1, 2. Киристон адӕймаг берӕуӕладзугон хӕдзари хузӕн цӕмӕй ӕй? (1 Коринфӕгтӕмӕ 15:58).

 1978 анзи Токиой исамадтонцӕ, 60 уӕладзуги кӕми адтӕй, уӕхӕн хӕдзарӕ. Адӕн дес кодтонцӕ, уомӕн ӕма уоми зӕнхинкъуститӕ арӕх фӕууй, ӕма ин никкӕлунӕй тарстӕнцӕ. Уӕхӕн федар цӕй фӕрци адтӕй? Инженертӕ ’й уотӕ искодтонцӕ, ӕма еу ӕрдиги федар адтӕй, иннердиги ба тасгӕ кодта, цӕмӕй зӕнхинкъустити рӕстӕг ма никкалдайдӕ. Киристӕнттӕ дӕр уӕхӕн берӕуӕладзугон хӕдзари хузӕн ӕнцӕ. Цума ӕмхузӕн цӕмӕй ӕнцӕ?

² Киристӕнттӕн ӕхсидзгӕ ’й, цӕмӕй тасгӕ дӕр кӕнонцӕ ӕма федар дӕр уонцӕ. Йегови закъӕнттӕ ӕма уагӕвӕрдти туххӕй дзурд ку фӕццӕуй, уӕд гъӕуама ӕнӕфӕккеугӕ уонцӕ. (Бакӕсӕ 1 Коринфӕгтӕмӕ 15:58.) Киристон адӕймаг фиццагидӕр Хуцаумӕ фегъосуй, адӕнмӕ нӕ, фал (Гъуд. 5:29). Зундӕй фӕййархайуй ӕма, уавӕртӕ ку фӕййамонунцӕ, уӕд ӕ унаффӕ раййевунмӕ цӕттӕ фӕууй (Иак. 3:17). Киристон адӕймаг гъӕуама лӕдӕргӕ уа, гъома, ӕгӕр карз дӕр ма уа ӕма ӕгӕр фӕлмӕн дӕр. Аци статьяй бал фиццагидӕр ӕркӕсдзиан, нӕ бон куд ӕй ӕнӕфӕккеугӕ ун. Уой фӕсте ба радзубанди кӕндзиан, Сайтан ци фондз гъуддагемӕй пайда кӕнуй, цӕмӕй Йегови фарс мабал лӕууӕн, уобӕл. Ӕма базондзиан, нӕ бон куд ӕй ӕ нихмӕ федар фӕллӕуун.

3. Сӕйраг Закъонӕвӕрӕг Гъуддӕгти 15:28, 29 цӕхуӕн закъӕнттӕ ниффинсун кодта?

³ Йеговӕ, Сӕйраг Закъонӕвӕрӕг, ӕ адӕнӕн алкӕддӕр бӕлвурд разамунд раттидӕ (Ис. 33:22). Зӕгъӕн, фиццаг ӕноси  разамонӕг совет бӕлвурд унаффӕ рахаста, киристӕнттӕ цӕхуӕн ӕртӕ гъуддагеми гъӕуама уонцӕ федар: 1) гъӕуама мӕнгӕ хуцӕуттӕй нӕхе еуварс дарӕн ӕма айдагъдӕр Йеговӕн лӕггадӕ кӕнӕн, 2) гъӕуама тог табуйагбӕл нимайӕн ӕма 3) гъӕуама цӕрӕн, Библий уагӕ ӕма ӕгъдауи туххӕй ци финст ес, уомӕ гӕсгӕ. (Бакӕсӕ Гъуддӕгтӕ 15:28, 29.) Нӕ бон куд ӕй аци ӕртӕ гъуддагеми Йеговӕмӕ игъосун?

4. Йеговӕбӕл еузӕрдон ке ан, е цӕмӕй бӕрӕг уодзӕй? (Раргомадӕ 4:11).

⁴ Нӕхе мӕнгӕ хуцӕуттӕй еуварс дарӕн ӕма айдагъдӕр Йеговӕн лӕггадӕ кӕнӕн. Йеговӕ израилӕгтӕн бафӕдзахста, цӕмӕй ӕрмӕстдӕр уомӕн кувтайуонцӕ (Дук. з. 5:6–10). Ӕма Киристе дӕр, Сайтан ӕй ку фӕлвардта, уӕд бӕлвурдӕй бавдиста, Йеговӕн ке гъӕуама лӕггадӕ кӕнӕн (Матф. 4:8–10). Уомӕ гӕсгӕ мӕнгӕ хуцӕуттӕн нӕ лӕггадӕ кӕнӕн. Уомӕй уӕлдай адӕнӕй хуцӕуттӕ нӕ кӕнӕн, нӕдӕр политиктӕй, нӕдӕр спортсментӕй, нӕдӕр артиститӕй. Мах лӕггадӕ кӕнӕн Йеговӕн, «алцидӕр» ка сфӕлдиста, уомӕн. (Бакӕсӕ Раргомадӕ 4:11.)

5. Цард ӕма тог табуйагбӕл цӕмӕн нимайӕн?

⁵ Йегови закъонмӕ гӕсгӕ цард ӕма тог табуйагбӕл нимайӕн. Цӕмӕн? Уомӕн ӕма цард тоги ӕй ӕма ’й Хуцауи лӕвар (Лев. 17:14). Йеговӕ адӕнӕн фид хуӕруни барӕ ку равардта, уӕд ма син загъта, цӕмӕй тог ма хуӕронцӕ (Райд. 9:4). Еци фӕдзӕхст ма дуккаг хатт загъта, Моисеййи закъон ку равардта, уӕд (Лев. 17:10). Ӕма фиццаг ӕноси разамонӕг советӕн унаффӕ рахӕссун кодта, цӕмӕй киристӕнттӕ сӕхе тогӕй хезонцӕ (Гъуд. 15:28, 29). Еци фӕдзӕхстмӕ гӕсгӕ федарӕй фӕййархайӕн, не ’нӕнездзийнади фӕдбӕл нӕ ести фарста ниллух кӕнун ку фӕгъгъӕуй, уӕд b.

6. Цӕмӕй Йегови уагӕвӕрдтӕмӕ гӕсгӕ цӕрӕн, уой туххӕй куд фӕййархайӕн?

⁶ Йеговӕ уагӕ ӕма ӕгъдауӕн ци закъӕнттӕ ӕрфедар кодта, уонӕмӕ гӕсгӕ цӕрӕн (Дзиуит. 13:4). Апостол Павел ӕ финстӕги загъта, цӕмӕй нӕ зӕнхон бауӕри фӕндтӕ «ниммарӕн», гъома, нӕ бон цидӕриддӕр ӕй, уой кӕнӕн, цӕмӕй нӕ тӕрегъӕдгун бауӕри фӕндти фӕдбӕл ма рацӕуӕн. Ӕнӕгъдау хузтӕ ку фӕууинӕн, уӕд уайтагъд нӕхе рахатӕн ӕма нӕ ӕнӕгъдау миутӕмӕ ка ӕркӕндзӕй, уӕхӕн гъуддӕгтӕй дӕр неци кӕнӕн (Кол. 3:5; Иов 31:1). Йеговӕй нӕ ка раидард кӕндзӕй, уӕхӕн гъуддӕгтӕй ӕма гъудитӕй нӕхе еуварс дарӕн, уӕлдайдӕр ба нӕ лӕгъузӕй ести искӕнун ку фӕффӕндуй, уӕд.

7. Нӕ федар фӕндӕ ци гъӕуама уа ӕма цӕмӕн?

⁷ Йегови фӕндуй, цӕмӕй имӕ «зӕрдӕй игъосӕн» (Ром. 6:17). Йегови закъӕнттӕй кӕцитӕ ӕнхӕст кӕндзиан, кӕцитӕ ба – нӕ, уой равзарӕ-бавзарӕ кӕнун нӕ бон нӕй. Гъӕуама нӕ гъудий дарӕн, ӕ разамунд нӕхе пайдайӕн ке фӕууй (Ис. 48:17, 18; 1 Кор. 6:9, 10). Мах ӕгас хъауритӕй архайӕн, цӕмӕй Йегови зӕрдӕ рохс кӕнӕн ӕма цӕмӕй нӕ бон уа псаломзаргӕнӕги хузӕн зӕгъун: «Ӕз мӕ зӕрдӕ исаразтон, цӕмӕй дин дӕ уагӕвӕрдтӕ ӕнхӕст кӕнон ӕносмӕ, цалинмӕ мӕ цӕститӕ ӕрттевонцӕ, уӕдмӕ» (Пс. 119:112). Сайтан архайуй, цӕмӕй Йеговӕн зингзӕрдӕй мабал лӕггадӕ кӕнӕн. Цӕхуӕн мадзӕлттӕй пайда кӕнуй?

8. Сайтан, нӕ фӕдбӕл ке фӕззелунцӕ, уомӕй куд испайда кӕнуй, цӕмӕй Йегови фарс федарӕй мабал лӕууӕн?

⁸ Нӕ фӕдбӕл зелунцӕ. Цӕмӕй Йегови фарс федарӕй мабал лӕууӕн, уой туххӕй Сайтан пайда кӕнуй, нӕ нихмӕ ка ӕй, уонӕй, удта архайуй, цӕмӕй тӕрсун райдайӕн. Ӕ нисан ӕй, цӕмӕй нӕ «ранихъуӕра» ӕма нин Йегови хӕццӕ ци лимӕндзийнадӕ ес,  уой фехала (1 Пет. 5:8). Фиццаг ӕноси киристӕнттӕмӕ ӕвзистонцӕ, надтонцӕ сӕ ӕма ма сӕ сауӕнгӕ маргӕ дӕр ракӕниуонцӕ, раст ци ӕй, уой кӕнун сӕ ке фӕндадтӕй, уой туххӕй (Гъуд. 5:27, 28, 40; 7:54–60). Сайтан абони дӕр уӕхӕн мадзӕлттӕй пайда кӕнуй. Уомӕн цӕветтон ӕй, Уӕрӕсей ӕма ӕндӕр бӕстити дӕр нӕ хуӕртӕ ӕма ӕнсувӕрти ке ӕфхуӕрунцӕ, е. Раст зӕгъгӕй, Йегови лӕггадгӕнгутӕй алкедӕр ӕфхуӕрд баййафуй.

9. Сайтани хийнӕмиутӕмӕ цӕттӕ цӕмӕн гъӕуама уӕн? Ӕрхӕссӕ цӕветтон.

⁹ Хийнӕмиутӕ. Сайтани хийнӕмиутӕ гъӕуама зонӕн, уомӕн ӕма алкӕд нӕ нихмӕ ӕргом нӕ рацӕуй (Еф. 6:11). Ӕркӕсӕн не ’нсувӕр Роберти хабармӕ. Уомӕн гъудӕй операци искӕнун, ӕма ’й сӕйгӕдони ниввардтонцӕ. Уоми дохтиртӕн загъта, тог бауадзунбӕл ке неци хузи исарази уодзӕй. Хирург исарази ӕй ӕнӕ тогӕй оперци искӕнунмӕ. Фал операций размӕ, еци изӕр, ӕ хӕстӕгутӕ ку рандӕ ’нцӕ, уӕд палатӕмӕ анестезиолог ӕрбацудӕй ӕма Робертӕн загъта: «Ӕвӕдзи, тог нӕ багъӕудзӕй, фал ӕй уӕддӕр цӕттӕй дардзиан». Ка ’й зонуй, дохтирмӕ уотӕ кастӕй, ӕма ӕ хӕстӕгутӕ ку рандӕ уонцӕ, уӕд Роберт тог бауадзунбӕл исарази уодзӕй. Фал Роберт федар фӕллӕудтӕй ӕма загъта: «Цийфӕнди ма ’рцӕуа, уӕддӕр тог бауадзунбӕл арази нӕ дӕн».

10. Аци дуйней зундахаст тӕссаг цӕмӕй ӕй? (1 Коринфӕгтӕмӕ 3:19, 20).

¹⁰ Адӕймаги зундахаст. Аци дуйней адӕни хузӕн сагъӕс кӕнун ку райдайӕн, уӕд рӕстӕг рацӕудзӕй, ӕма Йегови, удта ӕ закъӕнттӕ иронх кӕнун райдайдзиан. (Бакӕсӕ 1 Коринфӕгтӕмӕ 3:19, 20.) «Аци дуйней зунд» адӕни разӕнгард кӕнуй, цӕмӕй Хуцауи закъӕнтти сӕрти хезонцӕ. Пергами ӕма Фиатири еуӕй-еу киристӕнттӕ фегъӕстӕ ’нцӕ, ӕнӕгъдау цард ка кодта ӕма мӕнгӕ хуцӕуттӕн ка кувта, уони зундахастӕй. Киристе дууӕ ӕмбурдемӕн дӕр бауайдзӕф кодта, уомӕн ӕма хӕтундзийнадӕ ӕма ӕнӕгъдау гъуддӕгтӕмӕ цийфӕнди цӕстӕй кастӕнцӕ (Рарг. 2:14, 20). Абони дӕр адӕн нӕ алливарс аллихузи рӕдуд гъудитӕбӕл хуӕст ӕнцӕ. Гӕнӕн ес, ӕма нӕ нӕ хеуӕнттӕй кенӕ нӕ зонгитӕй еске рӕдуйун кӕна, зӕгъгӕ, дан, Библий уагӕвӕрдтӕ базӕронд ӕнцӕ, ӕма адӕймаг ӕ бауӕри монцти фӕдбӕл ку цӕуа, уӕд уоми лӕгъузӕй неци ес.

11. Нӕхе цӕмӕй гъӕуама хезӕн?

¹¹ Еуӕй-еухатт адӕймагмӕ уотӕ кӕсун райдайуй, ӕма Йеговӕ ци разамунд дӕттуй, е фагӕ нӕй, ӕма ’й бафӕндуй, «финст ци ӕй, уой сӕрти» рахезун (1 Кор. 4:6). Киристей рӕстӕги дӕр дини разамонгутӕ уотӕ архайдтонцӕ. Хуцауи закъонмӕ бафтудтонцӕ адӕни ӕримисгӕ закъӕнттӕ, ӕма уотемӕй адӕнбӕл уӕззау уаргъ исӕвардтонцӕ (Матф. 23:4). Йеговӕ нин ӕ Дзурд ӕма ӕ организаций фӕрци бӕлвурд разамунд дӕттуй, ӕма сӕмӕ нӕхецӕй еститӕ ӕфтаун нӕ гъӕуй (Ӕмб. 3:5–7). Уомӕ гӕсгӕ, Библий финст ци ’рцудӕй, уой сӕрти нӕ хезӕн ӕма, адӕймагӕн равзаруни барӕ кӕми ес, уоми нӕхе дзурдбӕл нӕ ниллӕууӕн.

12. Сайтан «хийнӕйдзаг ревӕд ахурӕдтӕй» куд пайда кӕнуй?

¹² Мӕнгӕттӕ. Сайтан пайда кӕнуй «хийнӕйдзаг ревӕд ахурӕдтӕй» ӕма «адӕймаги ӕримисгӕ ӕгъдӕуттӕй». Уотемӕй адӕни сайуй ӕма сӕ дехтӕ кӕнуй (Кол. 2:8). Фиццаг ӕноси пайда кодта адӕни философитӕй ӕма дзиуиттӕгти ӕримисгӕ ахурӕдтӕй. Удта кадӕртӕ уотӕ дзурдтонцӕ, ӕма киристӕнтти Моисеййи закъон ӕнхӕст кӕнун гъӕуй. Етӕ мӕнгӕттӕ адтӕнцӕ, уомӕн ӕма уони туххӕй адӕймагӕй феронх уидӕ, ӕцӕг зунд Йеговӕй ке цӕуй. Абони Сайтан адӕни сайуй ӕма пайда кӕнуй телевизор, интернет ӕма социалон сетьтӕй, цӕмӕй парахат кӕна уӕхӕн гъудитӕ, цума кӕцидӕр хецауадӕ кенӕ организаци кедӕр нихмӕ фудвӕндӕ искодта. Ӕма е уӕлдай хъӕбӕрдӕр рабӕрӕг ӕй коронавируси  пандемийи рӕстӕг c. Еци рӕстӕг беретӕ кастӕнцӕ, ӕууӕнкӕ кӕбӕл н’ адтӕй, уӕхӕн информацимӕ, ӕма уой туххӕй ӕгӕр тухстӕнцӕ. Фал Йегови организацийӕй ци разамунд цудӕй, уомӕ ка игъуста, еци хуӕртӕ ӕма ӕнсувӕртӕ ба ӕгӕр нӕ мӕтӕ кодтонцӕ (Матф. 24:45).

13. Нӕ рӕстӕг дзӕгъӕли цӕмӕннӕ харз кӕнӕн?

¹³ Рӕстӕг дзӕгъӕли ма харз кӕнӕ. «Ӕхсидзгӕдӕр ци ӕй», уой алкӕддӕр нӕ зӕрдӕбӕл дарӕн (Фил. 1:9, 10). Рӕстӕг дзӕгъӕли ку харз кӕнӕн, уӕд нин ӕхсидзгӕ гъуддӕгтӕн рӕстӕг ӕма хъауритӕ нӕбал фагӕ кӕндзӕй. Ӕнӕуой гъуддӕгтӕбӕл рӕстӕг ӕгӕр берӕ ку харз кӕнӕн, зӕгъӕн, хуӕрдӕ, ниуӕзтӕ, ерхӕфсӕнтӕ ӕма куст, уӕд нин еци гъуддӕгтӕ алцӕмӕй сӕйрагдӕр исуодзӕнцӕ (Лук. 21:34, 35). Уомӕй уӕлдай ма нӕуӕг хабӕртти алли бон дӕр фӕууинӕн, уӕд еу рауӕн, уӕд иннӕ рауӕн хӕлхъойтӕ ке цӕуй, политиктӕ ба ке фӕккӕрӕдземӕ унцӕ. Дӕ зӕрдӕбӕл дарӕ: уотемӕй, гӕнӕн ес, ӕма скъӕппӕги бахаудзӕнӕ, уомӕн ӕма ’й дӕхуӕдӕг дӕр нӕ балӕдӕрдзӕнӕ, еске фарс ке исуодзӕнӕ, уой. Ци фондз мадзалей кой ракодтан, уонӕй Сайтан пайда кӕнуй, цӕмӕй нӕ, раст ци ӕй, уой кӕнун мабал фӕндӕуа. Гъӕйдӕ ӕркӕсӕн, нӕ бон куд ӕй ӕ нихмӕ федар фӕллӕуун.

14. Ци нин банхус кӕндзӕй, цӕмӕй алкӕддӕр Йегови фарс уӕн?

¹⁴ Дӕхе Хуцауӕн цӕмӕн иснивонд кодтай ӕма донаргъуд цӕмӕн райстай, уобӕл сагъӕс кӕнӕ. Уӕхӕн къахдзӕф искодтай, уомӕн ӕма дӕ бафӕндадтӕй Йегови фарс ислӕуун. Дӕ зӕрдӕбӕл ӕрлӕуун кӕнӕ, рӕстдзийнадӕ ке иссирдтай, уой куд исбӕрӕг кодтай. Библи ахур кӕнун ку райдӕдтай, уӕд Йеговӕ Хуцауи базудтай ӕма ’й райдӕдтай уарзун ӕма нимайун. Ба ибӕл ӕууӕндтӕ ӕма дӕ тӕрегъӕдтӕбӕл ӕрфӕсмон кодтай. Ба дӕ фӕндадтӕй дӕ лӕгъуз гъуддӕгтӕ ниууадзун ӕма Хуцауи фӕндонмӕ гӕсгӕ цӕрун. Хуцау дин ке ниххатир кодта, уой ку базудтай, удта, цума дӕ рагъӕй уӕззау уаргъ рахаудтӕй, уотӕ (Пс. 32:1, 2). Ду райдӕдтай ӕмбурдтӕмӕ  цӕун ӕма, Библийӕй ци базудтай, уой иннетӕн дзорун. Удта дӕхе Йеговӕн иснивонд кодтай ӕма донаргъуд райстай. Уӕдӕй фӕстӕмӕ цӕуис, цардмӕ ка кӕнуй, еци надбӕл ӕма дӕ фӕндуй еци надбӕл кӕронмӕ бахъӕртун (Матф. 7:13, 14).

15. Библи ку ’ртасӕн ӕма ибӕл ку сагъӕс кӕнӕн, уӕд нин е ци пайда ӕрхӕсдзӕй?

¹⁵ Хуцауи Дзурд ахур кӕнӕ ӕма ибӕл сагъӕс кӕнӕ. Бӕласӕ федар фӕллӕууй ӕ едӕгти фӕрци. Мах бон дӕр ӕй федар ун, не ’ууӕндундзийнадӕ Хуцауи Дзурдбӕл ку бундореуӕг кӕна, уӕд. Бӕласӕ ку фӕййирӕзуй, уӕд ӕ едӕгтӕ арфӕй-арфдӕр фӕккӕнунцӕ. Мах дӕр Библи ку фӕййахур кӕнӕн ӕма ибӕл ку фӕссагъӕс кӕнӕн, уӕд не ’ууӕндундзийнадӕ бафедар уй ӕма бабӕй ӕй еу хатт дӕр фӕууинӕн, Хуцау ци над амонуй, е тӕккӕ хуӕздӕр ке ӕй (Кол. 2:6, 7). Сагъӕс кӕнӕ, Йеговӕ рагидзаманти ӕ лӕггадгӕнгутӕн куд ӕнхус кодта ӕма син ӕ разамунд ӕма ӕ унаффитӕ куд ӕнхус кодтонцӕ, уобӕл. Зӕгъӕн, Йезекилӕн цӕстӕбӕлуайӕн бавдиста. Еци цӕстӕбӕлуайӕни изӕд ковӕндонӕ барӕнӕй барста, пахампар ба имӕ лӕмбунӕг кастӕй. Еци цӕстӕбӕлуайӕн ӕй бафедар кодта кодта. Ӕма махӕн дӕр пайда уодзӕй. Ахур нӕ кӕнуй, цӕмӕй Йегови раст уагӕвӕрдтӕмӕ гӕсгӕ цӕрӕн (Йез. 40:1–4; 43:10–12) d. Махӕн дӕр хуарз уодзӕй, рӕстӕг ку хецӕн кӕнӕн, цӕмӕй Хуцауи Дзурди арф гъудитӕ ӕртасӕн ӕма сӕбӕл лӕмбунӕг сагъӕс кӕнӕн.

16. Роберт еузӕрдон ке адтӕй, е ӕй куд багъӕуай кодта? (Псалом 112:7).

¹⁶ Йеговӕбӕл еузӕрдон уо. Паддзах Давид Йегови уарзта. Е зардта: «Дӕубӕл дӕн еузӕрдон, о Хуцау» (Пс. 57:7). Мах дӕр Йеговӕбӕл еузӕрдон уодзиан, нӕ нифс ибӕл ку дарӕн, уӕд. (Бакӕсӕ Псалом 112:7.) Ӕркӕсӕн, уӕлдӕр ке кой кодтан, еци ӕнсувӕр Роберт еузӕрдон ке адтӕй, е ин куд банхус кодта. Куд загъд адтӕй, уотемӕй Робертмӕ анастезиолог бацудӕй ӕма ин загъта, тог цӕттӕй ке дардзӕнцӕ, уоххай ку багъӕуа, зӕгъгӕ. Фал ин Роберт еци фӕдбӕл дзуапп равардта: «Кӕд минкъий дӕр уотӕ гъуди кӕнтӕ, ӕма мин тог бауадздзиайтӕ, уӕд аци фӕдбӕл сӕйгӕдонӕй цӕугӕ кӕнун». Фӕстӕдӕр Роберт загъта: «Раст ке кӕнун, уобӕл ӕппундӕр нӕ гурусхӕ кодтон, удта нецӕмӕй тарстӕн».

17. Роберти хабарӕй цӕбӕл ахур кӕнӕн? (Кӕсӕ ма хузӕмӕ.)

 ¹⁷ Роберт уӕхӕн федар цӕй фӕрци разиндтӕй? Уомӕн ӕма унаффӕ дзӕвгарӕ раздӕр рахаста, цалинмӕ сӕйгӕдонӕмӕ нӕма бахаудтӕй, уӕдмӕ. Фиццаг бал ӕй бафӕндадтӕй Йегови зӕрдӕ рохс кӕнун, уой фӕсте ба, тог ӕма цард табуйаг ке ’нцӕ, уой лӕмбунӕг рартаста Библи ӕма Библибӕл арӕзт публикацити фӕрци. Ӕма ’й фӕууидта, Йегови уагӕвӕрдтӕ нӕхе пайдайӕн ке фӕуунцӕ. Нӕ бон ӕй еузӕрдон ун, цийфӕнди фӕлварӕнбӕл ма исӕмбӕлӕн, уӕддӕр.

18. Варакки цӕветтон нин куд банхус кӕндзӕй, цӕмӕй мах дӕр нӕ зӕрдӕ Йеговӕбӕл дарӕн? (Кӕсӕ хузӕмӕ ӕндаг цъарӕбӕл.)

¹⁸ Йеговӕбӕл ӕууӕндӕ ӕма ибӕл дӕ зӕрдӕ дарӕ. Ӕркӕсӕн Варакки хабармӕ. Йегови разамунд раст ке ӕй, уобӕл ке нӕ гурусхӕ кодта, уой фӕрци е знӕгтӕбӕл фӕууӕлахез ӕй. Кӕд израилӕгтӕмӕ нӕдӕр хъӕматӕ адтӕй, нӕдӕр уарттӕ, уӕддӕр Йеговӕ Вараккӕн загъта, цӕмӕй Сисари нихмӕ рацӕуа (Тӕрх. 5:8). Пахампар-уосӕ Деворӕ Вараккӕн загъта, цӕмӕй будурмӕ ӕрхизтайдӕ ӕма Сисари хӕццӕ уоми истухтайдӕ. Сисари ӕфсади адтӕй 900 тохӕн бӕхуӕрдуни. Варак ӕй зудта, ӕррӕстӕ будури еци тохӕн бӕхуӕрдунти нихмӕ ӕ бон ке неци исуодзӕй, фал уӕддӕр Хуцаумӕ байгъуста. Е ’фсӕддонтӕ Фавори хонхӕй будурмӕ ку цудӕнцӕ, уӕд Йеговӕ се знӕгтӕбӕл сӕх-сӕх уарун ӕруагъта. Уӕд Сисари бӕхуӕрдунтӕ еугурӕйдӕр лӕкъӕрди ниннахстӕнцӕ, ӕма сӕ уотемӕй Хуцау Варакки амӕттаг бакодта (Тӕрх. 4:1–7, 10, 13–16). Мах дӕр Йегови фӕрци фӕууӕлахез уодзиан, ку ибӕл ӕууӕндӕн, ӕма ибӕл нӕ зӕрдӕ ку дарӕн, уӕд, удта нин ӕ огранизаций фӕрци ци разамунд дӕттуй, уой алкӕддӕр растбӕл ку нимайӕн, уӕд (Дук. з. 31:6).

19. Цӕмӕн дӕ фӕндуй федарӕй Йегови фарс лӕуун?

¹⁹ Цалинмӕ аци дуйней цӕрӕн, уӕдмӕ нӕ гъӕудзӕй тох кӕнун, цӕмӕй нӕ бон уа федар ун ӕма ма фӕккеун (1 Тим. 6:11, 12; 2 Пет. 3:17). Куд фӕууидтан, уотемӕй Сайтан пайда кӕнуй фондз мадзалемӕй, цӕмӕй нӕ Хуцауӕй раидард кӕна (Еф. 4:14). Мах фӕндуй, цӕмӕй федар уӕн, Йегови уарзӕн ӕма ин ӕ фӕдзӕхститӕ ӕнхӕст кӕнӕн. Фал ма нӕ гъӕуй лӕдӕргӕ ун. Иннӕ статьяй радзубанди кӕндзиан, Йеговӕ ӕма нин Киристе еци гъуддаги фӕнзуйнаг куд ӕнцӕ, уобӕл.