цудтӕн, уӕд дин кӕсун, ӕма еу агъустбӕл уотӕ финст: «Йегови Ӕвдесӕнти Паддзахади Зал».

Мӕхенимӕр расагъӕс кодтон: «Анӕмӕ дӕр ку бауайинӕ, цума мӕмӕ атӕ ба ци цӕстӕй ракӕсдзӕнцӕ». Гъема медӕмӕ ӕрбахизтӕн бӕгъӕмбадӕй, ӕнӕдастӕй ӕма скъуд хӕлӕфти. Уагдармӕ ме ’ндаг бакаст ӕнахур нӕ фӕккастӕй. Е мин загъта, цӕмӕй еу каргун силгоймаги фарсмӕ исбадтайнӕ. Е ба мин ӕнхус кодта, ӕнсувӕр ци стихти кой кодта, уони Библий иссерун. Ӕмбурди фӕсте ба мӕмӕ беретӕ бацудӕнцӕ, цӕмӕй мӕ хӕццӕ базонгӕ адтайуонцӕ. Ӕгасӕй дӕр мӕбӕл уотӕ ке бацийнӕ кодтонцӕ, е мӕмӕ хъӕбӕр дессаг фӕккастӕй. Еу нӕлгоймаг ба мин уотӕ: «Кӕд дӕ фӕндуй, уӕд мӕмӕ хӕдзарӕмӕ ӕрбацо ӕма Библибӕл радзубандитӕ кӕндзиан». Фал уӕдмӕти Библи кӕронмӕ каст нӕма фӕддӕн ӕма ин загътон: «Цӕттӕ ку уон, уӕд дин ӕй зӕгъдзӕн». Фал ӕмбурдтӕмӕ ба уӕддӕр цудтӕн.

Цалдӕр къуӕрей фӕсте еци нӕлгоймагмӕ хӕдзарӕмӕ ’рбацудтӕн. Ӕма мӕмӕ Библийӕй ци фарстатӕ адтӕй, уонӕбӕл исдзуапп кодта. Къуӕрей фӕсте ба мин сумки ’дзаг дзӕбӕх хъӕппӕлтӕ балӕвар кодта. Фӕстӕдӕр ӕй базудтон, еци хъӕппӕлтӕ ке адтӕнцӕ, е ахӕстдони ке бадуй, ӕрмӕст цӕхуӕндӕр фудракӕнди туххӕй нӕ, фал ӕй Библий фӕдзӕхст ӕнхӕст кӕнун ке фӕндадтӕй, уой туххӕй. Е иннети уарзта ӕма ’й нӕ фӕндадтӕй тохунбӕл ахур кӕнун (Ис. 2:4; Иоан. 13:34, 35). Гъе уӕд ӕй балӕдӕрдтӕн, ци агурдтон, уой ке иссирдтон. Аци адӕн ӕцӕгӕйдӕр Библий ци финст ес, уомӕ гӕсгӕ цӕрунцӕ. Амондгун цард агорӕг зелун мӕ нӕбал гъудӕй. Мӕхецӕн загътон Библи лӕмбунӕг ке ӕртасдзӕн ӕма Нидерландтӕмӕ раздахтӕн.

Цуппар боней фӕсте исхъӕрттӕн Гронингенмӕ, уӕд еу машинӕ ӕрахӕссинӕ, уӕд иннӕ, уотемӕй. Гъудӕй мӕ куст иссерун. Гъема гъӕдин дзаумӕуттӕ кӕми кодтонцӕ, еу уӕхӕн бунатмӕ бацудтӕн. Уоми мин загътонцӕ, цӕмӕй анкетӕ байдзаг кодтайнӕ. Уоми ба уӕхӕн фарста адтӕй: «Цӕхуӕн динбӕл хуӕст дӕ?». Гъема ӕз дӕр ниффинстон Йегови Ӕвдесӕн ке дӕн. Хецау уой ку фӕууидта, уӕд хуарзау нӕбал фӕцӕй ӕма мин уотӕ: «Ести уӕд, дӕмӕ дзордзӕн». Гъема мӕмӕ абони дӕр дзоруй.

Уой фӕсте ӕндӕр рауӕнмӕ бацудтӕн. Уоми ба мӕ хецау бафарста, диплом кенӕ, раздӕр кӕми кустон, уордигӕй мӕмӕ ести финстӕг ес ӕви нӕ. Ӕз дӕр ин загътон, ӕрмӕстдӕр еу гъӕдин яхтӕ кӕддӕр мӕхе къохтӕй ке рӕвдзӕ кодтон. Мӕхемӕ дӕр дессаг фӕккастӕй, ку мин загъта, фӕсрӕфтӕ мӕ бон ке ӕй райдайун. Фал ма мин уотӕ дӕр загъта: «Ӕз Йегови Ӕвдесӕн дӕн ӕма Библимӕ гӕсгӕ  цӕрун. Нӕ мӕ фӕндуй, цӕмӕй ами ести ниммурхай». Мӕ десӕн кӕрон дӕр н’ адтӕй, ӕма ин загътон: «Ӕма ӕз дӕр уонӕй ку дӕн!». Фал раст зӕгъгӕй ме ’ндаг бакаст ба бустӕги хуӕрзтӕй н’ адтӕй: даргъ дзиккотӕ ӕма закъӕ дардтон. Еци нӕлгоймаг ӕй балӕдӕрдтӕй, Йегови Ӕвдесӕн ке нӕма дӕн ӕма мин уотӕ: «Гъӕйдӕ мадта Библи ахур кӕнун райдайӕн». Мӕн ба ма хуӕздӕр ци гъудӕй. Уотемӕй мин Йеговӕ мӕ зӕрди фӕндон исӕнхӕст кодта (Пс. 37:4). Ба ’й лӕдӕрдтӕн, фиццаг кумӕ бацудтӕн, еци кусти хецау мӕмӕ цӕмӕн нӕбал ӕрбадзурдта, уой. Еци ӕнсувӕрмӕ еу анзи бӕрцӕ ракустон, ӕма мӕ хӕццӕ Библи дӕр ахур кодта. 1974-аг анзи январи ба донаргъуд райстон.

Мӕйи фӕсте пионерӕй лӕггадӕ кӕнун райдӕдтон. Ме ’гас цард дӕр гъе уӕхӕн цидӕр агурдтон! Никкидӕр ма мӕйи фӕсте ба Амстердаммӕ рандӕ дӕн. Уоми фӕззиндтӕй испайнаг къуар, ӕз ба син ӕнхус кодтон. Мӕ зӕрдӕмӕ хъӕбӕр цудӕй Библий ахуртӕ испайнаг ӕма португайлаг ӕвзӕгтӕбӕл уадзун. 1975 анзи маййи ба мӕ иснисан кодтонцӕ сӕрмагонд пионерӕй.

Еухатт нӕ къуармӕ ӕрбацудӕй еу сӕрмагонд пионер Инеки ӕма ӕ хӕццӕ ӕрбахудта, Библи ке хӕццӕ ахур кодта, еу уӕхӕн кизги Боливийӕй. Инекий хӕццӕ кӕрӕдзей зӕрдӕмӕ фӕццудан ӕма нӕ бафӕндадтӕй хуӕздӕр базонгӕ ун. Кӕрӕдземӕ финстӕгутӕ финстан ӕма ’й балӕдӕрдтан, ӕмхузӕн нисӕнттӕ нин ке ес. Гъема 1976 анзи нӕ цард байеу кодтан ӕма сауӕнгӕ 1982 анзи уӕнгӕ сӕрмагонд пионертӕй лӕггадӕ кодтан. Уой фӕсте ба нӕ фӕххудтонцӕ Галаади скъолай 73-аг къласмӕ. Ахури фӕсте нӕ иснисан кодтонцӕ Хорискӕсӕн Африкӕмӕ. Раст зӕгъгӕй, уой ӕнгъӕл н’ адтан ӕма тухсгӕ дӕр куд нӕ кодтан. Фондз анзей дӕргъи лӕггадӕ кодтан кенийаг горӕт Момбаси. 1987-аг анзи ба Танзаний нӕ гъуддаг ӕхгӕд ку нӕбал адтӕй, уӕд нин загътонцӕ, цӕмӕй уордӕмӕ рандӕ адтайанӕ. Гъема си 26 анзей бӕрцӕ фӕллӕггадӕ кодтан, уой фӕсте ба фӕстӕмӕ Кенимӕ раздахтан.

Сӕрниллӕг адӕнӕн Библий рӕстдзийнадӕ амонӕн ӕма нӕ цардӕй ан зӕрдӕрохс. Ра уин дзорон, Момбаси фиццаг Библи ахур кӕнун ке хӕццӕ райдӕдтон, еци нӕлгоймаги туххӕй. Игъосун кӕнгӕй ибӕл рамбалдтӕн ӕма ин дууӕ журнали равардтон, е ба мин уотӕ: «Ку сӕ бакӕсон, удта ци?». Къуӕрей фӕсте Библи ахур кӕнун райдӕдтан киунугӕмӕ гӕсгӕ «Ты можешь жить вечно в раю на земле», еци киунугӕ суахили ӕвзагбӕл гъе уӕд фӕззиндтӕй. Еу анзи фӕсте ба еци нӕлгоймаг донаргъуд райста ӕма ӕнхӕстрӕстӕг пионерӕй лӕггадӕ кӕнун райдӕдта. Фӕстӕдӕр еци ӕнсувӕр ӕма ӕ бийнойнаг рӕстдзийнадӕ базонунмӕ банхус кодтонцӕ еу сӕдӕ адӕймагемӕн.

Амондгун цард цӕмӕй кӕнгӕ ’й, уой ку балӕдӕрдтӕн, уӕд мӕхемӕ фӕккастӕн, хъазар згъӕрдор ка иссирдта ӕма ’й ка нецӕбӕл баййивтайдӕ, еци гъӕздуг лӕги хузӕн (Матф. 13:45, 46). Мӕхе кӕдӕй гъуди кӕнун, уӕдӕй мӕ алкӕддӕр фӕндадтӕй адӕнӕн ӕнхус кӕнун амондгун цард иссерунмӕ. Гъема ’й мах дӕр мӕ бийнойнаги хӕццӕ нӕхебӕл бавзурстан: ӕцӕг амондгун цард ӕй, Йеговӕн лӕггадӕ кӕнгӕй, ке рарветай еци цард!