Зӕнхӕбӕл уойбӕрцӕ гъезӕмӕрттӕ цӕмӕн ес? Аци фарста беретӕн ӕнцойнӕ нӕ дӕттуй. Ӕвӕццӕгӕн ибӕл ду дӕр гъуди кодтай. Тугъдтӕлтӕ, мӕгурдзийнадӕ, ӕрдзон бӕллӕхтӕ мингай ӕнзти дӕргъи адӕмӕн гъезӕмӕрттӕ хӕссунцӕ. Зӕнхӕ идзаг ӕй цъамардзийнадӕй, адӕм сӕйунцӕ ӕма мӕлунцӕ. Евгъуд ӕнос адӕмӕн цӕйбӕрцӕ гъезӕмӕрттӕ ӕрхаста, уойбӕрцӕ некӕд. Ескӕд син кӕрон ӕрцӕудзӕй?

Хуцау хуарз ӕма о, хъӕбӕр рӕхги! Хуцауи Дзурд Библий финст ес: «Фудгӕнӕг нӕбал уодзӕй... Сабур адӕм ба зӕнхӕн хецау исуодзӕнцӕ, ӕма фарнӕй бафсӕддзӕнцӕ». Цӕйбӕрцӕ рӕстӕгмӕ? «Зӕнхӕ рӕстгӕнгути бауодзӕй, ӕма ибӕл цӕрдзӕнцӕ ӕностӕмӕ» (Псалом 37:10, 11, 29).

Хуцау фудӕнхӕ ӕма гъезӕмӕрттӕ ку фесафа, уӕд зӕнхӕй рауайдзӕй дзенет. Адӕм цӕрдзӕнцӕ ӕностӕмӕ ӕнӕнезӕй ӕма амондгунӕй. Хуцауи Дзурди финст ес: «[Хуцау] син ниссӕрфдзӕй сӕ цӕстисугтӕ, ӕма нӕбал уодзӕй нӕдӕр мӕлӕт, нӕдӕр маст, нӕдӕр гъарӕнгӕ, нӕдӕр рист» (Раргомадӕ 21:4).

Еци нӕуӕг дуйней ма мӕрдтӕ дӕр ӕгасгонд ӕрцӕудзӕнцӕ, цӕмӕй етӕ дӕр еци арфӕдзийнӕдтӕй исхайгин уонцӕ. «Райгас уодзӕнцӕ растгӕнгутӕ дӕр ӕма фудгӕнгутӕ дӕр» (Гъуддӕгтӕ 24:15). Гъеуомӕ гӕсгӕ Киристе загъта, ка ибӕл баууӕндтӕй, еци фудгӕнӕгӕн, зӕгъгӕ, ду мӕ хӕццӕ уодзӕнӕ дзенети (Лукай 23:43).

 Адӕми гъезӕмӕрттӕ цӕмӕй байдӕттонцӕ?

Кӕд Хуцаумӕ уӕхӕн хуарз фӕндӕ адтӕй адӕми туххӕй, уӕд гъезӕмӕрттӕ цӕмӕн бауагъта? Уотӕ берӕ рӕстӕг сӕмӕ ӕнцад цӕмӕн кӕсуй?

Хуцау Адам ӕма Еви искодта ӕнхӕст бауӕр ӕма зунди хӕццӕ. Е сӕ ӕрцӕрун кодта дзенетон дзӕхӕрадони ӕма син равартта, зӕрдӕ кӕмӕй ирадӕй, уӕхӕн куст. Библи зӕгъуй: «Хуцау ӕркастӕй, цидӕриддӕр искодта, уомӕ, ӕма алцидӕр адтӕй хъӕбӕр хуарз» (Райдайӕн 1:31). Адам ӕма Евӕ Хуцаумӕ ку байгъустайонцӕ, уӕд син райгурдайдӕ ӕнхӕст сувӕллӕнттӕ ӕма ӕгас зӕнхӕ дӕр иссайдӕ дзенет. Адӕм си цардайонцӕ амондгунӕй ӕностӕмӕ.

Хуцау Адам ӕма Еви искодта дессаги хузи – сӕ бон адтӕй сӕребарӕй унаффитӕ хӕссун. Етӕ ӕнӕзунд роботтӕ нӕ адтӕнцӕ. Сӕ амондгун цард кӕнгӕ адтӕй, еци лӕварӕй раст ку пайда кодтайонцӕ, гъома Хуцауи закъӕнттӕ ку ӕнхӕст кодтайонцӕ, уомӕй. Хуцау зӕгъуй: «Ӕз, Йеговӕ, дӕн дӕ Хуцау, пайда дин ци ӕй, уобӕл дӕ ка ахур кӕнуй, ци надбӕл дӕ гъӕуй цӕун, уобӕл дӕ ка кӕнуй» (Исай 48:17). Хуцаумӕ ку нӕ байгъустайонцӕ, уӕд сӕ е бӕллӕхмӕ ӕркодтайдӕ, уомӕн ӕма адӕм уотӕ конд нӕ ’нцӕ, цӕмӕй ӕнӕ Хуцауи разамундӕй ӕнтӕстгин уонцӕ. Библи зӕгъуй: «Зӕнхон адӕймагӕн ӕ над ӕхецӕй кӕнгӕ нӕй. Ӕ къахдзӕфтӕбӕл дӕр ӕ барӕ нӕ цӕуй» (Йереми 10:23).

Гъигагӕн, Адам ӕма Евӕмӕ уотӕ фӕккастӕй, ӕма Хуцаумӕ ку нӕ байгъосонцӕ, уӕддӕр сӕ цард хуарз уодзӕй. Фалӕ Хуцауи нихмӕ ку рацудӕнцӕ, уӕд сӕ Хуцау дӕр ниууагъта ӕма иссӕнцӕ ӕнӕнхӕст. Уоййадӕбӕл сӕ хъаурӕ сӕттун райдӕтта ӕма ӕппунфӕстаг базӕронд ӕнцӕ ӕма рамардӕнцӕ. Мах ба сӕ  байзайӕггӕгтӕ ке ан, уомӕ гӕсгӕ нӕ тоги рахастан ӕнӕнхӕстдзийнадӕ ӕма мӕлӕт (Ромӕгтӕмӕ 5:12).

Дзурддаг фарста – дун-дуйней хецау ка гъӕуама уа?

Хуцау Адам ӕма Еви цӕмӕн нӕ фесафта ӕма ӕндӕр нӕлгоймаг ӕма силгоймаги цӕмӕн не скодта? Уомӕн ӕма Хуцау дун-дуйней хецау ке ӕй, е исдзурддаг ӕй. Гъӕуама исбӕрӕг адтайдӕ еу гъуддаг, зӕгъгӕ, кӕмӕн ес барӕ дун-дуйнейӕн хецау ун ӕма ке хецаудзийнадӕ хуӕздӕр ӕй. Адӕмӕн ӕнӕ Хуцауи разамундӕй сӕ цард хуӕздӕр адтайдӕ? Хуцау адӕмӕн фагӕ рӕстӕг равартта ӕма сӕ сӕхе бӕрагӕ ниууагъта, цӕмӕй ӕппунфӕстаг исбӕрӕг адтайдӕ, Хуцауи хецаудзийнадӕ син хуӕздӕр ӕй ӕви сӕхе. Ци рӕстӕг син равартта, е фагӕ адтӕй, цӕмӕй ӕнӕ Хуцауи разамундӕй бавзурстайуонцӕ аллихузӕн хецауӕдтӕ ӕма динтӕ.

Ци рабӕрӕг ӕй? Истори ирдӕй ӕвдесуй, мингай ӕнзти дӕргъи адӕми гъезӕмӕрттӕ фулдӕрӕй-фулдӕр ке кодтонцӕ ӕма кӕнунцӕ. Адӕм евгъуд ӕноси бавзурстонцӕ, ка некӕд ма адтӕй, уӕхӕн гъезӕмӕрттӕ. Дуккаг дуйнейон тугъди мард ӕрцудӕй милиуангай адӕм. Еугурӕй ба евгъуд ӕноси тугъдтӕлти фӕммардӕй 100 милиуан адӕймагӕй фулдӕр. Кӕмидӕр цидӕр ӕрцудӕй, кедӕр рамардтонцӕ, кӕмӕдӕр бабурдӕнцӕ,– лӕг ӕндӕр неци фегъосдзӕй. Ӕгас дуйней дӕр наркотиктӕ ӕма ихӕлд гъуддӕгтӕбӕл ка бафтудӕй, етӕ фулдӕрӕй-фулдӕр кӕнунцӕ ӕма берӕ незти амӕттаг баунцӕ. Алли анз дӕр рамӕлуй 10 милиуан адӕймаги стонг ӕма незти фудӕй. Бийнонти цард ӕма хуӕрзӕгъдаудзийнадӕн некӕмибал аргъ кӕнунцӕ. Еунӕг хецауадӕн дӕр ӕ бон нӕй уавӕр исраст кӕнун, уӕлдайдӕр ба уотӕ бакӕнун, цӕмӕй адӕм зӕронд ма кӕнонцӕ, ма сӕйонцӕ ӕма ма мӕлонцӕ.

 Адӕмӕн сӕ уавӕр ӕй, Библи нӕ рӕстӕги туххӕй куддӕриддӕр загъта, раст гъеуӕхӕн. Уоми финст е, нуртӕккӕ мах ке цӕрӕн аци дуйнейӕн ӕ «фӕстаг бӕнтти» – «хъӕбӕр уӕззау рӕстӕгути». Дзурд ма си цӕуй, лӕгъуз ӕма фӕлевӕг адӕм фуддӕрӕй-фуддӕр ке кӕндзӕнцӕ (2 Тимофеймӕ 3:1–5, 13).

Тагъд гъезӕмӕрттӕ нӕбал уодзӕй

Дуйне ци уавӕри ӕй, уомӕй рабӕрӕг ӕй, адӕм ӕнӕ Хуцауи разамундӕй хуӕрзисӕфтмӕ ке ӕрцудӕнцӕ. Уомӕ гӕсгӕ тагъд Хуцау бартӕ ӕ къохмӕ райсдзӕй. Куд рабӕрӕг ӕй, уотемӕй ӕнӕ Хуцауи разамундӕй адӕмӕн некӕд неци бантӕсдзӕй. Ӕрмӕстдӕр Хуцауи разамунд ӕрхӕсдзӕй адӕмӕн сабурдзийнадӕ, амонд, ӕнӕнездзийнадӕ ӕма ӕносон цард. Федарӕй зӕгъӕн ес, Йеговӕ фудӕнхӕ ӕма адӕми гъезӕмӕрттӕмӕ берӕ ке нӕбал кӕсдзӕй. Мадта хъӕбӕр тагъд рӕстӕги Хуцау адӕми гъуддӕгтӕмӕ ӕркӕсдзӕй ӕма аци цъамар дуйней цардӕвӕрд фунук фестун кӕндзӕй.

Библий раги финст ӕрцудӕй: «Еци паддзӕхти [нури зӕнхон хецӕутти] рӕстӕг уӕларвон Хуцау исфедар кӕндзӕй, ка некӕдбал ниппурх уодзӕй, уӕхӕн паддзахадӕ [уӕлӕрвти]. [...] Е ниппурх кӕндзӕй еугур еци паддзахӕдтӕ [нури зӕнхон хецауӕдтӕ], ӕхуӕдӕг ба уодзӕй ӕностӕмӕ» (Данел 2:44). Йеговӕ ӕ уӕларвон Паддзахади фӕрци исбӕлвурд кӕндзӕй, ӕрмӕстдӕр е ке ӕй дун-дуйней Хецау ӕма Разамунддӕттӕг. Е ба ӕй Библий сӕйраг гъуди. «Фӕстаг бӕнттӕ» сӕйрагидӕр цӕмӕй бӕрӕг уодзӕнцӕ, уой туххӕй Киристе загъта: «Ӕма Хуцауи Паддзахади туххӕй аци хуарз хабар игъустгонд ӕрцӕудзӕй ӕгас зӕнхи цъарӕбӕл дӕр, цӕмӕй уой туххӕй еугур адӕмтӕ дӕр фегъосонцӕ. Ӕма уӕд ӕрцӕудзӕй кӕрон» (Матфейи 24:14).

 Кӕрон ку ’рцӕуа, уӕд ка фӕййервӕздзӕй? Библи дзуапп дӕттуй: «Растгӕнӕг адӕм цӕрдзӕнцӕ зӕнхӕбӕл, ӕнӕфау ка ’й, етӕ ибӕл байзайдзӕнцӕ. Фудгӕнгутӕ ба зӕнхӕй фесӕфдзӕнцӕ, мӕнгард адӕмӕй еу дӕр нӕбал байзайдзӕй» (Ӕмбесӕндтӕ 2:21, 22). Растгӕнгутӕ ӕнцӕ, Йегови фӕндон ка зонуй ӕма ’й ка ӕнхӕст кӕнуй, етӕ. Йесо Киристе загъта: «Цӕмӕй адӕймаг ӕностӕмӕ цӕра, уой туххӕй гъӕуама базона дӕу, еунӕг ӕцӕг Хуцауи, ӕма ду ке рарвистай, еци Йесо Киристей» (Иоанни 17:3). О, «дуйне фӕццӕуй ӕ кӕронмӕ... Хуцауи фӕндон ка ӕнхӕст кӕнуй, е ба цӕрдзӕй ӕностӕмӕ» (1 Иоанни 2:17).

Кӕд ӕндӕрхузи амунд нӕй, уӕд стихтӕ ист ӕнцӕ «Библи – Ног дунейы тӕлмац»-ӕй.