Дуккаг дуйнеуон тугъди рӕстӕг мӕ ниййергутӕ Эстониӕй Германимӕ ралигъдӕнцӕ. Ӕз уоми райгурдтӕн. Фӕстӕдӕр сӕ бафӕндадтӕй Канадӕмӕ рандӕ ун. Канади мах цардан Оттавӕмӕ хӕстӕг. Нӕ фиццаг хӕдзарӕ адтӕй къирӕй цагъд кӕркдони къум. Хъӕбӕр мӕгур цард кодтан, фал нӕмӕ уӕддӕр сехуарӕн ба ӕйкитӕ алкӕддӕр фӕууидӕ.

Еу уӕхӕни Йегови Ӕвдесӕнтӕ мӕ мадӕн бакастӕнцӕ Раргомади 21:3, 4 финст дзурдтӕ. Еци скъуддзаг ӕ зӕрдӕбӕл гъе уотӕ бамбалдӕй, ӕма ӕ цӕстисугтӕ ӕруадӕнцӕ. Йегови Ӕвдесӕнтӕ ци нӕмуг байтудтонцӕ, е ирӕзтӕй ӕма тагъд рӕстӕги мӕ ниййергутӕ донаргъуд райстонцӕ.

Мӕ ниййергутӕ англисагау хъӕбӕр лӕгъуз дзурдтонцӕ, фал уӕддӕр рӕстдзийнадӕн ба устур аргъ кодтонцӕ. Алли сабати дӕр мӕ фидӕ мӕн ӕма мӕ хуӕрӕ Сильвий игъосун кӕнунмӕ фӕххонидӕ, сауӕнгӕ ма ӕгас ӕхсӕвӕ ку фӕккосидӕ, уӕд дӕр. Косгӕ ба кодта никель кӕми тайун кодтонцӕ, уӕхӕн заводи Садберийи (провинци Онтарио). Удта алли къуӕре дӕр ӕгас бийнонтӕй «Гъӕуайгӕнӕн мӕсуг» ахур кодтан. Мӕ ниййергутӕ мин банхус кодтонцӕ Йегови бауарзун. Ӕма уой фӕрци 1956 анзи мӕхе Йеговӕн иснивонд кодтон. Уӕд мӕбӕл цудӕй 10 анзи. Мӕ ниййергутӕ Йегови куд берӕ уарзтонцӕ, е мин ме ’гас царди дӕргъи дӕр хъауритӕ лӕвардта.

Скъола ку фӕдтӕн, уӕд уотӕ зингзӕрдӕй нӕбал лӕггадӕ кодтон. Уотӕ мӕмӕ кастӕй, ӕма пионер ку исуон, уӕд некӕд бакосдзӕн ӕхца, цӕмӕй мӕ бӕллец исӕнхӕст кӕнон – хуӕдтӕхӕгбӕл ӕгас дуйнебӕл дӕр ӕрзелон. Уой туххӕй райдӕдтон радиой диджеййӕй косун. Мӕ куст мӕ зӕрдӕмӕ цудӕй, фал мӕ гъудӕй изӕригӕнтти косун. Уой туххӕй ӕмбурдтӕ арӕх цох кодтон ӕма, Йегови ка нӕ уарзта, уони хӕццӕ рӕстӕг берӕ ’рвистон. Фал мӕ фӕстӕдӕр мӕ цӕсгон хуӕрун райдӕдта ӕма ’й балӕдӕрдтӕн, мӕ царди мӕ цидӕр феййевун ке гъӕуй.

Ӕз рандӕ дӕн Ошавӕмӕ (провинци Онтарио). Уоми базонгӕ дӕн Рей Нормани хӕццӕ, ӕ хуӕрӕ Лесли, удта ӕндӕр пионерти хӕццӕ. Еугурӕйдӕр мӕмӕ хӕларзӕрдӕ адтӕнцӕ. Уидтон ӕй, куд амондгун адтӕнцӕ ӕма мӕ бафӕндадтӕй мӕ нисӕнттӕмӕ ӕркӕсун. Етӕ мӕ баразӕнгард кодтонцӕ, цӕмӕй пионерӕй лӕггадӕ кӕнун райдӕдтайнӕ. Ӕма ӕз дӕр уотӕ бакодтон 1966 анзи сентябри. Хъӕбӕр амондгун адтӕн. Фал ма мин Йеговӕ федӕни берӕ лӕвӕрттӕ искодта, ӕма мин етӕ мӕ цард цӕхгӕрмӕ феййивтонцӕ.

Скъолай ма ку ахур кодтон, уӕд Канади Вефили лӕггадӕ кӕнунмӕ курдиадӕ балӕвардтон. Вефил  адтӕй Торонтой. Фӕстӕдӕр пионерӕй ку лӕггадӕ кодтон, уӕд мӕ фӕххудтонцӕ Вефили цуппар анзи балӕггадӕ кӕнунмӕ. Фал мӕ зӕрдӕмӕ Лесли хъӕбӕр цудӕй ӕма тарстӕн, ку исарази уон, уӕд ӕй ке некӕдбал фӕууиндзӕн. Берӕ фӕккувтон, ӕма фӕстагмӕ ниллух кодтон, Вефили ке лӕггадӕ кӕндзӕн. Гъема Леслийӕн ӕнкъардӕй дзӕбӕх уо загътон.

Фиццӕгти Вефили кустон, хъӕппӕлтӕ кӕми ӕхснадтонцӕ, уоми. Фӕстӕдӕр ба секретарӕй. Уӕдмӕти Лесли иссӕй сӕрмагонд пионер Гатиной (провинци Квебек). Арӕх сагъӕс кӕнинӕ: «Нур Лесли ци косуй? Цума раст унаффӕ рахастон?» Уӕд дин базудтон Рэййи, Леслий ӕнсувӕри, Вефилмӕ ке фӕххудтонцӕ. Уӕд куд бацийнӕ кодтон, уомӕн зӕгъӕн дӕр нӕййес. Рэййи хӕццӕ еу къомнӕти цардан, ӕма уой фӕрци мӕ бон адтӕй нӕуӕгӕй Леслий хӕццӕ лимӕн кӕнун. Еци цуппар анзи фӕцӕнцӕ 27 феврали 1971 анзи, ӕма еци бон Леслий хӕццӕ нӕ цард байеу кодтан.

Леслий хӕццӕ нӕ Квебеки французаг ӕмбурдмӕ иснисан кодтонцӕ. Цалдӕр анзей фӕсте ба мӕ районон цӕстӕдарӕгӕй лӕггадӕ кӕнунмӕ фӕххудтонцӕ. Уӕд мӕбӕл 28 анземӕй фулдӕр нӕ цудӕй. Уотӕ мӕмӕ кастӕй, ӕма ӕгӕр ӕригон, удта ӕвӕлтӕрд дӕн. Фал мин хъӕбӕр банхус кодтонцӕ Йеремий 1:7, 8 финст дзурдтӕ. Еу цӕбӕлдӕр ма тухстӕн. Лесли цалдӕр хатти аварий бахаудтӕй, удта лӕгъуз фунӕй кодта. Ӕма сагъӕс кодтан, цума нӕ бон уодзӕй еци хузи балӕггадӕ кӕнун. Фал мӕ хъазар бийнойнаг загъта: «Кӕд нин уой Йеговӕ баихӕс кӕнунмӕ гъавуй, уӕд гъӕйдӕ равзарӕн». Мах исарази ан ӕма уотемӕй 17 анзи фӕллӕггадӕ кодтан.

Районон цӕстӕдарӕгӕй ку лӕггадӕ кодтон, уӕд хъӕбӕр ӕнӕвдӕлон адтӕн ӕма мин арӕх Леслийӕн рӕстӕг нӕбал фӕууидӕ. Фал мин фӕстӕдӕр еу хабар зундзонӕн иссӕй. Еу уӕхӕни нӕмӕ авдисӕри сӕумӕй кадӕр ӕрбахуаста. Ракастӕн, фал си неке адтӕй. Дуари рази ниууагътонцӕ тӕскъӕ пикниккӕн. Адтӕй си стъолӕмбӕрзӕн, рӕзӕ, цигът, дзол, сӕнӕ, бокалтӕ ӕма запискӕ, фал кӕмӕй адтӕй, е ба си финст н’ адтӕй. Финст си адтӕй: «Дӕ бийнойнаги пикникмӕ фӕлласӕ». Уӕд дзӕбӕх хор бон адтӕй. Фал Леслийӕн балӕдӕрун кодтон, радзубандитӕ цӕттӕ кӕнун мӕ ке гъӕуй, ӕма мӕ бон ӕ хӕццӕ фӕццӕун ке не ’суодзӕй. Лесли алцидӕр балӕдӕрдтӕй, фал уӕддӕр еу минкъий ӕрӕнкъард ӕй. Радзубанди цӕттӕ кӕнунмӕ исбадтӕн, фал мӕ мӕ цӕсгон хуӕрун райдӕдта. Мӕ зӕрдӕбӕл ӕрлӕудтӕнцӕ Ефесӕгтӕмӕ 5:25, 28 финст дзурдтӕ. Цума мин Йеговӕ ӕхуӕдӕг дзурдта: «Рейно, цо, ӕма дӕ бийнойнаги хӕццӕ рӕстӕг рарветӕ». Ӕз ракувтон, удта Леслийӕн загътон: «Цӕуӕн пикникмӕ!» Ӕ цийнӕн кӕрон дӕр н’ адтӕй. Мах цӕугӕдони билӕбӕл рӕсугъд бунат иссирдтан ӕма си стъолӕмбӕрзӕн райтудтан. Еци бон гъе уотӕ дзӕбӕх рарвистан, ӕма ’й нури уӕнгӕ дӕр гъуди кӕнӕн. Хӕдӕгай, мӕ радзубандитӕ дӕр бацӕттӕ кодтон.

Районон лӕггадӕ нӕ зӕрдӕмӕ хъӕбӕр цудӕй. Ӕгас Канадӕбӕл ӕрзилдан: Бритайнаг Колумбийӕй Ньюфаундленди уӕнгӕ. Сувӕллонӕй цӕмӕ бӕлдтӕн, е исӕнхӕст ӕй. Галаади скъолай туххӕй дӕр еуӕй-еухатт расагъӕс кӕнинӕ, фал мӕ миссионерӕй лӕггадӕ кӕнун ба нӕ фӕндадтӕй. Уотӕ мӕмӕ кастӕй, ӕма миссионертӕ иннӕ адӕни  хузӕн нӕ ’нцӕ ӕма мӕ бон уони хузӕн исун некӕд исуодзӕй. Удта ма тарстӕн, Африки лӕггадӕ кӕнунмӕ нӕ ку иснисан кӕнонцӕ, уомӕй, уомӕн ӕма си берӕ незтӕ ес, удта берӕ рауӕнти тугъдтитӕ цӕуй. Канади лӕггадӕ кӕнун ба мӕ зӕрдӕмӕ хъӕбӕр цудӕй.

1992 анзӕй фӕстӕмӕ Йегови Ӕвдесӕнтӕн сӕ бон адтӕй сӕребарӕй игъосун кӕнун, раздӕр Советон Цӕдесмӕ ка хаудтӕй, еци бӕстити. Ӕма нӕ бафарстонцӕ, Эстоний, дан, уӕ нӕ фӕндадтайдӕ миссионертӕй балӕггадӕ кӕнун. Е ӕнӕнгъӕлти адтӕй, фал Йеговӕмӕ берӕ фӕккувтан. Аци хатт дӕр бабӕй расагъӕс кодтан: «Кӕд нин Йеговӕ ести кӕнун кӕнуй, уӕд цӕмӕннӕ гъӕуама бавзарӕн?» Мах исарази ан. Ӕма исуолӕфтӕн: «Хуарз ӕма, уӕддӕр Африкӕ нӕй».

Еци фӕдбӕл эстойнаг ӕвзаг ахур кӕнун райдӕдтан. Уобӕл цалдӕр мӕйемӕй ӕндӕр нӕ рацудӕй, ӕма нин баихӕс кодтонцӕ, цӕмӕй районон цӕстӕдаргутӕй лӕггадӕ кӕнӕн. Мах гъудӕй бӕрӕг кӕнун 46 ӕмбурди ӕма цалдӕр къуари Балтий бӕститӕй ӕртеми, удта Калинингради. Е ба уобӕл дзорӕг адтӕй, ӕма еу минкъий гъӕуама зудтайанӕ латышаг, литоваг ӕма уруссаг ӕвзӕгтӕ. Е ӕнцон н’ адтӕй, фал хуӕртӕ ӕма ӕнсувӕртӕн ӕхцӕуӕн адтӕй се ’взаг син ке ахур кӕнӕн, ӕма нин банхус кӕнунмӕ цӕттӕ адтӕнцӕ. 1999 анзи Эстоний филиал фӕззиндтӕй, ӕма мӕ уоми иснисан кодтонцӕ филиали комитетмӕ. Адтӕнцӕ ма си Томас Эдур, Лембит Райле ӕма Томми Кауко.

Сибирмӕ ке рарвистонцӕ, уӕхӕн хуӕртӕ ӕма ӕнсувӕртӕй берети хӕццӕ базонгӕ ан. Кӕд сӕ сӕ хеуӕнтти хӕццӕ фӕххецӕн кодтонцӕ ӕма сӕмӕ хъӕбӕр ӕнӕхатир адтӕнцӕ, уӕддӕр сӕ зӕрди маст нӕ ниддардтонцӕ. Етӕ сӕ цийнӕ нӕ фесафтонцӕ ӕма сӕ фӕндадтӕй зингзӕрдӕй Хуцауи туххӕй иннетӕн дзорун. Сӕ цӕветтон нин нӕ нифс бафедар кодта ӕма ’й фӕууидтан, зин уавӕрти мах бон дӕр ке исуодзӕй нӕ цийнӕ ма фесафун.

Берӕ ӕнзти дӕргъи ӕнӕрӕнцайгӕй лӕггадӕ кодтан. Рӕстмӕ бауолӕфунмӕ ба нин рӕстӕг нӕ фӕууидӕ. Еу афони Лесли ӕгӕр фӕллайун райдӕдта. Уӕд ӕй нӕ балӕдӕрдтан, е фибромиалгийӕ нези хӕццӕ баст ке ӕй. Уомӕ гӕсгӕ сагъӕс кӕнун райдӕдтан, цӕмӕй Канадӕмӕ фӕстӕмӕ раздӕхӕн. Еци рӕстӕг нӕ фӕххудтонцӕ Филиали комитети иуӕнгти скъоламӕ Патерсони (штат Нью-Йорк, АЕШ), ӕма гурусхӕ кодтон, нӕ бон исуодзӕй уордӕмӕ фӕццӕун ӕви нӕ. Йеговӕмӕ зӕрдиагӕй кувдтан ӕма исарази ан. Ӕма нин Йеговӕ райарфӕ кодта. Цалинмӕ ӕз ахур кодтон, уӕдмӕ Леслийӕн ӕ бон иссӕй е ’нӕнездзийнадӕмӕ фӕккӕсун. Рӕстӕг рацудӕй, ӕма бабӕй нӕ цард ӕхемӕ ’рцудӕй.

Эстонимӕ ку ӕрӕздахтан, уӕд мӕмӕ еу изӕр сӕйраг хайадӕй ӕрбадзурдтонцӕ ӕма нӕ бафарстонцӕ: «Цӕттӕ айтӕ Конгомӕ рандӕ ун?» Е адтӕй 2008 анзи. Мӕ десӕн кӕрон дӕр н’ адтӕй, уӕлдайдӕр ба уой туххӕй ӕма дзуапп иннӕ бон раттун гъудӕй. Леслийӕн неци загътон, уомӕн ӕма ’й зудтон, ӕгас ӕхсӕвӕ ӕнӕхуссӕг ке фӕууодзӕй. Фал ӕнӕхуссӕг мӕхуӕдӕг фӕдтӕн. Йеговӕмӕ кувтон ӕма ин дзурдтон, Африкӕмӕ цӕун мӕ нифс цӕмӕннӕ хӕссун, уой туххӕй.

Иннӕ бон алцидӕр Леслийӕн радзурдтон. Мах расагъӕс кодтан: «Йеговӕ нӕ хонуй Африкӕмӕ. Кӕцӕй ’й зонӕн, ӕма ни неци рауайдзӕй, кӕд ӕма ӕвзаргӕ дӕр нӕма ракодтан?» Эстоний фӕллӕггадӕ  кодтан 16 анзи, ӕма уой фӕсте рандӕ ан Киншасӕмӕ. Филиал хъӕбӕр рӕсугъд адтӕй. Адтӕй си берӕ бӕлӕстӕ ӕма дидингутӕ, удта си хъӕбӕр сабур адтӕй. Лесли нӕ къомнӕти, Канади ин ци открыткӕ адтӕй, уой ниввардта. Финст ибӕл адтӕй: «Кӕми дӕ ниййаразтонцӕ, уоми дидинӕг кӕнӕ». Конгой хуӕртӕ ӕма ӕнсувӕрти хӕццӕ балимӕн ан, удта нин Библий ахуртӕ дӕр фӕззиндтӕй. Уой фӕрци миссионертӕй лӕггадӕ кӕнун нӕ зӕрдӕмӕ цӕун райдӕдта. Фӕстӕдӕр нӕмӕ уӕхӕн кадӕ дӕр ӕрхаудтӕй, ӕма нин баихӕс кодтонцӕ Африки иннӕ бӕсти филиалтӕ бӕрӕг кӕнун. Ӕдеугурӕй бабӕрӕг кодтан 13 филиали. Уой фӕрци базонгӕ ан аллихузи хуӕртӕ ӕма ӕнсувӕрти хӕццӕ, ӕма син сӕ рӕсугъд уодигъӕдӕ фӕууидтан. Африкӕмӕ цӕун цӕй туххӕй тарстӕн, уомӕй фӕд дӕр нӕбал байзадӕй, ӕма Йеговӕй хъӕбӕр боз адтан, ардӕмӕ нӕ ке ’рарвиста.

Конгой нӕ хинстонцӕ, сагъӕс дӕр кӕбӕл нӕ ракодтайанӕ, уӕхӕн хуӕруйнӕгтӕй, сауӕнгӕ ма хъӕбузатӕй дӕр. Фал сӕ хуӕртӕ ӕма ӕнсувӕртӕ уӕхӕн хуӕрд кодтонцӕ, ӕма сӕмӕ мах дӕр исмондаг ан, ӕма нӕ рафӕсмон кодтан.

Бӕсти скӕсӕнӕрдигӕй змӕнтгутӕ гъӕутӕмӕ балӕбориуонцӕ ӕма сувӕллӕнттӕн, удта силгоймӕгтӕн фудмиутӕ кӕниуонцӕ. Хуӕртӕ ӕма ӕнсувӕртӕн гъудӕй гуманитарон ӕнхус фӕлласун ӕма сӕ бафедар кӕнун. Сӕ фулдӕр хъӕбӕр мӕгур цард кодтонцӕ, фал райгасдзийнадӕбӕл ӕгас зӕрдӕй ӕууӕндтӕнцӕ. Йегови хъӕбӕр берӕ ке уарзтонцӕ ӕма организацибӕл еузӕрдон ке адтӕнцӕ, е нин нӕ нифс хъӕбӕр федар кодта. Уонӕмӕ кӕсгӕй ма еу хатт дӕр расагъӕс кодтан, Йеговӕн цӕмӕн лӕггадӕ кӕнӕн, уой туххӕй, ӕма нин е не ’ууӕндундзийнадӕ бафедар кодта. Еуӕй-еу хуӕртӕ ӕма ӕнсувӕртӕ сӕ хӕдзӕрттӕ ӕма сӕ тиллӕг фесафтонцӕ. Ӕз ӕй фӕууидтон, аци дуйней адӕймагмӕ ци мулк ес, уой хъӕбӕр тагъд ке фесӕфуй. Ӕма дзӕвгарӕ ӕхсидзгӕ дӕр ӕй, Йегови хӕццӕ нин ци лимӕндзийнадӕ ес, е. Кӕд хуӕртӕ ӕма ӕнсувӕртӕ берӕ зиндзийнӕдтӕбӕл исӕмбалдӕнцӕ, уӕддӕр хъӕбӕр ефстагмӕ гъаст кодтонцӕ. Сӕ зиндзийнӕдтӕмӕ уӕхӕн цӕстӕй ке кастӕнцӕ, е махӕн дӕр нӕ нифс бафедар кодта. Ба ’й лӕдӕрдтан, зиндзийнӕдтӕбӕл ку исӕмбӕлӕн кенӕ нӕмӕ цӕхуӕндӕр нез ку разиннуй, уӕд нифсхаст ке гъӕуама уӕн.

Уоййадӕбӕл нӕ хабӕрттӕ нӕ фӕцӕнцӕ. Фӕстӕдӕр нӕ иснисан кодтонцӕ Гонконги филиалмӕ.  Махӕн нӕ сӕри къуми дӕр н’ адтӕй, скӕсӕнӕрдиги ке цӕрдзиан. Фал исарази ан, уомӕн ӕма ’й абони уӕнгӕ еу ӕма дууӕ хатти нӕ фӕууидтан, Йеговӕ нӕбӕл куд тухсуй, уой. 2013 анзи цӕстисуг калгӕй хуӕрзбон загътан нӕ африкаг хуӕртӕ ӕма ӕнсувӕртӕн, удта дессаги рӕсугъд Африкӕн. Федӕни нӕмӕ ци ӕнгъӕлмӕ кастӕй, уой нӕ зудтан.

Гонконг устур горӕт ӕй. Хъӕбӕр берӕ адӕн си цӕруй. Африки хӕццӕ рабаргӕй уоми цард ӕндӕрхузи ӕй. Китайаг ӕвзаг ахур кӕнун дӕр ӕнцон н’ адтӕй, фал нин ӕнсувӕртӕ банхус кӕнунмӕ алкӕддӕр цӕттӕ адтӕнцӕ. Удта ма нӕ зӕрдӕмӕ хъӕбӕр фӕццудӕй, Гонконги ци хуӕруйнӕгтӕ адтӕй, етӕ. Вефили куст фулдӕрӕй-фулдӕр кодта, ӕма уомӕ гӕсгӕ фулдӕр бунат гъудӕй. Фал зӕнхӕ ӕма хӕдзӕртти аргъ хъӕбӕр исхъазар ӕй. Уомӕ гӕсгӕ Разамонӕг совет унаффӕ рахаста, цӕмӕй филиали фулдӕр бӕстихӕйттӕ уӕйӕгонд ӕрцудайуонцӕ. 2015 анзи нӕ иснисан кодтонцӕ Хонсар Корейӕмӕ, ӕма нур дӕр уоми лӕггадӕ кӕнӕн. Корейаг ӕвзаг дӕр ӕнцон нӕй, ӕма ибӕл кӕд нур дӕр мӕлӕти хуарз нӕма дзорӕн, уӕддӕр нӕ хуӕртӕ ӕма ӕнсувӕртӕ растаунцӕ, минкъий ести нин ку рауайуй, уӕд дӕр. Мах си уой туххӕй хъӕбӕр боз ан.

Нӕуӕг ӕмбӕлттӕ иссерун алкӕд ӕнцон нӕ фӕууй. Фал ӕй мах балӕдӕрдтан: дӕхуӕдӕг иуазӕгуарзон ку уай, уӕд иннети хӕццӕ тагъддӕр базонгӕ уодзӕнӕ. Удта ма ’й фӕууидтан, ӕнсувӕртӕ кӕрӕдземӕй хъӕбӕр ке нӕ хецӕн кӕнунцӕ. Дзубанди дӕр ибӕл нӕййес, Йеговӕ нӕ уотӕ ’скодта, цӕмӕй нӕ бон уа берӕ ӕмбӕлттӕн нӕ зӕрди бунат искӕнун (2 Кор. 6:11).

Еу гъуддагбӕл исахур ан: гъӕуама адӕнмӕ Йеговӕ цӕхуӕн цӕстӕй кӕсуй, уӕхӕн цӕстӕй кӕсӕн. Удта гъӕуама уинӕн, Йеговӕ нӕбӕл ке тухсуй ӕма нӕ ке уарзуй, уой. Нифссаст ку фӕууианӕ кенӕ нӕмӕ уотӕ ку фӕккӕсидӕ, цума нӕ неци уотӕ уарзунцӕ, уӕд кастан не ’мбӕлттӕ нин ци открыткитӕ ӕма финстӕгутӕ ниффинстонцӕ, уони. Йеговӕ нин нӕ кувдитӕбӕл куд дзуапп кӕнуй, уой нӕхебӕл бавзурстан. Е нин алкӕддӕр нӕ нифс бафедар кӕнидӕ ӕма нин хъауритӕ раттидӕ.

Мах ӕй Леслий хӕццӕ балӕдӕрдтан, кудфӕнди ӕнӕвдӕлон ма уӕн, уӕддӕр гъӕуама кӕрӕдземӕн рӕстӕг хецӕн кӕнӕн. Удта ма фӕууидтан, нӕхебӕл раходун ци хуарз ӕй, уӕлдайдӕр ба ӕндӕр ӕвзаг ку ахур кӕнай, уӕд. Удта алли изӕр дӕр байархайӕн, цӕмӕй ӕргъуди кӕнӕн, Йеговӕн цӕй туххӕй райарфӕ кӕнӕн, уой.

Раст зӕгъгӕй, уой ӕнгъӕл некӕд адтӕн, ӕма мӕ бон исуодзӕй миссионерӕй лӕггадӕ кӕнун, удта ӕндӕр бӕстити цӕрун. Фал Йегови хӕццӕ алцӕмӕндӕр ес гӕнӕн. Мӕ зӕрдӕбӕл ӕрлӕудтӕнцӕ пахампар Йеремий дзурдтӕ: «О Йеговӕ, ду мӕ фӕссайдтай» (Йер. 20:7). Йеговӕ нин, нӕ гъудий кӕрон дӕр ка н’ адтӕй, берӕ уӕхӕн лӕвӕрттӕ искодта – сауӕнгӕ ма мин мӕ бӕллец дӕр исӕнхӕст кодта. Минкъий ма ку адтӕн, уӕд мин еске уотӕ ку загътайдӕ, ӕма уойбӕрцӕ бӕститӕмӕ фӕттӕхдзӕн, уӕд ибӕл нӕ баууӕндтайнӕ. Филиалтӕ бӕрӕг кӕнгӕй берӕ бӕститӕ фӕууидтан. Кӕмифӕнди ма лӕггадӕ кодтайанӕ, Лесли мин алкӕддӕр ӕнхус кодта, ӕма си уой туххӕй хъӕбӕр боз дӕн.

Мах алкӕддӕр нӕ зӕрдӕбӕл ӕрлӕуун кӕнӕн, кӕмӕн лӕггадӕ кӕнӕн ӕма цӕмӕн, уой. Абони ци арфӕдзийнӕдтӕй исхайгин ан, етӕ, федӕни нӕмӕ ци ’нгъӕлмӕ кӕсуй, уонӕн ӕрмӕстдӕр сӕ аууон ӕнцӕ. Уӕд Йеговӕ ӕ къох райгон кӕндзӕй ӕма алкӕмӕндӕр ратдзӕй «ӕ зӕрдӕ ци зӕгъуй, уой» (Пс. 145:16).