1. Псалом 15:1–5 ци финст ес, уомӕ ӕркӕсун пайда цӕмӕн ӕй?

 АЙРАЗИККОН статьяйӕй куд базудтан, уотемӕй Йеговӕ ӕ цатурмӕ хонуй, ӕ цард ин ка иснивонд кодта ӕма ӕ хуарз ӕмбал ка ӕй, уони. Цума нӕ бон куд ӕй Хуцауи хӕццӕ балимӕн ун ӕма еци лимӕндзийнадӕ багъӕуай кӕнун? Дзуапп иссерӕн ес 15 псаломи. (Бакӕсӕ Псалом 15:1–5.) Гъӕйдӕ имӕ лӕмбунӕгдӕр ӕркӕсӕн ӕма базонӕн, Йеговӕ е ’мбӕлттӕй ци агоруй, уой.

2. Давид Йегови цатури кой ку кодта, уӕд цӕбӕл гъуди кодтайдӕ?

² 15 псалом уӕхӕн дзурдтӕй райдайуй: «О, Йеговӕ, ке баиуазӕг кӕндзӕнӕ дӕ цатури? Ка цӕрдзӕй дӕ кӕдзос хонхбӕл?» (Пс. 15:1). Давид Йегови «цатури» кой ку кодта, уӕд, ка ’й зонуй, гъуди кодта, цӕйбӕрцӕдӕр рӕстӕг Гаваони ка адтӕй, еци ӕмбурди цатурбӕл. Кенӕ ба «кӕдзос хонхи» кой кӕнгӕй, ка ’й зонуй, гъуди кодта Йерусалими Сиони хонхбӕл. Еци хонх адтӕй Гаваонӕй еу 10 километри идарддӕр. Ӕма ибӕл Давид ӕрӕвардта цатур ӕма имӕ бахаста бадзурди кирӕ. Еци кирӕ уоми адтӕй, цалинмӕ ковӕндонӕ конд не ’рцудӕй, уӕдмӕ (2 Сам. 6:17).

3. 15 псалом нин куд банхус кӕндзӕй, цӕмӕй Йегови хӕццӕ нӕ лимӕндзийнадӕ багъӕуай кӕнӕн? (Кӕсӕ ма хузӕмӕ.)

³ Ке зӕгъун ӕй гъӕуй, израилӕгтӕн сӕ фулдӕр сугъдӕг цатури некӕд лӕггадӕ кодтонцӕ. Удта бадзурди кирӕ кӕми адтӕй, уордӕмӕ бацӕуни барӕ дӕр ӕрмӕстдӕр еуӕй-еуетӕн адтӕй. Фал уӕддӕр Йеговӕн еузӕрдонӕй кадӕриддӕр лӕггадӕ кодта, уонӕн сӕ бон адтӕй Хуцауи ӕмбал исун, гъома, рахӕсгӕ хузи Йегови цатури иуазӕг исун. Мах дӕр фӕндуй уӕхӕн иуазгутӕ ун. 15 псаломи финст ӕй, ци кӕнун гъӕуй, цӕмӕй Йегови хӕццӕ нӕ лимӕндзийнадӕ багъӕуай кӕнӕн.

 ӔНАЙЙЕПП УОТӔ ӔМА РӔСТӔЙ АРХАЙЕТӔ

4. Цӕмӕй Йегови ӕмбал исуай, уой туххӕй донаргъуд райсун фагӕ ке нӕй, уой кӕцӕй зонӕн? (Исай 48:1).

⁴ 15 псаломи 2 стихи финст ӕй, Йеговӕ е ’мбӕлттӕбӕл ке нимайуй, «ӕнаййепп ка ӕй» ӕма «рӕстӕй ка цӕруй», уони. Фал цума ӕнӕнхӕст адӕни бон ӕй ӕнаййепп ун? Гъо! Йеговӕ нӕ уӕхӕн адӕнбӕл банимайуй, не ’гас хъауритӕй ку фӕййархайӕн, цӕмӕй ин коммӕгӕс уӕн. Ӕма уотӕ фӕгъгъӕуй архайун алкӕддӕр, рӕстӕгӕй-рӕстӕгмӕ нӕ, фал. Нӕхе Хуцауӕн ку иснивонд кӕнӕн ӕма донаргъуд ку райсӕн, уӕд е нӕ надӕн ӕрмӕстдӕр ӕ райдайӕн фӕууй. Фӕгъгъӕуй нӕ идарддӕр дӕр архайун, цӕмӕй Йеговӕбӕл еузӕрдон уӕн. Зӕгъӕн, кӕд ӕгас Израил дӕр Хуцауӕн нивондгонд адтӕй, уӕддӕр е уобӕл дзорӕг н’ адтӕй, ӕма израилӕгтӕй алкедӕр Йегови иуазӕг адтӕй. Цӕмӕн ес уотӕ зӕгъӕн? Уомӕн ӕма имӕ «ӕцӕгдзийнадӕ ӕма рӕстдзийнадӕмӕ» гӕсгӕ нӕ кувтонцӕ, удта, сӕхе куд дардтонцӕ, уомӕй Хуцауи ном ӕгадӕ кодтонцӕ. (Бакӕсӕ Исаййи 48:1.) Израилӕгти гъудӕй идарддӕр дӕр архайун, цӕмӕй Хуцауи домӕнтӕ зононцӕ ӕма сӕ ӕнхӕст кӕнонцӕ. Гъе уотемӕй сӕ бон адтайдӕ Йегови иуазгутӕ ун. Ӕма абони дӕр хабар уотӕ ’й. Донаргъуд райсай ӕма дӕхе Йегови Ӕвдесӕн хонай, айдагъ е фагӕ нӕй. Гъӕуама архайай, цӕмӕй «рӕстӕй цӕрай». Уомӕ ци хауй?

5. Алли гъуддаги дӕр нӕ бон куд ӕй Йеговӕмӕ игъосун?

⁵ Цӕмӕй ӕнаййепп уай ӕма рӕстӕй цӕрай, уой туххӕй уотид ӕмбурдтӕ ма цох кӕнай, е фагӕ нӕй (1 Сам. 15:22). Гъӕуама Йеговӕмӕ игъосӕн алли гъуддаги дӕр, сауӕнгӕ ма нӕ ку неке фӕууинуй, уӕд дӕр. Ӕхсидзгӕ ’й, цӕмӕй Йеговӕн коммӕгӕс уӕн минкъий гъуддӕгти дӕр (Ӕмб. 3:6; Еккл. 12:13, 14). Уотемӕй ӕй бавдесдзиан, ке ’й уарзӕн. Уӕд нӕ Йеговӕ ӕхуӕдӕг дӕр хъӕбӕрдӕр уарздзӕй (Иоан. 14:23; 1 Иоан. 5:3).

6. Дзиуиттӕгтӕмӕ 6:10–12 финст дзурдтӕмӕ гӕсгӕ, цӕмӕй идарддӕр дӕр Йегови цатури уӕн, уой туххӕй нӕ раздӕри хуарз гъуддӕгтӕ фагӕ цӕмӕннӕ ’нцӕ?

 ⁶ Йеговӕ устур аргъ кӕнуй, уой туххӕй цидӕриддӕр искодтан, уомӕн. Фал кӕддӕр ци хуарз гъуддӕгтӕ кодтан, айдагъ уони фӕрци нӕ бон нӕй Йегови цатури иуазгутӕ ун. Е бӕрӕг ӕй Дзиуиттӕгтӕмӕ 6:10–12 ци финст ес, уомӕй (ба сӕ кӕсӕ). Йегови фӕндуй, цӕмӕй ибӕл идарддӕр дӕр еузӕрдон уӕн ӕма ин ӕгас зӕрдӕй «кӕронмӕ дӕр» лӕггадӕ кӕнӕн. Ӕма нӕ къохтӕ ку не ’руадзӕн, уӕд нин нӕ хъиамӕтӕн райарфӕ кӕндзӕй. Нӕ бон уодзӕй ӕносмӕ дӕр Йегови ӕмбӕлттӕ ун (Гал. 6:9).

УӔ ЗӔРДИ РӔСТДЗИЙНАДӔ ДЗОРЕТӔ

7. Нӕ бон куд ӕй нӕ зӕрди рӕстдзийнадӕ дзорун?

⁷ Йегови иуазӕг ун ке фӕндуй, е гъӕуама «ӕ зӕрди рӕстдзийнадӕ дзора» (Пс. 15:2). Маке сайай, айдагъ е фагӕ нӕй. Гъӕуама нӕмӕ сӕри гъунӕй къахи ӕнгулдзи уӕнгӕ сайдӕй маци уа (Дзиуит. 13:18). Е ӕцӕгӕйдӕр хъӕбӕр ӕхсидзгӕ ’й, уомӕн ӕма «мӕнгард адӕймаг Йеговӕн ӕнадӕ ’й, рӕстзӕрдӕ ка ӕй, етӕ ба ӕнцӕ ӕ хуарз ӕмбӕлттӕ» (Ӕмб. 3:32).

8. Нӕхе цӕмӕй гъӕуама хезӕн?

⁸ Раст ци ӕй, уой ӕ зӕрди ка дзоруй, уӕхӕн адӕймаг иннети рази ӕхе уотӕ нӕ дардзӕй, цума Хуцауӕн коммӕгӕс ӕй, ку ’й неке уина, удта ин ӕ закъони сӕрти хездзӕй (Ис. 29:13). Е уобӕл дзорӕг адтайдӕ, ӕма адӕймаг дудзӕсгон ӕй. Адӕймаг уӕхӕн кутемӕй исуй? Фиццагидӕр бал, гурусхӕ кӕнун райдайуй Библий уагӕвӕрдтӕй еуӕй-еуетӕ раст ке ’нцӕ, уобӕл (Иак. 1:5–8). Уой фӕсте ба имӕ уотӕ ӕхсидзгӕ ка нӕ кӕсуй, уӕхӕн фарстати Йеговӕн ӕгоммӕгӕс исуй. Ӕ рӕдудтитӕ ’й уайтагъд лӕгъуз фӕстеугутӕмӕ ке не ’ркӕнунцӕ, уомӕ гӕсгӕ ӕгӕр ӕндиуд исуй ӕма Хуцауи закъӕнтти сӕрти хезун райдайуй (Еккл. 8:11). Уотемӕй ӕ лӕггадӕй нецибал пайда фӕууй. Фал мах фӕндуй, цӕмӕй алли гъуддаги дӕр рӕстӕй архайӕн.

9. Киристей зӕрдӕмӕ Нафанаил цӕмӕн фӕццудӕй ӕма уомӕй цӕбӕл ахур кӕнӕн? (Кӕсӕ ма хузӕмӕ.)

⁹ Ӕцӕгӕйдӕр, хъӕбӕр ӕхсидзгӕ ’й, цӕмӕй адӕймаг ӕ зӕрди дӕр, раст ци ӕй, уой дзора. Ӕма е бӕрӕг ӕй, Филипп Киристемӕ е ’мбал Нафанаили ку ’рбахудта, еци хабарӕй. Киристе Нафанаили нӕ фӕсмардта, фал си уотӕ загъта: «Айӕ ӕй ӕцӕг израилаг, хийнӕдзийнадӕ  кӕмӕ нӕййес, е» (Иоан. 1:47). Ке зӕгъун ӕй гъӕуй, Киристе ӕ иннӕ ахуркӕнуйнӕгти дӕр раст адӕнбӕл нимадта, фал Нафанаилмӕ еци менеуӕг хъӕбӕр ирдӕй зиндтӕй. Нафанаил дӕр мах хузӕн ӕнӕнхӕст адӕймаг адтӕй, фал имӕ хийнӕдзийнадӕ ӕма цӕстӕмӕ миутӕн сӕ кой дӕр н’ адтӕй. Киристей зӕрдӕмӕ е хъӕбӕр фӕццудӕй, ӕма ’й уой туххӕй растудта. Ӕвӕдзи, махӕй алкедӕр фӕндадтайдӕ, цӕмӕй си Киристе уотӕ зӕгъа.

10. Ци дзорӕн, уомӕ лӕмбунӕг цӕмӕн гъӕуама уӕн? (Иакови 1:26).

¹⁰ 15 псаломи ци домӕнтӕ финст ес, уонӕй сӕ фулдӕр хаунцӕ нӕхе иннети хӕццӕ куд фӕддарӕн, уомӕ. 3 стихи куд финст ӕй, уомӕ гӕсгӕ Йегови иуазӕг «е ’взагӕй нӕ кӕнуй фудкой, иннемӕн лӕгъуздзийнадӕ нӕ кӕнуй ӕма е ’мбалӕй ӕфхуӕрӕн дзурдтӕ нӕ кӕнуй». Не ’взаги рохтӕбӕл ку нӕ хуӕцӕн, уӕд уой туххӕй, гӕнӕн ес, ӕма иннетӕн зиан ӕрхӕсдзиан. Ӕма уӕд нӕ бон нӕбал уодзӕй Йегови цатури иуазгутӕ ун. (Бакӕсӕ Иакови 1:26.)

11. Фудкой кӕнун ци ӕй, удта инней фудкой ка кӕнуй ӕма ибӕл ка нӕ фӕсмон кӕнуй, уомӕ ци ӕнгъӕлмӕ кӕсуй?

¹¹ Псаломзаргӕнӕг куд загъта, уотемӕй Йегови иуазӕг «е ’взагӕй нӕ кӕнуй фудкой». Фудкой кӕнун ци ӕй? Е ӕй, адӕймаг еске туххӕй ӕргом мӕнгӕттӕ ку дзора ӕма ин уой туххӕй ӕ хуарз ном ку фехала. Адӕймаг еске фудкой ку кӕна ӕма ибӕл ку нӕ фӕсмон кӕна, уӕд уӕхӕн адӕймаги киристон ӕмбурдӕй рацох кӕнунцӕ (Йер. 17:10).

12, 13. Уотӕ куд рауайуй, ӕма не ’мбалӕй ӕфхуӕрӕн дзурдтӕ ракӕнӕн? (Кӕсӕ ма хузӕмӕ.)

¹² 15 псаломи 3 стихи ма уотӕ дӕр финст ӕй, ӕма, дан, Йегови иуазӕг «иннемӕн лӕгъуздзийнадӕ нӕ кӕнуй ӕма е ’мбалӕй ӕфхуӕрӕн дзурдтӕ нӕ кӕнуй». Цума уомӕн куд ес гӕнӕн, цӕмӕй не ’мбӕлттӕй ӕфхуӕрӕн дзурдтӕ кӕнӕн?

¹³ Хатгай ӕй нӕхуӕдтӕ лӕдӕргӕ дӕр нӕ бакӕнӕн, адӕймагӕн ӕ ном куд рафудконд кӕнӕн, уой. Уомӕн куд ес гӕнӕн? Райсӕн цалдӕр уавӕри: хуӕрӕ пионерӕй нӕбал лӕггадӕ кӕнуй; лӕг ӕма уосӕ Вефилӕй рандӕ  ’нцӕ; ӕнсувӕр хестӕр нӕлгоймагӕй кенӕ кӕстӕреуӕггӕнӕг ӕнсувӕрӕй нӕбал лӕггадӕ кӕнуй. Раст н’ адтайдӕ уотӕ дзорун: «Ӕвӕдзи, хабар гъе уой ӕма гъе уой туххӕй рауадӕй уотӕ», ӕма ма уобӕл иннети хӕццӕ дӕр дзорун. Махӕй арӕхдӕр бӕлвурдӕй нӕ фӕззонӕн, адӕймаг цӕхуӕндӕр унаффӕ цӕмӕн рахаста, уой. Куд ӕй зонӕн, уотемӕй Йегови иуазӕг «иннемӕн лӕгъуздзийнадӕ нӕ кӕнуй ӕма е ’мбалӕй ӕфхуӕрӕн дзурдтӕ нӕ кӕнуй».

ЙЕГОВӔЙ КА ТӔРСУЙ, УОНӔН КАДӔ КӔНТӔ

14. Йегови ӕмбӕлтти бон куд ӕй исбӕрӕг кӕнун, адӕймаг «нецӕййаг» ке ӕй? Ба ’й лӕдӕрун кӕнӕ.

¹⁴ 15 псаломи 4 стихи финст ӕй Йегови ӕмбалӕн ӕ цӕсти ӕгадӕ ке ӕй «нецӕййаг адӕймаг». Цума ке бон ӕй уотӕ зӕгъун, аци адӕймаг нецӕййаг ӕй, зӕгъгӕ? Еци гъуддаги нӕ нӕхе сӕризундбӕл ӕма не ’нкъарӕнтӕбӕл нӕ зӕрдӕ дарун нӕ гъӕуй, уомӕн ӕма мах ӕнӕнхӕст ан. Уомӕ гӕсгӕ, кедӕрти хӕццӕ ӕнцонтӕй фӕффедауӕн, кӕмӕдӕр ба мӕстгун фӕккӕнӕн. Мадта ӕрмӕстдӕр Йеговӕн ес уӕхӕн барӕ, цӕмӕй адӕймагӕй зӕгъа, айӕ нецӕййаг ӕй, зӕгъгӕ, ӕма си ’хе еуварс дарун гъӕуй (1 Кор. 5:11). Уӕхӕн адӕнмӕ хаунцӕ, сӕ тӕрегъӕдтӕбӕл ка не ’рфӕсмон кӕнуй, етӕ, удта ма нин нӕ дин ка нӕ нимайуй ӕма нин Йегови хӕццӕ ци лимӕндзийнадӕ ес, уой фехалунбӕл ка архайуй, етӕ (Ӕмб. 13:20).

15. «Йеговӕй ка тӕрсуй», уонӕн ке кадӕ кӕнӕн, уой нӕ бон куд ӕй бавдесун?

¹⁵ Уой фӕсте 15 псаломи 4 стихи финст ӕй, «Йеговӕй ка тӕрсуй», уонӕн кадӕ кӕнун ке гъӕуй. Уомӕ гӕсгӕ мах фӕндуй, цӕмӕй Йеговӕ е ’мбӕлттӕбӕл ке нимайуй, уонӕмӕ хӕларзӕрдӕ уӕн ӕма сӕ нимайӕн. Е цӕмӕй бӕрӕг уодзӕй? (Ром. 12:10). 4 стихи идарддӕр финст ӕй, Йегови иуазӕг «ӕ соми ӕхецӕн зиан ку хӕсса, уӕд дӕр ӕ дзурд ке нӕ раййевдзӕй». Ци дзурд равардтан, уой ку нӕ исӕнхӕст кӕнӕн, уӕд уомӕй, гӕнӕн ес, ӕма кӕмӕндӕр ӕ зӕрдӕ фӕрресун кӕнӕн (Матф. 5:37). Йеговӕ е ’мбӕлттӕй агоруй, сӕ цардӕмбалӕн ци дзурд равардтонцӕ, уой ке ӕнхӕст кӕндзӕнцӕ. Уомӕй уӕлдай ма ин ӕхцӕуӕн фӕууй, ниййергутӕ дӕр сӕ сувӕллӕнттӕн зӕрдӕ цӕмӕй байвӕрунцӕ, уой ку исӕнхӕст кӕнунцӕ. Кӕд Йегови ӕма адӕни уарзӕн, уӕд, ци дзурд раттӕн, уомӕ уӕлӕнгай цӕстӕй некӕд кӕсдзиан.

16. Йегови ӕмбӕлттӕн ма никкидӕр нӕ бон куд ӕй кадӕ кӕнун?

¹⁶ Уомӕй уӕлдай ма нӕ бон ӕй Хуцауи ӕмбӕлттӕн кадӕ кӕнун иуазӕгуарзон ӕма рӕдау ку уӕн, уӕд (Ром. 12:13). Хуарз ӕй нӕ рӕстӕг хуӕртӕ ӕма ӕнсувӕрти хӕццӕ ку ферветӕн ӕмбурди разӕй, ӕмбурди фӕсте, удта ма игъосун кӕнгӕй дӕр. Фал айдагъ е фагӕ нӕй. Ӕнӕуой дӕр ма ескӕми нӕ рӕстӕг сӕ хӕццӕ ку ’рветӕн, уӕд нин е ӕнхус кӕндзӕй, цӕмӕй сӕ хӕццӕ дӕр ӕма Йегови хӕццӕ дӕр хъӕбӕрдӕр балимӕн уӕн. Удта ма иуазӕгуарзон ку уӕн, уӕд уотемӕй нӕ Хуцауи фӕнздзиан.

ӔХЦАУАРЗАГӔ МА УОТӔ

17. 15 псаломи ӕхцай кой цӕмӕн цӕуй?

¹⁷ Йегови иуазӕг «ӕфстау проценттӕбӕл нӕ дӕттуй ӕма ӕнӕфуд адӕймаги фӕффудгин кӕнуни туххӕй гӕртан нӕ есуй» (Пс. 15:5). Аци цубур Псаломи ӕхцай кой цӕмӕн цӕуй? Уомӕн ӕма адӕймаг ӕхцабӕл ӕгӕр берӕ сагъӕс кӕнун ку райдайа, уӕд ин адӕнӕй дӕр ӕма ма Хуцауӕй дӕр сӕйрагдӕр исуодзӕнцӕ (1 Тим. 6:10). Рагон Израили еуӕй-еуетӕ устур проценттӕ истонцӕ, мӕгур ка адтӕй, уонӕй, ӕма сӕбӕл уотемӕй ӕхца кустонцӕ. Уотӕ дӕр ма адтӕй, ӕма тӕрхонгӕнгутӕ гӕртӕнттӕ райсиуонцӕ, уой фӕсте ба ӕнӕфуд адӕймаги фӕффудгин кӕниуонцӕ. Уӕхӕн гъуддӕгтӕй Йеговӕ е ’сӕфт уинуй! (Йез. 22:12).

18. Цӕхуӕн фарстатӕ нин банхус кӕндзӕнцӕ расагъӕс кӕнун, ӕхцамӕ цӕхуӕн цӕстӕй кӕсӕн, уобӕл? (Дзиуиттӕгтӕмӕ 13:5).

¹⁸ Хуарз уайдӕ расагъӕс кӕнун, ӕхцамӕ  цӕхуӕн цӕстӕй кӕсӕн, уобӕл. Дӕхе бафӕрсӕ: «Ӕхцабӕл кенӕ, ӕхцайӕй балхӕнӕн ци ес, уобӕл куд арӕх фӕссагъӕс кӕнун? Мӕ ихӕс афойнадӕбӕл раттун ӕви мӕмӕ уотӕ фӕккӕсуй, ӕма мин кӕд адӕймаг ӕхца ӕфстау равардта, уӕд ӕй неци уотӕ гъӕунцӕ? Ӕхцай туххӕй сӕрбӕрзонд кенӕ къинди не ’сдӕн? Уотӕ мӕмӕ нӕ кӕсуй, ӕма кӕд хуӕрӕ кенӕ ӕнсувӕр хуарз ӕхца косунцӕ, уӕд син царди уомӕй сӕйрагдӕр неци ес? Уотӕ нӕ уайуй, ӕма гъӕздугути хӕццӕ лимӕн кӕнун, мӕгур ка ӕй, уонӕй ба мӕхе еуварс дарун?» Йеговӕ нин уӕхӕн кадӕ искодта, ӕма нӕ бон ӕй ӕ иуазгутӕ ун. Е нин зӕрдӕ байвардта, ке нӕ некӕд ниууадздзӕй. Ӕма цӕмӕй еци лимӕндзийнадӕ багъӕуай кӕнун нӕ бон исуа, уой туххӕй гъӕуама ӕхца уарзунӕй нӕхе хезӕн. (Бакӕсӕ Дзиуиттӕгтӕмӕ 13:5.)

ЙЕГОВӔ Е ’МБӔЛТТИ УАРЗУЙ

19. Йегови цӕмӕн фӕндуй, цӕмӕй, 15 псаломи куд финст ӕй, уотӕ архайӕн?

¹⁹ 15 псалом уӕхӕн дзурдтӕй фӕцӕй: «Уотӕ ка кӕнуй, е некӕд фӕккеудзӕй» (Пс. 15:5). Ами псаломзаргӕнӕг балӕдӕрун кодта, Йегови цӕмӕн фӕндуй, цӕмӕй аци псаломи куд финст ӕй, уотӕ архайӕн. Уомӕн ӕма уӕд амондгун уодзиан. Хуцау ци разамунд дӕттуй, уомӕй ку пайда кӕнӕн, уӕд ин ӕ хуарзӕнхӕ иссердзиан ӕма нӕ гъӕуай кӕндзӕй (Ис. 48:17).

20. Йегови иуазгутӕмӕ цӕхуӕн федӕн ӕнгъӕлмӕ кӕсуй?

²⁰ Йегови иуазгутӕмӕ дессаги федӕн ӕнгъӕлмӕ кӕсуй. Ӕ исӕрст лӕггадгӕнгутӕ цӕрдзӕнцӕ уӕлӕрвти, Киристе син бунӕттӕ кӕми ӕрцӕттӕ кодта, уоми (Иоан. 14:2). Зӕнхӕбӕл цӕруни нифс кӕмӕн ес, етӕ ба хъӕбӕр ӕнгъӕлмӕ кӕсунцӕ, Раргомади 21:3 финст дзурдтӕ кӕд исӕнхӕст уодзӕнцӕ, уомӕ. Йеговӕ не ’гасемӕндӕр устур кадӕ искодта – нӕ бон ӕй е ’мбӕлттӕ ун ӕма ин ӕносмӕ дӕр ӕ цатури лӕггадӕ кӕнун!