1, 2. Вавилони ци дзиуиттӕгтӕ цардӕй, уони цӕхуӕн ӕхсидзгӕ унаффӕ рахӕссун гъудӕй? (Ездрӕ 1:2–4).

 ПАДДЗАХ бардзурд равардта! 70 анзей дӕргъи цагъартӕй Вавилони ци дзиуиттӕгтӕ цардӕнцӕ, уонӕн Йерусалиммӕ раздӕхуни барӕ фӕцӕй. (Бакӕсӕ Ездрӕ 1:2–4.) Уомӕн гӕнӕн иссӕй ӕрмӕстдӕр Йегови фӕрци. Цӕмӕн ес уотӕ зӕгъӕн? Уомӕн ӕма вавилойнӕгтӕ сӕ цагъарти некӕд уӕгъдӕ кодтонцӕ (Ис. 14:4, 17). Фал Вавилон ӕндӕр паддзах байахӕста, ӕма е дзиуиттӕгтӕн сӕ фидибӕстӕмӕ раздӕхуни барӕ равардта. Гъема алкедӕр, уӕлдайдӕр ба бийнонти хестӕрти, гъудӕй ӕхсидзгӕ унаффӕ рахӕссун: Вавилони байзайдзӕнцӕ ӕви Йерусалиммӕ рандӕ уодзӕнцӕ? Фал еци фарста ниллух кӕнун уотӕ ӕнцон н’ адтӕй. Цӕмӕннӕ?

² Беретӕн сӕ бон н’ адтӕй, уӕхӕн идард ӕма тӕссаг балций рандӕ ун сӕ карӕмӕ гӕсгӕ. Удта ма дзиуиттӕгтӕн сӕ фулдӕр Вавилони райгурдӕнцӕ, ӕма еци бӕстӕй ӕндӕр неци фӕууидтонцӕ. Уонӕн Израил уотид сӕ рагфиддӕлти зӕнхӕ адтӕй. Уомӕй уӕлдай ма беретӕ Вавилони хъӕбӕр исгъӕздуг ӕнцӕ. Уомӕ гӕсгӕ син, ӕвӕдзи, зин адтӕй сӕ хуарз хӕдзӕрттӕ ӕма, дзӕбӕх ка цудӕй, еци куст ниууадзун ӕма ӕнӕзонгӕ бунатмӕ рандӕ ун.

3. Израилмӕ ка раздахтӕй, еци дзиуиттӕгтӕмӕ цӕхуӕн арфӕдзийнадӕ ӕнгъӕлмӕ кастӕй?

³ Хуцаубӕл еузӕрдон ка адтӕй, еци дзиуиттӕгтӕ ’й лӕдӕрдтӕнцӕ, Израилмӕ раздӕхун цийфӕнди зин ма уа, уӕддӕр арфӕдзийнӕдтӕ зиндзийнӕдтӕй дзӕвгарӕ фулдӕр ке уодзӕнцӕ. Тӕккӕ устурдӕр арфӕдзийнадӕ ба е адтӕй, ӕма сӕ бон адтайдӕ Йеговӕн, куд ӕмбӕлуй, уотӕ  лӕггадӕ кӕнун. Кӕд Вавилони 50 ковӕндонемӕй фулдӕр адтӕй, уӕддӕр си Йеговӕн ковӕндонӕ ба н’ адтӕй. Уомӕ гӕсгӕ, израилӕгти бон н’ адтӕй, Моисеййи закъон куд амудта, уотӕ Хуцауӕн нивӕндтӕ хӕссун. Удта син еци нивӕндтӕ хӕссунмӕ ка ӕнхус кодтайдӕ, уӕхӕн саугинтӕ дӕр н’ адтӕй. Уомӕй уӕлдай ма Хуцауи адӕн цардӕнцӕ, мӕнгӕ хуцӕуттӕн ка кувта ӕма Йегови уагӕвӕрдтӕ нимади дӕр кӕмӕ н’ адтӕнцӕ, уӕхӕн адӕни астӕу. Уомӕ гӕсгӕ, Хуцауӕй ка тарстӕй, мингай уӕхӕн дзиуиттӕгтӕ хъӕбӕр ӕнгъӕлмӕ кастӕнцӕ, сӕ райгурӕн бӕстӕмӕ кӕд раздӕхдзӕнцӕ ӕма раст дин сӕ къахбӕл кӕд ислӕуун кӕндзӕнцӕ, уомӕ.

4. Израилмӕ ка раздахтӕй, еци дзиуиттӕгтӕн Йеговӕ зӕрдӕ цӕмӕй байвардта?

⁴ Вавилонӕй Израилмӕ над ӕнцон н’ адтайдӕ ӕма, ӕвӕдзи, еу цуппар мӕйи рахастайдӕ. Фал Йеговӕ зӕрдӕ байвардта, еци над ке ислигъз кӕндзӕй. Пахампар Исай ниффинста: «Йеговӕн ӕ над ракӕдзос кӕнтӕ! Нӕ Хуцауӕн ӕдзӕрӕг будури над ралигъз кӕнтӕ. [...] Къуппитӕ зӕнхӕ ислигъз уӕд, къуппитӕ-къӕгъдтитӕ зӕнхӕ фестӕд лигъз будур» (Ис. 40:3, 4). Дӕ цӕститӕбӕл рауайун кӕнӕ: ӕдзӕрӕг будури хуӕнхти астӕу цӕуй уӕрӕх ӕма ӕррӕстӕ над. Уӕхӕн надбӕл цийфӕнди бӕлццонӕн дӕр ӕнцон цӕуӕн уодзӕй. Хуӕнхтӕ ӕма кӕмтти астӕу цӕунӕй, уӕхӕн надбӕл цӕун дзӕвгарӕ ӕнцондӕр ӕй.

5. Дзиуиттӕгтӕ рахӕсгӕ хузи Израилӕй Вавилонмӕ ци надбӕл гъӕуама цудайуонцӕ, е ци хундтӕй?

⁵ Нӕ рӕстӕги берӕ нӕдтӕн фӕууй нӕмттӕ. Исай рахӕсгӕ хузи ци нади кой ’скодта, уомӕн дӕр ес ном. Е ниффинста: «Уоми конд ӕрцӕудзӕй устур над ӕма ’й исхондзӕнцӕ Сугъдӕг над. Еци надбӕл, сугъдӕг ка нӕй, е нӕ рацӕудзӕй» (Ис. 35:8). Аци зӕрдӕвӕрд израилӕгтӕн цӕбӕл дзорӕг адтӕй ӕма абони махӕн цӕбӕл дзорӕг ӕй?

6. Над «сугъдӕг» цӕмӕн хундтӕй?

⁶ Еци надӕн ӕцӕгӕйдӕр ци дессаги ном ес – «Сугъдӕг над»! Фал цума уотӕ цӕмӕн хуннуй? Уомӕн ӕма, пахампаради уотӕ загъд адтӕй, ӕма израилӕгтӕй ка раздӕха, уони астӕу, сугъдӕг ка нӕй, уӕхӕн еу дӕр ке нӕ уодзӕй. Гъома сӕ астӕу нӕ уодзӕй еу уӕхӕн дзиуиттаг дӕр, ӕнӕгъдау цард ка кӕнуй, мӕнгӕ хуцӕуттӕн ка ковуй ӕма ӕндӕр уӕхӕн уӕззау тӕрегъӕдтӕ ка кӕнуй. Израилӕгтӕ гъӕуама иссайуонцӕ Хуцау Йегови цӕсти «сугъдӕг адӕн» (Дук. з. 7:6). Фал е уобӕл дзорӕг н’ адтӕй, ӕма Вавилонӕй ка рацудӕй, уони сӕхебӕл косун ӕппундӕр нӕ гъудӕй.

7. Кӕцидӕр дзиуиттӕгти цӕхуӕн ӕййивддзийнӕдтӕ искӕнун гъудӕй? Ӕрхӕссӕ цӕветтон.

⁷ Минкъий раздӕр ӕй куд загътан, уотемӕй дзиуиттӕгтӕй беретӕ Вавилони райгурдӕнцӕ ӕма си беретӕ, ӕвӕдзи, вавилойнӕгти ӕгъдӕуттӕ ӕнхӕст кӕнун райдӕдтонцӕ. Израилмӕ ку раздахтӕнцӕ, уобӕл дзӕвгарӕ рӕстӕг ку рацудӕй, уӕд Ездрӕ базудта, дзиуиттӕгтӕй кадӕртӕ, мӕнгӕ хуцӕуттӕн ка кувта, уӕхӕн силгоймӕгтӕ ке ракурдтонцӕ (Рац. 34:15, 16; Езд. 9:1, 2). Фӕстӕдӕр ба хецау Нееми хъӕбӕр бадес кодта, Израили ка райгурдӕй, еци сувӕллӕнттӕй еуӕй-еуетӕ дзиуиттагау ке нӕ дзурдтонцӕ (Дук. з. 6:6, 7; Неем. 13:23, 24). Цума еци сувӕллӕнттӕ Йегови куд гъӕуама бауарзтайуонцӕ ӕма ин куд гъӕуама лӕггадӕ кодтайуонцӕ, кӕд ӕма, Хуцауи Дзурд ци ӕвзагбӕл финст адтӕй, уой нӕ лӕдӕрдтӕнцӕ? (Езд. 10:3, 44). Уомӕ гӕсгӕ дзиуиттӕгти ӕхсидзгӕ  ӕййивддзийнӕдтӕ искӕнун багъудӕй. Фал син е Израили цӕргӕй ӕнцондӕр адтайдӕ, уомӕн ӕма, уоми раст дин минкъийгай ӕ къахбӕл лӕуун райдӕдта (Неем. 8:8, 9).

8. Цалдӕр сӕдӕ анзей размӕ ци хабӕрттӕ цудӕй, етӕ махмӕ куд хаунцӕ? (Кӕсӕ хузӕмӕ ӕндаг цъарӕбӕл.)

⁸ Ка ’й зонуй, кадӕр зӕгъдзӕй: «Е хуарз ӕй, фал еци рагон хабӕрттӕ мӕнмӕ куд хаунцӕ?» Хаунцӕ. Уомӕн ӕма, мах дӕр, зӕгъӕн ес, ӕма «Сугъдӕг надбӕл» цӕуӕн. Уӕлдай си нӕййес, исӕрст киристӕнттӕмӕ хауӕн ӕви ӕндӕр фустӕмӕ, алкедӕр ни гъӕуама архайа, цӕмӕй «Сугъдӕг надӕй» ма райеуварс уа (Иоан. 10:16). Уой фӕрци нӕ бон уодзӕй Йеговӕн лӕггадӕ кӕнун нур дӕр ӕма нӕуӕг дуйней дӕр – ӕ Паддзахадӕ зӕнхӕмӕ арфӕдзийнӕдтӕ ку ӕрхӕсса, уӕд b. 1919 анзӕй фӕстӕмӕ милиуангай нӕлгоймӕгтӕ, силгоймӕгтӕ ӕма сувӕллӕнттӕ рацудӕнцӕ Устур Вавилонӕй, ӕгас дуйней мӕнгӕ динтӕй, ӕма аци надбӕл ӕрлӕудтӕнцӕ. Ӕвӕдзи, ду дӕр сӕ астӕу дӕ. Кӕд сугъдӕг над еу 100 анзей размӕ райгон ӕй, уӕддӕр ӕй цӕттӕ кӕнун ба ӕностӕ раздӕр райдӕдтонцӕ.

9. «Сугъдӕг над» куд бацӕттӕ кӕндзӕнцӕ, уой туххӕй Исаййи 57:14 ци финст ес?

⁹ Йеговӕ батухстӕй, цӕмӕй Вавилонӕй ци дзиуиттӕгтӕ рацудӕнцӕ, уони надбӕл маци бахъор кодтайдӕ. (Бакӕсӕ Исаййи 57:14.) Абони ци «Сугъдӕг надбӕл» цӕуӕн, уомӕй ба ци ес зӕгъӕн? 1919 анзӕй цалдӕр ӕноси раздӕр Йеговӕ баразӕнгард кодта, Хуцауӕй ка тарстӕй, уӕхӕн нӕлгоймӕгти, цӕмӕй Устур Вавилонӕй над кӕдзос кӕнун райдӕдтайуонцӕ. (Рабарӕ Исаййи 40:3.) Етӕ над бацӕттӕ кодтонцӕ, цӕмӕй фӕстӕдӕр кӕдзосзӕрдӕ адӕн Устур Вавилонӕй рацӕуонцӕ ӕма Йеговӕн ӕ адӕни хӕццӕ лӕггадӕ кӕнонцӕ. Цума ’й кутемӕй бацӕттӕ кодтонцӕ? Гъӕйдӕ ибӕл радзубанди кӕнӕн.

10, 11. Киунугутӕ мухур кӕнун ӕма Библи тӕлмац кӕнун ке райдӕдтонцӕ, уой фӕрци Библий рӕстдзийнадӕ куд парахат кодта? (Кӕсӕ ма хузӕмӕ.)

¹⁰ Киунугутӕ мухур кӕнун райдӕдтонцӕ. 1450 анзи уӕнгӕ Библитӕ къохӕй финстонцӕ. Еци кустбӕл берӕ рӕстӕг ке рандӕ уидӕ, уомӕ гӕсгӕ Библитӕ берӕ н’ адтӕй, удта хъӕбӕр хъазар адтӕнцӕ. Фал фӕстӕдӕр ӕргъуди кодтонцӕ мухургӕнӕн станок. Уой фӕрци ӕнцондӕр иссӕй Библитӕ мухур кӕнун ӕма сӕ парахат кӕнун.

¹¹ Библи тӕлмац кӕнун райдӕдтонцӕ. Ӕности дӕргъи Библитӕн сӕ фулдӕр адтӕнцӕ латинаг ӕвзагбӕл. Еци ӕвзаг ба ӕрмӕстдӕр ахургонд адӕн лӕдӕрдтӕнцӕ. Фал киунугутӕ мухур кӕнун ку райдӕдтонцӕ, уӕд, Хуцауи ка уарзта, еци адӕн ин ӕ Дзурд хумӕтӕг адӕни ӕвзӕгтӕмӕ тӕлмац кӕнун райдӕдтонцӕ. Уотемӕй, Библи ка кастӕй, уони бон адтӕй рабарун, аргъауӕни сӕ цӕбӕл ахур кӕнунцӕ ӕма Библи ӕцӕгӕй цӕбӕл ахур кӕнуй, уой.

12, 13. Библи ка ӕртаста, етӕ 19 ӕноси аргъауӕни мӕнгӕ ахурӕдтӕ ӕргом кӕнун куд райдӕдтонцӕ, уомӕн цӕветтон ӕрхӕссӕ.

¹² Ӕрмӕг Библи ӕртасунмӕ. Библи лӕмбунӕг ка ӕртаста, етӕ Хуцауи Дзурдӕй берӕ цидӕртӕ базониуонцӕ. Ци базониуонцӕ, уой римӕхстӕй нӕ дардтонцӕ, кӕд е дини разамонгути зӕрдӕмӕ нӕ цудӕй, уӕддӕр. Зӕгъӕн, 19 ӕноси цалдӕр нӕлгоймаги, аргъауӕни мӕнгӕ ахурӕдтӕ ка ӕргом кодта, уӕхӕн брошюритӕ уадзун райдӕдтонцӕ.

¹³ 1835 анзмӕ хӕстӕг еу нӕлгоймаг Генри Гру рауагъта брошюрӕ, мӕрдтӕ ци уавӕри ’нцӕ, уой туххӕй. Уоми Финстадӕмӕ гӕсгӕ балӕдӕрун кодта, адӕймаг ӕнӕмӕлгӕ  уоди хӕццӕ ке нӕ райгуруй, фал ин ӕнӕмӕлгӕ цард Хуцау ке балӕвар кӕнуй. 1837 анзи ба саугин Джордж Сторрз поезди еци брошюритӕй еу иссирдта. Ку ’й бакастӕй, уӕд ӕй балӕдӕрдтӕй, е раст ке ӕй, ӕма ’й бафӕндадтӕй уой туххӕй иннетӕн дӕр радзорун. Уомӕ гӕсгӕ 1842 анзи цалдӕр лекций бакастӕй уӕхӕн темӕбӕл «Фарста: фудгӕнгутӕ ӕнӕмӕлгӕ цардӕй исхайгин унцӕ?». Джордж Сторрз ци ниффинста, е устур ӕнхус фӕцӕй ӕригон нӕлгоймаг Чарлз Расселӕн.

14. Ӕнсувӕр Рассел ӕма е ’мбӕлттӕ куд испайда кодтонцӕ, сӕ размӕ «Сугъдӕг над» бацӕттӕ кӕнунбӕл ка архайдта, уони куститӕй? (Кӕсӕ ма хузӕмӕ.)

¹⁴ Ӕнсувӕр Рассел ӕма е ’мбӕлттӕ куд испайда кодтонцӕ, сӕ размӕ «Сугъдӕг над» бацӕттӕ кӕнунбӕл ка архайдта, уони куститӕй? Финстадӕ ӕртасгӕй пайда кодтонцӕ дзурдуӕттӕй, симфонитӕй ӕма Библий аллихузи тӕлмацтӕй. Уомӕй уӕлдай ма син устур ӕнхус фӕцӕнцӕ, Генри Гру, Джордж Сторрз ӕма иннетӕ Библи ӕртасгӕй ци базудтонцӕ, етӕ дӕр. Ӕнсувӕр Рассел ӕма е ’мбӕлттӕ «Сугъдӕг над» бацӕттӕ кӕнунмӕ берӕ хъауритӕ ӕривардтонцӕ, уомӕн ӕма Библибӕл арӕзт киунугутӕ ӕма брошюритӕ берӕ уагътонцӕ.

15. 1919 анзи цӕхуӕн ӕхсидзгӕ хабӕрттӕ ӕрцудӕй?

¹⁵ 1919 анзи Хуцауи адӕн исуӕгъдӕ ’нцӕ Устур Вавилони уацарӕй. Еци анз ма фӕззиндтӕй «ӕууӕнкгун ӕма зундгин цагъар». Е раст ӕ афонӕбӕл адтӕй, уомӕн ӕма уотемӕй кӕдзосзӕрдӕ адӕнӕн сӕ бон иссӕй «Сугъдӕг надбӕл» ислӕуун (Матф. 24:45–47). Еци «цагъари», удта, раздӕр над бацӕттӕ кӕнунбӕл ка архайдта, уони фӕрци ци бантӕстӕй? «Сугъдӕг надбӕл» ка ислӕудтӕй, уони бон адтӕй фулдӕр базонун Йегови туххӕй (Ӕмб. 4:18). Уомӕй уӕлдай ма сӕ бон адтӕй сӕ цард ӕ уагӕвӕрдтӕмӕ гӕсгӕ аразун. Цума Йегови уотӕ фӕндадтӕй, цӕмӕй ӕ лӕггадгӕнгутӕ еци фӕдбӕл раййевонцӕ? Нӕъ. Е сӕ минкъийгай кӕдзос кодта. (Кӕсӕ рамкӕ « Йеговӕ ӕ адӕни сабургай кӕдзос кӕнуй».) Ӕцӕгӕйдӕр, куд  амондгун уодзиан, нӕ алли гъуддагӕй дӕр Хуцауи зӕрдӕ рохс кӕнун нӕ бон ку уа, уӕд (Кол. 1:10).

16. 1919 анзӕй фӕстӕмӕ «Сугъдӕг над» рӕвдзӕ кӕнунбӕл цӕхуӕн куститӕ цӕуй? (Исай 48:17; 60:17).

¹⁶ Ӕгас нӕдтӕ дӕр рӕстӕгӕй-рӕстӕгмӕ барӕвдзӕ кӕнун фӕгъгъӕуй. Гъе уотӕ, 1919 анзи «Сугъдӕг надбӕл» ци куститӕ райдӕдтонцӕ, етӕ нур дӕр ма цӕунцӕ. Цӕмӕн? Цӕмӕй фулдӕр адӕнӕн сӕ бон уа Устур Вавилонӕй рацӕун. Ӕууӕнкгун цагъар ӕ ихӕстӕмӕ ку равналдта, уомӕй минкъий фӕстӕдӕр, 1921 анзи, рауагъта киунугӕ «Арфа Божия». Еци киунугӕн ӕ нисан адтӕй адӕни Библий рӕстдзийнади хӕццӕ базонгӕ кӕнун. Ӕдеугурӕй рауагътонцӕ 6 милиуан киунуги 36 ӕвзагебӕл. Еци киунугӕ беретӕн банхус кодта рӕстдзийнадӕ базонунмӕ. Ӕрӕги ба нӕмӕ Библи ахур кӕнунмӕ нӕуӕг ӕрмӕг рацудӕй – «Амондгунӕй цӕрӕ ӕносмӕ!». Аци фӕстаг бӕнтти рӕстӕг Йеговӕ ӕ организаций фӕрци ӕнӕрлӕугӕй дӕттуй не ’ууӕндундзийнадӕ федар кӕнунмӕ хуӕруйнаг, цӕмӕй нӕ бон уа «Сугъдӕг надбӕл» идарддӕр дӕр цӕун. (Бакӕсӕ Исаййи 48:17; 60:17.)

17, 18. «Сугъдӕг над» кумӕ кӕнуй?

¹⁷ Зӕгъӕн ес, ӕма адӕймаг Библи ахур кӕнунбӕл ку исарази уй, уӕд ин фадуат фӕззиннуй еци «Сугъдӕг надбӕл» цӕунмӕ. Кадӕртӕ еци надбӕл ислӕуунцӕ, фал фӕстӕдӕр фӕййеуварс унцӕ. Иннетӕн ба сӕ федар фӕндӕ ӕй еци надбӕл цӕун, цалинмӕ кумӕ цӕунцӕ, уордӕмӕ нӕ бахъӕртонцӕ, уӕдмӕ. Цума еци над кумӕ кӕнуй?

¹⁸ Уӕларвон нифс кӕмӕн ес, уони «Сугъдӕг над» ӕркӕндзӕй Хуцауи дзенетмӕ уӕлӕрвти (Рарг. 2:7). Зӕнхӕбӕл цӕруни нифс кӕмӕн ес, уони ба еци над Киристей Минанзон хецаудзийнади кӕрон ӕркӕндзӕй ӕнхӕстдзийнадӕмӕ. Кӕд еци надбӕл цӕуис, уӕд фӕстӕмӕ фӕккӕсӕ-фӕккӕсӕ ма кӕнӕ ӕма еци надӕй ма райеуварс уо, цалинмӕ дӕ нисанмӕ, гъома нӕуӕг дуйнемӕ, нӕ бахъӕртай, уӕдмӕ. Мадта фӕндагираст кӕнӕ!