1, 2. а) Киристей цард ӕма мӕлӕти туххӕй ку фӕссагъӕс кӕнӕн, уӕд нӕмӕ цӕхуӕн ӕнкъарӕнтӕ фӕззиннуй? б) Аци статьяй цӕмӕ ӕркӕсдзиан?

 БЕРӔ ке уарзтан, уӕхӕн еске ку рамӕлуй, уӕд ибӕл хъӕбӕр ферхун кӕнӕн. Фиццӕгти ин ӕ царди фӕстаг бӕнттӕбӕл ку фӕссагъӕс кӕнӕн, уӕд нӕ зӕрдӕ хъӕбӕр фӕрресуй, уӕлдайдӕр ба кӕд ӕ мӕлӕти размӕ гъезӕмарӕ кодта, уӕд. Фал рӕстӕг ку рацӕуй, уӕд нӕ рист фӕссабурдӕр уй. Зӕгъӕн, хъӕбӕр ӕхцӕуӕн нин фӕууй ӕргъуди кӕнун, цӕбӕлдӕр нӕ куд ахур кодта, дзурдӕй ӕма нӕ гъуддагӕй куд федар кодта ӕма еумӕ куд дзӕбӕх фӕхходианӕ, уой.

² Киристей мӕлӕт ӕма гъезӕмӕртти туххӕй ку фӕккӕсӕн, уӕд дӕр нин гъе уотӕ зин фӕууй. Имисӕн изӕри рӕстӕг фӕййархайӕн, цӕмӕй Киристей нивондӕн цӕхуӕн устур аргъ ес, уобӕл никки фулдӕр сагъӕс кӕнӕн (1 Кор. 11:24, 25). Фал цийнӕ дӕр фӕккӕнӕн, Киристей зӕнхон царди туххӕй ку фӕккӕсӕн, уӕд. Мах туххӕй нур ци кӕнуй, удта ма федӕни дӕр ци искӕндзӕй, уой туххӕй ку фӕссагъӕс кӕнӕн, уӕд нин е дӕр нӕ нифс хъӕбӕр бафедар кӕнуй. Мадта нӕмӕ Киристе ци уарзондзийнадӕ бавдиста, е нӕ разӕнгард кӕнуй, цӕмӕй си боз ке ан, уой гъуддагӕй ӕвдесӕн. Уобӕл дзурд цӕудзӕй аци статьяй.

3. Нивонди туххӕй боз цӕмӕн гъӕуама уӕн?

³ Киристей цард ӕма мӕлӕти туххӕй ку фӕссагъӕс кӕнӕн, уӕд си хъӕбӕр боз фӕууӕн. Цалинмӕ зӕнхӕбӕл лӕггадӕ кодта, уӕдмӕ адӕнӕн дзурдта, Хуцауи Паддзахадӕ ци арфӕдзийнӕдтӕ ӕрхӕсдзӕй, уони туххӕй. Паддзахади туххӕй рӕстдзийнадӕ ке зонӕн, уомӕн хъӕбӕр аргъ кӕнӕн. Удта ма нивонди туххӕй дӕр хъӕбӕр боз ан, уомӕн ӕма нӕ бон ӕй Йегови ӕмбӕлттӕ дӕр ун ӕма Киристей ӕмбӕлттӕ дӕр.  Киристебӕл ка ӕууӕндуй, уонӕн фӕззиннуй нифс ӕносон цардӕй, удта берӕ ке уарзтонцӕ, етӕ ке райгас уодзӕнцӕ, уомӕй (Иоан. 5:28, 29; Ром. 6:23). Нӕхе хъауритӕй еци арфӕдзийнӕдти аккаг некӕд иссайанӕ. Удта Хуцау ӕма Киристе мах туххӕй ци искодтонцӕ, уой бафедун дӕр нӕ бон некӕд исуодзӕй (Ром. 5:8, 20, 21). Фал си боз ке ан, уой ба нӕ бон ӕй бавдесун. Кутемӕй?

4. Марийӕ Магдалинӕ куд бавдиста, Киристейӕй боз ке адтӕй, уой? (Кӕсӕ хузӕмӕ.)

⁴ Ӕркӕсӕн Марийӕ Магдалини хабармӕ. Еци силгоймаги гъезӕмарӕй мардтонцӕ сайтӕнттӕ – ӕнӕгъӕнӕ авд адтӕнцӕ. Марийӕн, ӕвӕдзи, ӕ сӕри къуми дӕр некӕд адтӕй, еске бон ин ке исуодзӕй банхус кӕнун. Мадта расагъӕс кӕнӕ Киристейӕй куд фӕббоз ӕй, сайтӕнттӕй ӕй ку исуӕгъдӕ кодта, уӕд! Е ӕй баразӕнгард кодта Киристей ахуркӕнуйнаг исунмӕ. Хъӕбӕр ӕй фӕндадтӕй Киристейӕн ӕ лӕггади ӕнхус кӕнун. Уомӕ гӕсгӕ ин нӕдӕр ӕ рӕстӕг, нӕдӕр ӕ хъауритӕ, нӕдӕр ӕ фӕрӕзтӕ не ’вгъау кодта (Лук. 8:1–3). Марийӕ хъӕбӕр аргъ кодта, Киристе уой туххӕй ци искодта, уомӕн, фал ибӕл, ӕвӕдзи, сагъӕс дӕр некӕд ракодтайдӕ, федӕни ин дзӕвгарӕ фулдӕр ке искӕндзӕй. Киристе гъӕуама ӕ цард равардтайдӕ, «цӕмӕй ибӕл ка ӕууӕндуй, е ма фесӕфа, фал ӕносон цардӕй хайгин уа» (Иоан. 3:16). Марийӕ боззӕрдӕ ке адтӕй, е ӕй разӕнгард кодта, цӕмӕй Киристебӕл еузӕрдон адтайдӕ. Киристе гъезӕмӕртти гъӕдӕбӕл ауигъд ку адтӕй, уӕд Марийӕ уой фарсмӕ дӕр ӕма иннети фарсмӕ дӕр ӕрбалӕудтӕй (Иоан. 19:25). Ку рамардӕй, удта Марийӕ ӕма ма дууӕ силгоймаги дзӕппазӕмӕ ӕрбацудӕнцӕ ӕма сӕ хӕццӕ хуӕрздӕф кӕрдӕгутӕ ӕрбахастонцӕ, цӕмӕй си Киристей мард байсарстайуонцӕ (Мар. 16:1, 2). Марийӕ ӕ еузӕрдондзийнади туххӕй арфӕгонд ӕрцудӕй: Киристе ку райгас ӕй, уӕд ӕй Марийӕ фӕууидта ӕма ӕ хӕццӕ дзоргӕ дӕр кодта, ӕ ахуркӕнуйнӕгтӕн сӕ фулдӕрмӕ ба уӕхӕн кадӕ не ’рхаудтӕй (Иоан. 20:11–18).

5. Нӕ бон куд ӕй бавдесун, Йеговӕй ӕма Киристейӕй боз ке ан?

⁵ Мах бон ба куд ӕй бавдесун, Йеговӕ ӕма  Киристейӕй боз ке ан? Е бӕрӕг уодзӕй, нӕ рӕстӕг, нӕ хъауритӕ ӕма нӕ фӕрӕзтӕ Хуцауи Паддзахади гъуддагӕн ку не ’вгъау кӕнӕн, уӕд. Зӕгъӕн, нӕ бон ӕй ӕнхус кӕнун, Йеговӕн кӕми фӕллӕггадӕ кӕнӕн, еци бӕстихӕйттӕ амайунмӕ ӕма сӕ рӕвдзӕ кӕнунмӕ.

6. Цӕмӕн ес уотӕ зӕгъӕн, ӕма Киристей нивонд махӕй алкӕмӕндӕр устур лӕвар ӕй?

⁶ Йеговӕ ӕма нӕ Киристе берӕ уарзунцӕ, ӕма сӕ мах дӕр куд нӕ уарзӕн (1 Иоан. 4:10, 19). Киристе алке туххӕй дӕр ке рамардӕй, уой ку балӕдӕрӕн, уӕдта сӕ никки фулдӕр уарзун райдайӕн. Апостол Павел уой хуарз лӕдӕрдтӕй. Галатӕгтӕмӕ финстӕги уотӕ ниффинста: «[Ӕз] цӕрун Хуцауи Фуртбӕл ӕууӕндгӕй, мӕн ка бауарзта ӕма мӕн туххӕй ӕ цард ка равардта, уобӕл ӕууӕндгӕй» (Гал. 2:20). Киристе нивонди аргъ ке бафиста, уой фӕрци нӕ Йеговӕ ӕхемӕ ӕрбакодта ӕма нин фӕззиндтӕй фадуат, цӕмӕй е ’мбӕлттӕ исуӕн (Иоан. 6:44). Ӕхцӕуӕн нин куд нӕй, Йеговӕ ни хуарзӕй цидӕр ке фӕууидта ӕма мах туххӕй уӕхӕн устур аргъ ке бафиста. Уой зонгӕй Йегови ӕма Киристей никки фулдӕр уарзун нӕ райдайӕн? Дӕхе бафӕрсӕ: «Уойбӕрцӕ мӕ ке уарзунцӕ, е мӕн ба цӕмӕ разӕнгард кӕнуй?»

7. Ӕркӕсӕ хузӕмӕ. Йегови ӕма Киристей ке уарзӕн, уой нӕ бон куд ӕй бавдесун? (2 Коринфӕгтӕмӕ 5:14, 15; 6:1, 2).

⁷ Хуцауи ӕма Киристей ке уарзӕн, е нӕ разӕнгард кӕнуй иннети уарзунмӕ. (Бакӕсӕ 2 Коринфӕгтӕмӕ 5:14, 15; 6:1, 2.) Фал ӕй адӕн куд базондзӕнцӕ, ке сӕ уарзӕн, уой? Зингзӕрдӕй син Хуцауи Паддзахади туххӕй хуарз хабар ку игъосун кӕнӕн, уӕд. Мах нӕ кӕсӕн, адӕймаг цӕхуӕн адӕнихаттӕй ӕй, гъӕздуг ӕй ӕви мӕгур ӕма ин адӕни астӕу цӕхуӕн ном ес, уомӕ. Хуарз хабар фӕдздзорӕн, кӕбӕл исӕмбӕлӕн, уонӕй алкӕмӕндӕр. Уотемӕй ӕнхӕст кӕнӕн Йегови фӕндон, уомӕн ӕма уой фӕндуй, «цӕмӕй аллихузи  адӕн, рӕстдзийнадӕ ци ӕй, уой базононцӕ ӕма фӕййервӕзонцӕ» (1 Тим. 2:4).

8. Хуӕртӕ ӕма ӕнсувӕрти ке уарзӕн, уой нӕ бон куд ӕй бавдесун?

⁸ Хуцауи ӕма Киристей ке уарзӕн, е ма нӕ разӕнгард кӕнуй хуӕртӕ ӕма ӕнсувӕрти уарзунмӕ дӕр (1 Иоан. 4:21). Мах сӕбӕл тухсӕн ӕма тухст уавӕри ку бахаунцӕ, уӕд сӕ фарсмӕ балӕууӕн. Сӕ хеуӕнттӕй еске ку рамӕлуй, уӕдта фӕййархайӕн, цӕмӕй син сӕ рист фӕмминкъийдӕр кӕнӕн. Ку фӕссӕйгӕ унцӕ, уӕд сӕ бабӕрӕг кӕнӕн, нифссаст ку фӕуунцӕ, уӕдта сӕ бафедар кӕнӕн (2 Кор. 1:3–7; 1 Фес. 5:11, 14). Мах хуӕртӕ ӕма ӕнсувӕрти туххӕй ӕдзох ковӕн, уомӕн ӕма ’й зонӕн: «Рӕстгӕнӕги зӕрдиаг кувдӕн устур хъаурӕ ес» (Иак. 5:16).

9. Хуӕртӕ ӕма ӕнсувӕрти ке уарзӕн, уой ма никкидӕр нӕ бон куд ӕй бавдесун?

⁹ Хуӕртӕ ӕма ӕнсувӕрти ке уарзӕн, е ма бӕрӕг уодзӕй, нӕ бон цидӕриддӕр ӕй, уой ку кӕнӕн, цӕмӕй сӕ хӕццӕ фӕрнӕй цӕрӕн. Мах дӕр фӕндуй Йегови хузӕн хатир кӕнун. Кӕд Йеговӕ ӕ Фурти нивонди равардта нӕ тӕрегъӕдти туххӕй, уӕд мах ба куд гъӕуама ма хатир кӕнӕн, хуӕртӕ ӕма ӕнсувӕртӕ нӕ нихмӕ ести ку искӕнунцӕ, уӕд? Мах нӕ фӕндуй, Киристе фӕсномуг хабари ци фудзӕрдӕ цагъари кой ракодта, уой хузӕн ун. Ӕ хецау ин хъӕбӕр устур ихӕс ку ниххатир кодта, уӕд уой ба нӕ бафӕндадтӕй, дзӕвгарӕ минкъийдӕр ихӕс си ка дардта, еци цагъарӕн ниххатир кӕнун (Матф. 18:23–35). Ӕмбурди еске хӕццӕ кӕрӕдзей ку нӕ балӕдӕрайтӕ, уӕд дӕ бон н’ адтайдӕ фиццаг къахдзӕф искӕнун ӕма ӕ хӕццӕ бафедаун, цалинмӕ Имисӕн изӕр нӕма ралӕудтӕй, уӕдмӕ? (Матф. 5:23, 24). Гъе уотемӕй бавдесдзӕнӕ, Йеговӕ ӕма Киристей ӕцӕгӕйдӕр ӕгас зӕрдӕй ке уарзис.

10, 11. Хестӕр нӕлгоймӕгти бон куд ӕй, Йегови ӕма Киристей ке уарзунцӕ, уой бавдесун? (1 Петури 5:1, 2).

¹⁰ Хестӕр нӕлгоймӕгти бон куд ӕй, Йегови ӕма Киристей ке уарзунцӕ, уой бавдесун? Е бӕрӕг уодзӕй, Киристей уӕриккитӕбӕл ке тухсунцӕ, уомӕй. (Бакӕсӕ 1 Петури 5:1, 2.) Йесо Петурӕн уой туххӕй комкоммӕ загъта. Минкъий раздӕр Петур Киристейӕй уотӕ ку загъта, нӕ ’й зонун, зӕгъгӕ, уӕд ӕй уой фӕсте, ӕвӕдзи, хъӕбӕр фӕндадтӕй бавдесун, ке ’й уарзуй, уой. Киристе ку райгас ӕй, уӕд Петури бафарста: «Иоанни фурт Симон, уарзис мӕ?» Петур, ӕвӕдзи, цийфӕнди искӕнунмӕ дӕр цӕттӕ адтӕй, цӕмӕй ӕй бавдистайдӕ, ке ’й уарзуй, уой. Киристе ин загъта: «Кӕсӕ мин мӕ уӕриккитӕмӕ» (Иоан. 21:15–17). Ӕма Петур цӕргӕ-цӕрӕнбонти ӕгас зӕрдӕй еци фӕдзӕхст ӕнхӕст кодта, ӕма уомӕй бавдиста, Киристей ке уарзуй.

¹¹ Хестӕр нӕлгоймӕгтӕ, Имисӕн изӕри рӕстӕг уӕ бон куд ӕй бавдесун, Киристе Петурӕн ци загъта, уомӕ уӕлӕнгай цӕстӕй ке нӕ кӕсетӕ? Йегови ӕма Киристей куд берӕ уарзетӕ, е бӕрӕг уодзӕй, хуӕртӕ ӕма ӕнсувӕртӕн сӕ нифс ку федар кӕнайтӕ ӕма ка ӕрлӕмӕгъ ӕй, уонӕн Йеговӕмӕ раздӕхун ку ӕнхус кӕнайтӕ, уӕд (Йез. 34:11, 12). Удта ма уӕ бон ӕй, Библи ка ахур кӕнуй ӕма Имисӕн изӕрмӕ фиццаг хатт ка ӕрбацудӕй, уонӕбӕл батухсун. Мах фӕндуй, цӕмӕй ӕй уинонцӕ, се ’рбацуд нин ӕхцӕуӕн ке ӕй. Удта ма нӕ нифс ес, етӕ дӕр Киристей фӕдбӕлдзӕугутӕ ке исуодзӕнцӕ.

12. Киристе ӕ мӕлӕти размӕ еци изӕр ци дзурдтӕ загъта, етӕ нин куд ӕнхус кӕнунцӕ, цӕмӕй нифсхаст уӕн? (Иоанни 16:32, 33).

¹² Ӕ мӕлӕти размӕ, еци изӕр Киристе ӕ ахуркӕнуйнӕгтӕн загъта: «Аци дуйней уӕмӕ ӕнгъӕлмӕ кӕсуй зиндзийнӕдтӕ, фал федар лӕууетӕ! Ӕз фӕууӕлахез дӕн аци дуйнебӕл». (Бакӕсӕ Иоанни 16:32, 33.) Киристейӕн ци банхус кодта, е знӕгти нихмӕ федар фӕллӕуун ӕма ма сауӕнгӕ ӕ мӕлӕти уӕнгӕ дӕр Хуцаубӕл еузӕрдонӕй байзайун? Е ӕ  зӕрдӕ дардта Йеговӕбӕл. Ӕ фӕдбӕлдзӕугутӕ дӕр уӕхӕн фӕлварӕнтӕбӕл ке исӕмбӕлдзӕнцӕ, уой зудта, ӕма ӕ Фидӕй курдта, цӕмӕй сӕ гъӕуай кодтайдӕ (Иоан. 17:11). Уой ке зонӕн, е нин нӕ нифс куд федар кӕнуй? Зонӕн ӕй, Йеговӕ не ’гас знӕгтӕй дӕр хъаурӕгиндӕр ке ӕй (1 Иоан. 4:4). Уомӕй римӕхст неци ӕй. Мах ибӕл федарӕй ӕууӕндӕн: нӕ зӕрдӕ ӕгасӕйдӕр Йеговӕбӕл ку дарӕн, уӕд нин банхус кӕндзӕй, цӕмӕй ма тӕрсӕн ӕма нифсхаст уӕн.

13. Аримофейаг Иосиф нифсхаст ке адтӕй, уой куд бавдиста?

¹³ Ӕркӕсӕн аримофейаг Иосифи хабармӕ. Дзиуиттӕгти астӕу ин кадгин ном адтӕй, уомӕн ӕма адтӕй Сӕйраг тӕрхондони, гъома Синедриони иуӕнг. Фиццӕгти Иосифи нифсхаст адӕймаг зинтӕй адтӕй исхонӕн. Иоанн куд загъта, уотемӕй Иосиф «Йесой ахуркӕнуйнаг адтӕй, фал ӕй нӕ гъӕр кодта, уомӕн ӕма дзиуиттӕгти разамонгутӕй тарстӕй» (Иоан. 19:38). Кӕд рӕстдзийнадӕ ӕ зӕрдӕмӕ райста, уӕддӕр, Киристебӕл ке ӕууӕндтӕй, уой ба нӕ гъӕр кодта. Ци кадгин бунат ахӕста, уой фесафунӕй тарстӕй. Фал кудфӕнди ма уа, уӕддӕр Библий финст ӕй, Киристе ку рамардӕй, уӕд «Иосиф ӕ нифс [ке] бахаста Пилатмӕ бацӕун ӕма си Йесой мард ракорун» (Мар. 15:42, 43). Иосиф Киристей фӕдбӕлдзӕуӕг ке иссӕй, уой нӕбал римахста.

14. Ци дӕ гъӕуй кӕнун, цӕмӕй адӕнӕй мабал тӕрсай?

¹⁴ Иосифи хузӕн ду дӕр ескӕд адӕнӕй тарстӕ? Зӕгъӕн, скъолай кенӕ кусти, Йегови Ӕвдесӕн ке дӕ, уой зӕгъунӕй нӕ тарстӕ? Кенӕ ба, ка ’й зонуй, ӕнаргъуд игъосунгӕнӕг исунмӕ кенӕ донаргъуд райсунмӕ дӕ нифс нӕ хӕссис, уомӕн ӕма тухсис, иннетӕ ди ци зӕгъдзӕнцӕ, уобӕл. Ма бауадзӕ, цӕмӕй дӕ уӕхӕн цидӕртӕ хъор кӕнонцӕ, раст ци ӕй, уой кӕнун. Йеговӕмӕ зӕрдибунӕй ковӕ. Корӕ си, цӕмӕй ин ӕ фӕндон нифсгунӕй ӕнхӕст кӕнай. Ӕма ’й ку уинай, Йеговӕ дин дӕ кувдтитӕбӕл дзуапп куд дӕттуй, уой, уӕд ди е хъауритӕ бауадздзӕй ӕма никки нифсхастдӕр уодзӕнӕ (Ис. 41:10, 13).

15. Киристе ӕ ахуркӕнуйнӕгтӕмӕ ку фӕззиндтӕй, уӕд сӕ маст цийнӕмӕ цӕмӕн раййивта? (Лукай 24:52, 53).

¹⁵ Киристе ку рамардӕй, уӕд ӕ ахуркӕнуйнӕгтӕ хъӕбӕр нифссаст адтӕнцӕ. Дӕхе уони бунати ниввӕрай. Сӕ уарзон ӕмбал рамардӕй, удта сӕмӕ уотӕ кастӕй, цума сӕ нифс нецӕмӕйбал ес (Лук. 24:17–21). Фал сӕмӕ Киристе ку фӕззиндтӕй, уӕд син балӕдӕрун кодта, Финстади ци пахампарӕдтӕ адтӕй, етӕ ибӕл куд исӕнхӕст ӕнцӕ. Удта ма син еу ӕхсидзгӕ гъуддаг баихӕс кодта (Лук. 24:26, 27, 45–48). Киристе уӕлӕрвтӕмӕ ку иссудӕй,  уӕдмӕти ахуркӕнуйнӕгтӕн сӕ маст устур цийнӕмӕ раййивта. Нур ӕй зудтонцӕ, сӕ Хецау ӕгас ке ӕй ӕма син ци баихӕс кодта, уой исӕнхӕст кӕнунмӕ ке банхус кӕндзӕй. Еци цийнӕ син банхус кодта, цӕмӕй Йегови ӕдзох кадгин кодтайуонцӕ. (Бакӕсӕ Лукай 24:52, 53; Гъуд. 5:42.)

16. Нӕ бон ку ӕй Киристей ахуркӕнуйнӕгти фӕнзун?

¹⁶ Нӕ бон куд ӕй Киристей ахуркӕнуйнӕгти фӕнзун? Нӕ бон ӕй Йеговӕн цийнӕгӕнгӕй лӕггадӕ кӕнун, айдагъ Имисӕн изӕри рӕстӕг нӕ, фал ӕгас анзи дӕргъи дӕр. Уой туххӕй ба гъӕуама Хуцауи Паддзахадӕ нӕ царди фиццаг бунати ӕвӕрӕн. Зӕгъӕн, беретӕ сӕ кустӕн уӕхӕн график искодтонцӕ, цӕмӕй сӕ бон уа фулдӕр игъосун кӕнун, ӕмбурдтӕмӕ цӕун ӕма бийнонти ахур уадзун. Еуӕй-еу игъосунгӕнгутӕ ба унаффӕ рахастонцӕ, цӕмӕй сӕмӕ ӕгӕр берӕ дзаумӕуттӕ ма уа, кӕд берети гъудимӕ гӕсгӕ еци дзаумӕуттӕ нӕ рӕстӕги ӕнӕмӕнгӕй гъӕунцӕ, уӕд дӕр. Уотӕ уомӕн бакӕнунцӕ, цӕмӕй сӕ бон уа фулдӕр лӕггадӕ кӕнун се ’мбурди кенӕ, игъосунгӕнгутӕ кӕми нӕ фагӕ кӕнуй, уоми. Ӕма ӕцӕгӕйдӕр, цӕмӕй Хуцауӕн лӕггадӕ кӕнӕн ӕма ин ӕ Паддзахадӕ нӕ царди фиццаг бунати ӕвӕрӕн, уой туххӕй фӕндфедарӕй гъӕуама архайӕн. Ӕма нин Йеговӕ зӕрдӕ ӕвӕруй, уотӕ ку архайӕн, уӕд нин рӕдауӕй ке райарфӕ кӕндзӕй (Ӕмб. 10:22; Матф. 6:32, 33).

17. Имисӕн изӕри рӕстӕг дӕ куд фӕндуй архайун? (Кӕсӕ хузӕмӕ.)

¹⁷ 4 апрели, геуӕргибони ӕрӕмбурд уодзиан, цӕмӕй Имисӕн изӕр исбӕрӕг кӕнӕн. Мах еци бонмӕ хъӕбӕр ӕнгъӕлмӕ кӕсӕн! Фал Киристей цард ӕма мӕлӕти туххӕй, удта нӕмӕ е дӕр ӕма Йеговӕ дӕр ци уарзондзийнадӕ бавдистонцӕ, уобӕл айдагъ еци бон сагъӕс кӕнун нӕ гъӕуй. Байархайӕ, цӕмӕй еци рӕстӕг Киристей царди хабӕрттӕбӕл никки фулдӕр сагъӕс кӕнай. Зӕгъӕн, 2023 анзи мартъий «Косӕн тъетрад»-и ес «Библи кӕсуни график Имисӕн изӕри рӕстӕг». Дӕ бон ӕй, еци графикки ци хабӕртти туххӕй финст ес, уони бакӕсун ӕма сӕбӕл расагъӕс кӕнун. Библий скъуддзӕгтӕ кӕсгӕй де ’ргом уӕлдай хъӕбӕрдӕр ӕздахӕ, дӕ менеугутӕ фӕххуӕздӕр кӕнунмӕ дин ка банхус кӕндзӕй, еци стихтӕмӕ. Зӕгъӕн, цӕмӕй никки боззӕрдӕдӕр уай, дӕ уарзондзийнадӕ фулдӕр кӕна, никки нифсхастдӕр уай ӕма дӕ цийнӕдзийнадӕ дӕр ма исӕфа. Удта расагъӕс кӕнӕ, ӕгас зӕрдӕй боз ке дӕ, уой дӕ бон куд ӕй гъуддагӕй ӕвдесун. Ӕма ибӕл ма гурусхӕ кӕнӕ, Киристе хъӕбӕр аргъ кӕнуй, Имисӕн изӕри рӕстӕг ин ӕ царди хабӕрттӕбӕл фулдӕр ке фӕссагъӕс кӕнис, уомӕн (Рарг. 2:19).