1, 2. Садок ка адтӕй? (1 Анзфинстити 12:22, 26–28).

 ДӔ ЦӔСТИТӔБӔЛ рауайун кӕнӕ: 340 000 нӕлгоймагемӕй фулдӕр ӕрӕмбурд ӕнцӕ Хеврони хонхбӕл, цӕмӕй Давиди Израили паддзахӕй исӕвӕронцӕ (1 Анз. 12:39). Ӕртӕ боней дӕргъи си цийни згули цудӕй: адӕн хабӕрттӕ кодтонцӕ, худтӕнцӕ ӕма кади зартӕ зардтонцӕ. Еци нӕлгоймӕгти астӕу адтӕй еу лӕхъуӕн Садок дӕр. Иннетӕй, ӕвӕдзи, нецӕмӕй хецӕн кодта, фал ӕй Йеговӕ еци берӕ нӕлгоймӕгти астӕу фӕууидта, ӕма ’й бафӕндадтӕй, цӕмӕй мах дӕр Садоки базонӕн. (Бакӕсӕ 1 Анзфинстити 12:22, 26–28.) Садок ка адтӕй?

² Садок адтӕй саугин ӕма лӕггадӕ кодта хестӕр саугин Авиафари хӕццӕ. Уомӕй уӕлдай ма Библий финст ӕй, ӕ бон ке адтӕй цӕстӕбӕлуайӕнтӕ уинун. Е ба уобӕл дзорӕг ӕй, ӕма ин Хуцау равардта хъаурӕ, удта зунд, цӕмӕй ин Садок ӕ фӕндон лӕдӕра (2 Сам. 15:27). Уомӕ гӕсгӕ беретӕ Садокӕй унаффӕ ракориуонцӕ. Уомӕй уӕлдай ма Садок адтӕй нифсхаст. Ӕма уобӕл аци статьяй радзордзиан.

3. а) Йегови лӕггадгӕнгути нифсхаст ун цӕмӕн гъӕуй? б) Аци статьяй цӕмӕ ӕркӕсдзиан?

³ Аци фӕстаг бӕнтти рӕстӕг Сайтан Хуцауи лӕггадгӕнгутӕбӕл ӕ маст хъӕбӕрӕй-хъӕбӕрдӕр калуй (1 Пет. 5:8). Мах не ’гас зӕрдӕй ӕнгъӕлмӕ кӕсӕн, Йеговӕ Сайтанӕн ӕма ӕ фуддуйнейӕн кӕрон кӕд искӕндзӕй, уомӕ (Пс. 31:24). Фал цалинмӕ еци рӕстӕг нӕма ралӕудтӕй, уӕдмӕ бал нӕ гъӕуй Хуцауи Паддзахади фарс лӕуун, хуӕртӕ ӕма ӕнсувӕртӕн ӕнхус кӕнун ӕма идарддӕр дӕр Йеговӕбӕл еузӕрдон ун. Ӕгас еци гъуддӕгтӕн ба гъӕуй нифсхастдзийнадӕ. Гъӕйдӕ ӕркӕсӕн, Садоки цӕветтон нин еци гъуддаги куд банхус кӕндзӕй, уомӕ.

 ХУЦАУИ ПАДДЗАХАДИ ФАРС ЛӔУУӔ

4. Цӕмӕй Хуцауи Паддзахади фарс лӕууӕн, уой туххӕй нӕ нифсхастдзийнадӕ цӕмӕн гъӕуй? (Кӕсӕ ма хузӕмӕ.)

⁴ Мах, Хуцауи лӕггадгӕнгутӕ, ӕ Паддзахади фарс ӕгас зӕрдӕй лӕууӕн, фал е алкӕд ӕнцон нӕ фӕууй (Матф. 6:33). Зӕгъӕн, фӕгъгъӕуй нӕ ӕцӕг нифсхастдзийнадӕ, цӕмӕй Сайтани фуддуйней Йегови кӕдзос уагӕвӕрдтӕмӕ гӕсгӕ цӕрӕн ӕма ин ӕ Паддзахади туххӕй хуарз хабар игъосун кӕнӕн (1 Фес. 2:2). Уомӕй уӕлдай ма политики хӕццӕ баст фарстати неке фарс лӕууӕн ӕма уӕхӕн цӕйдӕрти туххӕй иннети хӕццӕ дӕр нӕ фӕдздзорӕн (Иоан. 18:36). Ӕма нӕ уой туххӕй дӕр фӕгъгъӕуй нифсхастдзийнадӕ, уомӕн ӕма ӕфсадмӕ ке нӕ цӕуӕн, удта политики хӕццӕ баст гъуддӕгти ке нӕ фӕййархайӕн, уой туххӕй хатгай нӕ мулк фесафӕн, кедӕрти фуднад фӕккӕнунцӕ, кедӕрти ба ма ахӕстдони дӕр исбадун кӕнунцӕ.

5. Цӕмӕй Садок Давиди фарс лӕудтайдӕ, уой туххӕй ӕй нифсхастдзийнадӕ цӕмӕн гъудӕй?

⁵ Садок Хевронмӕ ӕрбацудӕй, Давид паддзах ке иссӕй, уой фӕдбӕл бӕрӕгбонмӕ. Фал ма еци лӕхъуӕнмӕ хъӕма дӕр адтӕй ӕма тохунмӕ цӕттӕ адтӕй. Ӕ федар фӕндӕ адтӕй Давиди фарс тохун ӕма Израил е знӕгтӕй гъӕуай кӕнун (1 Анз. 12:38). Садок адтӕй саугин ӕма, ӕвӕдзи, тохунмӕ уотӕ арӕх нӕ цӕуидӕ. Фал уӕддӕр ӕцӕг ӕфсӕддони хузӕн нифсхаст адтӕй.

6. Давид Садокӕн хуарз цӕветтон цӕмӕн адтайдӕ? (Псалом 138:3).

⁶ Саугин Садок уӕхӕн нифсхаст цӕй фӕрци иссӕй? Ӕ алливарс адтӕй, берӕ нифсхаст ӕма хъаурӕгин нӕлгоймӕгтӕ. Дзубанди дӕр ибӕл нӕййес, етӕ ин хуарз цӕветтон ке адтӕнцӕ. Зӕгъӕн, Давид. Хуарз разамонӕг ӕма ӕфсӕддон ке адтӕй, уой фӕрци ӕгас израилӕгти дӕр фӕндадтӕй, цӕмӕй сӕ паддзах иссайдӕ (1 Анз. 11:1, 2). Знӕгти хӕццӕ тох кӕнгӕй Давид алкӕддӕр ӕ зӕрдӕ Йеговӕбӕл фӕддаридӕ (Пс. 28:7; бакӕсӕ Псалом 138:3). Фал ма Садоки фарсмӕ адтӕй ӕндӕр нифсхаст нӕлгоймӕгтӕ дӕр, зӕгъӕн, Иодай ӕма ӕ фурт Ванейӕ, удта ма 22 муггаги хестӕри  (1 Анз. 11:22–25; 12:26–28). Уонӕн се ’гасемӕндӕр сӕ федар фӕндӕ адтӕй Давиди паддзахӕй исӕвӕрун ӕма ин ӕ хецаудзийнадӕ гъӕуай кӕнун.

7. а) Нӕ рӕстӕги нин ӕ нифсхастдзийнадӕй фӕнзуйнаг ка ӕй? б) Видеороликмӕ бакӕсгӕй ӕнсувӕр Нси́луӕй цӕбӕл исахур дӕ?

⁷ Мах бон ба куд ӕй нифсхаст исун? Зӕгъӕн, нӕ бон ӕй сагъӕс кӕнун, Йегови хецаудзийнади фарс нифсгунӕй ка ислӕууидӕ, уони цӕветтонтӕбӕл. Фиццагидӕр е ӕй нӕ Паддзах Йесо Киристе. Е адтӕй федар ӕма Сайтани дуйней политики хӕццӕ баст гъуддӕгти архайунбӕл не ’сарази ӕй (Матф. 4:8–11; Иоан. 6:14, 15). Удта Киристе ӕ зӕрдӕ ӕхебӕл нӕ дардта, фал алкӕддӕр ӕнхус Йеговӕй ракоридӕ. Киристейӕй уӕлдай ма нин абони дӕр ес, фӕнзуйнаг ка ӕй, уӕхӕн хуӕртӕ ӕма ӕнсувӕртӕ. Зӕгъӕн, берӕ ӕригон нӕлгоймӕгтӕ ӕфсадмӕ нӕ цӕунцӕ, удта политики хӕццӕ баст гъуддӕгти нӕ архайунцӕ. Сӕ хабӕрттӕ син дӕ бон ӕй базонун сайти jw.org a.

ХУӔРТӔ ӔМА ӔНСУВӔРТӔН ӔНХУС КӔНӔ

8. Хестӕр нӕлгоймӕгти нифсхастдзийнадӕ цӕхуӕн уавӕрти багъӕуй?

⁸ Йегови лӕггадгӕнгутӕ уарзунцӕ кӕрӕдземӕн ӕнхус кӕнун (2 Кор. 8:4). Фал еуӕй-еухатт уой туххӕй фӕгъгъӕуй нифсхастдзийнадӕ, зӕгъӕн, тугъд кӕми фӕццӕуй, уӕхӕн рауӕнти. Нӕ хуӕртӕ ӕма не ’нсувӕртӕй кӕмӕдӕрти нӕ фӕууй Библи, Библибӕл арӕзт литературӕ, удта хуӕруйнаг ӕма хъӕппӕл дӕр. Уодуӕлдай хестӕр нӕлгоймӕгтӕ цӕттӕ фӕуунцӕ, Йегови уӕриккитӕ ци гъӕуагӕ ’нцӕ, уобӕл батухсун, кӕд сӕхе цардӕн тӕссаг фӕууй, уӕддӕр (Иоан. 15:12, 13). Уотӕ ке фӕййархайунцӕ, уомӕй фӕффӕнзунцӕ Садоки.

9. Давид Садокӕн цӕхуӕн гъуддаг баихӕс кодта? (2 Самуили 15:27–29). (Кӕсӕ ма хузӕмӕ.)

⁹ Еу уӕхӕни Авессалом исфӕндӕ кодта ӕ фидӕ Давиди рамарун ӕма паддзахи бунат байахӕссун (2 Сам. 15:12, 13). Давиди Йерусалимӕй ледзун багъудӕй. Ӕ лӕггадгӕнгутӕн загъта: «Исистетӕ, ледзун гъӕуй, уомӕн ӕма Авессаломи къохӕй уодӕгасӕй нӕ райервӕздзиан!»  (2 Сам. 15:14). Давид ӕма е ’мбӕлттӕ горӕтӕй цӕунмӕ ку гъавтонцӕ, уӕд ӕй Давид балӕдӕрдтӕй, Йерусалими ӕй ке гъӕуй ниууадзун, ӕууӕнкӕ кӕбӕл ес, уӕхӕн адӕни, цӕмӕй ин цит Авессаломи фӕндти туххӕй фегъосун кӕнонцӕ. Еци ихӕс Давид баихӕс кодта Садок ӕма иннӕ саугинтӕн. (Бакӕсӕ 2 Самуили 15:27–29.) Гъудӕй сӕ уӕлдай лӕмбунӕг ун. Куд ӕй зонӕн, уотемӕй Авессалом адтӕй хеуарзон, мӕнгард ӕма, иннетӕй ӕ маст ка есуй, уӕхӕн адӕймаг. Расагъӕс кӕнӕ, Авессалом Садок ӕма иннӕ саугинтӕн ци бакодтайдӕ, ку ’й базудтайдӕ, е ’гас хабӕрттӕ дӕр ин Давидӕн ке дзорунцӕ, уой.

10. Садок ӕма е ’мбӕлттӕ Давиди цард куд багъӕуай кодтонцӕ?

¹⁰ Давид ӕргъуди кодта пълан ӕма ӕнхус ракурдта Садок, удта ӕ иннӕ еузӕрдон ӕмбал Хусийӕй (2 Сам. 15:32–37). Гъема Хуси дӕр Давиди пъланмӕ гӕсгӕ архайдта. Авессаломи ӕхебӕл баууӕндун кодта ӕма ин е дӕр ӕ унаффитӕмӕ игъосун райдӕдта. Уой фӕрци Давид ӕма ӕ адӕнӕн рӕстӕг фӕззиндтӕй, цӕмӕй тохмӕ сӕхе хуӕздӕр бацӕттӕ кодтайуонцӕ. Хуси Авессаломӕн ци унаффӕ равардта, уой Садок ӕма Авиафарӕн фӕххабар кодта (2 Сам. 17:8–16). Етӕ ба ’й Давидӕн радзурдтонцӕ (2 Сам. 17:17). Уотемӕй Садок ӕма иннӕ саугинтӕ Йегови фӕрци Давиди цард багъӕуай кодтонцӕ (2 Сам. 17:21, 22).

11. Ӕнсувӕртӕн ӕнхус кӕнгӕй нӕ бон куд ӕй Садоки хузӕн нифсхастӕй архайун?

¹¹ Тӕссаг уавӕрти ка бахаудтӕй, еци ӕнсувӕрти де ’нхус ку гъӕуа, уӕд куд архайдзӕнӕ? Дӕ бон куд ӕй Садоки хузӕн нифсхастӕй архайун? 1) Амундтӕмӕ гӕсгӕ архайӕ. Тӕссаг уавӕрти хъӕбӕр ӕхсидзгӕ фӕууй, цӕмӕй нӕ еудзийнадӕ багъӕуай кӕнӕн. Уомӕ гӕсгӕ, бунӕттон филиал ци амундтӕ раттуй, уонӕмӕ гӕсгӕ архайетӕ (Дзиуит. 13:17). Хестӕр нӕлгоймӕгтӕ гъӕуама еци амундтӕбӕл рӕстӕгӕй-рӕстӕгмӕ дзубанди кӕнонцӕ, цӕмӕй ӕй ӕмбурд зона, ести бӕллӕх ку ’рцӕуа, уӕд син куд архайгӕ ’й, уой (1 Кор. 14:33, 40). 2) Нифсхаст уо, фал лӕдӕргӕй архайӕ (Ӕмб. 22:3). Ести бакӕнуни размӕ бал дзӕбӕх расагъӕс кӕнӕ. Дзӕгъӕли дӕ цард тӕссаг уавӕри ма гӕлдзӕ. 3) Дӕ зӕрдӕ дарӕ Йеговӕбӕл.  Хуӕртӕ ӕма ӕнсувӕртӕн ку фенхус кӕнтӕ, уӕд уӕ гъудий дариайтӕ, Йеговӕ ӕрмӕст уони ӕдасдзийнадӕбӕл ке нӕ тухсуй, фал сумах ӕдасдзийнадӕбӕл дӕр. Е уин банхус кӕндзӕй, цӕмӕй хуӕртӕ ӕма ӕнсувӕртӕн дӕр банхус кӕнайтӕ ӕма уӕхецӕн дӕр маци зиан ракӕнайтӕ.

12, 13. Виктор ӕма Виталий хабарӕй цӕбӕл ахур кӕнис? (Кӕсӕ ма хузӕмӕ.)

¹² Дууӕ хестӕр нӕлгоймаги Виктор ӕма Витали Украини хуӕртӕ ӕма ӕнсувӕртӕн хуӕруйнаг ӕма дон амал кодтонцӕ. Виктор зӕгъуй: «Хуӕруйнаг кӕми нӕ агурдтан, уӕхӕн бунат нӕ байзадӕй. Хатгай нӕ алливарс ӕхсгӕ кодтонцӕ, уотемӕй ӕй агурдтан. Еу уӕхӕни еу ӕнсувӕр нисайнагӕн равардта хъӕбӕр берӕ аллихузи хуӕруйнӕгтӕ. Ӕ рӕдаудзийнади фӕрци хуӕртӕ ӕма ӕнсувӕртӕн цӕйбӕрцӕдӕр рӕстӕг адтӕй, ци бахуӕронцӕ, е. Еци хуӕруйнӕгтӕ нӕ машини ку ’цурхтан, уӕд еу 20 метри идарддӕр нӕ рази ракетӕ ӕрхаудтӕй. Ӕгас еци бон Йеговӕн лигъстӕ кодтон, цӕмӕй мин нифсхастдзийнадӕ ратта ӕма мӕ бон уа идарддӕр хуӕртӕ ӕма ӕнсувӕртӕн ӕнхус кӕнун».

¹³ Витали ба зӕгъуй: «Хъӕбӕр берӕ нифсхастдзийнадӕ нӕ гъудӕй. Фиццаг хатт хуӕруйнӕгтӕ ку ластон, уӕд мӕ 12 сахатти багъудӕй цӕун. Ӕгас над дӕр Йегови хӕццӕ дзоргӕй цудтӕн». Витали кӕд нифсхаст адтӕй, уӕддӕр арӕхсгай архайдта. Идарддӕр зӕгъуй: «Йеговӕй алкӕддӕр лӕдӕргӕдзийнадӕ ӕма бонзонгӕдзийнадӕ курдтон. Хецауадӕ цӕуни барӕ ци нӕдтӕбӕл равардта, ӕрмӕстдӕр уонӕбӕл фӕццӕуинӕ. Удта ме ’ууӕндундзийнадӕ хъӕбӕр бафедар уидӕ, ку ’й уидтон, хуӕртӕ ӕма ӕнсувӕртӕ куд еумӕйагӕй архайунцӕ, уой, раст цума еу бауӕри иуӕнгтӕ ӕнцӕ, уотӕ. Еуетӕ нин амудтонцӕ, нӕ над кӕбӕлти ракӕнӕн, уой. Иннетӕ нин гуманитарон ӕнхус ӕрӕмбурд кӕниуонцӕ, кадӕртӕ ба мӕнӕн ӕма Викторӕн бахуӕрун кӕниуонцӕ ӕма батухсиуонцӕ, цӕмӕй нӕ фӕллад исуадзӕн».

ИДАРДДӔР ДӔР ЙЕГОВӔБӔЛ ЕУЗӔРДОН УО

14. Берӕ ке уарзӕн, уонӕй еске Йегови ку ниууадзуй, уӕд нӕмӕ цӕхуӕн ӕнкъарӕнтӕ фӕззиннуй?

¹⁴ Нӕ хеуӕнттӕй кенӕ не ’мбӕлттӕй Йегови еске ку ниууадзуй, уӕд арви цӕфау фӕууӕн (Пс. 78:40; Ӕмб. 24:10). Адӕймаги хӕццӕ куд ӕнгомдӕр фӕууӕн, уотӕ нин зиндӕр фӕууй. Кӕд дӕубӕл дӕр уӕхӕн хабар ӕрцудӕй, уӕд ди хъауритӕ бауадздзӕй еузӕрдон Садоки хабар.

15. Садоки нифсхаст ун цӕмӕн гъудӕй, цӕмӕй Йеговӕбӕл еузӕрдонӕй байзадайдӕ? (1 Паддзӕхти 1:5–8).

¹⁵ Садок Йеговӕбӕл еузӕрдонӕй байзадӕй, ӕ хуарз ӕмбал Авиафар ибӕл ӕ зӕрдӕ ку исӕййивта, уӕд. Еци хабар ӕрцудӕй Давиди хецаудзийнади кӕрон. Уӕд Давид ӕ кари бацудӕй, ӕ фурт Адони ба исфӕндӕ кодта паддзахи бунат байахӕссун, кӕд ӕма еци бунатӕй Йеговӕ Соломонӕн зӕрдӕ байвардта (1 Анз. 22:9, 10). Авиафар дӕр Адоний фарс ислӕудтӕй. (Бакӕсӕ 1 Паддзӕхти 1:5–8.) Ӕма уотемӕй айдагъ Давидбӕл нӕ рацудӕй гадзирахаттӕй, фал ма Хуцаубӕл дӕр. Дӕ цӕститӕбӕл рауайун кӕнӕ, е Садокӕн куд зин адтайдӕ. 40 анземӕй фулдӕр Авифари хӕццӕ усхъӕй-усхъӕмӕ лӕггадӕ кодтонцӕ саугинтӕй ӕма «ӕцӕг Хуцауи бадзурди кирӕмӕ» сӕ цӕстӕ дардтонцӕ (2 Сам. 8:17). Ӕгас еци рӕстӕг Давидӕн ӕнхус кодтонцӕ. Еумӕ берӕ цидӕртӕ бавзурстонцӕ ӕма кӕрӕдзебӕл хъӕбӕр ӕновуд иссӕнцӕ (2 Сам. 19:11–14).

16. Садокӕн ци ӕнхус кодта, цӕмӕй Йеговӕн еузӕрдонӕй лӕггадӕ кодтайдӕ?

¹⁶ Садок Йеговӕбӕл еузӕрдонӕй байзадӕй, кӕд Авиафар уотӕ нӕ бакодта, уӕддӕр. Давид Садоки еузӕрдондзийнадӕбӕл некӕд гурусхӕ кодта. Адоний фудвӕндӕ ку раргом ӕй, уӕд Давид Садок, Нафан ӕма Ванейӕн баихӕс кодта, цӕмӕй Соломони паддзахӕй байсарстайуонцӕ (1 Пад. 1:32–34). Садоки рази уӕхӕн адӕн ке адтӕй, е ин ӕнхус кодта, цӕмӕй идарддӕр дӕр Йеговӕн еузӕрдонӕй лӕггадӕ кодтайдӕ (1 Пад. 1:38, 39). Соломон паддзах ку  иссӕй, уӕдта Авиафари бӕсти саугинӕй исӕвардта Садоки (1 Пад. 2:35).

17. Дӕ бон куд ӕй Садоки фӕнзун, де ’мбал кенӕ дӕ хеуон Йегови ку ниууадза, уӕд?

¹⁷ Дӕ бон куд ӕй Садоки фӕнзун? Кӕд дӕ хӕстӕг кенӕ де ’мбал рӕстдзийнадӕ ниууагъта, уӕддӕр дӕхецӕн федарӕй унаффӕ рахӕссӕ, Йеговӕй дӕхе ке нӕ рахатдзӕнӕ (Йес. Н. 24:15). Хуцау дин хъаурӕ дӕр ӕма нифсхастдзийнадӕ дӕр дӕтдзӕй, цӕмӕй дӕ бон уа, раст ци ӕй, уой кӕнун. Дӕ зӕрдӕ ибӕл алкӕддӕр дарӕ. Ковӕ имӕ ӕма ин еузӕрдонӕй ка лӕггадӕ кӕнуй, уонӕбӕл дӕхе бӕттӕ. Йеговӕ дин дӕ еузӕрдондзийнадӕн аргъ кӕнуй ӕма дин ӕнӕмӕнгӕй райарфӕ кӕндзӕй (2 Сам. 22:26).

18. Марко ӕма Сидсей хабарӕй цӕбӕл ахур кӕнис?

¹⁸ Ӕркӕсӕн еу ӕнсувӕр Ма́рко ӕма ӕ бийнойнаг Си́дсей хабармӕ. Сӕ дууӕ кизги дӕр рӕстдзийнадӕ ниууагътонцӕ. Марко зӕгъуй: «Дӕ минкъий бӕдоли фиццаг хатт дӕ къохтӕмӕ ку райсис, уӕд дӕ зӕрдӕ уарзтӕй байдзаг уй. Ӕма дӕхецӕн фӕззӕгъис, алцидӕр ке бакӕндзӕнӕ, цӕмӕй ӕй багъӕуай кӕнай. Уомӕ гӕсгӕ нӕ дууӕ кизги дӕр Йегови ку ниууагътонцӕ, уӕд ци рист ӕма маст бавзурстан, уомӕн зӕгъӕн дӕр н’ адтӕй». Марко идарддӕр зӕгъуй: «Фал Йеговӕ алкӕддӕр нӕ фарсмӕ фӕууй. Е нӕбӕл тухсуй, цӕмӕй мӕ бийнойнаги хӕццӕ кӕрӕдземӕн нифси хуасӕ уӕн. Уотӕ некӕд фӕууй, ӕма нӕ дууӕ дӕр ӕнӕхъаурӕ ан. Мӕнмӕ ку нӕбал фӕууй хъауритӕ, уӕд мӕ Сидсе бафедар кӕнуй. Е ку исӕнӕхъаурӕ уй, уӕдта ин ӕз фӕуун нифси хуасӕ». Сидсе ба зӕгъуй: «Ӕнӕ Йегови ӕнхусӕй еци уавӕрбӕл неци хузи искъаурӕ кодтайанӕ. Гъуди ма ’й кӕнун, ӕдзох мӕхе куд фудгин кодтон. Уой туххӕй Йеговӕмӕ ракувтон. Гъема дин цалдӕр боней фӕсте Паддзахади залмӕ ку ’рбацудтӕн, уӕд мӕмӕ бацудӕй, берӕ ӕнзти дӕргъи ке нӕ фӕууидтон, еу уӕхӕн хуӕрӕ. Е мин рахъури кодта, мӕ цӕститӕмӕ мин бакастӕй ӕма мин загъта: „Сидсе, мӕ хуӕрӕ, е дӕу фуд нӕй“. Йеговӕ мӕ некӕд ниууагъта ӕма мин нур дӕр ӕнхус кӕнуй, цӕмӕй лӕггадӕ кӕнгӕй мӕ цийнӕ ма исафон».

19. Аци статьямӕ ӕркӕсгӕй дӕхецӕн цӕхуӕн нисӕнттӕ исӕвардтай?

¹⁹ Йегови фӕндуй, цӕмӕй е ’гас лӕггадгӕнгутӕ дӕр Садоки хузӕн нифсхаст уонцӕ (2 Тим. 1:7). Фал е уобӕл дзорӕг нӕй, ӕма нӕ ӕрмӕстдӕр нӕхе хъауритӕбӕл гъӕуй нӕ зӕрдӕ дарун. Йегови фӕндуй, цӕмӕй нӕ каст алкӕддӕр уомӕ уа. Кӕд дин нифсхастдзийнадӕ нӕ фагӕ кӕнуй, уӕд ӕй Йеговӕй корӕ. Ӕма дин е дӕр банхус кӕндзӕй, цӕмӕй Садоки хузӕн нифсхаст уай! (1 Пет. 5:10).