1. Йеговӕ нӕ цӕмӕ разӕнгард кӕнуй?

ӔНОВУД уарзт Йегови цӕсти хъӕбӕр рӕсугъд менеуӕг ӕй (Ос. 6:6). Ӕма ’й фӕндуй, цӕмӕй ӕ лӕггадгӕнгутӕ дӕр еци менеуӕгӕн аргъ кӕнонцӕ. Уомӕ гӕсгӕ нӕ разӕнгард кӕнуй, цӕмӕй иннети ӕновуд уарзтӕй уарзӕн (Ӕмб. 3:3). Уой туххӕй ба нӕ гъӕуй фиццагидӕр базонун, ӕновуд уарзт ци ӕй, уой.

2. Ӕновуд уарзт ци ӕй?

² Ци ӕй ӕновуд уарзт? «Библи – Нӕуӕг дуйней тӕлмац»-и ирон ӕвзагбӕл аци дзурдбаст ӕмбӕлуй 240 хаттемӕй фулдӕр. Адӕймаг еске ӕновуд уарзтӕй ку фӕууарзуй, уӕд ӕй фӕууарзуй ӕгас зӕрдӕй, фӕууй ибӕл ӕновуд, удта, цийфӕнди ма ’рцӕуа, уӕддӕр ибӕл ӕ зӕрдӕ не ’сӕййевуй. Еци дзурдбаст арӕх фӕййамонуй, Хуцау адӕни ци уарзтӕй уарзуй, уомӕ, фал ма уӕхӕн уарзондзийнадӕ фӕууй адӕни ’хсӕн дӕр. Фиццагидӕр нин Йеговӕ ӕй фӕнзуйнаг, иннети ӕновуд уарзтӕй куд уарзуй, уомӕй. Аци статьяй радзубанди кӕндзиан, Йеговӕ адӕни ӕновуд уарзтӕй ке уарзуй, е цӕмӕй бӕрӕг фӕууй. Иннӕ статьяй ба радзубанди кӕндзиан, махӕн – Йегови лӕггадгӕнгутӕн – нӕ бон куд ӕй уой хузӕн иннети ӕновуд уарзтӕй уарзун.

3. Йеговӕ Моисеййӕн ӕхе туххӕй ци загъта?

³ Йеговӕ израилӕгти Египетӕй ку рахудта, уӕд ӕ номи ӕма ӕхе туххӕй еу цидӕр раргом кодта: «Йеговӕ, Йеговӕ  – фӕлмӕнзӕрдӕ ӕма тӕрегъӕдгӕнагӕ Хуцау, мӕстгун кӕнунмӕ тагъд ка нӕ кӕнуй, ӕнӕкӕрон ӕй е ’новуд уарзт ӕма алли гъуддаги дӕр ӕй раст. Е ’новуд уарзтӕй хай кӕнуй мингай фӕлтӕртӕн, хатир кӕнуй рӕдуд дӕр, фудракӕнд дӕр ӕма тӕрегъӕд дӕр» (Рац. 34:6, 7). Йеговӕмӕ уӕхӕн дессаги менеугутӕ ке ес, е нин уодӕнцойнӕ куд нӕ хӕссуй. Фал ма Йеговӕ Моисеййӕн е ’новуд уарзти туххӕй еу цидӕр раргом кодта. Ци?

4, 5. а) Йеговӕ ӕхе туххӕй ци раргом кодта? б) Цӕхуӕн фарстатӕмӕ ӕркӕсдзиан?

⁴ Йеговӕ ӕ уарзондзийнадӕ айдагъ ӕновуд не ’схудта, фал ма загъта, ӕнӕкӕрон ин ке ӕй. Уӕхӕн дзурдтӕ ма Библий ӕмбӕлунцӕ 7 хатти ӕма ӕрмӕстдӕр Йеговӕмӕ хаунцӕ (Ним. 14:18; Неем. 9:17; Пс. 86:15; 103:8; Ис. 63:7; Йер. Гъ. 3:32; Иоил 2:13; Ионӕ 4:2). Куд ӕй уинӕн, уотемӕй Йегови фӕндуй, цӕмӕй ӕй зонӕн, уӕхӕн менеуӕг имӕ ке ес. Йегови ӕновуд уарзт ӕй ӕнӕкӕрон *. Паддзах Давид ма уой туххӕй псалом дӕр ниффинста, ӕма си уӕхӕн дзурдтӕ адтӕй: «О Йеговӕ, де ’новуд уарзт ӕй уӕлӕрвти уӕнгӕ... О Хуцау, куд хъазар ӕй де ’новуд уарзт! Адӕймаги фурттӕ баримӕхсунцӕ дӕ базурти аууони» (Пс. 36:5, 7). Мах ба Йегови ӕновуд уарзтӕн Давиди хузӕн аргъ кӕнӕн?

⁵ Цӕмӕй ӕй базонӕн, Йеговӕн е ’новуд уарзт цӕмӕй бӕрӕг фӕууй, уой туххӕй ӕркӕсӕн дууӕ фарстайемӕ: Йеговӕ е ’новуд уарзтӕй ке уарзуй? Йегови ӕновуд уарзт цӕхуӕн арфӕдзийнӕдтӕ хӕссуй?

6. Йеговӕ ӕновуд уарзтӕй ке уарзуй?

⁶ Уарзун берӕ цидӕртӕ ӕнгъезуй. Зӕгъӕн, Библий финст ӕй, еуетӕ ке уарзунцӕ «зӕнхи куст» кӕнун, иннетӕ уарзунцӕ «сӕнӕ ӕма сойнӕ», кадӕртӕ ба уарзунцӕ «зундамунд», «зонундзийнӕдтӕ», «зунд» ӕма уотӕ идарддӕр (2 Анз. 26:10; Ӕмб. 12:1; 21:17; 29:3). Фал уӕхӕн цидӕртӕ ӕновуд уарзтӕй уарзӕн нӕййес. Цума Йеговӕ ӕгас адӕни дӕр ӕновуд уарзтӕй уарзуй? Нӕъ, ӕрмӕстдӕр е ’мбӕлттӕбӕл ке нимайуй, уони. Йеговӕ син ӕрцӕттӕ кодта дессаги федӕн ӕма сӕ алкӕддӕр уарздзӕй.

7. Йеговӕ ӕгас адӕни дӕр ке уарзуй, е цӕмӕй бӕрӕг ӕй?

⁷ Ӕнӕуой Йеговӕ ӕгас адӕни дӕр уарзуй. Йесо Никодимӕн загъта: «Хуцау дуйне [гъома адӕни] уотӕ берӕ уарзуй, ӕма ӕ еунӕг Фурти равардта, цӕмӕй ибӕл ка ӕууӕндуй, е ма фесӕфа, фал ӕносон цардӕй хайгин уа» (Иоан. 3:1, 16; Матф. 5:44, 45).

8, 9. а) Йеговӕ ӕ лӕггадгӕнгути ӕновуд уарзтӕй цӕмӕн уарзуй? б) Идарддӕр цӕмӕ ӕркӕсдзиан?

 ⁸Ӕновуд уарзтӕй ба Йеговӕ ӕрмӕстдӕр ӕ лӕггадгӕнгути уарзуй. Е бӕрӕг ӕй паддзах Давид ӕма пахампар Данели дзурдтӕй. Зӕгъӕн, Давид загъта: «Идарддӕр дӕр де ’новуд уарзтӕй тавӕ, ка дӕ зонуй, уони». «Йегови ӕновуд уарзтӕй ӕносӕй-ӕносмӕ хайгин ӕнцӕ, ка си тӕрсуй, етӕ» (Пс. 36:10; 103:17). Пахампар Данел ба загъта: «О Йеговӕ, ӕцӕг Хуцау, адӕймагбӕл тас ка ’фтауй, еци Хуцау. Ка дӕ уарзуй ӕма дин дӕ фӕдзӕхститӕ ка ӕнхӕст кӕнуй, уони туххӕй ду ӕнхӕст кӕнис дӕ бадзурд ӕма син де ’новуд уарзтӕй хай кӕнис» (Дан. 9:4). Аци стихтӕй бӕрӕг ӕй, Йеговӕ ӕ лӕггадгӕнгути ӕновуд уарзтӕй ке уарзуй, уомӕн ӕма ’й зонунцӕ, тӕрсунцӕ си, уарзунцӕ ’й ӕма ин ӕ фӕдзӕхститӕ ӕнхӕст кӕнунцӕ. Ӕрмӕстдӕр ӕ лӕггадгӕнгути бон ӕй еци уарзт сӕхебӕл ӕвзарун.

⁹ Йеговӕн лӕггадӕ кӕнун ку нӕма райдӕдтан, уӕд мах дӕр уарзта, иннӕ адӕни куд уарзуй, уотӕ (Пс. 104:14). Фал ин лӕггадӕ кӕнун ку райдӕдтан, уӕд ин е ’новуд уарзт нӕхебӕл бавзурстан. Йеговӕ ӕ лӕггадгӕнгутӕй алкӕмӕндӕр зӕгъуй: «Уотӕ некӕд уодзӕй, ӕма ду ме ’новуд уарзтӕй ӕнӕхай фӕууай» (Ис. 54:10). Мах дӕр ӕй Давиди хузӕн нӕхебӕл зонӕн, Йеговӕ ке искадгин кӕнуй, еузӕрдон ибӕл ка ӕй, уони (Пс. 4:3). Йеговӕ нӕбӕл уотӕ ’хцул ке ӕй, е нин уӕлдай ӕхцӕуӕн ӕй. Псаломзаргӕнӕг уой туххӕй финста: «Ка ӕй зундгин? Е фӕууиндзӕй уони ӕма ӕ гъос лӕмбунӕг дардзӕй, Йеговӕ е ’новуд уарзтӕй ци гъуддӕгтӕ кӕнуй, уонӕмӕ» (Пс. 107:43). Гъӕйдӕ мадта расагъӕс кӕнӕн, Йегови ӕновуд уарзтмӕ ци ӕртӕ гъуддаги хауй, уонӕбӕл.

10. Йегови ӕновуд уарзт ӕносмӕ ке ӕй, уой нӕ зӕрдӕбӕл цӕмӕн гъӕуама дарӕн? (Псалом 31:7).

¹⁰Хуцауи ӕновуд уарзт ӕносмӕ ’й. Псалом 136:1 финст ӕй: «Арфӕ кӕнтӕ Йеговӕн, уомӕн ӕма ӕй хӕларзӕрдӕ. Уомӕн ӕма ӕносмӕ ӕй е ’новуд уарзт!» Дзурдтӕ, «уомӕн ӕма ӕносмӕ ӕй е ’новуд уарзт», зӕгъгӕ, аци псаломи ӕмбӕлунцӕ 26 хатти.  Аци скъуддзаг кӕсгӕй адӕймаг деси бафтуйуй, Йегови ӕновуд уарзт ӕ лӕггадгӕнгутӕмӕ куд ӕнӕкӕрон ӕй ӕма цӕйбӕрцӕ аллихузи гъуддӕгтӕй бӕрӕг фӕууй. Кӕд берӕ кӕмидӕрти фӕррӕдуйӕн, уӕддӕр уотӕ некӕд фӕссагъӕс кӕнуй, ӕма ни неци рауайдзӕй, удта нӕбӕл ӕ къох некӕд ракъуӕруй. Алкедӕр ни Йегови зӕрдӕн уотӕ адгин ӕй ӕма ни алкӕбӕлдӕр уотӕ ӕхцул ӕй, ӕма нӕ некӕд ниууадздзӕй, уӕлдайдӕр ба зин уавӕрти ку бахауӕн, уӕд. Е нин уодӕнцойнӕ куд нӕ хӕссуй! Мадта цӕхуӕн арфӕдзийнӕдтӕй исхайгин уӕн? Йеговӕ нӕ уотӕ берӕ ке уарзуй, е нин хӕссуй цийнӕ ӕма нин дӕттуй хъауритӕ, цӕмӕй идарддӕр дӕр царди зиндзийнӕдти хӕццӕ тох кӕнӕн ӕма ин еузӕрдонӕй лӕггадӕ кӕнӕн. (Бакӕсӕ Псалом 31:7.)

11. Псаломи 86:5 куд финст ӕй, уомӕ гӕсгӕ Йегови хатир кӕнунмӕ ци разӕнгард кӕнуй?

¹¹Хуцауи е ’новуд уарзт разӕнгард кӕнуй хатир кӕнунмӕ. Адӕймаг ӕ тӕрегъӕдбӕл ку ’рфӕсмон кӕнуй ӕма ӕ лӕгъуз гъуддӕгтӕ ку ниууадзуй, уӕд Йеговӕ уой алкӕддӕр фӕууинуй ӕма ин ниххатир кӕнуй, уомӕн ӕма ’й ӕновуд уарзтӕй уарзуй. Давид Йегови туххӕй ниффинста: «Нӕ тӕрегъӕдтӕмӕ гӕсгӕ нин ци гъӕуй, уой нин нӕ бакӕнуй, ӕма нин нӕ рӕдудтитӕмӕ гӕсгӕ ци ’мбӕлуй, уой нин нӕ бафедуй» (Пс. 103:8–11). Давид ӕй ӕхебӕл бавзурста, адӕймаги ӕ цӕсгон ку фӕххуӕруй, уӕд е куд зин фӕууй, уой. Фал ма ’й ӕхебӕл бавзурста, Йеговӕ хатир кӕнунмӕ дӕр цӕттӕ ке ӕй. Цума Йегови хатир кӕнунмӕ ци фӕрразӕнгард кӕнуй? Уой туххӕй финст ӕй Псалом 86:5. (Ба ’й кӕсӕ.) Мадта Давид куд загъта, уотемӕй Йеговӕ хатир кӕнуй, кадӕриддӕр имӕ седуй, уонӕн, уомӕн ӕма сӕ ӕновуд уарзтӕй уарзуй.

12, 13. Кӕддӕр ке искодтан, еци тӕрегъӕдти туххӕй нӕхе ӕгӕр ку хуӕрӕн, уӕд нин ци банхус кӕндзӕй?

¹² Адӕймаг ӕ тӕрегъӕдбӕл ку фӕсмон кӕна, уӕд е хуарз ӕй, уомӕн ӕма ’й ӕ цӕсгон ку хуӕра, уӕд архайдзӕй, цӕмӕй уӕхӕн тӕрегъӕд мабал искӕна. Фал Хуцауи лӕггадгӕнгутӕй еуӕй-еуетӕ сӕхе ӕгӕр фӕххуӕрунцӕ, кӕддӕр ци тӕрегъӕд искодтонцӕ, уой туххӕй. Кӕд зӕрдӕй ӕрфӕсмон кодтонцӕ, уӕддӕр сӕмӕ уотӕ фӕккӕсуй  ӕма син Йеговӕ некӕд ниххатир кӕндзӕй. Кӕд дӕумӕ дӕр уӕхӕн сагъӕстӕ фӕууй, уӕд дин ци банхус кӕндзӕй? Фулдӕр сагъӕс кӕнӕ, Хуцау нӕ ӕновуд уарзтӕй ке уарзуй, уобӕл.

¹³Цӕхуӕн арфӕдзийнӕдтӕй исхайгин уӕн? Кӕд ӕнӕнхӕст ан, уӕддӕр нӕ бон ӕй Йеговӕн цийнӕгӕнгӕй ӕма кӕдзос цӕсгонӕй лӕггадӕ кӕнун, уомӕн ӕма нӕ «ӕ Фурт Йесой тог кӕдзос кӕнуй ӕгас тӕрегъӕдтӕй дӕр» (1 Иоан. 1:7). Кӕд дӕ тӕрегъӕдтӕбӕл ӕрфӕсмон кодтай, фал дӕ уӕддӕр дӕ цӕсгон хуӕруй, уӕд ӕй зонӕ, Йеговӕ алкӕддӕр цӕттӕ фӕууй хатир кӕнунмӕ. 103-аг псаломи Давид балӕдӕрун кодта, Йеговӕ нӕ ӕновуд уарзтӕй ке уарзуй ӕма нин хатир дӕр уой фӕрци ке кӕнуй. Уоми финст ӕй: «Уомӕн ӕма арв зӕнхӕй уӕлдӕр куд ӕй, уотӕ устур ӕй е ’новуд уарзт, ка си тӕрсуй уонӕмӕ. Хорискӕсӕн хорнигулӕнӕй куд идард ӕй, уотӕ раидард кодта махӕй нӕ тӕрегъӕдтӕ» (Пс. 103:11, 12). Мадта нин Йеговӕ зӕрдӕй ниххатир кӕнуй (Ис. 55:7).

14. Давид Йегови ӕновуд уарзт цӕй хӕццӕ рабарста?

¹⁴Йегови ӕновуд уарзт нин не ’ууӕндундзийнадӕ гъӕуай кӕнуй. Давид Йегови туххӕй зардта: «Ду дӕ мӕ римӕхсӕн бунат, ду мӕ багъӕуай кӕндзӕнӕ бӕллӕхӕй. Фӕййервӕзун мӕ кӕндзӕнӕ ӕма мӕ алливарс игъусдзӕй цийни гъӕртӕ... Ӕ зӕрдӕ Йеговӕбӕл ка даруй, е ба рӕвдуд ӕй ӕновуд уарзтӕй» (Пс. 32:7, 10). Рагидзаманти горӕти алливарс устур фӕрстӕ исамайиуонцӕ, цӕмӕй ӕй знӕгтӕй багъӕуай кодтайуонцӕ. Ӕма нӕ Йегови ӕновуд уарзт дӕр уӕхӕн фӕрсти хузӕн гъӕуай кӕнуй, Йеговӕй нӕ ци раидард кӕндзӕй, уомӕй. Уомӕй уӕлдай ма нӕ Йеговӕ ӕновуд уарзтӕй ке уарзуй, уой фӕрци ан е ’мбӕлттӕ (Йер. 31:3).

15. Йегови ӕновуд уарзт федар мӕсуг ӕма римӕхсӕн бунати хӕццӕ рабарӕн цӕмӕн ес?

¹⁵ Хуцау ӕ адӕни куд гъӕуай кӕнуй, уой туххӕй ма Давид ниффинста: «Хуцау ӕй мӕ бӕрзонд хонх, ӕновуд уарзтӕй мӕ ка уарзуй, еци Хуцау». Иннӕ псаломи ба Йегови туххӕй ниффинста: «Е мӕ уарзуй ӕновуд уарзтӕй, е ӕй мӕ федар мӕсуг, мӕ бӕрзонд хонх, мӕ Ервӕзунгӕнӕг ӕма мӕ уарт. Ӕ иуазӕг бакодтон мӕхе» (Пс. 59:17; 144:2). Давид Йегови ӕновуд уарзт федар мӕсуги ӕма римӕхсӕн бунати хӕццӕ цӕмӕн рабарста? Кӕмифӕнди ма уӕн, уӕддӕр нин Йеговӕ не ’ууӕндундзийнадӕ аллирдиги дӕр гъӕуай кӕндзӕй, цӕмӕй си ма раидард уӕн, фал ин уой туххӕй гъӕуама еузӕрдонӕй лӕггадӕ кӕнӕн. Уӕхӕн гъуди ма финст ӕй, Моисей ке ниффинстайдӕ еци псаломи дӕр: «Ӕз зӕгъдзӕн Йеговӕн: „Ду дӕ мӕ римӕхсӕн ӕма мӕ федар мӕсуг“» (Пс. 91:1–3, 9, 14). Моисей ма Йегови федар мӕсуги хӕццӕ рабарста 90 псаломи дӕр (Пс. 90:1). Ӕ царди фӕстаг бӕнтти ба ма уӕхӕн дзурдта дӕр ниффинста: «Рагидзамантӕй фӕстӕмӕ ка ӕй, еци Хуцау ӕй дӕ римӕхсӕн, е дӕбӕл хуӕцуй е ’носон къохтӕй» (Дук. з. 33:27). Дзурдтӕ, «е дӕбӕл хуӕцуй е ’носон къохтӕй», зӕгъгӕ, Йегови ӕновуд уарзти туххӕй ма еу гъуддаг дӕр ӕргом кӕнунцӕ. Цӕхуӕн?

16. Йеговӕ нин куд банхус кӕнуй? (Псалом 136:23).

¹⁶ Йеговӕ нӕ римӕхсӕн бунат ку уа, уӕд нифсгун уодзиан. Фал еуӕй-еухатт нӕхемӕ нийгъосӕн ӕма нӕмӕ хъауритӕ нӕбал байзайуй. Нифссаст ке ан, уой Йеговӕ ку фӕууинуй, уӕд куд бакӕнуй? (Бакӕсӕ Псалом 136:23.) Ӕ къох нӕмӕ ӕрбадаруй ӕма нӕбӕл исхуӕцуй, цӕмӕй нӕуӕгӕй нӕ къӕхтӕбӕл ислӕууӕн (Пс. 28:9; 94:18). Цӕхуӕн арфӕдзийнӕдтӕй исхайгин уӕн? Мах ӕй зонӕн: 1) кӕмифӕнди ма уӕн, уӕддӕр нин ес  римӕхсӕн бунат; 2) нӕ уӕларвон Фидӕ нӕ уарзуй ӕма нӕбӕл зӕрдӕй тухсуй.

17. Йегови ӕновуд уарзт нин цӕбӕл дзорӕг ӕй? (Псалом 33:18–22).

¹⁷ Аци статьяй куд базудтан, уотемӕй цийфӕнди зин уавӕри ма уӕн, уӕддӕр нӕ бон ӕй федарӕй ӕууӕндун, Йеговӕ нӕ фарсмӕ ке уодзӕй ӕма нин ке банхус кӕндзӕй, цӕмӕй ибӕл еузӕрдонӕй байзайӕн (2 Кор. 4:7–9). Пахампар Йереми загъта: «Мах нӕ фесавдан Йегови ӕновуд уарзти фӕрци, уомӕн ӕма ӕнӕкӕрон ӕй ӕ фӕлмӕнзӕрдӕдзийнадӕ» (Йер. гъ. 3:22). Мах ӕй федарӕй зонӕн, Йеговӕ нӕ алкӕддӕр ке уарздзӕй. Псаломзаргӕнӕг загъта: «Йеговӕ кӕсуй, ка си тӕрсуй уонӕмӕ, е ’новуд уарзтмӕ ин ка ӕнгъӕлмӕ кӕсуй, уонӕмӕ». (Бакӕсӕ Псалом 33:18–22.)

18, 19. а) Нӕ зӕрдӕбӕл ци гъӕуама дарӕн? б) Иннӕ статьяй дзурд цӕбӕл цӕудзӕй?

¹⁸ Нӕ зӕрдӕбӕл ци гъӕуама дарӕн? Йеговӕ ӕгас адӕни дӕр уарзуй. Ӕма еци уарзт нӕхебӕл бавзурстан, лӕггадӕ кӕнун ин ку нӕма райдӕдтан, уӕд. Фал ӕ адӕнмӕ ку ӕрбайеу ан, удта нӕхебӕл бавзурстан е ’новуд уарзт. Зӕгъӕн ес, ӕма нӕ Йеговӕ ӕхемӕ ӕрбалхъивта. Е нӕ некӕд ниууадздзӕй, гъӕуай нӕ кӕндзӕй ӕма е ’гас зӕрдӕвӕрдтӕ дӕр исӕнхӕст кӕндзӕй. Йегови фӕндуй, цӕмӕй ӕносмӕ дӕр е ’мбӕлттӕ уӕн! (Пс. 46:1, 2, 7). Уомӕ гӕсгӕ, цийфӕнди зин уавӕри ма бахауӕн, уӕддӕр нин хъауритӕ дӕтдзӕй, цӕмӕй ибӕл еузӕрдонӕй байзайӕн.

¹⁹ Аци статьяй базудтан, Йеговӕ ӕ лӕггадгӕнгути ӕновуд уарзтӕй ке уарзуй, уой. Ӕма ’й фӕндуй, цӕмӕй кӕрӕдзей дӕр уӕхӕн уарзтӕй уарзӕн. Уобӕл дзурд цӕудзӕй иннӕ статьяй.