1. Исаййи ци фӕндадтӕй израилӕгтӕн балӕдӕрун кӕнун?

 ПАХАМПАР Исай Йегови исхудта «еузӕрдон Хуцау». Ами дзурд «еузӕрдон» ци дзурдӕй ратӕлмац кодтонцӕ, е ма нисан кӕнуй «ӕцӕгдзийнадӕ» кенӕ комкоммӕ «амменӕ». Амменӕ ба нисан кӕнуй «уотӕ уӕд» (Ис. 65:16). Дзурд «амменӕ» Библий ку фембӕлуй, уӕд арӕх фӕййамонуй, Йеговӕ кенӕ Киристе ӕнӕмӕнгӕй сӕ дзурд ке исӕнхӕст кӕндзӕнцӕ, уомӕ. Цума Исаййи уомӕй ци зӕгъун фӕндадтӕй? Уой фӕндадтӕй, цӕмӕй израилӕгтӕ ӕууӕндтайуонцӕ, Йеговӕбӕл алкӕддӕр сӕ бон ке ӕй сӕ зӕрдӕ дарун. Е ӕ зӕрдӕвӕрдтӕ аллихатт дӕр исӕнхӕст кӕнуй.

2. Нӕ бон цӕмӕн ӕй Йегови зӕрдӕвӕрдтӕбӕл ӕууӕндун ӕма цӕхуӕн фарстатӕмӕ ӕркӕсдзиан?

² Йегови зӕрдӕвӕрдтӕбӕл ӕууӕндун нӕ бон цӕмӕн ӕй? Исай аци дзурдтӕ ку ниффинста, уобӕл еу 800 анзи ку рацудӕй, уӕд апостол Павел балӕдӕрун кодта, нӕ бон цӕмӕн ӕй Хуцауи зӕрдӕвӕрдтӕбӕл федарӕй ӕууӕндун. Е загъта, Хуцауи бон фӕссайун ке нӕй (Дзиуит. 6:18). Уомӕн гӕнӕн куд нӕййес, цӕмӕй сауӕдонӕй ӕнӕуой дон дӕр цӕуа ӕма цӕхгун дон дӕр, гъе уотӕ уомӕн дӕр гӕнӕн нӕййес, цӕмӕй Йеговӕ, рӕстдзийнади Хуцау, сайгӕ кӕна. Е ба уобӕл дзорӕг ӕй, ӕма цидӕриддӕр фӕззӕгъуй, уобӕл ӕууӕндӕн ес. Аци статьяй ӕркӕсдзиан уӕхӕн фарстатӕмӕ: Йеговӕ нин цӕхуӕн  федӕнӕй зӕрдӕ ӕвӕруй? Е ’гас зӕрдӕвӕрдтӕ дӕр ке исӕнхӕст уодзӕнцӕ, уомӕн цӕхуӕн бӕлвурдгӕнӕнтӕ ес?

3. а) Ӕгас Йегови Ӕвдесӕнтӕ дӕр цӕхуӕн пахампарадӕ уарзунцӕ? (Раргомадӕ 21:3, 4). б) Еуӕй-еуетӕ еци зӕрдӕвӕрдмӕ ци цӕстӕй ракӕсунцӕ?

³ Мах радзордзиан, ӕгас Йегови Ӕвдесӕнтӕ дӕр берӕ ке уарзунцӕ, еци пахампарадӕбӕл. (Бакӕсӕ Раргомадӕ 21:3, 4.) Йеговӕ нин зӕрдӕ ӕвӕруй, ке ралӕудзӕй уӕхӕн рӕстӕг, «ӕма нӕбал уодзӕй нӕдӕр мӕлӕт, нӕдӕр маст, нӕдӕр гъарӕнгӕ, нӕдӕр рист». Аци дзурдтӕ игъосун кӕнгӕй адӕнӕн арӕх фӕккӕсӕн, цӕмӕй син бавдесӕн, нӕуӕг дуйней цард цӕхуӕн уодзӕй, уой. Арӕхдӕр адӕн аци дзурдтӕмӕ цӕхуӕн цӕстӕй ракӕсунцӕ? Беретӕ фӕззӕгъунцӕ: «Етӕ аргъӕуттӕй ӕндӕр неци ’нцӕ».

4. а) Йеговӕ рагацау ци зудта? б) Йеговӕ ма нин дессаги зӕрдӕвӕрдӕй уӕлдай никкидӕр ци равардта?

⁴ Ке зӕгъун ӕй гъӕуй, Йеговӕ ’й зудта Раргомади финст пахампарадӕ адӕнӕн игъосун кӕнгӕй арӕх ке кӕсдзиан. Уомӕй уӕлдай ма ’й зудта, беретӕн еци дзурдтӕбӕл зин баууӕндӕн ке уодзӕй. (Ис. 42:9; 60:2; 2 Кор. 4:3, 4). Мадта нӕ бон ци ӕй кӕнун, цӕмӕй Раргомади 21:3 ӕма 4 ци дзурдтӕ финст ес, уобӕл иннетӕ дӕр ӕууӕндун райдайонцӕ ӕма ибӕл нӕхуӕдтӕ дӕр федарӕй ӕууӕндӕн? Йеговӕ ма нин еци дессаги зӕрдӕвӕрдӕй уӕлдай федар бӕлвурдгӕнӕнтӕ дӕр равардта, цӕмӕй ибӕл нӕ бон уа ӕууӕндун. Цума етӕ цӕхуӕн бӕлвурдгӕнӕнтӕ ’нцӕ?

5. Йегови зӕрдӕвӕрдбӕл ӕууӕндӕн ке ес, уомӕн бӕлвурдгӕнӕнтӕ иссерун нӕ бон кӕми ӕй?

⁵ Йегови дзурдтӕбӕл ӕууӕндӕн ке ес, уомӕн бӕлвурдгӕнӕнтӕ финст ӕнцӕ Раргомади 21:5 ӕма 6. Еци стихти ци дзурдтӕ финст ес, уони загъта, зӕнхӕй дзенет ке рауайун кӕндзӕй, еци зӕрдӕвӕрди хуӕдфӕсте. Уоми финст ӕй: «Паддзахбадӕнбӕл ка бадтӕй, е загъта: „Цидӕриддӕр кӕнун,– алцидӕр ӕй нӕуӕг!“ Ӕма мин уотӕ: „Ниффинсӕ, уомӕн ӕма аци дзурдтӕ ӕнцӕ раст ӕма ӕцӕг“. Удта ма мин загъта: „Аци дзурдтӕ исӕнхӕст ӕнцӕ! Ӕз дӕн Альфӕ ӕма Омегӕ, райдайӕн ӕма кӕрон“».

6. Раргомади 21:5 ӕма 6 финст дзурдтӕ нин куд ӕнхус кӕнунцӕ, цӕмӕй Хуцауи зӕрдӕвӕрдбӕл федарӕй ӕууӕндӕн?

⁶ Аци стихти ци финст ес, уой фӕрци Йегови зӕрдӕвӕрдбӕл хъӕбӕрдӕр ӕууӕндӕн. Уой туххӕй киунуги «Апогей Откровения» уотӕ финст адтӕй: «Йеговӕ ӕ еузӕрдон лӕггадгӕнгутӕн арфӕдзийнӕдтӕй зӕрдӕ байвардта ӕма сӕ ниффинсун кодта. Ӕма аци стихти ци дзурдтӕ финст ес, уонӕй ба зӕгъӕн ес, ӕма еци финстити бунмӕ ӕ къох ӕрӕвардта» b. Раргомади 21:3 ӕма 4 стихти финст дзурдтӕ ӕнцӕ Йегови зӕрдӕвӕрд, иннӕ дууӕ стихи ба ӕнцӕ ӕ къохӕвӕрд. Уой фӕрци нӕ бон ӕй еци зӕрдӕвӕрдбӕл федарӕй ӕууӕндун. Гъӕйдӕ мадта лӕмбунӕгдӕр ӕркӕсӕн, 5 ӕма 6 стихти ци финст ес, уомӕ.

7. 5-аг стихи райдайӕн нин цӕбӕл дзорӕг ӕй?

⁷ 5 стих уӕхӕн дзурдтӕй райдайуй: «Паддзахбадӕнбӕл ка бадтӕй, е загъта» (Рарг. 21:5а). Йеговӕ арӕхдӕр ескӕмӕй испайда кӕнидӕ, цӕмӕй ӕ зӕгъуйнаг фегъосун кӕна. Фал Раргомади киунуги финст ес, Йеговӕ ӕртӕ хатти ӕхуӕдӕг ке дзурдта, ӕма аци хабар уонӕй сӕ еу ӕй. Еци зӕрдӕвӕрд Йеговӕ ӕхуӕдӕг фегъосун кодта – нӕдӕр изӕдӕй испайда кодта, нӕдӕр Киристейӕй. Ӕма уой фӕрци, идарддӕр ци дзурдтӕ финст ес, уонӕми фулдӕр хъаурӕ ес. Уотӕ зӕгъӕн цӕмӕн ес? Уомӕн ӕма е ӕй, «ӕ бон сайун кӕмӕн нӕй, еци Хуцауи» зӕрдӕвӕрд (Тит. 1:2). Мадта 5 стихи райдайӕни ци финст ес,  уой фӕрци нӕ бон ӕй федарӕй ӕууӕндун, Раргомади 21:5 ӕма 6 ци финст ес, уобӕл.

8. Йеговӕ куд балӕдӕрун кодта, ӕ зӕрдӕвӕрд ке исӕнхӕст кӕндзӕй? (Исай 46:10).

⁸ Нур ба ӕркӕсӕн, идарддӕр ци гъудиадӕ цӕуй, уомӕ: «Цидӕриддӕр кӕнун,– алцидӕр ӕй нӕуӕг!» (Рарг. 21:5). Грекъаг ӕвзагбӕл аци гъудиадӕ ци дзурдӕй райдайуй, уой ӕнгъезуй ратӕлмац кӕнун уӕхӕн дзурдтӕй: «кӕсӕ» кенӕ «игъосӕ». Еци дзурд Раргомади киунуги арӕх фембӕлуй. Библи ка лӕдӕрун кӕнуй, еу уӕхӕн киунуги финст адтӕй, еци дзурдӕн ӕ нисан ке ӕй, цӕмӕй ка кӕсуй, уой ӕргом идарддӕр финст дзурдтӕмӕ раздаха. Цума си идарддӕр ци финст ес? Де ’ргом раздахӕ, Йеговӕ уотӕ ке загъта: «Цидӕриддӕр кӕнун», зӕгъгӕ. Уотӕ нӕ загъта: «Цидӕриддӕр кӕндзӕн». Федӕни ци ӕййивддзийнӕдтӕ искӕндзӕй, уони туххӕй уотӕ дзоруй, цума сӕ нур райдӕдта кӕнун. Е ба уобӕл дзорӕг ӕй, ӕма ибӕл ӕппундӕр нӕ гурусхӕ кӕнуй, ӕ зӕрдӕвӕрд ӕнӕмӕнгӕй ке исӕнхӕст кӕндзӕй. (Бакӕсӕ Исаййи 46:10.)

9. а) Йеговӕ алцидӕр нӕуӕг куд искӕндзӕй? б) Нури «арв» ӕма нури «зӕнхӕбӕл» ци ӕрцӕудзӕй?

⁹ Еу хатт дӕр ма ӕркӕсӕн аци дзурдтӕмӕ: «Цидӕриддӕр кӕнун,– алцидӕр ӕй нӕуӕг!» Аци сӕри финст ӕй, Йеговӕ дууӕ гъуддаги ке искӕндзӕй. Фиццаг: фесафдзӕй зӕронд дуйне. Ӕма дуккаг: искӕндзӕй нӕуӕг дуйне. Раргомади 21:1 финст ӕй: «Раздӕри арв ӕма раздӕри зӕнхӕ ба нӕбал ӕнцӕ». «Раздӕри арв» амонуй, Сайтан ӕма ӕ сайтӕнтти дӕлбарӕ ка ӕй, еци зӕнхон хецауӕдтӕмӕ (Матф. 4:8, 9; 1 Иоан. 5:19). Дзурд «зӕнхӕ» ба Библий арӕх фӕййамонуй зӕнхӕбӕл цӕрӕг адӕнмӕ (Райд. 11:1; Пс. 96:1). Е ба уобӕл дзорӕг ӕй, ӕма «раздӕри зӕнхӕ» амонуй, нӕ рӕстӕги ци исӕфт адӕн цӕруй, уонӕмӕ. Йеговӕ нӕ архайдзӕй, цӕмӕй нури «арв» ӕма нури «зӕнхӕ» исраст кӕна. Е сӕ фесафдзӕй ӕма сӕ баййевдзӕй «нӕуӕг арв» ӕма «нӕуӕг зӕнхӕй», гъома нӕуӕг хецауадӕ ӕма нӕуӕг адӕнӕй.

10. Йеговӕ ци иснӕуӕг кӕндзӕй?

¹⁰ Фал Йеговӕ алци нӕ фесафдзӕй. Цидӕр иснӕуӕг кӕндзӕй (Рарг. 21:5). Зӕгъӕн, Йеговӕ иснӕуӕг кӕндзӕй зӕнхӕ ӕма адӕни, цӕмӕй нӕуӕгӕй исуонцӕ ӕнхӕст. Пахампар Исай загъта, зӕнхӕ дессаги дзенет ке фестдзӕй – ӕнӕгъӕнӕйдӕр Едеми дзӕхӕрадони хузӕн уодзӕй. Махӕй ба ’й алкедӕр лӕдӕрдзӕй, бонӕй-бонмӕ ӕнӕнездӕр ке кӕнуй ӕма ӕ хъауритӕбӕл хъауритӕ ке ӕфтуйуй. Къулухтӕ, хъӕрӕутӕ ӕма къуӕттитӕ сӕ незтӕ феронх кӕндзӕнцӕ. Сауӕнгӕ ма ка рамардӕй, етӕ дӕр райгас уодзӕнцӕ (Ис. 25:8; 35:1–7).

11. Йеговӕ Иоаннӕн ци бакӕнун кодта ӕма цӕмӕн?

¹¹ Йеговӕ ма ци загъта, цӕмӕй ин ӕ дзурдтӕбӕл федарӕй ӕууӕндӕн? Иоаннӕн загъта: «Ниффинсӕ, уомӕн ӕма аци дзурдтӕ ӕнцӕ раст ӕма ӕцӕг» (Рарг. 21:5). Хуцау ин уотид уотӕ нӕ загъта, «ниффинсӕ», зӕгъгӕ. Фал ма уотӕ бакӕнун цӕмӕн гъӕуй, уой дӕр ин балӕдӕрун кодта: «Уомӕн ӕма аци дзурдтӕ ӕнцӕ раст ӕма ӕцӕг». Ци хуарз ӕй, Иоанн, Хуцау ин куддӕриддӕр загъта, уотӕ ке бакодта. Уой фӕрци ’й зонӕн, Йеговӕ зӕнхӕй дзенет ке рауайун кӕндзӕй, уой, удта ма уой фӕрци нӕ бон ӕй сагъӕс кӕнун, ци дессаги федӕн нӕмӕ ӕнгъӕлмӕ кӕсуй, уобӕл.

12. Йеговӕ уотӕ цӕмӕн загъта: «Аци дзурдтӕ исӕнхӕст ӕнцӕ!»?

¹² Идарддӕр Хуцау загъта: «Аци дзурдтӕ исӕнхӕст ӕнцӕ!» (Рарг. 21:6). Федӕни ци дзенет уодзӕй, уой туххӕй Йеговӕ уотӕ зӕгъуй, цума ралӕудтӕй, уотӕ. Ӕма ӕ бон ӕй уотӕ дзорун, уомӕн ӕма ’й неке ӕма неци бахъор  кӕндзӕй, цӕмӕй ӕ фӕндон исӕнхӕст кӕна. Уой фӕсте ма Йеговӕ ӕрхаста еу ма бӕлвурдгӕнӕн дӕр, федарӕй ибӕл ӕууӕндӕн цӕмӕн ес, уомӕн.

13. Йеговӕ уотӕ цӕмӕн загъта: «Ӕз дӕн Альфӕ ӕма Омегӕ»?

¹³ Минкъий раздӕр ӕй куд загътан, уотемӕй, Иоанн ци цӕстӕбӕлуайӕн фӕууидта, уоми Йеговӕ ӕхуӕдӕг ӕртӕ хатти дзурдта (Рарг. 1:8; 21:5, 6; 22:13). Ӕма аллихатт дӕр Йеговӕ фӕззӕгъидӕ: «Ӕз дӕн Альфӕ ӕма Омегӕ». Альфӕ ӕй грекъаг алфавити фиццаг дамугъа, Омегӕ ба – фӕстаг. Ӕма Йеговӕ уотӕ ке зӕгъидӕ, «Альфӕ ӕма Омегӕ», уомӕй бавдесидӕ, цидӕриддӕр гъуддагмӕ равналуй, уой кӕронмӕ ке бакӕнуй.

14. а) Балӕдӕрун кӕнӕ, Йеговӕ рахӕсгӕ хузи кӕд загъта «Альфӕ» ӕма кӕд зӕгъдзӕй «Омегӕ»? б) Райдайӕни 2:1–3 цӕхуӕн бӕлвурдгӕнӕн ес?

¹⁴ Йеговӕ Адам ӕма Еви ку сфӕлдиста, уӕд син фегъосун кодта, адӕни ӕма имӕ зӕнхи туххӕй ци фӕндон ес, уой. Библий кӕсӕн: «Ӕма син Хуцау райарфӕ кодта ӕма син загъта: „Цӕуӕт уадзетӕ, исберӕ уотӕ ӕма зӕнхӕ байдзаг кӕнтӕ ӕма ин хецау уотӕ“» (Райд. 1:28). Еци рӕстӕг, зӕгъӕн ес, ӕма Йеговӕ загъта «Альфӕ». Е комкоммӕ балӕдӕрун кодта, ӕ фӕндон цӕй медӕг ӕй, уой: ӕнхӕст ӕма коммӕгӕс Адам ӕма Еви байзӕддӕгтӕ гъӕуама зӕнхӕ байдзаг кодтайуонцӕ ӕма си дзенет рауайун кодтайуонцӕ. Е ку исӕнхӕст уа, уӕд Йеговӕ, зӕгъӕн ес, ӕма зӕгъдзӕй «Омегӕ». Е ӕнӕмӕнгӕй уотӕ ке уодзӕй, уомӕн Хуцау бӕлвурдгӕнӕн равардта, арв ӕма зӕнхӕ ку сфӕлдиста, уой фӕсте. Уой туххӕй финст ӕй Райдайӕни 2:1–3 (ба сӕ кӕсӕ). Ӕртиккаг стихи куд загъд ӕй, уомӕ гӕсгӕ Йеговӕ ӕвдӕймаг бон иннӕ бӕнттӕй рахецӕн кодта. Ӕма ӕвдӕймаг бон ке рахецӕн кодта, е ӕй федар бӕлвурдгӕнӕн, еци бони кӕронмӕ ӕ фӕндон ӕнӕмӕнгӕй ке исӕнхӕст кӕндзӕй.

15. Сайтанмӕ уотӕ цӕмӕн фӕккастайдӕ, ӕма Йегови бахъор кодта ӕ фӕндон исӕнхӕст кӕнунмӕ?

 ¹⁵ Адам ӕма Евӕ Хуцауи нихмӕ ку рацудӕнцӕ, уӕд иссӕнцӕ тӕрегъӕдгун, ӕма сӕ байзӕддӕгтӕ дӕр тӕрегъӕд ӕма мӕлӕт сӕ тоги рахастонцӕ (Ром. 5:12). Цума е уобӕл дзорӕг адтӕй, ӕма Хуцауи фӕндон фехалдӕй ӕма нур зӕнхӕ ӕнхӕст ӕма коммӕгӕс адӕнӕй некӕдбал байдзаг уодзӕй? Цума Сайтани туххӕй Хуцауи бон «Омегӕ» зӕгъун нӕбал исуодзӕй? Сайтанмӕ, ӕвӕдзи, уотӕ кастӕй, ӕма Йегови къохтӕ исбаста, ӕма ин нур берӕ фадуӕттӕ нӕбал ес, цӕмӕй еци фарста ниллух кӕна. Еци фадуӕттӕй еу адтӕй Адам ӕма Еви фесафун ӕма сӕ бӕсти ӕндӕр ӕнхӕст адӕни искӕнун. Фал Йеговӕ уотӕ ку бакодтайдӕ, уӕд Сайтан загътайдӕ, ӕма Хуцау мӕнгӕттӕ дзорагӕ ’й. Цӕмӕн? Уомӕн ӕма Райдайӕни 1:28 финст дзурдтӕмӕ гӕсгӕ Йеговӕ Адам ӕма Евӕн загъта, уони байзӕддӕгтӕй ке байдзаг уодзӕй зӕнхӕ.

16. Сайтанмӕ уотӕ цӕмӕн кастӕй, ӕма ӕ бон уодзӕй Йегови фӕффудгин кӕнун, ӕ фӕндон исӕнхӕст кӕнун ке не ’сфӕразта, уой туххӕй?

¹⁶ Цума ма Сайтан никкидӕр куд сагъӕс кодтайдӕ? Ӕвӕдзи имӕ уотӕ кастӕй, ӕма Йеговӕ Адам ӕма Евӕн цӕуӕт рауадзуни барӕ ку ратта, уӕддӕр еци цӕуӕт ӕнхӕст некӕд исуодзӕнцӕ (Еккл. 7:20; Ром. 3:23). Ӕма гъе уӕд дӕр Йегови фӕффудгин кодтайдӕ, ӕ фӕндон кӕронмӕ исӕнхӕст кӕнун ке не ’сфӕразта. Цӕмӕн? Уомӕн ӕма уӕд зӕнхӕ нӕ байдзаг адтайдӕ ӕнхӕст ӕма Хуцауӕн коммӕгӕс адӕнӕй.

17. Йеговӕ Сайтани пълӕнттӕ куд фехалдта ӕма гъуддаг цӕбӕл ниллух уодзӕй? (Кӕсӕ ма хузӕмӕ.)

¹⁷ Йеговӕ Сайтани фӕндтӕ фехалдта (Пс. 92:5). Е Адам ӕма Евӕн барӕ равардта, цӕмӕй цӕуӕт уадзонцӕ. Уомӕ гӕсгӕ Сайтани бон не ’ссӕй Хуцауи фӕффудгин кӕнун, сайгӕ ке кӕнуй ӕма, ци райдӕдта, уой кӕронмӕ фӕуун ӕ бон ке нӕй. Йеговӕ байархайдта, цӕмӕй фӕззинна «байзӕддаг» ӕма цӕмӕй ӕ цард ратта Адам ӕма Еви коммӕгӕс байзӕддӕгти туххӕй (Райд. 3:15; 22:18). Йеговӕ уӕхӕн устур аргъ бафедунмӕ цӕттӕ ке ӕй, уой Сайтан ӕнгъӕл дӕр н’ адтӕй. Цӕмӕннӕ? Уомӕн ӕма Йеговӕ адӕни ӕнӕхийнӕ уарзтӕй уарзуй. Сайтан уой некӕд балӕдӕрдзӕй, уомӕн ӕма е ӕхецӕй ӕндӕр неке уарзуй (Матф. 20:28; Иоан. 3:16). Мадта нивонди аргъ фист ке ’рцудӕй, уой фӕрци ци бантӕсдзӕй? Киристей Минанзон хецаудзийнади кӕрон зӕнхӕбӕл цӕрдзӕнцӕ Адам ӕма Еви ӕнхӕст ӕма коммӕгӕс байзӕддӕгтӕ. Алцидӕр уодзӕй, Хуцау райдайӕни куддӕриддӕр исфӕндӕ кодта, уотӕ. Ӕма гъе  уӕд зӕгъӕн уодзӕй, ӕма Йеговӕ зӕгъдзӕй «Омегӕ».

18. Зӕнхӕй дзенет ке рауайдзӕй, уомӕн цӕхуӕн бӕлвурдгӕнӕнтӕ ес? (Кӕсӕ ма рамкӕмӕ « Йегови зӕрдӕвӕрдтӕбӕл ӕууӕндӕн цӕмӕн ес?».)

¹⁸ Аци статьяй ӕркастан, зӕнхӕ дзенет ке исуодзӕй, уомӕн цӕхуӕн бӕлвурдгӕнӕнтӕ ес, уомӕ. Фиццагидӕр Йеговӕ уомӕй зӕрдӕ ӕхуӕдӕг байвардта. Раргомади киунуги финст ӕй: «Паддзахбадӕнбӕл ка бадтӕй, е загъта: «Цидӕриддӕр кӕнун,– алцидӕр ӕй нӕуӕг!» Еци зӕрдӕвӕрд исӕнхӕст кӕнун Хуцауи фӕндгӕ дӕр кӕнуй, удта имӕ зунд дӕр ӕма хъаурӕ дӕр ес. Дуккаг: Йеговӕ федарӕй зонуй, ӕ зӕрдӕвӕрд ке исӕнхӕст уодзӕй ӕма имӕ уӕхӕн цӕстӕй кӕсуй, цума нурмӕти дӕр исӕнхӕст ӕй. Гъе уомӕ гӕсгӕ загъта: «Аци дзурдтӕ ӕнцӕ раст ӕма ӕцӕг» ӕма «Исӕнхӕст ӕнцӕ!» Ӕртиккаг: Йеговӕ цидӕриддӕр гъуддагмӕ равналуй, уой кӕронмӕ исӕнхӕст кӕнуй, уомӕн ӕма ӕхе хонуй «Альфӕ ӕма Омегӕ». Йеговӕ ’й бавдесдзӕй, Сайтан мӕнгӕттӕ ке фӕдздзурдта ӕма ӕ бон ке нӕй Хуцауи ӕ фӕндон исӕнхӕст кӕнунмӕ бахъор кӕнун.

19. Хуцау зӕнхӕй дзенет ке искӕндзӕй, уобӕл адӕймагӕн зин баууӕндӕн ку уа, уӕд дӕ бон ци адтайдӕ бакӕнун?

¹⁹ Дӕ зӕрдӕбӕл дарӕ, Хуцауи зӕрдӕвӕрдти туххӕй куд арӕхдӕр фӕдздзорис, уотӕ сӕбӕл дӕхуӕдӕг дӕр хъӕбӕрдӕр феууӕндис. Фал, зӕгъӕн, адӕймагӕн игъосун кӕнгӕй бакастӕ Раргомади 21:4, е ба дин уотӕ загъта: «Атӕ аргъӕуттӕй ӕндӕр неци ’нцӕ». Дӕ бон ин ци адтайдӕ зӕгъун? Дӕ бон ин ӕй бакӕсун ӕма балӕдӕрун кӕнун 5 ӕма 6 стихтӕ. Ба ин ӕвдесӕ, Йеговӕ зӕрдӕ цӕмӕй байвӕруй, уой бунмӕ ӕ къох ке ӕрӕвӕруй. Е ба уобӕл дзорӕг ӕй, ӕма ӕ зӕрдӕвӕрд ӕнӕмӕнгӕй исӕнхӕст кӕндзӕй (Ис. 65:16).