1. Библий ӕцӕг уарзондзийнади туххӕй ци финст ес?

 «УАРЗТИ цӕхӕртӕ ӕнцӕ арти цӕхӕртӕ, Йаги пеллон арт. Уарзти зинг берӕ дӕнттӕ дӕр нӕ ниххуссун кӕндзӕнцӕ, цӕугӕдӕнттӕ дӕр ӕй нӕ фӕлласдзӕнцӕ» (Сол. з. 8:6, 7) b. Дессаги рӕсугъд дзурдтӕ! Аци дзурдтӕй бӕрӕг ӕй, уомӕн гӕнӕн ке ес, цӕмӕй лӕг ӕма уосӕ кӕрӕдзей ӕносмӕ дӕр уарзонцӕ.

2. Лӕг ӕма уоси ци кӕнун гъӕуй, цӕмӕй сӕ уарзондзийнадӕ ма ӕруазал уа?

² Лӕг ӕма уосӕ кӕрӕдзей цӕргӕ-цӕрӕнбонти уарздзӕнцӕ ӕви нӕ, е сӕхецӕй кӕнгӕ ’й. Ӕрхӕссӕн цӕветтон: цӕмӕй арт цӕфса, уой туххӕй имӕ согтӕ гӕлдзун гъӕуй. Ку неке имӕ гӕлдза согтӕ, уӕд сабургай ниххусдзӕй. Уотӕ лӕг ӕма уосӕн дӕр сӕ уарзти зинг нӕ ниххусдзӕй, сӕ бийнонти цардбӕл ку тухсонцӕ, уӕд. Фал ӕй еуӕй-еухатт лӕг ӕма уосӕ фӕллӕдӕрунцӕ, сӕ уарзти зинг ке ӕруазал ӕй. Уотӕ берӕ алцӕйти туххӕй рауайуй: ӕхцайӕй нӕ фӕхъхъӕртунцӕ, се ’нӕнездзийнадӕй батухсунцӕ, сувӕллӕнтти гъомбӕл кӕнгӕй зиндзийнӕдтӕбӕл исӕмбӕлунцӕ. Уомӕ гӕсгӕ, лӕгтӕ ӕма уоститӕ, уӕ бон ци ӕй кӕнун, цӕмӕй «Йаги пеллон арт» ниххуссун ма бауадзайтӕ? Аци статьяй ӕркӕсдзиан ӕртӕ унаффемӕ. Етӕ уин банхус кӕндзӕнцӕ, цӕмӕй уӕ бийнонти цардӕй уӕ зӕрдӕ рохс кӕна c.

3. Лӕг ӕма уосӕн Йеговӕ се ’мбал ку уа, уӕд син е куд банхус кӕндзӕй, цӕмӕй сӕ уарзт ма ӕруазал уа? (Екклесиаст 4:12). (Кӕсӕ ма хузӕмӕ.)

³ Цӕмӕй «Йаги пеллон арт» ма ниххусса, уой туххӕй лӕг дӕр ӕма уосӕ дӕр гъӕуама Йеговӕбӕл сӕхе бӕттонцӕ. Е сӕ  бийнонти цардӕн куд банхус кӕндзӕй? Йегови хӕццӕ син ци лимӕндзийнадӕ ес, уомӕн ку аргъ кӕнонцӕ, уӕд ин ӕ унаффитӕй дӕр ӕнӕ ракӕнӕ-бакӕнӕй пайда кӕндзӕнцӕ. Е ба син банхус кӕндзӕй, цӕмӕй, уарзондзийнадӕ ци зиндзийнӕдти туххӕй ӕруазал уй, уони сӕрти хезонцӕ. (Бакӕсӕ Екклесиаст 4:12.) Йеговӕ е ’мбал кӕмӕн ӕй, етӕ фӕййархайунцӕ, цӕмӕй ӕй фӕнзонцӕ ӕма уонцӕ хӕларзӕрдӕ, фӕразон ӕма хатиргӕнагӕ (Еф. 4:32–5:1). Уӕхӕн бийнонти уарзт некӕд ӕрхусдзӕй. 25 анземӕй фулдӕр лӕгмӕцуд ка ӕй, еу уӕхӕн хуӕрӕ Ленӕ зӕгъуй: «Йегови ка уарзуй, уӕхӕн адӕймаги уарзун ӕма нимайун дзӕвгарӕ ӕнцондӕр ӕй».

4. Йеговӕ Мессийи ниййергутӕй Иосиф ӕма Марийи цӕмӕн равзурста?

⁴ Ӕркӕсӕн Библийӕй еу хабармӕ. Мессийи ниййергутӕ ка уодзӕй, уой Йеговӕ ку ’взурста, уӕд цӕмӕ кастӕй? Давидӕн хъӕбӕр берӕ байзӕддӕгтӕ адтӕй, фал се ’гасемӕй равзурста Иосиф ӕма Марийи. Цӕмӕн? Уомӕн ӕма сӕ дӕууемӕн дӕр Йеговӕ сӕ хуарз Ӕмбал адтӕй. Йеговӕ ’й зудта, сӕ цард ку байеу кӕнонцӕ, уӕд син Хуцау фиццаг бунати ке уодзӕй. Лӕгтӕ ӕма уоститӕ, уӕ бон цӕбӕл ӕй исахур ун Иосиф ӕма Марийӕй?

5. Лӕгтӕн сӕ бон куд ӕй Иосифи фӕнзун?

⁵ Иосиф Йегови разамундмӕ ке байгъосидӕ, уомӕ гӕсгӕ си хуарз сӕрихецау рауадӕй. Йеговӕ ин, куд бийнонти хестӕрӕн, уотӕ, разамунд раттидӕ, ӕма Иосиф разамундмӕ еци фӕдбӕл байгъосидӕ, кӕд ӕй уой туххӕй устур ӕййивддзийнӕдтӕ искӕнун багъӕуидӕ, уӕддӕр. Ӕма Библий финст ес ӕртӕ уӕхӕн уавӕрей туххӕй (Матф. 1:20, 24; 2:13–15, 19–21). Иосиф Хуцауи амундтӕмӕ ке игъуста, уой фӕрци ӕ бон адтӕй Марийи гъӕуай кӕнун ӕма ибӕл тухсун. Уомӕ гӕсгӕ ’й Марийӕ, ӕвӕдзи, никки фулдӕр уарзта ӕма нимадта. Лӕгти бон ба куд ӕй Иосифи фӕнзун? Библий агоретӕ, уӕ бийнонтӕбӕл батухсунмӕ уин ка банхус кӕндзӕй, уӕхӕн унаффитӕ d. Еци унаффитӕмӕ гӕсгӕ архайӕ, кӕд дӕ устур ӕййивддзийнӕдтӕ искӕнун гъӕудзӕй, уӕд дӕр. Уотемӕй бавдесдзӕнӕ, дӕ бийнойнаги ке уарзис, ӕма кӕрӕдземӕ никки хӕстӕгдӕр исуодзиайтӕ. 20 анземӕй фулдӕр лӕгмӕцуд ка ӕй, еу уӕхӕн хуӕрӕ Вануатуйӕй зӕгъуй: «Мӕ сӕрихецау Йегови разамунд ку фӕййагоруй ӕма еци разамундӕй ку фӕппайда кӕнуй, уӕд ӕй никки фулдӕр нимайун райдайун. Раст унаффӕ ке рахаста, уобӕл нӕ фӕддузӕрдуг кӕнун ӕма нецӕбӕл фӕттухсун».

6. Уоститӕн сӕ бон куд ӕй Марийи фӕнзун?

⁶ Марийӕн дӕр Йеговӕ ӕ хуарз ӕмбал адтӕй. Е ’ууӕндундзийнадӕ Иосифи ӕууӕндундзийнадӕй кӕнгӕ н’ адтӕй. Е хуарз зудта Сугъдӕг Финстадӕ, удта рӕстӕг дӕр рахецӕн кӕнидӕ, цӕмӕй ибӕл сагъӕс кӕна (Лук. 2:19, 51) e. Дзубанди дӕр ибӕл нӕййес, ӕгас еци гъуддӕгти фӕрци Марийӕ хъӕбӕр  хуарз бийнойнаг иссӕй. Абони дӕр берӕ уоститӕ Марийи хузӕн архайунцӕ. Зӕгъӕн, нӕ хуӕрӕ Эмико загъта: «Киндзицуд ку нӕма адтӕн, уӕд ковгӕ дӕр мӕхуӕдӕг кодтон ӕма Библи дӕр мӕхуӕдӕг ӕртастон. Фал киндзи ку ’рцудтӕн, удта уавӕр раййивта. Ковун мӕ сӕри хецӕу райдӕдта, удта бони стих дӕр е февзаридӕ. Еу уӕхӕни ’й балӕдӕрдтӕн, мӕхуӕдӕг ке нецибал кӕнун, цӕмӕй Йеговӕмӕ хӕстӕгдӕр кӕнон. Е мӕхе хӕссуйнаг ке ӕй, е ми байронх ӕй. Ба ’й лӕдӕрдтӕн, мӕхе дӕр мӕ ке гъӕуй архайун, цӕмӕй Йеговӕмӕ хӕстӕгдӕр кӕнон. Уомӕ гӕсгӕ рӕстӕг хецӕн кӕнун райдӕдтон, цӕмӕй мӕ Хуцауи хӕццӕ рӕстӕг ӕрветон, ковон имӕ, ӕ Дзурд ин кӕсон ӕма ибӕл сагъӕс кӕнон» (Гал. 6:5). Уоститӕ, уӕхуӕдтӕ Йеговӕмӕ ку хӕстӕгдӕр кӕнайтӕ, уӕд уӕ уӕ лӕгтӕ никки фулдӕр уарздзӕнцӕ ӕма уин сӕ цӕсти никки фулдӕр кадӕ уодзӕй (Ӕмб. 31:30).

7. Йеговӕн еумӕ лӕггадӕ кӕнун куд гъӕуй, уомӕй Иосиф ӕма Марийӕ бийнонтӕн фӕнзуйнаг цӕмӕй ӕнцӕ?

⁷ Уомӕй уӕлдай ма Иосиф ӕма Марийӕ Йеговӕмӕ еумӕ хӕстӕг кодтонцӕ. Ӕгас бийнонтӕй Йеговӕн лӕггадӕ кӕнун цӕйбӕрцӕбӕл ӕхсидзгӕ ’й, уой лӕдӕрдтӕнцӕ (Лук. 2:22–24, 41; 4:16). Ӕвӕдзи, е ӕнцон н’ адтӕй, уӕлдайдӕр ба син сувӕллӕнттӕ ку фӕззиндтӕй, уӕд, фал исарӕхстӕнцӕ. Абони бийнонтӕн е хуарз цӕветтон ӕй. Кӕд уин сувӕллӕнттӕ ес, уӕд уин, ӕвӕдзи, ӕнцон нӕ фӕууй ӕмбурдтӕмӕ цӕун, удта алли къуӕре дӕр бийнонти ахур уадзун. Никки зиндӕр ба фӕууй рӕстӕг рахецӕн кӕнун, цӕмӕй дууемӕй Библи ӕртасайтӕ ӕма Йеговӕмӕ ковайтӕ. Фал уи уӕддӕр иронх ма уӕд: Йеговӕн лӕггадӕ кӕнунмӕ кӕрӕдземӕн ку ӕнхус кӕнайтӕ, уӕд Хуцаумӕ дӕр хӕстӕгдӕр кӕндзиайтӕ ӕма кӕрӕдземӕ дӕр. Уомӕ гӕсгӕ уин Йеговӕн лӕггадӕ кӕнун фиццаг бунати уӕд.

8. Бийнонти медӕг зиндзийнӕдтӕ ку уа, уӕд лӕг ӕма уосӕн цӕхуӕн унаффӕ банхус кӕндзӕй, цӕмӕй бийнонти ахур уадзонцӕ?

⁸ Фал кӕд уӕ астӕу цӕхуӕндӕр зиндзийнӕдтӕ ес, уӕдта? Уӕдта уӕ, ӕвӕдзи, неци уотӕ фӕффӕндуй еумӕ бийнонти ахур уадзун. Кӕд сумах хабар дӕр уотӕ ’й, уӕд бал минкъий естӕмӕй райдайетӕ. Цубуртӕй рартасетӕ, уӕ дууей зӕрдӕмӕ дӕр ка цӕуй, уӕхӕн ести. Е уин банхус кӕндзӕй, цӕмӕй кӕрӕдземӕ фӕххӕстӕгдӕр уайтӕ ӕма уӕ фӕндӕуа Йеговӕн еумӕ лӕггадӕ кӕнун.

9. Лӕгтӕн ӕма уоститӕн рӕстӕг еумӕ ӕрветун ӕхсидзгӕ цӕмӕн ӕй?

⁹ Лӕгтӕ ӕма уоститӕ, рӕстӕг еумӕ ку ӕрветайтӕ, уӕд уӕ уарзти арт некӕд ниххусдзӕй. Уой фӕрци дӕ цардӕмбали гъудитӕ ӕма ӕнкъарӕнтӕ никки хуӕздӕр лӕдӕрдзӕнӕ (Райд. 2:24). Руслан ӕма Лилийӕ сӕ цард ку байеу кодтонцӕ, уомӕй минкъий фӕстӕдӕр еу цидӕр балӕдӕрдтӕнцӕ. Е адтӕй еу 15 анзей размӕ. Лилийӕ зӕгъуй: «Цӕйбӕрцӕ нӕ фӕндадтӕй, уойбӕрцӕ рӕстӕг нин н’ адтӕй кӕрӕдзей хӕццӕ ӕрветунмӕ. Кусти фӕсте хӕдзари хабӕрттӕ кӕнун райдайианӕ, фӕстӕдӕр ба ма нин сувӕллӕнттӕ дӕр фӕззиндтӕй. Гъе уӕд ӕй балӕдӕрдтан нӕ дууӕ еумӕ рӕстӕг ку не ’рветӕн, уӕд кӕрӕдземӕй ке раидард уодзиан».

10. Лӕгӕн ӕма уосӕн сӕ бон куд ӕй Ефесӕгтӕмӕ 5:15, 16 финст унаффӕй испайда кӕнун?

¹⁰ Ци уин банхус кӕндзӕй, цӕмӕй кӕрӕдземӕн рӕстӕг хецӕн кӕнайтӕ? Рӕстӕг пълан кӕнтӕ. (Бакӕсӕ Ефесӕгтӕмӕ 5:15, 16.) Нигерийӕй еу ӕнсувӕр Узонду загъта: «Мӕ бийнойнаги хӕццӕ ци рӕстӕг ӕрветдзӕн, уой алкӕддӕр пълан фӕккӕнун. Ӕма мӕ графикки фӕууй фиццаг бунати» (Фил. 1:10). Молдовӕй еу районон цӕстӕдарӕги бийнойнаг Анастасийӕ ба зӕгъуй: «Цалинмӕ мӕ сӕрихецау ӕмбурдти хабӕртти фӕууй,  уӕдмӕ ӕз ба мӕхе гъуддӕгтӕ фӕккӕнун. Ку исуӕгъдӕ уй, удта нӕ бон фӕууй рӕстӕг еумӕ рарветун». Фал уӕ дууӕ дӕр хъӕбӕр ӕнӕвдӕлон ку уайтӕ ӕма уин уӕ кӕрӕдземӕн рӕстӕг иссерун зин ку уа, уӕдта?

11. Акилӕ ӕма Прискиллӕ еумӕ цӕхуӕн гъуддӕгти архайдтонцӕ?

¹¹ Лӕг ӕма уосӕн сӕ бон ӕй берӕ цӕбӕлдӕрти исахур ун Акилӕ ӕма Прискилли цӕветтонӕй. Еци лӕг ӕма уосӕ фиццаг ӕноси киристӕнттӕй беретӕн уарзон адтӕнцӕ (Ром. 16:3, 4). Кӕд сӕ царди туххӕй Библий уотӕ берӕ финст нӕййес, уӕддӕр ӕй зонӕн, алцидӕр еумӕ ке кодтонцӕ, косгӕ дӕр ӕма игъосун кӕнун дӕр, удта ма иннетӕн дӕр ӕнхус кодтонцӕ (Гъуд. 18:2, 3, 24–26). Уомӕй уӕлдай ма Библий Акилӕ ӕма Прискилли кой хецӕнтӕй некӕми цӕуй.

12. Лӕг ӕма уосӕ рӕстӕг еумӕ фулдӕр цӕй фӕрци ӕрветдзӕнцӕ? (Кӕсӕ ма хузӕмӕ.)

¹² Лӕгтӕ ӕма уостити бон куд ӕй Акилӕ ӕма Прискилли хузӕн архайун? Лӕг ӕма уоси берӕ гъуддӕгтӕ кӕнун фӕгъгъӕуй. Расагъӕс кӕнтӕ, еци гъуддӕгтӕй уӕ бон ци адтайдӕ, хецӕнтӕй нӕ, фал еумӕ кӕнун. Зӕгъӕн, Акилӕ ӕма Прискиллӕ еумӕ игъосун кӕнунмӕ цудӕнцӕ. Сумах ба алли къуӕре дӕр рӕстӕг рахецӕн кӕнтӕ, цӕмӕй еумӕ игъосун кӕнайтӕ? Уомӕй уӕлдай ма Акилӕ ӕма Прискиллӕ косгӕ дӕр еумӕ кодтонцӕ. Кӕд сумах еу рауӕн нӕ косетӕ, уӕддӕр уа бон н’ адтайдӕ хӕдзари куститӕ еумӕ кӕнун? (Еккл. 4:9). Еумӕ еститӕ ку косайтӕ, уӕд кӕрӕдземӕ хӕстӕгдӕр кӕндзиайтӕ, удта уин радзубанди кӕнунмӕ дӕр фулдӕр фадуӕттӕ уодзӕй. Роберт ӕма Линдӕ сӕ цард байеу кодтонцӕ еу 50 анзей размӕ. Роберт загъта: «Раст зӕгъгӕй, еумӕ уолӕфунмӕ нин рӕстӕг алкӕд нӕ фӕууй, фал тӕбӕгътӕ ку фехснун, Линдӕ ба сӕ ку фӕссӕрфуй кенӕ ба дзӕхӕрай ку фехсӕдун, е ба мӕ рази еститӕ ку фӕккосуй, уӕд мӕнӕй амондгун дӕр неке фӕууй. Еумӕ ести ку фӕккосӕн, уӕд нӕ е кӕрӕдзебӕл хъӕбӕр фӕббӕттуй, ӕма уой фӕрци кӕрӕдзей никки фулдӕр уарзун райдайӕн».

13. Лӕг ӕма уосӕ ӕцӕгӕйдӕр кӕрӕдзебӕл баст цӕй фӕрци уодзӕнцӕ?

¹³ Иронх уи ма уӕд, цӕмӕй лӕг ӕма уосӕ кӕрӕдзебӕл баст уонцӕ, уой туххӕй уотид кӕрӕдзей фарсмӕ ун фагӕ нӕй. Еу лӕгмӕцуд хуӕрӕ Бразилийӕй зӕгъуй: «Абони рӕстӕг ӕппундӕр нецӕмӕн фӕхъхъӕртуй. Кӕмӕдӕр, гӕнӕн ес, ӕма уотӕ кӕса, кӕд еу хӕдзари цӕрӕн, уӕд ӕнӕуой дӕр рӕстӕг еумӕ ’рветӕн. Фал ӕй балӕдӕрдтӕн, е фагӕ ке нӕй. Дзӕвгарӕ ӕхсидзгӕдӕр ӕй, цӕмӕй дӕ цардӕмбали хӕццӕ дзорай». Уӕ гъос ӕрдаретӕ, Бруно ӕма ӕ уосӕ Таисӕн е цӕй фӕрци ӕнтӕсуй. Бруно зӕгъуй: «Еумӕ ку фӕууӕн, уӕд нӕ телефонтӕ райеуварс кӕнӕн ӕма кӕрӕдзей хӕццӕ зӕрдиагӕй фӕдздзубандитӕ кӕнӕн».

14. Лӕг ӕма уоси зӕрдӕмӕ рӕстӕг еумӕ ӕрветун ку нӕ цӕуа, уӕд сӕ бон ци ӕй кӕнун?

¹⁴ Фал кӕрӕдзей хӕццӕ рӕстӕг ӕрветун  уӕ зӕрдӕмӕ ку нӕ цӕуа, уӕдта? Гӕнӕн ес, ӕма еуей зӕрдӕмӕ ци цӕуй, е инней зӕрдӕмӕ нӕ цӕуй кенӕ кӕрӕдземӕн нӕ бухсетӕ. Уӕхӕн уавӕри уӕ бон ци ӕй кӕнун? Уӕлдӕр ци цӕветтони кой кодтан, уой нӕ зӕрдӕбӕл ӕрлӕуун кӕнӕн. Арт еци фӕдбӕл не ’сцӕфсуй, фиццаг бал фӕгъгъӕуй минкъий къуӕцӕлтӕй исарт кӕнун, уой фӕсте ба согтӕ багӕлдзун. Гъе уотӕ сумах дӕр райдайетӕ минкъий ести гъуддӕгтӕй, цӕмӕй алли бон дӕр кӕрӕдзей хӕццӕ рӕстӕг ӕрветайтӕ. Хуарз уайдӕ рӕстӕг рарветунмӕ, уӕ дууей зӕрдӕмӕ дӕр ка цӕуй, уӕхӕн ести гъуддӕгтӕ ку равзариайтӕ, цӕбӕл рабуцӕу уодзиайтӕ, уӕхӕн ести нӕ, фал (Иак. 3:18). Уотемӕй сабургай уӕ уарзти арт нӕуӕгӕй иссодздзӕй.

15. Лӕг ӕма уосӕ кӕрӕдзей ку нимайонцӕ, уӕд син е куд банхус кӕндзӕй, цӕмӕй сӕ уарзти арт ма ниххусса?

¹⁵ Ӕнӕ тауӕггурӕй арт куд тагъд ниххуссуй, уотӕ бийнонти астӕу дӕр уарзондзийнадӕ тагъд ниххусдзӕй, лӕг ӕма уосӕ кӕрӕдзей ку нӕ нимайонцӕ, уӕд. Фал лӕг ӕма уосӕ ку архайонцӕ, цӕмӕй кӕрӕдзей нимайонцӕ, уӕд, зӕгъӕн ес, ӕма еци арт ниххуссун нӕ бауадздзӕнцӕ. Дӕ гъудий дарӕ, кӕд дӕумӕ уотӕ кӕсуй, ӕма дӕ цардӕмбали нимайис, уӕд е фагӕ нӕй, гъӕуама ’й е дӕр лӕдӕра. Арет ӕма Пенни сӕ цард байеу кодтонцӕ еу 25 анзей размӕ. Пенни зӕгъуй: «Кӕрӕдзей ке нимайӕн, уой фӕрци нӕ астӕу ес уарзондзийнадӕ ӕма нӕ хӕдзари алкӕддӕр фӕууй фарнӕ. Алке бон дӕр фӕууй ӕ гъудитӕ ӕргом дзорун, уомӕн ӕма ни алкедӕр инней гъудийӕн аргъ кӕнуй». Дӕу бон ба ци ӕй кӕнун, цӕмӕй ӕй дӕ цардӕмбал лӕдӕра, ӕцӕгӕйдӕр ӕй ке нимайис? Ӕркӕсӕн Авраам ӕма Сарри хабармӕ.

16. Лӕгтӕн сӕ бон куд ӕй Авраами фӕнзун? (1 Петури 3:7). (Кӕсӕ ма хузӕмӕ.)

¹⁶ Авраам ӕ бийнойнаг Сарри берӕ уарзта ӕма ин ӕ гъудитӕ ӕма е ’нкъарӕнтӕ нимадта. Еухатт Саррӕ гъе уотӕ тухст адтӕй, ӕма ӕ маст Авраамбӕл фӕккодта. Уотӕ имӕ кастӕй, ӕма ци мӕститӕ ӕвзаруй, етӕ Авраами фудӕй ӕнцӕ. Авраам уомӕ ци цӕстӕй ракастӕй? Цума имӕ рамӕстгун ӕй ӕма ин алли фудтӕ никкалдта? Нӕъ. Е ӕй зудта, Саррӕ коммӕгӕс ӕма сӕрниллӕг бийнойнаг ке ӕй. Авраам имӕ байгъуста ӕма байархайдта, цӕмӕй еци гъуддаг ниллух кодтайдӕ (Райд. 16:5, 6). Лӕгтӕ, уомӕй цӕбӕл ахур кӕнтӕ? Сумахӕн барӕ ес, цӕмӕй уӕ бийнонти туххӕй унаффитӕ хӕссайтӕ (1 Кор. 11:3). Фал дӕ бийнойнаги гъуди дӕр ку нимайай, уӕд ӕй бавдесдзӕнӕ, ке ’й уарзис, уой. Е уӕлдай ӕхсидзгӕ фӕууй, ци унаффӕ рахӕссис, е уобӕл дӕр ку рабӕрӕг уй, уӕд (1 Кор. 13:4, 5). Гӕнӕн ес, ӕма еуӕй-еухатт дӕ бийнойнаг цӕбӕлдӕр тухса, ӕма имӕ уӕд байгъосун фӕгъгъӕуй. Лӕмбунӕг имӕ ку байгъосай, уӕд ӕй бавдесдзӕнӕ, е ’нкъарӕнтӕ ин ке нимайис. (Бакӕсӕ 1 Петури 3:7.) Aнжелӕ ӕма Дмитрий сӕ цард байеу кодтонцӕ еу 30 анзей  размӕ. Анжелӕ радзурдта, ӕ лӕг ӕй ке нимайуй, уобӕл цӕмӕннӕ гурусхӕ кӕнуй, уой: «Димӕ мӕмӕ алкӕддӕр цӕттӕ фӕууй байгъосунмӕ, тухст ку фӕуун, уӕд дӕр ӕма мӕ ӕнӕуой радзорун ку фӕгъгъӕуй, уӕд дӕр. Мӕ хӕццӕ фӕразон фӕууй, ӕгӕр карз дзурд ку фӕккӕнун, уӕд дӕр».

17. Уоститӕн сӕ бон куд ӕй Сарри фӕнзун? (1 Петури 3:5, 6).

¹⁷ Саррӕ Авраами ке нимадта, уомӕ гӕсгӕ, ци унаффитӕ рахӕссидӕ, уонӕбӕл исарази уидӕ (Райд. 12:5). Еухатт сӕмӕ ӕнӕнгъӕлти иуазгутӕ ӕрбацудӕй. Уӕд Авраам Саррӕн загъта, цӕмӕй ӕ гъуддӕгтӕ ниууадза ӕма дзӕбӕх берӕ дзол искӕна (Райд. 18:6). Ӕма имӕ Саррӕ дӕр еци фӕдбӕл байгъуста. Уоститӕ, сумахӕн дӕр уӕ бон ӕй Сарри фӕнзун ӕма, уӕ лӕгтӕ ци унаффитӕ рахӕссунцӕ, уонӕбӕл арази кӕнун. Уотемӕй уӕ бийнонти цард федардӕр кӕндзиайтӕ. (Бакӕсӕ 1 Петури 3:5, 6.) Раздӕр ке кой кодтан, еци ӕнсувӕр Дмитрий радзурдта, ӕ бийнойнаг ӕй ке нимайуй, уобӕл цӕмӕннӕ гурусхӕ кӕнуй, уой: «Кӕд алкӕд еу хузи нӕ фӕгъгъуди кӕнӕн, уӕддӕр Анжелӕ фӕййархайуй, цӕмӕй, ци унаффитӕ рахӕссун, уонӕмӕ гӕсгӕ архайа. Ӕма уомӕн хъӕбӕр аргъ кӕнун. Кӕд, ци унаффитӕ рахӕссун, уони алкӕд еугур хуарз исхонӕн нӕ фӕууй, уӕддӕр мин сӕ мӕ цӕстӕмӕ некӕд бадаруй». Ӕцӕгӕйдӕр, ка дӕ нимайуй, уой уарзун хъӕбӕр ӕнцон фӕууй!

18. Лӕг ӕма уосӕн ӕхсидзгӕ цӕмӕн ӕй архайун, цӕмӕй сӕ астӕу ци уарзондзийнади арт цӕфсуй, е ма ниххусса?

¹⁸ Сайтани фӕндуй, цӕмӕй бийнонти астӕу ци уарзондзийнади арт цӕфсуй, уой ниххуссун кӕна. Е ӕй зонуй, лӕг ӕма уосӕ кӕрӕдзей ку нӕбал уарзонцӕ, уӕд Йеговӕй идард кӕнун ке райдайдзӕнцӕ. Фал ӕцӕг уарзт неке бон ӕй ниххуссун кӕнун! Уомӕ гӕсгӕ, уӕ астӕу ци уарзондзийнадӕ ес, е уӕд, Соломони зари ци уарзондзийнади туххӕй дзурд цӕуй, уой хузӕн. Уе ’гас хъауритӕй архайетӕ, цӕмӕй уин Йеговӕ фиццаг бунати уа. Кӕрӕдземӕн фагӕ рӕстӕг хецӕн кӕнтӕ, удта уӕ кӕрӕдзей гъудитӕ ӕма ӕнкъарӕнтӕ нимайетӕ. Уотӕ ку кӕнайтӕ, уӕд уӕ бийнонти цардӕй кадгин кӕндзиайтӕ, ӕцӕг уарзт кӕмӕй цӕуй, уой – Йеговӕ Хуцауи. Ӕма уӕ уарзондзийнади арт некӕд ниххусдзӕй!