30 АХУРГӔНӔН СТАТЬЯ
36 ЗАР Нӕ зӕрдитӕ гъӕуай кӕнӕн
Израили хуарз ӕма лӕгъуз паддзӕхтӕй цӕбӕл ахур кӕнӕн?
«Ӕма бабӕй уӕд нӕуӕгӕй фӕууиндзиайтӕ, рӕстгӕнӕг ӕма фудгӕнӕг, Хуцауӕн ка лӕггадӕ кӕнуй ӕма ин ка нӕ лӕггадӕ кӕнуй, етӕ кӕрӕдземӕй цӕмӕй хецӕн кӕнунцӕ, уой» (МАЛ. 3:18).
ЦӔМӔ ӔРКӔСДЗИАН
Мах базондзиан, еуӕй-еу паддзӕхтӕ Йегови цӕсти хуарз цӕмӕн адтӕнцӕ, иннетӕ ба – лӕгъуз. Уой фӕрци хуӕздӕр лӕдӕрдзиан, Йеговӕ абони ӕ лӕггадгӕнгутӕй ци агоруй, уой.
1, 2. Еуӕй-еу паддзӕхти туххӕй Библийӕй ци ес базонӕн?
БИБЛИЙ финст ес еу 40 паддзахей туххӕй a. Еци паддзӕхтӕй еуӕй-еуетӕ ци фудгъуддӕгтӕ кодтонцӕ, уой туххӕй си ӕргомӕй финст ӕй. Сауӕнгӕ ма, хуарз паддзахбӕл нимад ка адтӕй, етӕ дӕр цӕхуӕндӕр тӕрегъӕдтӕ искӕниуонцӕ. Райсӕн паддзах Давиди. Йеговӕ си уотӕ загъта: «Мӕ лӕггадгӕнӕг Давид... мин мӕ фӕдзӕхститӕ ӕнхӕст кодта ӕма ӕгас зӕрдӕй мӕ коммӕ кастӕй ӕма кодта, мӕ цӕсти раст ци ӕй, ӕрмӕстдӕр уой» (1 Пад. 14:8). Фал уӕддӕр Давид устур тӕрегъӕд искодта: лӕгмӕцуд силгоймаги хӕццӕ ӕмуат ӕрцудӕй ӕма ин ӕ сӕрихецауи рамарун кодта (2 Сам. 11:4, 14, 15).
2 Иннердиги ба лӕгъуз паддзӕхтӕй дӕр кадӕртӕ еуӕй-еухатт раст гъуддӕгтӕ фӕккӕниуонцӕ. Зӕгъӕн, паддзах Ровоам. Йеговӕ си уотӕ загъта: «Ровоам кодта, лӕгъуз ци адтӕй, уой» (2 Анз. 12:14). Фал Израили 10 муггаги рахецӕн ун ку исфӕндӕ кодтонцӕ ӕма сӕхецӕн нӕуӕг паддзахи ку равзурстонцӕ, уӕд Ровоам Йеговӕмӕ байгъуста ӕма сӕ хӕццӕ тохунмӕ нӕ рандӕ ’й. Уомӕй уӕлдай ма Иуди горӕттӕ федар кодта, цӕмӕй си ка цардӕй, уонӕн тӕссаг мацӕмӕй адтайдӕ (1 Пад. 12:21–24; 2 Анз. 11:5–12).
3. Цӕхуӕн фарста ӕвзуруй ӕма аци статьяй цӕмӕ ӕркӕсдзиан?
3 Ӕвзуруй ӕхсидзгӕ фарста: кӕд Израили паддзӕхтӕ хуарз гъуддӕгтӕ дӕр ӕма лӕгъуз гъуддӕгтӕ дӕр кодтонцӕ, уӕд Йегови цӕсти еуӕй-еуетӕ хуарз цӕмӕн адтӕнцӕ, иннетӕ ба – лӕгъуз? Аци фарстабӕл дзуапп ку иссерӕн, уӕд нин е банхус кӕндзӕй балӕдӕрун, абони Йеговӕ махӕй ци агоруй, уой. Ӕркӕсӕн ӕртӕ гъуддагемӕ. Йеговӕ ку ниллух кӕнидӕ, паддзах хуарз ӕй ӕви лӕгъуз, уӕд, ӕвӕдзи, аци ӕртӕ гъуддагемӕ фӕккӕсидӕ: 1) сӕ зӕрдӕ цӕхуӕн уавӕри адтӕй, 2) ӕгас зӕрдӕй ӕрфӕсмон кӕниуонцӕ ӕви нӕ ӕма 3) Йеговӕн, куд ӕмбӕлуй, уотӕ лӕггадӕ кодтонцӕ ӕви нӕ.
ӔГАС ЗӔРДӔЙ АДТӔНЦӔ ЙЕГОВИ ХӔЦЦӔ
4. Хуарз ӕма лӕгъуз паддзӕхти туххӕй Библий ци финст ес?
4 Йеговӕн тӕккӕ ӕхсидзгӕдӕр адтӕй, еци паддзӕхтӕн сӕ зӕрдитӕ b цӕхуӕн уавӕри адтӕнцӕ, е. Хуарз паддзах Иосафати туххӕй финст ӕй: «Йегови ӕгас зӕрдӕй... агурдта» (2 Анз. 22:9). Иосий туххӕй ба кӕсӕн: «Ӕ разӕй дӕр ӕма ӕ фӕсте дӕр уой хузӕн паддзах н’ адтӕй... [Е] ӕгас зӕрдӕй... е ’ргом раздахта Йеговӕмӕ» (2 Пад. 23:25). Соломони туххӕй ба ци зонӕн? Е ӕ царди кӕрон лӕгъуз паддзах иссӕй. Библий финст ӕй: «Ӕ зӕрдӕ ӕ Хуцау Йегови хӕццӕ ӕнӕгъӕнӕйдӕр нӕбал адтӕй» (1 Пад. 11:4). Иннӕ лӕгъуз паддзах Авий туххӕй ба финст ӕй: «Ӕ зӕрдӕ ӕ Хуцау Йегови хӕццӕ ӕгасӕй н’ адтӕй» (1 Пад. 15:3).
5. Йеговӕн ӕгас зӕрдӕй лӕггадӕ кӕнун ци нисан кӕнуй, уой балӕдӕрун кӕнӕ.
5 Йеговӕн ӕгас зӕрдӕй лӕггадӕ кӕнун ци нисан кӕнуй? Е нисан кӕнуй, адӕймаг Хуцауӕн ке фӕллӕггадӕ кӕнуй, уарзгӕ ’й ке кӕнуй, уой туххӕй, е ӕ ихӕс ке ӕй, уой туххӕй нӕ, фал. Уӕхӕн адӕймаг Хуцауи фӕууарзуй, удта ибӕл еузӕрдон фӕууй цӕргӕ-цӕрӕнбонти.
6. Нӕ бон куд ӕй нӕ зӕрдӕ багъӕуай кӕнун? (Ӕмбесӕндтӕ 4:23; Матфеййи 5:29, 30).
6 Нӕ бон куд ӕй хуарз паддзӕхти хузӕн архайун ӕма Йегови ӕгас зӕрдӕй уарзун? Гъӕуама нӕхе еуварс дарӕн, лӕгъузӕрдӕмӕ нӕбӕл ка фӕббӕрӕг уодзӕй, ӕгас еци гъуддӕгтӕй. Зӕгъӕн, гъӕуама лӕмбунӕг уӕн, цӕхуӕн ерхӕфсӕнтӕ ӕма цӕхуӕн ӕмбӕлттӕ ӕвзарӕн, уомӕ. Удта ма ӕхсидзгӕ ’й, цӕмӕй нӕ сагъӕстӕ ӕхца ӕма дзаумӕуттӕбӕл ма исуонцӕ. Ку ’й балӕдӕрӕн, ӕма Йегови минкъийдӕр уарзун райдӕдтан, уӕд гъӕуама ӕвӕстиатӕй архайӕн – нӕ лимӕндзийнадӕ ке туххӕй фехӕлдзӕй, еци гъуддӕгтӕй нӕхе райеуварс кӕнӕн. (Бакӕсӕ Ӕмбесӕндтӕ 4:23; Матфеййи 5:29, 30.)
7. Йеговӕмӕ нӕ уарзондзийнадӕ ке туххӕй ӕруазал уодзӕй, ӕгас еци гъуддӕгтӕй нӕхе еуварс цӕмӕн гъӕуама дарӕн?
7 Нӕ зӕрдӕ гъӕуай кӕнун уотӕ ӕхсидзгӕ цӕмӕн ӕй? Кӕмӕдӕр уотӕ фӕккӕсдзӕй, ӕма Йегови гъуддӕгти фулдӕр ку архайа, уӕд ибӕл лӕгъузӕрдӕмӕ неци рабӕрӕг уодзӕй. Фал уомӕй ӕхе сайуй. Ӕрхӕссӕн цӕветтон. Дӕ цӕститӕбӕл рауайун кӕнӕ, цума уазал дунгӕмӕ ниссалдтӕ. Хӕдзарӕмӕ ӕрбацудтӕ ӕма пец бандзарстай. Фал цума уомӕй ести пайда уодзӕй, дуар игонӕй ку ниууадзай, уӕд? Ӕндегӕй медӕмӕ уазал дунгӕ кӕндзӕй. Аци цӕветтон нӕ бон ӕй рахӕссун, Йегови хӕццӕ нин ци лимӕндзийнадӕ ес, уомӕ. Цӕмӕй Йегови уарзтӕй нӕхе тавӕн, уой туххӕй ӕууӕндундзийнадӕ федаргӕнӕн хуӕруйнагӕй нӕхе ӕфсадун фагӕ нӕй. Гъӕуй ма «дуар нихгӕнун» дӕр, кенӕ ба нӕмӕ аци дуйней зундахаст уазал дунги хузӕн багъардзӕй ӕма нӕ зӕрди Йеговӕмӕ ци уарзти зинг содзуй, уой ниххуссун кӕндзӕй (Еф. 2:2).
СӔ ТӔРЕГЪӔДТӔБӔЛ ӔГАС ЗӔРДӔЙ ӔРФӔСМОН КӔНИУОНЦӔ
8, 9. Давид ӕма Езеки сӕхе куд бадардтонцӕ, ку ’й балӕдӕрдтӕнцӕ, Йегови рази устур тӕрегъӕдтӕ ке искодтонцӕ, уой? (Кӕсӕ хузӕмӕ.)
8 Куд ӕй загътан, уотемӕй паддзах Давид уӕззау тӕрегъӕд искодта. Фал ӕй пахампар Нафани фӕрци ку балӕдӕрдтӕй, Йегови зӕрдӕ куд хъӕбӕр фӕрресун кодта, уӕд сӕрниллӕгӕй ӕрфӕсмон кодта (2 Сам. 12:13). Е ӕцӕгӕйдӕр уотӕ ке адтӕй, е бӕрӕг ӕй 51 псаломӕй. Е цӕстӕмӕ миутӕ нӕ кодта, цӕмӕй Нафани басайдтайдӕ кенӕ цӕмӕй ӕфхуӕрд ма баййафтайдӕ (Пс. 51:3, 4, 17; раздзурд).
9 Паддзах Езеки дӕр Йегови нихмӕ тӕрегъӕд искодта. Библий финст ӕй: «Ӕ зӕрдӕ исхъал ӕй. Ӕма уой туххӕй Езекимӕ, удта Иудӕмӕ ӕма Йерусалиммӕ дӕр Хуцауи маст иссугъдӕй» (2 Анз. 32:25). Цума Езеки сӕрбӕрзонд цӕмӕн иссӕй? Ка ’й зонуй, ӕхемӕ ниццӕй, Йеговӕ ин гъӕздугдзийнӕдтӕ ке равардта, ассирийӕгтӕбӕл фӕууӕлахез унмӕ ин ке банхус кодта ӕма ’й мӕлӕтдзаг незӕй ке фӕййервӕзун кодта, уой туххӕй. Ӕвӕдзи, сӕрбӕрзонд ке иссӕй, уой туххӕй ӕ мулкӕй вавилойнӕгти рази ӕхе ’стаун райдӕдта. Гъе уомӕ гӕсгӕ ин пахампар Исай загъта, Йеговӕ си арази ке нӕбал ӕй (2 Пад. 20:12–18). Фал Езеки дӕр паддзах Давиди хузӕн сӕрниллӕгӕй ӕрфӕсмон кодта (2 Анз. 32:26). Мадта Езеки Йегови цӕсти цӕхуӕн паддзах адтӕй? Йеговӕ ’й банимадта еузӕрдон паддзахбӕл. Библий финст ӕй: «Езеки кодта, Йегови цӕсти раст ци адтӕй, уой» (2 Пад. 18:3).
Паддзах Давидӕн ӕма паддзах Езекийӕн сӕ тӕрегъӕдти туххӕй ку бауайдзӕф кодтонцӕ, уӕд сӕрниллӕгӕй ӕрфӕсмон кодтонцӕ (кӕсӕ 8 ӕма 9 абзацтӕ)
10. Паддзах Амаси пахампари дзурдтӕмӕ цӕхуӕн цӕстӕй ракастӕй?
10 Иуди паддзах Амаси дӕр кодта, Йегови цӕсти раст ци адтӕй, уой, фал Давид ӕма Езекийӕй уӕлдай «ӕгас зӕрдӕй нӕ» (2 Анз. 25:2). Цӕхуӕн рӕдуд искодта? Йеговӕ Амасийӕн ку банхус кодта едомӕгтӕбӕл фӕууӕлахез ун, уӕд син сӕ хуцӕуттӕн ковун райдӕдта c. Йеговӕ имӕ уой туххӕй ӕ пахампари барвиста, фал имӕ Амаси игъосгӕ дӕр нӕ бакодта ӕма ’й ратардта (2 Анз. 25:14–16).
11. 2 Коринфӕгтӕмӕ 7:9, 11 финст дзурдтӕмӕ гӕсгӕ ци кӕнун гъӕуй, цӕмӕй нин Йеговӕ хатир кӕна? (Кӕсӕ ма хузӕмӕ.)
11 Аци хабӕрттӕй цӕбӕл ахур кӕнӕн? Ести тӕрегъӕд ку искӕнӕн, уӕд ӕхсидзгӕ ’й, цӕмӕй ӕрфӕсмон кӕнӕн ӕма ӕгас хъауритӕй архайӕн, цӕмӕй еци рӕдуд мабал искӕнӕн. Зӕгъӕн, хестӕр нӕлгоймӕгтӕ дин цӕхуӕндӕр унаффӕ равардтонцӕ, фал дӕумӕ ба уотӕ кӕсуй, ӕма е дӕумӕ нӕ хауй. Уотӕ ма сагъӕс кӕнӕ, ӕма хестӕр нӕлгоймӕгтӕ дӕ нихмӕ ’нцӕ кенӕ дӕ Йеговӕ нӕ уарзуй. Йеговӕ Израили хуарз паддзӕхтӕн дӕр зунд карзӕй байамонидӕ (Дзиуит. 12:6). Нӕ рӕдудмӕ нин еске ку байамонуй, уӕд ӕхсидзгӕ фӕууй: 1) унаффӕ нин ка дӕттуй, уомӕ сӕрниллӕгӕй байгъосун, 2) ци гъӕуй, уой исраст кӕнун ӕма 3) идарддӕр Йеговӕн еузӕрдонӕй лӕггадӕ кӕнун. Нӕ тӕрегъӕдбӕл зӕрдӕй ку ӕрфӕсмон кӕнӕн, уӕд нин Йеговӕ ниххатир кӕндзӕй. (Бакӕсӕ 2 Коринфӕгтӕмӕ 7:9, 11.)
Нӕ рӕдудмӕ нин ку байамононцӕ, уӕд гъӕуама: 1) сӕрниллӕгӕй байгъосӕн, 2) ци гъӕуй, уой раййевӕн ӕма 3) идарддӕр дӕр Йеговӕн ӕгас зӕрдӕй лӕггадӕ кӕнӕн (кӕсӕ 11 абзац) f
ЙЕГОВӔН, КУД ӔМБӔЛУЙ, УОТӔ ЛӔГГАДӔ КОДТОНЦӔ
12. Хуарз паддзӕхтӕ лӕгъуз паддзӕхтӕй цӕмӕй хецӕн кодтонцӕ?
12 Йеговӕ еузӕрдонбӕл ке нимадта, еци паддзӕхтӕ раст дини фарс федар лӕудтӕнцӕ ӕма адӕни дӕр уобӕл ахур кодтонцӕ. Дзубанди дӕр ибӕл нӕййес, етӕ дӕр ӕнӕнхӕст адтӕнцӕ ӕма рӕдудӕнцӕ. Фал Йеговӕбӕл еузӕрдон адтӕнцӕ ӕма зингзӕрдӕй архайдтонцӕ, цӕмӕй бӕстӕ мӕнгӕ хуцӕуттӕй искӕдзос кодтайуонцӕ d.
13. Йегови цӕсти Ахав лӕгъуз паддзах цӕмӕн адтӕй?
13 Лӕгъуз паддзӕхтӕй ба ци ес зӕгъӕн? Цидӕриддӕр кодтонцӕ е лӕгъуз адтӕй? Нӕъ. Зӕгъӕн, лӕгъуз паддзах Ахав ку фегъуста, Навуфеййи уой туххӕй ке рамардтонцӕ, уӕд ӕрӕнкъард ӕй ӕма ӕхе ӕрниллӕг кодта (1 Пад. 21:27–29). Уомӕй уӕлдай ма Ахав горӕттӕ амадта ӕма израилӕгти знӕгти хӕццӕ ӕнтӕстгунӕй тухта (1 Пад. 20:21, 29; 22:39). Фал уӕддӕр Ахав сӕйрагидӕр кодта, Йегови цӕсти лӕгъуз ци адтӕй, уой. Ӕ уосӕмӕ игъосгӕй, Израили адӕни мӕнгӕ хуцӕуттӕн ковунбӕл бафтудта, ӕма уобӕл некӕд ӕрфӕсмон кодта (1 Пад. 21:25, 26).
14. а) Йеговӕ Ровоами лӕгъуз паддзахбӕл цӕмӕн нимадта? б) Лӕгъуз паддзӕхтӕмӕ еумӕйагӕй ци адтӕй?
14 Радзорӕн, Йеговӕбӕл еузӕрдон ка н’ адтӕй, уӕхӕн паддзах Ровоами туххӕй. 2 абзацци куд загъд адтӕй, уотемӕй ӕ хецаудзийнади рӕстӕг берӕ хуарз гъуддӕгтӕ искодта. Фал бартӕ ӕ къохи ку ’рфедар ӕнцӕ, уӕд Йегови закъон ниууагъта ӕма мӕнгӕ хуцӕуттӕн ковун райдӕдта (2 Анз. 12:1). Уӕдӕй фӕстӕмӕ кӕцидӕр рӕстӕг Йеговӕн фӕкковидӕ, кӕцидӕр рӕстӕг ба – мӕнгӕ хуцӕуттӕн (1 Пад. 14:21–24). Ровоам ӕма Ахави хузӕн Израили паддзӕхтӕн сӕ фулдӕр мӕнгӕ хуцӕуттӕн кувтонцӕ ӕма адӕни дӕр уобӕл бафтудтонцӕ. Мадта уӕд цӕмӕй кӕнгӕ адтӕй, паддзах Йегови цӕсти хуарз ӕй ӕви нӕ? Е кӕнгӕ адтӕй, Йеговӕн, куд ӕмбӕлуй, уотӕ лӕггадӕ кодта ӕви нӕ, уомӕй.
15. Йеговӕн ӕхсидзгӕ цӕмӕн ӕй, цӕмӕй ин адӕймаг, куд ӕмбӕлуй, уотӕ лӕггадӕ кӕна?
15 Йеговӕн тӕккӕ сӕйрагдӕр цӕмӕн адтӕй, цӕмӕй ин Израили паддзӕхтӕ еузӕрдонӕй лӕггадӕ кодтайуонцӕ? Фиццаг: паддзӕхтӕбӕл адтӕй ихӕс, цӕмӕй адӕнӕн фӕнзуйнаг адтайуонцӕ, Хуцауӕн куд лӕггадӕ кӕнун гъӕуй, уомӕй. Дуккаг: адӕймаг мӕнгӕ хуцӕуттӕн ковун ку райдаидӕ, уӕд ӕй е ӕнӕмӕнгӕй ӕндӕр уӕззау тӕрегъӕдтӕмӕ дӕр ӕркӕнидӕ, удта ма иннетӕбӕл дӕр хӕранӕй цӕун райдаидӕ (Оси 4:1, 2). Ӕртиккаг: ӕгас адӕн, уой хӕццӕ ба ма паддзӕхтӕ дӕр, Йеговӕн нивондгонд адтӕнцӕ. Уомӕ гӕсгӕ, адӕн мӕнгӕ хуцӕуттӕн ковун ку райдайиуонцӕ, уӕд Библий е барст цудӕй, лӕг кенӕ уосӕ ӕ цардӕмбалбӕл гадзирахаттӕй ку рацӕуидӕ, уой хӕццӕ (Йер. 3:8, 9). Адӕймагбӕл ӕ цардӕмбал гадзирахаттӕй ку рацӕуй, уӕд ин е устур зӕрди рист ӕрхӕссуй. Уотӕ Йеговӕн дӕр хъӕбӕр зин фӕууй, ӕ лӕггадгӕнӕг ӕй ку ниууадзуй, цӕмӕй ӕндӕр ескӕмӕн кенӕ естӕмӕн лӕггадӕ кӕна (Дук. з. 4:23, 24) e.
16. Йегови цӕсти фудгӕнӕг ӕма рӕстгӕнӕг цӕмӕй хецӕн кӕнунцӕ?
16 Нӕ бон ци ӕй нӕхецӕн зундӕн райсун? Гъӕуама нӕхе идард дарӕн мӕнгӕ дини хӕццӕ баст гъуддӕгтӕй. Фал ма уомӕй уӕлдай гъӕуама раст дини фарс ӕгас зӕрдӕй лӕууӕн. Пахампар Малахий дзурдтӕй бӕрӕг ӕй, Йегови цӕсти хуарз ӕма лӕгъуз адӕймаг цӕмӕй хецӕн кӕнунцӕ, е. Е ниффинста: «Ӕма бабӕй уӕд нӕуӕгӕй фӕууиндзиайтӕ, рӕстгӕнӕг ӕма фудгӕнӕг, Хуцауӕн ка лӕггадӕ кӕнуй ӕма ин ка нӕ лӕггадӕ кӕнуй, етӕ кӕрӕдземӕй цӕмӕй хецӕн кӕнунцӕ, уой» (Мал. 3:18). Уомӕ гӕсгӕ гъӕуама ма бауадзӕн, цӕмӕй нӕ ести кенӕ еске Хуцауӕн лӕггадӕ кӕнунмӕ хъор кӕна. Зӕгъӕн, еуӕй-еухатт нӕ рӕдудтитӕ ӕма нӕ гъӕндзийнӕдтӕй гъе уотӕ истухсӕн, ӕма нӕ нӕ къохтӕ ӕруадзунмӕ берӕ нӕбал фӕгъгъӕуй. Фал гъӕуама нӕ лӕггадӕ маци хузи ниууадзӕн, уомӕн ӕма уотӕ ку бакӕнӕн, уӕд е дӕр уодзӕй устур тӕрегъӕд.
17. Дӕхецӕн цардӕмбалӕн ке равзарай, е куд рабӕрӕг уодзӕй, Йегови хӕццӕ дин ци лимӕндзийнадӕ ес, уобӕл?
17 Кӕд дӕ бийнонтӕ искӕнун фӕндуй, уӕд дин Малахий дзурдтӕ банхус кӕндзӕнцӕ хуарз цардӕмбал иссерунмӕ. Зӕгъӕн, адӕймагмӕ цидӕр хуарз менеугутӕ ес. Фал цума Йеговӕ рӕстгӕнӕгбӕл банимайдзӕй, ка ин нӕ лӕггадӕ кӕнуй, уӕхӕн адӕймаги? (2 Кор. 6:14). Уӕхӕн адӕймаги хӕццӕ дӕ цард ку байеу кӕнай, уӕд дин цума Йеговӕмӕ хӕстӕгдӕр кӕнунмӕ ӕнхус кӕндзӕй? Расагъӕс кӕнӕ: Соломони уоститӕмӕ дӕр, ӕвӕдзи, цӕхуӕндӕр хуарз менеугутӕ адтӕй, фал Йеговӕн нӕ лӕггадӕ кодтонцӕ. Ӕма Соломони зӕрдӕ дӕр сабургай мӕнгӕ хуцӕутти ’рдӕмӕ раздахтонцӕ (1 Пад. 11:1, 4).
18. Ниййергутӕ сӕ сувӕллӕнтти цӕбӕл гъӕуама ахур кӕнонцӕ?
18 Ниййергутӕ, аци статьяй ци гъудитӕ адтӕй, уони фӕрци уӕ бон ӕй уӕ сувӕллӕнттӕн банхус кӕнун, цӕмӕй сӕ Йеговӕн лӕггадӕ кӕнун бафӕндӕуа. Ба син лӕдӕрун кӕнтӕ, кӕцидӕр паддзах хуарз цӕмӕн адтӕй, кӕцидӕр ба – лӕгъуз. Йеговӕн ӕхсидзгӕ адтӕй, цӕмӕй ин паддзӕхтӕ лӕггадӕ кодтайуонцӕ ӕма иннети дӕр уобӕл ахур кодтайуонцӕ. Уӕ сувӕллӕнттӕн лӕдӕрун кӕнтӕ, сӕ царди фиццаг бунати ке гъӕуама уа Йеговӕн лӕггадӕ кӕнун. Ӕма син еци гъуддаги уӕхуӕдтӕ фӕнзуйнаг уотӕ. Уӕ сувӕллӕнттӕ уинӕнтӕ, Библи ахур кӕнун, ӕмбурдтӕмӕ цӕун ӕма игъосун кӕнун уӕ царди фиццаг бунати ке ӕй (Матф. 6:33). Уӕ сувӕллӕнттӕ ’й гъӕуама балӕдӕронцӕ, сӕ ниййергутӕ Йегови Ӕвдесӕнтӕ ке ’нцӕ, е фагӕ ке нӕй. Гъӕуама Йеговӕмӕ сӕхуӕдтӕ дӕр хӕстӕг кӕнонцӕ. Уотӕ ку нӕ уа, уӕд син Йеговӕн лӕггадӕ кӕнун фиццаг бунати нӕбал уодзӕй, ӕма, ка ’й зонуй, рӕстдзийнадӕ дӕр ниууадздзӕнцӕ.
19. Йеговӕмӕ ӕрбахӕстӕг ун ке фӕндуй, уони ци кӕнун гъӕуй? (Кӕсӕ ма рамкӕ « Йеговӕмӕ ӕрбаздӕхӕ!».)
19 Кӕд кадӕр Йеговӕн нӕбал лӕггадӕ кӕнуй, уӕд цума е уобӕл дзорӕг ӕй, ӕма си нецибал рауайдзӕй? Нӕъ! Ӕ бон ӕй ӕрфӕсмон кӕнун ӕма Йеговӕмӕ ӕрбаздӕхун. Уой туххӕй ӕй, ка ’й зонуй, багъӕудзӕй ӕхе ӕрниллӕг кӕнун ӕма хестӕр нӕлгоймӕгтӕй ӕнхус ракорун (Иак. 5:14). Е ин ӕнцон нӕ уодзӕй. Фал цума Йеговӕ уой аккаг нӕй, цӕмӕй хъауритӕ ӕрӕвӕрӕн ӕма имӕ фӕстӕмӕ ӕрбахӕстӕг уӕн?
20. Хуарз паддзӕхти хузӕн ку архайӕн, уӕд нӕмӕ Йеговӕ цӕхуӕн цӕстӕй кӕсдзӕй?
20 Аци статьяйӕй ци базудтан? Гъӕуама еузӕрдон паддзӕхти хузӕн архайӕн. Уой туххӕй ба ӕхсидзгӕ ’й, цӕмӕй нӕ зӕрдӕ гъӕуай кӕнӕн ӕма Йеговӕбӕл еузӕрдон уӕн. Гъӕйдӕ мадта уӕн сӕрниллӕг, цӕмӕй нӕ рӕдудтитӕй ахур кӕнӕн, нӕ тӕрегъӕдтӕбӕл зӕрдӕй фӕсмон кӕнӕн ӕма нин ци унаффитӕ дӕттунцӕ, уонӕмӕ игъосӕн. Удта ма макӕд иронх кӕнӕн, куд ӕхсидзгӕ ’й еумӕ Хуцауӕн лӕггадӕ кӕнун. Уотӕ ку архайӕн, уӕд нӕ Йеговӕ рӕстгӕнгутӕбӕл нимайдзӕй.
45 ЗАР Мӕ зӕрди сагъӕстӕ
a Аци статьяй дзурдбаст «Израили паддзӕхтӕ» амонуй, Йегови адӕни сӕргъи кадӕриддӕр адтӕй, еци паддзӕхтӕмӕ, фӕнди Иуди дууӕ муггагей паддзӕхтӕ адтӕнцӕ, фӕнди Израили дӕс муггагей паддзӕхтӕ, фӕнди ба ӕгас дууадӕс муггагей паддзӕхтӕ.
b ЦИ НИСАН КӔНУЙ: дзурд «зӕрдӕ» Библий арӕх фӕййамонуй, адӕймаг медӕгӕй цӕхуӕн ӕй, гъома имӕ цӕхуӕн гъудитӕ, фӕндтӕ, искурдиӕдтӕ ӕма нисӕнттӕ ес, уомӕ.
c Ӕвӕдзи, уотӕ бакодта, мӕнгӕ хуцӕуттӕн ка кувта, еци ӕндӕрбӕстаг паддзӕхти ӕгъдаумӕ гӕсгӕ. Етӕ ци адӕнихаттбӕл фӕууӕлахез уиуонцӕ, уони хуцӕуттӕн ковун райдайиуонцӕ.
d Зӕгъӕн, паддзах Асӕ устур рӕдудтитӕ дӕр искӕнидӕ (2 Анз. 16:7, 10). Фал уӕддӕр Библий финст ӕй, Йегови цӕсти раст ци адтӕй, уой ке кодта. Кӕд райдайӕни пахампармӕ исмӕстгун ӕй, уӕддӕр фӕстӕдӕр ба ӕрфӕсмон кодта. Зӕгъӕн ес, ӕма имӕ хуарз лӕгъузӕй фулдӕр адтӕй. Сӕйрагдӕр е ӕй, ӕма Асӕ ӕрмӕстдӕр Йеговӕн лӕггадӕ кодта ӕма хъӕбӕр зӕрдиагӕй архайдта, цӕмӕй ӕ паддзахади мӕнгӕ хуцӕуттӕн макебал кова (1 Пад. 15:11–13; 2 Анз. 14:2–5).
e Моисеййи закъони фиццаг дууӕ фӕдзӕхстемӕ гӕсгӕ Йеговӕй ӕндӕр ковӕн некӕмӕн ӕма нецӕмӕн адтӕй (Рац. 20:1–6). Ӕма уомӕй бӕрӕг ӕй, Йеговӕн цӕйбӕрцӕбӕл ӕхсидзгӕ ’й, цӕмӕй ӕрмӕстдӕр уомӕн лӕггадӕ кӕнӕн.
f ХУЗӔ. Ӕригон хестӕр нӕлгоймаг бафеппайдта, ӕнсувӕр ниуӕзтӕбӕл ке фӕййахур ӕй ӕма уобӕл ӕ хӕццӕ дзубанди кӕнуй. Ӕнсувӕр имӕ сӕрниллӕгӕй байгъуста, ци гъудӕй, уой раййивта ӕма идарддӕр дӕр Йеговӕн еузӕрдонӕй лӕггадӕ кӕнуй.
