1. Рӕстдзийнадӕн цӕмӕн аргъ кӕнис?

 ХУЦАУИ лӕггадгӕнгутӕ уарзунцӕ Библий рӕстдзийнадӕ. Не ’ууӕндундзийнадӕн ӕ бундор е ӕй (Ром. 10:17). Мах ибӕл ӕппундӕр нӕ гурусхӕ кӕнӕн, киристон ӕмбурд Йеговӕ уой туххӕй ке искодта, цӕмӕй «рӕстдзийнади цӕгиндзӕ ӕма бундор» уа (1 Тим. 3:15). Махӕн ӕхцӕуӕн ӕй, разамунд нин ка дӕттуй, уонӕмӕ игъосун. Еци ӕнсувӕртӕ нин ӕнхус кӕнунцӕ Библи лӕдӕрунмӕ ӕма Йегови разамундмӕ гӕсгӕ цӕрунмӕ (Дзиуит. 13:17).

2. Кӕд рӕстдзийнадӕ зонӕн, уӕддӕр нин тӕссаг цӕмӕй ӕй? (Иакови 5:19).

² Кӕд рӕстдзийнадӕ дӕр ӕма Йегови организаци дӕр уарзӕн, уӕддӕр уомӕн гӕнӕн ес, ӕма рӕстдзийнади надӕй радзӕгъӕл уӕн. (Бакӕсӕ Иакови 5:19.) Сайтан дӕр уомӕ ӕнгъӕлмӕ кӕсуй. Уомӕн уомӕй ӕхцӕуӕндӕр неци адтайдӕ, Библибӕл ӕма, Хуцауи организаци ци разамунд дӕттуй, уобӕл гурусхӕ кӕнун ку райдӕдтайанӕ (Еф. 4:14).

3. Рӕстдзийнадӕбӕл федар хуӕцун цӕмӕн гъӕуй? (Ефесӕгтӕмӕ 6:13, 14).

³ Бакӕсӕ Ефесӕгтӕмӕ 6:13, 14. Тагъд рӕстӕги Сайтан пайда кӕндзӕй, беретӕ кӕбӕл баууӕнддзӕнцӕ, уӕхӕн мӕнгӕттӕй, цӕмӕй аци дуйне Хуцауи лӕггадгӕнгути нихмӕ исахъела (Рарг. 16:13, 14). Уомӕй уӕлдай ма ӕгас хъауритӕй архайдзӕй, цӕмӕй Хуцауи адӕни дӕр ӕхе ’рдӕмӕ фӕккӕна (Рарг. 12:9). Уомӕ гӕсгӕ ӕхсидзгӕ ’й, цӕмӕй исахур уӕн, раст ци ӕй, уой мӕнгӕттӕй хецӕн кӕнун ӕма рӕстдзийнадӕмӕ игъосун (Ром. 6:17; 1 Пет. 1:22). Уомӕй кӕнгӕ уодзӕй устур бӕллӕхи сӕрти рахездзиан ӕви нӕ, е.

4. Аци статьяй цӕмӕ ӕркӕсдзиан?

 ⁴ Аци статьяй радзубанди кӕндзиан дууӕ менеуӕгебӕл. Етӕ нин банхус кӕндзӕнцӕ, цӕмӕй нӕ бон уа, раст ци ӕй, уой мӕнгӕттӕй хецӕн кӕнун. Уомӕй уӕлдай ма ӕркӕсдзиан, рӕстдзийнадӕбӕл федар хуӕцунмӕ нин ка банхус кӕндзӕй, ӕртӕ уӕхӕн унаффемӕ.

ЦИ ДИН БАНХУС КӔНДЗӔЙ, ӔЦӔГ ЦИ ӔЙ, УОЙ МӔНГӔТТӔЙ ХЕЦӔН КӔНУН?

5. Йеговӕй ку тӕрсӕн, уӕд нин е куд банхус кӕндзӕй, ӕцӕг ци ӕй, уой мӕнгӕттӕй ӕртасун?

⁵ Хуцауӕй тӕрсун. Йеговӕй ке тӕрсӕн, е уобӕл дзорӕг ӕй, ӕма ’й уарзӕн. Гъе уотӕ берӕ ’й уарзӕн, ӕма ин ӕ зӕрдихудти бацӕун тӕрсгӕ кӕнӕн. Махӕн царди тӕккӕ ӕхсидзгӕдӕр ӕй, цӕмӕн нин Йегови цӕсти хуарз ном уа. Уомӕ гӕсгӕ нӕ фӕндуй, цӕмӕй исахур уӕн, хуарз ци ӕй, уой лӕгъузӕй ӕртасун, ӕцӕг ци ӕй, уой ба – мӕнгӕттӕй (Ӕмб. 2:3–6; Дзиуит. 5:14). Ма бауадзӕ, цӕмӕй адӕнӕй уойбӕрцӕбӕл тӕрсун райдайай, ӕма дӕмӕ Хуцауи зӕрдихудти бацӕун мацибал кӕса. Арӕх адӕни цӕсти хуарз ци фӕууй, е Йегови зӕрдӕмӕ нӕ фӕццӕуй.

6. 10 израилаг ӕсгарӕги адӕнӕй ке тарстӕнцӕ, уой туххӕй, ӕцӕг ци адтӕй, уой куд исусхъуммӕ кодтонцӕ?

⁶ Адӕнӕй Хуцауӕй хъӕбӕрдӕр ку тӕрсӕн, уӕд рӕстдзийнади нихмӕ ци ӕй, уобӕл ӕууӕндун райдайдзиан. Нӕ зӕрдӕбӕл ӕрлӕуун кӕнӕн, Моисей 12 ӕсгарӕги зӕрдӕвӕрд зӕнхӕмӕ ку рарвиста, уӕд ци хабар ӕрцудӕй, уой. Еци ӕсгарӕгемӕй 10 ханаайнӕгтӕй хъӕбӕр фӕттарстӕнцӕ. Адӕнӕй ке тарстӕнцӕ, е сӕ гъе уотӕ бахъӕрӕу кодта, ӕма сӕ разӕй Хуцауи дӕр нӕбал уидтонцӕ. Израилӕгтӕн уотӕ загътонцӕ: «Еци адӕни нихмӕ рацӕун нӕ бон нӕй, уомӕн ӕма етӕ махӕй хъаурӕгиндӕр ӕнцӕ» (Ним. 13:27–31). Еуӕрдиги ци загътонцӕ, е раст адтӕй. Адӕймаги цӕстӕй ракӕсгӕй ханаайнӕгтӕ израилӕгтӕй дзӕвгарӕ хъаурӕгиндӕр адтӕнцӕ. Фал уотӕ кадӕриддӕр дзурдта, уонӕй Йеговӕ феронх ӕй. Еци 10 ӕсгарӕгемӕн се ’ргом раздахун гъудӕй, Йегови фӕндон цӕй медӕг ӕй, уомӕ. Уой ба фӕндадтӕй, цӕмӕй  израилӕгтӕ еци зӕнхӕ байахӕссонцӕ. Уомӕй уӕлдай ма сӕ гъудий гъӕуама дардтайуонцӕ, ӕрӕги Йеговӕ ӕ адӕни куд фӕййервӕзун кодта, уой. Уотемӕй ӕй балӕдӕрдтайуонцӕ, уой хъаурӕ ханаайнӕгти хъаури хӕццӕ рабарӕн дӕр ке нӕййес. Мадта и 10 ӕсгарӕгемӕн ӕууӕндундзийнадӕ нӕ фагӕ кодта. Фал Халев ӕма Йесо Навинӕй уотӕ зӕгъӕн н’ адтӕй. Уонӕн тӕккӕ ӕхсидзгӕдӕр адтӕй Йегови хуарзӕнхӕ иссерун. Етӕ адӕнӕн загътонцӕ: «Кӕд Йеговӕн хъазар ан, уӕд нӕ ӕнӕмӕнгӕй бакӕндзӕй еци зӕнхӕмӕ, ратдзӕй нин, ӕхсир ӕма муд кӕми кӕлуй, уӕхӕн зӕнхӕ» (Ним. 14:6–9).

7. Ци нин банхус кӕндзӕй, цӕмӕй Хуцауӕй тӕрсун исахур уӕн? (Кӕсӕ ма хузӕмӕ.)

⁷ Ци нин банхус кӕндзӕй, цӕмӕй исахур уӕн Хуцауӕй тӕрсун? Унаффӕ рахӕссуни размӕ расагъӕс кӕнисӕ: «Мӕ унаффӕй Йегови зӕрдӕ фӕрресун кӕндзӕн ӕви нӕ?» (Пс. 16:8). Библий ести скъуддзаг кӕсгӕй дӕхе бафӕрсисӕ: «Уӕхӕн уавӕри ӕз ба куд бакодтайнӕ?» Зӕгъӕн, ду дӕр израилӕгти астӕу дӕ ӕма игъосис, 10 ӕсгарӕги ци дзорунцӕ, уой. Сӕ дзурдтӕбӕл син баууӕндтайсӕ? Ду дӕр фӕттарстайсӕ? Ӕви Йегови ке уарзис, уой фӕрци син сӕ дзурдтӕ нецӕмӕ ӕрдардтайсӕ? Йесо Навин ӕма Халев, ӕцӕг ци ӕй, уой дзурдтонцӕ, фал сӕбӕл адӕн нӕ баууӕндтӕнцӕ. Уой туххӕй еци фӕлтӕрӕй Йесо Навин ӕма Халевӕй уӕлдай Зӕрдӕвӕрд зӕнхӕмӕ неке бацудӕй (Ним. 14:10, 22, 23).

8. Уӕлдай хъӕбӕрдӕр цӕхуӕн менеуӕгбӕл гъӕуй архайун ӕма цӕмӕн?

⁸ Сӕрниллӕгдзийнадӕ. Йеговӕ рӕстдзийнадӕ ӕргом кӕнуй ӕрмӕстдӕр сӕрниллӕг адӕнӕн (Матф. 11:25). Библи ахур кӕнуни туххӕй нин ку загътонцӕ, уӕд сӕрниллӕгӕй исарази ан, ӕнхус нӕ ке гъӕуй, уобӕл (Гъуд. 8:30, 31). Фал гъӕуама лӕмбунӕг уӕн, цӕмӕй ма иссӕрбӕрзонд уӕн. Кенӕ ба нӕмӕ уотӕ кӕсун райдайдзӕй, ӕма кӕцидӕр уавӕрти нӕхе гъуди Библий уагӕвӕрдтӕй кенӕ нӕ организаций амундтӕй растдӕр ӕй.

9. Ци нин банхус кӕндзӕй идарддӕр дӕр сӕрниллӕг ун?

⁹ Цӕмӕй сӕрниллӕг уӕн, уой туххӕй гъӕуама нӕ гъудий дарӕн, Йегови хӕццӕ рабаргӕй зӕнхон адӕймаг куд неци ӕй, уой (Пс. 8:3, 4). Нӕ бон ӕй Йеговӕмӕ ковун, цӕмӕй нин никки фулдӕр сӕрниллӕгдзийнадӕ дӕтта ӕма нӕ идарддӕр дӕр фӕндӕуа ахур кӕнун. Йеговӕ ни ӕ гъудитӕ нӕ римӕхсуй. Е нин сӕ ӕргом кӕнуй ӕ Дзурд Библий фӕрци ӕма, ӕ организаци ци публикацитӕ рауадзуй, уони фӕрци. Е нин ӕхуӕдӕг ӕнхус кӕндзӕй, цӕмӕй ин ӕ гъудитӕн аргъ кӕнӕн ӕма сӕ нӕхе гъудитӕй уӕлдӕр ӕвӕрӕн. Библи кӕсгӕй де ’ргом раздахисӕ, цӕмӕй бӕрӕг ӕй, Йеговӕ сӕрниллӕгдзийнадӕ ке уарзуй, сӕрбӕрзонд ӕма хъалзӕрдӕ адӕймагӕй ба е ’сӕфт ке уинуй. Уомӕй уӕлдай ма ӕхсидзгӕ ’й, цӕмӕй нӕ сӕрниллӕгдзийнадӕ ма фесафӕн, кадгин ихӕстӕ нин ку бабарӕ кӕнунцӕ ӕма нӕмӕ берӕ ӕргом ку фездахунцӕ, уӕд.

ЦИ НИН БАНХУС КӔНДЗӔЙ РӔСТДЗИЙНАДӔБӔЛ ФЕДАР ХУӔЦУН?

10. Рагидзаманти Йеговӕ разамунд ке фӕрци лӕвардта ӕма абони ке фӕрци дӕттуй?

¹⁰ Йегови организацибӕл макӕд гурусхӕ кӕнӕ. Фиццӕгти бал Йеговӕ ӕ адӕнӕн разамунд лӕвардта Моисеййи фӕрци, уой фӕсте ба Йесо Навини фӕрци (Йес. Н. 1:16, 17). Израилӕгтӕ гъӕуама лӕдӕрдтайуонцӕ, еци нӕлгоймӕгтӕ Йегови номӕй ке архайунцӕ, ӕма сӕ гъӕуама нимадтайуонцӕ. Уотӕ ку фӕййархаиуонцӕ, уӕд сӕ царди алцидӕр хуарз фӕууидӕ. Уомӕй сӕдӕгай ӕности фӕсте фӕззиндтӕй киристон ӕмбурд. Фиццаг бал разамунд лӕвардтонцӕ 12 апостоли (Гъуд. 8:14, 15). Фӕстӕдӕр ба ма сӕбӕл Йерусалими бафтудӕнцӕ ӕндӕр хестӕр нӕлгоймӕгтӕ дӕр. Киристӕнттӕ дӕр еци еузӕрдон нӕлгоймӕгти амундтӕмӕ ку игъустонцӕ, уӕд «ӕмбурдти ахуркӕнуйнӕгти ӕууӕндундзийнадӕ федардӕр кодта ӕма бонӕй-бонмӕ фулдӕр кодтонцӕ» (Гъуд. 16:4, 5). Гъе уотӕ абони дӕр,  цӕйбӕрцӕбӕл ӕнтӕстгун уодзиан, е кӕнгӕ уодзӕй, Хуцауи организацийӕн коммӕгӕс ан ӕви нӕ, уомӕй. Расагъӕс кӕнӕ, Йеговӕн куд адтайдӕ, разамунд дӕттунмӕ ке исӕвардта, уони ку нӕ нимадтайанӕ, уӕд. Аци фарстабӕл дзуапп раттун нӕ бон исуодзӕй, израилӕгтӕбӕл Зӕрдӕвӕрд зӕнхӕмӕ цӕугӕй ци хабар ӕрцудӕй, уомӕ ку ’ркӕсӕн, уӕд.

11. Моисеййи нихмӕ ка рацудӕй, еци израилӕгтӕбӕл ци ’рцудӕй? (Кӕсӕ ма хузӕмӕ.)

¹¹ Зӕрдӕвӕрд зӕнхӕмӕ цӕугӕй, израилӕгти астӕу кадгин ном кӕмӕн адтӕй, еци нӕлгоймӕгтӕй еуӕй-еуетӕ Моисеййи нихмӕ дзорун райдӕдтонцӕ. Етӕ уотӕ дзурдтонцӕ: «Аци адӕн еугурӕйдӕр [айдагъ Моисей нӕ, фал,] сугъдӕг ӕнцӕ ӕма Йеговӕ сӕ хӕццӕ ’й» (Ним. 16:1–3). Ӕцӕгӕйдӕр, Хуцауи цӕсти «адӕн еугурӕйдӕр» сугъдӕг адтӕнцӕ, фал син разамунд дӕттунмӕ ба ӕрмӕстдӕр Моисеййи исӕвардта (Ним. 16:28). Израилӕгтӕ Моисеййи нихмӕ ке цудӕнцӕ, уомӕй бавдистонцӕ, Йегови нихмӕ ке цӕунцӕ. Етӕ се ’ргом ӕздахун райдӕдтонцӕ, Йегови ци фӕндадтӕй уомӕ нӕ, фал сӕхе ци фӕндадтӕй, уомӕ. Фулдӕр кадӕмӕ ӕма бартӕмӕ бӕлдтӕнцӕ. Гъема Хуцау, змӕнтун ка райдӕдта, еци нӕлгоймӕгти ӕма, сӕ фарс ци мингай израилӕгтӕ ислӕудтӕй, уони се ’гасейдӕр фесафта (Ним. 16:30–35, 41, 49). Абони дӕр хабар нӕ раййивта. Йегови организаций амундтӕмӕ еске ӕнӕнвӕрсон каст ку фӕккӕнуй ӕма сӕ ку нӕ фӕннимайуй, уӕд е Йегови зӕрдӕмӕ нӕ фӕццӕуй.

12. Нӕ бон цӕмӕн ӕй Йегови организацибӕл алкӕддӕр ӕууӕндун?

¹² Йегови организацибӕл ӕууӕндун нӕ бон алкӕддӕр ӕй. Разамонӕг совети ӕнсувӕртӕ ’й ку фӕууинунцӕ, ести раййевун ке гъӕуй, уӕд еци фӕдбӕл архайун райдайунцӕ. Еци ӕййивддзийнӕдтӕ баст фӕуунцӕ Библий рӕстдзийнадӕ куд фӕллӕдӕрун кӕнӕн кенӕ Паддзахади гъуддаг куд цӕуй, уой хӕццӕ (Ӕмб. 4:18). Уотӕ уомӕн бакӕнунцӕ, ӕма син сӕйрагдӕр ӕй Йегови фӕндон. Удта, ци унаффитӕ рахӕссунцӕ, уонӕн сӕ бундор фӕууй Хуцауи Дзурд – «раст дзурдти дӕнцӕг».

13. Раст «дзурдти дӕнцӕг» ци ӕй ӕма ибӕл федар цӕмӕн гъӕуама хуӕцӕн?

 ¹³ Федар хуӕцетӕ «раст дзурдти дӕнцӕгбӕл» (2 Тим. 1:13). Раст дзурдти дӕнцӕгмӕ хаунцӕ, Киристе ке амудта ӕма, Библий финст ка ӕрцудӕй, еци ахурӕдтӕ (Иоан. 17:17). Уонӕбӕл арӕзт ӕй не ’ууӕндундзийнадӕ, ӕма нӕ Йегови организаци ахур кӕнуй, цӕмӕй еци дӕнцӕгбӕл федар хуӕцӕн. Уотӕ ку кӕнӕн, уӕд нӕ е гъӕуй кӕндзӕй.

14. Фиццаг ӕноси киристӕнттӕй еуӕй-еуетӕ «раст дзурдти дӕнцӕгӕй» куд райеуварс ӕнцӕ?

¹⁴ Цума «раст дзурдти дӕнцӕгӕй» ку райеуварс уӕн, уӕд ци ’рцӕудзӕй? Ӕркӕсӕн еу цӕветтонмӕ. Фиццаг ӕноси ӕмбурдти астӕу уӕхӕн кой райгъустӕй, зӕгъгӕ, дан, Йегови бон ралӕудтӕй. Ӕвӕдзи, уотӕ уомӕн рауадӕй, ӕма сӕмӕ еу финстӕг ӕрцудӕй. Еци финстӕгӕй дзурдтонцӕ, апостол Павел, дан, ӕй ниффинста. Фессалоники киристӕнттӕй еуӕй-еуетӕ гъуддӕгтӕмӕ лӕмбунӕг не ’ркастӕнцӕ, уотемӕй еци финстӕгбӕл баууӕндтӕнцӕ ӕма си ци финст адтӕй, уой иннетӕн дӕр дзорун райдӕдтонцӕ. Фал сӕ апостол Павел цӕбӕл ахур кодта, уой сӕ гъудий ку дардтайуонцӕ, уӕд сӕбӕл уӕхӕн сайд нӕ рауадайдӕ (2 Фес. 2:1–5). Уомӕ гӕсгӕ сӕ Павел бафӕдзахста, цӕмӕй ӕнцонсайӕн ма уонцӕ. Цӕмӕй идарддӕр дӕр сӕ бон уа, раст ци ӕй, уой мӕнгӕттӕй хецӕн кӕнун, уой туххӕй ӕ дуккаг финстӕг уӕхӕн дзурдтӕй фӕцӕй: «Мӕ салӕмттӕ уӕмӕ ӕз, Павел, финсун мӕхе къохӕй. Е ӕй нисан мӕ алли финстӕги дӕр, цӕмӕй ӕй зонайтӕ мӕнӕй ке ӕй» (2 Фес. 3:17).

15. Ӕцӕг хабӕртти хузӕн ка ӕй, еци мӕнгӕттӕбӕл цӕмӕй ма баууӕндӕн, уой туххӕй нӕ ци кӕнун гъӕуй? Ӕрхӕссӕ цӕветтон. (Кӕсӕ ма хузӕмӕ.)

¹⁵ Апостол Павел фессалоникӕгтӕмӕ ци ниффинста, уомӕй мах ба цӕбӕл ахур кӕнӕн? Гӕнӕн ес, ӕма мах дӕр фегъосӕн, деси ка ’фтауй кенӕ Библий рӕстдзийнади нихмӕ ка ӕй, уӕхӕн хабар. Уӕхӕн уавӕри гъӕуама уӕн лӕмбунӕг ӕма лӕдӕргӕ. Советон Цӕдеси ӕнсувӕртӕмӕ еу хатт ӕрбацудӕй финстӕг. Уотӕ зиндтӕй, цума ’й сӕйраг хайадӕй ӕрбарвистонцӕ. Еци финстӕги ӕнсувӕрти разӕнгард кодтонцӕ, цӕмӕй хецӕн организаци искӕнонцӕ. Еци финстӕг кӕд не ’знӕгтӕ ниффинстонцӕ, уӕддӕр ӕцӕги хузӕн адтӕй. Фал ӕнсувӕртӕ сӕхе сайун нӕ бауагътонцӕ. Етӕ ’й балӕдӕрдтӕнцӕ, финстӕги ци финст адтӕй, е ке хецӕн кӕнуй, уой размӕ сӕ организаци  цӕбӕл ахур кодта, уомӕй. Абони дӕр рӕстдзийнади нихмӕ ка цӕуй, уони бон ӕй аллихузи технологитӕй пайда кӕнун, цӕмӕй нӕ исдзӕгъӕл кӕнонцӕ ӕма нин нӕ еудзийнадӕ фехалонцӕ. Уомӕ гӕсгӕ гъӕуама лӕмбунӕг ӕма къӕрцгъос уӕн ӕма хатдзӕгтӕ кӕнунмӕ ма тагъд кӕнӕн. Цӕмӕй нӕхе сайун ма бауадзӕн, уой туххӕй гъӕуама расагъӕс кӕнӕн: ци кӕсӕн кенӕ ци игъосӕн, е, уой размӕ ци базудтан, уой нихмӕ нӕй? (2 Фес. 2:2; 1 Иоан. 4:1).

16. Ромӕгтӕмӕ 16:17, 18 финст дзурдтӕмӕ гӕсгӕ ци гъӕуама кӕнӕн, рӕстдзийнади нихмӕ ка ӕй, уӕхӕн гъудитӕ еске ку парахат кӕна, уӕд?

¹⁶ Йеговӕбӕл еузӕрдон ка ӕй, уони хӕццӕ уин ци еудзийнадӕ ес, уой гъӕуай кӕнтӕ. Йегови фӕндуй, цӕмӕй ӕ лӕггадгӕнгутӕ еугурӕйдӕр еумӕ лӕггадӕ кӕнонцӕ. Еци еудзийнадӕ нӕ астӕу уодзӕй, рӕстдзийнадӕбӕл федар ку хуӕцӕн, ӕрмӕстдӕр уӕд. Рӕстдзийнади нихмӕ ка цӕуй, уӕхӕн гъудитӕ еске парахат кӕнун ку райдайуй, уӕд уой туххӕй ӕмбурд ниддехтӕ уй. Уомӕ гӕсгӕ нӕ Хуцау фӕдзӕхсуй, цӕмӕй уӕхӕн адӕнмӕ хӕстӕгдӕр ма цӕуӕн. Кенӕ ба уотӕ рауайдзӕй, ӕма еци мӕнгӕттӕбӕл баууӕндгӕй Йеговӕбӕл еузӕрдон нӕбал уодзиан. (Бакӕсӕ Ромӕгтӕмӕ 16:17, 18.)

17. Рӕстдзийнадӕ ци ӕй, уой дзӕбӕх цӕмӕн гъӕуама зонӕн ӕма ибӕл федар цӕмӕн гъӕуама хуӕцӕн?

¹⁷ Рӕстдзийнадӕ ци ӕй, уой дзӕбӕх ку лӕдӕрӕн, уӕд си нӕ райеуварс уодзиан. Йегови къохбӕл федар хуӕцдзиан ӕма не ’ууӕндундзийнадӕ алкӕддӕр уодзӕй федар (Еф. 4:15, 16). Е нӕ багъӕуй кӕндзӕй аллихузи фесинмӕ ахурӕдтӕй ӕма, Сайтан ци мӕнгӕттӕ парахат кӕнуй, уонӕй. Удта ма уотемӕй устур бӕллӕхи рӕстӕг нӕ бон уодзӕй Йегови ӕнхусбӕл нӕ зӕрдӕ дарун. Мадта идарддӕр дӕр рӕстдзийнадӕбӕл федар хуӕцетӕ, ӕма «фарни Хуцау уодзӕй уӕ хӕццӕ»! (Фил. 4:8, 9).