Мӕ фидӕ адтӕй бунӕттон хестӕр нӕлгоймаг Канади Еугонд аргъауӕни. Уомӕ гӕсгӕ нӕ алли хуцаубони дӕр сӕумӕй рарветидӕ аргъауӕни скъоламӕ. Уой фӕсте ба 11 сахаттебӕл ӕ хӕццӕ аргъауӕни службӕмӕ рандӕ уианӕ. Фӕсрӕфтӕ ба нӕ мади хӕццӕ фӕццӕуианӕ Паддзахади залмӕ. Еци дууӕ дини кӕрӕдземӕй куд хецӕн кӕнунцӕ, уой хъӕбӕр хуарз уидтан.

Мӕ мадӕ ӕ нӕуӕг дини туххӕй радзурдта ӕ хуарз ӕмбӕлттӕ Боб ӕма Мэрион Хатчесонтӕн. Ӕма етӕ дӕр рӕстдзийнадӕ сӕ зӕрдӕмӕ райстонцӕ. 1958 анзи Хатчесонтӕ се ’ртӕ фуртей хӕццӕ рандӕ ’нцӕ, аст боней дӕргъи ка цудӕй, еци ӕхсӕнадӕмон конгресмӕ, «Хуцауи фӕндон», зӕгъгӕ. Цудӕй Нью-Йорки, ӕма мӕн дӕр сӕ хӕццӕ райстонцӕ. Абони ’й фӕстӕмӕ ракӕсгӕй лӕдӕрун, цуппар биццеуей хӕццӕ син куд зин адтайдӕ, фал еци конгресс мӕ царди хъӕбӕр устур фӕд ниууагъта.

Ирӕзгӕ кари ма ку адтӕн, уӕд цардан ферми ӕма фонсмӕ зелун мӕ зӕрдӕмӕ хъӕбӕр цудӕй. Мӕн фӕндадтӕй ветеринар исун. Мӕ мадӕ уой туххӕй загъта не ’мбурди хестӕр нӕлгоймагӕн. Е дӕр мин фӕлмӕнӕй мӕ зӕрдӕбӕл ӕрлӕуун кодта, «фӕстаг бӕнтти» ке цӕрӕн ӕма мӕ бафарста, цалдӕр анзей дӕргъи университети ку ахур кӕнон, уӕд е куд рабӕрӕг уодзӕй, Йегови хӕццӕ мин ци лимӕндзийнадӕ ес, уобӕл (2 Тим. 3:1). Гъема ӕз дӕр унаффӕ рахастон, уӕлдӕр ахурмӕ ке нӕ бацӕудзӕн.

 Мадта скъола ку фӕууон, уӕд ци косдзӕн? Алли уолӕфгӕ бӕнтти дӕр игъосун кӕнунмӕ цудтӕн, фал е мӕ зӕрдӕмӕ неци уотӕ цудӕй ӕма мӕ пионерӕй лӕггадӕ кӕнун дӕр нӕ фӕндадтӕй. Мӕ фидӕ ӕма ӕ кӕстӕр ӕнсувӕр Йегови Ӕвдесӕнтӕ н’ адтӕнцӕ. Сӕ дууӕ дӕр мӕ разӕнгард кодтонцӕ, цӕмӕй Торонтой ци устур страховой компани адтӕй, уоми кусти ниллӕудтайнӕ. Мӕ фиди ӕнсувӕр си устур бунат ахӕста, ӕма уомӕ гӕсгӕ ӕз дӕр исарази дӕн.

Торонтой мӕ фӕскуст арӕх косун ке фӕгъгъӕуидӕ, удта Йеговӕн ка нӕ лӕггадӕ кодта, уони хӕццӕ берӕ рӕстӕг ке ӕрвистон, уой туххӕй ӕмбурдтӕ цох кӕнун райдӕдтон ӕма игъосун кӕнунмӕ дӕр ефстагмӕ рацӕуинӕ. Фиццаг бал мӕ бабай хӕццӕ цардтӕн. Е Йегови Ӕвдесӕн н’ адтӕй. Фал ку рамардӕй, удта мӕ нӕуӕг цӕрӕнбунат агорун багъудӕй.

1958 анзи мӕ сӕ хӕццӕ конгресмӕ ка райста, еци бийнонтӕ Хатчесонтӕ мин ниййергути хузӕн адтӕнцӕ. Етӕ мӕ сӕхемӕ цӕрунмӕ фӕххудтонцӕ ӕма мин банхус кодтонцӕ, цӕмӕй Йеговӕмӕ фӕххӕстӕгдӕр адтайнӕ. 1960 сӕ фурт Джони хӕццӕ донаргъуд райстан. Джон пионерӕй лӕггадӕ кӕнун райдӕдта ӕма уомӕ кӕсгӕй ӕз дӕр фулдӕр игъосун кӕнун райдӕдтон. Къахдзӕфтӕ ке кӕнун, уой ӕмбурди ӕнсувӕртӕ фӕууидтонцӕ ӕма мӕ фӕстӕдӕр иснисан кодтонцӕ Игъосунгӕнгути скъолай лӕггадгӕнӕгӕй a.

1966 анзи ӕрхудтон еу зингзӕрдӕ пионер хуӕрӕ Ранди Берги. Уой хъӕбӕр фӕндадтӕй, Йегови Ӕвдесӕнтӕ кӕми нӕ фагӕ кодта, уоми лӕггадӕ кӕнун. Мах нӕ районон цӕстӕдарӕгӕй хъӕбӕр боз ан, уомӕн ӕма нӕ баразӕнгард кодта Ориллий (провинци Онтарио) ци ӕмбурд ес, уордӕмӕ рахезун. Уоми ӕнхус хъӕбӕр гъудӕй. Гъема мах дӕр нӕ дзаумӕуттӕ ӕрӕмбурд кодтан ӕма ранӕхстӕр ан.

Ориллимӕ куддӕр ӕрхъӕрдтан, уотӕ ӕз дӕр Рандимӕ рахицӕ кодтон ӕма пионер исдӕн. Куд зингзӕрдӕй лӕггадӕ кодта, е мӕбӕл хъӕбӕр фӕббӕрӕг ӕй. Еци гъуддаги ӕгас хъауритӕй архайдтон. Мӕ зӕрдӕмӕ хъӕбӕр цудӕй адӕнӕн Библий стихтӕ лӕдӕрун кӕнун. Ку ’й фӕууининӕ, рӕстдзийнадӕ сӕ зӕрдӕмӕ ке багъардта, уӕд мӕ цийнӕн кӕрон дӕр нӕбал фӕууидӕ. Гъуди ма ’й  кӕнун, еу лӕг ӕма уоси хӕццӕ Библи куд ахур кодтан. Хъӕбӕр ӕхцӕуӕн нин адтӕй, сӕ цард раййевунмӕ син ке банхус кодтан ӕма фӕстӕдӕр етӕ дӕр Йеговӕн лӕггадӕ кӕнун ке райдӕдтонцӕ.

Еу уӕхӕни Торонтой базонгӕ ан Арнолд Макнамари хӕццӕ. Е адтӕй, Вефили куст куд цӕуй, уомӕн дзуапп ка лӕвардта, еци ӕнсувӕртӕй сӕ еу. Е нӕ бафарста, нӕ, дан, уӕ фӕндуй сӕрмагонд пионертӕй лӕггадӕ кӕнун. Ӕз дӕр ин дзуапп равардтон: «Фӕндуй! Квебекӕй уӕлдай кумӕфӕндидӕр рандӕ уодзиан!» Мӕнбӕл хъӕбӕр рабӕрӕг ӕй, Канади англисагау ка дзурдта, уони зундахаст. Уонӕн сӕ зӕрдӕмӕ нӕ цудӕй, Квебеки французаг провинций змӕнститӕ ке адтӕй, е. Адӕни фӕндадтӕй, цӕмӕй сӕ провинци Канадӕй рахецӕн уа.

Арнолд загъта: «Нур филиал Квебекӕй ӕндӕр сӕрмагонд пионерти некумӕ ӕрветуй». Гъема ӕз дӕр исарази дӕн. Ӕз ӕй зудтон, Рандий уоми лӕггадӕ кӕнун ке фӕндадтӕй. Фӕстӕдӕр ӕй балӕдӕртӕн, е нӕ царди тӕккӕ хуӕздӕр унаффитӕй сӕ еу ке адтӕй!

Фондз къуӕрей дӕргъи нӕмӕ адтӕй французаг ӕвзаги къурситӕ. Уой фӕсте ба Рандий хӕццӕ, удта еу лӕг ӕма уоси хӕццӕ рандӕ ан горӕт Римускимӕ. Е адтӕй Монреалӕй 540 километри цӕгат-скӕсӕнӕрдӕмӕ. Фал ма уӕддӕр французагау мӕлӕти хуарз нӕ дзурдтан. Е уӕлдай хъӕбӕр рабӕрӕг ӕй еу ӕмбурди, игъосункӕнуйнӕгтӕ ку кастӕн, уӕд. Гъӕуама загътайнӕ, конгресмӕ нӕмӕ ке ӕрбацӕудзӕнцӕ берӕ австриӕгтӕ, фал уой бӕсти загътон, ке нӕмӕ ӕрбацӕудзӕй берӕ страустӕ.

Римуски ма нӕмӕ ӕрбайеу ӕнцӕ цуппар зингзӕрдӕ ӕнӕцуд хуӕри, удта, лӕг ӕма уосӕ Юбердо сӕ дууӕ кизгей хӕццӕ. Юбердо не ’гасемӕндӕр байхуӕрстонцӕ устур хӕдзарӕ. Мах ӕй худтан «Уорс хӕдзарӕ», уомӕн ӕма ӕ цӕгиндзитӕ дӕр ӕма ӕ фӕрстӕ дӕр уорс адтӕнцӕ. Уоми цардӕй 12 кенӕ 14 адӕймаги. Ӕз ӕма Ранди сӕрмагонд пионертӕй ке лӕггадӕ кодтан, уомӕ гӕсгӕ игъосун кӕнунмӕ цудан сӕумӕй дӕр, фӕсрӕфтӕ дӕр ӕма изӕрӕй дӕр. Мах хъӕбӕр аргъ кодтан, игъосун кӕнунмӕ нин алкӕддӕр ӕмбӕлттӕ ке фӕууидӕ, сауӕнгӕ ма зумӕгон уазал изӕрти дӕр.

Еци еузӕрдон пионерти хӕццӕ хъӕбӕр балимӕн ан. Сӕ хӕццӕ еу бийнонти хузӕн иссан. Еуӕй-еухатт ӕгасӕйдӕр арти размӕ ӕрӕмбурд уианӕ кенӕ ба нӕхецӕн искӕнианӕ «вареникти бон» – еугурӕйдӕр кодтан варениктӕ аллихузи гахи хӕццӕ. Еу ӕнсувӕр ба нӕмӕ музыкант адтӕй ӕма уомӕ гӕсгӕ сабати изӕригӕнтти арӕх фӕккафианӕ ӕма фӕззарианӕ.

Римуски Библий туххӕй берети фӕндадтӕй базонун. Фондз анзей дӕргъи фӕууидтан, Библи ка ахур кодта, уонӕй цалдӕр донаргъуд куд райстонцӕ, ӕмбурди ба 35 игъосунгӕнӕги ке иссӕй.

Квебеки лӕггадӕ кӕнгӕй игъосун кӕнуни гъуддаги дзӕвгарӕ фӕлтӕрдгундӕр иссан. Мах ӕй уидтан, Йеговӕ нин нӕ лӕггади куд ӕнхус кӕнуй ӕма нӕбӕл куд тухсуй, цӕмӕй маци гъӕуагӕ уӕн. Уомӕй уӕлдай ма хъӕбӕр бауарзтан, французагау ка дзурдта, еци адӕни, се ’взаг, удта се ’гъдӕуттӕ дӕр. Е нин устур ӕнхус фӕцӕй, цӕмӕй иннӕ адӕнихӕттити ӕгъдӕуттӕ дӕр бауарзӕн (2 Кор. 6:13).

Ӕнӕнгъӕлти нин филиал загъта, цӕмӕй игъосун кӕнунмӕ рандӕ уӕн провинци Нью-Брансуикки горӕт Тракадимӕ. Фал е уотӕ ӕнцон н’ адтӕй. Уой хуӕдразмӕ нӕуӕг хӕдзарӕ байхуӕрстан, удта скъолай къуӕремӕ цалдӕр сахатти ахургӕнӕгӕй кустон. Уомӕй уӕлдай ма Библи ке хӕццӕ ахур кодтан, уонӕй цалдӕр ӕнаргъуд игъосунгӕнгутӕ иссӕнцӕ. Фал уобӕл дӕр нӕ хабӕрттӕ нӕма фӕцӕнцӕ. Еци рӕстӕг Римуски Паддзахади зал кодтан ӕма куст ӕ тӕккӕ карзи адтӕй.

Ӕгас сабат ӕма хуцаубон Йеговӕмӕ фӕккувтан ӕма бал Тракадимӕ ӕркӕститӕ кӕнунмӕ рандӕ  ан. Еци горӕт Римускийӕй хъӕбӕр хецӕн кодта. Фал нӕхецӕн загътан: «Кӕд Йегови фӕндуй, цӕмӕй уоми уӕн, уӕд рандӕ уодзиан». Мах Йегови бафӕлвардтан ӕма ’й фӕууидтан, нӕ раз нин ке ислигъз кодта (Мал. 3:10). Ранди Йегови ке уарзта, уодуӕлдай ке адтӕй ӕма раходун ке зудта, уой фӕрци еци хабар ӕнцонтӕй фӕййевгъудӕй.

Ци ӕмбурдмӕ рахизтан, уоми адтӕй ӕрмӕстдӕр еунӕг хестӕр нӕлгоймаг Роберт Росс. Е ӕма ӕ бийнойнаг Линдӕ Тракадий лӕггадӕ кодтонцӕ пионертӕй. Фурт син ку райгурдӕй, уӕддӕр уоми байзадӕнцӕ. Ӕма син кӕд берӕ нӕуӕг хабӕрттӕ фӕззиндтӕй, уӕддӕр хъӕбӕр зингзӕрдӕй лӕггадӕ кодтонцӕ ӕма хъӕбӕр иуазӕгуарзон адтӕнцӕ. Мӕнӕн ӕма Рандийӕн алкӕддӕр фӕнзуйнаг адтӕнцӕ.

Тракадий дууӕ анзи ку фӕллӕггадӕ кодтан, уӕд мӕ ӕнӕнгъӕлти иснисан кодтонцӕ районон цӕстӕдарӕгӕй. Авд анзей дӕргъи лӕггадӕ кодтан, англисагау кӕми дзурдтонцӕ, уӕхӕн районти. Уой фӕсте ба нӕ иснисан кодтонцӕ, Квебеки французагау кӕми дзурдтонцӕ, еци районмӕ. Квебеки областон цӕстӕдарӕгӕй ка лӕггадӕ кодта, еци ӕнсувӕр Леонс Крепо b мӕ алкӕддӕр мӕ радзубандити туххӕй растауидӕ. Уой фӕсте ба мӕ рафӕрсидӕ: «Дӕ бон ма ци ӕй бакӕнун, цӕмӕй дӕ радзубандитӕ никки фулдӕр пайда хӕссонцӕ?» Ци унаффитӕ мин раттидӕ, етӕ мин банхус кодтонцӕ, цӕмӕй мӕ радзубандитӕ адтайуонцӕ бӕлвурддӕр ӕма ӕнцондӕр лӕдӕрӕн.

Некӕд ми феронх уодзӕй, Монреали 1978 анзи ӕхсӕнадӕмон конгресси мин ци гъуддаг баихӕс кодтонцӕ, е. Еци конгресс хундтӕй «Уӕлахезмӕ кӕнӕг ӕууӕндундзийнадӕ». Мӕн гъудӕй хуӕруйнаг бацӕттӕ кӕнун, конгресмӕ ка ӕрцӕудзӕй, уонӕн. Гъӕуама ӕрбацудайдӕ 80 000 адӕймаги. Ӕнсувӕртӕ загътонцӕ, аци хатт хуӕруйнаг ӕндӕрхузи ке бацӕттӕ кӕндзиан, раздӕр куд кодтан, уотӕ нӕ, фал. Цӕхуӕн хуӕруйнаг гъӕуама бацӕттӕ кодтайанӕ, куд ӕма кӕми, алцидӕр нӕуӕг адтӕй. Махмӕ адтӕй инсӕй устур уазалгӕнӕн прицеппи, фал ма нин етӕ дӕр рӕстӕгӕй-рӕстӕгмӕ басӕттиуонцӕ. Конгресси размӕ нӕ стадион бацӕттӕ кӕнун гъудӕй. Фал си еци бон еристӕ ке цудӕй, уомӕ гӕсгӕ кустмӕ равналун нӕ бон иссӕй ӕрмӕстдӕр ӕмбесӕхсӕви фӕсте. Рӕстӕг нин берӕ н’ адтӕй. Бонивайӕни уӕнгӕ гъӕуама алцидӕр искодтайанӕ, цӕмӕй сехуар афойнадӕбӕл исцӕттӕ адтайдӕ. Еци ӕхсӕвӕ хъӕбӕр бафӕлладан, фал фӕккӕсунмӕ ка ӕрбацудӕй, етӕ еци афони куд ӕнӕзийнадӕй ӕма игъӕлдзӕгӕй кустонцӕ, е мӕ деси бафтудта. Уонӕмӕ кӕсгӕй берӕ цӕбӕлдӕрти исахур дӕн. Еци ӕхсӕвӕ хъӕбӕр балимӕн ан  ӕма ма нури уӕнгӕ дӕр сӕ хӕццӕ хуарз ӕмбӕлттӕ ан. Кӕд 1940 ӕма 1950 ӕнзти Квебеки нӕ фӕдбӕл хъӕбӕр карзӕй зилдӕнцӕ, уӕддӕр си нур ба дессаги устур конгресс рацудӕй ӕма имӕ ӕз дӕр ке бахаудтӕн, уобӕл хъӕбӕр цийнӕ кодтон!

Монреали устур конгрессти рӕстӕг ӕнсувӕртӕй берӕ цӕбӕлдӕрти исахур уинӕ. Еу анз конгресси цӕстӕдарӕг адтӕй, абони Разамонӕг совети ка лӕггадӕ кӕнуй, еци ӕнсувӕр Дэйвид Сплейн. Иннӕ конгресстӕй еуеми ба цӕстӕдарӕг ӕз адтӕн, ӕма мин уӕд Дэйвид хъӕбӕр банхус кодта.

Рандий хӕццӕ районон лӕггади фӕцан 36 анзи, уой фӕсте ба мӕ, 2011 анзи иснисан кодтонцӕ Хестӕр нӕлгоймӕгти скъолай ахургӕнӕгӕй. Дууӕ анзей дӕргъи нӕ цӕрӕнбунат 75 хатти раййивтан. Кӕд нин ӕнцон нӕ фӕууидӕ, уӕддӕр е уой аргъ адтӕй. Алли къуӕрей кӕрон дӕр хестӕр нӕлгоймӕгтӕ хъӕбӕр боз фӕууиуонцӕ, уомӕн ӕма ’й уидтонцӕ, Разамонӕг совет син се ’ууӕндундзийнадӕбӕл куд хъӕбӕр тухсуй.

Фӕстӕдӕр адтӕн Хуцауи Паддзахади игъосунгӕнгути скъолай ахургӕнӕг. Ӕнцон си н’ адтӕй. Ка си ахур кодта, уони гъудӕй 7 сахатти урокти бадун, уой фӕсте изӕригӕнтти ӕртӕ сахатти хӕдзарӕмӕ куст кӕнун. Уомӕй уӕлдай ба ма син алли къуӕре дӕр 4 кенӕ 5 ихӕслӕвӕрди фӕууидӕ. Ӕз ӕма син иннӕ ахургӕнӕг фӕззӕгъианӕ, Йегови фӕрци син алцидӕр ке бантӕсдзӕй. Хуӕртӕ ӕма ӕнсувӕрти десӕн кӕрон нӕ уидӕ, алцидӕр син куд хуарз уайуй, уой ку уидтонцӕ, уӕд. Ӕма ӕцӕгӕйдӕр, Йегови ӕнхуси фӕрци нин алцидӕр бантӕсдзӕй!

Мӕ мадӕмӕ ӕргъудидзийнадӕ ке адтӕй, уомӕй банхус кодта, ке хӕццӕ ахур кодта, уонӕн. Ӕхе куд дардта, уомӕй мӕ фиди зӕрдӕ дӕр балхӕдта ӕма е дӕр рӕстдзийнадӕмӕ ӕрфӕлмӕн ӕй. Хъӕбӕр бадес кодтан, мӕ мадӕ ку рамардӕй, уӕд ӕртӕ боней фӕсте мӕ фидӕ ӕмбурдмӕ ке ӕрбацудӕй. Уой фӕсте 26 анзей дӕргъи ӕмбурдтӕмӕ цудӕй. Кӕд донаргъуд нӕ райста, уӕддӕр мин хестӕр нӕлгоймӕгтӕ загътонцӕ, ӕмбурди бон Паддзахади залмӕ ӕгасемӕй раздӕр ке ӕрбацӕуидӕ.

Нӕ мадӕ мӕнӕн дӕр ӕма ме ’ртӕ хуӕремӕн дӕр хъӕбӕр банхус кодта. Се ’ртӕ дӕр сӕ лӕгти хӕццӕ Йеговӕн еузӕрдонӕй лӕггадӕ кӕнунцӕ. Дууӕ ба си лӕггадӕ кӕнунцӕ филиалти: сӕ еу Португалий, иннӕ ба Гаитий.

Нур Рандий хӕццӕ лӕггадӕ кӕнӕн сӕрмагонд пионертӕй Гамильтони (провинци Онтарио). Районон лӕггади ма ку адтан, уӕд нӕ зӕрдӕмӕ хъӕбӕр цудӕй, дуккаг бацудтӕмӕ ӕма нӕ Библий ахуртӕмӕ ку фӕххониуонцӕ. Нур ба нӕхецӕн дӕр ес, Библи ке хӕццӕ ахур кӕнӕн, уӕхӕнттӕ, ӕма нин хъӕбӕр ӕхцӕуӕн ӕй къахдзӕфтӕ ке кӕнунцӕ. Не ’мбурди нин берӕ хуарз ӕмбӕлттӕ фӕззиндтӕй. Ӕма нин хъӕбӕр ӕхцӕуӕн ӕй, Йеговӕ алкӕддӕр сӕ фарсмӕ ке фӕууй, хуарз рӕстӕгути дӕр ӕма лӕгъуз рӕстӕгути дӕр.

Иронх ни нӕй хуӕртӕ ӕма ӕнсувӕрти ӕргъудидзийнадӕ. Етӕ нӕбӕл зӕрдиагӕй тухстӕнцӕ. Ӕма мах дӕр архайдтан, цӕмӕй син бавдистайанӕ, «ӕновуд» сӕбӕл ке ан (2 Кор. 7:6, 7). Зӕгъӕн, ӕнхус син кодтан, цӕмӕй балӕдӕрдтайуонцӕ, сӕ бон ци ӕй кӕнун, уой ӕма Йеговӕн ӕгас зӕрдӕй лӕггадӕ кӕнун. Зӕгъӕн, еу ӕнсувӕрӕн ӕнхӕстрӕстӕг пионертӕй лӕггадӕ кодтонцӕ ӕ уосӕ, ӕ фурт ӕма ӕ кизгӕ. Еу уӕхӕни ’й бафарстон: «Ду ба некӕд сагъӕс кодтай, ӕнхӕстрӕстӕг пионерӕй балӕггадӕ кӕнун?» Е мин загъта, ӕртӕ пионеремӕн ке ӕнхус кӕнуй. Уӕд ӕй бафарстон: «Куд дӕмӕ кӕсуй, Йеговӕй син хуӕздӕр банхус кӕндзӕнӕ?» Ӕз ин загътон, пионерӕй лӕггадӕ кӕнун ку райдайа, уӕд е дӕр ӕ бийнонти хузӕн ке цийнӕ кӕндзӕй. Ӕхсӕз мӕйей фӕсте ӕмбурд бийнонтӕй дӕр адтӕнцӕ пионертӕ.

Мӕн ӕма Рандий идарддӕр дӕр фӕндуй Йегови «дессаги гъуддӕгти» туххӕй хуӕртӕ ӕма ӕнсувӕрти «иннӕ фӕлтӕрӕн» дзорун (Пс. 71:17, 18). Нифс нӕ ес, ӕма етӕ дӕр Йеговӕн цийнӕгӕнгӕй лӕггадӕ кӕндзӕнцӕ, мах ин куд лӕггадӕ кӕнӕн, уотӕ.